Ka Nupepa Kuokoa, Volume XLII, Number 5, 29 January 1904 — He Manao i Kakauia Mai. [ARTICLE]

He Manao i Kakauia Mai.

Mr. Lunahooponopono: No kekahi manawa loihi i hala ae nei ua laweia mai imua o ko'u mau hoolohe ana na olelo ame na meuiao kalahea akea a ke kahu o ka ekalesia o Manana, Ewa. Mr. Ezera, e pili ana no kekahi lala o ka ohana o Mr. ame Mrs. Kahoa o ia wahi hookahi no. He mau olelo kela a ua kahu nei, a i hoolaha akea pu ia aku e Mr. Meemano, he hoahanau no ka ekalesia i oleloia ae nei a he hoaloha oiaio no ke kahu, e olelo ana, o ua lala nei o ka ohana o Mr. Kahoa, ua lilo oia he makuahine a ua hana hoi i kekahi hana ku i ke karaima, a ma ka home noho o Mrs. Sarah Kalama, ma alanui Liliha, i kaomi a uhiuhi lau mamane ia ai ua mau hana nei. O keia mau olelo i hoopukaia ua kalahea akea ia mai ka awai mai o ka luakini o Manana, a ua lilo keia kumuhana i poo olelo no kekahi mau la Sabati.

Ma keia wahi ke ninau nei au ua maopopo anei i ke kahu o ka ekalesia o Manana ka oiaio ame ka oiaio ole o kana mea i kalahea akea ai? A ke ninau nei au ia Mr. Meemano, ua ike no anei oia i ka oiaio ame ka oiaio ole o kana mea i kaiahea akea ai? Ua hele anei laua a ike pono ua lilo io keia lala o ka ohana o Mr. Kahoa i makuahine a ua kaomi a hunakele ia keia mau hana ma ka home noho o Mrs. Kalama? Ua hiki anei ia laua ke hooia ma o na ike lawelawe lapaau ua ku i ka pololei ka laua mau lawe'na olelo? Ma ko'u noonoo akahele ana he mau hana ku i ka laipila keia mau hana a Ezera ame Meemano, a he mea pono e hoopiiia laua ma ke kanawai.

Ua hoakaka pono la mai i kou mea kakau nei ua lilo keia mau lawe'na olelo i- pauku iwi na keia mau mea e noke ai i ka holehole imua o ke akea, a no ia mea, ke ninau nei au, o ka hana anei keia a na mea e hoolaha ana i ka olelo a ke Akua e hana ai? No ekolu la Sabati i hala ae nei i noonoo ia ai ka oiaio ame ka oiaio ole o keia mau lawe'na olelo imua o ka aha luna o ka ekalesia, ina paha ua olelo io o Meemano ma pela. Ua hoole like laua. Ma ka ia Sabati i hala ae nei ua hoounaia aku a ua heluheluia imua o ka aha he palapala na Mrs. E. S. Timoteo e olelo ana, na Meemano ponoi no i kamailio pololei aku iaia maluna o ke kaaahi, a me keia mau olelo o loko o ka palapala ua hoole hou no o Meemano.

A iloko o keia mau hana hookolokolo imua o ka aha luna ua oleloia ua huli ka hapanui o na hoahanau, a o lakou no apau, mahope o kahu ame Meemano no ka makau ka o pau nui I ka make ma o na akua aumakua la. Ka poe manao kapekepeke a lapuwale! I keia la Sabati iho e hoomauia aku ai o keia mau hana imua o ka aha luna, O kau mea kakau no, MANANA.