Ka Nupepa Kuokoa, Volume XXVII, Number 33, 18 August 1888 — HE INO NUI KA UA ME KA IKAIKA . [ARTICLE]

HE INO NUI

KA UA ME KA IKAIKA.

O ke Sabati i hala, he la ano e loa ia o na ao kaalelewa lanī i hele a poluluhi eleele he mau hoailona e hoike mai ana, eia ae ka ino nui a hiki mai. Ma ka po o ke Sabati, ua haule io mai la na pakaua me kekahi wahi makani mai ke Komohana mai, a ma na hora wanaao o ka Poakahi, ua pii mahuahua mai ka ino, ka ua me ka makani e puhi pono ana iloko o ke awa, a ua like na moku me he mau pauku laau la e olepe ia ana i o a ia nei, me ka hookui ana i na uwapo, a o kahi moku i kahi moku. O ka mokukaua Amerika Omaha, ua moku aku kona mau kaula hoopaa o hope, a kaia ia mai oia a hookui pu kona hope me ka moku hao Pelekane Wulala, me ka hoopoino ia o na rigini a me kekahi waapa nui i nahaha. O ka mokukaua Beritania Haiakima ua moku pu aku kona hope, a kaia ia ae oia iwaena o ke awa ma kona mau heleuma, a ua hoohana koke ia kona mahu no ka hoomau ana ma kona kulana. O ka mokuahi Mokolii a me ke kalepa Geremania Pekinabega, ua hookui pu laua a nahaha like na waapa. O na moku a pau maloko nei o ke awa, ua loaa like la lakou ka haawina o ka huikau nui a me kekahi mau ano o ka poino. Ma na apana mawaho aku nei o ke kulanakauhale, ua nui na kumulaau i ulupa ia iho e ka makani a mokaki maloko o na pa a me na alanui. O kekahi keia o na ino nui i makaikai mai ma Honolulu nei no kekahi mau makahiki lehulehu i hala ae. Ua hoomau keia makani i ka pa ana a hiki i ke kakahiaka Poalua, ua emi aku ka halukuluku o ke kai a pio hoi ka nou ana mai a ka makani.