Ka Nupepa Kuokoa, Volume XXVII, Number 32, 11 August 1888 — Page 3
| This text was transcribed by: | Uluwehi Sai |
| This work is dedicated to: | Ia Keaka Sai |
Ka Nupepa Kuokoa
KE KILOHANA POOKELA NO KA LAHUI HAWAII.
MA KE KAUOHA.
(graphic)
Ahaolelo o ke Kau o 1888.
HE KANAWAI
F. HOAKAKAK ANA NO KA HOEMI ANA I NA WA HOOPAAHAO O NA LAWEHALA MA KEKAHI MAU HIHIA.
E hooholoia e ka Moi a me ka Ahaolelo o ko Hawaii Paeaina.
PAUKU 1. O kela a me keia lawelawe i hoopaahaoia iloko o kekahi halepaahao, a wahi hoopaa paha o ke Aupuni, malalo o ka hoopai hana oolea a kekahi Aha Hookolokolo o ke Aupuni, e loaa no iaia mamuli o kana hana maikai mau, a hana ku paha i ka hooponopono, oiai @@@ e hana ana no kona hoopai, keia mau hoemi ana i hoikeia malalo, no kela a me keia mau malama ekolu o kona wa hoopai, oia hoi, penei:
Ka mua o na mahina ekolu, ehiku la.
Ka lua o na mahina ekolu ewalu la.
Ke kolu o na mahina ekolu, eiwa la.
Ka ha o na mahina ekolu, umi la.
A pela aku e pii hele ai, i hookahi la hou aku no kela a me keia mau malama ekolu a pau mahope aku.
PAUKU 2. Okela a me keia lawehala i hoopai dala ia, i hoopaaia ma ka hana oolea no ka hiki ole ke hookaa i ona hoopai, e like me ke kanawai, e loaa no ia ia na la oemi ma ke ano like no me ia i hoakaka ia, no na laweala i hoopai hana oolea ia: e loaa no nae ia ia keia hoemi ana no ka manawa wale no i hana maoli ia iloko o ka halepaahao.
PAUKU 3. E hiki no i kela me keia lawehala no kekahi hana pono ole, a kumu kupono e ae paha i hanaia, mamua o kona hookuuia ana mai ka halepaahao aku, ke hoonele ia i ua mau la hoemi nei a pau, a i kekahi hapa paha o ua maa la hoemi nei i loaa aku ai ia ia, a no na hana maikai, a hana ku paha i ka hoopono, a kumu kupono e ae paha, i hana ia mahope mai, e hiki ai no ke loaa hou aku ia ia ua mau la hoemi nei a pau, a o kekahi hapa paha o ua mau la hoemi nei i hoonele ia ai oia.
PAUKU 4. O ka haawi ana aku, a me ka aua ana mai, a me ka hoonele ana, a me ka hoihoi hou ana aku i keia mau la hoemi i hoakakaia ma keia kanawai e lilo ia na ka Papa alakai o na halepaahao e hana mamuli o ko lakou manao he pono.
A no na lawehala i hoopaaia ma na halepaahao e ae o ke Aupuni mawaho ae o ka Halepaahao Oahu, e hiki no i ka Papa Alakai o na halepaahao ke haawi i na luna o na halepaahao, a poe e ae paha a lakou i manao ai he pono, i ka mana e hiki ai ke haawi aku, aua mai, a hoonele aku, a hoihoi hou aku paha i ua mau la hoemi nei o na olawehale, i hoopaaia ma ia mau halepaahao, me ka mana pu no ia lakou e hoopau ai i kela mana i haawiia e lakou, ke manao lakou pela.
PAUKU 5. Ma kekahi manawa kupono o loko o na malama o Ianuari, Aperila, Iulai a me Okatoba, o kela a me keia makahiki, e hoike aku ai ka Papa nana o na halepaahaahao, i kela a me keia lawehala i ua mau la hoemi nei i haawiia aku, aua ia mai, a hooneleia paha, a i hoihoi hou ia aku paha, i ua lawehala nei o na mahina ekolu i pau aku, me ka hoike pu aku i na kumu o ka haawiia ana, aua ia ana, hoonele ia ana, a hoihoi hou ia ana aku paha, o ua mau la hoemi nei, a e hiki pu no hoi i ua mau Luna Nana nei, ke manao lakou he pono, e hoike aku i ke kulana o na hana a kekahi lawehala, imua o kekahi o na lawehala, a imua paha o lakou a pau, o loko o ka halepaahao.
PAUKU 6. E malama ia kekahi buke moolelo kupono, a mau buke paha, ma kela a me keia halepaahao, a e kapaia o ka Buke o na la hoemi, a malaila e kakau ia ai na inoa o na lawehala a pau e noho ana malalo o na hoopai, a i hoopaa ia iloko o ia halepaahao. Ma ia Buke no hoi e kakau ia ai ma kekahi aoao kaawale, ka inoa o kela a me keia lawehale, a malalo aku e kakau ia ai me ke akahele, ka moolelo o kana mau hana, a me na la hoemi i loaa aku ia ia, aua ia mai paha, hooneleia paha, a hoihoi hou ia aku paha ia ia, me na kumu pu hoi o ka loaa ana ia ia, aua ia ana, hoonele ia ana paha, a hoihoi hou ia ana aku paha, o ua mau la hoemi nei.
A o keia mau moolelo, a i ole o na kope oiaio paha o ia mea, ke hoike ia i ka Ahakukamalu i ka wa e noonoo ia ai na noi pili i ka lokomaikai Alii.
PAUKU 7. O na la hoemi i hoakaka ia ma keia Kanawai, ua hiki no ke haawiia i na lawehala i hoopaiia mamua ae o ka lilo ana o keia i kanawai; aka nae, e ae wale ia no mai ka la aku i apono ia ai.
O na la i hoemi ia no kekahi lawehala mamua aku o ka la i apono ia ai keia Kanawai, a i loaa aku ia ia malalo o ke Kanawai mua, e kakau ia no ia, ma ka moolelo o ia lawehala, a e houluulu pu ia ia mea me na la hoemi i loaa aku malalo o na haawina a keia Kanawai.
PAUKU 8. O na Kanawai a me na hapa Kanawai e kue ana i keia, ma keia ke hoopau loa ia nei.
PAUKU 9. E lilo keia i Kanawai mai kona la aku e aponoia ai.
Aponoia i keia la 23 o Iune, M. H. 1888.
KALAKAUA REX.
Na ka MOI:
L. A. THURSTON,
Kuhina Kalaiaina.
HE KANAWAI
E PILI ANA I KA WAIWAI A ME NA PONO O NA WAHINE I MARFIA.
E hooholoia e ka Moi a me ka Ahaolelo o ko Hawaii Paeaina.
PAUKU 1. O na waiwai paa a me ka waiwai lewa o kekahi wahine i kona manawa e mare ai e mau no ia i waiwai kaawale nona a e kaawale mai ka hooponopono mana, a me na aie o kana kane; a e hiki no i ka wahine i mare ia e lawe mai, paa, hooponopono a hoolilo aku i ka waiwai paa a lewa paha e like me he mea la aole oia i mare ia, aka nae aole e ae ia oia malao o keia Kanawa e hana i kekahi palapala kuai a moraki paha o kona waiwai paa me ka ae ole o kana kane i kakau ia ua ae ana la.
PAUKU 2. E hiki no i ka wahine i mare ia e hana i na aelike ma ka waha wale no, a ma ke kakau ana paha, i sila ia a i sila ole ia, e like me he mea la aole oia i mare ia, koe wale no aole oia i ae ia ma keia e hana i aelike na kana hana kino ponoi me ka ae ole i kakau ia e kana kane aole no hoi oia e hana aelike me kana kane.
PAUKU 3. O na hana a pau i hana ia a i hooko ia e kekahi wahine i mare ia no kekahi mea e aku aole o kana kane a me kana mau keiki e manao ia no ina aole he aelike maopopo e hoike okoa ana, ua hana ia a hooko ia paha ma kone pomaikai ponoi iho.
PAUKU 4. E hiki no i kekahi wahine i mare ia e lilo i Hookokauoha, Luna Hooponopono Waiwai, Kahu, a Malama Waiwai paha, a e hoopaa ia ia iho, a me ka waiwai ana e malama ana me ka hana, a ae ole ia mai e kana kane.
PAUKU 5. E hiki no i kekahi wahine i mare ia, e hoopii aku, a e hoopii ia mai, e like me he mea la aole oia i mare ia aka nae nae aole e manao ia ma keia Pauku, ua ae ia na hoopii mawaena o ke kane me kana wahine i mare ia.
PAUKU 6. Aole kau ia maluna o kekahi wahine i mare ia, na aie o kana kane, aole no hoi e hiki ke lawe ia kona waiwai ma ka hoomalu ana, a ma kekahi palapala e ae paha e kue ana i kana kane, koe wale no ma ke ano i hoakaka ia ma ka Pauku 10 o keia Kanawai.
PAUKU 7. Maluna o ke kane ina paha ua mare ia iloko o keia Aupuni, a ma kekahi aina e paha, a e noho ana maanei, e malama i kana wahine, oiai e paa ana ka mare, e like me kona malama ana ia ia iho, a e ili no maluna ona na aie a pau o kana wahine i aie ai no na mea kupono nona a me kona ohana iloko o ka wa mare, koe nae na aie i aie ia e ka wahine iloko a e pil ana i ka lawelawe ana i kekahi hana kaawale ana i lawelawe ai i like me ka mea i hoakaka ia ma ka Pauku 10. E ili no maluna ponoi o ke kane na hana hewa a pau a ka wahine i hana ia ma kona mana, a ae ana paha, aole no kekahi mea e ae. Ina e make mua ka wahine, me ke kauoha ole, alaila e ili koke aku no kona waiwai i kona mau hooilina eia no nae ina e make kauoha, a kauoha ole paha aia e loaa no kana kane mare ke kuleana oiai oia e ola ana iloko o ka hapakolu o ka waiwai paa o kana wahine.
PAUKU 8. Aole no e hoopii ia ke kane mare ma kekahi hoopii, ina ua ulu ae ia mea e kue ana i kona wahine mamua o ko laua mare ia ana, aole no hoi oia e koi ia e uku i kekahi mea i hooholo ia e uku ia e kana wahine, koe wale no e like me ka mea i hoakaka ia ma ka Pauku 10.
PAUKU 9. O na aelike i hana ia e kekahi wahine i mare ia e pili ana i kona waiwai kaawale, hana lima, oihana, a hana maoli paha, aole no ia e kau ia, a paa paha maluna o kana kane koe ma ke ano i hoakaka ia ma ka Pauku mahope iho nei, aole no hoi e hoopaa ia ia a me kona waiwai no ia mea, aka o ka wahine no a me kona waiwai kaawale no ka hoopaa ia ma ia mau aelike, e like no me he mea la aole oia i mare.
PAUKU 10. Ina e hana kekahi wahine i mare ia, a ua manao paha e hana ma ke ano kaawale, nana no, a i ole ia na kana kane e waiho aku ma ke Keena o ke Kuhina Kalaiaina, i palapala hoike, e hoakaka ana i ka inoa o ua wahine nei, a me kona wahi noho, a me ka inoa a me kahi noho o kana kane; i ke ano o ka hana, a me kahi o ia hana, a i manao ia paha e hana, me ka hoakaka, ina he mea hiki, i ka inoa o ke alanui, a me ka helu ma ia alanui; a ina e hoanoe ia ka hana, a hoonee ia paha ma kahi e aku, e waiho ia aku i palapala hoike hou. Na ke Kuhina Kalaiaina e kauoha e malama ia i buke, a maloko o ia buke, e kakau ia ai na palapala hoike i waiho ia aku a e auhau aku oia i hookahi dala, no ke kope ana i kela a me keia palapala hoike. E hana ia ua buke la ma ke papa kuhikuhi kupono, a iloko o na hora hana a pau e hamama no ka nana ia e ka lehulehu me ka uku ole. Ina aole e waiho ia aku ka palapala hoike e like me ka mea i olelo mua ia alaila, e hiki no ke hoomalu ia ka waiwai lewa, e hoohana ia ana ma ia hana, ma ke ano he waiwai no ke kane, a e lawe ia ma ka palapala ohi e kue ana ia ia, a e hoopaa ia no ke kane ma na aelike a pau, i ku i ke Kanawai i hana ia, e pili ana i ua hana nei, e like ke ano, a me ka nui, me he mea la he mau aelike i hana pono ia e ia.
PAUKU 11. Aole e lilo kekahi mea i hoakaka ia ma na Pauku mamua ae i mea e lilo ai na aelike i hana ia mamua o ka mare ana, i mea ole.
PAUKU 12. O na Pauku 1286 a me 1287 o ke Kanawai Kivila a me na Kanawai a me na hapa Kanawai e ae a pau e kue ana i keia, e hoopau ia a ma keia, ke hoopau loa ia nei.
PAUKU 13. Aole e lilo kekahi mea maloko o keia Kanawai i mea e kue ai i kekahi mau pono i ka waiwai i loaa mua mamuli o kekahi Kanawai e paa nei i keia manawa.
Apono ia i keia la 23 o Iune, M. H. 1888.
KALAKAUA REX.
Na ka Moi:
L. A. THURSTON,
Kuhina Kalaiaina.
Kela me Keia.
Eia ke hana a ke hoomaemae hou ia nei ka mokukuna Kauikeaouli makai o ka uwapo o Ema, Ulakohea.
Ua hoomaka ia ka hana i ke kahua o ko A. J. Kakalaika hale uinihepa hou ma Waikiki iho o Kalakaua Hale.
Ua lohe hoi ia mai, ua bito hou ke Alii ka Moi i ka Bila Kanawai hooponopono i na buke oihana
Ua ike hou ia ke alalauwa maloko nei o ke awa i keia mau la, a ua haiamu ia na uwapo i nehinei a i ka po nei e na poe lawaia me na makoikoi.
E hookuku kinipopo hou ana ua keiki aukai o na mokukaua Omaha a me Vandalia i ka auina la o keia la ma ke kahua mau na Makiki.
E holo balota alii ana o J. L. Kaulukou no ka mokupuni o Ohu nei, ma kahi hakahaka o Ka Hon. S. G. Waila i make.
Mawaena o ka poai o na koa, o ke koho ana i kenela no na bataliona elua, oia ka lono ano nui ma ko lakou mau poai iloko o keia mau la. O ka inoa koho nui ia,oia no o V. B. Akepoka.
E hui ana ka Aha Elele o ka aoao Hoomaemae no ke koho ana i ka lakou moho no ka noho alii, i keia ahiahi hora 7, ma ka rumi ahaolelo o Aliiolani Hale.
Ua holo makaikai aku ke Alii ka Moi iluna o ka mokukaua Amerika Omaha i ke awakea Poalua nei, a ua haawi ia n kipu aloha ana i kona hiki ana aku me ka hoi ana mai.
He nui na leyta a na makamaka i loaa mai ia makou, aka, no ko makou haiki i ke Kanawai e puka mau aku nei, ua hookaulua iki makou a loaa ka wa kaawale. mahalo i ko oukou mikiala.
Ua holo aku ka mokukuna Luka i ka Poalua nei no Kohala, Hawaii, a ua halawai nae oia me ka ino ma ke Kowa o Pailolo, mawaena o Molakai a me Lanai, nolaila, ua huli hoi hou mai oia i ke awa nei.
Ma ka pepa o keia la, ke puka aku nei ke Kanawai e pili ana i ka hoemi ia o ka hoopai o na lawehala ke malama pono i na rula o ka halepaahao. Pela pu me ke Kanawai o ka waiwai o na wahine i mare ia. E nana ae e na makamaka i keia mau Kanawai.
O ka holo ana aku nei o Mr. Taro Anado, Agena Pili aupuni a Kanikela o Iapana maanei, ma ke Kinau o ke ahiahi Poalua nei, oia kona hele nana a makaikai ana i ke kulana a me ka nohona o kona mau hoalahui ma na mahiko.
I ka Poaha nei ka noonoo ia ana o ka bila kanawai koho balota, oiai he bila loihi he 100 a oi pauku, ua pau nae i ka hana ia he 30 pauku me na hoololi ma kekahi mau pauku, a he hookahi pauku i hoopanee ia mahope e noonoo hou ai.
Ua loaa mai he leta ia makou mai a Mr. W. A. Kiha mai o Waipio, Hamakua, Hawaii, e hoike ana kana kula kuokoa ma ka olelo Enelani, ke hiki aku i ka la 29 me 30 o keia mahina. Ua makemake ia na makua a me ka lehulehu pu, e akoakoa nui ae ma ko lakou halekula kahi o ka hoike e malama ia ana.
O ka hora 12 awakea o keia la, e hoohui ia aa ma ka berita maemae o ka mare o Mr. Johan McCandless me Miss malie Kaluna o Honolulu nei. O ka makou kalokalo e ae nei i na Lani, e hahai ia ko laua alahele o keia ao nei me ka oluolu a me na pomaikai. He ahaaina nui ke malama ia ana ma kahi noho o Mr. K. P. Kaluna, ma Kapuukolo.
KA NINAU MAI LEPELA.
Ua ike wau, a me ka ahahui Opiopio holookoa o Kanaio nei, i ka ninau a Keanuoaipo o Kekaha, Kauai, nona ke poo – Hookoloia i ka nui manu.”
He mai lele aenei ka lepera aole paha.
Malalo o ka waiho laula ana mai o ka ninau i mua o na Ahahui Opiopio e ae o ko Hawaii Pae Aina, eia ka makou haina malalo o ka ninau a na ka Lahui e kaupaona i ka oiaio, a me ka ole.
He mai lele ka mai lepera aole paha? haina. Aole. He mai kumu ka mai lepera aole no he mai ano pale iho nei aka mai kahiko loa keia.
Pehea e akaaka ai he mai kahiko mai keia?
Oia ka wa o Iesu Karisto i keia ao e noho ana oia e like me ko kakou nei a iaia e kaahele ana i na Lahui kanaka oia au e ao ana i ka pono o ka olelo a ka Haku.
Mamua o kona hiki ana i ka palenaaina, ua nui na kanaka i ukali mai iaia, i kona iho ana mai, mai ka mauna mai a he lepera kekahi i ukali mai iaia, a ua hoola ia e Iesu ua lepera la no kona manaoio ana i ka Haku Iesu Kristo. E nana Mataio VIII.3-
Akahi mea e akaaka ai he mai kumu a kahiko loa keia, a i na e nana hou aku ana oe ma ka Euanalio i kakauia e Luka mok-17: 11-15; alaila, e ikeia ana no na lepera he umi i hoolaia e Iesu, malaila, nolaila, mai ia wa mai a hiki i keia wa ka mai lepera e laha nei mawaena o na lahui kanaka a o keia au e nee nei, aka o ka oi loa aku nae o ka iwi ona iwi, a me ka io ona io, ou e na Hhawaii e ulupa ia nei e ke ahi weliweli he lepera, e ai humuhumu nei i ko kakou mau hoakanaka Aloha wale kakou e Hawaii Ponoi.
Ahaha la ka laau lapaau e oki ia aku ai i keia kupua ino mai ou aku a o kakou no a pau e na Hawaii oiaio? eia hou a haina, pokole, a ina aole o ka pau no ia.
Elike me ka Haku i ao mai ai ma kana olelo ma ka Buke nui hemolele e ao mai ana, e hoi na kanaka apau i ka mihi a i mihi ole e make no, oia, ua hai mai oie e mihi, a o ka mihi kai kauohaia mai ia kakou mai, o ka lehelehe wale no?
Aole! Aole!! O ka mihi me ka manaoio imua o ke Akua no na hewa au i hahai ai i kona mau kanawai, e like me Kokoma a me Komora a pela no me ka wa ia Noa Nolaila ke kumu o keia luku o ke Akua i keia mau kulanakauhale a me ka wa ia Noa? Aole anei no ka hewa, he manao makou oia no na kumu nui o keia mau haawina e kau nei maluna ou e Hawaii Ponoi, oiai ua paa kakou i na kaula hakiikii o ke kanawai o ke Akua, i keia wa.
No keia mau haina a me na wehewehe maluna ae, a keia ahahui, i mua o ke akea, nolaila eia ka makou leo poloai i ka iwi, o ko makou iwi, a me io, o ko makou io, e kuekaa iho ma ka Baibala mai ka mua a ka hope.
Nolaila ke waiho nei makou na ka lahui e apono ae, a hoahewa mai i ka makou mau hoakaka ana, no keia ninau nui, nolaila ua lawe mai makou ma keia.
Aloha e ka Lahui mai Hawali o Keawe, a Kauai o Mano.
Me ka mahalo.
Na ka Ahahui Opiopio Imi Pono Karistiano o Kanaio, ma o
George P. Zekaria,
kakauolelo o ka Aha.
Kanaio Iulai 18, 1888
[Aohe i ku like ko makou manao me ko oukou, ina o ka Bibala a me ko Iesu mau pono ka oukou e hana ai, he au okoa ia. O ke ano nui o ka manao i hoopuka ia, e lele io mai anei ka mai lepera maluna o kekahi kino ola maikai ina e hoohuihui pu oia iaia iho ma ka noho pu, ai pu, moe pu a pela aku, a pehe kakou e hiki ai ke pakele, a heaha ka kakou e hana ai. L. H. @
AHA KAAPUNI APANA EKOLU.
Ke hoolaha ia aku nei ma keia, o ka Aha Kaapuni Apana Ekolu o waiohinu, Kau, Hawaii, ua hoopanee ia a ka Poakahi, Seqatemaba 10, a ke kauoha ia nei na lawehala e hiki ae ma ia la, ma kahi mau, aole hoi mamua ae.
L. McCULLY,
Lunakanawai o ka Aha.
Honolulu, Aug. 7. 1888. 2293 3t.
HOOLAHA LUNA HOOKO.
Ua hookohu pono ia ka mea nona ka inoa malalo i Luna Hooko no ka waiwai o Maria King, o Honolulu nei i make, nolaila, ke hoolaha ia aku nei na poe a pau he mau koi ka lakou i ua waiwai nei, ina paha malalo o ka moraki a ma kekahi ano e ae paha, e hoike koke mai maloko o na mahina eono mai keia la aku me na hooiaio kuponom, a i ole, e hoole mau loa ia aku no.
A o na poe a pau he mau aie ko lakou, ke kauoha ia aku nei lakou e hookaa koke mai ma ko’u keena Helu 3, alanui Kaahumanu, Honolulu.
J. CARTWRIGHT,
Luna Hooko Waiwai o Maria King.
Honolulu, Iulai 31, 1888. 2192-3t
AHA HOOKOLOKOLO AANA EHA o ko Hawaii Pae Aina. ma ka hooponopono waiwai. Ma ka waiwai o Jeo. Liilii o Lihue, Kauai, i make kauoha ole. Imua o ka Lunakanawai Kaapuni ma ke keena.
Ma ka heluhelu a me ka waiho ana mai o ka palapala noi a Hana ka wahine kane make a Jeo. Liilii e hoike mai ana, o Jeo. Liilii no Lihue, Kauai, ua make kauoha ole ma Lihue ma ka la 7 o Aperila, 1888, a e noi ana e haawiia ka palapala hookoho lunahooponopono waiwai ia S. Kaiu.
Ua kanohaia o ka POAONO, ka la 4 o AUGUST, 1888, ma ka hora 10 o kakahiaka, oia ka manawa i kohoia no ka hoolohe ana i na noi la, imua o ua lunakanawai la ma ka hale hookolokolo o keia aha, ma Koloa, a ma ia manawa a ma ia wahi no e hele mai ai na mea a pau i pili e hoike mai i ke kumu, ina he kumu oiaio ko lakou e ae ole ia ai ua noi la. A o keia olelo kauoha e hoolaha ia ma ka olelo Hawaii i ekolu pule ma ke KUOKOA nupepa ma Honolulu.
Kakauia ma Koloa, Kauai, ko Hawaii Pae Aina, July 5, M. H. 1888.
JACOB HARDY,
Lunakanawai o ka Aha Kaapuni Apana Eha. 2189-3t
OLELO HOOLAHA NO KA O LIMA.
E ike auanei na mea a pau, ua makaukau ka Papa Ola e haawi i ka e lima ana me ka ukuole i na mea a pau i e ole ia, a ke kauoha ia aku nei na makua a mea paha e paa ana i ke keiki e like me ia i kuhikuhi ia e na pauku 311 a me 312 o ke Kanawai Kivila, e hele mai ma ka Hale Haawi Laau o ka Papa Ola @ Kapamoo, ma alanui Hotele, ma na hora hana o ke Kauka Aupuni i hai ia malalo iho nei:
{Mai ka hora 8
Hora Hana {A “ “ 10
{kakahiaka.
N. B. EMERSON,
Pelekikena o ka Papa Ola. jm 6-6m
KE KULA KAMEHAMEHA NO NA KEIKIKANE LIILII.
E makaukau ana ke Kula Kamehameha no na keikikane liilii, no ka @po ana aku i na haumana ma ka POALUA hope o OKATOBA, 1888.
Ua kaupale ia ka heluna o na haumana e komo mai ai i keia makahiki mai ka makahiki ehiku a i ka makahiki umikumamalua, a no ka poe a pau i ake e komo ae ma ia kula no ia mua aku, e hoike ae ma ka la—o Okatoba, 1888.
Kekahi mau mea e ae e hoolako ia ana e na haumana pakahi, e hoouna ia ae ke ninau mua ae i ke kumu.
E loaa mua i na haumana na apono mai ke kauka no ko lakou kulana ola maikai.
He kula keia e hoomakaukau no ke komo ana aku i ke kulanui Kamehameha, a e hoomaamaa ia no na keiki ma na huahelu, hopunaolelo, a me ka himeni.
He $60 ka auhau o ka makahiki, e uku mua ia i kela a me keia hoomaka ana o ka hapaha.
No na mea i koe e loaa no ke ninau ae i ke kumu nui
MISS C. A. REAMER.
2192-8t.
KE KULA KAMEHAMEHA NO NA KEIKIKANE.
E hoomaka ana ke Kula Kamehameha no na keikikane ma ka POALUA mua o SEPATEMABA, 1888.
O kekahi mau mea e ae e hoolako ia ana e na haumana pakahi, e hoouna ia no ke ninau mua ae i ke kumu.
E malama ia ana ka ninaninau no ka poe e komo ana ma ka Poakahi, Sepatemaba 3, 1888, ma ka halekula, ma Palama, hora 8:30 a. m. E hoike ia lakou ma ka heluhelu, kakaulima, palapala aina o Hawaii, na rula kumu eha o ka aritimatika, kakau olelo Beritania.
He ($40.00) kanaha dala no ka makahiki.
No na mea i koe, e loaa no ke ninau ae i ke Kumu Nui
REV. WM. B. OLESON
2192-4t.
AHA HOOKOLOKOLO KIEKIE O ko Hawaii pae Aina. Ma ka hooponopono waiwai. Ma ka hana o ka waiwai o Mai Keaweamahi w. o Honolulu, Oahu, i make. Olelo kauoha e koho ana i la e hooiaio ia ai ka Palapala Kauoha, a no ka hoolaha ana.
No ka mea, ma ka la 16 o Iulai, 1888, ua waiho ia mai imua o ka Aha kekahi Palapala i oleloia, oia no ke kauoha hope loa o Mai Keaweamahi w, i make, a me ka palapala hoopii e noi ana e hooiaio ia kela palapala kauoha a e hoopuka ia hoi ka palapala Luna Hooko ia F. Pahia, i waiho ia mai e Keaweamahi.
Nolaila, ua kauohaia o ka Poakahi, oia ka la 6 o Augate, 1888, ma ka hora 10 o kakahiaka, ma ka rumi hookolokolo o ia Aha, ma Aliiolani Hale, Honolulu, oia ka la me ka hora, e hooiaio ia ai ia Palapala kauoha a e hoolohe ia ai hoi ia noi ana mai, a me na poe a pau i pili; e kue ana ia Palapala Kauoha, a me ka hoopuka ana i ka Palapala Luna Hooko.
A ua kauoha hou ia e hoolahaia ia mea no na manawa ekolu maloko o ke KUOKOA, he nupepa i pai a hoolaha ia ma Honolulu.
Kakauia ma Honolulu, Iulai, 16, 1888.
Na ka Aha :
HENRY SMITH,
Hope Kakauolelo.
2190-3t
HOOLAHA HOOKO NO KA MORAKI.
I kulike ai me ka mana no ke kuai malo0ko o kekahi moraki i hana ia e James Keau, o Honolulu, mokupuni o Oahu ia Bishop & Co. o Honolulu, i ke kau ia ma ka la 14 o Iune, 1883, a i kope ia ma ke Keena Kakau Kope ma Honolulu i ka Buke 81, aoao 192, 193 me 194, nolaila, ke hoolaha ia aku nei ka hooko ia ana o kela moraki no na kumu i uhakiia ai, ma ka hookaa ole ia o ke kumupaa a me ka ukupanee, e kuai kudala ia aku ana i ke akea, ma ka rumi kudala a J. F. Morgan i ka
POAONA, AUGATE, 18, 1888,
i ka hora 12 awakea, i kela apana aina e waiho nei ma Aala, Honolulu, i hoikeia ma ka Palapala Kuleana Helu 5657, (na aina i haawi ia ia Uluoa, Helu 1087), me na hale a pau ku la maluna o ka aina.
No na mea i koe, e ninau ia Bishop & Co. a i ole, ia W. O. Smith, lio o ka mea i morakiia. BISHOP & Co.
Honolulu, Mei25, 1888. 2182-6t
HALEKUAI BIBI HONOLULU
(Hope o Wm. McCandles.)
HELU 6, ALANUI MOIWAHINE, MAKEKE MA ULAKOH@O.
Na Bibi momona, Hipa, Puaa me Ia, na loako ai ulu & co.
O na kauoha a na ohana a me na moku mai e hoko koke ia no me ka eleu a me ka hikiwawe.
O na holoholona ola no na moku e hiki no ke hooko koke ia.
Telepone Helu 212. 2185-tf
UA LOAA MAI NEI HE MAU PAHU SAMANO HOU
Ano no ia i hiki mai nei, a e kuai ia aku me ka
Makepono Loa
na makamaka ono i na Samano ono. e wiki mai o hala ka wa pono.
2286-1m KAKELA me KUKE.
AINA WAIWAI NO KE KUAI.
He pahale nui a me na hale maikai ma ke kan@ e kokoke nei iwaena o ke kulanakauhalem he 145 kapuai ke akea, 105 kapuai ma ke alo, a he 208 me 119 ka hohonu ma na aoao. He eiwa ka nui o na hale, a ua holimalimaia no ke $75 o ka mahina. O keia pahale, ke waiho hamama ia aku nei i na mea a pau e makemake ana.
E ninau i ka
HUI OIHANA AGENA HAWAII,
Kihi o alanui Papa me Kalepa.
2184-
HOOLAHA HUI.
O na mea nona na inoa malalo nei, ke hoolaha aku nei i na inoa o na hoa a me ka hana a ka hui, penei :
1. Na inoa a me na wahi noho o na @@--F. Gay, A. Robinson, E. Sinclair, J. R. Gay me H. Robinson, no Makaweli, Kauai.
2. O ke ano o ka hana, he mahiai me ka hanai holoholona.
3. O ka inoa o ka hui, o Gay & Robinson.
4. O kahi o ka hana, aia ma Makaweli, Kauai.
GAY & ROBINSON,
Iulai 17, 1888. 2190-2t