Ka Nupepa Kuokoa, Volume XXXV, Number 20, 15 May 1896 — Page 2
| This text was transcribed by: | Tina |
| This work is dedicated to: | Brianna Summers |
Ka Nupepa Kuokoa
KE KILOHANA POOKELA NO KA LAHUI HAWAII.
Hoolaha Mana Hooko.
I keia la ua hookohula aku o MR. J. G. JONES i Luna Pa Aupuni no ka Pa Aupuni ma Kukuihaele, Apana o Hamakua, Mokupuni o Hawaii, ma kahi o S. K. Kalimaeka i waiho mai.
J.A. KING,
Kuhina Kalaiaina.
Keena Kalaiaina,
Mei 4, 1896. 2597-3t
I keia la i hookohuia'ku ai o HENRY J. LYMAN, ESQ., i Agena Haawi Palapala Mare no ka Apana o Puna, Mokupuni o Hawaii..
J.A. KING,
Kuhina Kalaiaina.
Keena Kalaiaina,
Aperila 24, 1896. 2596-3t
I keia la i hookohuia aku ai o MR. Z. KAKINA i Notere no ka Lehulehu no ka Apana Hookolokolo Elima o ko Hawaii Pae Aina.
J. A. KING,
Kuhina Kalaiaina.
Keena Kalaiaina,
Aperila 27, 1896. 2596-3t
I kei la i hookohuia aku ai o MR. PETER BORN i hoa no ka Papa Alanui no ka Apana Auhau o Kona Akau, Mokupuni o Hawaii, ma kahi o F. Marion Crane, M.D., i waiho mai.
J. A. KING
Kuhina Kalaiaina.
Keena Kalaiaina,
Aperila 29, 1896. 2596-3t
I keia la i hookohuia aku ai o MR. M. K. PALEKE i Luna Pa Aupuni no ka Pa Aupuni ma Kealia, Apana o Kona Hema, Mokupuni o Hawaii, ma kahi o W. Apela i waiho mai.
J. A. KING,
Kuhina Kalaiaina,
Keena Kalaiaina,
Aperila 29, 1896. 2596-3t
KA
Nupepa Kuokoa
No ka Makahiki - - - $2.00
No Eono Mahina - - - 1.00
Kuike ka Rula.
PUKA ANA, 1 Pule 2 Pule 3 Pule 4 Pule 5 Pule 6 Pule
Iniha.. $1.50 $2.00 $2.50 $3.00 $3.50 $4.00
2 Iniha.. 2.00 2.75 3.50 4.00 4.50 5.00
3 Iniha.. 2.50 3.50 4.50 5.00 5.50 6.00
4 Iniha.. 3.00 4.00 5.00 6.00 @.75 7.50
5 Iniha.. 3.50 4.75 6.00 7.00 @00 9.00
@ Inihia.. 4.00 5.50 7.00 8.00 9.00 10.00
O na Olelo Hoolaha a pau e hoouna la mai ana no ka Hoolaha maloko o keia Nupe@@ e hoouna pu mai me ka auhau, a ina aole, aoh@ hookomo ia.
HOOPUKAIA E KA
HAWAIIAN GAZETTE CO
C. G. BALLENTYNE, Luna Nui.
JOSEPH M. POEPOE, Lunahooponopono
Honolulu, Oahu.
POALIMA, - - - - - MEI 15, 1896.
KA MOOLELO AHAOLELO.
E hoomaopopo iho ana ko makou poe heluhelu i ka makou moolelo Ahaolelo e nee nei i keia wa, ua hala loa ia i hope, aole hoi ia i kaulike me na la hana a ka Ahaolelo e nee nei i keia wa; a ua lilo no paha keia i mea hoomanonia i ka manao hoihoi o ka mea heluhelu. he oiaio loa keia, aka, aole nae hiki ia makou ke pale ae i keia pilikia, oiai mamuli o na hana hoololi hou o ko makou keena pai nei, ua hoemi ia iho ke kino nui mohaha mua o ka pepa a ke kulana panana iki, elike me ko keia wa e nee nei, a nolaila, ua hoemiia mai na kowa e hiki ai ke hookomo mahuahua ia aku na manao heluhelu ana i ka loa, ka lauia a me ka nui o kahi waa i keia wa i mea e nee like ai ka makou mau moolelo Hale Ahaolelo me ko na la hana e paahanaia nei e lakou i keia wa, he mea maopopo lo@ e loaa wahi kowa ole ana no kekahi mau manao waiwai nui e ae a na makamaka e hoouna mai nei ia makou a pela no hoi me kekahi mau manao mai ka pepa ponoi aku; nolaila, o ka hana kupono wale no a makou e hana ai, oia ka hoopuka ana aku i na moolelo Ahaolelo, ma keia a me keia puka ana, elike me ka nui kupono e pilikia ole ai na manao e ae. Aka, e hoao ana no nae makou ma keia mua aku e hoonee aku i na hoikena moolelo Ahaolelo ma ke alahele o ka aneane e ukali mai i ko na moolelo o ka Ahaolelo e nee nei i keia wa.
Ka Manaoio o kekahi Poe Hawaii ma ke ano pili Hoomana no ka Aina o Amerika.
Oiai, ua omauia a paa maloko o ke Kumukanawai e ku nei i keia wa, ka manao alakai Aupuni o ka Repubalika o Hawaii e ku nei i keia la, no ka hoohui ana aku ia Hawaii nei me Amerika Huiia, ma ke ano hoohui aina maoli paha, a i ole ia, he hoomalu Aupuni paha. aia hoi mawaena o ka lahui Hawaii e noho nei i keia wa, he poe i ae e hookoia keia manao hoohui aina, a he poe hoi kekahi e kue loa ana i keia manao. Oiai aole he mau mea hoike maopopo imua o makou i keia wa no ka heluna nui o ka poe Hawaii o loko o ka Pae Aina nei i haawi ae i ka lakou mau hoohiki a kakoo ana i ke Aupuni e ku nei i keia wa, a kakoo pu hoi i ke kumuhana hoohui aina, e olelo ae no makou me ke kanalua ole, aia ka hapanui o na Hawaii ma ka aoao kue i keia kumuhana. Oiai hoi e ku ana keia mau aoao pela ke ano, e like ole ana ka moe ana o ko laua mau manao ma ke kumuhana i hoike ia ae la, aole makou e hewa i ka olelo ana ae, aia mawaena o keia lahui Hawaii holoookoa he poe e noho ana iloko o ka manaoio pili hoomana, i nana aku i ka aina o Amerika ma ke ano he aina hoano ia no lakou elike me @o na Iudaio paulehia ana ia Palesetina, ma ke ano he aina hooilina ia no lakou, a pela nohoi na Mahometa i ke kulanakauhale o Meka, a o na Karisitiano Katolika Roma hoi i ke kulanakauhale o Roma.
Nolaila, no keia poe Hawaii ka makou e olelo nei ma keia manao, oia hoi, o keia ka poe i manaoio loa aia ma ka aina o Amerika e kukulu ia ai ke kulanakauhale hoano o Ziona, a malaila e houluluia aku ai lakou. Ke kamailio nei makou i keia, me ke kapae ana ae i na manao hoahewa a hoapono paha no ia manao pili hoomana o keia poe Hawaii, aka, o ka mea e pili ana i ko @akou manaoio ma ia ano no ka aina o Amerika Huiia a me ka ninau hoohui aina e ku nei i keia wa, oia ko makou kuleana wale no e ka@ a@ ilio ai.
O keia poe no lakou ka manaoio pili hoomana a makou i hoike ae la no ka mea pili i ka aina o Amerika, o lakou na hoahanau - kane, wahine me na kanaka opio - o ka Ekalesia i kapaia - "Ka Ekalesia o Iesu Karisto no ka poe Haipule o na La Hope." Ke nana aku nei lakou i keia aina o Amerika, ma ke ana o ia ka aina hooilina o na mamo a Iosepa i noho ai ma Aigupia i ka wa o Parao, e like me na mea i hoike ia mai ma Kinohi 49 ma a pauku 26, a ma Kanawailua 33, pauku 13. O keia hoi ka aina a keia poe Hawaii i manaoio loa ai he aina houluulu ia no lakou. A o keia nae ka aina a ke kumuhana alakai Aupuni o ka Repubalika e ku nei i keia wa, e koi nei e hoohui ia aku o Hawaii nei. Aia nohoi ma ka manaoio ana o keia poe, o ka lahui Hawaii ili-ulaula, no Amerika mai ko lakou mau kupuna, a he poe na kanaka Hawaii na ia poe mai Amerika mai. A o keia aina o Amerika mai. A o keia aina o Amerika a makou i olelo ae 'la oia ka aina i kau kanawai ia i keia wa, e ke Aupuni nana ka hoomalu ana e uhi nei maluna o na mea apau e noho nei ma Hawaii nei, ma ke ano oia ka aina nana e hoomalu mai ia Hawaii nei, a oia hoi ka aina e hoohuiia aku ai o Hawaii nei. Ua maopopo ke kau a ke paa nei ke kanawai o ia ano maloko o ke Kumukanawai e ku nei i keia wa; a eia hoi ka olelo o ka Buke o na Berita me na Kauoha, i manaoio ia e keia poe Hawaii a makou i olelo ae nei, ma ke ano he buke ia mai ke Akua mai: "Ke manaoio nei makou, ua hoopaaia na kanaka a pau E KAKOO a E PAA a'e i kela a me keia Aupuni a lakou i noho ai, o@ai e hoomaluia ana ko lakou mau pono pili paa e na kunawai o ua mau Aupuni la." Ma keia rula alakai manaoio o keia poe Hawaii, ua kauohaia lakou e kakoo a e paa a'e i ke Aupuni a lakou e noho nei i keia wa, a o ko lakou kakoo a paa ole ana a'e i ke Aupuni nona ke kanawai i hoikeia ae la, ua kue lakou i ke kanawai o ka manaoio hoomana Akua a ka Ekalesia a lakou i noho hoahanau ai.
Mamuli o keia manaoio hoomana, no ka lilo ana o Amerika i aina houluulu no ia poe, i haalele iho ai kekahi poe o loko o ia Ekalesia ia Hawaii nei a hoi aku la no Mauna Pohaku. A ina hoi he oiaio ke koi manaoio hoomana a keia poe e olelo nei o Amerika ka aina e kukuluia ai ke kulanakauhale o Ziona, alaila, aole anei he mea no lakou e hauoli ai ka ike a me ka hoomaopopo ana ho ua haawi mai ke Akua i ke alanui malaelae loa no ka hiki ana e lilo o Hawaii nei i hapa no ke kino Aupuni o Amerika Huiia, ka aina i hoikeia mai e kekahi buke i manao io nui ia e lakou, oia ka buke a Moramona, elike me ka p@ulele nene ihi-kapu ana a ka poe Mahometa i ka Buke Korana, a o na Katolika Roma hoi i na Haawina Apokolika (Apostolical Traditions) ua hoikeia me ka maopopo loa penei: "Aka hoi, o keia aina (ola ka aina o Amerika) wahi a ke Akua e lilo ia i aina hooilina nou; a e hoopomaikalia ka poe Genetile (lahuikanaka e) maluna o ka aina. A o keia aina, he aina kuokoa auanei ia no ka poe Genetile; aole hoi e hoala ia na lii maluna o keia aina no ka poe Genetile. A e paku aku au i keia aina i na lahui kanaka a pau; a o ka mea nana e kaua mei ia Ziona, e make oia, wahi a ke Akua: no ka mea, o ka mea nana e hoala mai i alii e kue mai ia'u, e make oia." A ua olelo keia buke i paulele nui ia e lakou, hookahi wale no alii a kakou e nana aku ai oia no ke Akua: "No ka mea, Owau ka Haku ke Alii o ka lani, e lilo Au@ Alii no lakou."
Ka Moku Kilo Hoku Coroneta.
Ma ka hora 10 a oi o ka po Sabat a ku nei, ua ku mai la ma ke awa o Kou nei, ka moku "Kilo Hoku" Coroneta @oko o na la aumouna he 15 mai Kapalakiko mai, Mamuli o kona loaa ana i ka pohu i hookauluaia ai oia ma ka moana a kaa hope loa ai kona mauawa o ke ku ana mai ia nei. E holo loa aku ana keia moku no Iapana, no ka lawe ana aku ilaila, i ka puali kilo hoku.
Eia na inoa o na poe oloko o ka puali huli mea kino lani e hele nei no Iapana: Kapena Arther Curtis James o ka Hui heihei Waapa o Nu Ioka, he haumana i puka pono mai ke Kulanui o Amherst, a o ka mea hoi nana i lawe i na lilo apau o keia huakai "kilo hoku," ame Mrs. Arthur C. James; Prof. ame Mrs. David P. Todd o ke Kulanui o Amherst; John Pemberton, Eneginia Nui o ke Aumoku o Amerika Huiia; Willard P Gerrish o ke Keena Kilo Lani o ke Kulanui o Havada; Arthur W. Francis, E. A. Thompson ame Dr. Vanderpoel Adrianee. He 15 ka nui o na kanaka lawelawe o luna o ka moku.
O Prof. Todd, kekahi o na kanaka kilo hoku kaulana loa o ke ao nei, he hoa-kula aoi no Peresidena Hosmer o ke Kulanui o Oahu, una ke kula o Amherst.
E kaulua iki ana keia poe no onei, no na la paha he umi, a holo aku no Iapana. O ka nui o nei wahi moku he 160 tona, kona loa apau, he 133 kapuai; 27 kapuai ka laula.
AHAOLELO O 1896
KE KAU MAU O KA REPUBALIKA O HAWAII
LA HANA 37.
Poakahi, Aperila 6.
KA HALE O NA SENATE
Ka hale o na Senate.
Waihoia mai ka hoike papa inoa hope loa imua o ka Hale i keia kakahiaka. Haawiia i ke Komite Kuikawa. Na Baraunu i waiho mai i ke noi a na Pake tela lole, he 42 ka nui, aole pono lakou e laikiniia. Hoike mai ke Komite Pa'i, ua pau i ke pa'iia ke kanawai a Hokina no na palapala sila no na hana akamai. Hoike mai ke Komite iaia ka noonoo ana o ka Pauku 3 o ke Kanawai Kakauinoa, e pili ana i ke kakauinoaia ana o ke kanaka mahope iho o kona komo ana mai iloko nei o ka aina, iloko ia o ekolu mahina mahope iho o ka hiki ana mai. Waihoia ka hoike a noonoo pu me ka bila kanawai. hoike mai hoi o Makanalesa, e waiho mai ana ke Komite Wae no na Auhau i ka lakou hoike ma ka Poalua.
Hooholoia ma ke heluhelu ekolu ka bila kanawai a Kikila e hooponopono ana i ka hoopae limahana Pake; pela hoi ka bila kanawai o ka Waihona Buke Heluhelu o Hilo, ame ka bila kanawai no ka nui o ka hae Aupuni.
Ma ke kapaeia ana o na rula, waiho mai o Laimana he olelo hooholo e ahewa ana i kekahi keehina hana i lawelaweia e kekahi poe o Hilo, mamuli o ko lakou hooholo ana i kekahi mau olelo hooholo a hoouna mai i Komite e kue i ka hookaawale ole ana o ka Mana Hooko ame ka Ahaolelo i huina da@a mahuahua no na hana hou ma ka Mokupuni o Hawaii; a ua hoahewa pu ia na luna Aupuni i komo pu iloko o keia hana, a ke hana hou lakou pela e hoopauia no lakou mai ka lakou mau hana aku. Ua aponoia ka olelo hooholo, oiai nae o Makanalesa, Hokina ame Northrup i koho ai ma ka aoao kue.
Hooholoia ka Bila Kanawai Kakauinoa ma ka heluhelu elua, me ka hoololi a ka Hale o na Makaainana, e olelo ana, e kakauinoa koke no ka mea e hoea mai ana mai na aina e mai iloko nei o ka aina mahope koke iho no o kona pae ana mai ia nei. Haawiia ka Bila Kanawai a ka Hale o na Makaainana e pili ana i ka hoakea ana ae i na alanui o Honolulu nei i ke Komite o na Aina Aupuni ae na Hana Hou. Haawiia ka Bila Kanawai a Hokina no na palapala sila no na hana akamai i ke Komite Hookolokolo.
Hoopanee ka Hale.
KA HALE O NA MAKAAINANA.
He palapala mai ka Hale mai o na Senate e hoike ana i ka ae ana o ia Hale i na hoololi a ka Hale o na Makaainana no ka Bila Kanawai e pili ana i na moho Ahaolelo i hoopaapaaia. Waiho mai o Hanuna he palapala hoopii mai Honolulu aku nei e nonoi ana e hookapu loa ia na hana ki-ki-pu hoomaamaa iloko o keia kulanakauhale. Haawiia i ke Komite Hookolokolo. Na Robikana, o ke Komite Hookolokolo, he hoike no ka Bila Kanawai Senate e pili ana i ka hoopaapaa alanui ame pono wai, e kapae ana i ka Bila Kanawai a ka Hale o na Senate a e koi ana e hooholoia ka Bila Kanawai i hoomakaukauia e ke Komite no ia hana. Na Rikeke i waiho mai i ka hoike a ke Komite Waiwai no ka olelo hooholo o Hilo. Waihoia ma ka papa a noonoo pu ia me kekahi bila kanawai e laweia mai ana no ia hana.
Na Rikeke, o ke Komite i haawiia ai na itamu apau o ka Bila Haawina malalo o ka Mahele Buro Oihana Dute, e hooholoia ia mau itamu apau a koe ka itamu o $5,400, aka, e hooholoia i $6,000 no na luna koho waiwai dute ame na poe nana. Waihoia ma ka papa a noonoo pu ia me ka Bila Haawina. Nana mai no, o ke Komite Wae i haawiia aku ai na itamu apau malalo o ka Mahele Buro Oihana Leta, e hoike ana e apono ia na itamu apau o ia mahele, koe ka uku o ke kakauolelo i $3,600 ame ka huina o $27,120 no na kakauolelo apau, e komo pu ana malaila ka uku o ke kakauolelo kope i hoolimalimaia ai no kekahi hana kuikawa o ia keena, oia hoi, he $240, ua like ia me $60 no ka mahina hookahi. Waihoia keia hoike a noonoo pu ia me ka Bila Haawina.
Na Raikorofa mai, o ke Komite o na Aina Aupuni, e apono ana e hanaia ona uwapo ma Waiawa, a e hookomoia ma ka Bila Haawina i $4,000. Waihoia ka hoike a noonoo pu ia me ka Bila Haawina. Nana mai no, mai ia Komite hookahi mai no, e ae ana e haawiia ia A. B. Loebenstein i $587 no kona uku ana aina mamuli o na kauoha a ke Kuhina Kalaiaina. Waiho mai o Rikeke he ninau i ke Kuhina Kalaiaina: Heaha la ka hana a ka Mana Hooko no ke kumuhana i waihoia mai e ka Hui Kukui Uwila Hawaii, i kakauia ma ka la 21 o Maraki, 1895, no ka hoomalamalama ana i na alanui o Honolulu?
Nonoi mai o robikana e aeia ke Komite o ka Hale e pili ana i ke Sila Nui o ke Aupuni e halawai pu me ke Komite Senate a noonoo pu ia mau Komite a elua. Aponoia.
Hapaiia ka noonooia ana o ka Bila Haawina. Lilo ka Hale i ka hoopaapaa ana no ka hoike a ke Komite e kapae loa ana i ka uku o ka luna koho waiwai o ka Hale Dute. Ma ke koho ana ua apono loa ia ka hoike a ke Komite, he ekolu no poe ma ka aoao kue.
Hoike mai o Kamika i kona manao e lawe mai i bila kanawai e hoololi ai i ka Pauku 7 o ke kanawai pa aina. Ma ke kapaeia ana o na rula, heluheluia ka bila, no ka manawa mua, ma kona poo. Haawiia i ke Komite Pa'i.
Hoomaha ka Hale ma ka hora 12 a noho hou ma ka hora 1:30 auwina la.
Auwina La.
Hapaiia ka noonooia ana o ka uku o ke kakauolelo a ka Luna Leta nui mai ka $4,200 a ka $3,600. Mahope iho o ka papa leo ana o kekahi mau hoa no keia haawina, ua holo ka $3,600 elike me ka ke Komite. Kapae loa ia ka huina o $28,320, a koe ke $60 no ka mahina no ke kakauolelo kope.
Hapaiia ka itamu o $12,000 no ka helu kanaka o 6 makahiki, e hoomahuahua hou ana i $3,000. Nonoi o Robikana e noonoo pakahi ia. Kue hoi oHanuna i ka $2,000 no na mea paahana no na kula hana lima. Aka, ua hooholoia. Lilo no na ahahui kumukula, $1,000. Hooholoia. Waihona buke, $7,000. Hapaiia ka haawina dala no ka helu kanaka, $12,000. Hooholoia. Hana hou ana i na halekula, $12,000. Hooholoia. Ka uku o A. B. Loebenstein, $587. Holo.
Hooholoia ma ka heluhelu ekolu ka. Bila Kanawai no ka hoonoho ana i na hoa lunakanawai o ka Aha Kiekie. Pela no ka Bila Kanawai e hookomo mai ana i ka Aila Mahu ma ke ano wahie. Heluheluia no ka wa mua loa ka Bila Kanawai a ke Komite no na Pono Alanui me Pono Wai, i manaoia oia ke pani ma kahi o ka Bila Kanawai Senate. Haawiia i ke Komite Pa'i.
Hoopanee ka Hale.
LA HANA 38,
Poalua, Maraki 7.
KA HALE O NA SENATE.
Hoike mai ke Kuhina Kalaiaina, ua pau i ke kakauinoaia ka bila Kanawai e pili ana i na hana a ke Kuhina o ko na Aina e, e pili ana i ka oihana koa; ka bila Kanawai Alanui o Hilo, ame ka olelo hooholo hui e pili ana i ka Luna Hooia Nui ame ka Ahaolelo. Heluhelu iamai ka palapala mai ka Hale mai o na makaainana e nonoi ana e malamaia ona halawai kukakuka no ka mea e pili ana i ka Sila Nui o ke Aupuni.
Ma ke noi a Walakahauki, ua haawiia ke noi a ka hui o Hakapila ame ka Hui Mahiko o Kahuku i kekahi Komite Wae, oia o Laimana, Hokina ame Makanalesa. Waiho mai ke Komite Buke Helu i kekahi bila no $110.85 no ka paku e hoopuni ana i ke keena o ka Aha Senate. Kauohaia ke Komite e uku aku i ka bila.
Malalo o na hana mau o ka la, ua ua hooholoia ka bila Kanawai Kakauinoa ma kona heluhelu hope. O Wili Raiki wale no ka mea i koho ma ka aoao kue. Hooholoia ka bila Kanawai Aila Mahu, ma ka heluhelu mua, a haawiia i ke Komite Hooponopono Ka@nawai. Aponoia na hoololi a ka Hale no ka Bila Kanawai Helu 17, a hooholo loaia ua bila Kanawai la. Ha paiia ka noonooia ana o ka bila Kanawai Palena Pauahi. Ua kue o Kikila Baraunu i ka hoomahuahua hou ana aku i na palena pauahi, malalo o ke kumu he mea ia e hoopilikia ia ai na kanaka Hawaii. Kokua o Hanale Walakahauki i keia noi, a pela no hoi ke Kuhina Waiwai. Kokua hoi o Makanalesa ame ke Kuhina o ko na Aina e i ka bila Kanawai. Ma ke koho ana, ua holo loa ke noi a ka aoao kue. Hooholoia, ma ka heluhelu elua, ka pauku elua o ke Kanawai. Hoopanee ka Hale.
KA HALE O NA MAKAAINANA.
Hoike mai ke Kuhina Kalaiaina no na Bila Ahaolelo i kakauinoaia e ka Peresidena, elike no me kana i hoike ai ma ka Hale o na Senate. Hoike mai ka lunahoomalu no ka hooholo ana o ka Aha Senate ma ka heluhelu ekolu i ka Bila Kanawai e pili ana i ka hae Aupuni; pela hoi me ka hoouna ia ana o na bila Kanawai no ka waihona o Hilo ame ka Hoopaelimahana Pake, a i hooholoia ma ka heluhelu ekolu.
Na Robikana o ke Komite Hookolokolo i waiho mai i ka hoike no ka hooponopono ana i na aina ma Honolulu, ua kueia kekahi mau pauku o ua Kanawai la a kapaeia ae hoi. O ka pauku 3 o ua Kanawai la, e haawi ana i ka mana no ka noonoo ana no na hana hoomaemae maluna o kekahi aina i ikeia e ka Papa Ola he maikai ole, i ke Kuhina Kalaiaina ame ka Aha Kuka Hooko, me ka lohe ole ia o ka leo o ka mea nona ka aina, he kue Kumukanawai ia, ma ka manao ana o ke Komite. Na Bona o ke Komite Wae i waiho mai he hoike no ke noi a kekahi poe o Honolulu nei, e papa loa ia ke ki-ki pu ana ma ka la Sabati, a oiai ua ku like ia noi me ka bila Kanawai Helu 18 o ka Hale, nolaila, e waihoia ma ka papa ke noi noonoo pu ia me ka bila Kanawai.
Na Robikana i waiho mai ka hoike no ke Kanawai Helu 9 o ka Hale e pili ana i ka hooakea hou ia ana o kekahi mau alanui o Honolulu, e apono ana ke Komite i ua bila Kanawai la me kekahi mau hoololi. Hapaiia ka noonooia ana o keia Kanawai, heluhelu pakahi ia na pauku a aponoia na hoololi a ke Komite. A ma ke noi a ke Kuhina o ko na Aina e, e hoololiia ka pauku 5 i pauku oike Papa Hoakaka, ua ae ia; a hooholoia ka bila ma ka heluhelu elua.
Ma ke noi a Robikana, ua hapaiia ka noonoo ana o ka Hale no ka bila Kanawai Helu 12, e pili ana i na aina o Honolulu nei. Ua hooikaika o Robikana ma ka aoao e kue loa ana i ka pauku 3, no ka loaa ole ana he kuleana hoohalahala ma ka aoao o ka mea aina i ka olelo hohewa aka Papa Ola. Mahope iho o kekahi mau hoakaka ana, ua hoopaneeia ka Hale.
He Leta Mai na Aina E Mai.
Ma ke ku ana mai o ka mokuahi Mariposa i kela Poaha aku nei, ua loaa hou mai la ia makou he palapala mai na Aina e mai, a no ka piha e ana o ka makou pepa o ia pule ma ia la, nolaila, ua hookaulua ia ko makou hoopuka ana aku i keia palapala a ma ka pepa o keia la. Na ka mea heluhelu no e wae nona iho.
My Dearest Papa: - Aloha.
He wahi wa pokole loa ko'u e kakau iho ai i mau wahi lalani manao nau. Ua haalele makou ia Kapalakiko, oia hoi ka Hotele California a'u i hoike aku ai ia oe, ma ka'u leta o ka la 24 aku nei. Ua kau aku makou maluna o ke kaauila, i kapaia e koonei poe he Cable-car. Holo aku la makou a hoea i ka uapo. Eia no keia, ma keia aoao o Kapalakiko nei, a e holo ana makou no kela aoaoa o ke kai kuono (bay) aia ma ia aoao o Oakland.
I ka hoea ana i ka uapo, ua kau aku la no luna o ka waapa i kapaia e koonei poe he Ferry-boat; heaha la la la kakou - he waapa kao paha - ela nae he kohu ole ia inoa no keia ano waapa, oiai, ua ike au i ka waapa kao o Honolulu, aole loa ia i like me keia ano waapa. he hale ko luna o keia waapa, he aniani wale no kona hale apuni. he nani maoli no ke nana aku he nani a maemae ma na wahi apau. He nani a maemae ma na wahi apau. O keia kai kuono a makou i holo aku ai he maikai. Uliuli lipolipo maikai ka moanawai.
I ko makou pae ana ma kela aoao o Oakland ia, a ua holo loa makou no kahi o ka makamaka o kuu makuahine ma ke aloha, aia ia ma ka helu 619-19 Street, Oakland. Ma ka la Sabati aku nei, ua hele makou i ka pule. He Kula Sabati ame ke anaina pule maoli no koonei, elike no me ko kakou olaila. Ninau mai kekahi poe o onei ia'u no ko kakou anaina'haipule ma Honolulu, ua hoike aku nohoi au, he maikai no me kuu hai pu aku hoi ia lakou no ke kakou anaina pule ponoi iho aia no ia iloko o ka hall i kapaia o Ario@@ Hall i keia wa a Mililani Hall i ka@@ wa, He maikai no koonei anaina haipule. Aole au i hele makaikai aku i kahi mau anaina pule e ae. Lohe au i ke kani o ka ogana maloko nei o keia halepule ame na leo himeni, hoonao ae ia au i na anaina haipule o kakou, pela no me ko Kawaiahao, Ka@@makapili ame ke Central Union Church, na wahi a'u i hele mau ai, oia: ko'u mau la e noho ana ma ke Kula Kaikamahine o Kamehameha.
E papa, haiki loa ka manawa, ke kani mai nei ka bele ai. Ono mai la no ka poi, ka ai hanau o ka aina. Good-bye.
CECILIA KEALOHA POEPOE.
Oakland, Aperila 29, 1896.
I na Kula Sabati a Puni ka
Mokupuni Oahu.
Mamuli o ka hooholo ana o ka Ahahui Kula Sabati o ka Mokupuni Oahu, i noho @i ma ka luakini o Kaumakapili, Aperila 2, 1896, ua koho ia Aha i ko@ite wae o elima lala, ia lakou ka noonoo ana no na hana hoike hui o na Kula Sabati @ ka Mokupuni Oahu, ma ka la 6 @ I@@e e hiki mai ana, ma ka luakini o Kawaiahao.
Nolaila, oia ka ke Komite e hoike aku nei i keia Papa Kuhikuhi malalo iho nei:
Hoomaka ua hana hora 10 a.m.
1. Himeni hui - Hoku Ao Nani, aoao 210.
2. Pule.
3. Kula Kaikamahine Kawaiahao.
@ himeni.
Na Kula hui o Kawaiahao, 1 himeni.
4. Haiolelo - Henry Waterhouse.
5. Kula Kaikamahine Kamehameha, I himeni.
6. Haiolelo - Rikeke.
7. Kula Keikikane ame Kamalii, Kamehameha, I @imeni.
8. Haiolelo - S. L. Desha.
9. Kula o na Koolau, I himeni.
Kula Waialua, I himeni.
10. Haiolelo - S. Kapu.
11. Himeni Hui - Hoku Ao Nani,
aoao 220.
12. Lulu o na Kula Sabati.
13. Kula o Ewa ame Waianae, I himeni.
14. Haiolelo - J. M. Ezera
15. Na Kula nui o Kaumakapili, I himeni.
16. Haiolelo - E. S. Timoteo.
17. Himeni Hui - Hoku Ao Nani, aoao 232.
18. Pule Hookuu.
O keia iho la ka Papa Kuhikuhi a ke Komite i hoomakaukau ai, nolaila, e hoomaopopo na kula o na Koolau hookahi himeni, a pela me Waialua hookahi himeni, iloko na@ o ko laua manawa hookahi, o na Kula o Ewa ame Waianae hookahi himeni, elike me na mea i hoikeia ma keia Papa Kuhikuhi.
NA KE KOMITE.
Honolulu, Mei 12, 1896.
E NANA MA@I KELA.
E hoouna pololei mai i na Dala uku Napepa a Olelo Hoolaha paha, a ano e ae paha e pili ana i ke KUOKOA ma ka inoa HAWAIIAN GAZETT COMPANY, aole ma ka inoa o kahi mea e ae. Aole ma ka inoa @ ka Luna Nui a Lunahooponopono hoi.
E loaa no ka Lunahooponopono o keia pepa ma ka Poakolu ame Poaha o kela ame keia pule, ma kona keena oihana maloko o ka Halepai o ka Hawaiian Gazette, ma Alanui Moi, a ma na la e ae (koe ka la Sabati,) ma kona keena loio, maloko o ka hale-pohaku ma ke kihi o na Alanui Betela me Moi, pili pu me ke keena o ka Loio J. L. Kaulukou.
HE PALAPALA AFIDEVITA.
He mea hooiaio keia, ma ka ia 11 o Mei, ua hele aku la au i ka halekua: lapaau o Melick me na laau kookoo poaeae, a kuai aku la au i omole o ka Laau. Hoopau Eha a Kamalena, no ka hoola ana i ka ma'i ruatika, ka ma'i hoi nana au i hoolilo i lu-ahi na ka oopa Mahope iho o ko'u hamo ana i ekolu omole o keia laau, ua ola loa ae la au. A ke hooia aku nei au ia mea me ka hauoli. - Charles H. Wetzel, Sunbury, Pa.
Hoohikiia a kakauinoaia imua o'u ma ka la 10 o Augute, 1894. -Walter Shipman, J. P. He 50 keneta no ka omole. E kuaiia aku ana e na poe kuai laau lapaau apau. BENSON & SMITH na Agena ma ko Hawaii Pae Aina.