Ka Nupepa Kuokoa, Volume XLII, Number 1, 1 January 1904 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, IANUARI 1, 1904.

 

HE MOOLELO NO

 

RODERICK O KILADEA

 

KA NAITA KUPAA MAHOPE O KA MEA ANA I ALOHA AI.

 

AME

 

KATE MAKAMURAGA.

 

KA U`I NOHEA A HOOILINA OIAIO O KALEILOGA.

(Unuhiia e S. K. Nawaa.)

 

MOKUNA XVIII

 

KA HOPENA.

 

“A ike aku au ia oe Olu pono ko`u manao.”

 

“E Hebati Durano.” I hoomaka aku ai o Nane, “i ka wa i ala mai ai o keia mea a`u e ha`i aku ai ia oe, aole o`u manao maikai no na barona o Enelani, no ka mea o ko`u makuakane ke keiki mua loa a Mikaela O’Ruaka, ke koa hoi o Kanauka, a mai lilo no paha i kanaka mana nui iluna o ka aina, ina aole i komo main a Nomana.  I ka wa i make ai o ko`u makuakane – a hoi aku hoi oia no ka luakupapau me ke kaumaha – ua hoi aku la wau a noho ma ko Makamuraga hale; oiai no nae aole ona manao maikai, eia nae he oluolu oia.  I ka wa i ma`i ai o kana wahine na`u oia i malama; a ia`u i ike aku ai i ko Makamuraga hauoli, ua komo main a manao pahaohao iloko o`u no keia mea nana i hoohauoli iaia, oiai he mea maa ole ia iaia.  Mahope mai ua hanau mai la kana wahine i ke keiki, a ia`u i lawe aku ai i ka lohe iaia he kaikamahine ua keiki la aole oia i huna iho i kona hauoli nui.  Ua aneane ia Manawa i ke awakea.  Ia ahiahi ua kauoha mai la oia e hele aku wau iloko o kona lumi malu, a mahope o kona hoohiki ana ia`u aole e ha`i aku i kekahi mea, ua ha`i mai la oia i kekahi hana lapuwale loa ana i noonoo nui ai.  He mau mahina mamua aku, ua hanau mai la ke kaunawahine o Kilidea he keikikane, a ua hui aku kana kane me ka Haku o Kaleloga ma kekahi aelike e hiki ole ke mawehe ia ae, oia hoi ina e hanau mai an aka wahine a ka haku o Kaleloga he kaikamahine, o na keiki a i elua, a lilo i mana nui.  Ia kakahiaka no, ua loaa mai ka lono ia Ducana Makamuraga i ka hanau ana o ke kaunawahine o Kaleloga he kaikamahine. ‘Ano,’ wahi a Ducana, ‘ke hoohui ia o Kiladea ame Kaleloga e lilo mai ana ia i barona ikaika loa ma Irelana nei, a heaha hoi ka mea nana e hole ma ii ka noho mana ana aku o ke koko o Makamuraga?  Ina he mea hikiia`u ke ola a hiki i ko`u ike ana aku i ka`u kaikamahine e noho mai anan i kaunawahine no Kiladea, a ma ia ano e lilo aku ai ko`u koko i mana nui a hanohano, e hauoli no wau.”

 

“O keia iho la ka papahana a Makamuraga.  Ua nui kona noonoo ana no ia mea a me he mea la ua lilo ia i mea nana e hiipoi loa ai mamua o kona ola iho.  Ua noi mai oia ia`u e kokua aku iaia, a aole hoi wau i hole aku, no ka mea ua hoopaa mai la oia e loaa ana ia`u kekahi uku kiekie.  Me ka nana ole ae i ka nui o kaua mea i hoopaa mai ai ia`u, ua lawa ia`u ka ha`i ana aku ua komo mai ka hoowalewale iloko u`u a ua puni aku wau.  Aole wau i kahiko ia Manawa, a aole no hoi wau he pupuka.  O ka wahine nana e malama ana ke kaikamahine a Dorano he hoaloha ia no`u, a aole hoi i loaa main a kuai ia`u i ke kono ana aku i kona kokua ana mai ia`u, no ka mea ua hoomanaia mai wau e Ducana e Hooia aku i ka loaa ana iaia o ka uku nui no ka hapa o ka hana i hanaia eia.  Ua lawe aku wau i ke kaikamahine a Ducana Makumuraga a hiki i kahi e noho ana o ka wahine hii keiki a ke kaunawahine, a malaila maua i hoololi ai i na keiki a maua.  Ia`u i huli hoi aku ai no Dalavina Hale ua lawe aku wau i ke kaikamahine a ka eale, oiai ke kaikamahine a Makamuraga e laweia ana no Kaleloga.

 

“Aka, e kuu haku, aole no hoi i makona loa ko`u mau manao.  Ia`u e lawe ana i ka bebe o Kaleloga ma ko`u mau lima, ua hooholo iho wau iloko o`u e hana aloha aku iaia; no ka mea ua manao wau aole loa wau e haalele ana ia Dalavina Hale oiai wau e ola ana.  Aka aole wau i maopopo loa i ka manao ino iloko o ka hau o Wikilo.  He mahina mahope mai ua make iho la ka wahine hiikeiki o Kaleloga, a ma kekahi ulia ua loaa mai ia`u ka ike ua hanaiia ua wahine la i ka laau make a na kekahi hoi o ko Ducana Makamuraga mau akena i hana ia hana.  Na keia mea i hookomo ma ii ka manao iloko o`u e nana pono wau ia`u iho, a aole hoi i loihi loa mahope iho ua sua iho la wau ke makemake nei keia lapuwale e hana mai ia hana hookah no maluna o`u i mea e nalo ai keia mea huna e pee nei iloko o kona poli.  Me ko`u moe pono ole ua noho aku la wau e kiai, a ike iho la wau ua hanaia ka laaumake iloko o na mea ai i manaoia ai na`u.  Ia Manawa uakomo mai no ka manao iloko o`u e hele aku e ha`i i keia mea huna i ka haku o Keleloga; aka aole i loaa mai ia`u ke koa e hiki ai ia`u ke ku aku imua ona, a noho iho la wau e nana pono no ko`u pono iho – me ka manao ina e loaa mai an aka Manawa kupono ia`u e uku aku ai i keia hana a Makamuraga, e hana no wau pela.  Ua holo aku wau mai Wikilo aku, a hoi aku la, no Sekotia, a malaila wau i noho ai a hiki i ke kokoke ana mai o ka wa e hoohui ia ai na Haku o Kaleloga ame Kiladea.  He mea hoopau Manawa no`u ka ha`i ana aku i ka`u mau mea i hoonohonoho ai e panai aku no ka Makamuraga hana maikai ole ia`u; aka, e ha`i aku ana wau ia oukou o ka hana hauoli loa i loaa mai ia`u oia no ka hana e hanaia nei iloko o keia hora.  E Habati Dorano, o keia wahine u`u au i hoohiki ai e malama aku iaia oiai no nae aole oe i kamaaina iaia, o kau kaikamahine ponoi no ia 0 o ke keiki hoi i hanauia mai e ka puhaka o kau wahine he iwakalua makahik i hala ae nei.”

 

Huli aku la o Nane i ka haku o Wikilo a pane aku la: “E Ducana Makamuraga, aole he mea a`u e ha`i aku ai ia oe no ka mea ua ike no oe o kela opiowahine e ku mai la ma o, e manaoio nei hoi oia no ke keiki a Habati Dorano, a hana hoi i ka mea nona e make ai, oia no kau kaikamahine.  Aia kou koko ke holo la iloko o kona mau aakoko, a o ke ino iloko ou ua komo aku ia iloko ona.  Ke i aku nei wau ia oe ua hiki no ia oe ke lawe aku i kau kaikamahine me ka loaa ole o ka mea nana e keakea aku ia oe.  Aia oia, ua kupono---------.”

 

I keia manawa i ikeia aku ai ka lele ana mai o Magareta, me ka puana ana ae i aa olelo hailiili, a paa ana o Nane O’Ruaka, a iloko o ka manawa pokole ua kulaiia aku la ua wahine la a waiho ana iluna o ka papahele, a mai umiiia oia malaila ina aole i lele koke aku na lima kokua.  I kinohi ua hana menemene aku na kanaka i lele aku ai e kokua; aka, i ka wa a Margaareta i kuha aku ai ia lakou me ae la i ka manao ana e hana maikai aku iaia.  Ua nakinaki iho la lakou iaia a paa e like me ka hana ia ana maluna o ka mea i pupule.

 

“Hoopunipuni! hoopunipuni hoopunipuni.”  i hooho ae ai o Ducana Makamuraga, i kona wa i hiki ai ke kahea aku a lohe na mea apau.  “He hoopunipuni na mea a kela wahine i hoike ae nei.”

 

“Aole, aole.” wahi a ka bihopa, me ka luliluli ana ae a kona poo.  “Eia ka hoike aole he mea nana e hoopaapaa mai.  Ina aole keia o ka Lede oiaio o Kaleloga, alaila ua hewa ka`u mau hoomanao ana; no ka mea ke manao nei wau ke ike aku nei wau i ke kii o ko kakou kaunawahine aloha maluna o keia opiowahine.”  A, i hoomau aku ai ka bihopa me kona huli ana aku a nana ia Magareta, “e nana, a e ike no oukou i ke kii o Ducana Makamuraga ua kauia mai maluna o Kana keiki.  Aole he hoopunipuni na hoike a ke Akua!”

 

Ua hiki ole ia Sir Habafi ke kali hou iho.  Ua noonoonui oia iloko o koua puuwai, a ike iho la aole oia i hoopunipuniia mai.  Ua huli aku la oia ma kahi a Kate e noho mai ana, a wehe ae la i kona mau lima; a o ka opio wahine hoi, me ka leo uwe o ke aloha ame ka hauoli ua lele aku la oia iloko o na lima aloha e waiho mai ana imua ona.

 

Hui ae la ka makua me ke keiki me ke aloha palena ole, he ole hoi ke komo ana mai o na manao kaumaha oiai ua hookukeia aku la ia mau haawina e na hoike moakaka lea i ikeia ae nei.  Ua kipona iho la ka eale i na muki o ke aloha keiki, a hookau iho la hoi i na olelo hoopomaikai.

 

Ua nana aku ia kekahi poe maluna o Magareta me ka manao e pii ae ana kona inaina, aka aole ia mea i loaa aku iaia.  I ka wa ana i ike aku ai ia Sir Habiti e lawe aku ana ia Kate iloko o kona poli, ua nuu aku la oia ia Ducana Makamuraga.

 

“E ha`i mai, ina o oe ko`u makuakane, e ha`i mai oe pela.  E ha`i mai ina owau kau keiki e hele aku no wau mahope ou.  Ina o kaua he makua a he heiki he mea pono ia kaua ke houlolohi ole maanei.”

 

“Ua hala! ua puka aku la.” wahi a ua baku la o Wikilo, me ke kulou ana iho o kona poo a pili kona auwae i kona amauma.  “Ua ha`i o Nane i ka mea oiaio.”

 

“Ua huli aku la o Magareta ia Sir Kamaki, a pane aku la: hookuu mai i kuu makuakane ame a`u e hele aku.”

 

“E kuu haku, mai hookau hou mai i ka hilahila maiuna o`u.  E hookuu mai i kuu makuakane ame a`u e hele aku.”

 

“E hookuu aku ia laua,” wahi a Dorano i pane aku ai.

 

Ua weheia ae la na kaula e paa ana ia laua, a haele like aku la laua iwaho o ke kalela, a aole hoi i loihi mahope mai aia laua ke hoi la no Davavina.

 

Ina paha i noonoo iho o Sir Habati, ina paha ua ha`i aku oia ia Roderika i ka hoopauia ana o ka aelike i hana mua ia ai, a ma ia ano ua hookuu ia kana kaikamahine mai kela apo nana i hoopaa iho iaia; aka, ua nui loa kona hauoli, a ua iini loa kona uhane e hooko koke ia ke kiaha o ka hauoli.  Nolaila ua koi aku la oia e hana koke auk ka bihopa i ka hana i waihoia aku ai naua e hana.

 

He mau kue anei kekahi i keia manawa.  E hoole ani o Sir Kamaki,  Pehea hoi o Roderika?  O kate ani kekahi e hoole ana.  He mau manao anei ko Hiu Kapena e hoopanee ia ka hooko ana aku i ka mea i manaoia?  Ina aole, heaha hoi ka mea a ka bihopa e kali hou iho ai i ka hooko ana aku i kaua oihana laahia?

 

Aole i koho hewa o Sir Habati i kona manao ana e lilo aku ana o Magareta i alakai nui o na hana ino ma Wikilo.  Iloko no oia mahina ua mare aku laoia ia Baraina Duna, a hui ae la o Wikilo ame Dysart a ala kue mai la i na barona o Kiladea ame Kaleloga.  Ina aole i lohe mua ko kaua mau hoa o keia hoinainau ana, ina paha ua kau aku na haawina poino maluna o lakou; aka ua nui na mea i ikeia no ka Magareta mau hana limanui, a ua hanaia aku no hana kupono no ke pale ana aku iaia.

 

He mea oiaia ua hui ae o Wikilo ame Dysart, aka aole he mea pono ia kaua e ka mea heluhelu e poina iho i ka hoohuiia ana o Kiladea ame Kaleloga;a i ka manawa i hiki mai ai ka hoao ana, ua haule pahu iho la o Ducana Makamuraga ame Baraina Duna malalo o ka kakou Roderika.  Ua koe iho la o Magareta, e noho makua ole ana a he mea hoi i hooneleia i ke kihepili, ua mokumokuahua hoi kona mau manao, a e hoole ana hoi i na kokua a na barona i haawi aku ai nona, a me ia ano ua komo aku la oia iloko o ka home o na wahine wilikina, kahi hoi e kaawale ai mai an mea nana e hoouluku aku i kona mau manao.

 

Ua huikalaia aku o Nane O’Ruaka mai kana hana hewa i hana ai, a ua kukuluia aku he wahi home nona ma kahi e kokoke ana i Kaleloga.  I kinohi aole i launa aku no kauwa o Kaleloga me ia, aka i ko lakou maopopo pono ana ua mihi iho oia me ka oiaio i kana hana i hana ai, a ua nana aku oia maluna o lakou me na manao e loaa mai na hookipa aloha ana iaia; a ia lakou no hoi i ike aku ai i ko Roderika ame Kate hana ana aku i na hana maikai iaia, ua wehe ae la lakou i ko lakou mau puuwai aloha a hookipa mai la iaia iloko o keapo o ka nohona ohana an no Kaleloga.

 

No Hiu Kapena hoi, iaia i elemakule iho ai, a e hekau ana hoi ka ohu hau maluna o kona mau lauoho, ua lilo i mea hui loa iaia ka ha`i ana i kona aneane ana e lilo aku i naita.  Ua haawiia mai no ke kepa gula iaia, aka aole oia i makemake e lawe mai ia mea.

 

“No keaha hoi?” wahi a kekahi opio kanaka u`i o ka lauoho poni eleele, he opio hoi e hele mau ana e hoolohe aku i na olelo ame na moolelo o ka oihana naita a Hiu i makemake ai e ha`i aku.

 

“No ka mea,” wahi a Hiu a pani aku ai me ka hauoli, “ina wau i lilo i naita ina ua kauohaia mai wau e haalele aku i kou makuakane, a`u hoi i pulama aku ai iaia me ka hauoli.  A, e kuu keiki,” wahi a Hiu me ka hookau ana aku i kona lima maluna o ua opio la, “o oe, ina oe e ola loihi ana, e lilo mai ana oe i Eale no Kiladea ame Kaleloga, a i hiki mai ia manawa, ke noi ae nei wau i ke Akua a ae mai e lilo oe i mea aloha nui ia e kou mau kanaka e like me ko lakou aloha ana aku a hoohanohano ana aku i kou makuakane, a e hoopomaikai ia mai hoi oe me ka wahine i like aku kona u`i ka maikai ame ka hoopono e like me ka wahine au e kapa aku nei iaia, kou Makuahine!”

KA HOPENA

 

KAUNAWAHINE

O KE KULANAKAUHALE O TAREVIS.

 

KE ALOHA I KA MAKA PAHIKAUA.

 

MOKUNA VIII.

 

HUI NA PAHIKAUA, KA AULII ME KA PILIKUA.

 

Ma keia manawa ua ike koke iho ia o Rodolofo e komo loa aku ana oia iloko o ka pilikia, a e hiki ole ana iaia ke pale ae nona, a oiai ua lohe aku la oia i na leo uwe o na wahine opio mamuli o ka paa ana mai la i na koa, oia na ka manawa ana i hooholo iho ai e hana aku e like me ke ana i ana ia mai.

 

Alaila me ka eleu nui a me ka ikaika no hoi o ia lele ana ua kau PONO AKU LA OIA MALUNA O KE KINO O KE ALIIKOA, a kahea ae la me ka leo nui e hiki ole ai kekahi ke hoohewahewa ae i kona manao, me ka hoomau ana i ke ani ana i kaua pahikaua.

 

“E ku Akibihopa e! o ka Iede, ke Kaunawahine Tekela no ia, ka Hanai a Anola vona Iseneboga, ke hoohilahilaia ne e ko Mose lepoe o ke kulana haahaa loa, oiai oukou e ka poe e ku nana maka wale mai nei no.  E ke Kapena Tarevis, ke ku nana maka nei oe i kou komo aku iloko o ka pilikia, aole ane au kokua.  Tarevis!  Tarevis! aole anei hekanaka no ka Akibihopa maanei i keia manawa. E Tarevis!  Tarevis! Tarevis!”

 

I ka manawa pokole loa na puni ae la o Rodolofo ame ke Kaunawahine i no koa o ka Akibihopa, e pale ana hoi i na hoopoinoia mai.  Ua ike koke ke Kapena Tarevis i keia mea nolaila oia i haawi ai i kana lauoha i kona mau koa ke kumu o ka hoopuniia ana ae a paa hiki ole i ka enemi ke komo hoohaunaele aku.

 

Ma ka aoao o ke Kapena Winepoka ua kunana iho la oia me ka ike ole i kana mea e hana aku ai a mamua o kona hooholo ana i kona manao no kahi hana hou aku aia hoi ua puhee aku la i a koa o Belasetina ma na wahi like ole o ke kahua.

 

“Ua hoohihia mai oe ia makou i na koa o ka Akibihopa, ma keia kahea ana ma ka inoa o ka Akibihopa, no ka hoopakele ana i kana hanai ke Kaunawahine Tekela, a oiai ua maopupoloa ia`u ke Kaunawahine, a ina e wehe ae ka wahine opio i kona uhimaka, a ike au aole ia o ke Kaunawahine, alaila o ko poo ka uku hoopa`i o keia hana au.”  O keia na olelo a ke Kapena Tarevis, aka mamua o ke hiki ia Rodolofo ke pane aia hoi ua wehe ae la ke Kaunawahine i kona uhimaka a pau loa ae la no hoi ke kuhihewa.

 

“Owau io no keia, e like me kau e ike mai la, ke Kaunawahine Tekela, ke kaikamahine hanai a ka Akibihopa kou Haku.”  wahi a Tekela i pani aku ai me ka moakaka me ka pihoihoi no nae, a holopuni ae la ka ual nohea ma kona mau papalina ia manawa.

 

“He ku kiai maikai loa keia no ka koa o Mose-le nei no ka makaala ana i ko lakou Hakuwahine,” i hooho ae ai o Rodolofo me ka huhu piha maoli. “o ke kiai ana keia ame ke pale ana i na ino mai ka huakai ae a ke Kaunawahine Tekela e hele nei e ike i kona makua hanaupa i Kakela Turona.  He hana hoohilahila loa keia au i kou Hakuwahine.”

 

Aole e hiki i ke Kapena Tarevis ke pane aku ua kulou haaha@ iho la oia imua o ke Kaunawahine Tekela ame Rodolofo, e hoik@ ana kona hewa maopopo ma keia hookuukuu wale ana a me @ la i ka nana aku e kalaia mai oia wahi a kona noonoo a ua me@ la i ka nana aku e kalaia mai oia wahi a kona noonoo a ua m@ kaukau hoi e hooko i na hana apau e kauia aku ana maluna ona.

 

“ E kala mai ia`u e kuu Hakuwahine no keia mau mea, a @ makaukau wau e hana aku i no kauoha a kuu Hakuwahine e waih@ mai ai na`u e hana.”

 

“Ua nooikaika wau ma ko`u aoao e hike ai ia oe ke hoomaopopo mai, eia nae aole oe i nana ike mai no ia mea.” wahi a Rodolofo.

 

“ He mea oiaio ia, a kuu Haku, a owau maoli no ka mea i hewa bihopa, aku no keia manawa ua makaukau loa waa e hooka`ulua iho i ka huakai no ke Kakela Turona, ma ko`u lawe maoli ana ia oukou ma keia huakai maluna o na lio.”  O ka pane keia a @ Kapena nei me ka mau no o kona kolou ana.

 

“O ka`u wale no e noi aku ia oe oia kou hoomaopopo mai i @waapa a e kau aku makou a holo aku ma ka makou huakai.” wahi @ Rodolofo.

 

“O, ua lilo ka waa, a oiai he hapalua ae nei o ke aia i hale a he hapa koa a hiki aku i ke Kakela.  E hoomakaukau anei au i wah@ moe ai no oukou maanei a e hoike aku i ka Akibihopa.” wahi @ ke Kapena.

 

“Aole, e hele no makou.  He poe lio anei kou e lawa ai no ke Kaunawahine ame a`u ame ua kauwa a maua.”  wahi hou a Rodolofo.

 

“Ae, e kuu Haku.”

 

“A laila, e hoomakaukau mai oe i na io a hoomaka koke aku ka huakai me ka hoohaakalia ole hou aku.” wahi a ka Pukuniahi o ka la.

 

Mahope iho o ka haawi kunou ana o ke Kapena ua ualo aku ia oia no ka hoomakaukau ana i no mea i kauohaia.

 

“O, heaha la ka kakou hana kupono.” wahi a ke Kaunawahine me ke ano kunahihi maoli a maopopo ole iaia o ka mea e launa aku ai.

 

“Mai maka`u oe e Kuu Hakuwahine.” wahi a Rodolofo i hoa malielie aku ai.  “Iloko o ka manawa poloke e mamao loa aku ai kakou mai Tarevis aku a e hookokoko loa aku hoi i Turona.  O ka uumi ana i na ano ikiiki a malama i ke ano hookuoo i mea a loaa ole ai na hoohuoi oia ka kakou hana maikai a kupono i keia manawa.  oiai o ka`u mau kauoha apau ua hooko wale ia no me ka hoohuoi ole o ke Kapena, a ke manao nei wau i ka manawa kupono e makaukau mai ai ko kakou poe lio.”

 

Ke manao nei wau.” wahi a Rodolofo i hoomau aku ai.”  aole lakou nei i lohe i ke ano o keia huakai, a aole no lakau e lohe ana a hiki paha i ka auwina la o ka la apopo, nolaila ua nui no ka manawa i koe no ko kakou pakele mamua o ka hiki i ka Akibihopa ke alualu mai no ko kakou loaa iaia.  Mai maka`u iki oe, e like me ka`u i olelo hoopaa aku ia oe pela wau e hana ai a hiki i kou pakele ana iloko o ke Kakela Turona.”

 

Ma keia hoomalielie a ka Emepera, ua maha iki ae la ke Kaunawahine, a pane aku la me ka haawi ana aku i kona lima no ka lululima pumehana ana me ke kanaka ana i kipaku ai.

 

“E kala mai ai`u.” wahi ana i hawanawana aku ai. “no ka`u mau hana hoowahawaha ia oe i ka po nei.  O oe, O! oe ke koa wiwoole a kulana oiaio maoli.”

 

MOKUNA IX.

 

KE ALAHELE I KE KAKELA KOKIMA

 

Aole i liuliu ua hoea ae la ke Kapena Tarevis me eono koa kaulio i makaukau no ka huakai me na lako kaua a maluna o ko lakou mau lio e ukali ana mahope o ko lakou kapena. a e ka`iia ana he eha mau lio i lako me na pono kaulio.

 

“Ke manao nei au ua makaukau na mea apau a hookahi wale no mea i koe oia ko kakou hele aku,” wahi a ke Kapena.  “i`i hala aku nei i ka Lutanela o ke Kauna Belasetina no ka hoike ana i keia mau mea i kona Haku, nolaila ua manao wau o ko kakau haalele koke iho ia Burutika nei oia ka maikai loa, aka uae aole e lohe e ia ana na manao o ka Mea Hanohano ke Kauna Belasetina.  A ina no e lohe ana oia aole no e hiki ke hanaia kekuhi hand mamua o ka loheia aku o ka manao o ka Akibihopa.  Pehea la, ua makemake anei kuu Haku e hoouna aku i elele i ka Akibihopa no ka hoike aku i ka holomua o keia huakai a ke Kaunawahine?”

 

“Aohe ia he mea nui loa.” wahi a ka Emepera, “e lohe aku ana no ka Akibihopa iloko o ka manawa kupono, a ke manao nei au aia a hiki kakou i ke Kakela Kokima, alaila e hoouna aku i elele no ka hoike aku i ka holopono o keia huakai a ke Kaunawahine Tekela.”  Aole anei e hui aku kakou me no koa o ke Kauna Belasetina oiai kakou ma ke alahele?”

 

“Ke manao nei au aole kakou e hai me lakou.” wahi a ke Kapena.  Aohe mea hiki i keia poe koa ke hand no ka mea aole o lakou alakai, a ina no lakou e hoao mai ana, aohe he mea e hua mai ana mamua o ko lakou lilo i mea hoopuheeia, a ina no e hoea mai ana @ Kauna a namano ae e uhai mai ia kakou ke manao nei au e hiki @ ana kakou i ke Kakela Kokima mamua o ka loaa ana iaia ka manawa kupono e hana mai ai i kekahi hana no ke Kaunawahine.”

 

“Ina pela e hoomaka koke ka kakou huakai,” wahi a Rodolofo.  Alaila, kokua ae la oia i ke Kaunawahine no ke kau ana i kona lio a mahope o ka makaukau ana o na mea apau ua hoomaka aku la ka nee ana o ka huakai.

 

He eha poe kaulio mamua a he elua mahope o ke Kaunawahine ame Rodolofo ame na hoahele o laua a o ke Kapena Tarevis mamua loa o ka huakai. Aia o Rodolofo maluna o kona lio e hele pu ana me ke Kaunawahine – olaua wale no a o Konorado no hoi me Hilda mahope mai e lohe ole ia aku ai no ko laua leo nui me ke kamailio ana.

 

“Aole paha he mea i loheia mai nei mai ka Akibihopa mai.” i hoomaopopo hou aku ai ke Kaunawahine ia Rodolofo.

 

“Aole he maka`u ana i koe no ia mea mai keia manawa aku a hiki i ka auwina la o ka la apopo, ame ka hooikaika lakou e hana mai ai ke uhai mai mahope o kakou.”

 

“Aole anei lakou e imi mai, aole wale i ke ao, aka hele mai no i ka po?” wahi hou a ka ninau.

 

“Ina lakou e hana mai pela alaila he hana nui ia na lakou e hou hele ai i ka poeleele iloko o keia neneleau o ka nahele, a he mea hoohakalia no hoi ia i ko lakou hikiwawe ai i o kakou nei.”

 

“Alaila e hiki e ana no kakou i Kokima mamua o ko lakou hiki ae i Burutika mai Tarevis mai?”

 

“O ko kakou hala ana ma o o Kokima iloko o ka manawa kupono oia ko lakou halawai ole me kakou a komo wale kakou 1 Turona.  O ka`u nae e makemake loa nei e maopopo, oia ka waapa e laweheleia la e ka wai.  O ko`u kanao ke hiki aku kakou i ke Kakela Kokima i keia po, a ke ikeia kela waapa ma ia wahi, a ina he hiki maalahi ia kakou ke haalele i ke kakela i keia po no ka hoomau aku ma ka huakai maluna o ka waapa, alaila e pae palekana ana kakou me ke kanalua ole.”

 

Ma keia hoolala a ka Emepera ua luliluli iho la ke poo o ua Kaunawahine nei e hoike ana hoi i kona kanalua i ka hele i ka po.  “Ke kanalua ei`au i ka hiki ia kakou ke haalele ia Kokima i keia po.”  wahi ana.  “O kela kakela he wahi kiai makaala loa ia ia i ka po a i na manawa no apau.”

 

“Alaila, aohe he mea hiki ia kakou ke hana ian pela iho la ke kulana o ia kakela o ka Akibihopa aka aia a hiki kakou ilaila e kukulu ai au i ka`u papahana no na hana e hana aku ai no ke koena o ka huakai.  A hookahi mea i maopopo loa oia ke kau o na maka i na kokua e hiki mai ana.”

 

No ka inoino loa o ke alanui – o ke ano apuupuu, pela i hiki maalahi ole ai na kuka`i olelo ana, a hala he hookahi hora ma keia hele ana ua hiki aku la lakou i ke ke`a o ka muliwai, a ma ia wahi i loaa pono aku ai ia lakou na nanalaa kilakila o ke Kakela Kokima.

 

A oiai na ano molehulehu iho la, a e ano poeleele loa iho ana, o na puoa o ua kakela nei ka mea ike maopopo ia aku ka oioi ae iloko o na uluwehi o ka laau.  A hala hookahi hou hora o ka hoomau ana ua hiki aku la ua poe kaahele nei i ke Kakela.

(Aole i pau.)