Ka Nupepa Kuokoa, Volume XXVII, Number 29, 21 July 1888 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

 

Nupepa Kuokoa.

___________________

No ka Makahiki ----------------$2.00

No Eono Mahina-----------------1.00

KUIKE KA RULA

Poaono..................Iulai 21, 1888

 

Haawina Kula Sabati.

HAPAHA EKOLU

HAAWINA XXVII.  Augate 5, 1888

 

Ua kau no Iehova maluna ona i ka hewa o kakou a pau---I. 3, 3:6.

 

       KAHEA mai la o Iehova ia Mose, e olelo mai la hoi iaia mai loko mai o ka halelewa o ke anaina, i mai la,

       2     E olelo aku oe i na mamo a ka Iseraela, o i aku hoi ia lakou, Ina e lawe kekahi kanaka o oukou i ka mohai ia Iehova, no na holoholona e lawe ai oukou i ka oukou mohai, no ka ohana pipi, a no ka ohana hipa.

       3     Ina o kana mohai he mohaikuni noloko o ka ohana pipi, e mohai oia i ke kane kina ole: e mohai aku hoi oia ia no kona makemake iho ma ka puka o ka halelewa o ke anaina, ma ke alo o Iehova.

       4     A e kau ae oia i kona lima maluna o ke poo o ka mohaikuni; a ke maliu ia nona e hooliloia i kalahala nona.

       5     A e pepehi oia i ka pipi kane ma ke alo o Iehova; a e lawe mai na kahuna, ka Aarona mau keiki, i ke koko, a e pipi i ke koko a puni maluna iho o ke kuahu, ka mea ma ka puka o ka halelewa o ke anaina.

       6     A e lole oia i ka ili o ka mohaikuni, a e okioki i ka mohai i mau apana.

       7     A e kau ae na keiki a Aarona ke kahuna i ke ahi maluna o ke kuahu, a e kau pono i ka wahie maluna o ke ahi.

       8     A e kau na kahuna, ka Aarona mau keiki i na apana i ke poo, i ke kaikea,. a pono maluna o ka wahie ka mea maluna o ke ahi, ka mea maluna o ke kuahu.

       9     Aka e holoi oia i kona naau, a me kona mau wawae me ka wai; a e kuni ke kahuna i na mea a pau maluna o ke kuahu, i mohaikuni, he mohai i kaumaha ia i ke ahi, he mea ala ono ia Iehova

       Pauku Gula. A ua kau aku no o Iehova maluna ona i ka hewa o kakou a pau. Is. 53:6.

Poakahi        Oih 1  1-17

Poalua          Oih 2  1-16

Poakolu        Oih 3  1-17

Poaha           Heb 10  1-25

Poalima        Rom 12  1-13

Poaono         1 Io 1  1-10

Sabati           Is 23  1-12

       Ua loihe anei ka noho ana o ka Isaraela ma Sinai mahope o ke kukulu ana i ka halelewa? Nah. 10:11. Heaha ka hana iloko oia mau la he kanalima? Oihk. 1:1. Mahea ka hoike ana ia mau kanawai?

       Ke ala e hiki aku ai i ke Akua.

       I. Na ke Akua i hoike no i ke ala. p.1. nawai i kamailio ia Mose? Mai hea mai? E kamailio ana no keaha? Pehea ka ke Akua pane ana ia lakou? No ke aha? Is 45:22. Io. 14:6--o. Hoik.

       II  Ka mohaikuni. p. 2, 2.  Ehia ano nui o na mohai a na Iudaio i kaumaha'i? Heaha na mea i kaumaha ia ma ka mohai kuni? p. 2, 14. Pono anei e mohai i na mea kuni? E haawi oluolu anei? Mahea kahi e kaumaha ia keia mohai? p. 3, Puk. 40:6.

       He mau haawina anei i ao ia ma keia mohai ana? He mea pono anei e kaumaha i na mohai? He mea pono anei e haawi i na mea kuni ole? Mal. 1:8. He mea oluolu anei i ke Akua ka haawi ana me ka makemake maoli me ka naau oluolu.

       III  Ke kaumaha ana i ka mohai a e hele aku ana i ke Akua? p. 4--9. Ke kaumaha ia ka mohai heaha ka pono? p. 5. E laa ia anei kekahi i ke Akua ma ia hana? Ua ae anei kela i ko ke Akua huikala ana ia ia ma ia hana? Kin. 9:4. Mahea kahi i ko pipi ia? Heaha ka i hana ia me ka holoholona i mohai ia? Ke koko owai ka i hookahe ia no kanaka?

       IV  He mau mea hoomaopopo mai ke Kauoha Hou mai. Heaha ka mohai a kakou e haawi ai no ke Akua? Rom. 12:1. He mea kupono anei ia no kakou? E kuhikuhi ana keia mau mohai a na Iudaio i keaha? Io. 1:29. Heb. 10:8-10. He mohai e ae anei e like me ia? Heb. 7:26 1 Pet. 1:19. Ua haawi oluolu ia anei? 1 Tim. 2:6. Io. 10:17. 18. He mea anei keia e pono ai kakou? Rom. 3:23-26. N@ wai? 1 Io. 2:2. Ua hoike ia anei ko ke Akua aloha ma ka haawi ana i keia mohai no kakou? Io., 3:16. 1 Io. 4:10. Rom. 8:32. Heaha ka mea i hoike ia ma ke koko o Karisto? Mat. 26:28. Heb.9:13-14. Heaha ka kakou hana? Io 3:14, 15. Rom. 1:16. Loaa anei ke ola ia kakou ma ko Iesu make ana? Rom 5:8 9. Gal. 3:16 Ep. 2:13. Heb. 9:13. 14. He mea anei ia e alakai ai ia kakou ma ka noho hemolele ana? 1 Pet. 2:24, 3:18. 1 Io. 1:7.

____________________________________________________________

Hoole Waiona

_________

[Na ka Ahahui W. C. T. U.]

       Ma Kaleleonalani, oia hoi o "Ema Hale" ma Honolulu.

       He halawai i kela me keia Poalima hora 7:30 o ke ahiahi.

       He halawai Hoole Waiona, o ka Ahahui o ka Lipine Bolu o Honolulu.

       Ke kono ia aku nei na kanaka, kane, wahine, keiki, na mea kiekie, na mea haahaa, ka poe waiwai, ka poe ilihune, ka poe hoole waiona, ka poe kanalua, na mea a pau, e akoakoa ma ia hale i kela me keia pule. Pela no me na malihini mai na mokupuni e mai, e komo, a hui me makou ma keia hana kuonoono, "No ke AKUA a me ka HOME, a me ka AINA HANAU."!!

_____________

[W. C. T. U.]

KE KAO A ME KA ELA.

__________________________

       He mau makahiki lehulehu i kaahope aku nei, i ka wa e kuu laula ia ana ka inu waino ma Enelani, o kekahi kahunapule o ka mokuaina o Wale, o Liki Pilipaka kona inoa, ma kekahi hale inu ela oia, a ia wa i lana ano e wale mai no kona manao e hoohainu i kekahi kao nui hanaiahuhu me ka ela. Ua inu a wai aku la ke kao a hiki i kona wa i hina pu ai ilalo, a inu a puaa iho la ke kahunapule a hiki i kona wa i kaualako ia ai i kona hale ponoi.

       Ua waiho mai oia i kekahi la ae, aka, i ke kolu o ka la, hele hou aku la no oia i ka hale inu ela a kamau hou no. Hoea pu ae no hoi ke kao malaila, a ike no oia i kona hoaai, a haawi hou aku i ela, aka, pipika ae la ka ihu o ke kao a aole ae e inu hou. O ke kahunapule, i kona hoomaopopo ana ua naauao loa ae ka holoholona mamua ona, ua hilahila loa oia nona iho, a haalele loa oia i kana puni.

       Ma ia hope mai, ua lilo oia i kahunapule hoopono.

___________________________

PAUAHI.

________

       Ma na hora kuliu o ke aumoe o ka po o ka Poakahi July 9, ua holapu ae ke alelo ana ole o ke ahi i ka halekuai o Tong Mau pake, ma Laupahoehoe Hilo Akau, Hawaii.

       Aole i hoomaopopoia ke ano o ke ahi; he ahi paha na ke kalohe, he ahi no paha na ka poe o ka hale. Ma ka Poalua July 10, ua noho ka Aha Koronero niele ma ka Hale hookolokolo no ka noonoo ana i ke kumu o keia Pauahi. (Aole i lohe keia makapeni i na olelo hope).

       Ua lehulehu na kanaka i akoakoa ae ma kahi pauahi no ke kokua ana i kekahi mau ukana a waiwai paha o ka mea nona ka halekuai i hoopoinoia e ke ahi. Aka aole e hiki, oiai, ua hikiwawe loa ka a holopapa ana a ke ahi ia loko a me waho o ka hale.

       Ua loihi no ka manawa i ku ai keia halekuai ma keia wahi, a ma ka po i hoike ia ae la, i amu ia ai oia e ka ahi.

       O ka lua keia o na pauahi ma keia wahi. O ka pauahi mua, he hale no, no ka pake, a he ano kokoke no i kahi o keia halekuai i pau ae la i ke ahi. He hale noho nae ia; no laila, ua emi mai no na waiwai io oia hale i hoopoino ia e ka ahi mamua o keia. Pau no hoi ia hale i ke ahi, ma ka po o ka la Sabati June la 3.

                                                                                                                                                                                         Wm. Laiana.

____________________________

NA MAKAI KIU

______O_______

Amerika a me Europa.

_______

HE LEI DAIMANA I AIHUE IA ME KE AKAMAI LOA.

_________

       I KO'U lohe ana i keia kuhikuhi a ke kahu kaa, hele aku la au ma ka hale helu 32 Corso e ninau ai, a hai ia mai la au e ka wahine nona ka hale ua hoolimlima ua haku nei i ke kau wahi rumi uuku mamua pono o ua hale nei, a i makemake ka oia i ua wahi rumi nei no ke kaa ma kahi hauwalaau ole ia, oiai he buke kana e kakau nei, a aohe ona makemake e noho ma kahi nui o ka nakeke. Ua uku e ia ka uku mahina o ua wahi rumi nei, a he elua ana mau pahu i lawe mai ai ilaila, ua kuni like ia keia mau pahu me ka inoa o ka 'Haku Sheffield', a o ka ka wahine ike no ua kanaka nei he keonimana maopopo oia, aohe hoouluhua wale mai, a i na la apau e hoohala ana oia he hookahi hora iloko o ua wahi rumi nei. I ke awakea nae o ka la iho mamua o keia a'u e ninau nei, ua hai aku la ua keonimana la ia ka wahine nana ka hale e holo ana oia no Marseilles, a uku aku la i kana bila aie, a he wahi wa pokole mahope iho kii mai la ke kaa i na pahu a lawe aku la, a he wahine ui opio kai holo mai maluna o kekahi kaa okoa i kii mai i ua keonimana nei, kau aku la oia maluna o ke kaa a o ka hopena ia o kana ike ana ia laua.

       "Me keia mau ike i hoike ia mai la ia'u, ua maopopo lea ke hahai nei au mahope o ka meheu o kekahi o na apiki i hele a lehia ma na kolohe o na ano a pau. O kela mau pahu i hoouna ia ai iluna o ka moku he mau hana maalea loa kela e alakai hewa ai i ka makai kiu e hahai aku ana mahope o laua, a i hana ia hoi pela i kumu e lawa ai ka manawa no ka hoomamao ana aku ia laua mai ka mea nana e uhai aku ana, a ua hooko pono ia ia makemake o laua.

       "I keia wa hele koke akku la au ma kahi hookio kaaahi e ninau hou ai, a hai ia mai la au e ka agena kuai palapala holo kaa ua kuai aku oia he elua palapala holo no ke kulanakauhale o Genoa i kekahi keonimana i kulike na helehelena me ka'u i hoakaka aku la, aka, ma ka manao nae o ua agena nei, aole ia he keonimana Pelekane, a me he la ma kana hoomaopopo aku me he kanaka Geremania la, aka, ua maopopo iho la no ia'u o ua haku nei no keia a'u e hahai nei, no ka mea, ke kulike loa na hiohiona i hai ia mai la e ka agena, a no ia mea kau aku la au ma ke kaa e holo no Alexandria, kahi a ua haku nei me ke kaikamahine i holo aku la.

       "Oiai au maluna o ke kaaahi e holo nei, ua hai hou ia mai la wau e kekahi o na luna kaaahi ua ike oia i kekahi mau mea maluna no o keia kaa hookahi a'u e holo nei i kulike loa na helehelena me ko ka'u mea e huli nei, a he hiki iaia ke hooiaio mai ua ike oia ia laua i ka lele ana ma Alexandria, no ka mea, o ke kumu o kona hoomapopo loa ana, mamuli no ia o ka wawa ia no ka ui o ke kaikamahine opio e na mea a pau i ike ia laua i ka lele ana malaila, a ua lilo hoi ua kaikamahine la he puu nana na kela a me keia mea malaila i ko laua ee ana mai luna iho o ke kaaahi.

       "Mamuli o keia lono ua hoopiha hou ia iho la au i ka manaolana no ka loaa aku ia'u o ua haku nei, a aole hoi oia wale, aka, ua ike iho la au eia au ke hahai nei ma ke ala pololei, a oiai ua maa mau wau i na hoohoka o kela me keia ano ma ka'u oihana, aole au i lawe mai i keia mau lono i kumu no'u e hooiaio loa iho ai e paa koke aku ana na lawehala ia'u.

       "I ko'u hoea ana aku ma Alexandria o ka'u hana mua i hana ai oia ko'u hele ana ma na hotele a pau e nana ai i na inoa o na poe e noho ana a i ole i noho pana malaila, aka, aole he loaa iki ia'u o ka inoa a ka Haku Sheffield ma keia mau wahi. I ko'u ninaninau ana ua hai ia mai la au e ke kupakako o kekahi o na hotele malaila ua ike oia i kekahi keonimana me kekahi lede i kulike loa na helehelena me ko ka'u mau mea e huli nti, ua noho laua malaila he hookahi po, he olelo Farani ka laua e olelo ai, a i ke ao ana ae ua holo hou aku la laua maluna o ke kaaahi o ia kakahiaka, a o ka laua wahi nae i hele aku ai aole oia i ike. O ko laua mau ukana he mau pahu elua, a maluna o ua mau pahu nei e kau ana ka inoa 'Dumont.'

       "Aohe no i lawa keia mau mea no ka hooiaio pololei loa ana mai ia'u o laua na mea a'u e hahai nei, aka hoi, no ka like loa o na hiohiona i hai ia mai la ia'u me ko ua haku nei a me ke kaikamahine, ua hooholo iho la au e hahai no mahope o keia mau mea i kuhikuhi ia mai la ia'u, a e ninau hele aku ma na wahi hookio kaaahi a pau o keia kaona. Ma keia hana ana a'u pela, lohe iho la au ua holo akku ua mau mea nei no ke kulanakauhale o Torina, kau koke iho la no au iluna o ke kaa a holo aku la ilaila, a ilaila au i lohe mai ai ua haalele iho laua ia kaona ia la hookahi no a'u i hoea aku ai no ke kaona o Martigny, ma Switzerland.

                                                                                                                                                                                    (Aole i pau.)

____________________________________________________

AHA HOOKOLOKOLO APANA EHA o ko Hawaii Pae Aina. Ma ka hooponopono waiwai. Ma ka waiwai o S. R. Kuapuu, o Waimea, Kauai, i make.

       Ma ke Keena, imua o ka Lunakanawai Kaapuni.

       Ma ka heluhelu a me ka waiho ia ana mai o ka Palapala Noi a me ka Papa Hoike o John Kakina Lunahooponopono o ka waiwai o S. R. Kuapuu, no Waimea, i make, e noi ana, e aponoia na hoolilo he $110.84, e hoike ana o na mea i loaa mai iaia he $171.24. a e noi ana e nana a apono ia kela mau mea, a e kauoha ia e mahele i na waiwai e waiho ana ma kona lima i na mea i kuleana malaila, a e hookuu ana iaia a me kona mau hope mai ko lakou noho ana ma ia ano.

       Ua kauoha ia, o ka POAONO, ka la 4o AUGUST, M. H. 1888, ma ka hora 10 kakahiaka, imua o ua Lunakanawai la ma kona keena, ma ka Hale Hookolokolo ma ikoloa, oia kahi a me ka manwa i koho ia no ka hoolohe ana i ua noi la, a me na Papa Hoike i olelo ia, a o ka poe a pau i pili malaila, e hele mai a e hoike i ke kumu, ina he kumu io ko lakou, e ae ole ia ai o ua noi la, a malaila e hoike mai ai na hoike o na mea i kuleana maloko o ka waiwai i oleloia.

       A o keia kauoha, e hoolaha ia ma ka olelo Hawaii i ekolu pule maloko o ka NUPEPA KUOKOA, nupepa ma Honolulu.

       Kakau ia ma Koloa, Kauai, ko Hawaii Pae Aina, Iulai 5, M. H. 1888.

                                                                                                JACOB HARDY, Lunakanawai Kaapuni Apana Eha.  3189-3t

______________________

HOOLAHA HOU

_________________

HOOLAHA A KA LUNA HELU O KOOLAUPOKO

_____________

       E noho ana ka Luna Helu o keia apana no ka ohi ana i na auhau o keia apana ma na wahi i ko keia malalo:

       Iulai 16. ma Kualoa.

       Iulai 18, ma Waikane ma kahi o Kamealoha.

       Iulai 20, ma Kaalaea, ma kahi o Akana.

       Iulai 23, ma Heeia, ma ka Wiliko pake.

       Iulai 25, Waimanalo, ma kahi o J. Cummins.

       Iulai 27, ma Kailua, ma kahi o Holi.

       A mahope aku o ia manawa e noho paa ana ma Kaneohe ma na Poakolu a pau a hiki i ka la 29 o Augate.

                                                              WILLIAM HENRY. Luna helu o Koolaupoko. Kaneohe, Iulai 5, 1888.                2188-3t

______________________________

HOOLAHA LUNA HOOPONOPONO WAIWAI.

________________

       O na mea nana na inoa malalo iho nei na Lunahooponopono Waiwai o S. P. Luahine i make no Kalaupapa, Molokai, oiai, ua hoonoho pono ia maua e Hon. Geo. E. Richardson, Lunakanawai Kaapuni o Maui, ma ka la 14 o Iune, 1888. Nolaila, o ka poe a pau i aie i ka mea make, e hookaa mai ia J. M. Maunaloa, ma Kawela, Molokai, a i ole ia, ia Mrs. S. P. Luahine ma Waikapu, Maui. A o ka poe e paa ana i kekahi waiwai o ka mea make i aie ai, e hoike mai i ka lakou mau Bila o nele auanei.

                                  J.M. MAUNALOA, MRS. S. B. LUAHINE.  Na Lunahooponopono Waiwai o S.B. Luahine.  Lahaina, Maui, Iune 15, 1888.    2186-2t

_____________________

HOOLAHA HOOKO MORAKI ME KE KUAI.

__________

       MAMULI O KEKAHI MANA KUAI i hoike ia maloko o kekahi Palapala moraki i hanaia mawaena o Luukia w, a me Henry Hali kana kane mare o ka aoao mua a me Raymond Reyes o ka aoao elua, ma ka la 20 Iulai, M.H. 1885, i kakau kope ia ma ka buke 95 aoao 185 a me 186, a mamuli o ka uhai ia ana o na kumu aelike o kela moraki, nolaila, ke hoolaha ia kau nei e ka mea nona ka aoao elua o ua moraki nei, e hooko ana oia ia mana kuai, a ma ia hooko ana, e kudala akea ana ia i na apana aina i hoike ia ma ia moraki, ma ka POAKAHI, la : 6 o IULAI, 1888, ma ke keena kudala o J. F. Morgan, ma Honolulu, m,a ka hora 12 o ia la.

       Hanaia i keia la 20 o Iune, 1888.          RAYMOND REYES.   M@a Moraki Mai.

       Penei na aina e kudala ia ana:

       1.    Kela apana aina i ike ia ma ka Palapala Sila Nui helu 4732 nona ka nui 109 anana kuea, ma Manowai, Molokai.

       2.    Kela apana aina i ike ia ma ka Palapala Sila Nui helu 6042, nona ka nui 1.409 ana na kuea ma Ohia Molokai.                                          2186.3t

________________

HOOLAHA HOOKO NO KA MORAKI

___________

       I kulike ai me ka mana no ke kuai maloko o kekahi moraki i hana ia e James Keau, o Honolulu, mokupuni o Oahu ia Bishop & Co. o Honolulu, i kakau ia ma ka la 14 o Iune, 1883, a i kope ia ma ke Keena Kakau Kope ma Honolulu i ka Bukle 81, aoao 192, 193 me 194, nolaila, ke hoolaha ia aku nei ka hooko ia ana o kela moraki no na kumu i uhakiia ai, ma ka hookaa ole ia o ke kumupaa a me ka ukupanee, e kuai kudala ia aku ana i ke akea, ma ka rumi kudala a J. F. Morgan i ka POAONO, AUGATE, 18, 1888, i ka hora 12 awakea, i kela apana aina e waiho nei ma Aala, Honolulu, i hoikeia ma ka Palapala Kuleana Helu 5657, (na aina i haawi ia ia Uluoa, Helu 1087), me na hale a pau e ku la maluna o ka aina.

       No na mea i koe, e ninau ia Bishop & Co. a i ole, ia W.O. Smith, loio o ka mea i morakiia.           BISHOP &CO.  Honolulu, Mei 25, 1888  2182-6t

____________________________

AINA WAIWAI NO KE KUAI

_____

       He pahale nui a me na hale maikai ma ke kahua e kokoke nei iwaena o ke kulanakauhale, he 145 kapuai ke akea, 105 kapuai ma ke alo, a he 208 me 119 ka hohonu ma na aoao. He eiwa ka nui o na hale, a ua hoolimalimaia no ke $75 o ka mahina. O keia pahale, ke waiha hamama ia aku nei i na mea a pau e makemake ana.

       E ninau i ka HUI OIHANA AGENA HAWAII, Kihi o Alanui Papu me Kalepa.                                   2184

________________________

HOOLAHA HOOKO MORAKI ME KE KUAI

_________

       I kulike ai me ka mana o kekahi moraki i hanaia e Wong Leong & C. ia Jones & Co. ma ka la 11 o Ianuari, 1884, a i hoikeia ma ka Buke 87, aoao 329, nolaila, ke hoolaha ia aku nei ka hooko ia ana o ia moraki, malalo o ka uhaki ia ana o ka aelike, a e kudalaia aku ana ma ka rumi kudala o J. F. Morgan, i ka hora 12 awakea o ka POAONO, IULAI 14, 1888.

       No na mea i koe, e ninau ae ia W. R. Kakela ma kona keena loio.                    JONES & CO.

       O ka aina e kuai ia aku ana, oia no kahi o Leong Hop o ka hui mahi raiki ma Kailua, Koolaupoko, Oahu, he 125 eka ka nui, he aina waiwai no ke kanu raiki, a he nui no hoi ka wai.                                                                                                                                        2185-4t

_________________________

HOOLAHA HOOKO MORAKI ME KE KUAI.

_______

       I kulike ai me kekahi mana kuai i hookomo ia iloko o kekahi moraki i hana ia e Kaluna w., a me A. K. Palekaluhi, kana kane mare o Honolulu, Mokupuni o Oahu, ko Hawaii Pae Aina, ia Allen & Robinson o Honolulu i olelo ia, na mea i moraki ia aku ai, i hana ia ma ka la 3 o maraki A.D. 1884, a i kopeia ma ke keena kope o ke Aupuni ma ka buke 84 aoao 541 a me 472.

       Ke hoolaha ia aku nei ua makemake na mea i moraki ia aku ai ka aina e hooko i ua moraki la no ka uhaki ia ana o na kumu, oi hoi ka uku ole ia ana o ke kumupaa a me ka ukupanee i ka wa e hookaa ia ai, a ma ia hooko ana i ua moraki la e kuai aku ana ma ke kudala ma ka la 30 o IUNE, A. D. 1888, ma ka hora 12 awakea, ma ke keena kukai o J. F. Morgan, Luna kudala ma Honolulu, i na aina a pau i hoike ia malalo iho:

                                                              ALLEN & ROBINSON, Mea Moraki.                     Honolulu, Iune 8, 1888.

______________

       O na aina e kuai ia aku ana, aia ke waiho la ma Waimea, Mokupuni o Kauai, ko Hawaii Pae Aina, a ua hoakaka pono ia penei:

       1- O na aina a pau loa i hoakaka ia iloko o ka palapala kuleana helu 7672 palapala sila nui 4819.

       2- O ka aina a pau loa iloko o apana 1 o ka palapala kuleana 3353 palapala sila nui 5282.

       3- O ka aina a pau loa iloko o ka palapala kuleana 2982, palapala sila nui 5285.

       4- O ka aina a pau loa iloko o ka palapala kuleana 6565 palapala sila nui 5284.

       A me elua apana aina ma alanui Kula Hono[l]ulu, mokupuni o Oahu, hookahi apana he 5.8 eka a o kekahi apana he : 50-100 eka.                          2184-4t

______________________________________

JAMES M. MONSARRAT.

                     (MAUNAKEA.)

LOIO A HE KOKUA MA KE KANAWAI

He Luna Hooiaio Palapala.

       E hana ia no na Palapala Kuai, Palapala Hoolimalima, a me na palapala pili kanawai e ae ma ka olelo Hawaii. Dala no ka hoaie ma ka moraki ma na waiwai paa.

              KEENA HANA:  Alanui Kalepa.

________________________________

HALEKUAI BIBI HONOLULU.

(Hope o Wm. McCandles.)

HELU 6. ALANUI MOIWAHINE. MAKEKE MA U@@KOHEO.

       Na Bibi momona. Hipa. Puaa me Ia. na lako ai ulu @ co.

       O na kauoha a na ohana a me na moku mai e hooko koke ia no me ka eleu a me ka hikiwawe.

       O na holoholona ola no na moku e hiki no ke hooko koke ia.

       Telepone Helu 212                                                                                2185-tf

_____________________________

UA LOAA MAI NEI HE MAU PAHU SAMANO HOU

       Ano no ia i hiki mai nei, a e kuai ia aku me ka

Makepono Loa

na makamaka ono i na Samano ono. E wiki mai o hala ka wa pono.

2286-1m                    KAKELA ME KUKE.

________________________

E HOOLOHE

       Na kanaka a pau ma keia la 21 o Iune, A. D. 1888, ua hoonoho aku maua ia Rufus A. Lyman Esq. o Paauhau, Hamakua, Hawaii, i hope no maua e ohi, e hoopii aku a e lawe mai i na uku hoolimalima, a me na aie mamuli o ka uku hoolimalima i loaa a i kupono ke loaa ia maua mai ko maua aina mai e waiho ana ma Waipio, Hamakua, i olelo ia, oia hoi ka aina nona ke kuleana helu 6955 i haawiia no Kaholo a nona ka nui 4 5-100 eka a e hana hoi i na hana a pau i kupono maoli ia hana.        KAIAHUA   kona X kaha

AKIONA    kona X kaha

       Honolulu, Iune 21, 1888.                                   2186-3t

________________________________

ELIMA DALA MAKANA.

_________

       O ka mea e malama nei i kekahi helu o ka nupepa KUOKOA o ka makahiki 1883 a 1884 paha, e pili ana i ka hoolaha hoohui a na lala o ka hui Kalepa Hawaii ma Kahalii, Hilo, Mokupuni o Hawaii, e loaa na dala makana elima iaia no 1 helu wale no, ke hoouna pololei ia mai i ka mea nona ka inoa malalo nei.

       O ka mea puka mua mai nae, a e hoouna pololei ia na dala elima ma ka inoa o ka mea nona ia nupepa, ma ka Bila Kikoo Hale Leta o Hilo.

       Eia na inoa o na lala i hoohui ae ia lakou iho e lawelawe ma ka Oihana Kalepa Lole a pela aku, ma Kahalii, ma keia inoa "Hui Kalepa Hawaii."

                                  J. Kalua

                                  Joela

                                  Kaihupau

                                  Kaliula

                                  Keka

                                  Kaawa

                                  Kaiakoili

                                  Manu

                                  Kaili Maikaaloa.

JOSEPH MAIKAALOA KAUHI (opio), Manager Clerk, Komisina Ohi Aie.              Mokuhooniki, Hilo, Hawaii,                 2186-4t

________________________________

Pahu Hale Leta 351.                                                                                                                                                                       Bele Telepone 271.

KA AGENA OIHANA HAWAII.

No. 68 ALANUI PAPU KIHI O ALANUI KALEPA, HONOLULU, H. I.

HE AGENA OIHANA, A ME AGENA OHI DALA NO NA BILA A PAU.

KEENA OIHANA.

Na Waiwai paa--kuai a hoolilo aku, a me auhau uku ana.

Na Hale hoolimalima, Rumi, Keena, Aina e hoolimalima, a aelike e ohi i na uku hoolimalima o na ano a pau.

Na Moraki e ae ia ma na ano waiwai a pau.

Na Pepa kuleana aina, e kakau a hooponopono ia me na Pepa a pau e pili ana ma ke kanawai.

Kope a me ka Unuhiolelo ma na olelo a pau iloko o keia aupuni.

Na Panihakahaka ola, Hale, a me na waiwai o na ano a pau i na Ahahui Panihakahaka helu ekahi.

Na Malama ana i na Buke a me ka hooponopono ana.

E haawi ia no ka mikiala no na Ohi aie ana.

Na Gula, Kala me na Bila kikoo dala, kuai a hoolilo.

Na Hooponopono Hale Dute e pili ana i na waiwai mai ko na aina e mai.

Na Ukana o kela a me keia ano, e kuai a hoolilo aku.

Na Kauoha o na Mokupuni, e hooko ia no me ka eleu.

       O na hana a pau a na makamaka e haawi mai ana no ka hooko aku i ke kauoha, e hooko ia no me ka eleu a me ka mikiala.

                                                                                                              Agena Oihana Hawaii.                                2170 1 yr. Mar.

______________________________________________________________

FRANK GERTZ,

103 Alanui Papu

BOOTS & SHOES

UA WEHE AE NEI AU I NA KAHIKO AULII O NA

Kamaa o na Ano a Pau

No na Wahine, na Kane a me na Keiki i wae pono ia e Mr. Gertz iloko o Amerika.

________________o________________

                                               HE OLUOLU KE KUMUKUAI MA KE KU IKE

_________________o________________

E loaa mau mai ana na waiwai ma na mokuahi a pau.

mr 31-tf

_______________________________________

B. F. EHLERS & CO.,

PAINAPA.

Poe Kuai i na Ano Lole a Pau.

Helu 99 alanui Papu. - Honolulu

____________

       E loaa mau ana na lole hou o na ano a pau maluna o kela a me keia moku.

___________________________________

Ka Waiwai o ka Hilinai

________

KA AYER Laau Sasaparila kai kaulana a hilinai nui ia no ka hoomaemae koko, ma na wah a pau o ka honua, no aneane 40 makahiki i haia ae nei, a ua                  lawelawe nui ia hoi iwaena o na oihana @@@au.  O keia

LAAU SASAPARILA, no loko ae ia o keia Sasaparila Honedura maoli; ua loaa ka mana hoomaemae ma o ka hui pu ia ana me kekahi mau aa laau e ae, a me       kekahi mau mea no loko o ka honua a me ka hao.

       He koko inoino a nawaliwali anei kou? Ua awili pu anei me na ano mai ikaika? A ua hui pu anei me na wai awaawa hoopehu.  Na keia

LAAU e hoomaemae ua mau mea ino a pau, a maikai.  O na kauka lapaau a pau o Amerika ike ke ano o ka AYER SASAPARILA, ua olelo lakou, aole he mea maikai e ae no ka hoomaemae koko ana mai na mai i awili pu ia, aka o keia wale no. No ka

HOOMAEMAE ana i ke koko, a me ka hookahua pono ana i na mea a pau ma kekahi mau ano mai i ikeia, o ka AYER SASAPARILA wale no ka laau nana e       hoomaemae hakalia ole mamua ae o kekahi ano laau e ae    O ke

KOKO ino hakuhaku, a nawaliwali hoi kona holo pono ana ma ke kinok e hoomaemae ia a e hooikaika pu ia no hoi ma o ka ai ana i keia LAAU                      SASAPARILA  A  AYER.  He maalahi a he

MAIKAI loa hoi keia Laau, aole no ka hoomaemae wale ana no i ke koko, aka, no ka hookaawale pu ana kekahi i na ma'i, hoomomona hou ana i ke koko ino, a me ka hooikaika pu i kona holo pono ana ma na aa. He lehulehu wale na hooia ana mai na wahi a pau o ke ao nei i hoohana mau i keia laau mamua o kahi        mau laau e ae.

A HILINAIIA no ka ikaika kupono o ke ola kino, ma ka maemae ana o ke koko, hoomake pu ia na ma'i a pela aku. He nui na laau hoomaemae koko i hoolaha    wahahee wale ia malalo o na inoa lehulehu, aka, o na hilinai a me na hooia wale no a ke ao holookoa, maluna o ka

Ayer Laau Sasaparilla.

I HOOMAKAUKAUIA E

Kauka J. C. Aver & Co., Lowell, Mass.

HOLLISTER & CO.

Na A ena ma ka Paeaina Hawaii.

Helu 100.  . . . Alanui Papu, Honolulu                                                                   2086-tf

________________________________

NA HOOLAHA KUMAU

KAKELA & KUKE.

 HALEKUAINUI O NA WAIWAI.

E laa na pahiolo, koi hole, 

e hamale, koi nui a me liilii, kila,

wili puaa, rula, apuapu, kai o na ano a pau, 

kala kaa , hao hoopaa puka

 

pohaku hoana kepa, lei ilio, kaula hao ilio, pahi, upa, pahi umiumi, kalapu, 

kope hulu, pulupulu, oepa kalakala, lina hao, ami, keehi, a me ke 

 

KAULA OPU

 

Palau o na ano a pau,

Oo, ho, koala, pe, kipikua, hao kope, au ho a pela aku, kua bipi,lei bipi, kaula hao bipi, uwea pa, uwea keleawe, hao pili. piula, kaapalala, ipuhao, ipu ti

 

PA-PALAI MAKAU ME KE AHO

 

 

Ili wai, papa holoi, kopa ala, kaula kuaina, hu'akai, ehi wawae, hulu pena, a pela aku.

Pena wali, kini nui a me liilii o na ano a pau, me ka pepa kuhikuhi, pena keokeo, aila pena, aila hoomaloo, vaniki kaa, a me vaniki moe;

 

 

PENA HOOMALOO

-a me aniani hale-

 

AILA MAHU, AILA MIKINI, AILA HAMO ILI, AILA KAA, INIKA KAMAA.

 

PAUDA, KUKAEPELE, KIANA PAUDA, UIKI IPUKUKUI O NA ANO HE NUI A LEHULEHU.

 

LOLE MAKEPONO

 

E laa na

 

AHINAHINA, KALAKOA. KEOKEO, LEPONALO, HULUMANU, UWE-WAHINE, KUI HUMUHUMU, A ME KA LOPI.

 

Ke Kuike e loaa no la ma kahi o 

Kakela & Kuke!

–––––––––––––––––––––

 

NA MEA PIULA

 

Mikini Humuhumu

 

Mekini a WHEELER a me WILSON

 

MIKINI A WILCOX ME GIBBS

 

NA MAKINI A

-REMINGTON-

 

He nui loa na mea hao me na ukana e ae o na ano a pau, aole hiki ke hai pau ia aku, hewa i ka wai na maka ke ike.

 

Laau Lapaau Kaulana Loa

A DR JAYNE.

LAAU HOOMAEMAE KOKO LAAU HOOPAU NAIO, LAAU KUNU, PENIKILA, HUAALE PAAKAI, LAAU HOOPAAHI. A

 

Me na Laau Hamo a Pela 'ku.

 

Kakela me Kuke.