Ka Nupepa Kuokoa, Volume XLI, Number 49, 4 December 1903 — Page 5
| This text was transcribed by: | Kina'u Mckeague |
| This work is dedicated to: | No kuʻu Tūtū, Helen Lilia Kaluakanawaliwali McKeague. With all my heart, Aloha wau iaʻoe. |
Ka Nupepa Kuokoa
KE KILOHANA POOKELA NO KA LAHUI HAWAII.
NUHOU KULOKO
---
Mai poina i ka naue ae ma ka Halekuai o Goo Kim, ma Alanui Hotele, e ike ai kana mau mea kuai. E nana iho i kana hoolaha e puka aku nei ma kekahi wahi o ko makou pepa.
---
Ua loaa mai ka lono mai ka huli Koolau mai o Oahu nei ua hoohanini ikaika iho na omakawai o Kulanihakoi i keia mau ia iho nei a ua nui na poino i loaa aku i na hui mahi laiki olaila.
---
Ua loaa mai nei he lono mai Kapalakiko mai ua hiki aku nei o John K. Sumner mai Tahiti ae a e hoi hou mai ana i Honolulu nei. Ua manaoia e hoi loa mai ana oia a noho maanei no ke koena o kona mau la.
---
Ua kau ae nei ka hoolaha a ka oihana leta, o na moku lawekoa e haalele ana ia Kapalakiko ma ka la1 o keia mahina no Manila, e kipa mai ana maanei me na eke leta no nei, Mokupuni Hapawaena ame Manila.
---
Me he mea la e loaa ae ana kekahi mau hoololiloli iloko o na keena oihana Aupuni e like me ka loli ana ae nei o na poo Aupuni, oiai ua loaa aku no ia lakou ka mana e hoololi e like me ko lakou makemake a e hoho no hoi i ko lakou mau hope.
---
Ua hoomahuahua ae nei o Lunakanawai Gear i na iaia o ke Kiure Nieniele o ka Teritori a hiki i ka iwakalua-kumamalua iaia. Mahope o ka hookuuia ana o kekahi poe i noho iho nei i ke kau mua au hookomo hou ia aku he umi-kumamalua poe hou.
---
Ua hele aku na hoaloha o J. W. Pratt a hoomaikai aku iaia no kona lilo ana ae nei i Komisina no na Aina Aupuni. He keu keia a o ka haole i hanau lakiia mai. Pau ae no mai ia hana mai noho hou ana he hana. O ke ano ino la paha ia o ka maunu maikai, hele no noho i ka hana.
E hoopaula aku ana ka holo ana o ka mokuahi Iwalani e like me kona mau, a e waihola ae ana mai ka holo ana. O ke kumu o keia oia ka eni mai o na hana kalepa. Mawaho ae o ka Iwalani, eia o Hanalei, Noeau ame Waialeale ke ku wale nei aole he hoohanaia.
---
Mai poino i ka alawa ana iho i ka hoolaha a S. Ozaki e puka aku nei ma keia helu. Malaila e loaa ai na nu paikini u'i loa i kupono i na ipo lei manu ame na Hawaii no apau e makana aku ai i ka lakou mau sweetheart ame na hoaloha. Mai poina! Hele hookahi, hele no apau loa. Sua!
---
Ma ke ahiahi o ka Poaono, Novemaba 28, ma ka Halepule Mamona ma Auwaiolimu, i hoohuiia ae ai ma ka berita maemae o ka mare o Mr. C. Akana (Pake) me Miss Marie, na Rev. Gustave. Mahope o ka pau ana o ka mare ua haawi ae laua he papaaina imua o ko laua mau ohana ma Kakaako.
---
Ma ka hookuku popo pekuwawae mawaena o Kamehameha ame ke Kula Kiekie ma ke kahua o Punahou i ka auwina la Poakahi nei, ua kaili ae ka inoa mua i ka hanohano ma o na aipuni he 10 la 0 a kona hoa paio. Ma keia paani ana i lilo ai ka helu ekahi i na keiki o Kamehameha o keia kau lealea o na kula.
---
Ua hou ae o Kimura i kekahi o kona hoa lahui ma ke Sabati i hala ma Waialua, Oahu, a au paa ae oia i ka hopuia e Hope Makai Anaru Cox. Ua kahiohio ua mau Mikado ia a eu hoopaapaa ana no hoi, a iwaena o keia hoopaapaa ana i hanaia ai keia hana. He hoaloha o Kimura no Yanagi, kela hou pahi o Ewa e huliia nei, a me he mea la e noho nei i keia puuwai eleele mai ia Kimura mai.
---
I ike iho oe i ka hoolaha a Fukuroda e puka aku nei, mai paweo iho oe, aka heluhelu pono, noonoo pono, kanana pono a e ike no oe aia ilaila kou hoaloha Hawaii oiaio. Edward Kealoha, kahi i ki-pu hoola'i mai ai e kali ana o kou hoea aku. I ike maopopo ole oe i ka inoa o ka mea nona ka halekuni, hele pololei no oe ma ke Alanui Hotele a o na huahelu 28-32 i kau ana oia kahi o au Hawaii la e kali mai la ia oe. Mai poina! Hele o papa, mai haaleleia mama; hele no apau loa. Sua!
---
HEAHA IA MEA HE KUNU? Oia ka hooikaika ana e kiola aku i ka wale maika ohe puu aku. O ke anu ola ka mea nana e hoiliili ae i ka wale, a i ka wa e piha ai ke ake ame na ohe puu, he hopena hoopehu ka mea e loaa mai ana. Ina aole malama pono la e lilo mai ana paha ae anu ia i ma'i numonia, a ina ia e loli ae me ka awiwi he hopena poino ke loaa ana. Ina ke hoomalio nei no ke kunu he mea oiaio e hiki mai ana kekhai ma'i akepau koikoi loa. Mai hoopalaleha wale i ke anu ame ke kunu. E lawe koke i ka Chamberlain's Cough Remedy. He oiaio e ola no a he la hikiwawe hoi. O Benson, Smith & Co, Ltd, oia na Agena e kuai nei.
-----
KANAWAI KU'E HOOKAUWA MA PILIPINE.
WASINETONA. Nov. 28- Ua waiho ae nei o Lunamakaainana Patterson iloko o ka Hale he bila kanawai e hoopau ana i ka hana hookauwa ma Pilipine a e hoopau ana i ka mana o ke kuikahi a P@i@ i hana ai me ke Suletana o Sulu e ae ana i ka hookauwa ame ka noho wahine lehulehu.
(I ka makahiki 18@@, oiai e noho Kiaaina ana o Generala John C. Bates no Mindanao@ ame Jolo@ ua hanaia iho la keia kuikahi a ua nui na olelo e hoahewa ana no ka mea he ike ana aku ia i ke ku mai o ka hookauwa ame ka noho wahine lehulehu ana. Eia no keia kuikahi ke mana nei, oiai ua manao ka oihana kaua he hana naauao ia i ole e ala mai na pa@@ hahana ana e hookahela ai ke koko@.)
-----
Papa Luna Kiai o Oahu nei.
---
KAKOO KA HAPANUI O NA LALA IA GILMAN I LUNAHOOMALU.
---
Ma ka halawai o na lala o ka Papa Lunakiai o Oahu nei i malamaia ma ka Poakahi nei, Novemaba 30, ua lokahi ka hapanui e hoolilo aku ia Jos. A. Gilman i lunahoomalu no ia Papa.
---
O ka ninau nui a lakou i noonoo ai a kukakuka oia na bona o na luna aupuni i kaa na ia papa e hookau aku, a o kekahi oia no na hale oihana.
E waihola ae ana he noi i ke Kiaaina e waiho ae i hoike no na loaa makahiki o Oahu, mai na auhau ae, a ma keia e ku ai ka lakou hooholo no na bona e hookau aku ai. Ke manao nei no nae na Lunakiai e oi ana na bona mamua o na huina i paa a i ikeia iloko o ka lima o kekahi luna aupuni e paa ana i na wa i hala ae nei.
Ma ka noonoo ana no na hale oihana ua waihola ae ma ka lima o kekahi komite, oia hoi o Gilman ame Hocking, no ka huli ana a hoike ae. Ua kaheaia ae ma ia halawai e hui hou ana ia papa i keia Poakahi ae i ka auwina la. E noi ae ana ka papa i ke Aupuni e lawelawe lakou no ka manawa, i na hana Kalana, ma ke Keena Ohi Auhau o ke Aupuni i keia manawa, oiai ua makaukau mau ia Keena me na wahi waiho buke ame waiho dala.
Ke ioni loa nei ko Oahu nei papa e loaa aku ka huina o $90,000 no ka hoomaka ana i na hana ma ka la 4 o Ianuari, a o keia no hoi ka huina i hookaawaleia ai e ka Ahaolelo no ke Kalana o Oahu nei. Ke ohi ae na auhau ame na loaa laikini e loaa ana he waihona o $200,00 no ke Kalana o Oahu nei ma ka la 1 o Maraki.
-----
Aole o Hawaii i ka Huelo.
---
KA IKAIKA PUALIKOA LAHUI O KEKAHI MAU MOKUAINA AME NA TERITORI.
---
Oiai o Hawaii Teritori oia ka ukulii o na Teritori iloko o Amerika Huipuia, eia nae, aole ia i haule i ka huelo ma ka ikaika kaua a pualikoa kuloko e malama ana i ka maluhia. Ma ka hoike makahiki a ka Akukana-Generaia o Amerika i hoopukaia mai nei, a i loaa mai nei hoi he kope oia hoike ia Konela J. W. Jones o na pualikoa Lahui Hawaii, i ikeia ai ka oiaio o keia poo e kau ae ia maluna.
He mea hoohoihoi manao ke kilohi iho i na huahelu o keia hoike, a malaila i ikeia ai aia no o Hawaii iluna. O Nu Ioka oia ke kiekie me 13,869 koa, a o ka haahaa no hoi oia ko Nevada, he 140 koa. O ka nui o na koa o na pualikoa Hawaii he 573, Idaho 449, Montana 538, Arizona 382, Deleware 389, Nu Mekiko 371, Uta 376 a o Wyoming 360.
He lono hoohauoli keia i ka lahui, a he mea hoohoihoi hoi i na koa Hawaii e noho mai nei iloko o ko kakou mau pualikoa. O ka hoopau loa i na pualikoa, a hoemi ana, oia kekahi o na hana i hana a i noonoo mau ia i kela ame keia kau ahaolelo, aka nae, ua hiki ole. He mea maikai ka malama ana i na pualikoa no ka wa ulu mai o na haunaele, ua makaukau ke aupuni e hoomalu. O na haunaele liilii he hiki no i ka oihana makai ke hoopau ae, aka o na haunaele nui, he mea paakiki i keia oihana ka hoomalu ana, o ka oihana koa wale no. Nolaila, ua pono ke koe ana o na pualikoa Hawaii, a me he mea la o ka hana pono e hanaia oia ka hoomahuahua ana. He uuku o Hawaii nei, aka, ua mokumoku ka waiho ana, a he mea pilikia no ke ala mai na haunaele ma na mokupuni i noho ole ia e ka oihana koa, a e noho nui ia mai nei e na lahui e ae ma na hana mahiko.
-----
Ke Aumeume Nei No.
---
HOEMI UKU LAWE UKANA MAI NA AWA O KINA, IAPANA A AMERIKA.
---
Na ka nupepa Tokio Asahi i hoike ae ua hoemi ae nei ka hui Mokuahi Nippon Yusen Kaisha ame kekahi mau hui mokuahi e ae e holo nei no Amerika i ko lakou auhau lawe ukana no na ukana huikau a i hookahi keneta o ka paona, a he $8 hoi ma ke tona. O keia hana, paio ana aku ia i na mokuahi e akena ia nei e Haka@ia ma maanei, a oia no hoi na mokuahi o na hui Mokuahi Laweleta Pakipika ame ka Hui Mokuahi Toyo Kisen Kaiaha, e lawe nei hoi i keia manawa e like me ka lakou i aelike ai mamua, a oia aelike hoi ua pau ka manawa. Ua noi aku na hui e ae e hoopauia ka lawe ukana ana malalo o ka uku mua oiai au pau ka manawa, eia nae aole i ae aku kiea hui, a no ia mea i ala mai ae keia aumeume ana. Nawai ia o lakou ka eha, aole i maopopo.
-----
Okaikai na Awa o Kona.
---
Ma ka kakahiaka nui o ka Poalua nei i ku mai ai ka mokuahi Mauna Loa mai kona mau awa o Hawaii ame Maui. Ua hoike ae o Kupakako Conkling o ka huakai aku nei mai nei aku oia kekahi o na huakai maikai i ikeia, a ua mau ia maikai a hiki wale i ke ku ana o ka moku ma Kau. Wahi ana ua lana maikai ke kai ia lakou ma Kau @ aole i lona mai na pilikia oiai ka moku e hooili ukana ana.
I ka huli hoi ana mai o ka moku ua hoomaka mai la e halawai me na hoailona a ke okaikai, a ma ke awa o Hoopul@@ i hoomaka ai ke kupilikii o ka hooili ukana ana. Me ka nui o ka hana i kau ai na ukana o keia awa a haalele aku ia ka moku ialaila a k@ ma Hookena., eia nae ua hiki ole ke hooleleia ka waapa oiai aia na nalu nui ke uhi la iluna o ka uwapo. Ua holo loa mai ka moku a ku ma Napoopoo, a maanei ua nui ka hooikaika ana no ka lawe ana mai i nolaila mau ukana. O ka uwapo o Napoopoo oia kekahi uwapo haahaa loa me na Kona, a ma kela ina ua uhipula@ ua uwapo la e na nalu nei e po'i ana. Ma Keauhou ame Kailua aole i loaa kela haawina oiai he ano okoa ka waiho ana o ko laua mau uwapo a he lana malie hoi ke kai ma ia mau wahi.
He 23 ohua kapena i holo mai nei mai Hawaii ame Maui mai, a iwaena oia mau ohua o ka Anela o Haili kekahi, Rev. S. L. D@@@a, a he 53 ohua oneki.
-----
Nel@ i ke Tikini. Hauleana ianei@
---
He umi-kumamalima minute mamua o ka holo ana oka mokuahi Kina no Kapalakiko, mai nei aku, i kei Poaha aku nei, ua hiki aku ia kekahi o na loio o ke taona nei i ka uwapo a me ia pu he kane a he wahine, he mau Kepani e holo ana no ka hana ma Kaleponi, e like hoi me na mea i aelikeia ai mawaena o na Kepani ame ua loio ia, he agena huli limahana hoi no kekahi hui limahana o Kaleponi. E hii ana ka wahime i kekahi bebe uuku, nona na mahina eono wale no, a ia lakou nei i pii aku ai ma ke alapii, ua noiia mai ia na kikiki. Haawi aku nei ka loio i na kikiki elua, no ke kane a no ka wahine, a noiia mai ko ka bebe. Ua hooikaika aku ka loio, a o ka haina i loaa mai:
"E pono ia oe e kii aku i kikiki no ka bebe. Ina e holo ana keia bebe a he elua wale no kikiki no lakou apau, e loaa mai ana na poino he nui i keia hui ma Kapalakiko. Me keia, aole e hiki."
Ua hoi mai ia lakou nei, a i ke aluka e moku ana iluna o ka moku, ua hoao hou ia e kau aku keia mau Kepani, eia nae, aole i hiamoe na maka o ka mea e kiai ana. Ua hiki ae kekahi lala o ka hui hoopae limahana a hookahi ka hooikaika ana me ka loio, a ua paneia mai, "Ina laua nei e holo ana, e kii aku i kikiki no ka bebe, a ina aole, e waiho i ka bebe a o laua nei ke holo." I ka makaukau ana e huki i ke alapii iluna, au holo aku la ke Kepani kane a kau ana iluna: au kunana iho ka wahime no kekahi manawa pokole, a huli ae ia a haawi i ka bebe i kekahi wahine o kona lahui, a uhai aku la mahope o kona haku kane. "No kuru hanahana; bebe nuinui korae!" Aloha ino!
-----
Haule i ka Lio a Eha Loa.
---
Ma ka manawa e pii ana o Charles Dole, ke keiki hanauna a Lunakanawai S. B. Dole i ka pali Nuuanu ma ka lio ua halawai iho la oia me kekahi ulia koikoi, ma kona haule ana mai kona lio mai a aneane e lilo ke ola.
He huakai keia e hele ana no na Koolau, a ma kahi i hoikeia ae nei aneane i ka hora ekolu o ka auwina la o ka Poaono ka loaa ana iaia keia poino a maloko o ke kulana ano hapopo o kona noonoo me ka hoomaopopo ole oia a hiki i ka hora 10 o ia po iho, aoi no hoi ka manawa i loaa aku ai i na kauka ka manaolana no kona maikai mai.
Ma ua Poaono la ua iho aku la o Dole ame Derby, ka mea e hana nei iloko o ke keena loio o Kinney ma, no ka hoolaha ana i ko laua manawa o ka Lapule ma na Koolau. He mau lia no ko laua a elua a mahope o ka hala ana mai o ka pali a ma kahi maikai o ke alanui kokoke i ka mala ko-li au hoomaka iho la e holo nui ma ke ano heihei ke kumu i kaa akuai o Derby mamua, a i keia manawa o ka mama nui o ka holo ana o na lio oia no ka manawa i lohe ai o Derby i kekahi halulu lio mahope mai ona i ano e ae i ke ano mau.
Nolaila i kona huli ana ae ia manawa koke oia no ka manawa ana i ike aku ai i ka waiho mai o ke kino o Dole iluna o ka honua ame ka lio hoi e kupaka ana no ke ku hou ana iluna.
Ua lele koke iho ia o Derby mai kona lio iho a holo aku ia e hoopakele i kona hoaloha. Ua ike koke iho la o Derby ua pau ka ike o Dole me he ia ua make a ua hooikaika maoli aoi ma kona aoao e kokua i kona hoaloha o ka huakai hookahi i mea e hoi hou mai ai ke kanaka ponoi iloko o kona ola.
Ma ka nana ana i ke kulana ehaeha o ke kanaka opio ua loaa ae keia mano i kona hoa ia Derby, o ke kiokio o ka papale mahiole o Dole oia ka mea nana i hoopakele ae iaia mai ka make koke ana oiai au loaa keia manao au haule o Dole ma ka iho mua ana o kona poo i ka honua.
Mahope koke iho o keia ulia poino ua hoea ae la o Mr. Henriques a o ka hookauia iho la no ia o ke kanaka poino maluna o kona wahi kaa huila-lua a ma kona home i Nuuanu i hoomaha iho ai o Dole a nanaia e na kauka Cooper me McDonald i ko laua manawa i hiki aku ai ilaila.
Mamuli o ka hana hoomau a na kauka maluna o ke kanaka poino a hala kekahi manawa ua makili ae la ka noonoo o ua kanaka opio nei a loaa mai na lono i ka maikai ae i keia manawa.
I ka hoikeia ana aku o keia lono ia Lunakanawai Dole ua pii koke aku oia me na hoaloha e ae o ke kanaka opio ilaila.
-----
Hoohaunaele na Pukiki Hudalama.
Ma ka po o ka Poaono iho mei i hoohaunaele ae ai kakahi mau Pukiki Hudalama (hoodlums) lapuwale ame kekahi poe kelamoku ma ka hale inu-rama ma Aala ke kumu o ka hiki koke ana aku o ke kauoha i ke Keena Makai.
Ua hoikeia aku i ke Keena Makai i ka hoohaunaele me ka lawelaweia o ka hana a ka pahi a i ka manawa kupono i hoea aku ai ke kaa o ka oihana makai me ka Hope Makai Kiekie Kiliniwoki a hoopokole ia ae la ka hana ma ka hoopaaia ana o John Hollerson no ka hoeha.
Ua loaa aku na Pukiki e hoohaunaele ana a na keia Hollerson i ku'i aku ia C. Simerson ke kumu i loaa aku ai ke alina ma kona maka. O keia Hollerson oia no ke Pukiki i hopula no ekolu manawa mamua no keia hewa hookahi, a e nanaia mai ana keia e ke kanawai e like me kona ano mau.
-----
HEMO MAI KA HALE PUPULE AKU.
ST. PAUL. Nov. 28. - O Peter Elliott, ka mea i hopuia iho nei no ka hoao ana e hui me Peresidena Rusawela, ua hemo ae nei mai ka hale pupule aku.
(O ka mea i mahuka oia ke kanaka Kuekena i hoao ai e hui me Persidena Rusawela ma ka la 3 o Okatoba. Ua komo aku oia iloko o ka Hale Keokeo a ua hookukeia e na aialo o ka Peresidena. Ia la no ua hoao hou ae oia e komo a ma ia hana ana i hopule ai a loaa aku la na mea make iloko o kona poii. Ma kona huli pono ia ana au maopopo ua pupule ola nolaila i hoih@@a ai no ka hale pupule.)
-----
Nuhou o na Aina E
LILO O SAN DOMINGO I KA POE HOALA KIPI.
CAPE HAYTIEN. Nov. 25. - Ua haawi pio aku nei ke kulanakauhale o San Domingo iloko o ka lima o ka poe hoala kipi. Ua hoi aku o Peresidena Gil ame kona aha kuhina iluna o kekahi mokukaua Geremania.
KUKAI NO NU IOKA.
WASINETONA. Nov. 25. - Ke hui nei o Peresidena Rusawela, Senatoa Piatt ame Kiaaina Odell o Nu Ioka, no na mea e pili ana no ka pono o Nu Ioka, a ua lokahi ae nei lakou e lawelawe lokahi i na hana pili kalaiaina.
HOI HOU O RUKINI.
TIENTSIN. Nov. 25. - Ua hoi hou ae nei na koa Rukini e paa ia Haiching, he wahi o ewalu mile mai Port Arthur aku.
NA AUMOKUKAUA AMERIKA.
WASINETONA. Nov. 27. - Ua kauohaia ka mokuahi lawe lako ai Solace e hui ae me na aumokukaua Amerika malalo o Adimarala Evans ma Honolulu ma ka la 15 o December me na lako no ka oihana kaua Moana.
HOUPUUPU COLOMBIA IA PANAMA.
BOGOTA. Nov. 27. - Ua hoike ae nei ke aupuni Colombia i ka hui Alawaioki o Panama, aole ia Aupuni e ae ana i ka hoihoi ana i ko lakou pono hana alawaioki no Amerika.
NU OLINA. Nov. 27. - Ua huli hoiaku nei o Generala Reyes, ko Colombia Komisina Maluhia, no kona home. Ua waiho iho oia i kekahi hoohalahala ikaika ma Wasinetona e ku-e ana i ka Amerika hana no Panama.
PANAMA. Nov. 27. - O ka mana hooponopono aupuni e ku nei i keia manawa, e hoapono koki aku ana i ke kuikahi a Hay ame Varilla i ka wa e loaa mai ai.
IKE O GEREMANIA IA PANAMA.
BERLINE. Dec. 1. - Ua ike ae nei ke Aupuni Geremania i ke kuokoa o Panama.
-----
Manao e Hookohu hou ia Liilii i Lunakanawai
HILO, Nov. 11. - Ke aneane aku nei ko Lunakanawai Liilii palena pau o ka noho ana ma ka noho Lunakanawai Kaapuni no ka Apana Kaapuni Eha o ka teritori o Hawaii a e noho aku ai no ka lua o ka manawa ke hookohuia mai e ka Peresidena.
Inehinei i hoomakaukauia ai he palapala noi no ke kakauinoia mai e na Lunanui o na Mahiko. He eha inoa i paa iloko o ua palapala noi nei mamuli o ke kakauinoa ana mai o kela mau lunanui eha o na mahiko a he ekolu i hoole ae.
Ina e kukuluia ka ninau no ke kupono ole o Mr. Liilii ma ka oihana, a ina e koho balota ia ua hiki ole ke hoopaapaa ae i ka lilo o ke koikoi o ka poe koho balota ma ka aoao o ka Lunakanawai no ka hoonoho hou ana aku iaia ma ua noho la.
Mawaho ae o keia kukulu manao ana o ke kupono o ka Lunakanawai Liilii o Hilo, o kana mau olelo hooholo maluna o na hihia i hooloheia e ia ma kona manawa e noho ana ma ka oihana o lakou na hoike e hoike mai ai i ka lehulehu i ke kupono maoli io no oiai oia no kana mau hana i hana maoli ai a e like me ka mea oiaio, ma ka hana ke kanaka e maopopo ai kona ano, pela i keia, a maluna o keia mau hihia i hooloheia he iwakalua-kumamawalu ka nui.
He elua aole i hooloheia oia no ka pololei ole o ka hookomo ana a maluna iho o ke koena i loaa mai ai kana mau hoohana ana i hiki aku ai i ke 74 @@keneta.
O keia na hooikaika o ko Hilo poe no ka hoike ana aku i ko lakou manao ohaoha i ka Peresidena no ka hookohu hou mai ia Mr. Liilii a aia he palapala o ia ano hookahi no e lawelaweia ana iwaena iho o ko Hilo poe no ke kakauinoa kakoo ia mai.
-----
Alakai Hou, Mekia Milsaps@.
KE PANI O MEKIA HARRIS O KA PUALI HOOLA.
Ua hiki mai maanei maluna mai o ka mokuahi Sonoma, mai Kapalakiko mai, i ka Poakolu i hala o Mekia Milsaps, no ke pani ana i ka hakahaka, o Mekia Harris, o ka Puali Hoola, i hoi aku nei. Oia ke alakai oia hoomana maanei ma keia mua aku.
Aole i malihini na maka o keia haole ia Honolulu nei, no ka mea ua kipa mua mai no oia maanei mamua. O ka hiki mua ana mai ianei, oia no ka makahiki 1894, ka wa mua loa i kukuluia ai o keia hoomana maanei. O ka lua o kona manawa i kipa mai ai maanei, oia no na- i hiki mai ai o na moku lawe koa mua loa o Amerika e holo ana no Manila. Ma Manila oia kahi i lawelawe ai i ke hana a ka Haku iwaena o na koa, a oia kekahi i honi aku i ka uwahi pauda@ a ka poe Pilipine, aole no nae i loaa he haawina poino maluna. Ua hoi ae oia no Amerika a lawelawe aku i ka hana malaila a hiki i kona kikooia ana aku e hoi mai maanei.
-----
Makemake e Hoao i ke Kanawai Kalana@.
Ua manaoia, e hoike ae ana ka Aha Kiekie o ka Papa o na Kula Aupuni, he papa ku ole ua i ke kanawai, a ma ia ano aole i hoonioniia ka mana o ke Kanawai Kalana. Eia nae@, ke manaoia nei aia no he mau mea ano nui e ae i kina'una'u iloko o au bila kalana la i ikeia he hiki mai kona pahu h@@@ o ka loheloheia ana. Ina ke oiaio keia alaila he hana hewa loa ka pana@ ana aku i keia kanawai imu o ka lehulehu mamua o ka pau ana o na hooponopono ana a ka Aha Kiekie. O na mea maikai oia ke hooponoponoia ae a waiho aku ia ano imua o ka mana hookolokolo, a i ole e like me ka hikiwawe e hanaia ai-Maui News.
-----
Laau Ili nona Bebe
NO KONA POO AME KONA LAUOHO
Kekahi Mea ano nui loa aia Mokuahine e noonoo nei @i
UA HANAUIA KELA A ME KEIA KEIKI ILOKO O KA HONUA N@@ me ke ewe o na mai lehlehu e ulu mai ana iloko o ka ili, ke poo a e lilo ana hoi ke koko ia wa i mea nui loa no ka panee ana i keia p@pilikia, a pela ililo ai ia i mea nui loa e hookaumaha mau ai i ka noonoo o kela a me keia mea i hoohia i ka naii ana a na ma'i lehulehu. Aole keia mea i hookaumaha ia ma kekahi ano e ae, aka, mamuli no o ka hoopalalehaia ana e ka mea i kupono e malama a makaala. I keia poino. Nolaila, ua lili i kumuhana na kela ame keia makuahine maikau e makaala mau ai i ka lakou mau keiki e loo@@ ana i na popilikia lehulehu e ulu mai ana mamuli o ke koko ino, e hookamaaina mau lakou me na mea a pa ue hiki a ke pale aku i keia mau popilikia lehulehu, i mea hoi e loaa ai ke oia maikai, malalo o ma lapaau noeau ana me ka hikiwawe a me ke oia loa no hoi.
Ua olelo ia o k aauau me ka wai pu mehana a me ke KOPA CUTIKURA no ka hoomaemae ana i ka ili no ka papaa i ka lepo a me kahi mau ino e ae, a pela hoi no ka unahi-pii, a pela hoi, ina ka e kapili malie i ka Aha Hamo CUTIKURA, oia wale ae la no ka na mea a pau e hana ai no ka pale ana aku i keia mau kinaunau o na keiki liilii i na wa apau e hoomaka mai ai, a ina no ua loaa mua, he mea pau wale no ia i keia mau l@n@ ae ia, ke malama pono ia na kuhikuhi. Ma keia hana ana pela, e loaa ai i na makuahine pomaikai ma na home lehulehu a puni ka aina.
Mamuli o ka momona, ka maemae ame ka hikiwawe o ke oia o keia laau, i makemake nui ia ai e na lahui kanaka a pau i hoao a ikemaka i kona waiwai nui ma ke ano hoola a pela no hoi i hilinai nui ia ai kona waiwai me ka hoopakele ana i ka luhi a me ke kaumaha o na makua lehulehu ma na wahi a pau, a pela no i malama nui ia ai maloko o na home.
HE HOOLA MAOPOPO NO NA MA'I MALOKO A MAWAHO O KE KINO.
Oia hoi ke KOPA CUTICURA a hoomaemae ai i ka ili a me ke kepia e ke poo a hoowaliwali i ka alualu, o ka AILA CUTICURA HAMO no ka hoopau koke i ka maneo a hooluolu a hoola, a me ke CUTICURA RESOLVENT no ka hooluolu a hoomaemae ana i ke koko. Ke kualia nei ma na wahi a pau o ka honua nei. Keena Kuai ma Auseteralia, R. Towns & Co., Sydney, N. @. W. Keena ma Aferika Hema, Lamron Ltd., Cape Town. "I loaa ai ka ili pahee maikai, ka lauoho a me na lima."
O POTTER DRUG AND CHEM. COMP., Boston, U. S. A., na Ona o na Laau CUTICURA a pau loa.
-----
Na Mea
PAANI AME HOOIKAIKA KINO
Ma Kahi o Pearson & Potter Co., LIMITED.
ALANUI HOTELE ME UNIONA
-----
HOOKAHI PA HAUKALIMA A ME KA MEAONO NO 10 KENETA
HOOKAHI KIAHA WAIU NE KA MEAONO NO 10 KENETA
MA KA HALEKUAI PUHI PALAOA
SUNRISE BAKERY
Alanui Nuuanu kokoke i Alanui Beretania.
O ka Hau Kalima (Ice Cream) e hanaia nei maanei mai ka waiu maikai a momona maoli i loaa mai ai, oiai o na meaono e hanaia nei aia ma ke ano maikai loa. He hookoia na kauoha palaoa me na meaono o na ano apau no ke kumukuai kupono. E hele nui mai.
-----
HOOLAHA KUMAU
-----
A Mea Nui Kou Mau Niha
E Pono e ike Oe Ina ua Pono ko
Lakou Hana ia Ana!
---
He Hookahi Wale no Alahele e Pono ai, a o ka M kou ke Alahele Pono.
O na hana apau na ka poe wale no i hemo maikai mai na Kula Kiekie a ke hoopaa nei makou i ka lakou mau hana. E nana no makou i kou mau niho me ka auhau ole a e hai aku hoi ia oe i na lilo no ko lakou hana ia ana.
Ua hiki ia oe ina he manao kou na makou e hana i kau hana ma ke kipa ana ae ma ka
New York Dental Parlors,
1057 Alanui Papu,
Maluna ae o ke Keena o ka Honolulu Photo Supply Co.
-----
E LAWE I KA NUPEPA "KUOKOA," I IKE MAU I NA MEA HOU.
-----
HOOLAHA KUMAU
---
JOHN M KEA.
He Notari no ka Lehulehu; he mea hana i na Palapala Kanawai, a he mea huli i na Kuleanan aina. O ma kauoha mai na mokupuni mai e hookola no me ka pololei.
Keena Hana: Ma ka Loio Kuhina, Hale Mana Hooko.
Honolulu. Mei 22, M. H. 1903.
-----
KAUKA GEO.J AUGUR
Kauka @uluwai Liilii.
LAAU MOMONA AOLE MULEA
Keena Hana 4@1 Alanui Beritania Telepona Helu 1881. Hora Hana 10-12 a.m., 2-4 ame 7-8 p.m. Sabati 9:30-10:30 a.m.
-----
O NA WAIWAI U'I LOA
NO NA
LA KU LAIA
Eia ke hoikeia nei ma ko S. OZAKI Halekuai, ma Waverly Block, Alanui Hotele.
O na waiwai o laa-
NA KIMONO, NA HAINAKA SILIKA, LEI A-I AME NA PALULE O KANE,
He ohaoha wale ia no ia mau Makana a pau.
INA HE ALOHA HOU E PA MAI E IKE IA'U
S. OZAKI,
Waverly Block Alanui Hotele.
-----
KUAI HOEMI NUI O NA WAIWAI KALIKIMAKA
E HOOMAKA ANA MAI NOVEMABA 28, 1903
Na Lole Kinohinohi ana kou laa@. Na Lole Nani Waili@la. No Kamaa e @a ana a pau@. Na Lako Hoonani Hale. Pale-ili@ o Kane me na Wahine. Na Waiwai Kalikimaka e na @@o a pau, a he nui wale aku na waiwai i k@@ e hiki ole ai he hal@ papa aku.
Nolaila, o na makamaka, ua hamama keia mau i@uku @@u e kipa mai ai. E HELE MAI NO A PAU, @OE KAOO. E HELE MAI I KA WA KUPONO, A E WA@ HOU IHO.
Goo Kima
@ui@@ e no Alanui Nuuanu me Hotele.