Ka Nupepa Kuokoa, Volume XXIV, Number 37, 12 September 1885 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXIV, HELU 37. HONOLULU, POAONO, SEPATEMABA 12, 1885.

NA HELU A PAU, 2041.

 

NA HOOLAHA KUMAU.

 

W. R. KAKELA.                                           

LOIO A HE KOKUA MA KE KANAWAI.

He Luna Hooiaio Palapala.

tf.

 

A. ROSA. (AKONI.)                                    

LOIO A HE KOKUA MA KE KANAWAI.

He Luna Hooiaio Palapala.

KEENA HANA: Ma ke Keena Loio Kuhina.

tf.

 

S. B. DOLE.                                                  

LOIO, LOIO, LOIO.

He Luna Hooiaio Palapala.

KEENA HANA: Ma Alanui Kaahumanu.

 

DILLINGHAM & CO.                                 

Mau Mea Kuai Lako Hoo

Alanui Papu, Honolulu.

 

FRANK PAHIA.                                          

ANA AINA!  ANA AINA!

KEENA HANA: Aia ma alanui Moi, kokoke

loa i ka Uwapo o Hooliliamanu.         tf.

 

C. BREWER & CO. (BRURA MA.)                       

            Ua makemake ia ka poe mea ILI KAO MALOO a me na ILI BIBI, a pela hoi me na ILI MIKO o na ano a pau, e kuai mai i ko lakou mau ILI me makou, a e haawi no makou i ke KUMUKUAI KIEKIE LOA o ko makou Makeke.                                                                        tf

 

G. L. FITCH, (KAUKA PIKA.)                   

            Ua wehe ae nei au he Keena Lapaau ma Alanui Maunakea, Honolulu, Helu 70, a e loaa no au ma ke Keena ma ka hora 9 a ka hora 12 o ke kakahiaka o kela a me keia la, hora 5:30 a i ka hora 7:30 ahiahi.            2007-y

 

J. P. HANAAUMOE.                                               

He Loio a he Kokua ma ke Kanawai ma na

Aha Hoomalu a Apana o keia Aupuni.

E loaa no au ma Puna, Hawaii.

 

JNO. M. KEALOHA.                                   

LUNA Hooiaio Palapala Kepa Paahanu no ka apana o Kawaihau, Kauai.  He Agena no ka Hooiaio ana i na Palapala no ka apana o Kawaihau, Kauai.  He Komisina Palena Aina no ka apana o Kawaihau, Kauai, a he Luna Hooko Mare no ka Pae Aina holookoa.

 

CHAS. H. PULAA.                          

HE LOIO A HE KOKUA MA KE KANAWAI

A e loaa no au ma Honomakau, Kohala Akau, Hawaii.         2001-tf.

 

JOHN MAHIAI KANEAKUA.       

LOIO A HE KOKUA MA KE KANAWAI

MA NA AHA HOOKOLOKOLO A PAU O

KEIA AUPUNI.

Keena Hana ma Hon. E. Preston (loio Pelekane)

ma Alanui Kaahumanu, Honolulu

 

CECIL BROWN.                              

LOIO A HE KOKUA MA KE KANAWAI.

A he Agena Hooiaio Palapala no ka Mokupuni o Oahu

KEENA HANA: Helu 8 alanui Kaahumanu –

tf.

 

RICHARD F. BICKERTON.                       

(PEKEKONA.)

LOIO A HE KOKUA MA KE KANAWAI

KEENA HANA: Helu 27 alanui Kalepa.

tf.

 

W. A. KINI.                                      

LOIO, LOIO, LOIO.

KEENA HANA:  Helu 15 Alanui Kaahumanu, Honolulu.   tf.

 

W. C. AKANA (KALAUKI.)                      

He Mahele a Unuhi-olelo ma ka olelo Pake me ka olelo Hawaii.  Ua makaukau no hoi e hana i na Palapala Kuai a Hoolimalima a pela aku mawaena o na Pake a me na kanaka Hawaii.  E loaa no au ma ke Keena Helu 7, Alanui Moi, ma kahi e kokoke ana i ka uwapo o Hooliliamanu.

                                                                                                                                            2010-1y

 

WILDER & CO. (WAILA MA.)      

Mea kuai papa a me na lako kukulu hale

o na ano a pau, a me na pono a pau no ka hale.

Kihi Alanui Moiwahine me Papu.       tf.

 

WILLIAM AULD.                           

Luna Hooiaio Palapala Kepa Paahanu

no ka Apana o Kona.

KEENA HANA:  Ma ke Keena Wai o Honolulu.     tf

 

S. H. MEEKAPU.                             

Tela humuhumu lole.

HALE HANA: Helu 11 alanui Nuuanu.

 

M. THOMPSON, [KAMIKANA]    

HE LOIO A KOKUA MA KE KANAWAI

            Keena hana maluna o ka Hale Pohaku o Kamapela, (Campbell’s Block,) Rumi helu 8 me 9.  Puka komo e huli pono la i ke Alanui Kalepa, Honolulu.

 

HE MOOLELO NO KA NAITA

ALA-HUNA

KA WELI, A O KA POWA HOI, O KA ULULAAU ELEELE.

 

He Nanea i piha me na Hooipo ana a ke Aloha, a o na

mea Kupaianaha a Hoopahaohao hoi i hanaia, a me na

hana Weliweli i ikeia ma ia au Hookala Makakila.

 

                                                Auwe oe e ka mea i haulehia,

                                    I           loko o na palapu eha o ka maka-kila:

                                                A e kahe mai ana hoi kou koko—

                                                Aole e emo a pau kou oni ana!

                                                Aka! Ua lohe ia kou leo e—

                                                Na anela puuwai aloha!

 

            I KEIA wa i pane koke aku ai ke kaikamahine a ke kanaka uhai holoholona, me kona nana pono loa ana aku iloko o na maka uliuli o kona hoaloha, “e Elika, me he mea la i ko‘u manao, ua ano komohia loa aku ke aloha iloko o kou puuwai no keia kanaka.”

            “Aole, aole hoi pela e Elina,” ia Elika i pane aku ai, me ka mino aka iki ana iho, a pane hou aku la; “aka, he hiki ia‘u ke hoike ae, ua nana mai oia ia‘u me kona makemake nui no‘u.  A iloko hoi o ko‘u puuwai, ua olioli loa au i ko kaua hoopakele ana iaia; oiai, ina aole ia i loaa aku nei ia kaua, ina la ua make ia.”

            “A ua lealea pu no hoi me a‘u no kona ola ana, aka, ua oi aku ko‘u makemake ina aole kaua i lawe mai nei iaia malalo o ka malu o ka hale o ko‘u makuakane,” wahi a Elina.

            “Heaha hoi ke kumu o kou manao ana pela e Elina?”

            “Aohe no ka hoi ou ike?  Pehea la auanei ka loihi o ke kanaka elike me Tolibana—a na alii hoi e huli nui nei; me ka uku makana nui i haawiia no kona poo; ka weli hoi o ke Aupuni nei, a o ka enemi hoi o ka poe kaahele—a a pehea la auanei ka loihi o kona manawa e noho ai malalo o ka malumalu o ko‘u home nei, mamua o ka wa e loheia ai eia ia maanei?—a heaha la auanei ka mea e hana ia mai ana maluna o ka mea nana i malama, a hookipa hoi i ke Alii Powa o ka Ululaau  Eleele nei?”

            Mamua hoi o ka loaa ana ia Elika he manawa e pane mai ai, ua ike aku la laua i ka holo ana mai o Felita, ka ilio, me ke ano hoihoi, a e hoike mai ana hoi ia laua, he kamaaina a hiki mai.  Aole no hoi i liuliu iho, ua hoea io mai la ke kanaka uhai holoholona, a o ka mea hoi nona keia hale kahi a ke kanaka powa e hiolani mai nei, i ka olu hoi o na lapaau maiau ana a ke kauka wahine opio o ke kakela.

            Ua ane kokoke loa aku na makahiki o Maka Obana i ke kanalima; he kanaka o ke kulana ikaika ke hoike mai ana maluna ona, a he ano pahaahaa hoi; he kino nui a puipui kona, me kona mau poohiwi kihikihi; he mau lala oolea hoi, i hele na olona a wikani; he helehelena hoi kona o ke ano kuoo, me ka manao paa, a hoopono hoi,—he kanaka hoi ia i hiki ke hilinaiia aku maluna ona ma na ano a pau; he lauoho loloa haehuehu ke hoonani ana maluna iho o kona poo, me kona mau maka nunui o ka nanaina wiwo ole; a o kona hiohiona a pau, e hoike mai ana hoi ia, he kanaka koa oia malalo o na ano a pau.  He aahu hoi kona o ka poe noho kuahiwi; he mau lole ili holoholona o ke ano nani loa, a ma kona poo hoi he papale nui e luheluhe ana, i hanaia mai na veleveta palupalu loa mai, a o ke ano nui iho la keia o ka mea nona keia hale, oia hoi, ke kanaka uhai holoholona hihiu kaulana, Maka Obana, a o ka makuakane hoi o ka palupalu Elina.

            I ka wa i hiki aku ai o Maka Obana imua o na kaikamahine, ua haawi koke aku la ia i ke aloha ana i ke kaikamahine o ke kakela me kona kunou ana a me ka wehe pu ana ae i kona papale, a huli aku la hoi ia a apo aku la i kana Elina, me ka honi ana aku iaia ma kona mau papalina ohelohelo; a hoomaka aku la oia e noho aku maluna o kekahi noho, aka, ua puiwa ae la ia i kona ike ana aku i kekahi apana lole keokeo i paumaele ia me ke koko.

            I keia wa i pane koke aku ai kana milimili iaia, i kona ike ana aku i ka nana ino ana aku o kona makuakane i ka apana lole me ke ano puiwa, “e ko‘u papa aloha, e noho iho oe ilalo a e hahai aku au ia oe i na mea a pau e pili ana i kekahi mea ano nui i hana ia e maua ma keia la.

\           Ua hoolohe io mai la no kona makuakane iaia, a noho aku la oia maluna o kekahi noho, me ka hele ana aku hoi o Elina imua ona, e ku ana hoi ia i kekahi wa, a e noho ana hoi iluna o na uha

o kona makuakane i kekahi manawa, me ka hahai ana aku i ka moolelo—ua hai pokole aku la no hoi ia ma ke ano nui, mai ka manawa a laua i lohe ai i ka leo, a hiki i ko laua hoihoi ana mai i ke kanaka a waiho iluna o kahi moe iloko o ka hale.

            “E papa, aole no paha oe e hoahewa mai ana ia maua, i ko maua lawe ana mai iaia a waiho iloko o ka hale nei.  Aole no hoi he mea pono e ae a maua e hana ai.  O ke kanaka ua—“

            “A heaha la hoi ia, e hoomaikai ia oe e kuu lei aloha!  A heaha hoi kou mea e inoino ai o kou manao no ia mea!  E hoahewa aku ana anei au ia oe, no kou kokua ana ia Elika i ka hoopakele ana i ke kino kanaka mai ka make mai!”

            “Ae!—aka, e papa, aole paha oe i moeuhane mua no ka mea e waiho nei malalo o ka malu o kou hale nei?”

            I keia wa ua ku ino ae la ke kanaka uhai holoholona iluna me ke ano puiwa, a hapai ae la ia i kana keiki e noho ana maluna o kona uha, a kuu aku la ilalo, a pane ae la ia:

            “Ae!  Ke manao nei au, na ike au i ua mea la.  Ua lohe wale au i kona ike ia ana ma keia mau wahi, aka hoi, aole au i manao ua hoouna koke ia aku na koa mahope ona.  Ua hai mai no anei ia i kona inoa ia olua?”

            “Aole, aka, aole paha ia he mea paakiki ke koho aku,” wahi a Elina i kona makuakane.

            I keia manawa, ua holoholo ae la o Maka Obana mai kahi aoao a i kekahi aoao o ka lumi nui, me na manao kaumaha iloko ona.  A paa ae la kona lima ma kona lae, a ku iki iho la ia i kahi hookahi no kekahi wa, a pane aku la:

            “E noho malie olua maanei me ke makaala, a e hele ae hoi au e ike i ka olua malihini.  O kela eha ma ka aoao oia ka mea nui a‘u e nana ai.”

            I ka pau ana o kana kamailio ana, o kona huli aku la no ia a puka iwaho, a haalele iho la i na lede opio puuwai aloha iloko o ka lumi.

            Hoomaka aku la o Felita e uhai mahope ona, aka ua kahea aku la o Elika a lohe mai la no ia i ka leo o kona haku, a hoi mai la ia a moe iho la ma na wawae o kana mea i aloha nui ai.

            Ua ano liuliu loa keia hele ana o Maka Obana,—loihi hoi e manao inoino ai na kaikamahine, ina paha ua hiki mai kekahi mea e hoopilikia mai ana i ko lakou ola.  Mai ano makau loa io no paha o Elina, no ke ola o kona makuakane, ina aole ia i ike i ke kulana ikaika o Maka Obana, a me ka nawaliwali hoi o ka powa.

            He ano kue iki hoi ko Elika manao i ko Elina.  Ua manao no ia o ke kanaka a laua i hoopakele ai, he kanaka koa a wiwo ole hoi ia.  Ua hoihoi aku ia i kona ola me ia, a ua ike no hoi ia ma ka nana ana mai o ke kanaka poino iaia, aia he mau hiohiona e hoike mai ana, o ka hoomaikai nui iloko o kona puuwai no na mea nana i hoopakele iaia mai ka make mai.  A ina hoi e hiki mai ana na koa me ko lakou manao e lawe aku i ka lakou pio alaila e hooikaika ana no ia e pale aku me ka mana a pau e hiki ana iaia.  Aka, he makemake nui no hoi iloko ona.  He makemake nui e hoi mai ke kanaka uhai holoholona a hai mai, ina no ke ola la ua kanaka nei, a me ka oluolu maikai paha o kona mau eha.  A o kekahi mea no hoi ana e ake nui ana o ka hoi mai o Maka Obana a hai mai owai la ia, oiai, aole i pau kona ano kanalua o ke alii powa ia.

            Ua piha ka hapalua hora, a hoi mai la o Maka Obana.  Komo mai la ia iloko o ka lumi nui a noho ino iho la iluna o ka noho, me ka ekemu ole, me na helehelena o ke kaumaha a me ka ehaeha nui maluna ona.  A o Elina ka mea i hoopuka mua aku i ka ninau.

            “E papa,—pehea ua kanaka la?  Ua ike mai nei anei ia oe?”

            “Ae, ua ike aku nei au iaia e waiho ana me ka maikai loa, a aole hoi elike me ka‘u i manao wale ai.”  A huli ae la ia a ia Elika a pane aku la:

            “Ia oe hoi e ka lede opio o ke Kakela kaulana o Denakadofa, nou hoi kona aie nui ana no kona ola.  Aole no hoi o‘u manao he wahi waiwai iki kekahi no ke kii ana aku i kauka.  A ke hoomaikai aku nei hoi au ia oe, no kau mau lawelawe lapaau ana me ke akamai nui maluna ona.  No kau mea i hana ai no kela eha nui ma kona aoao, ua oi aku ia mamua o na akamai a pau a‘u i ike ai mamua—ua holopono loa na mea a pau i hana ia.  Ua hai mai no hoi oia ia‘u, i kou hou ponoi ana me kou manamana lima iloko o ka eha, me kou kanalua ole, a haalulu hoi, a me ka holopono loa o kau mau hana ana a pau maluna ona.  A ina aole e loaa ana kekahi ulia ano e ae, alaila e palekana ana oia.  Ua manao au ua loaa ia‘u ka mea kupono nana e nana iaia.”

            I keia wa, ua pa-e koke aku la ko Elina leo, “e papa, ua hai mai nei anei oia i kona inoa ia oe?  A ua—“

            Ma keia manawa ua hapai koke ae la kona makuakane i kona lima, me ka papa ana aku iaia.

            “Aole pono e hoopuka iki ia kona inoa maanei.  E hoomanao no hoi oe e kuu keiki—he kanaka ia aia iloko o ka pilikia, a i haawiia mai na kakou e malama; a e hana kakou i na mea a pau e hoopakele ai i kona ola.  A ia oe hoi e Elika,—ke nonoi aku nei au ia oe, i kou wa hoi e haalele mai ai i ka hale nei a hoi aku oe i ka inoa o ka mea au i kokua iho nei me kou lima aloha.  Oia hoi,—aole oe e hoopuka iki i kekahi wahi mea e pili ana nona, i kekahi mea e aku.  A e haawi mai ana anei oe i kou ae, me kou hoohiki pu ana mai?”   

            Ua pane aku la ka nohea o ke kakela; “ae, me ka maikai, a me ka oiaio.”

            Pane hou aku la o Maka Obana, me na ouli o ke kaumaha e kau ana maluna ona; “He oiaio! He oiaio!  Ae, ua haawi aku nei au i ko‘u ae ana imua ona, e noho ia malalo o ka malumalu o ko‘u hale nei, me ka pilikia ole, a aole hoi mea nana ia e hoike aku i kekahi o kona poe enemi.  Ua pono paha keia hana ana a‘u, aole paha, aka, ua waiho aku au ia i ka Mea Kiekie no ka hoapono ana mai.  No‘u iho, ua manao au ua pono loa keia hana ana a‘u.  A ma na ano a pau, ua aa au e ku mahope ona i na manawa a pau.”

            Mahope iho o ko Elika hai hou ana aku no kana olelo hoopaa me ke kanaka uhai holoholona, a manao ae la ia no ka hoi ana aku i kona home ma ke kakela.  Ma keia manawa no hoi, e aneane loa aku ana i ka wa e nalo aku ai ka malamalama mai ka ilihonua aku, a uhi mai hoi ka pouli maluna o ka aina a puni, a aole no paha ia e hiki aku ana i ke kakela mamua o ka poeleele loa ana.  Ua manao o Maka Obana e hoihoi pu aku iaia, aka, ua olelo mai la ke kauka wahine opio o ke Kakela Denakadofa, ua lawa no ia me kona kiai o Felita.

            A mamua hoi o kona huli ana aku e hoi, ua pane aku la ia: “Ina aole au e hiki mai i ka la apopo, alaila e hiki mai ana no au i kahi la aku, no ka ike ana i ke kanaka mai.  A oiai hoi, ua lilo kona ola ia‘u, nolaila, mai hai aku oe i kekahi mea e ano e ai, a e makau ai ia.”

            “Amene!  E hooiaio ia! pela i puana ae ai ke kanaka uhai holoholona me ka leo eehia.

            A huli hoi aku la ke kaikamahine puuwai aloha o ke Kakela Denakadofa no kona home, me kana ilio ma kona aoao.

            Me he mea la ua hawanawana ia mai la ia—i kona wa i hiki aku ai iloko o ka ululaau anoano ma ke ala e hiki aku ai i ke kakela, e kekahi mea i ike ole ia—he leo eehia hoi mailoko mai o na oawa mehameha—aia he mea ano nui e hiki mai ana—he ao eleele o ka ino ua kokoke loa e popoi mai maluna o kona kino laahia.  A ua ano ilihia iho la ia, a kokolo ae la ke anu maeele a puni kona kino lahilahi, aka, ua noonoo koke ae la ia no kona Makua Nui ma ka Lani, a nonoi aku la ia Iaia e aloha mai iaia.

 

Ka Moolelo Kaao Nani!

—O—

TONERIKA!

—KA—

Anela o Mekiko.

 

Ka mea i oleloia, ka Hokuwelowelo o na

mauna Anede, a o ka mua loa hoi o ka

mea nana i haaheo ka leialii me ke

kalaunu i ke keiki alii Beriala.

 

Hoopukaia e ka Haku Moolelo kaulana

Mose Manu no ke Kuokoa.

 

            I KA lohe pono ana o ka Moi a me ka Moiwahine me na keiki i na manao o Tonelele, aia hoi ua hoike mai la ko lakou ano a pau i piha i na helehelena o ka hauoli me na manao lokahi me ka holopono, a he panai kupono hoi keia no ka Tonelele mau hana maikai, a ma keia manao i hooholo ia, aole i liuliu iho ma ia hope ua holo koke ae la keia lohe iwaena o na alii a pau o ka aina a pela pu no hoi me na makaainana o ke kulanakauhale e lilo ana ke kaikamahine eha a ka Moi ia Tonelele, ka mea hoi nona ka inoa Rusire, a o keia no hoi ke kaikamahine i pii malie mai kona mau helehelena me ke kulana i oi ae mamua o kona mau kaikuaana, a he mau hiona kilakila maoli kona ma ka nana ana, a ua kupono hoi oia kekahi i helu pu ia me ka mea nona keia moolelo.  Nolaila, ua pono kakou ke kali aku i ka hopena o keia hoopalau ana o ke kaikamahine alii Rusire me ke keiki o ka uka o na ululaau o na mauna Anede, a he pono hoi ia kakou e olelo no ko Tonelele noho ana ma ke alo alii ponoi o ke kulanakauhale o Mekiko.

 

NA LA O TONELELE O KA NOHO ANA MA

KE ALO ALII, A ME KANA HANA

NANA I HOOKAULANA AKU

I KONA INOA.

 

            Aia iloko o keia mau la a Tonelele e noho pu nei me ke keiki alii Beriala me kona mau makua alii a me kona mau hanau muli a pau.  Ia laua e nanea maikai ana malalo o ka malumalu o na lau laau maloko o ka pa alii, a e kolonahe malie mai ana ke ala o na pua mai na wahi mai a pau o ka pa alii, ua hoopuka aku la o Tonelele i kona manao imua o Beriala, oia hoi keia.  “Ano ua loaa ia‘u ka wa pono e olelo aku ai ia oe e ke’lii, oiai au e noho ana malalo ou me ka hoolohe i na mea a pau au e olelo mai ai ia‘u a no‘u iho; o kou kaikuahine alii ka mea i manaoia e pili mai ana me a‘u ma na la ma keia mua aku e hiki mai ana.  Nolaila, aole au i makemake e hoolauna aku me ia a me kona mau hanau mua, aole no hoi au e haawi aku i kekahi huaolelo imua o lakou  iwaena o ko‘u noho ana me oukou, aole no hoi au i kupono e launa pu me lakou ma na wahi a pau o keia hale alii a me ke kauwahi e ae a hiki i ko‘u wa e ike ai i ka lio eleele o ko‘u kaikuahine maloko o keia kulanakauhale, a he mea hoi ia na‘u i manao me ka maikai, a e loaa hoi ia kakou ka maluhia o ka noho ana.”

            I ka pau ana o keia mau huaolelo a Tonelele, ua ae koke mai la ke keiki alii me ka noonoo nui ana i keia mau huaolelo a Tonelele; a mahope iho o ko laua nanea ana, ua huli hoi mai la laua no ka hale alii, a no ia manawa i ha‘i aku ai ke keiki alii i kona mau kaikuahine, a ua lilo ae la ia manao i mea maikai ia lakou a pau eha; aka no ia manawa paha i like ai ko lakou manao.  A no na la mamua aku e hiki mai ai, me he mea la e ala mai ana na manao kue mawaena o lakou a lilo i mea e mokuahana ai ko lakou noho ana.  I kekahi la, ua kupu ae la ka manao iloko o Tonelele e holo aku maluna o kona lio keokeo e makaikai i ke kulanakauhale, a ma keia manao ona, ua hele pu aku ke keiki alii me kona mau hanau muli a pau loa, a ma ia huakai a lakou i hele ai, ua lilo mua no ka helu ekahi o ka la ia Tonelele me kona lio keokeo, a he mea hiki ole hoi i na lio a pau o ke keiki alii ke hoohalike aku me ko Tonelele, a he kulana hanohano maoli no kona me ka hiehie nui, a mamuli o ia hana, ua haawi ia aku iaia e ka Moi he kulana alihikaua no na koa a pau o ka Moi, a ua lilo kana mau a‘o ana i mea mahalo nui ia e na koa a pau.

            I ka wa i ike ai o Tonelele ua makaukau na koa kaua lio a me na koa hele wawae, ua puka ae la lakou maloko o ke kulanakauhale me ka hookahakaha, ua hoike o Tonelele i keia mea ma ke ano kaua o na Ilikini me ha mau auna manu la e lele ana i ka lewa ka lele makawalu o na pua pana mai na kakaka aku a me na mea kaua e ae, a he manawa loihi ka hoikeike ana o na koa me ko lakou alihikaua hou i ke akamai o na koa, a ua nui na mahalo i hoike ia aku e na mea a pau a me ka Moi, a ua kaulana ae la ko Tonelele inoa a puni ke kulanakauhale, a ma ia ano oia i noho ai a hiki wale i ka manawa i hiki mai ai ka lio eleele o kona kaikuahine.  Nolaila, ua pono ia kakou ke waiho iki ae i ka olelo ‘ana no Tonelele ma keia wahi, oiai ua ike ae nei kakou iaia aia oia ma ke alo alii ponoi, a nolaila, ua hiki ia kakou ke hoomanao ae aia ke alanui mua e hiki aku ai i ka mea nona keia moolelo imua o ke keiki alii Beriala, a lilo iaia ka haaheo ana i ke kalauna o ua keiki alii la.

 

KA HAOHAO ANA O TONERIKA A ME KO

LAUA MAU MAKUA IA TONELELE A

ME KA HOOUNA IA ANA AKU O

KA LIO ELEELE E HULI I

KONA KAIKUNANE.

 

            Ua ike ia ma ka helu mua ae nei ko Tonelele hele ana, aole oia i hoi aku i ko lakou wahi mau kahi hoi a ko laua mau makua a me na kahuhanai o laua e noho la ma ka home noho mauna.  He mea mau no hoi ia lakou ka ike pinepine ana i ko Tonelele hoi aku i na la a pau; aka, ma keia hele ana nae o ua Tonelele nei, ua kali aku nei kona kaikuahine, na makua a me na elemakule iaia, aole oia i hoi iki aku a hiki i ka poeleele loa ana.  Pela lakou i kali ai ia po a ao aole oia i hoi aku.   Nolaila, ua ulu ae la na manao pono ole a haohao, a ma ia ano, ua nune ae la lakou ia manawa me na manao kaumaha, a ike aku la o Tonerika i na kulu waimaka o ko laua mau makua e iho makawalu mai ana ma na lihilihi, a pela no hoi me na wahi elemakule na laua i hanai o Tonelele, a no keia mea, ninau aku la o Tonerika i ko laua mau makua.  Ano, he mea haohao no‘u ka ike ana aku ia oukou e uwe ana i keia wa.  Nolaila, heaha ke kumu o ko oukou uwe ana?  Pane mai la kona makuahine me ka leo ha‘uha‘u, e uwe ae ana makou i ko kaikunane, aole oia i hoi mai; no ka mea, he mea mau iaia ka hele ana i na la a pau a hoi mai, aka i ka la i nehinei a po a ao ae nei a hiki i keia la, aole oia i hoi mai, a oia ka makou e uwe ae la i ko kaikunane, me he mea la ua loaa paha oia i ka poino.

            I ka lohe ana o Tonerika i keia mau olelo a kona makuahine, hele koke aku la oia imua o ka luahine Satone, ka mea nana oia i malama, a iaia i hiki aku ai imua ona a ha‘i aku la oia i na mea a pau e pili ana i kona kaikunane mai ka mua a ka hope, huli pono mai la ke alo o ka luahine me ka hulili o kona mau maka i hoolei pau mai ai kona mau nanaina imua o kana hanai Tonerika, a puana mai la i kana mau huaolelo.  “E Tonerika e—, e nana pono mai oe imua o‘u no ka manawa pokole a‘u i makemake ai nou,” huli mai la kana hanai me kona mau helehelena olina me ka nani nui a nana pono mai la, ia manawa i pane aku ai ka luahine.  Aia imua o ko kaua alo ke ku nei kou kaikunane me ka pomaikai i loaa iaia ma ke kulana kiekie loa, a ke hoike mai nei kona mau hauli ia‘u, aole oia i pilikia.  Nolaila, e kahea aku oe i ka lio eleele a kou kaikunane i haawi mai ai nou.

            A mahope iho o ka pau ana o na huaolelo a ka luahine Satone, ua hoomaka koke aku la o Tonerika e kahea ma ka inoa  o ka lio eleele, ia lohe ana no o ua lio nei, he manawa pokole o ka holo ana mai ku ana ua lio nei imua o kona haku wahine me na helehelena hauoli.  Ia manawa i o aku ai ka lima akau o Tonerika, o ke pelu koke iho la no ia o na wawae mua o ua lio nei ma ke ano kukuli ana, o keia ka wa i hookau aku ai ka luahine Satone i na pono a pau iluna o ke kua o ua lio nei me ka hikiwawe loa oia i hana aku ai i keia mau mea a pau.  A i loa no hoi a pau ka lawelawe ana a ka luahine, aia hoi he manawa pokole me ka eleu nui i kau aku ai ua eueu nei o ka uka iuiu o na mauna Anede, a iaia no hoi i kau ae ai iluna o ka lio, a kahea iho la oia i kona inoa e ala ae.  I loa no a pau kana olelo ana, o ke ala ae la no o ua lio nei a hoomaka aku la e holo, a pane hou iho la no o Tonerika e holo a e lele, ua hooko  no ka lio e like me kona makemake.  Nolaila, ua holo ka lio me ka lele ana maluna o na lau laau me ha Hokuwelowelo la i ka ili o ka lani, he manawa pokole loa ua kokoke loa aku keia e hiki i na palena o Mekiko, a ike aku la oia i kekahi puu e kupono mai ana mamua ona e  pohai ia ana e na laau, a malaila oia i hoomaha iho ai me kona lio, a noonoo pono iho la oia i kana e hana ai no ia manawa.  Nolaila, ua ulu ae la kona manao a me kona noonoo e hookuu i kona lio e holo e imi i kahi a kona kaikunane i hele ai malia o loaa paha i kona lio ke huli.

 

KA MOOLELO KAAO O

Kahanuopaineki,

Ke keiki alii o ke aupuni o Italia

Ka Olali o na Waoakua o Arabia.

Ka Naita nana i kuekaa na lua

huna o na powa.

 

            NOLAILA, ma ko‘u manao, o ka hoopai a kau aku ai maluna o na pio ma ko‘u noonoo, o ka li ia laua a elua ma ka amana ka uku hoopai no ka poe powa a pakaha wale i ko kakou pono, a oia ko‘u manao; aka, ma ua hewa keia e hoihoi mai no ia me a‘u.  I ka lohe ana o na mea a pau, ua lokahi  koke ae la ko lakou manao no ka li ia o keia mau pio, a ua hooholo lakou i eha la i koe, alaila e li ia laua.  I ka nana ana aku o ke’lii opio a ike, ua kaumaha loa ia kona naau.  Nolaila, kauoha aku la oia i kona makuakane a  me ka Haku Makuisa e hele mai imua ona.  I ka lohe ana o na makua i ka leo aloha o ka laua keiki, ua hele koke mai la laua imua ona a pane mai la.  Eia maua kou mau makua e ha‘i mai i ka olelo.  Pane aku la ka laua keiki, i kauoha aku nei au ia olua e hele mai imua o‘u, no ka noonoo ana i mea a pau e pili ana no ka li ia ana o na pio, a i ole e noonoo mai olua no ka hoopai kupono e kau aku ai maluna o laua.  E, auhea olua, o ko‘u manao e hookuu loa ia laua, no ka mea, ua nui ko‘u kaumaha no kela mea, oia hoi no ka li ia o kou makuakane, o ko‘u manao e hookuu loa ia na pio.

            I ka lohe ana o ka makuakane o Kahanuopaineki, ua nui kona nonoi ana i kana keiki e li ia no kona makuakane a me kona hoahanau i uku panai no ka laua hewa i hana ai maluna o olua, ina aole he ike kilokilo iloko o kau aikane, ina ua make oe a me kau aikane.  Nolaila, mai kanalua no ia mau mea, e hana aku e like me ka rula o na kanawai koa, a ina e hookuu ana oe, alaila e lilo ana na kanawai o kou aupuni i mea ole, a o oe mai no ka luahi, a e ili mai no na poino a pau maluna o olua me kau aikane, a e ike oe e pau pu aku ana me kakou a me ka Haku Makuisa a me kou mau ukali a pau, mamuli o kou hookuu ana i na pio.  Nolaila, o ka mea kupono e li ia laua, aia no nae ia i kou manao, ina ua ike oe he mea pono ia, alaila, ua pono no, a ina ua ike oe he mea hewa ia aia no ia i kou manao.  A lohe iho la o Kahanuopaineki i keia mau huaolelo a kona makuakane e ha‘i mai ai, ua huli koke aku la oia a hoi aku no ka hale alii a me ka hoopuka ana mai i keia mau huaolelo penei: E kali na mea a pau a hiki i ka wa kupono a e hiki hou mai au o ka wa no ia o ka hoopai e kau aku ai maluna o laua, a o ka wa no ia e hemo ai ina i ku i kahi o ka hemo hemo no.

            I ka lohe ana o kona makuakane a me na mea a pau i keia mau olelo a ke keiki alii Kahanuopaineki, ua hoomaka koke mai la ka manao a uluku iloko  o kona makuakane.  I kekahi manawa ua hui mau aku ka makuakane o Kahanuopaineki me kona pokii oia hoi ka Haku Makuisa a kuka pu iho la laua, a olelo aku la ka Haku Makuisa i keia mau huaolelo.  Ina e manao ana ke’lii opio e hoola i ka makuakane o kaua a me ko kaua kaikuaana ua hiki no; no ka mea, ua nui ko‘u aloha i ko kaua makuakane a me ko kaua hanau mua.  Ia laua nei no e kamailio ana komo ana ke’lii opio me kona hanohano nui a ku ana imua o lakou nei.  Wehe ae la oia i kekahi owili pepa nui me ka malie a heluhelu mai la oia me ke akahele, a penei ka heluhelu ana o ua owili pepa nei:  “I na’lii a me na kaukau alii, na balona ka poe maka hanohano, na hoa o ka aha kukamalu a me na lunakanawai kiekie, a me na kuhina o ke aupuni.  Aloha oukou a pau loa,—No ka ili ana mai o ka hanohano maluna o‘u a oukou i waiho mai ai na‘u e hooholo i ka hoopai e kau aku ai maluna o na pio.  Nolaila, ke hoike aku nei au imua o oukou, o ka manao a me ka‘u mea i hooholo ai, oiai aole no hoi au e nana ana i ka laua mau mea i hana hewa mai ai maluna o maua me ka‘u aikane aloha.  Oia la i lohe oukou e na hoa o ko kakou hale ahaolelo o ko kakou aupuni nei.

            I ka pau ana o keia mau olelo a ka opio, ua kahea koke aku la o Kahanuopaineki i kona mau makuakane e hele mai imua ona.  I ka hele ana mai o kona mau makuakane, ua pane koke aku la ua alii opio nei, e lalau aku olua i na lima o ko olua makuakane a me ko olua kaikuaana, a e puili oukou me ke aloha pumehana me ka naau i piha i ke aloha, a pela iho la oukou e hana ai a lilo laua i mau kupuna no‘u, a o oukou hoi i mau makua no‘u, o ka lohe ko oukou e noho me ka lokahi, pela kakou e noho ai a lilo kakou i mau moi no na aupuni a pau o ka honua nei.  I ka lohe ana o kona mau makuakane i keia mau olelo a ke’lii opio Kahanuopaineki, ua piha loa ia iho la lakou i na manao o ka hauoli.