Ka Nupepa Kuokoa, Volume XXXIV, Number 26, 29 June 1895 — Page 4
| This text was transcribed by: | Lynn Nakagawa |
| This work is dedicated to: | Typing Tuesday's at Na Mea: Aunty Ruby, Liz, Meleana, Kalei and Kawena and everyone else, too! |
Ka Nupepa Kuokoa
KE KILOHANA POOKELA NO KA LAHUI HAWAII.
KA
NUPEPA KUOKOA
Ko Hawaii Paeaina i Huiia
No ka Makahiki. --- $2.00
No Eono Mahina. ---1.00
Kuike ka Rula.
HAWAIIAN GAZETTE CO.
GEO. H. PARIS, Luna Nui.
J. U. KAWAINUI, Luna Hooponopono.
@ Honolulu, Oahu, Lakou a pau
Poaono, --- Iune 29, 1895.
KULA SABATI.
HAAWINA II. -- IULAI 14.
Ka Pipi Keiki Gula, Pukaana 32:1-8,
30-35.
A ike aku la na kanaka i ko Mose hookaulua ana i ka iho mai, mai ka mauna mai, akoakoa iho la na kanaka io Aarona la, olelo ae la iaia, E ku oe, e hana i akua no kakou, i mea hele mamua o kakou; no ka mea, o ua Mose la, ke kanaka nana kakou i alakai mai nei, mai ka aina o Aikupita mai; aole kakou ike i kona wahi i lilo aku ai.
2 I mai la o Aarona ia lakou, E uhai oukou i na apo gula pepeiao o ka oukou wahine, a me ka oukou keikikane, a me ka oukou kaikamahine, a e lawe mai io'u nei.
3 Uhai iho la na kanaka a pau i na gula pepeiao, i na mea iloko o ko lakou pepeiao, a lawe mai i o Aarona la.
4 Lawe iho la ia, mai ko lakou lima aku, a koli iho la ia mea i ke kila, a hana ae la i bipi keiki i hooheheia; a olelo iho la lakou; Eia kou akua, e ka Iseraela, nana oe i lawe mai nei, mai ka aina o Aikupita mai.
5 A ike aku la o Aarona, hana iho la ia i kuahu imua i ke alo o ia mea; hea aku la o Aarona, i aku la, E, apopo, he ahaaina na Iehova.
6 A ia la iho, ala koke ae la lakou, a mohai aku la i mohaikuni, a lawe mai no hoi i mohaihoomalu; a noho iho la na kanaka e ai, a e inu, a ku ae la iluna e paani.
7 I mai la o Iehova ia Mose, O hele oe, e iho ilalo; ua hana hewa kou poe kanaka au i lawe mai ai, mai ka aina o Aigupita mei.
8 Ua huli koke ae lakou, mai ke ala aku a'ui kauoha aku ai ia lakou; ua hana akou i bipi keiki i hooheheeia no lakou, ua hoomana lakou ia mea, a ua mohai hoi lakou iaia, me ka i ana aku, E ka Iseraela e, eia kou akua, nana oe i lawe mai nei, mai ka aina o Aigupita mai.
30 A ia la iho, i mai la o Mose i na kanaka, Ua lawehala loa oukou; ke pii aku nei no hoi au io Iehova la; e hana paha wau i mea e kalaia mai ai ko oukou hewa.
31 Hoi aku la o Mose io Iehova la, i aku la, Auwe hoi, ua lawehala loa keia poe kanaka, a ua hana i akua gula no lakou.
32 Ano hoi, ina paha e kala mai oe i ko lakou hewa-; aka, i ole, ke nonoi aku nei au ia oe e holoi mai oe ia'u, mai ka buke Au i palapala ai.
33 I mai la o Iehova ia Mose, O ka mea i lawehala i Ka'u, e holoi aku Au iaia, mai Ka'u buke aku.
34 No ia mea, o hele oe, e alakai ia poe kanaka i kahi A'u i olelo ai ia oe: aia hoi e hele no Ko'u anela mamua ou, aka hoi, i Ko'u la e hoopai ai, e hoopai aku Au i ko lakou hewa maluna o lakou.
35 Hahau mai la o Iehova i na kanaka no ka lakou hana ana i ka bipi keiki a Aarona i hana'i.
Pauku Gula. I. Ioane 5:21. E na keiki aloha, e malama pono oukou ia oukou iho i na akua kii.
Manao Nui. E pono ia kakou ke pale aku i na hoowalewale e haalele i ke Akua lua ole.
Olelo Hoakaka. A pau ke kukala ana i na kanawai he umi, ua loaa ia Mose he mau kanawai aku, oia no ka buke o ka berita. Ua ae ia keia e na lunamakaainana, Puakaana 24:1-11. Ua pii aku o Mose i ka welau o ke kualono e kamailio pu me Iehova. Ua hookaawale ia oia no na la kanaha. Ia wa no, ua hanaia na hana i hoike ia ma ka moolelo, ko kakou haawina baibala no keia Sabati.
1. Hookaulua,-no na la kanaha. Akua,-kekahi kiiakua i makemakeia mamuli o na hana maa mau o ka lahui Aigupita. 2. Apo,- no na kane kekahi e like me na wahine. 3. Aarona,-ko lakou kahuna nui. 4. Hooheheeia,-a lilo i ili, no ke kii laau i kalai ia. Bipi,-Api, oia no ka inoa o ke akua kii o Aigupita. 5. Iehova,-i hoomana ia ma keia kii akua. 6. Paani,-lealea, mamuli o na hana haumia. 7. Hewa,-ma ke ano kupaianaha ko ka Iseraela hana, e hoopaina ana i na hana kokua ame ka hoopakele o Iehova. 8. Huli,-ihope, mamuli o na hana o na puaa a me na ilio, II. Petero 2:22. 30. Lawehala,0 kalahui holookoa, oiai ua hoopaiia ko lakou mau mea alakai kakaikahi wale no. Kalai ia,-a pau ke ano lawehala, aole nae i lilo ka hana hewa i mea ole. 31. Hana,-me kamanao lapuwale, ua hiki ia lakou ke hoomana aku i kekahi mea a lakou i hana ai. 32. Holoi,- mai hoopakele oe ia'u, ina paha e holoi ia ana aku ko'u mau hoa lahui. 33. buke,-me he mea la ua hoomau ia na inoa o na kamaaina a pau loa ma ka buke hoike inoa. 34. Anela,-ka anela aialo, o ka lua o ke kahikolu, mamua loa iho o kona lawelawe ana i ke ano kanaka ma kona oihana ka Mesia. 35. Hahau,-aole nae i holoi aku;
End of column 1
hoopai me na poino i olelo ole ia ke ano.
I. Ka hewa o ka Iseraela, 1-6. I ka wa a Mose i kaawale ai, heaha ka manao o ka Iseraela? Heaha ko lakou noi aku ia Aarona? Heaha kana olelo pane? Heaha nae kona kauoha? Heaha kana olelo kuahaua? Heaha ka hana o ka Iseraela? Heaha ko lakou hewa? Ua makemake anei lakou e haalele ia Iehova? Heaha na kumu no ke kalai ana i bipi keiki me he akua la? No keaha la i hanaia ke kii gula? Nohea mai ke gula? Heaha ka hana i hoohuiia me ka hoomanakii? Heaha na kumu no ko ka Iseraela makemake ana i ka hoomanakii? Heaha na kumu no ko keia lahui Hawaii hoi hou ana i na hana hoomanamana o ka wa kahiko? Pehea e maopopo ai ka naaupo o keia hana?
II. Ka huhu o ke Akua, 7, 8. Heaha ko ke Akua kauoha ia Mose? Heaha ka olelo paa a Iehova ia Mose e pili ana i kona poe mamo? Heaha ko Mose olelo uwao no kona lahui? Heaha kona hana ana aku i na papa pohaku i kalaiia na kanawai? Heaha kana hana ana'ku i ke kii akua? Pehea i hoopaiia ka poe hoomanakii, Pukaana 32:27, 28?
III. Ka pule uwao o Mose, 30-30. Heaha ka Mose olelo ao i ka lahui? Owai ka mea nana i kaumaha aku ai i mohai kalahala no kakou? Heaha ko Mose noi aku i ke Akua? Heaha ko ke Akua olelo pane? Heaha kona kauoha ia Mose? Heaha kona olelo paa e hoopomaikai ai? Heaha kana olelo ao? Heaha ko ka baibala olelo ao ma ka Pauku Gula ia kakou? Pehea i hoopai ia ka Iseraela? Heaha kekahi mau kumupale no ka hoomanakii? Heaha ka uku hoopai kupono no ka hoomanakii, Hoikeana 2:8?
Manao Pilo. 1. Heaha kou kii akua? 2. Ua makau anei o haule hou oe iloko o ka hewa noloko mai o na kuleana haipule? 3. Ua makaukau anei oe e paio mehameha ma ka aoao o ka pono? 4. Ua kupono anei ke kumupale ua hooweliweli kekahi mea ia oe? 5. Pehea e hoi hou ana anei oe i ko ke Akua lokomaikai?
Haina o na Ninau Baibala a D. H. Aukai.
E ka Lunahooponopono:-No ka nui o na hemahema ma kekahi kalaimanao kuailo, malalo o ka poolelo maluna iho, a e oluolu oe e hoopuka i keia mau olelo pane.
1. E hiki anei ia kakou ke hoomaopopo he Akua hookahi no me ka mana palena ole, in a paha aole no kakou ka Baibala, no keia mau kumu: (1) Ua hanaia kakou; aole i hana kakou ia kakou iho. (2) O ka mea hana, oia no kekahi mea nona ka mana loa mamuli o kekahi mau manao paa, i kapala na kanawai paa o na mea i ikemakaia. (3) Hookahi wale no keia mea mana, nona ka noonoo pono; no ka mea, mamuli o ka manao hookahi ua hooponopono ia na mea a pau loa. (4) Olai he nui na hoololi ana ma na mea i ikemakaia, aole keia na hoailona o na akua lehulehu; no ka mea, ua hooholo pu ia ka manao hookahi ma kela mau hoololi ana. He mea onoi paa ka mea Mana Loa; aole nona ka lolilua.
2. Ua hookaawale ia ka lani a me ka honua no ko ke Akua hana ana ia laua, he mau wahi noho okoa no na mea ano okoa.
3. O ka hana oi a ke Akua i hana ai mawaena o ke Akua a me kanaka, oia no ka haawi ana ia Iesu ka Haku e ola ai no na kanaka hewa, ma ke poo he mohai kalahala, e hoohemolele ai ia lakou a hookomo no hoi i ka pomaikai lani.
4. Aole hiki ke mahele i ke Akua a me ka uhane o ke kanaka, e like me ka mahele ana i na mea kino. Aole he mau hapa no na uhane; hapalua, hapakolu a pela aku. He mau oihana okoa no ka ka uhane e heoko ai, ka noonoo ana, ke aloha ana, ke koho ana. Aole nae i pili keia mau oihana okoa i na hana okoa.
5. Ua aloko ka uhane hemolele ia Iesu i ka waonahele. Ua alakai ka uhane hemolele i ka poe manaoio a pau loa mamuli o ko lakou ano hoolohe.
6. O ka inoa o ka ekalesia a Iesu i kukulu ai, oia no ka ekaleaia o na hoahanau nona na inoa i paa ai ma ka ike o ka mea lani. He hui hookahi kela.-H.
Haina o ka Ninau Baibala a ke Keiki Wawahi Pali o Kauhako.
E Mr. Lunahooponopono; Aloha oe:-E oluolu oe e hookomo iho ma kahi kaawale o kau nupepa i ka haina o ka ninau Baibala a ke keiki wawahi pali o Kauhako, i hoopuka ia ma ka nupepa Kuokoa Hela 21, a i hoike ia mai nei ka haina e D. H. Aukai, ua ike au ma kana mau haina o ua mau ninau la, ma ko'u noonoo, aole i pololei, aole i like
End of Column 2
ka'u me kana, na na olohe huli Baibala ia mai Hawaii a Niihau e kaupeona iho i ka mama a me ke kaumaha o na haina a elua i ko laua mau wehewehe a me na pauku.
No ka ninau I, ua loaa la'u ka noonoo maikai a ke Akua i haawi mai ai, ka ike a me ka naauao, a me ke akamai. Haina 1, he Akua no ka mea nana i hana, a penei ka hoakaka ana: Hookahi mea nui i mahele ia elua apana e ka mana o ka uhane, o ka lani ka apana mua a me kona mea i piha ai, a no ka laa o ka apana oia hoi ka honua, a nolaila, ua maopopo ia kakou keia mau mea nui, he mea hiki ole i kekahi mea kino a kino kanaka ke hana i keia mau mea nui elua a pela i maopopo ai he Akua ka mea nana i hana, oia iho la ka hoike ina aole ka Baibala, e like me ka ninau, a eia iho ka hoike i ka manawa o ka Baibala i hoikeia ma Ioanae, Mekuua 1 Pauku 3, Kinohi, Mo. 1.1. Mo. 2:1.
Haina o ka ninau 2. Ma ka ninau 2, e kamailio aku au ma keia ninau he imi kumu i ko ke Akua hookaawale ana i ka lani a me ko ka honua haina. Eia ke kumu 1, oia kahi e noho ai o ka poe pono a me na anela, a oia kona nohoaliii. 2 O ka honua oia kahi e noho ai o ka poe hewa, nolaila o kona keehina wawae la a malaila e noho ai ka poe hewa a hiki i ka la hookolokolo, kaili ia ak i ka poe pono a ia manawa e ohi ai ka poe hewa i ko lakou uku a e komo ai lakou iloko o ko lakou kuleana ka luahi pio ole, malaila lakou e ai i ka lakou ai ka eha mau loa, a o ko lakou wai ka hoowahawaha n@ loa ia, a kaili ia aku ka poe pono ma ka lani ma ka hale a ke Akua i hoomakaukau ai no ka poe pono malaila e noho ai lakou me ke ola mau loa, malaila lakou e ai ai i ka ai lani a e inu ai i ka wai laui oia hoi ka wai e pipii ana i ke ola mau loa.
Haina o ka ninau 3. Ma keia ninau ke hawi aku nei au i ko'u mahalo i ka mea nana keia mau ninau no ka naauao o kana mau ninau i waiho mai ai na kakou e huli. Ninau 8 haina. Oia ko ke Akua hoohui ana i ka wai, i ke koko a me ka uhane a me ka lepo no ka berita mau loa. Me neia e maopopo ai, l au hana ke Akua i keia mau mea he ikaika no ke kanaka a me ka uhane, ka lua no ka berita hope oia o Kristo, oia kana i hele mai e hooia i ka na kahuna a me ka na kaula, nolaila, ua maopopo keia mau mea he ekolu mea nana i hoike mai ma ka lani, ka makua, ke keiki a me ka uhane, ekolu hoike ma ka honua ka wai, ke koko a me ka uhane, ua hooia mai o Paulo ma Hebera, Mok 9 pauk, 18-20. Eia ka loa o ko'u hoakaka i mea e pau ai ko kakou pohihihi. 1 O keia ke koko a me ka wai i hoike no ka uhane a me ke kino mawaena o ke kane a me ka wahioe a ke Akua i hana ai, aolaila e hoohua aku olua i ka hua no ka honua.
Haina o ka ninau 4. Ninau 4, haina, ka uhane naauao. Oia ka hapa o ke Akua i lilo i ke kanaka, holaila he waiwai pilipaa ia no ke kanaka a hiki i keia la, nolaila o ka ike, ke akamai a me ka naauao, no ke Akua mai, aole no ka mea e, o ka naauao ka mea nana e hoike mai he pono keia, o ka naauao ka mea nana e hoike mai he hewa keia, o ka naauao ka naauao ka mea nana i hoike ia Adamu ma ua hewa laua. Eia ka ninau a ke Akua ia laua, nawai i hai mai ia olua aole o olua kapa, na ka uhane naauao a ke Akua i haawi mai ai i ke kanaka i like ai me ka haina o ka ninau.
Haina o ka ninau 5. Ninai 5, halua. Ka uhane o Satana. Me keia e maopopo ai o ka uhane o Satana a ua make o Satana mamua o ka make ana o Adamu. E haohao mai ana paha oukou no keia haina, me neia e maopopo ai; au make o Satana ma ka olelo a ke Akua e like me kana i olelo aku ai ia Satana, ua oi aku kou ahewa ia i ko na holoholona laka a pau a i ko na holoholona hihiu a pau o ke kula ilalo kou alo e kolo ai oe, o ka lepo kau ai e ai ai oe a pau na ia o kou ola aua, nolaila, ua make o satana, nolaila, e hoomaopopo kakou he mea kino o satana a ua kau ka hoopai a ke Akua maluna ona he make. Eia ka mea e maopopo ai ma kela olelo wanana a ke Akua ma Kinohi, Mok 3 pauk 15 i mea e maopopo ai loa ai ia kakou o ka hua a ka wahine oia o Kristo, ka hua a Satana oia ka uhane, ka hookoia ana nae o ka wanana a ke Akua i ka pau ana o 4000 makahiki mahope mai o ia manawa oia ka wa i hui ai o ka hua a ku wahine me ka hua a satana, oia ka mea i hoikeia ma Mataio, Mok 4 pauk 1-11. O keia iho la ka'u haina no keia ninau, aole hoi e like me ka D. H. aukai haina i hoike mai nei o ka uhane manu nunu.
Haina o ka ninau G. Ninai 6, haina Ekaleeia olalo. Eia ka hoakaka ana, 1 Ekaieeia kupaa, 2 Naue ole, 3 Hoi hope ole, hi-o ole, mae-
End of column 3
mae, hoolohe a malama, hemolele, a ola ka ekalesia a Iesu Kristo i kukulu ai, kukulu maluna o ka olalo. a eia ka lua o ka wehewehe, aole makemake o ka mea nona ka ekelesia e lanakila ka hewa maluna o ka ekalesia. Ma keia ke ike nei kukou i ku makemake o ka mea nona ka ekalesia e lanakila ka hewa maluna o ka ekalesia. Ma keia ke ike nei kukou i ka makemake o e o ka Haku e lanakila ka hewa maluna o ka ekalesia i like mi me na olelo ao a ka mea nona ua ekalesia nei e hemolele oukou e like mo ka hemolele o ko’u makua i ka lani, eia ka ke Akua a Iehova, oway ao o Iehova ke ouko i Akua, nolaila e hoomaemae oukou ia oukou iho i maemae oukou, no ka mea he maemae au, aole hoi oukou e hoohaumia ia oukou iho. 2 I ekelesia hoolohe a malama oia ka mea i hoikeia ma Matalo Mok. 7, pauk 24-25. I ekalesia kupaa me ka naue ole, oia ka mea i hoike ia ma Matailo, Mok 6, pauk 18. Eia ka Paulo, i paa ko oukou manao ma ka mana o ke Akua, aole ma ke akamai o kanaka, nolaila e hoomana kakou i ke Akua me ka oiaio.
Haina o ka ninau 7. Ninau 7, haina. I kii ia Aberahama a me na haipule a me ka poe manaoio a pau e hoomaemae oiai aole i pau ko lakou hewa kumu mai a Adamu mai. O keia ae la ka’u haina no ka ninau Baibala a G. W. E. Kaleihoohihi o Kalaupapa, nolaila ke waiho aku nei ao i keia inau haina a me na wehewehe ana a na oukou la e wae iho. Ina he manao pane ko oukou no ka’u mau haina a me ka’u mau wehewehe, alaila pane mai ua makaukau au e pane hou aku. Me ke mahalo,
J. K. Kiiwaiolehua,
Makanalua, Molokai, Iune 20 1895
HE MOOLELO WALOHIA
NO NA UI
Makua Ole Elua
LA FOSA,
Ka Makona,
A ME
Pia Fosa,
KA MEA I PIHA I KE ALOHA
DE WODISE,
Ka Naita Puuwai Piha
Hamama a me ka Olu
Waipahe.
MOKUNA XII.
“A pela laua e lohi mai ai a hala ka manawa kupono, ea,” wahi a ka pane iloko o ka leo nui huhu, i ua keiki i aloha nui ia nei i hele aku ai malalo o kekahi wahi malumalu, no ka pee ana i ka ino, a malaila oia e kali ai a hiki i ka hoea ana aku o kona makuahine, a mai iaia mai hoi oia e manao ai e loaa mai ona mau wahi dala no kona po inu rama ma kekahi hale inu raina kokoke.
Neenee aku la o Pia ma kahi e no ka makau o kui ia aku oia, he mea hoi i maa i ka hana ia e kona kaikuaana lokoiuo. A ma o ka nana ana aku iaia, e hoao ana oia e noonoo i kekahi mea ana i makemake ai e hoopuku aku imua o kona kaikuaana, a ma o ka hakilo pono loa ana i ka loihi o ka manawa ana i noonoo ai, ua hiki no ia oe ke hoomaopopo aku aole i loaa pono kana mea i makemake ai e kamailio.
A he manawa loihi mahope iho, hele aku la oia imua o Keaku, a iloko o ka leo ulolohi a hopohopo hoi, pane aku la oia:
“E Keaku, he wahi manao hoi ko’u e makemake nei e ninau aku ia oe.”
“Ina he dala, he oki loa au ma @ mea,” wahi a ka pane a ka pane a ka hanau mua me ka hele ana aku.
“aole, aole, “ i pane mai ai o Pia me ka hikiwawe. “Aole he dala, aka, e nana mai ia’u e Keaku, i kou manawa e huhu ai ia’u, kuamuamu ia’u, e pepehi ia’u ina oe e makemake ana, aka nae, mai kahea oe ia’u he kina oopa, hapakue, aole loa hoi i ka manawa o Luisa pa kekahi ma ia manawa.
Nana aku la o Keaku i kona kaikaina me ke ano hoomaopopo ole i kana mau mea i lohe ai, a iaia i ike aku ai i ka nanaina nonoi maluna o na heieheiena oke keiki kina, puoho ae la oia iloko o ka akaaka pahenehene ana.
End of column 4
“Pela io ka hoi!” i pahenehene aku ai oia. “I ka Mon@iua ka mea i hahaloia paha makou e kamailio aku ai; e wehe ae paha i kou papale wahi a koa manao wale. A no ke aha mai hoi, e hookomo aku hoi paha makoa ia oe iloko o ke silika a me ka veleveta. Ua makemake paha ne i mau mikini lima nou e komo ai a me ona pahikaua ma kou aoao, aole anei pela?”
A o keia mau olelo ouku kohu ole ana, ua lilo loa iho la ia mea i mea lealea na kona noenoe, a na ia mau olelo i kono hou mai e hooki oia i kana kamailio ana ma o ka lilo hou ana iloko o kekahi akaaka pahenehene ana.
He anaina o ke kaumaha ke hoalii ana maluna o na helehelena o Pia, me kona manao la hoi, e ae lokomaikai ia mai ana kana wahi nonoli a na ia mau huaolelo pahenehene i hamare aku i ke keiki popilikia a naha kona puuwai.
“Keaku!” wahi ana, iloko o ka leo kaumaha a me ka manao hoahewa ole.
“Alaila, ua eha loa iho la no kou manao no ke kahea ia kina, hapakue, ea, aole anei pela?” i hoomau mai ai o Keaku iloko o ka leo e heeha aku ana i knoa kaikaina a oi aku mamua o kana puupuu. “Aole ne paha oe i ike, e nana iho no hoi ia oe, a heaha kou ane?”
“He wahi keiki ilihune, hapakue oopa hoi au,” i pane mai ai o Pia iaia e holoi ana i na waimaka e hoopiha ana i kona mau maka. A la wai la hoi ke kumu o ke kina ana? Owai i ko’u manawa he keiki wale iho no, pepehi ia’u, uhai a me ka wili ana i ko’u mau wahi laia, no kuu hoole ana aole e aihue i kuka nona?”
“Hoopunipuni oe! He koloka!” i kahamaha koke mai ai o Keaku me ka leo nui.
“A o kou ano mau no hoi ia, “ i hoomau aku ai ke keiki kina, “o ke kokono i kekahi mea okoa e hele e aihue nau. A no ia kumu i loaa ai ka pilikia ia Mariana-”
“Mariana!” i hooho mai ai o Keaku, iaia i hapai ae ai i kona lima no ka hoomoe ana aku i ka mea e heala mai ana i na mea i hala. “Mai hoao oe e hoopuka hou i ka inoa o kela ino a’u i hoomanawanui ai, lohe oe? He oi oia a ka pupuka ino a’u i ike ai, ua aa oia e hele i ka halepaahao mamuli o kona haawi ana mai ia’u i kana mau dala,” a huli ae la o Keaku i kahi e me na manao huhu e hana mao ole ana iloko o kona puuwai no na hana hilahila a hoohoka a ka wahine.
“Ua hoopakele oia ia oe mai ke kau ana a ka hoopai maluna ou,” iaia hoi e pale ana no ka wahine popilikia mai ka hoohihia wale ia ana mai.
“Uoki koke oe!” i pane mai ai ke kanaka lima nui me ka hehi ino ana no ka huhu. “Aole o’u makemake e lohe hou i kekahi mea e pili ana nona. Ua loaa hou ia’u kekahi mea hou i oi aku o ka ui mamua ona a ma ka hooko pololei aole lua. A ou hoi, a e like hoi me kou makemake ole e kahea ia he hapokue ma keia mua aku-”
A i kela manawa, hooki pu iho la o Keaku, a me he mea la e huli ana kona puniu i kekahi inoa, a ia Pia hoi e noonoo ana me ka manao ua mihi kona kaikuaaana, a ua makaukau oia e pane main no kana noi, a pane aku la oia me ka naau olioli.
“Ae?”
“Ke hoomaikai aku nei au ia oe me keia inoa hou-Kiupika (cupid) he inoa ino.
A he helehelena o ka ehaelia ke pahoa ana maluna o Pia i kela manawa, a i ka leo akaaka pahenehene hoi o kona kaikuaana e hana mao ole ana.
“E hana aku oe e like me kou makemake,” wahi a Pia, me ka luhi, iaia hoi i haawi pio aku ai iaia iho malalo o na hanawale a knoa kaikuaana i manao ai e hooili aku maluna ona.
“Akahi no au a ike,” wahi a Keaku me ka haakei nui, aia wale no kou makemake ole e kahea ia i ka hapakue i ka manawa o Luisa pu kekahi, ea-” a no ka hiki ole iaia ke paa mai i na manao diabolo iloko ona, ua puoho hou ae la no oia iloko o kekahi akaaka pahenehene hou, no kekahi mau manao ino i komo iloko o kona puniu lapuwale, a keukeu iho ia oia iaia iho, a wahi ana me ka luliluli ana ana ae o kona poo iloko o ke ano hoomaewaewa: “Ae, ua nani maoli ka hoi keia mea.”
“Alaila, aole no ka hoi oe i naaupo loa e like me kau mea i manao wale ai, “ i akaaka mai ai o Keaku. “He makapo oia, a aole hoi e hiki iaia ke ike i ke auo e mawaena o kekahi kanaka hanohano ui e kukuli a hoomaikai ia mai ai no ka ui nohea e like me a’u nei, a me oe hui e kena wahi keiki hoomakaukau waiwai ole o ke oia ana,” a o kona mau manao lealea hana wale, ua lilo hou ae ia no oia iloko o ka akaaka, puana ae la oia: “Eia ka oe iloko o ke aloha-iloko o ke aloha me ke kaikamahine makapo.”
Aole i pau.
End of column 5
Ka Hawaiian
Gazette
He Nupepa Namu Elua
Puka ana o ka Hebedo-
ma, ma na
POALUA a me POALIMA
e hoopuka ia nei e ka
Hui
HAWAIIAN
GAZETTE
COMPANY.
O ka Nupepa Kuloko
Alakai keia ma ka Olelo
Beritania e hoolahaia nei
maloko o ka Paeaina a
hala loa aku i na Aina E
a ke heluhelu ia nei e na
mea a pau ma na oihana
na Halekula a komo loa
iloko o na ohana.
Ka Uku Pepa Laulaha.
No ka Malama..........$ 50
No ka Makahiki Kuloko. 5.00
“ “ Kuwaho..6.00
Keena Hana Helu 319.
alanui Kalepa.
Pahu Leta O. Honolulu Oahu
2531-tf
Na Hua
Kuni
Inoa
Eia ka Hui Hawaiian Gazette Co., ke hana paka maoli nei i na Hua Kuni Inoa o kela a me keia ano, nuia liilii e like me ka iini a ka manao.
O keia mau Hua Kuni Inoa, ua lawa ia no ke kahakaha ana ma ke kanana a pepa e ae e hoailona ai i ka Inoa a kohu maluna o kekahi mea i makemake ia e kuni a kaha paha.
He like ole na uku o na Papa Kuni Inoa, no ka mea aia no ke kau ia o ka uku a maopopo ke ano o ka Papa Inoa au i makemake ai, he nui a he liilii paha. Aka he oluolu ka uku a he waipahe na kuka ana.
E kipa kino mai e nana i ike kumaka, a i ole ia e hoouna mai i na kauoha ma ke
eena!Hana-Maika iHalepai HAW-
AIIAN GAZETTE, Helu 318
Alanui Kalepa, Honolulu
2e31-tf
Halepai
Hawaiian
Gazette.
O keia ka Halepai Nupepa Alakai o ke Kulanakauhale o Honolulu nei. Ua lako i na Hua Kepau o na ano a pau a ka makemake e ui ae ai.
Eia ma keia Halepai e pai ia nei ka Nupepa KUOKOA, a me Nupepa HAWAIIAN GAZETTE PACIFIC COMMERCIAL ADVERTISER CHURCH CHRONICLE a me PLANTER’S MONTHLY.
Ua hiki loa i keia Halwpai ke pai aku i na pepa nunui hoolaha alanui, na buke, na bila kikoo, na bila hookaa, na palapala poloai ahaaina a me na hana e ae a pau o ka oihana pai.
Eia maloko o keia Halepai he Keena Humuhumu Buke, kahi e humu ia ai na Buke, na pepa a me na mea a pau i pili i ka humuhumu ana i na palapala. He oluolu ke kuka ana a he emi kupono na auhau.
Keena Hana, Holu 318 Alamai Kale-
po, Honolulu i ka Hale@luna.
2531-tf
End of column 6
@oolaha @umau.
Aole loa e maikai a oluolu ke ola ana o kekahi mea kino uhane ola ina he aaiole kona akepaa a hiki ole ke lawelawe i kana mau hana me ka hololea. E hahai ana ka ualulu a me na nawaliwali e ae ma ka moali o ke ake ponalo. He mea oiai o keia i hoolalo ia ma na wahi o na poai oluolu akau iloko o ka hapaha keneturia, o na
HUALE A AYERS,
oia wale no ka LAAU HOOLA AKE maikai loa i ikeia. E hooia ana i ka lepopaa, ka nalulu eha, na ma’i oloko o ka opu, a ma ke ano LAAU OHANA aohe ona loa e like ai.
O ka Ayers Sasaparila, oia ka Laau Hoomaemae Koko kilakila, e haawi ai i ka ikaika a me ka hooponopono ana ia loko o ke kino o ke o ka ili, e hoopau ana i na maluhilukanaka. E pepehi a ulupa ana i na PUHA, e hoola ana i na pohapoha hi o ke ola ana a e kipaku loa ai i na ane ma’i a pau. O ka poe ma’i no ka wali pono ole o ka ai, ka nawaliwali mau a ano ma’i e ae i ulu ae mai ke koko ino mai, he mea pono e inu i ka laau
SASAPARILA A AYERS.
He laau e hooikaika ai i ka nawaliwali, a e hoopuipui mai ai i ke kino. Ma ka inu ana i keia laau, e hoonoono ia ai ka ai ana, oluolu ka moe ana a maikai ke ola ana.
O ka Ayers Cherry Pectoral
laau, aohe loa ma ka hoola awiwi ana i na KUNU, ANU a me na PUU EHA. E hoola ia na KUNU KALEA a me na ma’i pili i ke ake me ka hikiwawe loa.
O na IIuaale a Ayers, na Sasaparila a me ka Ayers Cherry Pectoral, aia kahi o loaa ai ma ka Halekuai o ka
Hollister Drug Co. Lt.
Na A@na ma ka Paeaina Hawaii.
2614
KAKELA
ME
KUKE
Ka Halekuai Nui
O NA
WaiWai LIKE OLE
NA MEA
HANA KAMANA AIPAU
Na lako pili hao kukulu hale,
Na kepa,
Na lei ilio,
Na kaulahao ilio,
Na Pahi,
Na Upa,
Nu kope hulu,
Na Pulupula.
PALAU LIO
Na mea mahiai,
Na au ho,
Na au koi,
Na kua bipi,
Na lei bipi,
Na kaulahao bipi,
Na uwea pa,
Na kaa pulala,
Na mea piula,
Na ipuhao.
Makau me Aho Lawaia
Na ilwai
Na kaala,
Na hulu pena,
Na puiumi,
Na pena, me ka aila,
Na kopa,
Na aila maku
Na pakako
Na pakeko hao,
Na kapu hao,
Na pauda,
Na kukaepele,
Na uwiki, a me
Na ipukukui.
Mikini Humuhumu Kaulana
Wilcox & Gibbs Hookahi Lopi.
ka Remington, Elua Lopi.
A me na ukana he nui loa, o kala ana me keia ano.
Kakela me Kuke
1024-4