Ka Nupepa Kuokoa, Volume XXXVII, Number 19, 13 May 1898 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

BUKE XXXVII.    HELU 19.   HONOLULU, POALIMA, MEI 13,1898.  NA HELU APAU 2702

 

@Hoolaha Loio.

W.R. KAKELA.

Loio a he Kokua ma ke Kanawai HE LUNA HOOIAIO PALAAPLA. 2370

 

LYLE A. DICKEY.

Loio a he Kokua ma ke Kanawai.

 

Alanui Kaahumanu, Helu 14. Tel. 682.

 

Iloko o ke Keena o ka Loio Kuhina mamua, a he Loio Hoopii ma ka Aha Apana o Honolulu.

 

 

E hookoia na hana pili kanawai apau mai na Mokupuni mai.

O A. F. Tavares, Kakauolelo, Maheleolelo a Notere no ka Lehulehu. 1yr.

 

@Hoolaha Humao

Papa! Papa!

Aia ma kahi o

LEWERS & COOKE

(Lui Ma.)

 

Ma ke Kahua Hema o na Alanui Papu me Moi.

 

E LOAA NO NA

Papa Nouaiki

 

O kela a me keia ano.

 

Na Pani Puka…

Na Puka Aniani…

Na Olepelepe…

Na Pou…

Na O'a...

Na Papa Hele…

Na Papa Ku…

Na Papa Moe…

 

Na Pili Hale

O na Ano apau.

Ame na

Wai Hoohinuhinu Nani

O Na Ano Apau.

 

Na Palaki o na Ano he Nei Wale.

 

Ke haiia aku nei oukou e na makamaka a pau, ua makaukau keia mau makamaka o oukou e hoolawa aku ma na mau a pau o pili ana ma ka laua Oihana na ka

 

Uku Haahaa Loa

@me ka mea e  holo ana mawaena o Lana a no ka Mea Kuai.

@E Mai o Wao no Oukou Iho.

 

O ka olelo a na nupepa, na kekahi kanaka o Ohio kekahi mau keiki maikai he ehiku ko lakou nui i kekahi wa ioihi i hala ae nei. Mailoko mai o keia mau keiki ehiku, hookahi wale no i make aku. Ua manaolanaia,ua hoahu oia i ka lako Laau Kunu a Kamalena, ka laau e ola io ai ke kunu ho, kunu kalea, anu ame na kunu e ae, a oia ke kumu o ka pakele ana o na keiki ana eono. E kuaiia ana e na poe kawili laau laapaau apau ame ka poe kuai laau lapaau. O Benson, Smith & Co., na Agena ma ko Hawaii Pae Aina.

 

No elua pule okoa ka nui o ka makou mau mea hou o na Aina e, e puka aku nei ma ko makou pepa o keia la. Mai huhu mai oukou no ka nui loa.

 

Upaipai na Eheu o ka Aeto Amerika ma Manila.

 

PAU NA MOKUKAUA SEPANIA I KA LUKUIA.

 

Ke Koa a me ka Wiwo ole o ka Adimarala Sepania.

 

EHUEHU NA HANA A KA ILIPUAKEA O MALEKA.

 

Ka Hoonee Kaua ma ka Moana Atelanika.

 

KE KAUA MAWAENA O AMERIKA AME SEPANIA.

 

O keia mau nuhou a makou e panee aku nei malalo iho nei, no ke kaua mawaena o Amerika Huiia ame Sepania, oia na mea hou i loaa mai ia makou maluna mai o ka moku kalepa "Transit" ame ka mokuahi "Rio de Janeiro"ma ka Poalima ame ka Poaono (Mei 6 ame 7) o kela pule aku nei.

 

HOOPUKA O PERESIDENA MAKINILE I KA OLELO KUAHAUA PANIKU I NA AWA KUMOKU O CUBA.

Wasinetona, Aperila 22. I keia la i hoopukaia aku ai ka olelo kuahaua a Peresidena MaKinile no ke paniku ana i na awa-kumoku o Cuba. A penei ke ano nui o ua olelo kuahaua 'la: Oiai, Ma o kekahi olelo hooholo hui la i hooholoia e ka Ahaolelo Nui a i aponoia ma ka la 20 o Aperila, 1898, a i waihoia aku hoi i ke Aupuni o Sepania, ua kauohaia aku ua Aupuni la (o Sepania) e hookuu koke i kona noho mana ana ame kona noho hooponopono aupuni ana ma ka Mokupuni o Cuba, a e unuhi aku i kona mau aumokukaua mai Cuba aku, a mai na kai aku hoi o Cuba, a  au kauohaia hoi ka Peresidena o ka Mokuaina Huiia e hoohana aku i ka oihana kaua holookoa o Na Mokuaina Huiia, ma ka aina a ma ka moana, a e kahea aku hoi no ka hoohana maoli ia ana iloko o ka oihana kaua o Na Mokuaina Huiia, na pualikoa o na mokuaina lehulehu, i like ka nui me ka mea e lawa ai ka hooko ana'ku i ua olelo hooholo la; a Oiai Ma ka hooko ana'ku i ua olelo hooholo la, ua manao ka Peresidena o Amerika Huiia, he mea pono ke hoonee aku a e hookahua aku hoi i ke paniku ana i ka aoao akau o Cuba, oia hoi na awakumoku apau ma ua kapakai la, mawaena o Cardenas ame Bahia Honda, ame ke awakumoku o Cienfuegos, ma ke kapakai hema o Cuba; A nolaila, owau, o William Makinile (McKinley), Peresidena o Na Mokuaina Huiia, i mea e hooko aku ai i au olelo hooholo la, ke kukala nei, ma keia, a ke hoike aku nei, ua panikuia e Na Mokuaina Huiia o Amerika ke kapakai akau o Cuba, e komo pu ana na awa ma ua kapakai la, mawaena o Cardenas ame Bahia Honda, ame ke awa o Cienfuerto ma ke kapakai hema o Cuba, i oleloia, elike me na Kanawai o Na Mokuaina Huiia, ame na Kanawai o na lahui, i pili ma keia kulana hana. E hoonohoia aku ana he ikaika kaua lawa pono, e hiki ai ke akeakea aku i ke komo ana mai ame ka puka ana aku o na moku mailoko aku o na awa i oleloia ae la. O kela ame keia moku o kahi aina kuikawa e hookokoke mai ana i ua mau awa la, a e hoao ana paha e haalele iho ia mau wahi, me ka hoike mua ole ana mai i ka lohe, a hoomaopopo ana paha no ka hookumuia ana o keia panikuia ana, e hoikeia aku no e ke aliikoa kiekie o ka oihana kaua e hooko ana i keia paniku ana, a nana hoi e hoopaa iho ma ke kakau kua ana i na olelo ame ka la oia hoike ana mai, maluna o ka palapala hoike a ua moku la, a pela hoi me kahi i kakau kua ia ai ua palapala 'la, a ina e hoao hou ua moku la e komo aku iloko o kekahi awa i panikuia, e hopu pio ia no ia a e hoounaia aku ma ke awa mua loa e ikeia ana he kupono no ka lawelaweia ana o na keehina hana e kue ana i ua moku la ame kona mau ukana, ma ke ano he waiwai pio ia, elike hoi me ka mea e ikeia ana he pono.

O na moku o na aina kuikawa e ku ana maloko o kekahi o au mau awa _____la, ma ka manawa i hookumuia ai ke panikuia ana, e hoikeia aku no i ke iho ia wahi iloko o na la he kanakolu. I hoike no keia, ke kakau nei au i ko'u inoa a kauoha e hoopiliia ke Sila o na Mokuaina Huiia.

Hanaia ma ke Kulanakauhale o Wasinetona, i keia la 22 o Aperila, M. H. 1898, a o ke Kuokoa ana o Na Mokuaina Huiia hookahi haneri ame iwakalua.

 

WILLIAM M'KINLEY.

Na ka Peresidena:

JOHN SHERMAN,

Kuhina Nui.

 

HOIKE MAOPOPO O SEPANIA UA HEMO KA NOHO HOALOHA MAWAENA O NA AUPUNI ELUA.

Maderida, Aperila 21. Eia iho ke ano nui o ka palapala a ke Kuhina o ko na Aina E o Sepania i haawiia aku ai i ke Kuhina Amerika Woodford: "Aloha oe; Ma ka hooko ana'ku i kekahi hana hoehaeha naau, ua loaa ia'u ka hanohano e hoike aku ia oe, ua aponoia e ka Peresidena o ka Repubalika, he olelo hooholo, na na Hale elua o ka Ahaolelo Nui o Na Mokuaina Huiia, e hoole ana i ko Sepania mana Aupuni oiaio, me ka hooweliweli ana mai hoi e komo akeakea me na mea kaua ma Cuba, a ua like nohoi ia me ke kukala kaua maoli ana.

"Ua kauoha aku nei ke Aupuni o ka Moiwahine i kona Kuhina e huli hoi mai, me ka hakalia ole, mai Amerika Akau mai, me na hoa apau o ka oihana Kuhina.

"Ma o keia hana ana 'la, ua hookiia ka launa pili Aupuni ana ikea ai mamua aku nei mawaena o na Aupuni elua, a pela pu hoi me na hana apau mawaena o ko laua mau luna Aupuni.

"Ua konoia au, pela iho la e hoike aku ai ia oe, i hiki ai ia oe ke hoomakaukau nou iho elike me kau i ike ai he pono. Ke  nonoi aku nei hoi au i kou hanohano i kou hooia ana mai i ka loaa ana'ku o keia palapala, ma ka manawa au i ike ai he pono, me ko'u lawe pu ana ae hoi i keia wa maikai, no ka hooia ana aku imua ou i ko'u mau manao mahalo kiekie ia oe.

                                                                           "P. GULLOU."

 

KE AUMOKUKAUA AMERIKA MA NA KAI O CUBA.

Havana, Aperila 22. Ua hoike ae ka mea kakau o ka nupepa Herald o Nu Ioka, mai Havana mai, ke kulanakauhale poo o Cuba, penei: Mai na pae puu aku o Guanajay, i ike aku ai au i na mokukaua o Amerika, i keia auina la. Ke holo mai nei lakou no _Havana nei mai ke kukulu komohana mai. Ua hoea aku ka lohe i ke Kakela o Morro. Ke hoomakaukau la ia wahi. He nui ka hopohopo o na Sepania na lakou e kiai nei ke kulanakauhale. O kahi nawaliwali loa o ke kulanakauhale o Havana nei, aia ia imua ponoi o na aumokukaua Amerika.

 

 

Komodoa Dewey ame Kona Moku ka Olumepia.

 

 

Aia hoi o Kenerala Blanco, iloko o kona aahu koa piha, iloko o ka papu o Santa Clara, ke pookela o ka ikaika o na papu pale o Havana nei. Aia pu me ia kona mau alii ukali apau, ame na 'liikoa alakai o na mahele koa kumau a pualu. Ke puahi nei ka holo ana a na 'lii hooko kauoha iloko nei o ke kulanakauhale, e kahea ana e lalau i na mea kaua, me ka a-hai ana i na kauoha i na batari pu-kaa, me na kauoha ia lakou e hoike koke aku imua o ke Kapena-Kenerala.

Ua nui ka uluku o loko nei o ke kulanakauhale, ame ka pioloke. Ka puhee nei kekahi poe maloko o na pakaua, a o kekahi poe hoi ke haalele nei i ke kulanakauhale. He nui hewahewa na kanaka i holo aku no na pakaua no ke kaua ana.

O kahi hoi a na mokukaua Amerika e kia mai nei, he wahi maikai loa ia no ka hoolele ana mai i na koa Amerika no uka nei o ka aina, a ua hoomaopopo hoi o Kenerala-Blanco i keia mea, a nolaila, ke hoouna awiwi nei oia i na pualikoa i ka papu o Santa Clara. Ua hoouna awiwi aku nei nohoi oia i kekahi mau mahele koa, ma ke kaa-ahi, no Vedado ame Karamelo. He mau pakaua nawaliwali keia. E hiki loa ana i na pualikaua Amerika ke hoopae ia mai ma keia wahi, me ka loaa ana no nae he wahi hooili kaua uuku ana mawaena o na aoao elua e pilikia nui ole ai na Amerika. Ke hopohopo loa nei hoi o Kenerala Blanco o lilo ke alahele ma ka muliwai Almendarez, i alahele mua no na koa Amerika e hele mai ai ma ko lakou wa e pae mai ai i uka nei o ka aina, a ma ia hana ana e loaa ana ia lakou he kulana ma ke komohana, he mau mile wale no ka mamao mai ke kulanakauhale aku nei. O ka papu ano nui wale no ma ia wahi oia ka Hale Kakela o Alares. Ua lehulehu loa hoi na regimena i hoounaia aku i Playa de Mariano, he awa pae maikai loa hoi ia. He alahao hoi ke moe ana mai keia wahi mai a hoea i Havana nei.

Eia pu hoi o Arolas, ke kiaaina oihana koa o Havana nei, ke lawelawe pu nei me Kenerala Blanco, a o laua kai hele aku nei e nana i ke kulana pale ma ke alahele o Mariano. Ua hele mua aku nae laua i ka papu o Reina, mahope iho o ko laua haalele ana iho ia Santa Clara. Ua pau loa na pukuniahi i ka lawa pono i na kanaka, a ua haawiia aku hoi na kauoha ia lakou e ku me ka makaukau i keia po, no ka manao wale ia ana, aia ka hoomaka ana o ke kaua ma ka wanaao.

 

WAWALO KA LEO O KA PU MUA LOA O KE  KUKALA KAUA MAI KA MOKUKAUA NASHVILLE AKU O KE AUMOKUKAUA O AMERICA.

Ki Komohana, Felorida, Aperila 22. Na Patrick Mullen i ki i ka pu mua loa o ke kukala kaua mawaena o Amerika Huiia ame Sepania. O keia pu i ki ia ai, mailuna aku ia o ka mokukaua Nashville, malalo o Kapena Maynard, oiai ia e nee pu ana me ke aumokukaua malalo o Adimarala Kamekona (Sampson) no Havana. A penei ka hoike a Kapena Maynard no ke ano i paa pio ai ka moku Sepania Ventura, oia hoi ka moku i kipu ia aku ai e Patrick Mullen.

"Mamuli o ke kauoha a ka moku lawe hae, ua holo aku la makou a he iwakalua mile paha mai Ki Komohana mai, a ma ka hora 7 a oi iki ua hoike mai la ko makou luau (look-out), ua ike aku oia i kekahi moku malihini. Ua ike aku la nohoi makou, he moku Sepania ua moku la, eia nae aohe hae e kau ana maluna ona. Ua haawi aku la makou i hoailona, eia nae aole i pane mai ua moku la, aka, o ka makou mea o ka ike ana aku e holo ana ua moku la mai a makou aku. I keia wa i haawi mai ai ka Adimarala ia makou i ke kauoha e uhai makou i ua moku la, ma ke ano he waiwai pio ia no ke kaua. Ua kauohaia aku la hoi o Patrick Mullen, kekahi kanaka ki-pu o luna o ka moku, e ki aku oia i kekahi pu mamua aku o ka ihu o ka moku e holo ana. U a ki ia aku keia pu, a ua hoea aku i kahi makemake ia, aole no nae i ka'ulua iho ua moku la. Nolaila, ua ki hou ia ka pu, a ua lele aku ka poka a he kanalima wale no kapuai i koe a loaa aku o hope o ka moku Paniolo, a na keia pu i hoohuli mai i ua moku la. Ua hopu pio ia ua moku la e makou. Ua kue mai hoi ke kapena no keia hana, eia nae ua hoike aku makou, ua kukalaia ke kaua."

 

KA HOIKE MA KO NA AMERIKA AOAO NO KE KIPOKAIA ANA O MANZAS, MA CUBA.

Ki Komohana, Aperila 27. Ma ka auinala o keia la iho la i kipoka aku ai ke aumokukaua Amerika, malalo o Adimarala Kamekona i na kahua kipu ame na papu o ka poe Sepania ma ke awa o Matanzas, a ua pau lakou i ka ulupaia. O na mokukaua i hoohanaia ma keia kipoka ana, oia na mokukaua Nu Ioka (ka moku o ka Adimarala), me ke Cincinnati ame ka Puritana. He mokukaua moni-ta keia moku hope.

 

E kalewa ana keia mau mokukaua mawaho mai o keia awa no ka hakilo ana i na papu o uka o ka aina, ia wa i ki ia mai ai ka moku o ka Adimarala e na pu o na batari pu-kaa ma Lae Rubala Cava ame Lae Maya, oia na papu kiai ma ka nuku o ke awa. I kela wa i holo aku ai ka moku lawe hae, Nu Ioka, noloko o ke awa, me ka huai ana o na pu ma kona mau aoao elua. Ia wa nohoi i komo aku ai ka mokukaua moni-ta Puritana, a ki aku la kona mau pu i ka papu ma Lae Maya, oiai hoi ka moku o ka Adimarala i hookokoke aku ai i ka papu ma Lae Rubala Cava me ka hoolele ana i na poka-pahu. Ma ia wa hoi, ua haawi mai la ka mokukaua Cincinnati i ka hoailona i ka moku Adimarala e aeia aku oia e kipoka i uka o ka aina, oiai ua kauoha ka Adimarala iaia e ku iwaho. Ua haawiia aku hoi ka ae iaia. Nolaila, ua kipoka ae a ia i ka papu ma ka aoao komohana e kupololei ana ma kana wahi e ku ana.

Ua ki mai nohoi na pakaua mai uka mai i na moku Amerika, aole nae i manuheu mai na moku i ka lakou mau poka.

Iloko o umikumamawalu minute i hoomau aku ai na mokukaua i ke kipu ana, ua hamau a meha loa ke kani ana mai o na pu o uka o ka aina. He 300 paha ka nui o na poka i hoolele ia aku e na moku Amerika no uka o ka aina, a o ka mamao i ki ia aku ai na pu, no uka o ka aina, aia mawaena o 4000 ame 7000 iwilei, ua like hoi ia me 12,000 a 21,000 kapuai ka mamao.

Ua kali iki iho la na moku Amerika o ke ki hou mai o uka, a hala kekahi manawa, ua haalele iho la lakou i ke awa a puka aku la nowaho me ka loaa ole ana ia lakou o na palapu a o na manuheu hoi mai na pu mai o na pakaua.

 

KA HOIKE O KENERALA BLANCO I KE AUPUNI O SEPANIA NO KEIA KIPOKA ANA A NA MOKUKAUA AMERIKA MA MATANZAS.

(Laweia noloko mai o ka Nupepa San Francisco Chronicle, April 30.)

Maderida, Aperila 29. Eia iho ka hoike ano nui o ka hoike pili Aupuni a Kapena-Kenerala Blanco, no ke kipoka pahuia ana o na papu o Matanzas, ma ka Poakolu aku nei:

"Ua kipoka mai na mokukaua Amerika i na batari pukaa ma ka Papu o Morila, ma Matanzas, me ka loaa ole ana he poino. He umikumamaha ka nui o na poka a mokou i ki aku ai, a ua ki mai hoi na moku Amerika i na poka he lehulehu loa, mai na pu kani alapine mai, me ko makou poino ole ana. Ua ki ae nohoi na moku Amerika he umikumamaha mau poka i ka batari pukaa ma Abaniia, a ua make hookahi miula malaila, a he eha hoi ka nui o na poka i ki ia aku e na batari mai laila ae i na moku Amerika. Ua mamao loa na moku mai ka loaa ana aku i ke ana kupono o ka ikaika o ka makou mau pu. Ua kipoka mai nohoi na moku elima iloko o ke kulanakauhale, aole nae he mea poino. Ua kue loa na luna aupuni o na Aupuni e ae no keia ki poka ia o ke kulanakauhale, me ka hai mua ole ia ana mai o ka lohe. Ua waiho maoli aku nei na Kanikela Auseturia ame Farani he mau palapala kue no keia kipoka ana a na mokukaua Amerika.

 

PANE O AMERIKA HUIIA NO KE KUE A NA KANIKELA AUSETURIA ME FARANI

Wasinetona, Aperila 29. I keia la i pane aku nei ke Keena Kuhina Nui i na kue a na Kanikela Auseturia me Farani ma Matanzas, no ke kipokaia ana ame ka hoolele poka pahu ia ana o ke kulanakauahale e na mokukaua Amerika. O ke kumu hoohalahala a ua mau kanikela 'la, oia hoi ka hai mua ole ia ana aku o ka lohe e kipokaia ana ke kulanakauhale. A penei ke ano nui o ka pane: Aole i kueia na kanawai o na lahui e keia kipoka ana. O na moku i kipoka aku ai, ua ki mua ia mai lakou e na batari pu o

(E nana ma ka aoao elua)