Ka Nupepa Kuokoa, Volume XLIII, Number 14, 7 April 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA, APERILA 7, 1905.

 

NA WARENA

OPIO

ILOKO O KA ENAENA O KA

LUKUWALE.

He Moolelo o ka Lukuwale Ana ia o na Pelekane ma Inia.

 

MOKUNA I.

KA NOHONA O NA KOA PELEKANE.

 

            "E pono kakou e hiki aku ilaila i ka hora ehiku o ke kakahiaka. Ua hooponopono aku nei mana i ka wa o ka hana i ka hora ehiku i loaa ai he manawa kupono i na lede opio nei no ko laua ainakakahiaka mamua o ka hele ana. I ka hapaha hora eono wau e hiki mai ai ianei e kau pu mai ai me a'u a aohe no hoi ia he mea hookaumaha ia'u."

            A i ka hala ana aku o na malihini oia no ka manawa i komo mai ai na keiki iloko o ka lumiaina a nonoho iho la ka ohana iluna o na noho ma ke pakaukau-aina no ko lakou ainakakahiaka. I ka wa wela nui o ka aina oiai he aina wela nui o Inia aole he ono ka ai ana o na kanaka o ia wahi aka i ka wa e hala ae ai ka Makalii a nee aku ka manawa i ka haulelau a hooilo hoi alaila oia ka wa e ikaika ai ka ono ai me kolaila poe, a o ia ano haawina ka i kau aku maluna o na Pelekane ame ka poe no apau i noho loihi ole aku ilaila.

            He mea maa mau no hoi i ko Inia poe o ke ala kakahiaka nui loa a e hoi ahiahi okoa ana e hiamoe, a i ke kakahiaka ana ae i kahi la ae na makaukau e iho la ka ainakakahiaka o na lede opio o ka hora eono me ka hapa a ua ala mua aku hoi o Kete ame Rose mamua o ka makaukau ana o ko laua paina; a oia no hoi ka wa i hoea mai ai o Kapena Danalope maluna o kona kaa i kupono no elua ohua, a aia hoi ke kaa nui o Mekia Warena ua makaukau, a o ko lakou hoomaka iho la no ia no ka hele.

            Ma ke ala i hui nui aku ai lakou me na hoaloha o kahi like ame na wahi e ae i kamaaina oiai ua puka pu mai no lakou no ka hele ana i kahi o ka lealea i kau nui ia e lakou. O ka aina e like me Sanadinafa nei he aina papu like ia me ka palahalaha nui e mahelehele ia ana nae e na muliwai o Ganegisa ame Jumuna. E like me na aina lo'ikalo a lo'ilaiki pela ka mahelehele ana o ka aina i maheleheleia ai ma na lo'i e ulu ana hoi na meaulu a he nani maoli i ka nana ana, a na ia mea i alai ae i ka holopono o ka paani houhou puaa oiai ka aina i paa ia mau lo'i ame ka auwai liilii e momoe ana mawaho ae o na auwai nunui kahi e kahe mai ai ka wai noloko o na lo'i.

            O na halenoho aole o lakou pupupu i kahi hookahi e like me ka mau aka he kakaawale ma na wahi like ole, eia nae, aole no i nele ke ku pupupu ana o na halenoho ma kahi nae e uluia ana e na laau loloa. E ike pu ia aku ana na kane e mahi ana e like no me na wahine ka hooikaika i ka mahiai. A ma keia huakai i halawai aku ai na opio me keia mau hiohiona o ka aina a hui pu hoi me na makamaka ame na hoaloha i nele ole hoi i ka pa-alohaia mai.

            "Ae, e na lede eia olua ma ka huakai no ka ike ana i ka paani houhou puaa," wahi a ke Konela. "A aole hoi au ihe e ka Mekia. Ua manao anei oe e waiho aku ia hana na na'Opio Warena.'"

            "Aia ihea ka pu-a puaa ahiu, e Mrs. Renewika?" i ninau aku ai o Kete i ka wahine a ke konela oiai o Konela Renewika kona inoa.

            "He puaa mai anei kela a lohe mai i ke a'o. Nui kela e mo-ku mai la," wahi a Mrs. Renewika i pane aku ai ia Kete no kana ninau, me ke kuhikuhi pu ana aku o kona lima i kekahi wahi o ka aina. "Ke hoomaopopo la anei oe i kela wahi e ulu nui mai la ka mauu loloa a o ia mea e pouliuli pohukuhuku mai la – e pohukuhuku nui mai la oia ua pu-a puaa ahiu nei, a i keia po iho la a ao wale ae la no ka makai mau ia ana o lakou, a i ka po e nakuhele ai keia poe puaa e hanaino ana i na mala a o ka hoi ana aku la no ia i ko lakou wahi e momoe ai i ke ao. Manao anei oe e Mekia Warena eia kakou ma ke kahua maikai e ike moakakaia aku ai ke kaua o keia la?"

            "Ke manao nei wau ina e pii oukou e kela puu, alaila ua kau aku oukou ma kahi malaelae o ka aina e ike moakakaia ai na hana o keia la, a o kekahi no hoi, mamao aku oukou mai kahi e holo ai na puaa oiai ua manao wau aole lakou e holo ana i kahi kiekie, aka, iloko o ka ululaau ame na poopoo, ko lakou wahi e holo ai."

            O na olelo keia a Mekia Warena a o ka huli aku la no ia o ko lakou mau kaa no ka puu me ka piha hauoli o na opio Warena mai na keikikane a na kaikamahine ame ka poe no apau e ka'i pu ana Aia na kanaka Pelekane maluna o ko lakou mau lio ua makaukau no ka hana o ka la a o na kamaaina ponoi iho o ka aina oia hoi na Inia ua kukuluia lakou ma ko lakou mau wahi no ka pa-ku ana i ole e holo wale na puaa i kahi o lakou i makemake ole ia ai e holo aka e holo ai lakou no ka ululaau a pakele na mahinaai a na kamaaina i hoopilikia wale ia e keia ano holoholona.

            O ka uhai puaa ahiu ana me na ihe oia kekahi o na lealea me ke akamai kaulio ke kanaka e pono ai, a i ka wa o ka hana, he mea maopopo e makaukau ke kanaka kaulio me kana ihe i lawa ka ike me ia no ia hana, a i ka wa o ka hana e manao mua ia aku ana e akamai ka holo ana o ka lio i pakele ai mai ke kepa ana mai o na puaa @nui i loloa na niho oiai he mama loa lakou i ka uhai ana i ka uhai ke hoohaehaeia lakou a pii ka huhu.

            Me ka makaukau nui ma ka aoao o ka poe uahi puaa ua hoomaka aku la na Pelekane i ka uahi ana – o Kapena Danalope ame Kopala Sikina ame ko lakou Kauka, oia hoi, ke kauka o ko lakou pualikoa ame elua koa – o lakou ma ko lakou mahele a no kekahi manawa ka holo like ana aka mahope mai i oi loa aku ai o Kapena Danalope ame Sikina mamua o ko laua mau hoa. Aia kekahi poe e uhai ana i na puaa wahine a o kekahi poe e uhai ana i na puaa keiki a ua lilo nui maoli no ka uhai houhou puaa me na ihe i paani ano uni no ia la a aole no hoi i liuliu loa o ka noke ana o ka nalo aku la no ia iloko o ka ululaau, a he hoopakele ana hoi ia i ka ma-la a mahinaai o na kamaaina.

            Ia Kapena Danalope ame Kopala Sikina i oioi aku ai mamua na puka mai la kekahi puaa kane nui me kona mau niho loloa a ua piena maoli mamuli o okeia kaiehuia ana, a hoomaka mai la ka puaa e uhai ia Kopala Sikina a mamuli o ke ano maa ole a makaukau o ka lie ua loaa mai la kona lio i ka niho o koa puaa ma ka o-pi a hina ana ka lio ilalo a oia no hoi ka mea nana i kiola aku ia Sikina he mau kapuai mamao loa aku mai kahi o kona lio e waiho eha ana.

            Alaila huli ae la ka puaa a mokio aku la i kahi e waiho ana o Kopala Sikina a oia no hoi ka manawa a Kapena Danalope i uhai aku ai no ka hoopakele ana i kona hoa, a e aneane aku ana ka puaa e haehae ae ia Sikina me kona mau niho loloa oia no ka wa i loaa aku ai ua puaa nei i ka ihe a ka Pelekane Danalope a ku halahu aku la ne nae, a na ia mea i haalele aku ai ka puaa ia Sikina a uhai mai la mahope o Kapena Danalope, a oiai he lio kona i a'oia no ka huli pokole ana ua hooko aku la ka lio a iloko o ka manawa pokole ua mamao loa aku la o Kapena Danalope mai ka puaa aku a no ka ike ana paha o ka puaa aole e loaa ana kona enemi iaia ua huli ae la oia a holo aku la no ka ululaau aka mamau o kona nalowale ana ua loaa pono aku la oia i ka ihe a ke Kauka Pelekane a waiho make ana ua kupua nei, a kaa ae la no hoi ka hanohano o ka la iaia ame Kapena Danalope oiai iaia i kahe mua ai ke koko o ka puaa ahiu; a e like iho la no me ka uahi ana o keia mau keonimana pela no ia haawina like i na mea e ae.

            "Me he la aohe keia he puaa," wahi a Kete i hooho ae ai, he loloa lo maoli no na niho a he ku maoli i ka weliweli."

            "Makemake anei oe i ka ili o ka puaa nau e Miss Warena?" wahi a Kapena Danalope i ui aku ai i ka wahine opio, oiai wahi ana ua lokahi like ae oia me ke kauka e mahele i ka ka puaa mawaena o laua, oia hoi, ia Kapena Danalope ka ili a i ke Kauka ka i'o.

            "Me ka mahalo," wahi a Kete, aiaila hooma@ iho la ka lapaau ana i ka poe i eha a haule mai ko lakou mau lio aku, a maluna hoi olaila i minoaka mau ai o Konela Renewika ame Mekia Warena no ko lakou ano makaukau ole maloko o keia ano paani; a aole no hoi i liuliu loa ua hulihoi aku la na mea apau no ko lakou mau wahi iho me na manao hauoli no ka paani o ia la.

 

MOKUNA II.

NA UNENE O KA LUKUWALE.

 

            He hebedoma mahope iho o ka paani houhou puaa i hoea mai ai o ka meahou hoolele hauli, e olelo ana i ka puka ana o kekahi kanaka Inia Sipoe Sipoe, kekahi inoa lahui o na Inia – ano like me ko Hawaii nei – ko Hawaii poe, ko Maui poe, a ko Kauai poe) ma ka inoa o Managula Panade he koa hoi iloko o ka pualikoa Inia 34 o kahi hoomoana o Balakapoa he wahi aole i mamao loa mai ke kulanakauhale mai o Kalakata, a mailaila aku i puka aku ai oia a hoolaha hooulu ae la i ka manao kipi iwaena o lakou Inia iho no ke kipi ana a hoala haunaele i na Pelekane a ma ka la 29 no hoi o Mei i hanaia ai ia hooulu ino a keia kanaka.

            Ma ia mea aole oia wale kana hana i hana ai aka ua ki pu aku oia i kekahi aliikoa Europa, he aliikoa ma ke kulana kakiana-mekia o ka pualikoa a pau pu hoi kekahi aliikoa iloko o ia haawina like ma ka hou ia ana i ka pahi. Ua hoeueu ikaika loa aku la oia i kona mau hoa Inia e komo kipi a e hoolako ia lakou iho me na mea kaua, a oiai ua hooleia no kona makemake ame kana noi e na hoa Inia ona eia nae, aole he hookahi o na koa Inia i aa e hopu aku iaia no ka hoopaahao ana ma ke ano kipi.

            I ka hoomaopopo ana ia Generala Hease, kekahi o na aliikoa Pelekane ua hiki koke aku la oia ma ke kahua paikau o kahi hoomoana me kana keiki ponoi ame kekahi o na mekia ona, oia o Mekia Rosa, kahi ona i ike ai i ke komo kokua ole o na hoa Inia o ke kanaka kipi a kokua i kana mau hana hoouluulu, a malaila no hoi i kiia ai ua kupuino hoala kipi nei me ka pu a kau aku na palapu maluna o kona kino aole nae i make.

            He elua la mahope koke iho i kipakuia ai ua Panade hoonuinui ino nei mai kona pili ana i ka oihana koa ma Balakapoe ama ka la 3 o Aperila i li ai o Panade iaia iho, me ke kau pu ana aku o ia haawina weliweli maluna o kekahi aliikoa Inia i hoole ai i ke kauoha no ka hoopakele ana i ka poe i pepehi wale ia e Panade, oiai oia no hoi kekahi i hoalaala kipi ae iwaena o na hoa Inia e ala ae a e ku-e aku i ke Aupuni Enelani.

            "Heaha kou manao maluna o keia meahou hoolele hauli e papa?" wahi a Dike i ninau aku ai i ka makuakane.

            "Ke manao nei au o ka liia ana o ke ola o na mea hoao hoala kipi oia no ka mea nana i hoouluku ae i ka noonoo o na Inia, a o ka hoopauia ana o ka pualikoa 19 oia kekahi mea nana e hoala ino loa i ka noonoo ana o na Inia, a o ka mea e puka mai ana mai ia mea mai e ike ana no kakou i ka manawa e hiki mai ana."

            Aole io no i hala ka hooaiai o Mekia Warena ana i pane ai i ka ninau o kana keiki Dike, oiai, mahope koke iho no i ulu mai ai na hoohalahala like ole apau mai na kahua hoomoana o na koa Inia apau a mai na kalana mai no hoi iwaena iho o lakou Inia no na hana lawe ola i kau aku maluna o keia Panade kipi ame kekahi mau aliikoa Inia. A hala o Aperila ua pii ikaika ae la ka manao kipi iwaena o na Sipoe ame kekahi mau ano lahui Inia e iho ma ka hoouna leta ana a mau elele mai kahi wahi aku a kahi wahi aku, a iloko o kekahi mau kulanakauhale o na Inia ua haunaele ae e like me ko Lukanao maloko o na kahua hoomoana oiai ua hoopauia ae ke ku ana o kekahi mau pualikoa Inia.

            Mamuli o keia hoouluulu kipi ua lilo ia i mea hoopihoihoi nui i na ohana Pelekane i loaa ole kana oihana, -- aohe mau keiki a wahine paha, aole he ikaika loa a kaumaha loa o kona noonoo maluna o na haawina weliweli e ili mai ana, a oiai he kanaka oia i maopopo mua no ka make a ua makaukau no ke komo hakaka ana aku ma kahi e kaheaia mai ana no ka hana a aohe hoi mea nana e hookaumaha loa ia ano poe.

            Aole pela na kane Pelekane me na ohana, no ka mea, o ke kane he wahine kana ame na keiki e malama ai a e hoopakele ai mai na haawina weliweli e ulu ae ana e like me keia hoouluulu kipi e pii ikaika nei iwaena o na lahui Inia kue i na Pelekane, oia no ka nui ino loa o na Inia ke hookukuia me na Pelekane, e hiki ai no ke oleloia – i hookahi Pelekane he kaukani ia o na Inia.

            Ua holopapa aku keia haawina weliweli iloko o ka aina holookoa, iwaena no nae o na Pelekane ka maka'u no ka mea he uuku wale no lakou a he kakaawale loa iloko o Inia holookoa a he mau mile hoi ke kaawale o na ohana Pelekane mai kahi kauhale aku a kahi kauhale, a e like me ia haawina kunahihi i kau aku ai i na kauhale apau o Inia pela i loaa aku ai ia haawina like i ke kauhale o @nadinafa kahi o Warena ohana e noho ana. Aole no nae i haule na aha hoohauoli i ka malamaia iwaena iho o na ohana Pelekane, a i kekahi po ua malama ae o Mekia Warena he aha hoohauoli kahi i akoakoa mai ai kekahi mau aliikoa Pelekane me ka lakou mau wahine ame na aliikoa mare ole no hoi, oia hoi na kanaka opio, a hooluana iho la, e hoolohe ana i ka hookani piano palua ana o na Lede Warena opio Kete ame kona hoahanau Rose, a e hele palanehe ana no hoi na kuene Inia me na pa-kilima ame na meaono ame na mea hu'ihu'i e ae i kupono no na aha hoohauoli a ia manawa o ka olioli aia hoi, ua loaa ae la kekahi mea hoopuiwa ia lakou iwaena no nae o ka poe i hoomaopopo ma ke komo ana mai o okekahi Inia Sipoe.

            "Heaha ia?" wahi a Mekia Warena i ninau aku ai i kekahi o na aliikoa e noho ana ma ka lanai me ka mekia ame kekahi poe e iho a he aliikoa no hoi oia ma ke kulana konela.

            "He leta mai nei na ke Konela Sahiba," wahi a ka pane.

            O ke konela iaia ka leta i haawiia mai ai e noho kokoke ana hoi me Warena ua ku ae la no oka hele ana, a oia no hoi ka manawa a Mekia Warena i ka-ua aku ai:

            "Alia oe e hele, -- e, e lawe mai i ihoiho kukui," wahi ana i kahea aku ai i kekahi kanaka Inia lawelawe ona.

            A i ka manawa i hoea mai ai o ke kukui, a malamalama ae la laua oia no ka wa i wehe ae ai ke Konela i ka leta i laweia mai nana, a aole no hoi i u iho ua hooho ae la ke konela me ka leo ku i ke kunahihi a ano ha'uha'u hoi.

            "Heaha ka pilikia e ke konela?" i ninau aku ai o Mekia Warena.

            "Ua hooulu kipi ae na koa Inia o Miruta e pepehi wale ana i na kane ame na wahine Pelekane pau pu me na kamalii e loaa aku ana ia lakou a eia lakou ke ma-ki mai nei i Delahe."

            A komo pu aku la no hoi o Mekia Warena ma ia haawina kaumaha like a haka-nu like iho la na aliikoa no kekahi mau minute no ka nui io o ka weliweli o ka meahou, a he haka-nu hoi ko laua, i na leo olioli o na hoa e hauwalaau ana me ke kani o na pila. A no ka hapalua hora paha ko laua holoholo ana ma ka lanai me ka noonoo nui ana ame ke kuka nui ana oiai ua manaoio loa laua i ka oiaio o keai meahou hookunahihi noonoo aoiai he leta ia i loaa mai ai ma ka oihana koa i hoounaia mai ai e kakiana o Miruta.

            Ua noonoo like iho la laua i ka hana kupono e hana ai ia po, a ma ka hooholo ana e huna laua i ka meahou hoohikilele noonoo a aole hoi e hoike aku i na lede ame na opio ame na aliikoa e olioli ana, a ua hooko io aku no laua ia mea a hiki wale i ka hookuu ana he hoohaunaele ole ana ia i ka olioli o ke anaina opio ma o keia meahou weliweli.

            Ua hooholo pu iho la na aliikoa e hoike aku i keia nuhou i ke kakahiaka ae o kahi la ia lakou apau i loaa ai ka makaukau e liuliu ai mamua o ka hiki ana mai o oka poino, a ua hooholo pu iho laua i ka hoakoakoa ae i na aliikoa apau i kela po i ka wa e hookuu ae ai ka aha hoohauoli no ke kukakuka ana.

            Alaila ua komo hou aku la laua iloko o oka olioli ana me ka poe opio e hui kamailio ana, ame na olioli ana o ka aha i @ ia ma'i manawa mahope iho a hiki wale i ka hookuu ana o ka aha i ka hora umi o ia po, a o ia no hoi ka hookuu ana i ka aha hoohauoli hope loa i malmaia no lakou ma ia wahi.

            I ke ao ana ae i kahi la ae oia no ka wa i hauwawa ae ai ka mea hou ano nui a weliweli nui wale apuni ka aina, a o ka poe koa o na kahua hoomoana ku mamao aku mai na kauhale aku, o lakou ka poe ano ahona iki aka aole nae e maalo ae mai ka lukuwale ana a na Inia. O kekahi poe ua loaa aku no i ka poe kipi a pau lakou i ka ppehi hoomainoinoia me ka nana ole ae ihea la e loaa aku ai, a o ka mea e loaa aku ana ma ke alanui pau pu no lakou iloko o ka haawina o ka make, ina no e loaa aku ana i na koa Inia a i ole i na kupa Inia oihana koa ole i komo ka inaina, e pau ana no na haole o Europa i ka lukuia; eia nae, aole no i nele ka pakele o kekahi poe ma ka mahuka ana a holo no Miruta iloko o oke kahua hoomoana o na koa Pelekane.

(Aole i pau.)

 

MAKAIKIU

WETE DETONA

Ke Ahi Lalapa Pio ole i na Nihiliti

Ke Kanaka Amerika Koa lua ole

 

MOKUNA LV.

"E HONI MAI LA'U E LIKE ME KAU I MANAO AI."

 

            I ka hora eono o ke ahiahi, aia kekahi kaoo nui e hele ana i keia hale a kaua i ike ae nei i kona mau mea nani. O na kane o na wahine, a ma ko lakou mau aahu ua hiki ke kohoia aku he po hanohano lakou no Nu Ioka.

            Ma ka lakou mau olelo ana he mea maopopo loa aia ko lakou mau manaolana e loaa ana ia lakou he manawa maikai loa e hoohala ai i keia ahiahi Pokiulai, a ke kuko la kekahi poe opiokane e loaa ko lakou mau hoa e hulahula pu ai.

            E huli ae kaua a nana aku iloko o keia hale a kaua i ike ae nei i kona mau mea hoowehiwehi i ike ai kaua i na mea e hanaia ana.

            Ma kekahi lumi o ka hale oluna e noho ana kekahi opiowahine u'i iluna o kekahi nohopulu. Ua aahuia ua wahine la me kekahi lole silika a'ia'i, e anapa ana hoi ke gula ame ke daimana ma kona mau manamanalima, pela no hoi ma kona a-i a hiki loa aku iloko o kona mau owili lauoho. Ma kona aoao e ku ana kekahi kaikamahine opio, a e hookau aku ana i kekahi po-ke pua violeta maluna o ka umauma o ka opiowahine.

            Aole i liuliu iho mahope o ka pau ana o keia hookau pua ana, aia hoi kikeke ana kekahi mea mawaho o ka puka, a i ka wehe ana aku o ke kaikamahine, e ku ana kekahi o na kanaka kiai puka a hookomo mai la oia i kekahi pa iloko o ka lumi. Iluna o ua pa la e waiho ana kekahi wa-hi leta, a mawaho o ua wa-hi leta la e kau ana kekahi mau huaolelo e maopoop ai i ka opiowahine nana ua leta la, a he telegarapa hoi i hoounaia mai nana.

            Wehe koke ae la oia i ka leta, a o keia na huaolelo ana i heluhelu iho ai:

            "I kuu Kaunawahine aloha: -- Eia wai mawaho o ke awa. E hiki aku ana wau ilaila iloko o hookahi hora. Me na manaolana e hoopomaikaiia mai olua e na lani. Owau no kau, "WETE."

            Me ka naau i piha i ka hauoli, ua ku koke ae la ua opiowahine la iluna a kauoha koke aku la i ke kaikamahine lawelawe e kii koke aku i ka hakukane.

            "Heaha keia, e kuu Vera aloha," wahi a kekahi leo i pane mai ai a komo ana kekahi opiokane kino loihi:

            "E kuu Ivana aloha, e heluhelu iho i keia."

            "Auwe, o ko kaua hoaloha keia. Hauoli maoli no wau ke ike aku iaia," wahi a Ivana.

            He hapalua hora mahope mai, imua o oke alo o ka Bihopa Nui o ka hoomana Katolika Roma, a ma kela kihi hoi nona ka hoowehiwehi a kaua i ike ae nei, aia hoi e ku ana ua mau opio nei a kaua i ike mua ae nei, a e huli mai ana imua o kekahi anaina nui.

            He nani ko laua mau kulana ke nana aku, huipu hoi me ko laua mau kinohinohi, he pali hoi ke kua mahina ke alo i ua mau opio nei.

            No Vera i keia po ua hoolei pau mai la kona nani piha, he mea hoi i ike ole ia mamua, a he nani hoi e hiki ole ai ke kupaa aku kekahi mea, no ka mea ua:

"Kilakila Waialeale.

Kuahiwi o ka aina."

            A i ka mea kakau e pupue ana ma kekahi kihi a e hoolei ana i kona lena ike ma o a maanei, aole i nele ka halawai ana aku me na onohi o na opiokane i naue ae ma ua po la, e lou aku ana a lou mai me na huaolelo e hooho ana, he:

"Uwila makeneti.

Hoonioni ana i ke alahao,"

Ua Kaunawahine Vera Radolinisiki nei a kaua.

            I ka wa i pau ae ai na hana e ae a ka Bihopa, a iaia i puana ae ai, "Ke kukala akea aku nei wau ua mare pono ia o Ivana Horawiki me Vera Radolinisiki, a he kane a wahine laua i keia manawa," aia hoi oloio ana kekahi opiokane kulana keonimana iloko o ua lumi la, me kona mau lima e ope'a ana mamua o kona alo, ame kona mau maka hauoli e kau pono ana imua o na mea i mareia.

            I ka halawai ana o ko Vera kiionohi me ka opio, me he uwila la i anapa ae, aia hoi ua pii pa-umi ia ae la ka u'i o ua kaunawahine la, a he mea hoi ia na ke anaina i ne-i ae ai me na huaolelo mahalo i ko Vera u'i, ame ke pahaohao pu i keia loli ano e koke ana i ka manawa a ka opiokane i komo ai.

            I ka pau ana o na hana a ka Bihopa, a nee aku ka poe ike i na opio no laua ia po hanohano, aia hoi iwaena o ka poe e nee ana imua, o ka opiokane kekahi a kaua i ike ae nei.

            "E kuu hoaloha, hauoli maoli wau i kou hiki ana mai, a i ka manawa hoi au e ikemaka ai i ka hopena o kau mau hana aloha ia'u," wahi a Vera i puana ae ai i ka wa a ka opio i ku aku ai imua o kona alo, a haawi aku i kona lima akau o ke aloha.

            "E ke kauunawahine, e ae mai ia'u e hoomaikai aku ia oe noo ookeia hui ana ame ka hookoia ana o ko olua iini, a e hoopomaikai mai na lani ia olua ma keia mua aku, oia ka pule a kau kauwa nei," wahi a ka opio i pane aku ai, me kona haawi ana aku i kona lima ia Ivana Horawiki.

            "E hoomanao, e kuu hoaloha," wahi a Vera i kahamaha ae ai.

            "Heaha ia, e kuu kaunawahine," i huli ae ai o Wete Detona.

            "E honi mai ia'u e like me kau i manao ai," i pane mai ai o Vera, me ka pii pu ana ae o kona ula nohea, ame na mino aka e popohe ana maluna o kona papalina.

            "He mau ku-e ana anei kekahi?" i huli ae ai o Wete a ninau aku ia Ivana.

            "Aole, e kuu hoaloha," a hene iho la ka Ivana aka.

            A ia wa aia ua Wete nei a kaua ke muki la i na papalina e kana milimilli i alo pu ai iloko o ka inea o na hana a Kaunawahine Sofia Alamazofa.

            "A e hoomanao pu no hoi oe, e kuu Wete aloha, e hulahula pu ana kaua i keia po," wahi hou a Kaunawahine Vera.

            Ua hookoia keia mau mea apau me ka hauoli piha o Ivana ma no Wete, a ua huipu mai ma keia hauoli ana na luau'i o Ivana, a ua papahiia mai na huaolelo mahalo nui no Wete no kaua mau hana