Ka Nupepa Kuokoa, Volume XXV, Number 21, 22 May 1886 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

Buke XXV, HELU 21, HONOLULU, POAONO MEI 1886.  NA HELU A PAU, 2077

HOOLAHA KUMAU.

WR. Karbla

*** A ME KOKUA MA KE KANAWAI.

He luna hooiaio Palapala.

tf.

 

A ROSA. (AKONI,)

*** A HE KOKUA MA KE KANAWAI

He Luna Hooiaio Palapala

KEENA HANA: Ma ke Keena Loio Kuhina

tf.

 

PACIFIC HARDWARE COMPANY

Mau Mea Kuai Lako Hoo

Alanui Papu, Honolulu

 

FRANK PAHIA.

ANA AINA! ANA AINA!!

KEENA HANA: Aia ma alanui Moi, kokokeloa i ka Uwapo o Hooliliamanu.

 

J P. HANAAUMOE.

He Loio a he Kokua ma ke Kanawai ma na Aha Hoomalu a Apana o keia Aupuni.

F. loaa no au ma Puna, Hawaii

 

CHAS H PULAA.

HE LOIO A HE KOKUA MA KE KANAWAI

A e loaa no au ma Honomakau, Kohala Akau, Hawaii. 2001-tf

 

CECIL BROWN

LOIO A ME KOKUA MA KE KANAWAI

A he * Hooiaio Palapala no ka Mokupuni o Oahu

KEENA HANA: Ma alanua Kalepa.

tf.

 

KINNEY & PETERSON

LOIO, LOIO, LOIO.

KEENA HANA: Helu 13 Alanui Kaahumanu, Honolulu. tf.

 

W.C. AKANA (KALAUKI.)

He Mahele a Unuhi-olelo ma ka olelo Pake ma ka olelo Hawaii.  Ua makaukau no hoi e hana i na Palapala Kuai a Hoolimalima a pela aku mawaena o na Pake a me na kanahu Hawaii. E loaa no au ma ke Keena Helu 7, Alanui Moi, ma kahi e kokoke ana i ka uwapo o Haaliliamanu 2010-fy

 

WILDER & CO. (WAILAMA)

Moo kuai papa a me na lako kukulu hale na ano a pau a me na me na pono a pau no ka hale. 

Kiai Alanui Moiwahine me Papu. tf.

 

RICHARD F. BICKERTON (PEKEKONA.)

LOIO A ME KOKUA MA KE KANAWAI

KEENA HANA: Maloko o ka Halewai hou

tf

 

WILLIAM AULD.

Rima Hooiaio Palapala Kapa *nohana no ka Apana o Kona.

KEENA HANA: Ma ke Keena o ke Kuokoa. tf

 

JOSEPH WILLIAM KELIIKOA

Ma lalo, a he kokua, a he pale, a he koo ma ke Kanawai, loaa no au ma ke Keena o J. N. Poepoe, kihi o na Alanui Alii a * Honolulu, Ua hihi no hoi he hana i na palapala pili Kanawai o kela me keia ano.1vr.

 

H * SB. (KRIKI.)

Mea Paikii kaahele ma na mokupuni.  E hanaia no na kii me ka maikai a me ka eleu pu no hoi.  E paiia no na kii nui a liilii me ka makemake o na makamaka. 

 

J. A. MAGOON (Makuna.)

LOIO A HE KOKUA MA KE KANAWAI

Keena Hana, Helu 42 Alanui Kalepa, kokoke i ke Keena o Pekekona. 

 

JOHN MAHIAI KANEAKUA.

LOIO A HE KOKUA MA KE KANAWAI.

HE MEA UNUHIOLELO MA KA OLELO BERITANIA A ME KA OLELO HAWAII.

Keena Hana ma Alanui Kalepa, Honolulu, maluna ae o ka Banako o Bihopa m. 1yr.

 

KE KAUKA IAPANA

MR. M. Goto.

Me Kauka ao ka mai lepera, na mai e pili ana i ka ili o ke kanaka, ka mai kaokani

etc. etc. etc.

KEENA HANA-Aia ma Kapalama, malalo pono o kahi noho o ka Hon. J. Keau

NA HORA HANA Hora 1 a ka **

" " " " Na La Sabati hora 5-12

***

 

SH. MEEKAPU.

Tela humuhumu lole.

HALE HANA: Hola 11 ***

 

KA MOOLELO KAAO EEHIA O KE KEIKI ALII

ROMURA.

(Ka Puuwai Liona)

 

Ka mea i kapaia, ka Opuu Rose o na kihapai me ka Puuwai o kona Lahui, a o ka Manu Aeto hoi o na Kualono a me na Ululaau anoano o Alexeria, he Iwikani no na au i hala.

 

Ka Hookalakupua o ka Makakila.

I KA pau ana o ka paina ana, ua kau mai la ka maka hiamoe i ka Moiwahine, a aia oia ke lupea ia ala e na hooniponipo ana a ka hua ohia pahaohao o na kihapai a me na malaai o na mauna palipali o Lano, (oia hoi he aina papu, kahi i loaa mai ai ka hua Pometelana a me ka hua ohia.)

            Oiai ka Moiwahine e nipo ana i ke aloha o ka hua ohia i oleloia,

"E like me ka laau ohia mawaena o na laau o ka nahelehele

Pela kaʻu mea i aloha ai mawaena o na keiki kane;

Ua noho iho au malalo o kona malu me ka oluolu,

A ua ono kona hua i kuu ai ana."

            I kekahi la ae, e noho ana ka Moiwahine me na hiona aihue puuwai a ka naau e hoonaluea ai i ka noonoo, a e moe pono ole ai o ka po ke moe, a hoomanao ae la au i keia lei ahihi a ke aloha i pili paluaia, penei:

O kou po ua moe ia.

O koʻu nei aole;

Lia wau i ke aloha,

I ka nani o ia pua.

            I ka aui hou ana ae he mau la i hope, ua hapai ae la ka moiwahine Lavania i ka lua o ka laua mau keiki, a o ka mea hoi nona ka inoa "Edine Berenia." I ka piha ana o na malama he umi, ua hanau mai la ka moiwahine i ke keiki hou i lua no Sepa ka lokoino, a lilo aku la ka hanai ana i ke Kuhina Nui o ka Moi, De Moine (Des Moines.)

            Oiai ke keiki alii Edine Berenia e opuu ae ana a mohala e like me na pua o ke kihapai, e hoike mai ana i ke kilakila o kona oiwi a me ke kilohana hoi o kona kulana e aihue ana i ka puuwai o ka aoao palupalu, he mea e ka makahehi o na mea a pau i kona nani a ka maka e hoohie ai me ka awihi ana.  Ua hookaulana ia ae ka nani a me ka ui o ua Keiki alii opio nei o Alegeria. a na ia mea i kauo mai i na mea a pau e kilohi aku maluna o ko laua mau oiwi, a e haawi mau ia ana hoi na lealea i na la a pau no ua mau ao opua la o Edoma kahiko ke kaulana.

            I ka piha ana o na makahiki ekolu o Edine, ua haawi ae la ke kuhina De Moine he ahaaina palala nui no ke keiki alii opio.  Ua hoouna ia na elele ma na wahi a pau o ke aupuni a hoea loa aku hoi imua o na aupuni e noho hoaloha pu ana me ia.  Ua konoia aku ka poe akamai loa o ka hikina a me ka aina o Aitiopa no ka poe mele, e hele ae ma ka la ahaaina hauoli o ke keiki alii Edine Berenia.

            Mahope iho o ka piha ana o na la ehiku ua hoomaka iho la ka ahaaina ana; ua hookaniia na bele a me na o-le, a e welo ana na hae i ka welelau makani. e hone ana ka leo o na ohe, a e nukupeu ana hoi ka pahu mamua o ka huakai a ka poe mele e kamoe ae ana no kahi o na mea ai e nuu ana a ka maka e hewa ai ke ike iho, maloko o ka pa alii o Kinimailehuna, malalo hoi o ka malumalu o kekahi lanai i luhiehu ia e na lipo lauae o ka waokele a me na nani kamahao a ka maka e kilohi ai a nana, i ka ka mea he nani a me ka manuunuu o na mea i hoonuʻa ia no ka hanohano o ke tiga inu koko ona ululaau o Silimela.

            Oiai na mea a pau e ai a e inu ana me ka hauoli, ua hooho ia ae la, e i ae ke hele mai nei no kahi ahaaina ke alii ka Moi Rabona ka Moiwahine, ke kuhina De Moine a me na keiki alii Sepa me Edine, a me na kauwa e paa ana i na kawele holoi hou.

            I ke komo ana mai o na Moi a me na opio puuwai tiga, ua ku like ae la ke anaina iluna me ka huro ana no ekolu manawa, a ia wa no i mele ia mai ai kekahi mele e na puali o ka poe mele e ku ana mamua pono o na keiki alii me ke eehia a me ke anoano, a noho iho la na mea a pau ilalo a koe wale no ka haku puuku e ku ana iwaenakonu, a puana mai la i keia mau huaolelo.  "E na makamaka e kulolia pu ana, e ai a e inu i na mea i hoomakaukauia no ke ola o ke Keiki alii Edine iloko o na la ehiku, a hala ae ia mau la, alaila malama ia na lealea i hookaawaleia no ia mau hana, a e makaala ia poe i ka lakou mau apana hana iho."

            I ka hala ana ae o ia mau la, ua hiki mai la i na hora o na hana lealea o na ano a pau e like me na mea i oleloia.  Oiai na mea a pau e nipoa ia ana e na hana luaiele a ka makemake, ua hooho ia ae la, e i a he puali o na naita no lakou ka huina he umikumamalua a me ko lakou alakai opio e kau ana maluna o kekahi lio kalakoa, a ua kahikoia hoi me ka aahu omaomao a e pulelo ana hoi ka hulu o ka Vuletura keokeo o Lebalona maluna o kona papale me ka hiehie nui, a o kona mau naita hoi ua aahuia lakou me na lole eleele i uhiia mai ke poo a na wawae a me ka uhi maka hoi i paluluia ma ko lakou mau maka, a na ia mea i huna aku i na helehelena a nalowale a e kau ana hoi lakou a pau maluna o na lio eleele pakahi a ua paluaia hoi ko lakou hele ana. 

            Ia lakou i hookokoke aku ai mawaho o na ipuka o ka pakaua o Bareseta, kahi o na lealea e loku la, ua lohe ia aku la ka leo o ka huro nui ana o na mea a pau, a o ia mau leo e hooho la, oia no ka lanakila ana o Odema ka hiena a o ka naita kaulana hoi o ke aupuni o Bitunia, he aina i kaulana no na pohaku makamae e like me ka agati, nona na hooluu like ole a ka maka e pahaohao ai.

            Oiai ka puali naita i kaalo ae ai ma ka puka, ua haawi ae la ko lakou alakai opio he hoailona, a ia wa no i ikeia aku ai na naita a pau e ku ana i ka honua ma ka aoao o ko lakou mau lio pakahi e paa ana i na keehi, a o ko lakou mau nanaina hoi e huli pono mai ana ia imua o ko lakou alakahi opio.  Wahi ana i pane iho ai. "E kali maanei he mau minute wale no i koe, a halawai no kakou me na hana lealea o keia la.  Eia au ke komo nei, a malalo o kekahi hoailona e komo mai ai oukou me ko oukou mau pono a pau maluna o na lio." Haawi ia mai la ka ae e ke kiai puka no ke kanaka opio e komo, a oiai oia i hui aku ai me ka Puuku, ua ae ia mai la oia a me kona mau naita e komo aku, a ua haiia mai la no hoi, o ka naita malihini nona ka inoa o Odema o ka aina o Bitunia ka moho oi kelakela o ka la mai ka la mua mai a hiki i keia la, a o ka lima keia o na la a o ka la hope loa no hoi ia o na lealea e hookuu ai. Noi aku la ka opio i ka haku puuku, e ae ia mai kona puali e komo, a ua makemake oia e ana pahikaua laua me ua naita ala nana i hoohoka ke akamai kakapahi o na moho kaulana o na aupuni ma ka aoao hikina o ke kai Nui. 

            Haawi ae la ua opio la i kekahi hoailona a ikeia aku la ua mau kaeaea la maluna o na lio me na aahu eleele e komo mai ana no kahi o na lealea me ka hanohano nui. (Aole i pau.)

HE MOOLELO KAAO

No

Lameka Puluka,

Ka Makahiapo mua i oili mai, mai ka puhaka o ka Ui Pua Rose a me Kahanuopaineki

KA MEA I KAPAIA KA

Ka liona o na mauna hui o Arabia, ka naita nana ulupa na kupua o ka lewa lani a me na kupua e noho ana i ka papaku o ka moana.  o ka mea hoi nana i pani ka maka o ka la.

OIAI ka pouli e aaki paa ana maluna o ka aina ua halawai ae la na puali kaua a elua i ka manawa hookahi e haawi ana kela a me keia puali kaua i ko lakou inaina maluna o ko lakou mau enemi a o ke kupua Matone Samadaria hoi ke anai mai la ma ka eheu akau o na naita o Lameka Puluka me ka weliweli nui, aia hoi ka opio puuwai ahi ke hele la imua e waele ana i kona alahele, a ke kokoke aku la oia e hui me kona enemi. 

            He mea haohao loa i ke kupua Matone Samadaria no ka pau loa o kona mau naita i ka haule ilalo i ka honua, aole i liuliu, halawai ae la ke koa opio me ke kupua Samadaria a hoomaka iho la e kakelekele i ka laua mau pahikaua.  Iloko o ka hapaha hora ua ike iho la oia i kona kulana kupilikii, no ka mea, o kona hoa paio he oi ae ke oolea o kana mau hauna pahi mamua o kana a ua opa pu ia aku la oia a pilipu, ia manawa oia i kauoha ae ai i kona mau naita kiai kino e hele mai e kokua iaia, a mamua o ka hiki ana mai o ua poe la, aia hoi, ua hiki mua mai la o Laiana a me Polepa a ua loaa he mau kokua ikaika no ke alii opio.  I ka manawa i lele mai ai na kupua o Matone Samadaria me ka manao e apahu pu ae i ke ola makamae o ke alii opio, ua hoopuehuia aku lakou e na lima wikani o Laiana Bea a me Polepa, a o ke kupua Matone hoi ke noke la no i ka hakaka me ke alii opio.

            Ike iho la ua kupua nei aole oia e lanakila ana, ua huli ae la oia a kiola aku la i kekahi pokaa kaula maluna o ke alii opio me ka manaao ina e loaa oia i keia pokee kaula, alaila, e pio ana ke alii opio, pela kona manao wale aka, iaia i hoomaka mai ai e kiola i ua pokaa kaula nei maluna o ke alii opi aia hoi, ua lele mua ae la ke alii opio a he 60 kapuai ke kiekie maluna ae o kahi a Matone e ku ana, a o ka pokaa kaula hoi ua halahu aku la oia a kaahele aku la, a i ka huki ana mai o ua kupua nei i kana pokaa kaula a nana iho la, me ka manao la hoi ua hoi waiwai mai, eia ka auanei he neo ka mea e loaa ana iaia.  Ike mai la no ua kupua nei e kau hoolai aku ana no kona enemi, ua hoomaka ae la oia e lu i kona kino kanaka, a hoolilo ae la iaia i anela me na eheu e lele ana i ka lewa, me ka manao e alualu aku ia Lameka Puluka, e paa ana ma kona lima kana laau ihe a o kana palekaua lau laau ma kona lima hema.  Ike iho la o Lameka Puluka i kona hoa paio e pii ae ana e halawai me ia ua hoemi iho la oia i kona lio ilalo a halawai me ua pukonakona la o ka lewa a o ka hoomaka iho la no ia o ko laua paio ana me ka hahana, a o ka olomana hoi me kona mau ukali ke hookokoke mai la oia e hui me kana keiki imua o ka enemi.  Ia Lameka Puluka e noke nei i ka hakaka me ke kupua Matone Samadaria, a hala ka hapalua hora, ua paupauaho loa ua kupua nei, a ua loheia aku ke kani o kona mau puka ihu, iloko o ia manawa i huki ae ai i kana pahi puhaka a pahu aku la i ka honua, a ia manawa no i mahae koke ai ka honua i na apana like elua, a kaawale aku la kona mau enemi ma kekahi aoao a ku iho la ke kupua Samadaria ma kekahi aoao, a pane iho la: Ahaha! Aole oukou e hiki hou mai ana imua o kuu alo, nolaila malaila no oukou hoi nui aku, ina e hiki hou mai oukou, alaila o ka make wale no ka hoopai e kau aku ana maluna o oukou.

            I ua kupua Matone Samadaria nei e kamailio ana, aia hoi ua akaaia aku la ka papale kaua o ua kupua la a waiho wale kona mau helehelena, a ua puiwa loa ia ua kupua la, a i kona ike ana o kona enemi no, a hahau mai la i kana pahikaua maluna o ke koa opio me ka manao e apahu pu ae i kona ola, eia ka auanei e po-ho ana kona manaolana palaualelo, no ka mea, ua loaa mua mai la oia i ka pale eleu a ke koa opio. 

            Iloko o keia hoouka kaua ana, ua hahana no na aoao a elua a hala hou he hapalua hora, ua pau hou no ke aho o ua kupua nei, nolaila lalau ae la oia i kona koloka ahi a wili ae la a nalowale ae la kona kino, he mau minute mahope mai ua lilo ae la ua koloka nei i laau kuku, oia paha ka puakala, a ua ulu mai la a nui a pua mai la a oo, pa mai la kekahi makani nui, mai ke kukulu komohana mai a hooluliluli ae la i ua moku puakala la, a helelei aku la ko lakou hua i ka ili o ka honua, a o ka wa no ia i puka mai ai he mau haneri tausani o na Legiona o na uhane ino a hoopuni ae la i ke koa opio me ka weliweli nui.  I keia manawa no i ku lohaloha iho ai ke koa opio, no ka mea, o kona mau hoa e kaua aku ai he mau uhane wale no, nolaila i ninau iho ai o Lameka Puluka ia Lopainahuelo kona lio aloha, i ka i ana iho: E kuu lio punahele, e Lopainahuelo e, heaha la kaʻu e hana aku ai i ko lakou inaina e kau mai ana?  Poha ae la ka leo o kona lio: E kuu haku aloha e oki ae i ka welelau o kuu pepeiao akau, a e mahele iho oe i na apana like eha, a e kiola aku oe i kekahi apana ma ke kukukulu hikina a o kekahi ma ke komohana, a pela hoi na hapa elua i koe, m ka akau a me ka hema; e ike auanei oe e hele kino mai ana lakou e kukuli mai imua ou me ka mihi ana mai imua o kou alo.

            I ka lohe ana o Lameka Puluka i na olelo a kona lio aloha, ua hooko koke aku la oia i na mea i kuhikuhiia iaia e kona lio. 

            I ka pau ana o na kauoha a kona lio i ka hookoia, o ka manawa no ia o ke alii opio i lohe aka ai i na leo uwe kumakena e hea mai ana ma kona inoa a e noi mai ana me keia mau huaolelo.  E ke alii nui o ka honua, ka mea i poniia e ka mea kiekie loa i hoola no ko ka honua a me ko ka lewa nei.  E ola makou ma kou moa ihiihi kapu.  I ka lohe ana o Lameka Puluka, ua pane ae la oia: E na Legiona o na uhane ino o ka po, ua ae no au i ka oukou noi ke hoohiki mai oukou, aole oukou e haliu kue mai iaʻu, alaila e kala aku no au ia oukou iloko o keia pilikia nui aʻu e kau aku nei maluna o oukou. 

            I ka lohe ana o na Legiona o na uhane ino, ua hele mai la lakou a kukuli mai la imua o ke alii opio a mihi mai la.  Ia manawa no i ninau iho ai o Lameka Puluka i kona lio: Pehea la auanei e pau ai ka pilikia maluna o keia poe uhane ino e mihi mai nei? Pane ae la kona lio: E paʻi ae oe ma kuu pepeiao hema a e puka mai no auanei he pika wai, a e lu aku oe i na huna wai ma kahi au i haalei ai i na apana o kuu pepeiao, a ike no auanei oe e pau koke no ko lakou pilikia i ka manawa pokole. 

            I ka lohe ana o Lameka Puluka i na kuhikuhi a kona lio, ua hooko aku la oia ia mau mea a pau, a pela iho la i pau ai ka pilikia o keia poe; a mahope o ko lakou palekana ana, ua hele mai la lakou a hoomaikai mai la i ke alii opio. 

            I ka ike ana o ke alii opio ua maliu mai keia mau uhane ino ia ianei, ninau aku la oia ia lakou i kahi o ke kupua Matone Samadaria i pee ai; ua pane mai la lakou me ka lokahi i ka i ana: O kela laau kuku e ku mai la, o ke kapa no ia o ke kupua, aia malalo aku o kela moku laau kahi i hiamoe ai ua kupua la me ka manao kuhihewa, eia makou ke kaua nei me oe, ina makou e hoomaka e uwa-uwa, alaila, e manao mai ana ua lanakila makou maluna ou, alaila puoho mai a oia ka wa e loaa ai.  E hai aku no makou ia oe, he mau wahi mana uuku wale no koe a lanakila oe a me kou poe maluna o ua kupua la, aole e liuliu mai keia la aku e pio no ia.

            I ka pau ana o keia mau kamailio ana a ua poe uhane ino nei, ua hoomaka ae la lakou e uwa me na leo ahiu o ka mama, e hohiluhilu aku ana i ua kupua nei  I ka lohe ana o ua kupua nei i na leo hulo o kona mau kanaka, ua puoho koke mai la oia a ku ana imua o ke alii opio; i kona ike ana mai eia no kona enemi ke ku aku nei imua ona, ua hoomaka mai la kona kino e naka haalulu, a pane mai la oia i na legiona o na uhane ino, e kuhi ana wau ua lanakila oukou maluna o ka enemi a oukou i uwa ae nei.  Pane mai la kekahi aole makou e hoao e kipi i ka mea hala ole, no ka mea o oe no kai hewa a o oe no ke hoao e hakaka me lakou, a ina oe e lanakila pomaikai no oe, a i pio oe nou no ia. Aka, i ko makou manao e pio no oe e pono ai, no ka mea ua aihue oe ia laua me ka hewa ole. 

            I ka lohe ana o ua kupua nei i neia mau olelo ana a na legiona o na uhane ino, ua pii ino kona inaina a puni kona kino, a hoomaka aku la oia e kahea i kona mau wahi kiai i koe, e hele mai e kokua iaia me ka manao no la hoi eia no ke koe mai nei, eia ka auanei ua hamoaia mai la e ka olomana Kahanuopaineki aohe ahailono.

            Iaia e hookani ana i kana o-le, aole nae he hiki mai o kona mau kokua, i ka hoomaka ana aku o ua kupua nei e puhi hou aku, oia ka manawa i hiki mai ai o Kahanuopaineki a ku ana imua o ke alo o ua kupua nei e kau ana oia maluna o kona noho koki, aia ma kona lima akau e paa ana kana ihe kupua.  I ka ike ana mai o ua kupua nei i ka olomana, ku iho la oia me na helehelena o ke kaumaha, oia ka manawa i kau ae ai ka olomana i kana o-le no elua manawa aole i liuliu, ku ana o Polepa me Laiana Bea a me na nunui he 16.  I ka ike ana o Kahanupaineki ua akoakoa mai lakou, ua huli ae la oia a ninau aku ia i kana keiki:  Pehea la kou manao no ianei? Pane aku la o Lameka Puluka: Aole oʻu manao e pepehi koke, o koʻu manao no, e hoopaa pio, a maluna no o ka amana ana i hana ai no makou e li ia ai oia, a oia ka hooko ia ana o koʻu mau manao a pau maluna ona. 

            Pane aku la o Kahanuopaineki, ua ae no au, aka eia ka mea apiki loa, aole kai paapio ia kakou, ke kuko e nei kakou mamua, a ke nana e mai nei no ko ia nei mau maka.  Nolaila e kuu keiki e hoomanawanui aia a paapio ia kaua hooholo ia kau olelo i hoopuka ai mamua.  Ia manawa i hoomaka aku ai ka olomana e nee imua o ke kupua Matone Samadaria, i ka ike ana mai o ua kupua Samadaria nei, e nee aku ana o Kahanopaineki, ua pane maila oia; heaha kau e nee mai nei imua oʻu, ke kupua hookahi i kau ai ka weli a puni ka lewa nei, a hala loa aku i ka papa kuhohonu o ka moana?

            Pane aku la o Kahanuopaineki, o kou mau la ia i kaulana ai: aka, i keia la e paapio ana oe ma ka poho o koʻu lima, a--maluna auanei o ka amana au i hoomakaukau ai no aʻu mau keiki, a me ko laua mau kiai hopo ole, e hooko ia ai kou hoopai.  

            E nee mai a e ike koke no oe i ka uku kupono e kau aku ana maluna ou, ia wa i hapai ae ai ua kupua nei i kana pahi kaua, me ka manao e hoomoe maluna o ka olomana.  O ka wa no ia o ka ihe poo-deragona i oili aku ai a kau maluna o ke kupua Matone Samadaria, a hahili ae la ma kona a-i a paa loa. 

            I ka ike ana o ua kupua nei ua paa loa kona a-i; ua hoomaka ae la oia e wehe me kona mau lima, aka elike me ka ikaika huki o na aa huki o ua kupua ala, pela no ka oi ae o ka paa kiki o ka pu-a-i o ua kupua nei.  No ka mea, ua hauhili ia ae la ka pu-a-i a paa pu me kona kino.  Ke nana aku i ua kupua nei, ua kuu pau oia i kona ikaika pau, me ka manao e hemo ae ana la iaia. Aka, ua poho nae ia manaolana ona. 

            I ka wa i nawaliwali ai ua kupua ala, oia no ka manawa i hoi ae ai na poo o ka ihe kupua a pani aku la i na maka o ua kupua la.  Ia manawa i kii aku ai o Polepa me kona mau hoa hanau, a hapai aku la ia kupua la a kokoke ma ka puka o ka hale uwila.  Ia wa no i puka mai ai o Mahinakauahiahi a ike mai la i kana kane e ku ana, me ke kupua i hauhili ia ana e ka ihe. 

            Ua huli mai la oia a ninau, o ke kupua keia nana kaua i hoopaa i keia wahi, (iloko o ka hale paahao ae wahi a kana kane, ae oia no.  E paa oia e pono ai a hiki i ka manawa e hooko ia ai ka make maluna ona.  I ka hoi nui ana aku o lakou nei a hiki i na rumi o ka hale uwila, ua hooluana i iho la lakou ma ka rumi hookipa, a ku ka iho la lakou i na mea a pau e pono ai no ka li ana.  O ka ka olomana hoi i ke aupuni o Arabia e li ia ai, a o ka ke keiki hoi, i ke aupuni no e li ia ai oia.  Ia lakou nei no e nanea ana, a e ku ka ana hoi, a i ka olomana i huli ae ai e nana, aole ke kupua matone Samadaria, ua hehee iho la a lilo i mea ole kona kino nui, a o ka ihe kupua hoi he oia mau no ka lapuu. 

            I ka ike ana o ka olomana aole ke kupua, ua lalau aku la oia i ka ihe a pane iho la, heaha hoi ka mea o ka hookuu ana i ka kaua pio, a luhi hou paha auanei kaua i ka huli hou aku?  Ia lakou nei e hauwalaoa ana no ka nalowale ano e ana o ke kupua Samadaria.  Aia hoi ike aku la lakou; he elua puupuu daimana, a me elua puupuu gula, e waiho mai ana ma kahi o ke kino o ke kupua. 

            I ka ike ana o ka olomana i ua mau puupuu nei, ua lalau aku la oia a nana iho la; a ua hopu mai la no hoi o Laianapea, Mahinakauahiahi, me na nunui he 16.  I ka pa ana o keia mau puupuu i na lima o lakou, o ka manawa no ia i malule iho ai a nele i ka ikaika ole, a poina pu ko lakou noonoo, me he mea la ua loaa i ka mai kuhewa. 

            E ninau mai paha aunei oʻu mau hoa kuilima o ka moolelo o Lamekapuluka, i ke kumu o keia pilikia ana o Kahanuopaineki ma: ae, e hai aku au ia oukou: Oke kumu o keia pilikia no kela mau puupuu daimana no ia, me na puupuu gula.  O na kino lau no ia o ke kupua Matone, a no ka milimili e ana o Kahanuopaineki ma oia ke kumu o ka loaa ana o keia pilikia: A no ko Lamekapuluka milimili ole ana, a me Polepa oia ke kumu o ko laua loaa ole ana keia haawina hookahi, a ina lakou e milimili a pau loa: Ina ua pau pulu aohe iau kanu, a ina ua kahu kaena a kela kupua, i ka manawa e lilo ana o Polepa ma i ka unu pai ia Laianapea ma. 

            A oia no hoi ka wa i ulu ae ai kekahi kumu laau nui ma ka puka o ka hale uwila, a nalo wale iho la na puupuu daimana, me na puupuu gula; oia no ke kumu laau a lakou e ike la.  A he mau minute wale no, aia hoi ua oi pakela ae ka nui o ua kumu laau nei, a me ke keiki a o kona wele-lau, ua pa aku la i ka lani. 

            A he mau minute loihi keia apo ana a Lamekapuluka ma, i ka poe i loa i ka pilikia, aole no he pohala iki ae, ia manawa, i hu ae ai ka noonoo e kii i ka omole waiola, a wehe ae la oia i ke pani a hookulu iho la maluna o na mea i loaa i ka poino, a ole koke ae la lakou iloko o ka manawa pokole. 

            A ia lakou e nanea ana, aia hoi owaka mai la ka waha o ka ihe kupua a Kahanuopaineki, a puka mai la kona leo: E komo mai oukou iloko nei oʻu no ka mea, ua kokoke loa ka make e hiki mai e hoolilo ai ia oukou i mau puu lehu a e lilo ai ke aupuni o o ke kupua Matone i mau moana wai nui, i pa tausani ia ka paila ana o kona wai, e komo koke mai oukou i keia manawa, a hamama ae la ka waha o ua ihe deragona nei a ka olomana, a poholo aku la lakou iloko, a o ke alii opio hoi ua hoomaka aku la oia e komo iloko pa e ana ka leo o kona * aloha.

            E kuu haku aloha, e huli mai a nana mai iaʻu a e hoolohe mai i keia mau olelo.  E kau mai oe maluna oʻu a e haalele kaua i keia wahi.  Ae aku la kona haku alii opio, a hoomaka aku la laua e lele i ka lewa me ka manao e puka aku ana laua mawaho o ke aupuni o ke kupua Samadaria, eia ka auanei e papapapau ana laua he aa ko ka hale. 

            I ka hiki ana aku o Lameka Puluka me kona lio i na palena o na aupuni o Matone ka hiena, ua ike koke mai la ua kupueu la i kona enemi e holo la, o kona wa no ia i hukihuki ae ai i ke kumulaau a kulai aku la ma kahi a ke alii opio e holo la, a o ka wa no ia o ke aupuni i lilo koke ae ai i muliwai ahi, a kuku ae la ka mahu o ua muliwai la a o na mea a pau maluna o ua aupuni la, aole i ike ia; a o Lopainahuelo me kona haku ua loaa pono aku la i ka wai wela a ua pala-he koke iho la kona kino a koe aku no ka a-i me ke poo, a o Laweka hoi ua make loa iho la oia.  Ia manawa i nahu ae ai o lopainahuelo i na iwi o kona haku a paa ma kona waha a lele hoomanawanui aku la oia a hiki i kona puka ana aku mawaho o na palena o ke aupuni o ka hiena Samadaria a loaa iaia ka maha. 

            Ua lele hoomanawanui hou aku la ua lio la a hiki i Arabia, a hoi loa aku la oia a me na iwi o kona haku iloko o ka laa huna kahi i loaa mua ai o Lopainahuelo ia Kahanuopaineki, a lehei aku la oia iloko o ka punawai o ke ola aʻu hoikeike aku ia oukou i na helu i hala. 

            I hakalia no a komo o Lopainahuelo iloko o ua punawai ola nei, o ka wa no ia i hoi hou mai ai kona kino e like me ka mau; a o ke alii opio hoi ua hoi hou mai la kona a like me kona wa mamua, a i nana iho ka hana, eia ka e au ana laua iloko o kekahi kiowai.  Ia manawa i pane ae ai o Lameka Puluka, e kuu lio punahele, "Nawai i kiola ia kaua iloko o keia punawai?" Pane aku la o Lopainahuelo, "Na ka make i kiola ia kaua iloko nei."

            I ka lohe ana o Lameka i keia mau olelo, pane aku la oia, "Aia la i hea kuu wahine a me kuu makuakane?" Pane aku la kona lio, "Mai kaumaha kou naau nona, no ka mea, ua palekana lakou."

            Ia manawa i pane aku ai o Lopainahuelo i kona haku e hele laua i kula no ka mea, ua pau ae la no ko laua pilikia.  Lele ae la laua i kapa, a wehe ae la ke alii opio i kona mau pono a kalai aku la, a ke nana aku oe i ka wehi a Mahinakauahiahi ka *

            "Papa pono ka la i Papaenaena" ka ua mea he ui e hoomahie ai ka aoao palupalu.

            Aole i emo ua maloo ae la kona lole, a hoomaka iho la o Lopainahuelo e omo i ka punawai o ke ola iloko o kona opu a kauoha aku la oia i kona haku e kau mai maluna ona, a he manawa ole ua hiki aku la laua i na palena o ke aupuni o ke kupua Matone Samadaria.

Aole i pau.

Mamuli o na akeakea mau i ka unuhi moolelo o ke alii makaainana Kalani ua nele kakou i keia pule.  A hoea hou aku no.