Ka Nupepa Kuokoa, Volume XLII, Number 5, 29 January 1904 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

4

 

lunaleta o Kalipena, a e ninau aku ina paha ua haawi io ia ka telegarapa a Kaloke i hoao ai, a i hoounaia ai ma ka la a laua i alualu ai a komo iloko o ka huikau o na kaa, me ka nana ole ae i ka haina i loaa mua aku. Wahi a Wakekona iaia iho, he mea pomo e loaa aku ia Kaloke he hoike no keia mea iloko o ka wa kupono.

    He nui na palapala a Sir Hanale e huli ai ia la i ka hale, nolaila e lilo ana kona manawa malaila a he mea hoi ia nana e hoo kuenii hopo ole i kona manao e hele aku e hooko i kana mea i manao ai. O kana huakai hele oia kekahi huakai maikai a i piha hoi i na mea nana e hoala i kona noonoo. O ke alahele ana i hele aku ai ma ke kula no ia, a nona hoi ka mamao o kahi i hele ia o eha mile, a malaiia i komo aku ai oia mawaeha o kekahi mau hale nui elua, a o keia no hoi ko Kauka Matimea mau hale, a oia no hoi na hale kiekie ma ia wahi. Iaia i hiki aku ai i ka haleleta a ninau ia aku ka lunaleta, na pane mai la kela:

     “Ae na hoouna aku wau i na telegarama la a haawiia aku ia Baremoa e like me ke kauoha.”

     “Nawai i haawi aku iaia?” i ninau hou aku ai o Wakekona.

     “Na kuu keikei. E Kimo, ua haawi anei oe i kela telegarama o kela pule aku nei ia Baremoa?:” i huli aku ia ka makuakane a ninau i ke keiki.   

      “Ae, e papa.”

      “Ua haawi aku oe iloko o kona lima ponoi?” i ninau hou aku ai o Wakekona.

      “Well, i kuu hiki ana aku ua haiia mai aia oia i ka hale oluna, nolaila aole i hiki ia’u ke haawi aku iloko o kona lima, ua haawi aku no nae wau ia Mrs. Baremoa, a olelo mai la no hoi kela nana no e haawi aku i ke kane.”

     “Ua ike anei oe ia Mr. Baremoa?”

     “Pehea hoi e hiki ai ia’u ke ike aku iaia oiai aia hoi ia i ka hale oluna.”

     “Alaila aole oe i ike aku iaia, a pehea i maopopo ai ia oe aia oia i ka hale oluna?”

     “Well, he mea oiaia e ike ana no hoi kana wahine,” i hoohenehene aku ai ka lunaleta. “Aole anei i loaa aku no hoi ka telegarama iaia.” Ina aole alaila no Mrs. Baremoa ia hewa.”

     Ua hoopau ae la o Wakekona i kana ninaninau ana, aka hookahi mea i maopopo iaia, aole he mau hooia e hiki ai ke hoole ae aole i hala aku o Baremoa no Ladana. Ina paha na hele io no oia  - ina no paha a oia ke kanaka hope loa i ike ai ia Sir Kale a oia no ke kanaka i hoomakakin ai i kona haku hou iaia i huli hoi mai ai no Pelekane. Heaha iho la ka manao? He agena anei oia no kekahi mea okoa, a i ole ke hana nei oia no kona pono iho? Heaha kana kumu kupono o ka hookau ana i kana mau hana pono ole maluna o ka ohana o Basekavila? O keia mau mea apau he mau mea ia na Wakekona e noonoo nui ana ia manawa. Noonoo ae la oia no kela palapala ano ei i hoopipipiliia ai me na huaolelo okolo o ka nupepa. He hana anei ia na kekahi mea i manao e huna iho i kona ano? Hookahi mea a ka manao e kalele ai, a oia no hoi ka manao o Sir Hanale i hai mua ai, oia hoi ka hoomaka’nka’u ana i kekahi hooilina o Basekavila i hiki ai ia Baremoa ke noho hookano i ka nani o Basekavila Hale. Eia no nae oia manao aole he moakaka lea e hiki ai ke ike aku i keia upena e hoopuni nei i ka barona opio. (Sir Hanale). E hoomanaoia, na i a’e o Kaloke, o keia kekahi hihia pohihihi loa i loaa aku aiai mai kona manawa i hoomaka ai e huli i na mea e pili ana no ia hihia. Nolaila, ia Wakekona e huli hoi ana aiai oia ke pule nuia la e hoea koka mai o Kaloke a e hoopau koke ia na nunu ano ole, a e huai koke ia ae na pohihihi apau e pili ana i keia hana nui ana e huli nei i kona mole.

     Ia Wakekona e hoi nei me keia mau noonoo, ua hoopuiwaia oia i ke pahupahu mai o kekahi mau kapuai wawae mahope mai ona me kekahi leo e kahea mai ana iaia. Huli ae la oia me kona manao o Kauka Matimea keia e holo mai nei mahope ona, aka ike aku la oia he malihini keia kanaka iaia. O na malihini la, he kanaka uuku, olohe kona auwae, helehelena maalea, lauoho puhuluhulu, a auwae haiki, o kona mau makahiki aia mawaena o kanakolu ame kanaha, e aahu ana i ka lole ahina a he papale ie ma kona poo. E lewalewa ana ma kona poohiwi kekahi pahu tini o na mea liilii i hoiliiliia a ma kona lima e paa ana kekahi upena hopuhopu pulelehua.

     “E kala mai ana paha oe ia’u, e Kauka Wakekona,” wahi ana i pane mai ai me ka nui ana iho o kona hanu. “Maanei he poe wale no i noho mau i kauhale; nolaila aole o makou maa i ka hoolauna ana. Me he mea la ua lohe oe i ko’u inoa mai kou hoaloha Matimea mai. Owau o Sepeletona o ka Hale Meripi.

     “O kena upena ame kau tini na mea nana e hai mai ia’u ia oe, ina no aole oe i hai mai nei, no ka mea ua ike no wau he mea kakau moolelo o Sepeletona. Aka pehea la oe i ike ai ia’u a loaa ko’u inoa ia oe?”

     I o Matimea la wau, a nana i kuhikui mai nei ia’u ia oe mai ka pukaaniani mai o kona keena hana ia oe i hele ae nei. Oiai o ko kana alanui like no hoi keia nolaila ua hooholo iho wau e holo mai a loaa oe ia’u a hoolauna aku ia’u iho ia oe. Ke manaolana nei wau aole i loaa aku he mau haawina pilikia ia Sir Hanale ma kana huakai mai nei?”

     “He maikai no oia; me ka mahalo i kou ninau ana mai la.”

     “I’a ano kanalua makou apau mahope o ka make ana o Sir Kale aole paha e hoi mai ana ka hooilina o Basekavila a noho maanei. He mea maikai ole ka hoi ana mai o kekahi kanaka waiwai a noho iho maanei kahi hoi e hamama aku ana kona luakupapau, aka aole wau e hai aku ana o keia iho la ka manao o na mea apau e noho nei ma keia wahi. Me he mea la aole paha he maka’u o Sir Hanale i na mea pili uhane lapu?”

     “Ke manao nei wau aole ona noonoo ia mau mea.”

     “Ke ole wau e hoohewahewa na ike no oe i ka moolelo o ka ilio nana i hookau aku i ka weli maluna o ka ohana o Basekavila?”

     “I’a lohe wau no ia mea.”

     “He mea kupaianaha ka loaa like ana o na manao hillinai iloko o kela ame keia mea e noho nei maanei no keia moolelo. Ina oe e ninau aku ana i kekahi mea e wikiwiki mai ana i ka hooia ana mai, na ike io no lakon i ka oiaio a he holoholona nui io no ia e hele nei ma ke kula.” Ua hai aku o Sepeletona i keia mau olelo me ka mino aka ana iho, aka ua hiki ia Wakekona ke ike aku aia ke koikoi o keia moolelo ke lalapa la iloko o kona puuwai. “O keia ka moolelo i komo loa aku na noonoo ana iloko o Sir Kale, a ke kanalua ole nei wau oia ka mea nana i alako aku iaia i ka jopena i loaa aku ai iaia.”

     “Ma ke ano he?”

     “O kona mau lala ia manawa aole i maikai a e loohia mau ana  oia i ka haupuupu i na manawa apau, a no ia mea aole io no i nele ke komo ana aku o ka makau iloko ona i ka wa e hoea mai ai o kekahi ilio, a malia paha oia ka mea nana i hoano e aku i kona puuwai. Ke manao nei wau ua ike io aku no oia i kekahi mea i like aku me ka ilio i ka po ana i hele aku ai ma ke alahele Wiu. Ua loaa mai ia’u ka makau e kau aku ana kekahi haawina pono ole i ka olomana, oiai ua loaa mai no kekahi mau manao maikai iloko o’u nona, a ua ike hoi wauaia kona nawaliwali ma ka puuwai.”

     “Pehea oe i maopopo ai i keia?”

     “Na Kauka Matimea no i hai mai ia’u.”

     “Alaila, ke manao nei oe na kekahi ililo i alualu aku ia Sir Kale, a na make iho oia no kona makau mamuli oia mea?”

     “Heaha hoi kau i manao ai.”

     “Aole wau i hiki aku ia wahi.”

    “A pehea hoi o Kaloke Home, heaha kona manao?”

     I ka wa i lohe ai o Wakekona i keia ninau ua hoopuiwa koke ia kona noonoo, aka nae ua nana aku la oia maluna o kona hoa papaleo me ke kuoo e hiki ole ai iaia ke koho mai i ka mea oiaio e holopapa iloko o kona waihona noonoo.

     “He mea waiwai ole ia oe, e Kauka Wakekona, e huna iho i kekahi mea kou manao mai aole makou i ike i kou ano,” wahi a Sepeletona i pane aku ai. “O ka moolelo o ka olua mau hana makaikiu ua hiki mua mai ianei, a aole hoi i hiki ia oe ke hoole mai i kou ike i na mea apau e pili ana i keia mea ano nui. Ia Kauka Matimea i hai mai ai i kou inoa aole oia i huna iho i kou ano. O kou hiki ana mai ianei oia ka hoike nana e hoike mai na komo aku iloko o Kaloke ka iini no keia hihia, a ke makemake nei wau e lohe heaha la kona manao ma keia mea.”

     “Ke manao nei wau aole i hiki ia’u ke hai i ka haina oia ninau au.”

(Aole i pau.)

 

NUPEPA KUOKOA, IANUARI 29, 1904.

 

HAWAII AME KONA LAHUI.

 

     Eia kekahi mea i hoakaka ia mai ma ka Palapala Hemolele, no ka nalowale ana o ko na lahni ike ana ia Iehova, ke Akua oiaio, penei, “I ka wa i ike ai lakou i ke Akua , aole lakou i hoonani aku iaia i Akua, aole hoi i aloha aku, aka, ua lapuwale lakou, i ko lakou manao ana, a ua hoopouli ia ko lakou naau hawawa. I ko lakou hookamani ana, lilo lakou i poe naaupo, a hoololi aku lakou i ka nani o ke Akua make ole i kii e like me ke kanaka make, ame na mana, ame na holoholona wawae eha, ame na mea kolo. Nolaila hoi, kuu iho la ke Akua ia lakou ma na kuko hewa o ko lakou mau kaau, i paumaele, a hoomainoino i ko lakou mau kino iho, ia lakou. Haalele aku la lakou i ke Akua oiaio, no ka mea apaapaa, a hoomana aku la lakou, a malamala hoi i ka mea i hana ia, aole i ka mea nana i hana, oia ka mea hoomaikai mau loa ia. Amene.” Ua akaka ma keia mau pauku, no ka makemake o kanaka i ka hewa, a no ka makemake ole ia Iehova, ame kana mau kauoha nolaila i hookuu ia mai ai na kanaka e poho loa iloko o ka pouli. Nolaila no i poho ai ko Hawaii nei. Ina i helu ia na kanaka o na hanauna apau mai Wakea mai, ehia tausani lakou? He lehulehu loa; aka, pau lakou i ka make iloko o ka hewa a ua poho ilalo. Auwe ka lehulehu o ka poe i poho! E aho nae ko lakou hope i ko kakou, ke hoowahawaha kakou i ka malamalama i hoolaha ia mai.

 

MOKUNA IX.

 

NO KA LAPAAU ANA I KA POE MA’I.

 

     I ka wa kahiko, he nui no ka poe i kapaia he poe kahuna lapaau, a ua kulike ka hana ana a kekahi poe, a kulike ole kekahi. Aole he ano like loa ka oihana lapaau a na kahuna apau, ua kue no kekahi i kekahi. O kekahi kahuna, he kahuna haha paaoao, oia ka ma’i i maa mai ka wa kamalii mai a hiki i ka wa nui, a ina e kii ia keia kahuna i maa i keia hana, alaila ola no. A pela no hoi ke kahuna haha ma’i maoli, he mui wale aku no. A o ka oihana a ke kahuna kuni i ike pu i ka lapaau ana i ka ma’i, oia kekahi mea e ola ai ka ma’i kekahi wa.

     I ka wa e haha ai ke kahuna i ka ma’i, a ike oia i ke ano o kela mai, ina he ma’i ola paha, a i ole ia he ola ole paha, kanalua kona manao, nolaila, hana ia he wahi oihana e ae.

 

     Penei ke ano o ka hana ana, he puu iliili a uhi ia keia puu iliili me ka welu maluna, me ka olelo ana, a mahele ia keia puu i elua mehele me ka olelo ana, “eia ka puu o ka ma’i. A eia no ko’u puu ko ke kahuna, a ina i oi lo’u puu ko ke kahuna, a mau ko ka mea ma’i, alaila hana au, a ina e oi ko ka mea ma’I a mau ko ke kahuna, aole e ola ia’u.” A pau ia, pule iho a pau no hoi, ua ko ma ka aoao o ke kahuna, alaila, hana ke kahuna, a i ole o ka haalele no ia. A pau ia, ina ua ike ke kahuna he nui ka waiwai o ka mea mai, olelo iho la ia he kumupaa ko ia nei mai he aumakua, a ninau aku i ka poe nana ka ma’i, “aole o oukou akua moo, a i ole ia, mano paha?” ae mai la ka mea ma’i, ae, he akua ko’u he mano, ua make ia nei iaia, alaila hoomaka ka hana ana e lapaau ua kahuna nei. Eia ka hana ana, o ke kaumaha ana i na akua aumakua i oluolu mai ka mea ma’i. Penei ka hana, ina he mano ke akua, kena aku la i puaa hiwa, i moa hiwa, i malo puakai, ame kekahi mau mea e ae, a o keia mau mea apau, pau lakou i ke kiola ia iloko o ke kai i oluolu mai ke akua, aole nae he oluolu mai.

     A ina aole i ola i keia hana ana, waiho ia, ua pau ko ka aumakua a nana hou ke kahuna, aole pono i ka aumakua i ola i ka mea ma’i. Ua pau ka maunu i ka oia nei i ka anaana ia, e aho e kuni i make ka mea nana i anaana, ae, a kena aku ke kahuna i puaa kumulau okoa no ka puaa o ka ma’i, a okoa ni ko’u ka ke kahuna, a imiia keia mau mea apau a ke kahuna i ha’i mai ai, a makaukau ae keia mau mea, alaila, waiho a hiki i na ku, kukahi, kulua, kupau, o na po ia e kuni ai, kuni iho la ua po nei, a pau a noho iho la, a make ae la kekahi mea kokoke ma kahi o ua ma’i nei, o ke kuhi aku la no ia ka! e pakele hoi ua make ia la i ka hui o mea i kuni ia iho nei, i make  no ka ia ia la o mea, a lilo loa ia kanaka i pookoi. Ma ia hana ana, aole ola o ka ma’i make no, a pau ka waiwai ia ia la, aka , ma ka poe kahuna lapaau maoli, he ola no ka ma’i i kekahi wa. Pela no ka lapaau ana i ka poe ma’i ma ka wa kahiko, aole nae pela wale no; aka, i kekahi manawa, okoa ka hana i hanaia e ola ka ma’i.

     Penei i ka hoomaka ana o ke kahuna e lapaau i kekahi ma’i, ninan mua oia i ke ano o kona ma’i, a ina i maopopo ole ke ano o ka ma’i alaila, kauoha aku ke kahuna i ka ma’i. E olelo aku ana, e hoi au, alia au e hana aku ia oe, e moemoe au i keia po, a loaa ia’u ka moe maikai, alaia hana aku au ia oe.

     I ka lapaau ana, e kalua ia kekahi puaa, i oluolu mai ke akua, waki o ko Hawaii nei, he kumupaa, apau ia, hana hou ke kahuna, a ike oia i ke ano o ka ma’i kauoha hou hou oia e imi i i’a ula, a loaa ka i’a ula, eia na inoa o ia mau i’a, Alaihi, Aweoweo, Weke, Moano, Kumu, o keia mau i’a apaui imi ia e hana ia ma ka pule i ka wa e ai ai. Hoomaka ka ma’i e ai i ka i’a, lawe mua ke kahuna i ka maka o ka i’a a haawi aku i ka ma’i, a i ka hi’u o ka i’a, o ka nui aku o ka i’a, aola e ai ia, pela ke ano o ka lapaau ana a kekahi mau kahuna.

 

O NA MA’I ME NA LAAU KUPONO.

 

     He mea pono paha e hai ia aku na inoa o na mai, ame na laau kupono i ua mau mai nei ma ka lapaau ana a na a na kahuna kahiko o Hawaii nei, Eia malalo iho keia mau inoa:

 

      NA MAI.                                                                          NA LAAU KUPONO.

He Nahu,                                                                  Hinahina, kowali, papaa menena,

He Nalulu,                                                                Wai, lomilomi,

Hui,                                                                           Lomi, wai papaaa a pela aku,

Makole,                                                                     Puakala, Ilima, Muohala,

Puho,                                                                         Eleku, a ia mea aku ia mea aku,

Kohepopo, e like me ke Ake pau,                              Apu kalo,

Umauma naha,                                                           Ai, wai, lepo,

Haoa,                                                                          Poho, Lepo, Aipuulai,

Puupau,                                                                       Hili, Niu, Kiwelawela,

Alaaia,                                                                         Popolo, Muohaia, Opuumaia,

Kakio,                                                                          Molehei, Muohala, Auhuhu,

Maihehe,                                                                      Nena’, Ki, Popolo,

Pupule,                                                                         Awa, Kalomana, Laupalili,

Hai,                                                                              Popolo, kowali, hua kukui, paakai,

Poonaha,                                                                      Noni, Paakai, Kahea, Ilima,

Kuli,                                                                             Kuhuulu, Waipopolo,

Opea hee,                                                                     Pohakuwela, Lauaila,

Iewe paa,                                                                      Hookomo i ke koko,

Pehu,                                                                            Puholoholo,

Ohao,                                                                            Aole laau ola,

Hano,                                                                            Awa,

     He nui aku no paha na mai i koe, aka, aole i pau na inoa i ka loaa ia’u ame na laau kupono.

     Hookahi mai nui nae i koe, a he nui ke ano o ia mai, ame ke kumu i hiki mai ai ia mai, o Kumupaa. Ua hiki mai keia mai mamuli o ka hoohiki ino ana, wahi a na kahuna, ina e hoohiki, aole nae hooko i ka mea I hoohiki ai, alaila, e loaa auanei i ua mai nei. O kekahi mau akua o Hawaii nei, o ka pueo, ame kahi mau manu e ae, ame ka moo, a ina e nou aku ke kanaka i kekahi  o ua mau akua la, he oiaio e loaa auanei oia i keia mai. Aole nae ke kanaka i pili ole aku kona mau kupuna i ua mau akua nei. O na mea wale no i pili aku i keia mau akua ma ka hoomana ana.

     A o keia mau mea la, ua kapaia mai he kumupaa. Oia ka inoa kekahi mai kahiko o Hawaii nei. Ma keia mai, he nui na laau, aka, o ka awa ka laau i komo nui i keia mai, ame na mai i hoike ia maluna ae. O ka puaa, ame na ia ula, oia kekahi mau mea i manao nui ia no keia mai. Ina aole loaa ka puaa hiwa paa, ame na ia ula, aole e hana ke kahuna.

     O ke ano o keia poe kahuna kahiko o Hawaii nei, he puni waiwai a ke kanaka mai. Penei e maopopo ai. Hele aku ke kahuna a ka hale o ka mai, nana aku no i ka mai, a o ka olelo aku no ia, “Aole puaa hiwa?” “Aole ia ula?” “Ina loaa ole keia mau mea a’u i ninau aku nei la, o ka make no ia ou.” Nolaila, makau loa ka mea mai.

 

O KA UKU.

 

     He nui loa ka uka o keia mau kahuna. He puni puaa. Kalua mau i ka puaa i ka hana ana i ka mai hookahi, eha, a elima, a oi aku na puaa e kalua ia no ka mai hookahi. Wahi a keia poe kahuna, o ka puaa ka mea e oluolu ai ke kumupaa; ina aole puaa, aole ola olu.

     Ke kii ana o ka laau o keia mau mai i hai ia aku nei, aole pono ke hele a hana wai, hana lepo, a lawa i hope, halawai me kekahi kanaka, kahea ia mai mahope a kani ia e ka mana; hookahi pono, o ka malu o ke kii ana i ka laau.

     I ka hana ana i na laau lapaau, e pule mua ana i na akua ke hiko, La, Mahina, Hoku, Kane, Lono, Uli. He lapuwale nae ke @@ o na pule, a lapuwale loa na hana a ua mau kahuna la i hana @@ aka, eia ka mea kupaianaha, ua mau no ka hana ana a keia poe ko huna i ka lakou hana lapuwale a hiki i keia wa a kakou e noho @@ a lilo na kanaka he nui wale i ka make. Aloha ino! Ahea la e paa ai na hana lapuwale, ame na hana naaupo, ma keia pae moku.

 

MO KE KUPAPAU.

 

     I ka wa e kaa mai ana a kokoke e make, he oeoe mamua aku o ka make ana o kekahi mea. O na makamaka, ame na mea e ae o na mea nei, ina he poe na make, a ina he poe ola, a penei ka ka meamai e olelo ai. “Eia ae o mea ke kii mai nei ia’u e hele.” A pela ia e olelo pinepine ai a hiki i kona wa e make ai. Aia hoi o kona poe makamaka a pau, uwe no lakou, a ina he mea ia i aloha nui ia, unuhi lakou i kekahi mea no ua mea no ua mea make nei maiao, a ina he niho, a ina he lauoho.

     Eia no hoi, ina ua ike ia kekahi mea mai kona waha mai, ame kona maka, he mea keokeo, ame ka waimaka, he aloha ka ia no na kupapau nei i kona poe makamaka, a loihi no ka waiho ana o kekahi iluna, eha, elima, a nui aku no ko lakou aloha. Ina e wahi ke kupapau maloko o ka pahu, e wahi ai me ka ike ole mai o ka lehulehu. Penei ka hana ana:

     E hookulou iho i ke poo o ke kanaka a komo i ke kowa o na uha, a pupuu mai na uha e puka ana na kuli maluna o na poohiwi, a e hookomo ia i kaula ma ke ami o na kuli, a nakii a paa loa; he poepoe wale iho no ke kupapau ia manawa. Ina he mea na na kupapau nei, he kala paha, he lole paha, a he wahi mea e ae paha, ua kanu pu ia lakou me ia, a wahio pe me ia i ai, i ia, i kapa paha.

     I ka lawe ana e huna i ke kupapau, elua, a ekolu wale wale iho no mau kanaka, aole lehulehu. I ka po hoi keia hana, aole i ke ao. i ka eli ana i ka lua, he lua poepoe no, ano like me ka lua maia. O ka hohonu kupono o ka lua i ka humenamalo, he pahee ka inoa o ka lua; i ka eli ana, lawe ka lepo o ka lua i kahi e iloko o ka ahu, ipu, o ike ia ka meheu. Ina he hale hou, eli mai no ka poe nana ke kupapau mawaho mai, a komo iloko o ka hale, me ka ike ole o ka mea nona kela hale.

     Manao na kanaka ina e ike ia kahi i waiho ia, kii ia na iwi i mea makau: o ka io he mea kupalu mano. He mau lua huna kekahi, ma ka pali paha, ma ka papu no paha. Aia no kekahi lua ma Haleakala, o ka Lua o Kaawa ka inoa, mauka pono o Nuu ma Maui.

    Penei ka hana ana i ke kupapau mamua o ka hoolei ana iloko o ia lua. E like no me ka mea i wehewehe ia mamua, aka, i ka lawe ana o na mea nona ke kupapau, me na mea, ono a kela mea i make ai e lawe pu ai, oia hoi he puni.

     Ina he puaa ka puni, maia, ko paha, ame ia mea aku ia mea aku, lawe no e like me ka nui o kona puni, ahiki i ka lua, kahea aku ka mea nana kela kupapau i ke kupuma i make mua iloko o ua lua nei, “E mea e, eia mai kau keiki.” A ina e haule loa ke kupapau iloko o ka wai, a pio ke anuenue i ka wai, aole ona makamaka oloko o keia lua e pili ana iaia; aka, o ka mea makamaka, hopu mai no lakou i ke kino kupapau i hoolei ia aku, o ka ili mai la no ia ka pali, aole e haule iloko o ka wai.

     A mahope iho o ka nalo ana o ke kupapau, a hoi mai a ka hale, alaila uwe nui, a kanikau. Eia no hoi, ina e amo ia ana ua kupapau nei mamua, a o kona mea paha i aloha ai, loihi oia mahope, hoolohelohe no ke kupapau, aia no mamua ka mea ana i aloha ai, aole ka e hoololohe, a ina e hoololohe, eia ka olelo a ka mea nana ke kupapau. “Kainoa, paha he aloha kou ia’u, aole ka ina penei kau hana e haihaiia kou mau wahi iwi.”

     A pau ka olelo ana pela, a alualu mai ka ke kupapau, a o ka mama no ia a hiki i kahi e kanu ai. Haliilii ia ka lua a maikai, a waiho ia no hoi ke kupapau, o ke poo ma ka hikina, a o na wawae ma ke komohana. Eia ka hewa, o ka mea e wahio ia ke poo ma ke komohana, hele mai e lapu. A pau ia, eia ka olelo a ka mea nana ke kupapau, “Mai noho a hele i kauhale. Noho malie no i kou hale; he ai no, he ia no, he kapu no.”

     Eia no hoi kekahi. O kekahi poe, ike lakou, ua make ke kanaka, holehole ia na iwi a pau ka io, a hana no ka i pahi, a i makau, a i ole ia kau malie no i ka hale i noho no ke aloha, hele aku no e nana.

     A o kekahi kupapau, ua lawe ia ma ke kai e kiola ia ai, a ma ka wai paha, i akua mano ame ka moo lakou.

     Eia no hoi na lua huna e kauia ai na alii o Nuu, o Makaopalena, Kealaohia, o Puukilea, aiai ma ke alo o Haleakala ma Maui lakou a pau.

     O Hamohamo, ame Alalakeiki kekahi; a ma Alalakeiki kahiki make ai o na kanaka mai Hawaii mai i lawe mai i lawe mai i ke kupapau ilaila e huna ia ai, a pau kela poe kanaka no Hawaii mai i ke komo iloko o ka lua, hiki mai kekahi kanaka kamaaina, o Ninaiaawa ka iona, a pani i ka waha o ka lua i ka pohaku, malaila lakou i noho ai a make. Aole kanaka e ola ana i ike i kekahi o keia mau lua huna. Ua nalo wale ia lakou.

 

NO KA UHANE MAHOPE IHO O KA MAKE ANA O KE KINO.

 

     Aneane kulike ole ka manao o na kanaka kahiko o Hawaii nei no ka uhane mahope iho o ka make ana o ke kino. He ekolu wahi e noho ai ka uhane, wahi a lakou. Oia hoi, o ka lua o Pele, o Kilauea no ia, oloko o na wai, ame ka aina maloo.

     Ina i make ke kino o na alii, a o kona kanaka ponoi paha, ame na kahu Pele alaila, e hoi ko lakou uhane i ka lua o Pele, a e lawelawe mai na kahu Pele, ame kona poe kanaka, e like me ka noho ana ma keia ao. A o na kahu Pele, o lakou kona poe puuku, a he mau luna hoi maluna o na kanaka ai puupuu, a i ole ia, o kona poe kahu ponoi no. I ka noho ana o keia mau uhane malaila, ina makemake kekahi kanaka e ike ia lakou, penei e ike ai, e hele pu me ke kahu Pele, a na ke kahu Pele e kahea aku.

    Olelo mai kekahi poe. Ina i make kekahi kanaka a kanu ia kona kino ma ke kae o ka muliwai, a o ka Punawai, a o ka Auwai paha, alaila, e komo ae ka Uhane iloko o kekahi mea kino e ae , iloko o ka mano paha, a iloko o ka puhi paha, a i ka ula paha, ame na mea e ae o ka moana; aka, o na mea ma ka lihiwai, e komo ae lakou iloko o ka muliwai, a lilo i mau okuhekuhe nui, a i mau moo huelo, a ina ma ka aina maloo, alaila, e komo ae iloko o ka pueo, a me na mea ano like.

 

     O ka laau lapaau “Chambrlain’s Cough Remedy” ua hanaia ia no na ma’i kunu, anu, naeoa’iku, kunu kalea ame ka nalulu. Ua hooka’ulua keia laau iaia iho ma na aupuni malamalama apau o ka honua, nei ma o kana hooia kamahao ana i keia mau ma’i i oleloia ae la. Ua loaa mai na hoaiai like ole mai na kanaka mai i loohia i keia mau pilikia e hoike mai ana i na hana kamahao o keia laau; na ma’i kunu ikaika loa i hooiaia e keia laau; na anu ikaika loa i haawi pio aku malalo o ka ikaika o keia laau; a o na ma’i naeo’iku i hooiaia e keia laau e hoopale mau ana i ke ola makemae o ke kamaiki. O ka hana hoohana lauia o keia laau no na ma’i ikaika loa o ke kunu kalea ua hoike maopopo loa mai keia laau i kona ikaika a mana e @@

Kaawale i na hua ino e loaa mai @@ mamuli o keia mau ma’i. Ua makaheki loa ia keia laau e na makuahine me he milimili la na lakou oiai aole he @@ mea hoopilikia iloko a keia laau a ua hiki loa ke haawi ia keia laau i ke bebe uuku. He hoola mau keia laau i keia mau ano ma’i a he hoola me ka hikiwawe loa.

     E loa ano keia laau ma ka halehkuai laau o Benson, Smith Co., Ltd., no ke kumukuai kupono.