Ka Nupepa Kuokoa, Volume XXXVIII, Number 37, 14 September 1900 — KE KOHO BALOTA. [ARTICLE]

KE KOHO BALOTA.

Ma keia helu, e na makamaka, ke hoopukaia nei he mau hoakaka waiwai nui no ka Lahui, malalo o na alakai manao ana a ko kakou makamaka maikai loa, ke Kapana mua o ke Kilohana nei—Mr. Joseph Mokuohai Poepoe. He mea pono i na makaainana a pau loa, (mai kuemi aku kahi i hope, a mai nana i ka Aoao Kalaiaina o na ona o keia Pepa.) e heluhelu pono i na hoakaka a pau e waihoia aku nei imua o oukou! Aole keia no ka waipahe wale aku no i wahi e loaa ai o na batota ia makou, aka, no ka ike maoli no i ka lalau o na alakai i lalau hele wale iho nei no e lu i ka luhi o oukou. Ina paha o ka hoohakaka a Owana ia Wilikoki e hoolaha mau ia nei, i kolia e ia, e hoakaka o Wilikoki ame kona mau hoa alakai, i na Kanawai o keia Panalaau, ina la ua pono! Aohe pono o ka hoopalaleha! E ala, oi kau ka la! Ke haunaele mai nei ka poe namu, no ke aumeume i ka pono holo balota, aka, me lakou aku no ka lakou mau hakaka. E nana kakou ia kakou iho. E hele nui e hoopaa inoa, i loaa ka pono koho. Mai hoohaka ia [hoohakalia].