Ka Nupepa Kuokoa, Volume XXIV, Number 34, 22 August 1885 — Page 4

This text was transcribed by:	L. A. Marchildon
This work is dedicated to:	Any Canadians calling Hawaii home...I'm so envious !!

Ka Nupepa Kuokoa

KE KILOHANA POOKELA NO KA LAHUI HAWAII.

Ka Nupepa Kuokoa

No Ka Makahiki, $2.00

Eono Mahina, 1.00.

--KUIKE KA RULA.—

Poaono Augate 22, 1885.

KE AWAWA HOOMAIKAI.

(THE VALLEY OF BLESSING.)

G. H. No. 196.

Eia au ma ke awawa e hoomaikai ai,

A eia pu Iesu me au,

A ma kona koko loaa ka maemae,

A pau ae la no kuu makau

Cho. Nee mai i ke awawa e hoomaikai ai,

A launa pu mai me Iesu,

A e apo, aloha, hookipa,

I ola a pomaikai pu.

Eia no ma ke awawa e hoomaikai ai,

Ka malu, ka lako a pau,

A he maha maikai no ka poe luhi nei,

A oli ka mea kanikau.

Cho. Nee mai, &c.

Eia no ma ke awawa e hoomaikai ai,

Ke alohaia'e e Iesu,

Ma ka lilo ana'e i alana mohai,

I kala ia'e la kakou.

Cho. Nee mai, &c.

Eia no ma ke awawa e hoomaikai ai,

Na mele hoonani onei,

A o o ko ka lani, a hooho mai,

O Iesu ke 'Lii e ola'i.

Cho. Nee mai, &c.

HAWAII

Haawina Kuia Sabati.

Haawina Kula Sabati, XI, Sept. 13, 1885. Kumuhana, Ke keiki a ka wahine o Sunema, Pauku Baibala, 2 Na Lii, 4: 28—37.

I AKU la ka wahine, Ua nonoi aku anei au i keikikane na kuu haku mai? aole anei au i olelo aku, Mai hoopunipuni mai oe ia'u?

29 Olelo aku la oia ia Gehazi, e kaei oe i kou puhaka, a e lawe i ko'u kookoo ma kou lima, a e hele ma kou ala: ina e halawai oe me kekahi kanaka, mai uwe aku oe ia ia; a ina e uwe mai kekahi ia oe, mai olelo aku oe ia ia; a kau aku oe i kuu kookoo maluna o ka maka o ke keiki

30 Olelo mai la ka makuwahine o ke keiki, Ma ke ola o Iehova, a ma ke ola o kou uhane, aole au e haalele ia oe. Ku ae la ia a hele aku mamuli ona.

31 A hele aku la o Gehazi imua o lakou, a kau aku la i ke kookoo maluna o ka maka o ke keiki; aka, aohe leo, aole hoi he lohe: a hoi aku la oia e halawai me ia, a olelo aku la iaia, i aku la, Aole i ala mai ke keiki.

32 A hiki aku la o Elisai iloko o ka hale, aia hoi, ua make ke keiki, a ua waihoia maluna o kona wahi moe.

33 Komo aku la ia maloko, a pani aku la i ka puka mahope o laua elua, a pule aku la ia Iehova.

34 Pii ae la ia a moe iho la maluna o ke keiki, o kona waha maluna o ko ia la waha, a o kona maka maluna o ko ia la maka, a me kona mau lima maluna o ko ia la mau lima, a kulou iho la ia maluna ona, a mahana mai la ka io o ke keiki.

35 A huli ae la ia, a holoholo iloko o ka hale, i o ia nei; a pii ae la a kulou maluna ona: a kih@ iho la ke keiki ehiku kihe ana, a kaakaa mai la na maka o ke keiki.

36 Kahea aku la oia ia Gehazi, i aku la, E hea aku i ka wahine no Sunema. Kahea aku la kela ia @; a hiki mai la ia io na la, i aku la o Elisai, E kaikai ae oe i kau keiki

37 A komo mai la ia maloko, a haule ma kona wawae, a kulou iho la ma ka honua, a kaikai ae la i kana keiki, a hele aku la iwaho.

Pauku Gula, Owau no ke al@ hou a@a a me ke ola. Io. 11: 25.

Manao nui, E hoola ia oukou i ka lokomaikai ma ka manaoio.

NA HELUHELU LA.

Poakahi, a Na Lii 2; 16—25.

Poalua, " " " 3: 4—27.

Paokolu, " " " 4: 1—17.

Poaha, " " " 4: 18—37.

Poalima, Hal. 10:3.

Poaono, Lu. 7: 1—18.

Saba@, Io. 11: 21—44.

Mele, "Aole mea paa ka lani wale no." H A. N p. 166.

Pule.

NA NINAU.

I ka hoi ana o Elisai i Ieriko, ua aha na haumana? 1 Na Lii, @: 16—18. Heaha ka pilikia o ia wahi? p. 19. Pehea ka hoopau ia ana? p. 10—22. I ko Elisai hele ana i Betela, owai ka i halawai me @ ma ke alanui? Ua aha lakou? Pehea ka hoopai @a ana? p. 24. Hele hou aku o Elia a ihea? p. 25. Mahea kona noho ana ma @a hope iho?

Owai ke alii ia wa? @ Na Lii, 3: 1. Owai ka i kue iaia? p. 5. Owai ka Iehorama i kii aku e kokua iaia? p 7. Heaha ka pilikia o ka pualikoa? p. 9. Heaha ke kauoha ia lakou? p. 16, 19.

Owai ka i lanakila? p. 21—26, Pehea? Heaha ka Elisai hana mana, i mea e kokua ai i ka wahine kane make? 4: 1—7. Ma ke kulanakauhale hea ko Elisai hele pinepine ana? p. 8. Nawai i kahea iaia e kipa ma kona hale? Heaha ka mea i maopopo no Elisai? p. 9. Heaha kana i manao ai e hana nona? p. 10. Ma ke aha e hoolako ai?

Owai ke kauwa a Elisai? p. 12. Heaha ka Elisai i noi ai na keia wahine, no kona hookipa lokomaikai iaia? p. 17. A nui ae la ua keiki la, ihea kona hele ana? p. 18. Heaha ka pilikia i kau mai maluna ona? I ka ike ana o kona makuakane ua loohia oia i ka mai, ua hoihoi ia ihea? p. 19. Loihi anei ka mai ana? A make oia, mahea ka waiho ia ana? p. 21

Ua hoala anei o Elia i kekahi keiki make mamua? 2 Na Lii, 17: 22. Ua hoala hou anei o Iesu i ka poe i make? Owai kekahi o lakou? Ua manao anei keia wahine ua hiki ia Elia e kokua iaia? Ua noho wale paha oia, ua ikaika paha ia i ka hana? Heaha kana i noi ai i kana kane? p. 22. Ua ha@ aku anei oia i ke kumu o kona hele ana? Ua aua anei kana kane? Hoole anei? Heaha ka i malama ia ma ka mahina-hou, a me ke Sabati? Nah. 28: 11—16. 10:10. Hal. 81:3.

Pe hea ka pane ana o ka wahine i kana kane? Heaha ke kauoha i kana kauwa? p. 24. Mahea o Elisai ia wa? p. 25. Ua ike anei oia i ka wahine e hele mai ana? Ua hoouna ia wai e halawai me ia? A e ninau pehea? Pehea ka ka wahine i ka ninau ia ana? p. 26. Ua ike anei o Elisai i ke kumu o kona hele ana e ike iaia ? p. 27.

Moe ka wahine imua ona me ke kaumaha, a pehea kana olelo? Heaha ka Elisai kauoha ia Gehazi? p. 28. Ua hoi anei ka wahine me ia? Kali oia no wai? Ua aha o Gehazi i ka hiki ana i ka hale? Hoi hou oia ia Elisai, me ka i ana pehea? p. 31.

I ka ike ana o Elisai ua make ke keiki, pehea kana hana? p. 33. Ia wai ke noi ana? He hana e ae anei kana? p. 34, 35. Ala hou mai anei ka mea i make? Kahea o Elisai ia wai? I ka ike ana o ka wahine ua ola hou kana keiki aloha, heaha ka hana mua? p. 37. Hoomaikai oia ia wai? Pono anei e hoomaikai i ka poe hana lokomaikai mai? He hana aloha anei ka hoopoina ana ia lakou?

Ua lohe hou anei kakou nona? 8: 1—6. Heaha ka Elisai i hoike aku iaia? Ua manaoio anei oia i ka olelo a Elisai? I hea kona hele ana? No na makahiki ehia?

Ua hoomanao mai anei ke Akua i ka wahine o Sunema, no kona hana lokomaikai ia Elisai? Heb. 6: 10.

Pehea ka hoao ana i kona manaoio? Ma keaha i ike ia'i kona manaoio? Ua ike pinepine ia anei ke kaumaha a me ka hauoli ma kahi hookahi? Ua haalele anei ke Akua i ka poe loohia i na pilikia, oiai ua malama no lakou iaia mamua? Heaha ka pule mana imua o ke Akua? Iak. 5: 16.

Ua kauoha ia anei i ka mea manaoio e lawelawe i ka hana i mea e ike ai'i kona manaoio?

Owai kekahi mau mea e ae i hoao ia ka manaoio? Ma ke aha i hoao ia ai ko Aberahama manaoio?

Owai ke ala hou ana a me ke ola? Ma ke aha e ola'i na mea a pau? Na wai mai ka makana o ke ola? Pomaikai anei na mea paulele i kekahi mea e ae?

Mele, "Iesu no ke Kahuhipa," H. A. N. p. 36.

Pule.

E AO OE O HINA.

E pii aku ana kekahi kanaka i kahi mauna kiekie me kona alakai. Hoopiipii ae oia ma kahi pahee. E poniuniu ana oia a ane hina, paa nae oia i ka lima o kona alakai. Alaila, lilo oia i ka noonoo ana no kekahi mauna e ae, me ke alakai e ae. Owai la ia mauna me ona alakai? Ke ao nei ka mauna, ka baibala ke alakai. Ua piha ke ao nei i na wahi pahee. E ao oe ka mea e hoopiipii ae ana o poniuniu a hina. A i ole oe e hina, e pili oe i ke alakai ka bailbala. E nana kakou i kekahi mau wahi pahee

1 Na halekuai. He kanaka kuai oe. E hoopiha oe i kou hale i na mea maikai, na lole maikai, na mea ai maikai, na mea inu maikai, i na pepa maikai. E hoole aku i ke komo ana o na meaino. Ma ke kuai ana, e kuai pono, e ana pono, e kaupaona pono, e hai polol@i i ke ano o kau mau mea kuai, mai hai hoopunipuni, mai kuai hoopunipuni. E nana i ke alakai. Oih. K. 19: 35, 36. Kanawailua 25: 13—15. Sol. 20: 10. Mika 6: 10—1@. E heluhelu a hilinai maluna o keia alakai o hele lalau oe a hina ma keia wahi pahee.

2 He wahi pahee ka haaheo. Ha kanaka ilihune oe. Makemake nae oe e hoohalike me ka poe waiwai. Kuai oe i na lole maikai, hana hoi-i hale maikai. No ka lawa ole o kau mau dala aie oe, a lilo kau aie ana i mea e pahee ai oea hina. Pehea oe e paa ai? E pili aku i ke alakai Rom. 13:8. 1 Tim. 6: 6—9. Heb. 13: 5.

3 Na hale lealea oia na wahi pahee. Na ha'e inu rama, na hale pili waiwai, me na kukini pili waiwai, na hale hulahula, hale hoopahupahu, na hale hookamakama. E ao o komo iloko a lilo i ka hoowalewale ia a poniuniu ke poo, a pahee a hina. Nui wale ka poe i hina ma keia mau wahi paheehee 1 lilo ka uhane. I ole oe e hina e noi aku i kou alakai e lalau a hoopaa ia oe. Nana ia Sol. 1: 10, 15, 22-23. 6: 20—26. 7: 24—27. Kek. 11:9.

Ua piha Hawaii i na wahi pahee. Nui na ui me na makua e hele noonoo ole ana ma ia mau wahi. Paapu ia mau wahi i ka poe i hina. Aloha ole ka poe i kokua i ka hoohina ana, o oukou na ona o na wahi e pahee ai a hina. Pehea ka loihi o ko oukou hoowalewale ana i na ai i na kakaka, i ka poe naaupo e komo iloko o ko oukou mau wahi e hoopahele ia ai? Pane anei oukou, aole makou i hookomo ia lakou, na lakou i komo wale e like me ko lakou makemake. A pakele anei oukou i ka hoahewa ia ana ma ia pane ana? Aole paha.

O oukou hoi ka poe e hele ana ma na wahi pahee, e wikiwiki e haalele ia mau wahi, oukou hoi ka poe i hina, mai hoomau i ka moe ana ilalo, e hoao e ala, a hiki ole e kahea aku i ke alakai nui ia Iesu e kokua. Kakou hoi ka poe i hina ole e kokua i ka hoala ana i ka poe i hina. A e ao hoi kakou o hina pu me lakou.

HAWAII.

KE ALA POLOLEI.

Ka baibala he rula kahiko ia, a oolea wahi a ke kanaka ui e ao ana i kekahi elemakule e huli i ka olelo a ke Akua ke makemake oia e ike i ka rula e ola'i. Nui na buke maikai e kuhikuhi ana i na mea e pono ai ka uhane, aole nae he oolea e like me ka baibala. Lalau ka elemakule i mau rula elua, ua kekee iki kekahi. Rula oia i mau lalani elua ma ia mau rula ma ka pepa, a haawi aku ia i ua ui nei. Nana ka ui ia pepa, a ninau, heaha ke ano o keia mau lalani? A pane oia, ke ike nei oe o kekahi lalani, aole ia he pololei, he kekee iki ae. Aia a kahakaha oe i ke ala e hele ai oe, mai kahakaha me ka rula kekee. Ke ano keia. Ka bailbala, oia ka rula pololei a oiaio. Na rula o na kanaka, he kekee ia. E lawe oe i ka baibala i rule e hele ai oe.

ELUA ALANUI. OWAI KOU?

Ma kekahi ahiahi, ua akoakoa ka poe ui ma kekahi hale, a e hula ana, a kekahi ui wahine, aole oia e hula pu ana. Ninau kekahi wahine i ka makuawahine o ia ui wahine hula ole, aole anei e hula ana kau kaikamahine? Pane oia, aole. A ninau hou ia, pehea la e hiki ai iaia ke noho ma keia ao. Ua lilo ia kaikamahine i wahine makua, a i wahine ikaika ma ka hana no ka aoao Karisetiano ma kekahi kulanakauhale nui. E na makuwahine e hanai ana, a e ao ana i ka oukou mau kaikamahine no ke aha? No ka Haku anei? No keia ao paha. Ina no keia ao, a lilo lakou i poe i mahalo ia no ke akamai i ka hula ana, a no ka mare ana me ka poe waiwai, a hanohano ka poe i lilo loa i na mea o keia ao, e noonoo i ka hopena.

E hoolohe i ka moolelo o kekahi makuwahine me kana kaikamahine. He naau noonoo ko ke kaikamahine, e makemake ana oia e huli ma ka pono, a e lilo i haumana na Iesu. Aole nae pela ka manao o ka makuwahine, he makuwahine lilo loa ia i ko keia ao, akeakea oia i ka hele ana o ke kaikamahine i na halawai euanelio, i ole oia e hele ia mau halawai, alakai oia iaia i na hale hula, a hoolako iaia i na lole nani i na pepeiao elua i na mea milimili he nui, i na buke e pili ana i na mea o keia ao. Imi no a mau ka makuwahine i na mea e pau ai ka manao o ke kaikamahine ma ko ka uhane. A ua pau no ia manao, a lilo ke kaikamahine i ko keia ao wale no.

Ma kekahi la ua loohia ke kaimahine i ka mai nui, olelo ke kanaka he mai make kona. Kauoha ke kaikamahine i kona makuwahine e lawe mai i kona mau lole nani me na mea nani ona e ae. Ua lawe ia mai a waiho imua ona, olelo ke kaikamahine i kona makuwahine, ka uku ia mau mea no ko'u uhane, a make iho la. Na ka makuwahine i pepehi i kona uhane.

Leta no Waimea, Hawaii.

O ka hana a ka Hope Makai Nui o ka apana o Kohala Hema, Hawaii, o ka pahupahu wale no i kela a me keia la; a me he la, ua hoolimalimaia paha oia e ke Aupuni no ke 40.00 dala o ka mahina, a o kana hana ia? Nui kela.

Ua haawi aku kekahi luna haawi palapala ae mare i kekahi mau mea mare. O ka nui o na makahiki o ke kane, he umikumamaha a oi; a ua kanalua ke kahunapule, aka, no ka pai ana aku no o ua luna haawi palapala nei ua ae ia, a mare ia iho la. Ua hana ia keia ma Waimea, Hawaii, imua o ka makua L. Laiana.

Ua holo aku nei ka Hope Makai Nui o ka apana o Hamakua. Hawaii, i oihana hou nana, i Luna Alanui no ia apana. Ana ole iho la no hoi la; oia nae hoi, aia ka pono o ka nui.

HUNAHUNA MEA HOU.

Ma ka holo ana aku nei o ka moku ahi Kinau ma ke ahiahi Poalua nei, na kau pu aku maluna ona ka ona o ka nupepa Pae Aina no ka makaikai ana i na hana o ka hoike kula Sabati o ka aina haaheo.

KE ALAKAI

Oihana Leta Hawaii.

Kuhikuhi no ka Oihana Leta Kuloko a me Kuwaho.

HELU 1, IULAI 1885.

1 O ka Hale Leta Nui ma Honolulu, eia ke ku nei ma ke kihi o na alanui Kalepa a me Betela. E hamama ana ka hale oihana i kela me keia la, mai ka hora 6:30 A. M. a hiki i ka hora 4 P. M. E paniia ana ma na la Kulaia Aupuni a pau.

2 Ma na la Sabati, e hamama ana ka Hale Leta mai ka hora 7 a hiki i ka hora 8 A. M.

3 Ma ka Poaono, e pani ia ana na puka ma ka hora 2 P. M. '

4 E hookomo koke mai i na leta me ka hikiwawe, i ka wa e makaukau ai.

5 E kakau i ka inoa a moakaka mawaho o ka wahi leta, me ka inoa o ka hale leta, ka apana a me ka mokupuni.

6 I ka mea wale no nona ka inoa mawaho o ka wahi leta e haawi ia ai, a i ole ia, i ka mea paha i hoomanaia eia e kii mai.

7 Mai hoouna i ke dala a waiwai ano makamae e ae maloko o ka eke leta, aia wale no ma ka bila kikoo hale leta a ma ka leta dala (registered letter) i ho opaa ia.

8 Ua papa loa ia ka hoouna ana maloko o ka eke leta kuloko a kuwaho paha, o na dala, waiwai makamae, dala gula a keokeo paha.

9 O na mea aniani hanaia, e like la me na maka aniani, na aniani nana hoailona, a pela aku, e opeia me ke akahele loa maloko o na pahu liilii Aole e kaa maluna o ka oihana leta na ahewa ia ke naha keia mau mea.

10 O na leta kiolaia mai, a i ole ia na pepa poo leta paha, no lakou na kono e halawai, e hookomo e ia mai iloko o ka Hale Leta o Honolulu, i 36 hora mamua ae o ka noho ana o ia halawai.

11 O na leta a pau e hoouna ia ana i na aina e, e kapili ia me na poo leta Hawaii wale no. E kakau i ka inoa o waho o ka wahi "me ka inika," aole me ka penikala, no ka mea, he pau wale no na kohu penikala a hiki ole ke hoomaopopo ia ka mea nona ka moa.

12 E kapili ia na poo leta ma ke kini akau o ka aoao maa e kakauia ai ka poe nona na leta. Aole i ae ia ke kapili ana i na poo leta ma ke kua o ka wahi leta, na nupepa a puolo paha.

13 O na poo leta i oki ia a elua a ekolu paha apana ma ke ano i poo leta no ka leta, ua hookapuia; a aole no hoi e hoouna ia na leta o ia ano.

14 O na poo leta a pau, ua manaoia lakou he dala maoli, a o ke kuai ana ia lakou ma ka hoaie, a oi ae a emi iho paha malalo o ka waiwai io, ua papa loa ia.

15 O na poo leta o na aina e aole i makemake ia maanei no ke kapili ana ma na leta, aole i malamaia ma kekahi o na hale leta no ke kuai aku.

16 O na kahakaha pakui wale iho a i paiia ma ka aoao e kakauia ai ka inoa o ka mea nana ka pepa poo leta e hoouna ia ana, ua keakea mai ia i ka hoouna ia ana aku.

17 I mea e maopopo lea ai ka hoouna ana o na leta kuloko o ka aina nei ma na eke leta, e kapili ia ke poo leta aole e emi iho malalo o elua keneta. Ina ua emi iho ke poo leta i kapiliia, alaila e uku papalua ana ka mea e loaa aku ai ka leta i ke koena aie poo leta, a e ukuia mamua o ka loaa ana aku o ka leta.

18 Ma na leta a me na buke a pau e hoouna ia ana ma ka eke leta, e kakau pu ia ka inoa o ka mea nana e hoouna ana mawaho o ka wahi leta a buke paha e like me ke kakauia ana maloko, no ka mea, i ka wa e kii ole ia mai ai, alaila ua hiki no ke hoihoi hou ia i ka mea nana i hoouna mai.

19 O ka mea lawe nupepa a buke nupepa paha i haalele i kona wahi noho mua a hale leta paha i maa i ka houna ia, he pono iaia ke hoike mua 'ku i ka luna pai nupepa no ia nee ana, a e hoouna ia no kona wahi hou, a e hoike pu mai hoi i ka Hale Leta nui no ia nee ana.

20 O na nupepa e hoouna ia ana i na aina e, he pono e kakau pu ia ka inoa o ka mea nana ka pepa maluna o ka nupepa ponoi a me ka wahi ae o waho.

21 O na Luna Pai nupepa a me na Agena hoouna mea hou e hoouna ana i na mea i paiia ma ka houluulu ana a akoakoa, ua hoomama mai ia i na kaana ana, me ka hikiwawe, ke wae pono ia a kaawale ko kele a me keia hale leta a mokupuni paha.

22 O na ninau, ina mai na luna leta a mai ka lehulehu mai paha, no na leta hoouna haule a nalowale paha, ina no loko nei a no waho paha, no na leta maa mau a no na leta dala paha i hoopaa ia, e ninau koke i ka Luna Leta Nui, a no na hoouna hewa a hiki pono ole paha, e hoike koke ia i ka wa e ike ia ai.

23 No na hoohalahala no ka uku kaulele hou ia iho, no ka lohi paha a no ka hoouna hewa ia paha o na leta, he pono ke hoouna pu ia mai "me ka wahi o waho a pale @aha o waho," me na mea a pau e pili ana no ia hoohalahala, a ina aole, aole no @ nana ia aku ana.

24 O na leta a me na nupepa i lawa ole ka uku poo leta e hoouna ia mai nei ma na eke leta o na aina e mai, ua kapaia "na leta auhauia" a me na nupepa. E ohi papaluaia ia koena o na poo leta i lawa ole, a na ka mea nana ka leta e uku mai.

25 O na wahi leta i paiia ka inoa mawaho, he oi aku kona maikai mamua o ka mea kakau lima ia, a ina ua pai pu ia me ka helu o ka pahu leta, e hikiwawe loa auanei me ka maluhia.

26 O na leta me na nupepa e hoouna ia mai ana i ko Honolulu nei poe, e kau pu ia ke alanui a me ka helu, a o kekahi wahi e ae paha i hoakakaia, oiai o ka manaolana o keia oihana e hoolala koke i mau hali leta no Honolulu nei, ke hiki i ka wa kupono.

27 E loaa no na pahu leta hoolimalima paa i ke ki ia ma ka Hale Leta Nui o Honolulu, ma ka ninau ana ae i ka puka aniani haawi let. He $1.50 ka uku hoolimalima o ka hapaha makahiki, a e uku koke ia ma ka pau ana o kela a me keia hapaha. No na ki nalowale a laka hakihaki paha, na ka mea hoolimalima pahu leta e uku na lilo o ka hana hou ana.

28 Ua hoolakoia he mau pahu leta hoolimalima ma na Hale Leta o Hilo, Wailuku a me Lahaina no ka uku he hookahi dala pakahi no ka hapaha makahiki.

29 I ka wa pono, e hoomakaukauia aku ana ona mau pahu leta ma na hale leta a puni ke Aupuni, a o ka poe a pau e loaa mau ana na leta a me na nupepa, e ike auanei lakou i ka maalahi o ka loaa ana o na pahu leta

30 Ke manao nei ka Oihana Leta Nui e hoopuka i na wahi leta "Kuikawa," a o ke poo leta e kapihia ai he 10 keneta no ka leta hookahi i oi ole aku ke kaumaha mamua o ka auneki. O na leta a pau o ia ano e komo mai ana ma ka Hale Leta o Honolulu, e hoouna koke ia me ka hakalia ole ma kahi noho a keena hana paha o ka mea nona ka inoa mawaho o ka wahi.

31 E kauia ana he elima keneta kaulele mawaho iho o na uku poo leta mau, no na leta hiki hope mai a pau mahope iho o ka hora i hoolahaia ai no ke pani ana i na eke leta e hoouna ia ana i na aina e. O na leta o ia ano, e hoounaia ana ma ka eke hiki hope, e waiho hoohamamaia ana no ka hookipa ana mai i na leta hiki hope i hoea ole mai i ka wa mau no ka hoouna ana ma na eke leta. Aohe mau poo leta kaulele hou iho no na pepa poo leta a nupepa paha.

32 E hoouna mai i na leta, na nupepa a me na puolo hilii i ka hale leta me na uku poo leta piha e lawa ai. E like me ka maa, e hele pololei ana a hiki i kahi i hoounaia ai me ka hikiwawe mamua ae o na leta e hoounaia ana mawaho ma kahi ano e ae. O ka nui o na hoohalahala no ka loaa pono ole o na leta mamuli no ia o ka hoounaia mawaho ae o na eke leta.

32a Ke ohiia nei na leta mai na pahu leta mai i kukuluia ma na alanui, ma hora 8 A. M. a ma ka hora 2 P. M., koe na la Sabati a me na la Kulaia Aupuni.

33 O na leta a pau e hookomo mau ia nei, e hoounaia ma na moku mua, koe na leta i kakauia ka moku e hoouna ai, a ma kekahi ala e ae mawaho ae.

34 No na nupepa, ina ua hoakoakoa ia a nui lawe mai, e hookomo ia ma ka puka aniani o na nupepa ma alanui Betela.

35 Ua papa loa ia na Luna o ka Hale Leta aole e nana i na olelo o loko o na pepa poo leta, a aole hoi e hoike wale i kekahi mau olelo i kakau ia, no ka poe e ae.

36 O na buke no lakou ka waiwai io i oi aku mamua o ka hookahi dala, ina e hoouna ia ana i Amerika Huipuia a i Europa paha, ua kau maluna o lakou na auhau o ka hale dute, aka, aole nae he mea mau ka hooukuia.

37 O ka hana wale no a ka Hale Leta, o ka haawi aku i na leta e like "me ke kuhikuhi." O na kaohi ana a me na hooponopono ana, he mau hana aloha wale no ia, i ae ia ke loaa i kahi wa mai na wa hana o ka oihana.

38 O na leta koi ole ia mai, e hoolaha ia ana i kela a me keia alua malama a e paa ia no eono malama, a ina aole kii ia mai, e hoihoi ia i kahi i hoounaia mai ai. Ina no loko iho nei ia mau leta, alaila e kau ia ma ka papa o na leta make, e weheia ana, a ina he wiwai ano nui, e hoihoi ia aku ana i ka mea nana ka leta i kakau, a ma aohe waiwai, e haehae ia ana.

39 Aole i ae ia kekahi Luna Leta a paahana paha o ka Hale Leta e hoike i kekahi mea e pili ana i ka leta i lawelawe ia e ia, aia wale no i ka mea nona ka leta.

40 E pani ia ana na puka o ka hale leta ma kela a me keia ku ana mai o na moku hali leta mai na aina e mai, e like ka loihi me ka loihi o ka manawa e kiolaia ai a kaana ana i na leta. O na nupepa, na puolo a me na leta o na kunaina, o lakou ka hope e wae ia ai.

(Aole i pau.)

JAMES M. MONSARRAT.

(MAUNAKEA.)

LOIO A HE KOKUA MA KE KANAWAI

He Luna Haelalo Palapala.

E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. @ no ka hoaie m@ ka moraki ma na waiwai @

KEENA HANA: alanui K@ tf

PAPA, PAPA

AIA MA KAHI O

LEWERS & COOKE,

(O LUI MA)

ma ke kahua kahiko ma alanui Papu a me Moi

E loaa ai na

PAPA NOUAIKI

o kela a me keia ano.

Na Pani Puka, Na Puka Aniani, Na Olepelepe, Na Pou, Na O-a, Na Papa Hele, Na Papa Ku,

A me na Papa Moe nui loa.

Na Pili o na Hale o na Ano a Pau.

Na Pepa Hoonani, Na Pena o na Wai a pau Na Kui mai ke Nui a ka Makalii, Na Ami Puka, Na Ami Puka Aniani, Na Ami o na ano a pau, Na Aila Pena, o kela me keia ano Na Aila Hoomaloo, he lehulehu wale, Na Aila e ae o na ano a pau.

NA WAI VANIKI

--A ME NA—

WAI HOOHINUHINU NANI!

O NA ANO A PAU LOA

NA BALAKI ANO NUI WALE.

A ke hai ia aku nei ka lono i na Makamaka pau, ua makaukau keia mau Makamaka o oukou e hoolawa aku ma na mea a pau e pili ana ma ka laua oihana

--NO KA—

UKU HAAHAA LOA.

E like me ka mea e holo ana mawaena o

LAUA a me ka MEA KUAI.

HELE MAIEWAE NO OUKOU.

HALEPAI O THOS. G. THRUM

--O KA NUPEPA—

SATURDAY PRESS m@ KUOKOA

ALANUI KALEPA, HONOLULU

Malaila e paila ai na ano a pau o na

BUKE,

HOIKE O NA KULA,

HOIKE A NA KOMITE,

NA HAAWINA KULA SABATI,

PAPA KUHIKUHI O NA ANO A PAU,

HOOLAHA NUNUI A LIILII,

HALO@A, LIPINE PAPALE,

TIKETA, WAHI LETA,

HILI PAI HAKA@

HOOLAHA KUDALA,

&c., &c., &c.

Iloko o ka @a pokole a me ka auhau haahaa.

A m@ ka halekuai o THOS. G. THRUM ma ALANUUI PAPU, e loaa ai na

Kalana kakau o na ano a pau,

Wahi Leta " " "

Inika " " "

Penikala " " "

Mea Hoopipili, buke hoomanao,

Peni gula a me kumu gula,

Kii, a me na laau,

@ke kii a na keiki,

Na mea paani a na keiki,

Kaa a na keiki,

Kaa huila lua o na opio,

A he Agena no ke ana lole pepa o na

Keiki a me na wahine

No ka hoailona ana i na lole me na moa ponoi e hookoia na kanoha a pau no na papa inoa ke waihoia ma keia halekuai me ka uku p@ o ka papa inoa i makemakeia. Uku no ka inoa hookahi me na inika a me ka hulu, $1.50 ina ma ka papa inoa keleawe, a ina ma ka papa inoa dala, $3.

O na kauoha pau mai na mokupuni e hookoia ina e hoouna p@ ia mai me ke dala a m@ ka moakaka pono o na hoakaka ana.

THOS. G. THRUM