Ka Nupepa Kuokoa, Volume XLI, Number 50, 11 December 1903 — Page 4

Ka Nupepa Kuokoa

KE KILOHANA POOKELA NO KA LAHUI HAWAII .

NUPEPA KUOKOA, DEKEMABA 11, 1903

 

                        "E kuu Haku." wahi a ke Kaunawahine i puoho ae ai me ka puiwa nui i ka lohe ana i kela inoa hanohano a eu ae la e ku iluna me ka huli ana aku e nana i ke kanaka opio no ka manawa mua loa, ke kumu no hoi i wehe ae ai ka Emepera opio i kona papale a haawi mai la i kona kunou hoomaikai no ka wahine o ke kulana puiwa.

 

                        "Ke nei aku nei au ia oe e kuu Hakuwahine e noho ilalo no ka mea he kahulihuli wale no ka waa i ka manawa ikaika o ka holo. Mai kanalua oe ia'u no ka'u mau hookauwa ana ia'u iho nou e like loa me ka Konorado e hana ai nou."

 

                        "He haku aha oe. a he haku io anei oe?" wahi hou a ka ninau.

 

                        "No ka puiwa loa o Konorado ma kana olelo ana oia ke kumu o ka puka ana mai la o kela ano olelo mai iaia mai he inoa aole au i koi aku e kau mai, a o kekahi paha he hoolohe oia i ka'u mau noi e hanaia mai e ia, e like me kona hooko ana no kona Haku."

 

                        "A owai kou inoa a heaha kou kulana, oiai ke ike la wau aole oe he kanaka i maa i ka hoe waapa?" wahi hou a ke Kaunawahine.

 

                        "Ke kaumaha loa nei au i keia mau manao i puka mai la mai ia oe mai no ka mea ua loaa ia'u ka manao ikaika e hana i na hana e lilo AI I MEA AKAMAI I KA HOPE WAAPA.  O Rodolofo ko'u inoa. a o ka mea e nana mai ana ia'u aole e nele ka loaa iaia ka ike he keonimana wau."

 

                        "He Kelemania anei oe?" wahi hou a ka wahine opio.

 

                        "Ua like loa ke koko iloko o kuu kino me ko ka Emepera, a he makaainana hoi nona."

 

                        "Alaila he kanaka Swisa imi huli hana oe?"

 

                        "He haawina ia i loaa ia na kanaka apau, a aole au i manao ua oi ae au mamua o na kanaka he nui," wahi a ka pane.

 

                        "Alaila he kiu oe ma kou aahu?" wahi hou a ka ninau.

 

                        "Aole au he kiu," wahi a ka Emerera, "Eia no wau me ko'u aahu a'u i noho ai i keia kulanakauhale mai ka manawa a'u i kipa mai ai a hiki wale i keia hui ana.  He hoaloha au no ka Haku o Konorado a ma keia hele ana mai nei a'u i ko ianei hale i ke kae muliwai, oia no hoi ka maopopo ana he hele holoholo po mahina keia nolaila upu ae ka manao iloko o'u e hui pu iloko o keia huakai malia o loaa kekahi kuia e makemakeia ai ke kokua a ka pahikaua alaila ua makakaukau keia pahikaua e hoohana ia no ka pono o ke Kaunawahine o ke kulanakauhale o Tarevis, a me ka manaoio wau e waiho aku nei iaia ma kou mau wawae a e hoohanaia oia e like me kau mau kauoha."

 

                        "Aia maka hikiwawe o ka holo o ka waapa ko'u kaunui ma keia huakai aole ma ka hakaka," wahi a ka wahine opio.

 

                        "O ka'u hoe waapa o keia po aia malalo o kou mau kauoha, a e hoohanaia e like me kou makemake, a malia o hui kakou me kekahi kuia oia ka manawa e hoowaiwai aku ai i keia mea hana no kou pono."

 

                        Ma keia wahi ua noho mumule iho la ke Kaunawahine no kekahi manawa a noonoo nui iho la iloko ona no kana mea e hana aku ai i keia kanaka malihini.  Ina oia he kiu naka Akibihopa alaila aole e ko ana kana manao i kukulu ai no kona pakele mai ka lima aku o ke kahuhanai, oiai aia he poe koa o ka Akibihopa i kukuluia ma na wahi like ole o ka muliwai no ke ku kiai ana i kona pono.

 

                        Nolaila. ua ulu mai la ka manao iloko ona ina no kona pakele e hoolele iaia mai ka waapa aku, oiai he kanaka koa oia i makaukau me ka mea kaua, oiai o Konorado aole i lawa, a ina paha e hiki ana i kahi o na koa o ka Akibihopa alaila ua maalahi loa ka ianei hana a o ka paa koke no ia mamua o ka hiki ana i kahi i manaoia.

 

                        Aole no hoi ona makemake e hoolele i keia kanaka ma kahi nui o kauhale malia o lilo ia i mea e loaa maalahi ai ka poe e kokua mai ai no ka hopu ana iaia a aole no hoi ona makemake e hoolele iaia iloko o ka uluylaau e like me kahi a lakou e holo nei no ka mea aia ka ululaau ke aaki paa la mailuna mai a hiki i ke ka'e muliwai, malia he mea ia e pilikia ai kona ola mamuli o na holoholona hihiu paha.  Nolaila ua lilo maoli keia i mea nui loa iloko o kona noonoo.

 

                        Huli ae la oia a ninau aku la ia Konorado:

 

                        "Ua maopopo anei ia oe keia wahi o ka muliwai, e Konorado?"

 

                        "Ke ike nei au eia kakou i Kokima nei, e kuu Hakuwahine."

 

                        "A heaha ka mamao?" i ninau hou ia mai ai.

 

                        "Ke manao nei au aia kakou ma kahi o eono mile e aneane ana e kaa malalo o ke  kauhale o Bovarisa o na Roma," wahi a Konorado.

 

                        Alaila huli ae la ua Kaunawahine nei ia Rodolofo.

 

                        "He Haku anei ka Akibihopa maluna ou?" i ninau aku ai ua wahine opio nei.

 

                        "Aole, e kuu Hakuwahine. He kanaka kuokoa wau aohe he mea maluna iho o'u." wahi a ka Emepera.

 

                        "Aole ka Emepera?" wahi hou a ka ninau.

 

                        "Ae, iaia wale no, a aole i kekahi mea okoa ae."

 

                        "A maihea mai oe a pehea ka loihi o kou noho ana i Tarevis nei?"

 

                        "Mai Palanipoka mai au a he eha la ka nui o ko'u manawa o ka noho ana ianei, a o ka mua loa no hoi keia o ko'u ike ana i keia kulanakauhale kaulana."

 

                        "Ua hele mai oe e hoohoaloha me ka Akibihopa?"

 

                        "Aole e kuu Hakuwahine.  He haumana wau a he koa no hoi, a ke hele nei au ma ke ano makaikai a e ike i na Ioina nohona o keia kulanakauhale kahiko a kaulana o Tarevia nei."

 

                        "A owai au i kan ike?"

 

                        "O oe ke Kaunawahine Tekela, ke kaikamahine hanai a ka Akibihopa o ke kaulanakauhale o Tarevis nei, ke kaikamahine hanauna hoi a ke Kauna Henerika ka mea hoi nona ke Kakela Turona au e hooikaika nei e hiki."

 

                        "Ua maopopo maoli ia oe keia mau mea.  A no ke aha keia imi ana au e ike oe i keia mea, ke hana nei oe no ke aha?" wahi kou a ka ninau.

 

                        "Ia'u e kau ana maluna o ko'u lio ma ka puka-pa i ka manawa o ka huakai a ka Akibihopa i puka mai ai i kela mau la aku nei, a oiai o ko'u komo ana mai no hoi ia iloko o ke kulanakauhale, ua ike aku la wau, o oe kekahi iloko o ka huakai ma ka aoao hema o ka Akibihopa a mailaila mai ka loaa ana ia'u kou kulana."

 

                        "Ua kamaaina anei oe me kekahi mau wahine opio o ke alo o ka Akibihopa mawaho ae o'u?"

 

                        "Aohe mawaho ae ou" e kuu Hakuwahine."

 

                        Ua noho mumule hou iho la na wahine opio nei no kekahi mau miuuke a pane aku la i ke kanaka opio me ka leo e hoike ana i kona hilinai ole iaia."

 

                        "Ke hilinai ole nei au ia oe.  Ina he keonimana oe, e like me kau i olelo iho nei, aole oe e hoolauna wale mai no ia oe iho imua o kekahi lede.  Nolaila, ke noi aku nei au ia oe, e lele aku oe mai keia waapa aku."

 

                        "Ke kaumaha loa nei au, e kuu Hakuwahine i ka hoole aku i kau noi, aole au e haalele ana ia oe a hiki i kou wa e hiki pono ai i ke Kakela Turona," wahi a ke kanaka opio i pane aku ai; a no ia pane ana a ke kahaka opio ua lilo ia i mea hookui i kona manao ana i mumule ai no kekahi minuke, alaila, hoomaka ae la oia e uwe e like me ke ano mau o na kaikamahine o umi-kumamaiwa makahiki, me ka upoi ana i kona mau maka me kona mau lima palupalu.

 

                        "E kuu Hakuwahine," wahi a Rodolofo, "e kala mai oe ia'u. Ua maopopo loa no ia'u ua lilo keia mana ikaika iloko o'u no ka hoopakele ana ia oe no keia mua aku, aka no keia manawa ua hoolilo au i ko'u hele pu ana i mea hoopilihua loa ia oe.  Ke hooholo kuke nei au e hooko aku i kou makemake.  E Konorado, e hoopili ae i ka waapa ma ka aoao aku o ka muliwai."

(Aole i pau.)

 

HE MOOLELO NO

 

RODERIKA O KILADEA

 

KA NAITA KIUPAA MAHOPE O KA MEA ANA I ALOHA AI.

 

:AME:

 

KATE MAKAMURAGA.

 

KA U'I NOHEA A HOOILINA OIAIO O KALELOGA.

(Unuhiia e S.K. Nawaa.)

 

MOKUNA XVI.

-----

PAA KE ALOHA AOLE LOLI.

 

"Aole e mokuhia ke aloha i na waikahe he nui."

 

                        Ia manawa i hahai aku ai o Habati i na mea i ala mai ma Kaleloga ia mau la i hala aku la e pili ana hoi no-Magareta.  Ua ha'i aku la oia i kana hui kukai kamailio ana me kona kapena; kona hahai ana aku i kana kaikamahine i kahi ana i hui aku ai me Baraina Duna, ame na mea no hoi a laua i kamailio ai a i ha'i mua ia aku ai ma ka mokuna i hala.

 

                        I kinohi aole i hooiaio aku o Sir Kamaki i kana mau mea i lohe ai, aka, i kona hoomaopopo ia ana mai ua ha'i pono ia aku iaia na mea apau, ua pahaohao nui iho la oia a hiki ole iaia ke noonoo maikai.

 

                        "Auwe no hoi e! he oiaio anei keia?" wahi ana i ninau aku ai me ka puiwa nui.

 

                        "He mea oiaio-he oiaio na olelo apau," wahi a Habati i pane aku ai.

 

                        "Auwe! heaha ka'u mea e hana aku ai no keia kaikamahine hana ponoole?"

 

                        "E noonoo like mai kaua ia mea.  Ma na ano apau he mea pono e hoi hou ole aku oia no Kaleloga.  Hamau! heaha hoi kela e nakeke mai la?"

 

                        "Aole wau i lohe aku nei i kekahi mea."

 

                        "Ua lohe aku nei wau i kekahi mea nakeke," wahi a Habati i pane aku ai me kona hoolono ana aku.  "Ma ko'u lohe aku nei na like me ka hanu ana o kekahi mea, a ua lohe pu aku nei no hoi wau i ka nehe wawae kanaka."

 

                        Ua wehe aku la o Fizigerela i ka puka a nana aku la mawaho o ka lanai, a mahope mai ua hele aku la oia no ka puka aniani, aka he ole kona ike aku i kekahi mea.

 

                        "Me he mea la o ka puahiohio makani kau mea i lohe aku nei," wahi a Sir Kamaki i kona wa i noho hou iho ai iluna o kona noho.

 

                        "Ua pono," wahi a kana malihini i pane aku ai. "Aole ke kaua hana he mea pono e lohe ia e kekahi mea.  No ka hoomau ana aku: Ua ninau mai nei oe ia'u i ka'u hana e hana aku ai no Magareta.  Ke aneane nei wau e koi aku ia oe e hoopaa ia aku oia ma kahi o Roderika e paa nei.  He mea oiaio ua lilo ae la ka kaua aelike i mea ole.  Aole wale no ua hookuu ia o Roderika mai ia haawina mai, aka, e hana ana wau i ka mea i hiki ia'u a e koi-ikaika aku ana wau ia Dueana Makamuraga e ae mai oia e haawi aku i ka lima o kana kaikamahine ia Roderika."

 

                        "He mea oiaio," wahi a Sir Kamaki i pane aku ai. "he mea pono no e kiai ia aku o Magareta me ka makaala loa, a he mea maikai ole paha ka hoopaa ana aku iaia."

 

                        "Ina kaua e hoopaa aku ana iaia, e hana kaua me ka lokahi: aka i ka la apopo paha ka manawa kupono no kaua e hana aku ai ia hana.  E pono ia kaua ke hele aku e hookuu ia Roderika, no ka mea ke makemake nei wau e hele pu aku me oe no kona wahi e hoopaaia nei."

 

                        "Ua pono kau, e kuu hoahanau.  E hele koke aku kaua i keia manawa."

 

                        Ua haalele mai la na eale a i elua i ka lumi. a i ko laua hala ana aku, ua hamama ae la ke panipuka o kekahi lumi waiho lole, a oili mai la kekahi kino kanaka mawaho, a mahope koke iho ua hala aku la ua kanaka la e like me ka hikiwawe i loaa aku iaia.  O keia kino kanaka aole ia he mea okoa aku, aka o Culena Kilala no.  Nolaila, aole wale no i ha'i aku o Sir Habati i na mea apau in Kamaki wale no, aka i kekahi pepeiao okoa aku no, ka mea hoi i komo mai e hoolohe i na mea apau i ha'i mua ia aku nei maluna.

 

MOKUNA XVII.

 

            O OE KO'U PUUHONUA.

 

" A ike aku wau ia oe, Olu pono ko'u manao."

 

                        Mamua o ka uhi ana mai o ka malu po. ua hoomaka ae la o Magareta e hoohuoi aia kekahi mea ano e ke holopapa la iloko o ke kakela o Kiladea.  Ua ike aku oia i ka nana ana mai o kona makuakane iaia. ia lakou e paina ana i ko lakou paina ahiahi, me ka hoihoi ole a pela no hoi me Fizigerela, a ma na mea e kamakama iloia ana ua maopopo pu aku la iaia aia kekahi mea i ha'i ole ia aku iaia, he mea hoi i hunakele loa ia.  I kinohi ua manao iho oia ua ulu mai keia mau mea mamuli o ko Roderida hoopaa loihi loa ia ana; aka mahope mai ua ike iho la oia aia kekahi mea mawaho ae o Roderika, a o ke ki hoi o keia mea huna ana i loha ole ai.  I ka loaa ana iaia o ka manawa kupono ua hele aku la oia i ka mea malama hale a ninaninau aku iaia. aka, aole he mea i loaa mai iaia oiai aole i ha'i aku o Irena i kekahi mea.  O ke kumu o keia, oia no ko Irena makemake ole ia Magareta, a ua ike aku la no hoi o Magareta ia mea a i iho la oia iloko iho ona:  E hoopa'i no wau i keia wahine ke hiki mai i ka wa o'u e lilo ai i kaunawahine no Kiladea." Iloko o keia nele o Magareta i kana mea i makemake ai, ua paa iho la no kona manao aia io no kekahi mea pohihihi ke waiho nei, a hooholo iho la oia iloko iho ona@@hoomau aku ana oia i ka huli ana i keia mea a hiki i ka loaa an@@@@@.

 

                                    Iwaena o kekahi mau kauwa i hele m@@@ me ka opio wahine mai Kaleloka mai. aia he ekolu o lakou a@@@ hilinai loa ai.  O keia poe ekolu he poe lakou na Baraina Dun@@ hoouna mai i kekahi manawa mamua aku a noho iho lakou ma Kaleloga ma ke ano he poe kiu, e hana ana no nae i na hana a ka eale e hoounauna aku ai.  O keia poe ka Magareta i manao ai e hui aku a i ka uhi ana mai o ka po, ua hele aku la o Magareta e huli ia lakou.

 

                        Ia Magareta e huli ana i keia poe, aia hoi kekahi mea ke huli la iaia.  Ma kekahi o na alanui hele o ka hale olalo. ma kahi hoi e kau ana kekahi kuikui, na halawai aku la o Culena Kilala me Magareta, kana mea hoi i  makemake ai.  Ua aneane ka opio wahine e hookaawale aku iaia, aka na ka leo o Kilala i kono mai iaia e ku aku.

 

                        "E Magareta Dorano. - ina o oe no hoi ia, ke makemake nei wau e hui kamailio pu aku me oe."

 

                        "Owai oe?" wahi a Magareta i pane aku ai.

 

                        "Ua ike mua no oe ia'u ma Kaleloga."

 

                        "Pela io no ma ko'u hoomaopopo aku.  He helehelena kena i kamaaina ia'u'; aka aole wau i ike i kou inoa."

 

                        "O Culena Kilala ko'u inoa."

 

                        "Oiaio. oia.- ua lohe wau i kena inoa.  Heaha kau mea e makemake nei e ha'i mai ia'u?"

 

                        "Aole wau e ha'i aku ana ia oe i kekahi mea ma keia wahi. e ka lede.  E pono ia kaua ke hele aku iloko o kekahi wahi e hiki ole ai i kekahi mea ke lohe mai i ka kaua mau mea e kamailio ai."

 

                        Aole i hopohopo iho o Magareta i ke kono a Kilala, nolaila ua hahai aku la oia mahope o na kanaka la, a ia laua i hiki aku ai ma kahi mehameha, ua ku iho la laua a pane aku la no hoi o Kilala:

 

                        "Ano, e ka lede. ke manao nei wau ua hiki ia'u ke ha'i aku ia oe i na mea au i makemake ai e ike. Ke ole wau e kuhihewa ua imi ae nei oe i kekahi mea au i makemake ai e lohe, aole no nae he mea i ha'i ia aku ia oe."

 

                        "E hoomau aku." wahi a Magareta, me ka hoihoi nui.  "Ina he mau mea kau e makemake nei e ha'i mai ia'u, ua makaukau wau e hoolohe aku."

 

                        "E pono ia oe e hoomaopopo pono mai i ko'u ano. e ka lede.  Aole wau i manao he mea pono ia'u e ha'i aku i kekahi moolelo. he hapa hoi oia moolelo aole oe i makemake.  E ninau mai oe ia'u i kau mau ninan i manao ai a e ha'i aku no hoi wau i na haina."

 

                        Aole i hoohala o Magareta i ka manawa ma ka noonoo ana.  Eia oia ke huli nei i keia mea nana i hoano e ae iaia, a ua paa hoi kona manao e huli aku; nolaila me ka hakalia ole iho. ua ninau aku la oia:

 

                        "Eia no anei o Roderika Fizigerela ke paa mai nei no?"

 

                        "Ae."

 

                        "Ua maopopo no anei ia oe ke kumu o kona hoopaaia ana?"

 

                        "Ae. e ka lede; ua maopopo ia'u na mea apau loa."

 

                        "Pehea. e paa ana no anei oia ma ia wahi a hiki i kona manawa e ae mai ai e lilo mai i kane na'u?"

 

                        Ua ninau aku o Magareta i keia ninau me ka hopo ole iho, a ua ha'i koke aku la no hoi o Kilala i ka haina:

 

                        "Ke manao nei wau, e ka lede. ua hoololiia ae ia papahana.  Aole a paa ia ana o Roderika maluna o keia aelike i hanaia ai."

 

                        "Pehea! ua @ua no anei oe ia mea?"

 

                        "Ae."

 

                        "Pehea i loaa mai ai ia ike ia oe?"

 

                        "Ma ko'u lohe ana i na mea i kamailioia mawaena o Sir Ka maki ame kou makuakane."

 

                        "Ea. owai iloko o keia kakela mawaho ae o ko'u poe ame ka poe e noho nei ma Kiladea nei?"

 

                        "Eia ianei o Kate Makamuraga."

 

                        "Oia! Pehea iho la hoi keia? Pehea hoi oia i hiki mai ai ianei?"

 

                        Ua ha'i aku la o Kilala i ka halawai ana o ka eale me ua nohea la o Wikilo; ka hoopakeleia ana mai ka lima mai o na mea nana oia i lawe aihue aku: a pela no hoi me ka lawe ana mai o Sir Kamaki iaia iloko o ke kakela.

 

                        Ua pii koke ae la ke kai o ua lede la o Kaleloga: mahope mai ua hoi mai la kona mau noonoo maikai. a pane aku la oia me ka leo puu:

 

                        "He manao kou o ka hele ana mai e ha'i mai ia'u i keia mea?"

 

                        "Ua pololei oe. e ka lede."

 

                        "Heaha ua manao la?"

 

                        "Ke manao nei wau he mea maikai e ha'i ia aku ia Makamuraga i kahi a kana kaikamahine e noho nei.  Ke manao mai la paha kela ua mamao aku kana kaikamahine mai nei aku."

 

                        "Hehea no hoi kou mea e hele ole aku ai e ha'i iaia i keia mea?"

 

                        "Ua hiki ole ia'u ke hana aku pela.  Ke manao nei wau ina oia e noho loihi iho ana ianei e haawi aku ana o Sir Kamaki i ka lima o Roderika i ua opio wahine la-he mea hoi i kulike ole me ko Ducana Makamuraga manao.  Ae-ke manao nei wau e pepehi iho no oia i kana kaikamahine me kona mau lima ponoi.  E ka lede. aole i hiki ia'u ke ha'i aku i na mea apau ia oe; aka. eia ka'u mea e ha'i aku nei ia oe:  Ke makemake loa nei wau e kii mai o Makamuraga i kana kaikamahine a lawe aku iaia-he mea hoi ana e hana mai ai ke ike oia i kona wahi e noho nei."

 

                        Ua maopopo mua no ia oukou e ka poe heluhelu i ko Makareta lohe ana i na hana a Makamuraga maluna o Kate. nolaila, aole he mea i koe e kanalua ai o Magareta i na mea a Kilala i ha'i aku ai iaia; no ia mea i ka pau ana o kana hoolohe ana i na mea a Kilala i ha'i aku ai iaia. ua pau ae la kona ninaninau hou ana aku. a hookuu aku la oia ia Kilala e hele aku e like me kona makemake; aka aole oia i hoi koke aku iloko o kona lumi.  Ua hele holoholo ae la oia ma ka aoao o ka pa e noonoo ana i kana mea e hana aku ai.  I kinohi ua manao oia e kii aku e pepehi maoli ia Kate; aka mahope o ka noonoo ana, ua hooholo iho la oia o ka hiki ana mai o Makamuraga a lawe aku i kana kaikamahine, oia wale no ke alahele mama loa.  Pehea hoi oia e hana aku ai a lohe o Makamuraga?  Ua pinepine na manaawa ana i ike ai i ua haku la o Wikilo-ua pinepine hoi kona mau manawa i hele ae ai no Kaleloga-a ua kau aku no hoi kona mau manao maikai maluna o ua haku la o Wikilo, a ua ike no hoi oia aia na mana maikai mawaena ona ame keia haku.  Heaha hoi ka hewa ina no hoi oia e hele aku e hui me ua haku la o Wikilo a ha'i aku iaia i na mea apau?"

 

                        He hapalua hora mahope mai, ua halawai aku la o Magareta me kakahi o kona mau kanaka, o Demota Makaalopina kona inoa.  Ua ninau aku oia ina ua ike ua kanaka la i ke alanui pololei e hele aku ai no Dalavina Hale, a ua ha'iia mai ua maopopo ia mea.  Nolaila ua ha'i aku la oia e makaukau lakou no ka hele ana aku i ke kakahiaka nui o kekahi la ae, a o na lio maikai wale no ke laweia aku, a e hoopuka ole ia hoi e lakou kekahi mea e pili ana no keia hele ana aku.

 

                        Mahope o ka pau ana o keia mau kauoha ana, ua huli hoi aku la o Magareta no kona lumi, a hoi koke aku la no hoi e hiamoe, a i ka wa i wehe ae ai o ke alaula o kekahi la ae. aia ua opio wahine la ke ku la iloko o ka pa, a malaila hoi oia i halawai aku ai me Demota e kali mai ana iaia.  Ua ha'i aku la oia i kekahi o ka Sir Habati mau kanaka i ala mai ai mamuli o ka hoomakaukauia ana o na lio, penei:

 

                        "Aole paha e ala koke mai ana kuu makuakane, a he mea ano ole hoi ka hele ana aku e hoala iaia. 

Ina oia e ala mai e ha'i aku oe iaia ua huli hoi aku wau no Kaleloga no ke kii ana i kekahi mea a'u i poina ai. a he mea hoi na'u i makemake loa ai.  E hulil hoi mai no wau i ka la apopo me ka maikai."

 

                        I ka papu ana o keia mau olelo, o ka pai koke ae la no ia o ua opio la i ke kaula kaohi o kona lio, a kamoe aku la kana huakai me ka loaa ole mai o na keakea iaia.

 

                        He hookahi hora mahope mai o ka hala ana aku o Magareta ame kona mau hoa ua ku aku la o Hiu Kapena ma ka puka o ka lumi o kona haku opio, a i kona ike ana aku ua hemo ka puka. ua manao ihu la oia e kiei aku iloko a nana ina paha eia kekahi mea iloko o ua lumi la.  Ua paha'oha'o nui oia i ka ike ana aku ia Roderika, e hoomakaukau ana iaia no ia kakahiaka.

 

                        "Auwe! O oe anei ia. e kuu haku?"

 

                        "Eia wau maanei. e kuu Hiu maikai."

 

                        "Ua holoma-lu mai anei oe?"

 

                        "Ua hookuu laelaeia mai wau."

 

                        "Ma ke kauoha anei a kou makuakane?"

 

                        "Na ko'u makuakane no i hookuu mai ia'u me kona mau lima ponoi."

 

                        "Auwe! heaha iho la ka manao o keia?"

 

                        "Oia ka'u mea e makemake nei e ike." wahi a Roderika i pane aku ai, iaia i huli mai ai mai ka pale kila Milana, kahi hoi ana i nana aku ai a i hoolilo ai hoi i aniani ku nona.  "Malia paha ua hiki ia oe ke ha'i mai ia mea.  O ka'u wale no e hiki ai ke ha'i aku ia oe,-i ka po nei ua hele ae kuu makuakane ame ka Haku o Kaleloga iloko o ko'u wahi i hoopaaia ai. me na nanaina kaumaha.  Ua apo mai la ko'u makuakane ia'u a noi mai la ia'u e huikala aku iaia; a ua noi mai la no hoi o Sir Habati ia noi hookahi no.  Ua hoikeia mai ia'u ua hookuu ia wau; aka. ia'u i noi aku ai e hoakaka ia mai na mea apau ia'u, ua hoole like mai la laua.  Ua i mai laua ia'u e kali hoomanawanui a hiki mai ka manawa kupono, a e ha'i koke ia mai ana no hoi ia'u.  E kuu Hiu maikai, heaha la ka manao o keia: Eia anei o Magareta ianei?"

 

(Aole i pau.)