Ka Nupepa Kuokoa, Volume XXXV, Number 20, 15 May 1896 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XXXV.   HONOLULU. POALIMA, MEI 15, 1896.  NA HELU APAU 2598

 

Hoolaha @oto.

 

A.     R. KAKELA,

Loio o he Kokua ma ke Kanawai.

HE LUNA HOOIAIO PALAPALA.

2370

 

Hoolaha Kumau.

 

Wilder & co., (WAILA MA.

 

M@ Kuai Papa a me na Lako ku@hale o na ono a pau, a me na mea e ae a pau e pono ai o @ hale.

 

Kibi o Alauni Moiwahine me Papu.

396-0

 

PAPA! PAPA!

 

AIA MA KAHI O

 

Lewers & Cooke

 

(LUI MA)’

 

Ma ke kahua hema o Alanui Papu me Moi.

 

E LOAA NO NA

 

PAPA NOUAIKI

 

O kela a me keia ano.

 

Na Pani Puka, na Puka Amani,

         na Olepelepe, na Pou, na O’a,

         na Papa Hele, na Papu  Ku,

         me na Papa Moe he nui loa

 

NV @PILI HALE O NA ANO A PAU

 

 A me na

 

WAI @ HOOHINUHINU NANI

 

O na ano a pau loa.

 

Na Balaki o na Ano he Nui Wale

 

         Ke hai ia aku nei oukou e na makamaka a pau, ua makaukau kela mau makamaka o oukou e noolawe aku ma na mea a pau e @ ana ma ka laua oihana no ka

 

Uku Haahaa Loa,

 

E li@e me ka mea e holo ana mawaena o Laua

o Laua a me ka Mea Kuai.

 

Hele Mai e Wae no Oukou iho

2396-q

 

MEA HUNA POHIHIHI

 

MOKUNA IIII.

 

         I kela wa ae aku la o Adelo, me ka eleu nui ame ka piha hoihoi nui. Nolaila, hoopili aku la laua i ko laua mau p[oohiwi a hooke aku la i ka puka.

         Ua hemo aku la ka puka a ia wa i komo aku ai laua iloko. O ka Haku Hameton nae. komo loa aku la oia iloko, oiai hoi o Adelo i ku iho ai ma ka puka, me ke pani hou ana mai i ka pani-puka i hemo ai ia laua.

         Ua piha ooko o ka rumi i ka uwahi, ame ka hoomanawanui hoi i hele aku ai ka Haku Hametona maloko aku o ka uwahi e punohu ana a hoea ma kekahi aoao o ka rumi a uu ae la i ka puka aniani iluna. la wa i amio mai ai ka makani a hoopuehu awiwi ae la i ka uwahi.

         He manawa pokole, na pau ae la ka punohoana o ka uwahi, a ia wa i ike pono ia aku ai na mea apau oloko o ka rumi, a ike pu ia aku la nohoi ke kumu o ke ahi, oia hoi, e a ana ia wa ke kapouahi hoopumehana iloko o ka rumi, a ua poha ae la kekahi puupuu lanahu o na kapuahi la a lele mai la he mamala lanahu ahi a haule iho la maluna o kekahi pale halii veleveta e waiho ana ma ka papahele, ma kahi kokoke loa i ke kapuahi.

         Lalau iho la ka Haku Hametona i na pale veleveta la a owili ae la, a pela i hoopioia ai ke ahi.

         I keia wa hoi, aia na onohi maka o Adelo ke nana la ma o a meenei, e ake ana e ike aku ia Beatirisia. Eia nae, aole i halawai iki kona mau onohi maka me ka oiwi ana i ake ai e ike aku.

         Hoomaopopo iho la nae ia, he rumi ia i kahiko ia me na mea nani o kela ame keia ano. He maiau, me ka mikioi ka hoonohonohoia ana o na mea apau oloko.

         Aka, o ka ona nae nona keia mau mea apau aole oia ma ia wahi.

         Ua holo awiwi ae la ko Adelo mau onhi maka ma o a maanei, e nana ana maluna o ua punee velevetala, no noho pulu nonolu ame na iioho e ae oloko o ka rumi, aole nae oia i ike aku i ka Lede Beatirisia. Aka, manao iho la oia aia paha na Ui nei o Hametona maloka o kekahi mau rumi e ae ona, a no ia mea olelo iho la oia iaia iho:

         “Ano, ua loaa ia’u ke kuleana o keia keehina mua o ke komo ana mai nei iloko nei o kona rumi, a ma ia kuleana hookahi no au e hele aku ai e huli iaia ahiki i ko’u ike pono ana no’u iho ina paha eia io no oia maloko o na eheu nei o keia hale kakela.”

         Ikela wa hoi i olelo mai ai ka Haku Hametona, ua pio ke ahi, a haawi mai la oia i kona mau hoomaikai ana i ua Adelo nei no kana mau kokua, me ka olelo ana mai e hoi lana no ka rumi hookipa aka me ka naau menemene a hilahila ole nohoi, ninau hoomaoe aku la ua Adelo nei:

         “Pehea la ka Lede Beatirisia?”

         Me ke ano pihoihoi nohoi, pane mai la ka Haku Hametona:

         “Manao au, aia no oia maloko o kekahi o kona mau keena. Me he mea la, aia no paha oia iloko o kona rumi moe.”

         Me ka maalea nohoi, pane hou aku la ua Adelo nei:

         “Aka, aole ia he mea no kaua e hele ole aku ai e hoomaopopo, na palekana paha oia, aole paha. O ka nui uwahi mai auanei keia e loaa ole ai he ulia poino i kekahi lede kino palupalu elike me ko Beatirisia ke ano. Manao au, ua paa paha kona hanu i keia uwahi, a ke moe maule nei paha oia maluna o ka papahele.”

         No keia mau olelo a ua Adelo nei, ua ano haikea loa ka helehelena o ka Haku Hametona. Nana mai la oia maluna o Adelo, a me he mea la ua hiki loa iaia ke helehelu mai i ko Adelo puuwai, oia hoi, ua ake loa maoli oia e ike i ko Beatirisia wahi i nalowale ano e aku ai, me ka puoho a puiwa ole ana mai hoi no keia pauahi kamahao loa iloko ponoi o kekahi o kona mau rumi. Aka, ua hiki ole nae iaia ke hoole mai i keia koi a ka mea ana i makemake ai i kane na kana kaikamahine. Olelo mai la ia:

         “E ku no oe maanei e Adelo, a owai ke hele ae e nana iaia iloko o kona rumi komo kapa.”

         Ia wa hele aku la ua Haku Hametona nei, a iaia no a komo aku ma ka puka o ke keena komo kapa o ka Lede Beatirisia, o Adelo aku no mahope a ku ana ma ka puka. O kona hoomaka koke aku la no ia e kiei, e halo a e nana iloko o ua rumi la. He oiaio, aole no o Beatirisia malaila.

         Ua ike aku la nae ua Adelo nei i ka Haku Hametona e ku ana mawaenakonu o ka rumi me na helehelena ano e, oiai hoi ka malamalama o ka ipukukui e papa ana malona ona.

         I ka huli ana mai o ua Haku Hametona nei a ike mai la ia Adelo e ku aku ana, ua hooi loa ia ae la ke ano e o kona helehelena, a pane mai la oia me ka leo nawaliwali a ano haalulu hoi:

         “Aia paha oia iloko o kona rumi moe,” a hele poloei aku la oia nolaila, oiai nohoi na maka makona o Adelo e nana aku ana.

         I ka wa i pale ae ai ka Haku Hametona i ka paku veleveta e kuu welu ana ma ka puka komo o ka rumi moe, ike koke aku la o Adelo i ka waiho maikai mai o na mea apau. Oia mau no na uluna i ho onuanauaia me na lihilihi nani, e mau ana nohoi ka ‘mohala maikai o ke kihei halii moe pahoehoe keokeo i hana lau ia, aole minomino, a e moani mai ana no ke ala huihui o ka wai ala i luluia iho maluna o ua kihei la.

         Ia wa i hooho ae ai ka haku Hametona: “He keu ka hoi a ka mea kupaianaha nui wale! Aia paha oia iloko o kona rumi auau.”

 

EBINE LANOKA.

 

MOKUNA III.

“E owaka ana na makakula,

E lele ana na hunahuna ahi,

E lohe ia ana na leo kaniuhu

Me ka halulu o na kino,

E hiolo makawalu ana,

I ka ili o ka honua”

 

         Iaia e haiolelo ana, aole oia i hoomaopopo aku i kekahi kaikamahine ui oi kelakela o ka nani e kau ana maluna o kekahi lio nui keokeo kukaenalo. Ua like ka opiopio keokeo o kona ili me ka io o ka niu akahi no a wa-hiia ae; a o kona lauoho loloa apiipii nupanupa ua like ka eleele me ka weleweta eleele; a o kona mau maka nunui mohaha ua like ka ponoponi me ka hoku puka wanaao; a o kona oiwi kino hoi, he loihi maloeloe puipui maikai me kela hiehie i kupono no ka noho kalaunu o na Moi nui o ke ao nei.

         I ka hooki ana o ka naita opio i kana haiolelo ana, ua hoohele mai la ka lede ui kamahao i kona lio a ku iho la ma kahi e kupono ana ma ke alo o ka lanai o ka hale, a e kupono ana hoi mamua pono o kahi a ka naita opio e ku mai ana, malaila, ua kunou aku la oia me ka mino-aka waipahe imua o ka naita, a me ke kiola ana aku he wahi pua Carnation poni ma ke alo o ka naita, ua pane aku la oia me ka leo nanahe malie, aka, me ka moakaka nae e hiki ai i na poe a pau ke lohe:

         “E ka naita o ke Kakela Ulaula, ke pahola aku nei au ma ka aoao o na makaainana o Italia nei, a i oi loa hoi, ma ka aoao o na kaikamahine opiopio o keia aina, i ko makou mau mapuna leo o ka mahalo kiekie, a me ka nui o ko makou hauoli palena ole nou. He mea oiaio, o kau mau hana koa a wiwo ole, he hana hoi i hiki ole i na koa a me ka ikaika o na tausani i hala aku, a me ka ehaeha au e i ae nei, ua lukuia he mau haneri o na haneri o na puuwai koa i hele mua mai e molia i ko lakou mau ola e keia poe hookahi no au hoi i hoopio iho la me kou mau lima ponoi wale no. Nolaila, ke puana ae nei au, aole loa he koa malalo iho o keia ponaha lani, a maluna iho hoi o keia ili honua, i like me oe e ka naita o na naita, ke koa o na koa a me ka wiwo ole o na wiwo ole. (Huro nui ia e ke anaina.). Nolaila, ke uwalo aku nei ko’u leo me ka haahaa, e lawe aku oe i keia mau mapuna leo mahalo a hiipoi iho hoi ma kekahi wahi kaawale o kou puuwai maemae. E lilo hoi kou inoa e ka naita opio wiwo ole i lei makamae ma ko’u umauma e hoomanao mau ai a o kou helehelena hoi e lilo ia i kii mau ai i na la a pau e mau ai ke koni ana a keia puuwai palupalu. Ke nonoi aku nei au me ka haahaa, oiai oe e hele aku ana ma kau huakai hoola a hoopomaikai i ko keia ao, e oluolu oe e lawe pu ma kou umauma, a ma kahi kaawale hoi o kou puuwai waipahe, i ka inoa o Violeta Agastina, ka mea hoi e ku aku nei imua o kou kiekie. Ko’u aloha pau ole ia oe, a me ke aloha o na makaainana pu a pau o Italia nei.”

         Ua kau iho ka ilihia maluna o ke anaina holookoa mai o a o, a i ka wa hoi i hooki ae ai o ka lede opio, aole loa he leo i loheia ae, oiai ua ano eehia na mea a pau. He kaikamahine oia i ike mua ole ia e na kanaka o ke kulanakauhale; aole hoi ona hele ma na alanui e ilke me ka ano o na kaikamahine e ae, nolaila, ua lilo keia ikeia ana ona me he anela la no ka malamalama mai; a o ka loheia ana hoi o kana mau olelo, he mea hou loa keia, a he mea hoi i mahalao nui ia e na kanaka a pau, oiai o kana panai ana i ka haiolelo a ka naita opio ua oi aku ka maikai a me ka naauao mamua o ka mea hiki ia lakou ke pane.

         Ua hanaia keia kaikamahine e kona mau makua me ke kapu loa a me ka punahele. O kona makuakane he kaukaualii kiekie loa oia no Italia, he kanaka waiwai nui hoi, a he kanaka i hoowahawaha i na hana kokua a na poo aupuni i na hana a ka poe kokua powa a pakaha wale. I ka wa i na Moi mua o ka aina, o ua kanaka la kekahi o na kuhikuhi punone o ia poe Moi, a ua noho ka aina iloko o ka maluhia a me ka maikai, aka, i ke kaa ana mai hoi o ke aupuni i ka Moi e noho ana ia wa, ua hehi ia Moi i na hana maluhia a ua puni mahope o na hana lealea a uhauha, me ka puni wale mahope o na alakai hookamani a ka poe puuwai eleele. Nolaila, ua hookaawale loa kela alii iaia me kona ohana mai ka launa pu ana me na poe o ke aupuni, a ua noho oia me ka hilinai maluna iho o kona waiwai ponoi a me ka hoomalu ana a kona poe koa kiai ponoi, a ua maluhia kona noho ana me kona ohana mai na hana haowale a limanui a ua poe powa la, a o kana mea oi loa o ka malama oia no kana kaika mahine kamakohi, Violeta ka Nani. Ua hopohopo nui kona naau o ikeia a lohe ia paha e ua poe alii powa la, no ka mea, ua nui na kaikamahine ui o ka aina i hoopoino ia e ua poe powa la, a ua maopopo no iaia ina e lohe ana kela poe puuwai eleele no kana kaikamahine aole loa e nele ko lakou ke-na mai i ko lakou poe koa e kii mai iaia a lawe aku me ka lima ikaika no ka hoohoumia ana iaia. Nolaila, i ka maopopo pono ana i ua alii la ua pio ua poe powa la i kekahi naita opio malihini, ka mea hoi nana i kala ae i keia pilikia nui loa mai ia lakou ae a o ka mea hoi nana i hoonalohia aku i kela manao weliweli nui mai kona puuwai aku. No ia kumu, ua lilo o Violeta i malihini nui i na poe a pau o ke kulanakauhale o Roma.

         Nolaila, i keia ike mua loa ana aku o Violeta ia Ebine, ka naita opio, ua like me he kui la e houhou ana i kona puuwai, e hooni ?ana hoi i na aa koni a pau o kona kino, a e hoonapenape ana hoi i kona umauma i ka ua mea o ka makemake a me ka hoohihi e lilo oia i hoa kuwili nona i ka po lailai kehau huihui o ke kau. Iloko hoi o na minute pokole ua hoopihaia kona puuwai holookoa me ke aloha kupaa oiaio no ka naita ui waipahe a koa wiwo ole hoi. Pela pu hoi me kona makuakane, ua hoopiha koke ia kona naau me ka mahalo kiekie no ka naita, a ua ake iho kona uhane hoookoa e lilo ka naita puuwai liona i kane na kana kaikamahine, ina hoi e maikai ana ia mea i ka manao o ke koa opio.

         Mahope iho o ka pau ana o na olelo a ka ui Violeta, ua hele mai la o Ebine me ke kunou haahaa ana, na lalau mai la oia i ka lima akau o ka ui a hapai malie ae la oia a hoopili ae la ma kona mau lehelehe, me ka muki malie ana iho, a me kaomi malie ana iho, me he la e i iho ana, “o oe no ka’u makemakekemake.” Ia wa ua hoolauna mai la o Violeta i kona luaui makuakane i ka naita opio. I kela wa ua poloai aku la ka naita opio ia lana e hele mai a e hooluana iki me ia ma ka lanai o ka hale no kekahi mau minute pokole. Ua ae koke aku la laua, a ia wa ua lele iho la laua me ka haawi ana i ko laua mau lio ma ka lima o ko laua mau ukali.

         I ko lakou hoonanea ana, ua ninau pono mai la ke Kauna Agastina (oia hoi ka inoa o ka makuakane o Violeta) i ka naita opio i kona inoa ohana ponoi, a ua hoike aku la oia o Ebina Lanoka kona inoa, a ma ka hema loa o Italia oia i noho ai me kona makuakane a hiki i ka make ana o kona  makuakane, ua hele mai oia e hooko i ke kauoha a kona luaui. He mea e ka hauoli o ua Kauna la i keia lohe ana ona o ke keiki keia a Alekanedero Lanoka, no ka mea, wahi ana, “ o kou makuakane ko’u hoaloha pilipaa loa mai ko maua mau la kamalii mai a hiki wale i ko maua kaawale ana, e hoi oia e lilo i kuhikuhi puuone no kona Moi a pela hoi au no ko’u Moi. O ka maua rula hookahi ia, o ke kue ikaika i ke komo ana mai o na poo o na Ekalesia iloko o na lawelawe a me na hoopunihei ana i na Moi, oiai ua maopopo mua ia maua he mau alakai ino a hookamani ka ka poe o na halepule. Mahope iho o ko’u lohe ane mai ua punihei loa ka Moi Lui i na alakai a me na a’o ana a ke Kadinela, ua maopopo ia’u ua haalele kou makuakane i na lawelawe aupuni ana, no ka mea, na ike au i kona ano a me kona mau manao. Aole loa nae hoi au i moeuhane iki e loaa mai ana au ia haawina like iloko o ia mau la pokole mai, aka, iloko o elua makahiki mahope mai o ia wa ua make iho la ka Moi o Italia nei, ka makua oiaio hoi o keia lahuikanaka; a i ka noho ana ae o ka Moi e noho nei i keia manawa na haalele mai la oia ia’u a me ka’u mau kuhikuhi ana, ka mea hoi a kona luaui Moi i kauoha iho ai iaia e lawe ia’u i alakai nona, eia nae ua lilo koke oia iloko o na hana puna lealea a me na hana haumia. Nolaila, e like hoi me ke ano maalea o kela poe kolohe, ua kokua koke lakou i kela hana a ua Moi opio la, me ka hoopunihei ana a me ka hapaimemeue aku imua o kona alo, he hiki no iaia ke hana e like me kona make make, a he mea ia nona e hanohano ai a e kaulana ai o ka lawe mai i ka mana o ke ola o ka lahui iloko o kona poholima, a he mea hoi ia ona i weliweli nui ia ai. Ua puni koke ka Moi a ua lilo koke au i mea makemake ole nana, no ka mea, he huhu au i kela mau hana maikai ole ana, me kuu a’o ikaika ana aku iaia. Nolaila, na hoopaweo mai kona maka ia’u, a o ka hopena nae mahope iho o ko’u haalele loa ana aku i ke alo alii, ua nui na hana hoomanaonao i hanaia a me na hana ku i ka weliweli. Mai kela wa mai ua lilo au i pulakaumaka no kela poe, a he nui na wa a lakou i hoao ai e lawe i ko’u ola, aka, mamuli o ka lokomaikai o na lani ua malamaia au me ka’u kaikamahine nei. O ka’u lei nei, oia ka’u mea hopohopo nui loa, oiai, ua ike au i ke ano o na hana a kela poe, a ina au i hoohemahema iki iaia, a ikeia paha oia e kekahi o lakou, he mea maopopo aole e hiki i ko’u mau wahi koa a me a’u pu ke pale aku i ko lakou ikaika a me ko lakou maalea mamua o na pualikana holookoa o Italia nei. Nolaila, e hoomanao oe e kuu keiki maikai (e kapa aku au ia oe he keiki na’u, oiai ua like kou makuakane me he hoahanau ponoi la no’u, mai ko maua wa e hele ana i ke kula a hiki iluna o ke kahua kana), o keia lono i hoea ae nei ma ko’u home na like ia me he leo la mai ka lani mai, e poha iho ana kona lono hauoli, me he la e hai mai ana, ‘eia ka Paredaiso, e hoi iho a noho me ka maluhia mau loa.’ Nolaila, na hiki ole ia’u  a me ka’u kaikamahine ke noho hou iho ma ka hale me ka ike mua ole i ka anela maikai nana i hoomanawanui a loaa keia maha i na poe noho maluhia o kai aina. Nolaila, aohe a’u uku e hiki ai ke panai aku ia oe, oiai aohe e hiki i na waiwai a pau o keia ao ke uku aku i ko makou aie ia oe, aka, he hookahi wale no a’u wahi uku e manao nei, ke oluoluia nae e kou puuwai maemae, oia hoi keia: E ae anei oe e lawe i ko kaikuahone nei i kokoolua nou no kia ola ana?”

         “E kuu makua maikai, ke haawi aku nei i na hoomaikai ana a pau a ko’u puuwai la ke panai aku. No keia hanahana palena ole au e pahola mai nei maluna iho o’u, ua hiki ole paha i ko’u haahaa ke ae aku, oiai e hai e eku no au ia olua i kinohi, he kanaka au me ka mea ole aku ma o a maanei paha o’u. Owau wale iho la no ia, aole he kuono a poopoo, o ko’u kino wale iho no me ko’u mau lima. Oiai, i ka wa i haalele aku ai ko’u makuakane a me a’u iloko o ko’u mau la opiopio loa ua haalele maua i ko maua mau waiwai a pau iloko o na lima o ka poe e a hele maua me na wahi mea i loaa i na lima o ko’u luaui a nohp ma kela wahi mehameha malihini no na makahiki lehulehu; nolaila, i ka haalele ana mai o ko’u makua ia’u, a hoi aku la no kahi mau o keia ola ana, ua haalele iho oia he hookahi wale no waiwai ia’u, oia hoi kana mau a’o maikai ia’u; a me keia makaukau ma na mea kaua, a me ka puuwai hopo ole iloko o ko’u umauma no ka hele ana e hooko i kona makemake o ka hoihoi hou mai i ka noho’na maluhia ma keia kulaakauhale a me ko’u aina hanu o Farani, me ka holoi loa ana i kela Hui Powa mai na papalina ae o ka honua, nolaila, he mea hiki ole ia’u ke lawe mai i ka lima o kau kaikamahine a hoopaa iho ma ko’u puuwai me keia hemahema i loaa ia’u. Ina paha mahope o ko’u hele ana a hooko au i ka’u hana a pau, malia o hiki paha ia’u ke hoihoi hou mau i na wahi pono a maua i haalele aku ai a paa hou ma ko’u lima, alaila paha e aho ia; a o kekahi no hoi, aole paha i like ka manao o ka lede ua maikai e kou manao,” wahi a ka naita opio.

         I kela wa ua kamailio koke mai la no o Violeta me ka waiho ole aku na kona makuakane e kamailio:

         (Aole i pau.)

 

         I ke kau hooilo o 1893, loohia iho la o F. M. Martin o Long Reach, West Va., i kekahi anu ikaika, a kuene pono loa iho la ke kunu. A ua hoike mai la oia i kona ola ana: “He nui na laau kunu a’u i hoao ai, aole nae he ole iki, a hiki i ko’u wa i kuai ai i omole Laau Kunu a KAMALENA, a ua loaa koke ia’u ka maha, a iloko o ka wa pokole ua ola loa au.” Ke loohia oukou i ke kunu a i ke anu paha, e inu i keia laau, aole auanei oukou’e hoao i na laau he lehulehu wale aku, mamua ae o ka loaa ana ia oukou he ola. He 20 makahiki a oi o ke ku ana o keia laau ma ka makeke kuai, a ua nui kona makemakeia a ua kaulana no hoi. He 50 keneta no ka omole. E kuaiia aku ana e na poe kuai laau lapaau apau. BENSON & SMITH, na Agena ma ko Hawaii Pae Aina.  *