Ka Nupepa Kuokoa, Volume XLI, Number 17, 24 April 1903 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

Hoopukaia i na kakahiaka Poaliama apau.

 

BUKE XLI. HELU 17           HONOLULU, POALIMA, APERILA 24, 1903. NA HELU APAU @960

 

Hoohalahala Maluna o Hikikoki.

 

Aneane e make o Mrs. Nakuina

 

Paa ka Manao o ka Oihana Makai e Hoopai ia ka Hana Hewa.

 

            O ka Loio Kuhina Andrews ame ka Makai Kiekie Brown eia laua ke huli pono nei i ke kulana o ka hoohalahala i waihoia mai imua o laua e Mrs. Emma Nakuina (Ema Kahapula) maluna o ka Hope Makainui Hikikoki ame kekahi makai malalo ona o ka mokupuni o Molokai.

            Ma ka hoohalahala a hoopii a Emma Nakuina ua hoike mai oia imua o ka Loio Kuhina Andrews, e hoike ana o ka hana o na luna o kona oihana makai ua aneane loa e lilo kona ola mamuli o ia mau hana. I kona manawa i hoi mai ai mai Maui mai no Honolulu nei, ma ka la 27 o Maraki ua lele aku la oia i ka aina ma Kaunakakai, Molokai, mai ua kau mai oia maluna o ka mokuahi Lehua, me ia pu he wahi keiki uuku ame kekahi kaikamahine opiopio.

            Ua lele mai ia lakou ma ka uwapo o ka Amerika Sugar Co., oiai, oia wale no ke ala pokole i kauhale. Maluna o keia uwapo aia he alahao e moe ana kahi hoi e holo ai na kaa e hukiia ai e na kanaka i kekahi manawa a e hukiia ai e na holoholona i kekahi manawa, ia lakou e hele ana he umi-kumama-lima kapuai mai ka lepo mai oia ka manawa i iho mai ai kekahi kaa ma kona wahi e hele ana, he kaa hoi e kau ana o Mr. H. R. Hikikoki, o Mr. Hapipa he makai ame Wilson he kumukuia mamua a mahope o ke kaa ka Hope Makainui Trimble, Henry Meyers a me Uahinui.

            Ua hoike ae o Mrs. Nakuina, iloko o kana hoohalahala ua kahea aku ke kaikamahine i na kanaka e ku ke kaa eia nae ua peku mai la no ke kalaiwakaa i ka @o a no ia kumu i hiki ole ai ia lakou ke aio ae mai ka pilikia o ka holo ia mai e ke kaa a o ka lele aku mai ka uwapo aku ka mea e kauhihi ole mai ai ia pilikia maluna o lakou nei. A i ka lele ana o Mrs. Nakuina ua hoike ae oia ua hookuiia mai oia e ke kaa a i kona haule ana maluna o ka pohaku ua poniuniu aku la oia.

            Ua hoopii koke aku oia i ke kanaka i ka hope Makainui Trimble, aka ua hooleia mai ka hopu ana i ke kanaka ke ole o Mrs. Nakuina e noho ilaila a hoopii, he hana hoi i hiki ole iaia ke hooko. Ua hoike pu ae no hoi o Mrs. Nakuina i ka mihi ole mai o Hikikoki a hoike mai paha i kekahi kumu pili i ua hana la i hanaia ai ia ahiahi oiai oia kekahi maluna o ka mokuahi Lehua a Emma Nakuina e kau ana.

            Ua kue nui o Mrs. Nakuina i keia ano hana ma ka aoao o ka Hope Makainui he hana hoi e kokua ana i na hana ha'iha'i kanakawai ame ka hoopaa ana i ka manao e hoopa'i ole ia ua mau ia.

            Ua hoike pu ae o Emma Nakuina i ka pilikia i kau aku maluna o kekahi elemakule ma ia wahi hookahi no, ame he mea ia, ua make ua elemakule ia. Ua hoike pu ae oia o ka uwapo oia wale no ke ala kokoke i kauhale no na ohua helewawae a ina lakou e hookuuia e hana ino ia e like iho ia me kona hoopilikia ana me ka hoapono ame ka ike no o ka oihana makai i keia hana hoopilikia alaila aohe he mea hoopakele ma ka aoao o na makaainana a ke kanawai e hiki ai ke haawi mai.

            Ua hoohalahala nui oia i ka hana a ka oihana makai ame ka hooholoia o keia mau kaa e ka poe i ona i ka rama, no ka mea he hooholoia me ka ikaika holo maoli.

            Ua hoike ae ka Loio Kuhina i ka Poakahi nei i kona hoike ana aku i keia hoohalahala imua o ka Makai Kiekie me kona hoomaka koke ana e huli pono, a wahi a ka Loio Kuhina, "ua paa ko maua manao - ka Makai Kiekie ame a'u aole e hookuu i keia hana ha'iha'i kanawai me ka hoopa'i ole ia."

            O ka uwapo aia ia iloko o ke kuleana o ka American Sugar Co., a ua oleloia ae ua kauoha aku ka agena A. W. Carter e pau ka holo ana o na kaa.

-----

 

Make i ke Kaa Uwila.

 

            Mawaena o ka hora ekolu ame ka hora eha o ka auwina la Poaono nei, i ke kaa uwila Helu 3@ e iho mai ana mai Kalihi mai ma ke Alanui Moi, a i ka hiki ana i ke kihi o na alanui Moi ame Kamehameha IV, ua ike aku la ka mea hooholo kaa i kekahi wahi kaikamahine Kepani uuku e paani ana ma ke alanui kaa uwila. No ka holo o ke kaa, aohe he hiki iaia ke hoopaa koke, aka, ua hookuu aku ia oia i ka pule o mua o ke kaa me ka awiwi a kilooiia ae ia ua wahi kaikamahine nei @a ka aoao o ke alanui.

            Ua holo aku kekahi poe e ku ana malaila e kii i ua wahi kaikaahine nei. Ua laweia oia i ka halema'i Kepani. Ua oleloia ae he wahi kaikamahine hele mau no keia e paani ma ke @iahao, a he nui no hoi na manawa i kokoke ai e pepe.

            Ma ka auwina ia Lapule nei, make ma wahi kaikamahine nei.

------

 

HIKI MAI KA MOKU MANUWA PELEKANE "AMPHITRITE"

 

            Ma ka hora 7 o ke kakahiaka Lapule nei, ua ikeia aku e ka mea e kiai nei ma Leahi e pii mai ana malalo mai kekahi moku nui eleele, a ua manaoia ae la o ka Mokuahi Doric paha, aka nae, i ke kokoke ana mai, ua ike maopopo ia aku la he moku manuwa holo moana (cruiser) a e welo mai ana hoi ka hae nana e rula nei na ale o ka moana, ka hae Pelekane. I ke kokoke pono ana mai ua ike maopopo ia aku ia he eha ona pukauwahi, a o kona inoa hoi o Amphitrite. He moku keia o ka papa helu ekahi o na moku holo moana (first class cruiser) o ke aumoku Pelekane, a he moku hou loa hoi, o ka piha ana iho nei no ia o kona makahiki hookahi i keia mahina iho nei.

            He 11,000 tona kona kaumaha, a o ka ikaika o kona mau enegini, ua like me 25,000 lio, a o kona holo he 25 mile kai o ka hora ina e hookuu pau ia. He mea oiaio he holo io no, no ka mea, he 12 wale no ia na i holo mai nei mai Yokohama mai a hiki i Honolulu nei me ka hookuu pau ole ia o kona holo.

            E ku ana oia maanei a hiki i ka la 4 o keia mahina ae, a e kali ana oia a ku mai Esquimalt mai ka mokukaua Pelekane holo moana Amphion me elua moku liilii wawahi topido, alaila, hoi aku ka Amphion a lawe loa aku ka Amphitrite ia laua no Kina. Ua oleloia ae e ku mai ana lakou ma ka la 25 o keia mahina (Poaono o keia pule.)

-----

 

Na Mokuahi Hou o ka Pakipika.

 

O "MONGOLIA" AME "MANCHURIA" NA INOA.

 

E HOOHOLOIA ANA MAWAENA O KAPALAKIKO, HONOLULU AME KINA.

 

            Ma ka Poaono nei i loaa mai ai i Honolulu nei kekahi lono telegarapa mai Nu Ioka mai e olelo ana o na mokuahi hou i kuaiia iho nei e ka Pacific Mail Co., ua kaheaia o "Mongolia" ame "Manchuria" na inoa.

            He mau moku nunui keia, oi ae mamua o Korea ma, 625 kapuai ka loihi, a o ke kaumaha he 13,000 tona, o ka hohonu o ke komo ana iloko o ke kai i ka wa e piha pono ai i ka ukana, he 33 kapuai, eia nae, he 30 wale ana no kapuai e hoohanaia aku ana. E holo ana laua mawaena o Kapalakiko, Honolulu ame Kina.

-----

 

Hoopakeleia ke ola e ka Popoki

 

            Ma ke wanaao o ka Poaha nei o ka pule i hala, ma kekahi hale ma Alanui Malawaina e kokoke ana i Alanui Muliwai, oiai e pauhia loa ana o Luisa Lukia ame kana kane i ka hiamoe, ma ka hapalua paha i hala o ka hora 4, ua hoaia laua i ka lohe ana i ka uwalu a ka laua wahi popoki i ka puka me ka hoao ana e puka iwaho. I ko laua ala ana mai, ike aku laua e lalapaia ana ka moena o ko laua lumi e moe ana e ke ahi, a ua hoomaka koke iho ia laua e kinai ma ka uhi ana me ke kihei heluhelu. Ua honi laua i ka hohono aila mahu, a ua manao laua, ua hoaoia ko laua hale e puhi i ke ahi e kekahi mea a laua i maopopo ole ai. Ua ha'i aku laua i keia mea i ka halewai, a ua hoounaia mai o Makai kiu McDuffie e noii, a i kona nana ana aku malalo o ka hale, ua ike aku oia ua nininiia i ka aila mahu na wahi apau o lalo o ka hale. Ma ia la, ua hopu aku oia i kekahi Pake o Lo Tuck ka inoa, he Pake hoi nana i hopu mamua no ka hoao ana e puhiahi i kekahi hale.

-----

 

            O KA EHA MA KA UMAUMA, oia ka hoailona e hoike mai ana e loaa ana oe i ka numonia. E hooma-u i kekahi apana huluhulu me ka Laau Hamo Eha a Chamberlain. (Chamberlain's Pain Balm), a wili ma kahi o ka eha, a o kekahi apana hoi ma ke kua mawaena o na poohiwi. Eloaa koke no ka oluolu i ke kau ekahi ana. E hoao Benson, Smith & Co., Ltd., na Agena e kuai nei.

-----

 

NUHOU O KO NA AINA E.

Mai ka Uwea Telegarapa mai.

 

MAKE EKOLU MA KE PAHU ANA.

 

            PENESAKOLA, Folorida, Aperila 9.

            Ma keia awa i keia la, ua pahu ae maluna o ka mokukaua Amerika Iowa kekahi poka a ua make ekolu a elima i eha. Aohe i maopopo loa na mea e pili ana i keia ulia, o ka mea wale no i loheia mai he poka o 12 iniha ka i pahu. O ka poe hana o ia pu ke hana ana malaila i ka wa i pahu ai.

 

MOKU HOLO KA SHAMROCK III.

 

            WEYMOUTH, Enelani, Aperila 9.

            Ma kekahi heihei hoao i malamaia i keia la mawaena o ka Shamrock III ame ka Shamrock I, ua puka ka moku hou he 17 minute ma ke ala heihei o 30 mile.

 

MAKE KE KAHUNAPULE O KA SENATE.

 

            SANTA BARBARA, Kal., Aperila 10.

            Ua make maanei i keia la o Rev. W. H. Milburn, ke kahunapule o ka Aha Senate o Amerika Huipuia no na makahiki he loihi.

 

MAKE HE MAU HANERI.

 

            HONGKONG, Aperila 10.

            He 1500 kanaka i make maanei i keia la ma ke pahu ana o ka hale hana pauda.

 

MAKE O BRIGHAM YOUNG.

 

            LOKO PAAKAI, Uta. Aperila 11.

            Mahope o ke kaa ma'i loihi ana, ua make maanei i keia la o Brigham Young, ke keiki a ke poo mua o ka hoomana Moremona.

 

PEPEHIIA NA KRISTIANO.

 

            CONSTANTINOPLE, Aperila 11.

            He kanalima o na Kristiano i pepehiia a make loa e na kipi Alabaniana ma Prilep, he wahi kaona uuku he kanawalukumamalima mile mai Salonica aku. Ke aia kue mai nei na Alabaniana.

 

HOOLANA HOU IA KA MOKU LAWE HAE PANIOLO.

 

            MANILA, P. I., Aperila 13.

            Ua hoolanaia ma keia la ka moku lawe hae Paniolo Reina Christina i hoopiholoia ai e ke aumoku kaua Amerika ma ke kaua ana ma ke kaikuono o Manila. maloko o kona loa i loaa aku ai he kanawalu kino iwi, ke kino o ka poe i make ma ke kaua a i piholo paha i ka wa i piholo ai ka moku.

 

HAKAKA NA KOA KELEMANIA AME AUSETURIA MA PEKINA.

 

            PEKINA, Aperila 13.

            Ua ulu ae kekahi hakaka mawaena o na koa Gelemania ame na koa Auseturia maanei i keia la, no ka ona mai ke kumu. He kanalima kanaka o ka aoaoa hookahi kai hakaka ae a he nui ka poe i eha. Ua kauohaia na koa kiai o na wahi noho o na kuhina e kinai i ka hoohaunaele, a e hopu i ka poe hakaka, a he nui ka poe i laweia i ka halema'i.

 

MAKE MA KA LUA ELI.

 

            KANSAS CITY, Aperila 13.

            Ma kekahi pahu ana iloko o ka lua eii ma Indian Teritori i keia ia, ua make elima kanaka.

 

KIPAKUIA KEKAHI MISIONARI E NA KELEMANI.

 

            WASINETONA, D. C., Aperila 14.

            Ua noi aku ke Kakauolelo Hay i ke aupuni Kelemania e hai mai i ke kumu i hopuia ai a i kipakuia ai hoi kekahi misionari Amerika ame na haumana mai na mokupuni mai o Ruk amd Ponape. O ke kipakuia ana o keia poe, he hana pono ole ia ma ko Kelemania aoao.

 

LOAA NA KOA AMERIKA I KE KOLERA.

 

            MANILA, Aperila 15.

            Ua puka ae ke kolera iwaena o ka puali koa e alakaiia nei e Kapena Pershing, ka mea e hakaka nei me na Moro kipi.

 

LIIA KEKAHI PAELE.

 

            JOPLIN, Mo., Aperila 15.

            Ma keia po i kii aku ai kekahi poe ma ka halepaahao a lawe mai a li hoi i kakahi paele i hopuia no ka pepehi ana a nake loa kekahi makai. I ka pau ana o keia ua kii aku ua poe nei e puhi i ke ahi i kahi e noho nei ne paele a kipaku aku i na paele o ke kulanakauhale nei. Ua hiki ole ke aupuni ke hoopau i ka hakaka. He wahi taona keia a nohoia nei e a poe eli a he okalakala ke ano o keia poe.

 

(E nana ma ka aoao @)

-----

 

Haule i ke Alapii a Ha'i ka A-i.

 

            Ma ka po Poaha nei, uya haule mai luna mai o ke alapii o ka Hale Uniona, Alanui Nuuanu, o "Bila" Keough a haki kona a-i. Mamua iho o ka loaa ana iaia keia ulia poino, ma ka lumi oia o kekahi mea o R. B. Rice ka inoa, a i ka pau ana o ka laua kamailio ana, ua haawi aku o Bila i kona aloha ahiahi a hoomaka e iho i ke alapii. He mau sekona mahope mai lohe o Rice i ka pahu, a i kona puka ana mai ike oia ia Bila e waiho mai ana ilalo. I kona hele ana  aku e kokua, ike aku ia oia ua haki kona a-i. Ua hoounaia aku ke kaa makai a laweia aku no ka haukapiia, aka nae, ua make oia mamua o ka hiki ana aku. Ua noho ka aha koronero e noonoo i kona kumu make.

            He pakipa oia no ka Hale Lama Heleuma. (Anchor Saloon) a he kamaaina hoi. He kuke kana hana mamua, a ua piga iaia he kanalima makahiki.

-----

 

Lele Mai Luna aku o ke Kaa Uwila.

 

            I kekahi kaa uwila e holo mai ana no ke taona mai waho mai o Waikiki ma ka auwina ia o ka Lapule nei, i ka hoohuli ana o ua kaa nei ma ke alanui Moi a oiai hoi e holo ana e like me ke ano maa mau, ua lele aku ia mai luna aku o ua kaa nei he wahine Kepani ohua mai waho mai o Waikiki me ka awiwi loa, ame ka hookani mua ole ana hoi i ka hele ame ka ike ole ana hoi o ka mea ohi kikiki. I ka lele ana o ua wahine nei, ua pa mua aku ia kona poo i ka honua, a i kona hapaiia ana ae, ua ike ia iho la ua maule oia a na eha loa ia hoi. Ua kii mai kana kane a hoihoiu iaia i ka hale, a elua hora mahope iho ua make loa ae ia.

            He poe hana mau no na Kepani ame na Pake e like me keia. Me ka hookani mua ole ana aku i ka hele, lele aku no oiai e holo nui ana ke kaa, a he nui na manawa i ikeia ai ka poe ohi kikiki e paa ana i keia poe mai ka lele naaupo ana aku ilalo i ka wa e holo nui ana ke kaa.

-----

 

KA FEA MA WAIALUA.

 

            "Ke kono aloha aku nei makou i na makuahine haipule iloko o ka Mokupuni o Oahu nei, e huipu mai me makou ma ka hora 12 awakea Poaono Mei 2, 1903 ma ka luakini o Waialua, ko makou Ahaaina makahiki o ka Ahahui Manawalea o na wahine Imipono Kristiano o ka Ekalesia o Waialua." o na kokua e loaa ana, no ka pomaikai ia o ka waihona o ko makou Ahahui.

Ma ka Kauoha.

MRS. BESSIE KAUWALU.

Kakauolelo A. M. W. I. K. E. W.

-----

 

Na ka Ahaolelo Nui e Mahele na Apana.

 

Kapae ka Ahaolelo i keia Hana.

 

Na ka Elele ana e Hookomo ua Bila nei.

 

            Ua pau keia kau Ahaolelo o ka Teritori o Hawaii nei, oia hoi, aohe e loaa ka manawa e heluhelu ekoluia ai kekahi bila e na Hale elua, a ma keia ua ikeia ae, ua haule kekahi hana koikoi a ka Ahaolelo Nui (Congress) i waiho mai i ka poe kaukanawai o ka Teritori nei, oia ka lilo ana o ka mahelehele o na apana koho balota i ka Ahaolelo kuioko nei.

            Ina e nanaia kekahi mahele o ka Pauku 55 o ke Kanawai Hoonoho Aupuni Panalaau, e ikeia no keia malalo iho:

            "Na ka Ahaolelo auanei ma kona kau mau o ka noho mua ana, mahope iho o ka maopopo ana o ka helu kanaka, a i kela ame keia manawa no hoi mahope aku, e hookaawale ina nohona iaia o ka Senate ame ka Hale o na Lunamakaainana, mamuli o ke kahua o ka lahuikanaka iloko o kela ame keia o ua mau Apana ia, a he poe kupa hoi lakou no ka Panalaau."

            Aohe i hana ka Ahaolelo o 1907 i keia mea, no ka mea, aole i loaa ia lakou ka papa helu kanaka. I keia kau hoi, ua makaukau na mea apau, eia nae, ua maka'u na hoa i ka hapai ana ae i keia kumuhana keia e hooulu ae ai i kekahi hoopaapaa ano nui iwaena o lakou, a no ia kumu aohe e holopono na hana.

            Ma ka heluna kanaka e waiho nei, he 76,000 kupa,a mai ioko ae o keia helu e maheleheleia ae ai na Apana koho, a ma ka nana aku i na huahelu, o Oahu nei ka Mokupuni oi aku o na hoa iloko o na Hale elua.

            I ka maopopo ana ua haule keia kumuhana i ka Ahaolelo kuloko nei, ua malama koke ae ke komike hooko o ka aoao Repubalika i kekahi halawai ma ka auwina la Poakolu nei a hooholo ae e pono e noiia aku ka Ahaolelo Nui e hana i keia kumuhana, i kumu hoi e ala oie ae ai kekahi hoopaapaa. Maanei ana no e hoomakaukauia ai ka bile, a na ka Elele Keikialii Kuhio ana e hookomo ma Wasinetona.

-----

 

Home no na Wahine Opio.

 

MAKEMAKE NA WAHINE I EONO KAUKANI DALA NO KE KUKULU HOME ANA.

 

            Aia he kumuhana ano nui ke hoouluia nei i keia manawa iloko o keia kulanakauhale no ka houluulu ana i waihona dala nui o $6,000 no ke kukulu home ana no na wahine opio maikai a kupono e noho hana ana iloko o keia kulanakauhale a no ka haawi ana i wahi e malu ai na haumana wahine i hemo pono mai na kula mai e noho iho ai no ka manawa, a no ka poe e hana ana ame ka poe aole iloko o ka hana.

            O ka manao o keia home oia no ke kokua ana i na kaikamahine maloko o ka lakou mau ike i a'o ai no ka hooholomua ana, a iloko o keia home ka malama ana no kahi moe ame ka ai ana no na auhau kupono.

            Mawaho ae o keia kumuhana e pakuiia mai ana he mau hana hoohauoli. O na papa humuhumu ame nanaia a Mrs. May Wilcox, ke kula hana lihilihi a Miss Adams ame ke kula kuke a Miss I. Green e hoihoiia mai ana lakou a malalo o ka malumalu hookahi. E malama pu ia ana he keena haawi iaau lapaau kahi e a'o ia ai no ka malama keiki ana malalo o kekahi wahine i makaukay ia hana. A mawaho ae o keia e malamna mau ia ana ke komokauhale ana iwaena o ka poe ilihune e noho puukiuki nei ma Kakaako i loaa ai ka ike i na wahine opio e noho ana iloko o keia home no na mea e pili ana i ke ano o ka nohona maikai a maikai ole a malaila e kaomila mai ai ka make nui ana o na kamaiki. Ua oleloia ae aole he alanui e ae mawaho ae o keia komokauhale ana e loaa ai ka hoomaleleia aku o ka pilikia e ulu nei maluna o ka lahui i keia manawa.

            O na lawelawe hana ana apau o keia home o na wahine opio e kaa ana ia malalo o ka hooponopono ana o hookahi lunanui i ike a i loaa ka makaukau ma keia haawina.

            O kekahi manao nui iloko o keia kumuhana oia ka loaa ana o ka manao e hoopakele i na wahine opio i loaa ole ka hana me ka nana ole i ke ano lahui.

            Me he mea ia o na kaikamahine i hemo pono mai, mai na kula mai, o lakou ka poe e kupono e malamaia eia nae aole o lakou wale no ke nana ia ma keia mahele o ka hana ku i ke aloha. Me keia mau mea e ku ana keia home ma ke ano he puuhonua ma kapa-alanui no na wahine opio e noho hana ole ana e noho ai no ka manawa kahi e loaa ai na olelo a'o maikai ame ka malama ia.

            O na lunanui o keia hana maikai oia keia malalo iho: Mrs. Henry Waterhouse, peresidena: Mrs. May Wilcox, hope-peresidena: Miss Lucy Adams, kakauolelo: Miss Ida M. Pepe, Puuku: Mrs. Fred Macfarlane, luna hoaia: Mrs. S. C. Allen, Miss Laura Green.