Ka Nupepa Kuokoa, Volume XXIV, Number 26, 27 June 1885 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

Ka Nupepa Kuokoa

No ka Makahiki,         $2.00

No Eono Mahina,        1.00

KUIKE KA RULA.

 

Poaono            Iune 27, 1885.

 

HAUOLI PU ME AU.

[REJOICE WITH ME]

G. H. NO.288.

 

1.

            Hauoli pu, na hoa o`u,

            Ua lanakila au la.

            Ua kuu a'e mai lalo mai,

            O ko Satana kaula.

 

            Cho. Hauoli pu, no'u no Iesu;

            Ko ia@a Kea kuu nani.

            E kai no au ia Kea a mau,

            A pii ae i ka lani:

 

            2.

            He oli ko'u, he oli hou.

            Ua hanau hou no au la.

            Na hewa o'u ua hala no,

            Ua kaiaia a pau la.

            Cho. Hauoli pu, &c.

            3.

            Ahewa mai ke Kanawai,

            A kau ka make mau la.

            Aloha mai Iesu maikai,

            A hookuu ia au la.

            Cho. Hauoli pu, &c.

            4.

            E hai no au mai o a o

            I ko Iesu aloha.

            A eia ka'u, e hahai mau

            I kana mau kauoha.

            Cho. Hauoli pu, &c.

           

            Hawaii.

 

Haawina Kula Sabati,

            Haawina Kula Sabati, III, Iulai 19, 1885. Kumuhana, Omeri me Ahaba; Pauku Baibala, i Na 'Lii, 16:23-34.

            I ke kanakolu kumamakahi o ka makahiki o Asa ke alii o I@da hoomaka ae la o Omeri i kona alii ana maluna o ka Iseraela, i na makahiki he umikumamalua: aono makahiki i alii ai oia ma Tireza.

            24 Kuai lilo mai la oia me Semera, i ka puu Samaria, i na talena kala elua, a kukulu ae la maluna o ka puu, a kapa ae i ka inoa o ke kulanakauhale ana i hana'i, o Samaria, mamuli o ka inoa o Semera, ka haku aina o ka puu.

            25 Aka, ua hana hewa ae la o Omeri imua o na maka o Iehova, a hoopakela aku i kona hewa mamua o ka poe a pau mamua ona.

            26 No ka mea, ua hele ae la oia ma na aoao a pau o Iereboama ke keiki a Nebata, a me kona hewa i hoolilo ai oia i ka Iseraela e lawehale, e hoonaukiuki ia Iehova ke Akua o ka Iseraela ma ko lakou mau mea lapuwale;

            27 A o na oihana e ae a Omeri i hana'i a me ka ikaika ana i hoike ai, aole anei ia i kak@uia ma ka buke oihana o na alii o ka Iseraela.

            28 A hiamoe iho la o Omeri me kona mau makua ma Samaria, a ua alii ae la o Ahaba kana keiki ma kona hakahaka.

            29 Hoomaka ae la o Ahaba ke keiki a Omeri i kona alii ana maluna o ka Iseraela i ke kanakolu kummawalu o ka makahiki o Asa ke alii o Iuda; a ua alii ae la o Ahaba ke keiki a Omeri maluna o ka Iseraela ma Samaria i na makahiki he iwakalua kumamalua.

            30 Hoopakela ae la o Ahaba ke keiki a Omeri i ka hana hewa imua o na maka o Iehova mamua o ka poe a pau mamua ona.

            31 Eia hoi kekahi, me he mea la, he mea uuku nona ke hele ma na hewa o I@roboama ke keiki a Nebata, lawe iho la oia ia Iesebela ke kaikamahine a Elebaala ke alii o ko Sidoma, i wahine, a hele hoi ia e malama ia Baala, a hoomana ae la ia ia.

            32 Kukulu ae la oia i kuahu no Baala maloko o ka hale o Baala, ana i hana'i ma Samaria.

            33 Hana iho la o Ahaba i wahi e hoomana'i, a ua oi aku ko Ahaba hoonaukiuki ana ia Iehova ke Akua o ka Iseraela mamua o na alii a pau o ka Iseraela mamua ona.

            34 I kona mau la hoi, kukulu ae @a o Hiela no Betela ia Ieriko; a ia Abirama i kana hiapo i hoonoho ai oia i ke kumu, a ia Segoba kana keiki hope loa i kukulu ai oia i na pani; e like me ka Iehova olelo ana i olelo mai ai ma ka lima o Iosua ke keiki a Nuna.

            Pauku Gula, he hoopailua ia Iehova ka aoao o ka mea hewa. Sol. 15:9.

            Manao nui, mahuahua mau ka ino o ka mea hewa.

            Na Heluhelu La.

            Poakahi,          I N@lii, 15: 1-13.

            Poalua,            "           "           15: 16-34.

            Poakolu,          "           "           16: 1-10.

            Poaha              "           "           16: 15-34.

            Poalima,                      Ios. 6: 17-27.

            Poaono,                       Sol. 4: 14-27.

            Sabati.                         Mat. 3: 1-12.

            Mele, "E ka Uhane mana," p. 231.

            Pule, I hoopau ia ka hewa ma na aupuni.

 

            Na Ninau.

            Ehia makahiki a Rehoboama i alii ai? 17. Ehia a kana keiki? 1 NaLii, 15:2. Ua hahai anei oia mamu@ o kona makuakane? He kanaka kaua anei? 2 Oih. 'Lii, 14:1. He alii maikai anei? 2 Oih. 'Lii, 13:2-19.

            Owai ke alii mahope ona? 2 Oih. Lii, 14:1. He alii maikai anei? p. 2 Heaha kana hana? 2 Oih. Alii, 14:3-7. Ua maluhia anei ka aina malalo ona? I ke kue ana o Zera owai ka i lanakila? 14:12-15. Ua aha o Asa i kona makuahine? 2 Oih. 'Lii 15:16. No ke aha?

            Heaha ka hana naaupo ana i hana ai? 2 Oih. 'Lii, 16:2, 7. Heaha ka hope? Mau anei ka maluhia o ka aina? p. 9.

            Owai ke alii mahope iho? 2 Oih. 17:1. Ua pomaikai oia no ke aha? 17:3-6. A lilo oia i alii waiwai nui, a hanohano, heaha ka hana lapuwale ana i hana'i? 2 Oih Alii, 18:1. Ua aponoia anei? 19:2. Ua hoolohe anei o Iehosapata i ka olelo a ke kaula? Ua maikai anei kona alii ana ma ia hope iho a i kena make ana? 20:30:-32.

            Pomaikai anei ia aupuni ma ka noho ana inai o na alii maikai ia Iehova? Pehea hoi ma ke aupuni o ka Iseraela? Make o Iereboama, owai kona pani? 1 Na Alii, 15:2@. Loihi anei kona alii ana? Owai ka mea kipi i ke aupuni a kaili i ka noho alii? 15:28. Mahea kona alii ana? 15:33. Ua hahai oia ma ka hewa a wai? No ka hahai ole ia Iehova, heaha ka wanana no kona hale? 16:1-4.

            Owai ke alii mahope ona? 16:6. Owai ka i ala kue iaia? 16:9,10. Ua hooko ia anei ka olelo no ka ohana o Baala? 16:12, 13. Ehia la ko Zimeri alii ana? 16:15.

            Owai ka mea a kanaka i koho ai i alii? 16:16. Heaha ka hopena o Zimeri? 16:18. Ua hahai kekahi poe kanaka ia wai? 16:21. Owai ka i lanakila. 22. Ehia makahiki keia mahope o ka maheleia ana o ke aupuni? 50.

            Mahea o Tireza? Kokoke no i Sekema? Kuai o Omeri i ka puu hea? Heaha ke kumukuai? Ua like me $3,285.00 i keia wa. He wahi maikai anei ia? He loihi anei ka moolelo o keia alii? Heaha ka mea i hai ia mai nona? p. 25. Aole anei i lawa na hewa o na alii i hala? He mea mau anei ia ke hoomaka kekahi i ka hewa, e hoomau aku a mahuahua? 2 Tim. 3:13. Owai ka i ike mai i ke ano o kena mau hana? Heaha auanei ka pomaikai ina ua holomua ke aupuni, a waiwai, a ikaika paha, ke nele i ka maka'u ia Iehova? Nalo anei kekahi mea mai ke Akua mai? Sol. 15:3

            Heaha ka hewa a Iereboama? Ola anei kekahi nona iho wale no? He nui anei ka ino, a o ka maikai paha a ka mea hookahi e hana'i? Nawai e uku mai? Pehea? Ua oi anei ka hana hewa ana o kekahi, oia wale no; a o ke alakai ana paha ia hai iloko o ka hewa? Ua ike anei ia lahui i ka pono? Hewa anei lakou ke malama ole? Iak. 4:17. Pakele anei kanaka i keia wa, oiai ua mahuahua ka ike, ka malamalama, i ko kela wa? Ina manao kekahi e hoomahuahua i kona mau pono ma ka hana ana i na mea kue i ka ke Akua mau kanawai, e ko anei?

            He ikaika anei keia alii hewa i ka imi ana i na  mea e holo ai kona aupuni imua? p. 27. Mau anei ka lanakila o ia poe? Iob. 20:4, 5. Mahea ke kanu ia ana o Omeri? p. 28. Owai kana keiki? He alii kaulana anei o Ahaba? Ua like anei kona ano me ko Omeri? p. 30. Ua haalele ia Iehova, heaha kekahi hou aku ana i hana'i?

            Ua papa ia anei ka mare ana me na lahui hoomana ki@? Ua pono anei ia hana? 2 Cor. 6:14. Owai ka wahine a Ahaba? No hea? Ua kaulana anei ia wahi no ka hewa? Mat. 11:21. Heaha ke ano o Iesebela? Ua komo pu anei o Ahaba i ka hoomana kii? Owai ke Akua kii o ia lahui? Mahea ko Ahaba hana i hale no Baala? p. 32. Heaha ma ia hale? 2 Na 'Lii, 10:26, 17. He nui ani na kanaka o Baala malaila? 1 Na Lii, 18:19. A hiki i ka la a ke Akua i manao e luku aku, ua hiki anei i kekahi e pakele?

            Heaha ka Davida olelo ma Ha@. 1:1. 26:4,5. 101:7. Pehea hoi ka Solomona? Sol. 1:15. 4:14,15. 12:11. 13:20. 22:24, 25. Heaha ka Paulo? 1 Cor. 5:11. 15:@@. 2 Cor. 6:14-18.

            Owai ka mea i manao e kukulu hou ia Ieriko ia mau la? p. 34. Heaha ka olelo ma Iosua no ia mea? Ios. 6:26. Ua ko anei? Heaha ka Iereboama i kukulu ai ma Betela?

            I ka noho mau ana o ke kanaka iwaena o ka hewa, aole anei e pili mai ana? Heaha ke ano o na hoa kupono? Hiki anei i kekahi ke lawelawe i ka @anahu me ka paumaele ole o kora lima? Hiki anei e lalau i ke ahi a wela ole? Hiki anei e nana mau i ka hewa, a launa me ka poe hewa, a mau ka maemae o ka naau?

            Mele, "E ke Akua ola," p. 289.          

            Pule, I ano hou na alii a pau.

 

            Ke hoike ia aku nei, ua hoonoho ia e na paahana na Haawina Kula Sabati mua no laua na la like (12) i kulike ai me ke kope i hoounaia mai i o ko makou keena nei. O ka pololei ma ia mau helu 5 a me 12. Nolaila aole makou i hewa ma ia mea.

 

HE MOOLELO LA NO KEKAHI

KANAKA KUAI RAMA.

Poakahi - Lawe au i ke kenikeni hope loa o Bila weluwelu no ka wiseke.

Poalua - Hele mai Kale Pipa ka mea i hoohiki e haalele loa i ka ona, haawi au i ekolu mu rama ana.

Poakolu - Hele mai Dike kanaka naau po, pupule ke inu i hookahi kiaha. Kuai au iaia i hookahi kuata. Lohe au ua hele oia e pepehi i kana wahine a make.

Poaha - Noi ikaika mai ka wahine a Keoni ia'u me ka waimaka, e kuai ole au i ka rama i kana kane. Ae au. Kuai nae au iaia ma ia la no, i kahi rama, a ona oia a hana ino i na noho, e wawahi liilii ana, a e pepehi ana i na keiki, - ha! ha! ha! Business, business.

Poalima - Bila Kata, ua aie ia'u no ka rama. Aole ona dala. Lawe au i ke komo lima gula, me ka lole pahoehoe o kana wahne no ka aie o ke kane, a hoihoi aku au i ke kane me ka ona loa.

Poaono - Samu Kapa, inu rama ma ko'u hale. Ekolu inu ana, Papa mai kona makuakane ia'u, mai kuai hou i rama i kana keiki. Kahaha au, a olelo, ina loaa ole ka rama iaia maanei, loaa no ma kahi e,

Sabati - Pani au i ka puka alo o ko'u hale, Hamama nae ka puka kua, A kuai au i ka rama me ka waina i kekahi mau keiki, E hilahila ana lakou ke hai aku, I'll bet, ua oi ke dala i loaa ia'u ma keia la, mamua o ke dala mahina hou ma ka luakini.

            N.B. Ua mahalo nui ia paha ka'u hana, no ka mea, hele mai no na keonimana e kuai rama ma ko'u hale.

            Auwe! Ino ka'u mau hana ke kakau ia ma ka pepa. E pau ke kaku moolelo la.

            Ke ano no keia o ka poe i loaa na laikini e kuai rama. He mea ole na rula hoopololei. Pau i ka hakihakiia. Hookahi kausani dala i lilo i ka laikini. E malama ana anei ka ona i na rula e papa ana i kekahi mau mea? Aole paha. Aole ona lunaikehala. Ua kinai ia. Aole ana wahi hana aloha iki i kona hoa. He naau diabolo kona, minamina ole i na keiki, i na makuwahine i na kino, i na uhane, i na mea ilihune. A he pono anei ke hoopiha ia Hawaii nei me na laikni kuai lama?

            Auwe ka lahuikanaka Hawaii! Ua hiki mai paha kou hopena. Ua hookuu ia o Apoluona ke 'lii o ka lua hohonu, me ka piha i ka huhu no ka paa ana mamua. I'll make up no ka hookapu ia 'na o ke kuai rama i na kanaka Hawaii? mamua a loihi loa, ua pau ke kapu. E hamama ana kou lua. E alualu ana au i ke koena o kanaka Hawaii, a loaa e hoopaa i ke kaulahao a hoolei aku iloko o kou lua.

            E, Apoluona, u'oki kou kaena ana. Aole e lilo ana na kanaka Hawaii haipule ia oe. Ehiku paha kausani lakou aole lakou e ae e kukuli iho a hoomana ia oe.

            To the rescue. E ala na haipule Hawaii. E houhou aku ia Apoluona i na ihe make i make oia, a paa kona waha kaena. Na ke akua e hoolanakila.

            MINAMINA HAWAII.

 

E HOOMAEMAE I KA LUA

[CLEAN OUT THE WELL]

            He kanaka no Maine. Ua huli mai ma ko Iesu aoao. Hoike oia i ka oiaio o kona huli ana ma ka hoopololei ana i kana mau hana kekee, me kona mau hoalauna.

            He lua wai kona. Ka hoomaemae ana ia lua, oia kana hana mua. I ka hoomaemae ana, aia hoi, he mau kaulahao ekolu me kekahi mau mea e ae ka i loaa mai, na mea a na hoalauna i haohao ai no ka nalowale ana. Wikiwiki oia i ka hoihoi aku ia mau mea  A pela na mea e ae ana i lawe wale ai; ua pau i ka hoihoi aku i na ona.

            Nui paha ka poe i ae ua huli mai, aole nae lakou i nana iloko o kolakou mau lua wai. Aia iloko o na lua, o na pa holoholona, o na keena hale, o na pahu kekahi mau mea i lawe wale ia, i aihue ia paha. I akaka kou huli io ana mai, e hoihoi aku ia mea me ka ae aku @ kou hewa. He mau moa, he mau pipi, he mau puaa, he mau hipa, he mau lio, he mau buke, he mau lole, he mau mea paahana, kila, pahiolo, koi kahi, wili, dala paha: Ua lawe wale ia, me ka manao paha e hoihoi aku, aole nae i hoihoi aku. E huli oe, a loaa e hoihoi koke aku.

            A pehea ke loaa ole, ua nalowale loa paha, ua pau i ka ai ia, i ke kuaiia 'ku, a ua ino loa paha, ua nahaha? Ae, he pilikia ia. Aka, eia ka pono, e pani i mau mea like o ke kumukuai, me ka uku kuala pu.

            Nana i ka olelo a Zakaio; Luka 19:8. "Ina ua lawe au me ka hewa i ka kekahi o ka pa ha ka'u mea e uku aku ai iaia." Aka, he kaumaha paha ia ia oe, pilikia loa. Me ka uku panee kupono kau e hoihoi aku ai i kau i lawe wale ai.

            E hoomaemae i kou mau luawai. E hookaa i kou mau aie kahiko, o make e oe a hele aku ma ka puka o ka lani a kikeke a pane mai ka leo maloko, aole au i ike ia oe, aole i kaa kou mau aie, aole i hoihoi ia aku na mea au i lawe wale ai, a i aihue ai.

            Hilahila anei kekahi ke hoihoi aku i ka mea i aihuela? Ae, pela paha. Aka e noi aku oe i ka Haku e kokua ia oe, e hoolanakila ia oe maluna o ka hilahila. Ina aole e pale aku i ka hilahila, e hilahila auanei Iesu ia oe, a e hoole, aole oe e komo iloko o kona aupuni.

 

            E halawai ana ka ahahui kula Sabati o Maui Komohana ke hiki aku i ka la 4 o Iulai ma Honokohau. Nolaila, ke kono ia aku nei na lala a pau o ia aha, e akoakoa pau loa ae ma ia la.

            W. D. KELIIOKAMOKU.

 

Na p@@apale i heluheluia imua o ke Kula Hui o na Kahunapule, Iune 8, 1885.

O ke alakai maopopo anei ke Kauoha Hou no ke Kahunapule?

 

            He alakai lalau ole anei ia? He alakai lawa mau anei ia?

            Ina no na mea pili i kana oihana uhane, aohe mea hoole ia mau ninau; ae like na mea a pau me ka hoonani aku i ka lokomaikai o ko kakou Haku, no kona waiho ole i kana mau kauwa e haha wale a pohihihi no i ke ala e kai aku ai i na kanaka i ona la. Ma na mea uhane, he oiaio no ua hoomoakaka ia mai nei ka kakou e manaoio ai a e ao aku ai hoi, me ke ala pu a kakou e alakai akuai i ka poe hahai pu me kakou.

            Ina nae peneia ka ninau: O ke Kauoha Hou, o ke alakai maopopo anei ia no ke kahunapule ma na mea pili i kana oihana kino? Aneane kanalua kekahi poe no ia mea, pela i ka nana aku, no ka mea, aole no i hahai pono kekahi poe i na rula a ka Haku a Iesu Kristo i waiho mai ai no kakou, me he la he malihini lakou ia mea! Ma kekahi mau mea pili oihana kahuna kino, lawelawe wale ke kahu ekalesia e like me kona manao, me he mea la aohe ona poo nana mai ka rula alakai nona ma kana oihana, me ke kauoha ole mai hoi "E hana kupuno i@na mea a pau me ka hoonohonoho pono ia hoi." 1 Kor. 14:40. A pela hoi ma ka pauku 33, "Aole na ke Akua mai ka uluaoa o ke kuikahi no kana;" a o ka manao nui no hoi ia ma ia mokuna holookoa, i pololei a kupono i ka rula Akua, na mea a pau loa i pili i ka hoomana.

            Ina he oihana e, aole n@ e kanalua kekahi no ia mea. He rula ko ka loio, he rula paa no a luli ole, a mamuli o ia rula oia e hahai aku ai, a i ole he hoka no kona. Me ke pani hakahaka e hana ia nei na mea a pau pili i ka hookolokolo, aole hoi i ae iki ia e hana e ka loio mamuli o kona manao. E pili no ia i ka rula, o kana no ia e pono ai. A o ke kauka hoi, ua like no. He lapaau no kana, aole mamuli o kona naaupo a kuhihewa wale, mamuli no o na rula i pili i ka oihana lapaau, na rula hoi a ka poe naauao i imi a hoonohonoho ai i na han@@na i hala e aku la. Aia haalele kekahi i ua mau rula nei, a hanai ke kahuna lapaau i ka mai i laau kupono ole, a make ua mai nei iaia, o kona pilikia kanawai no ia. Aole no he oihana iwaena o kanjaka i nele i ka rula ole, a o ka mea hahai pono mamuli o ua mau rula nei, he mea akamai no ia i kana, oiai o ka mea malama ole i ua mau rula la, he hawawa no ia a oia mau no. A o ke kahunapule hoi he makaukau ka mea malama pono i na rula o kana oihana, oiai he hawawa a hemahema mau ka mea hele mamuli o kona makemake wale iho no. Aole ia he paahana i apono ia e ke Akua a hilhila ole e puunaue pono ana i ka olelo oiaio (2 Tim. 2:15) aole hoi e like me ke kahunapule a Paulo e kamailio nui nei ma ia mau episetole a elua.

            E nana kakou ea, pehea la ke kahunapule e haawi ana i kana awai i ka moremona, a kamailio hoi ua n oremona la i ke anaina i akoakoa mai e lohe i ka ke Akua? Pehea la hoi ka mea i hoikeia mai nei ma Mat. 15:14 no ka makapo e alakai ana i ka makapo? A ina hoi haawi ke kahu i ka hana ma ka awai a ma ka luakini paha i ka hoomaloka e ae a kamailio wale kela no ia mea ae, ia mea ae, mamuli o kona naauao iho, ku anei ia i ka rula a Iesu i kau mai ai? O ke kamailio wale o ke kanaka i hoohanu ole ia, o ka hoomana anei ia a ke Akua e kauoha mai nei? Aole loa no. O ka euanelio oia ka olelo maikai a Iesu i lawe mai ai mai ka lani mai no ke ola no ia o kanaka i make iloko o ka hewa, a oia wale no ka ke kahu mea pono e hoike aku ai i kanaka, ina paha ma kona waha ponoi, a ina paha ma ko hai.

            "Ua paa ko'u manao," wahi a Paulo, aole e hoike i kekahi mea e ae iwaena o oukou, ia Iesu Kristo wale no me kona ma ke kea." 1 Kor 2:2. A ma Gal. 1:8,9. "Ina paha e hai aku makou a o kekahi anela paha mai ka lani mai i euanelio e ae, aole o keia a makou e hai aku nei ia oukou e hoomainoino ia oia." Ua maopopo ea, aole loa he mea pono i ke kahu ekalesia a kahunapule paha ke haawi aku i kona awai a luakini paha i ka mea karistiano ole, a hiki ole hoi ke alakai i kanaka ma ke ala o ke ola. I kuu nana aku, o ka hehi maoli no ia i ka la Sabati, a o ke alakai pu no hoi i kanaka ilalo i ka po.

            A oia ano like no paha ka hoonoho ana i ka mea komo ole iloko o Iesu, i Peresidena a alakai paha o ka Hui Karistiano opio o kakou. O kekahi mea no ia wahi a ka lono, i nawaliwali ai a make loa no paha ua mau ahahui opio nei mawaena o na ekalesia o kakou. O ka mokuahana iwaena o na ekalesia, oia hoi, iwaena o ke aupuni o ke Akua, o kona @@@@@ @@ @@. Mat. 12:25. Pehea ia hoi ka launa ana o ka malamalama me ka @ou@, a e Kristo hoi me Be@@@@@? 2 Kor. 6:14.

            Eia hou aku no. Ina he oiaio ka mea i laulaha wale iwaena o kakou eia no ma kekahi mau ekalesia Hawaii, ua noho huikau ka poe pono me ka poe hewa ma ke ano oluolu no, a hoohaumia ia ke aupuni a Iesu i kuai ai me kona koko iho imua o ko ke ao, a pehea ke kahu o ua ekalesia nei ke ae ia e noho pu me lakou? Ke malama nei anei oia i ka Iesu i ao mai ai @a kakou ma ke Kauoha Hou? 1 Kor. 5:13, "e hoolei ia mea hewa mai o oukou aku." Ua maopopo ia kakou he haihai kana, aole ka malama. Malama nae paha e mea mai ua kahu nei he hiki ole ke hoomaemae i kona ekalesia no ka ae ole o na hoahanau, a pehea la ia i ko oukou manao? Nowai la ka ekalesia piha a piha hapanui i na manuahi me na inu rama?

            Mai puni kakou i ka inoa @ he ekalesia kela no Satana, a o ke kahu hoi he kahu ekalesia oia no Satana, ke hoomau oia i kona noho pu ana me ua poe haumia nei. E aho ka haalele, a pela no e hoike aku ai imua o ko ke ao nei a pau i kona kuleana ole me ka poe kumakaia mau i kona. Haku nana kakou i hoolapanai mai ka make mai.

            O ka ahaaina a ka Haku kekahi mea a'u i manao nui ai. He ano kikoola wale ae no ka malama ana o kekahi mau kahu i keia oihana laa, oiai aia no ma 1 Kor. 11:23-29 ka rula nona a moakaka lea, a pela hoi ma ka Buke Lawelima a kakou, aia no ma ka aoao he 35. Eia nae i kuu ike maka a i kuu lohe ana hoi, me he mea la, aole no he rula i kau@a mai no ua  oihana nei, a he mea hiki hoi i kela a i keia ke hana aku e like me kona makemake ma ia mea. A penei no kekahi:

            1. Aole ona heluhelu a hoike i ke kumu o ka malama ana i ua Ahaaina nei, ma iloko ae o ke Kauoha Hou.

            2. He pule pili ole ka pule hoalohaloha.

            3. Wawahi ole ka berena.

            4. Haawi wale i ke kiaha me ka hoalohaloha ole.

            5. Hana wikiwiki i pau koke no ka hana.

            Ehaeha ka naau ia hana ana pela, no ka mea, na ka Haku mai no keia Oihana Hoonaauao, a nana mai hoi na rula no ka malama ana. Ina na ke kanaka mai, aia no i kona manao, ke ano o ka malama ana. Eia nae, aole na ke kanaka na Iesu no, a ina e hoolalau wale kakou i ka malama ana, ua like ia i ka na na aku, me ka hoohenehene i ka mea nana mai keia oihana a kakou e minamina nui nei.

            Ea, e hahai kakou mamuli o ka rula i waihoia mai nei no kakou ma ke Kauoha Hou. O ka mea hookahi no ia e e pono ai.

            Malama nae paha i ka manao o kekahi poe, aole he mea ano nui keia a'u e paipai aku nei oia ka malama paa a mau i na rula no ka Oihana Kahu, pili i ka hoomana i kauohaia mai nei ma ke Kauoha Hou. Aole nae he oiaio ia manao. He lalau no.

            Ia'u e noho pu ana ma ke kauwahi me na hoahanau, e hooko i ka Iesu a ai pu i kana Ahaaina, aole o kana mai ka ehaeha iloko o'u i ka heluheluia mai he mau himeni pili ole, a i ka loheia hoi, he pule pili ole a ka ikea hoi, ka huikau ma ka lawelawe ana, a aneane ia he ahaaina e, aole o ka Karisto, a maona ole ka uhane. Aia kuhikuhi pu aku na pauku Kauoha Hou, na himeni, na pule, na olelo paipai, me ke pa a me ke kiaha io Iesu la, ua lawa pono a i ole ua hemahema io no a waiwai ole no hoi.

            Eia hoi, ina he mea pono ke kapae iki i keia wa ma ala maa mau, ae, mamuli aole e nele ka haalele loa i ka oihana ku i ka Iesu. Aole i haalele ka ekalesia Roma i ka la hookahi, i ke ao ana a ke Kauoha Hou, a lilo loa mamuli o ka hana e, ku ole hoi i ka Hoomana Karistiano. He nee liilii kona ma kinohi mai ka pololei ae. O ka helehewa, he mea holo wale ia a ulu wale hoi na hewa a pau, e like me ka pipiwai ma ka auwala loi, aole o ka mahi kana mea e pono ai; oiai hoi o ka pono oia ka i malamia me ka minaminu a me ka makaala mau.

            Ea, e pipili no kakou i ka Iesu, i ke poo nui o ka ekalesia, a e pomaikai auanei kakou, a e pomaikai pu no hoi na mea a pau e noho nei malalo iho o ka mea a kakou e ao aku nei. Mai noho a hoopoina ia Dan. 12:3. "O ka poe naauao, e alohilohi auanei lakou me he malamalama la ma ke aouli; a o na mea hoohuli i ka lehulehu ma ka pono e like me ka hoku ia ao aku ia ao aku."

 

WAI! WAI!!

            Ke kauohaia aku nei ka poe a pau he pono hookahekahe wai ko lakou, mai keia la aku, o ka manawa hookahekahe wale on i aeia oia na hora mai ka 6 a ka 8 A.M., a mai ka hora 4 a i ka 6 P.M; aole ma na manawa e ae.

            CHAS. B. WILSON,

 

C BREWER & CO. (Burua Ma.)

            Ua makemake ia ka poe mea ILI KAO MALOO  a me na ILI BIBI, a pela hoi me na ILI MIKO o na ano a pau, e kuai mai i ko lakou mau ILI me makou, a e haawi no makou i ke KUMUKUAI KIEKIE LOA o ko kakou Makeke.

            tf.

 

NA HOOLAHA KUMAU.

 

HALEPAI O THOS. G. THRUM

 

O KA NUPEPA

 

SATURDAY PRESS me KUOKOA

 

ALANUI KALEPA, HONOLULU

           

Malaila e @uia ai na ano a pau o @@

 

BUKE,

            HOIKE O NA KULA.

            HOIKE A NA KOMITE,

            NA HAAWINA KULA SABATI,

            PAPA KUHIKUHI O NA ANO A PAU,

            HOOLAHA NUNUI A LIILII,

            BALOTA, LIPINE PAPALE,

            TIKETA, WAHI LETA,

            BILA PAI HAKAHKA

            HOOLAHA KUDALA,

            &c. &c. &c.

 

Iloko o ka wa pokole a me ka auhau haahaa.

 

A ma ka halekuai o THOS. G. THRUM ma ALANUI PAPU, e loaa ai na

            Kalana kakau o na ano a pau,

            Wahi Leta                   "           "           "

            Inika                            "           "           "

            Penikala                       "           "           "

           

            Mea Hoopipili, buke hoomanao,

            Peni gula a me kumu gula,

            Kii, a me na laau,

            Buke kii o ka ohana,

            Buke kii a na keiki,

            Na mea paani a na keiki,

            Kaa a na keiki,

            Kaa huila lua o na opio.

A he Agena no ke ana lole pepa o na Keiki a me na wahine

 

No ka hoailona ana i na lole me na inoa ponoi e hookoia na kauoha a pau no na papa inoa ke waihoia ma keia halekuai me ka uku pu o ka papa inoa i makemakeia. Uku no ka inoa hookahi me ka inika a me ka hulu, $1,50 ina ma ka papa inoa keleawe, a ina ma ka papa inoa dala, $2.

            O na kauoha pau mai na mokupuni e hookoia ina e hoouna pu ia mai me ke dala a me ka moakaka pono o na hoakaka ana.

            THOS. G. THRUM

 

M THOMPSON, [KAMIKANA]

HE LOIO A KOKUA MA KE KANAWAI

            Keena hana maluna o ka Hale Pohaku o Kamapela. (Campbell's Block,) Rumi helu 8 me 9. Puka komo e huli pono la i ke Alanui Kalepa, Honolulu.

 

PAPA! PAPA!

 

AIA MA KAHI O

 

LEWERS & COOKE

(O LUI MA)

 

ma ke kahua kahiko ma alanui Papu a me Moi.

 

E loaa ai na

 

PAPA NOUAIKI.

 

a kela a me keia ano.

 

Na Pani Puka, Na Puka Aniani, Na Olepelepe, Na Pou, Na O-a, Na Papa Hele, Na Papu Ku, A me na Papa Moe nui loa

 

Na Pili o na Hale o na Ano a Pau.

 

Na Pepa Hoonani, Na Pena o na Wai e pau Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano Na Aila Hoomaloo, he lehulehu wale, Na Aila e ae o na ano a pau.

 

NA WAI VANIKI

 

A ME NA

 

WAI HOOHINUHINU NANI

 

O NA ANO A PAU LOA.

 

NA BALAKI ANO NUI WALE.

 

A ke hai ia aku nei ka lono i na Makamaka a pau, ua makaukau keia mau Makamaka o oukou e hoolawe aku ma na mea a pau e pili ana ma ka laua oihana

 

NO KA

 

UKU HAAHAA LOA.

 

E like me ka mea e holo ana mawaena o LAUA a me ka MEA KUAI.

 

E HELE MAI E WAE NO OUKOU.

 

NA HOOLAHA KUMAU

 

KAKELA & KUKE

 

E laa na pahiolo, koi hole, hamale, koi nui a me liilii, kila, wili puaa, rula, apuapu, k@@ o na an@ a pau, kala kaa, hao hoopaa pu@@

 

pohaku hoana, kepa, lei ilio, kaula hao ilio, pahi, upa, pahi @@ a ai, kalapu, kope hulu, puiupulu, oepa @ lakala, lina hao, ami, keehi, a me @@@@@

 

KAULA OPU

 

Palau o na ano a pau, Oo, ho, kopala, p@ kipi kua, hao kope, au @@ @@ a aku, kua bipi, lei bipi, kaula hao bipi, uwea pa, uwea keleawe, hao @@@ piula, kaa palala, ipuhao, ipu @@

 

            PA PALAI MAKAU ME KE AH@

 

Ili wai, papa holoi, kopa ala, kaula kuaina, hu'akai, ehi wawae, hulu pena, a pela aku.

 

Pena wali, kini nui a me liilii o @ ano a pau, me ka pepa kuhikuhi, pena keokeo, aila pena, aila hoomaloo, vaniki kaa, a me vaniki moe,

 

PENA HOOMALOO

 

a me aniani hale

 

AILA MAHU, AILA MIKINI, AILA H@@@@@, AILA KAA, INIKA KAMAA

 

PAUDA, KUKAEPELE, KIAN@ PAUDA, UIKI IPUKUKUI O N@ ANO HE NUI A LEHULEHU

 

LOLE MAKEPONO

 

@ laa na

 

AHINAHINA, KALAKOA, KEOKEO, LEPONALO, HULUMANU, UWE-WAHINE, KUI HUMUHUMU, A ME KA LOPI

 

Ke Kuih@ a loaa no ia n@@ kahi @

 

Kakela & Kuke

 

NA MEA PIULA,

 

Mikini Humuhumu

 

M@kini a WHEELER a me WILSON

 

MIKINI A WILCOX ME GIBB

 

NA MIKINI

REMINGTON

 

He nui loa na mea hao me na @@@@@ ae o na ano a pau aole hiki ke @@@ @ ia aku, hewa i ka wai na maka ke @

 

LAAU LAPAAU KAULANA LO@

A DR. JAYNE,

LAAU HOOMAEMAE KOKO

LAAU HOOPAU NAIO, LAA KUNU, PENIKILA, HUAAL@ PAAKAI, LAAU HOOPAA HI@

Me na Laau Hame a Pela 'ku.

 

KAKELA ME KUKE