Ka Nupepa Kuokoa, Volume XXXV, Number 32, 7 August 1896 — Heaha ka Puana a ka Moe. [ARTICLE]

Heaha ka Puana a ka Moe.

Ia makou i hapai niau ai i na manao hoakaka no ka mea e pili ana i ko kakou kulana Aupuni e ku nei i keia wa, no na manawa he nui i hala ae nei, i keia la a ma keia liope aku nohoi, aole no ko makou makemake e hoino wale aku i ke kanaka Hawaii i kulike ole kona manao kalai Aupuni me ko makou; aka, no ko makou makemake ana e hoopau maoli ia ae na manao kuhihewa iloko o kekahi poe Hawaii e noho mai nei, no ka lilo ana o ke Aupuni e ku nei i Aupuni mau loa ole aku mamuli o ka hoihoi hou ia ana mai o ke Aupuni kaliiko, elike me na moeuhane palaualelo e hoopihapiha wale ia aku nei ia lakou i keia wa a ma keia hope aleu paha. Ua ike no na poe e hoolilo nei ia lakou iho i mau alakai no ka poai "Roialiti," aole loa o Amerika e hoihoi hou mai ana i ke Aupuni "Roialiti," eia no nae lakou ke hoomau nei i ke alakai ana i kahi hapa o ka lahui ma ia ano. Ina paha, e oleloia me ka maopopo e ua poe la, aole kakou e haawi i na kakoo ana i ke Aupuni e ku nei, no ko kakou makemake ole maoli no ia Aupuni, aole hoi no na manao ana e hoihoi hou ia mai ana ke Aupuni "Roialiti," ina paha e aho ia. Aka, o ka hoopaakiki ana, na Amerika a na Pelekane paha e hoihoi mai ana, ua Aupuni Roialiti la, oia ka makou i kue aku ai. Aole no ke ake hoino i ke kanaka Hawaii—aole.