Ka Nupepa Kuokoa, Volume XLIV, Number 12, 23 March 1906 — Page 8

Ka Nupepa Kuokoa

KE KILOHANA POOKELA NO KA LAHUI HAWAII.

 

KA EHA MA KA PUUWAI.

 

LOAA I KA RUMATIKA KEKAHI WAHI LAHILAHI LOA O KE KINO.

A O NA HUAALE AKALA A KAUKA WILLIAMS KA LAAU MAIKAI LOA NO NA MA'I O IA ANO.

 

            Ma ka manawa e pua mau ana o Mr. W. S. Geisel o ke Alanui East Coates. Helu 125 o Moberly, Mo., i ka hana  ma kona hana i maa a i akamai ma ka halehana hao ua lilo iho la oia i luahi na ka rumatika a o kona ike no ua ma'i la oia ka i loaa aku he mau kaukani o na poe i loohia ia ano ma'i a i hookikinaia iloko o ia ano, a o keia malalo iho nei ka wehewehe no ua ike nei ona:

            "Iloko au o ka hana no kekahi manawa loihi loa iloko o ka halehana hao, kahi hoi a'u i noho mau ai iloko o ke kawa-u. Ma ka hoomaka ana mai o ka eha uh hoomaka mai ia ma kuu mau wawae a pii mai la no hoi ka pehu, a pii mai la a kuu mau kuli a hiki loa i na poohiwi ma na ami no pae.

            " A o ka hopena ua hiki pono ole iho la ia'u ke hele a pii mai la ka eha ma na manawa apau a'u e hana ai, a no ia mea i koiia ai au e waiho i ka hana. Emi mai la ka ono ana i ka ai a pii mai la ka haikea ame ka nawaliwali pu.

            "Alaila, hoomaka iho ia au e ike i ka eha ma kuu puuwait a no ia mea i nui ai ko'u hopohopo no ko'u kulana. A o kuu makuahine ua ike oia i ka waiwai o na Huaale Akala a Kauka Williams no ka mea o lakou no na huaale i hoihoi mai ai i ke ola hou iloko on a ma ka wa on a i ano nawaliwali loa ai.

            "A aole no hoi i liuliu loa ua hoi hou mai la ka ikaika i naiohia aku mamua i ka wa o'u iloko o ua rumatika nei a hiki iho la ia'u ke hana i kekahi mau hana kupono owaho, a iloko o ka malama o Okatoba, ua ike koke iho la wai i ko'u ola loa a hiki iho la ia'u ke hele hou i ka'u hana iloko o ka Halehana hao ma Sana Lui."

            O ka rumatika oia kekahi o na ma'i aunuha loa ma ka lapaau ana, ke hoomakaia ka lapaau ana mahope iho o ke komo ko'iko'i a kukonukonu loa ana oia ano ma'i iloko o ke kanaka. A o ka mana hoola o na Huaale Akala a Kauka Williams loa a ikaika no hoi o keia ano a aohe he mea i hoopohoia ka manaolana, ma na manawa apau a kekahi e lawe ai ia mau huaale.

            He hoola maoli i'o no na Huaale Akala a Kauka Williams a mamuli no ia o ka hoomaka ana o kana oihana hoola mai ka mole mai o ka ma'i, oia hoi ka hoololi ana i ke koko i ka maikai kahi hoi i noho ai ka ma'i. A pau no hoi kekahi mau ma'i he nui i ke ola, na ma'i i ulu mai mamuli o ke koko ino a mai na aalolo nawaliwali, e like me na ano lolo, ame na ano ma'i apau o na kane ame na wahine pu.

            He kualia keia ano laau e ka poe kuai laau lapaau apau, a e loaa no ke kauoha aku ia Dr. Williams Medicine Co., Schenectady, N.Y.

 

PAU I KE AHI KA ULULAAU O KONA

 

            He lono kelekalapa uweaole ka i loaa mai i ka Papa Oihana Mahi ma ke kakahiaka Poalua nei mai ka Lunakiai Ahi McDougall mai, e hoike mai ana i ka a ia o kekahi ululaau o Kona Hema e ke ahi, he wahi ululaau koa ma kahi i kokoke i Kalahiki. A oiai ua hala aku o Lunaululaau Nui Hosmer i Waianae nolaila, ua lawe aw la o Mr. Holloway i ka hana nana e hooko ma ke kelekalapa ana aku ia Mr. McDougall e hana aku oia e like me ka hiki iaia a e like me kana i ike ai he pono ao ka hoopio ana i ke ahi: a e noi aku i ka poe mea kuleana aina e hui pu ae ma ke kinai ahi.

            Aliaila eleu aku la o Mr. Holloway no ka huli ana ia Mr. Dodge, ka lunahoohana o ka Waikai o Pauahi Bihopa, uo ke kuka pu ana in a paha he mea hiki e hui pu mai ka poe mea kuleana aina ame ko Bihopa poe e komo kokua ae ma ke kinai ana i ke ahi, aka, ma ka huli pono ana o ka lunahoohana o ka Waiwai o Bihopa ua loaa iho la iaia ka ike aole ke ahi maluna o ko iakou aina.

            A ma ka hora 4:45 p.m. ua loaa mai la ia Mr. Holloway he lono kelekalapa uweaole mai Kona mai e hoike mai ana aole i komo kokua ke poe kuleana aina o Kona ma ke kinai ahi ana, a o ka lono hope aohe ke ikaika loa o ko ahi a e ikaika ana ka poe mea kulana aina ma ke kinai ana.

 

MA KE KUPONO E HAAWUA AI NA AINA AUPUNI

 

            Mahope iho o ka noonoo ana ua hooholo iho la ke Komikina Aina Aupuni Pratt e hoopau i na kukai ana me ka Ahahui Hookuonoono Thompson o Kau. Hawaii, maluna o kona makemake e weheia ae i aina aupuni o 1900 eka no ka mahele ana mawaena iho o na laia o ua hui la he umi-kuma-maiwa, ma ka pakahi 100 eka aina i ka mea hookahi.

            Ua hoole iho ke Komikina Aina Aupuni i keia noi a oia no hoi ka hoole ana i ka haawi ana i keia heluna eka nui, no ka mea wahi ana, he waiwai nui loa na aina ulu nui ia e ke ko oini he mau aina kela i kupono no ke ko, a o ka huina eka no hoi o 1909 eka ua lawa ia no ke kukulu ana i hui mahiko.

            "E wehe no wai i na aina aupuni ma na manawa apau ma ke kupono no nae," wahi a Komikana Aina Aupuni Pratt. "a in a aole he makemake o keia mau ahahui e nee aku imua ma na kumu kupono a kahua maikai hoi, alaila, e haawila no na naina i ka poe okoa."

            Ua hoole pu aku no hoi ka komikina i ke noi aina o ka Hui o Hakalau, he noi hoi o keia ano like.

 

I HALE HANA EKE NA NA PAAHAO

 

            "Aole au i ike i ke kumu kupono e hoohana ole ia ai ne paahao he ekolu haneli a oi aku oloko o na halepaahao Teritori ma ke hana iole eke." wahi a aikai Kiekie William Henry i ka Poaono nei. "Eia ke komo mau nei iloko o keia Teritori ma kela ame keia makahiki he $600.000 waiwailo o na lole e humuia ai i eke i kupono no na kopaa ame laiki. Ua loaa ia'u ka manao he hana hoomakaulii ia no keia mau dala nui e lilo nei a o ka hoohana ana i na paahao ma keia mea ke manao nei au aole ia e lilo i mea hukihuki pili i na limahana ma ka laina ukuhana.

            "Ua palapala aku wau i ka mea malama paahao o San Quentin, Kaleponi, e ninau ana iaia no na hoolilo o na mikini hana eke, kahi e loaa mai ai na lole eke ame ke ano o ka hana ana. A i kuu makaukau ana e waiho aku ai au i ka Ahaolelo e noho mai ana, a no kela manawa ua makemake au e loaa na mea apau e pili ana i ke kumuhana."

            O ka manao o ka Makai Kiekie ma keia ninau he mea ano nui loa ia. O ka hoohana ana i na paahao no na hana hoopukapuka waiwai oia kekai o na ninau ko'iko'i loa i ke'ake'a mau aku i na aupuni hou o keia mau la. Ua lokahi pu ia ae no aole e hoohana i na paahao e lilo ai i mea hakaka me na limahana. He nui na hoao ana no keia mea a ua ike ia ka ikiiki mawaena o na paahao ame na limahana.

            O ka halehana lole eke o Kaleponi iloko o ka halepaahao o San Quentin, me he mea ia oia kekahi o na halehana i nui ka hauoli maluna o ke kumuhana o keia ano i hoaoia ea. Aia he mau kaukani o na lole eke o keia ano ma na makeke kuai e kuaiia ana i keia ame keia makahiki. O ka hukihuki wale no i ulu aw mawaena o na paahao ame na limahana ma keia  kumuhana i ikeia oia no ka like ole mawaena iho o na limahana uku haahaa loa Inia.

            He mea oiaio no o na lole eke e hanaia ai e na paahao o Kaleponi aole ia i lawa no ka hoolawa ana aku i na makeke o Kaleponi, aka, o kana e hoolako ai he kaomi ana mai ia i ka hoopii loa ana i na kumukuai o na lole eke a ka poe i komo iloko o ia hana hoowaiwai, a he pomaikai papalua hoi la no ka mokuaina.

            A iloko iho a Hawaii he mau kulana kona i ano like aku me ko Kaleponi. He mau kaukani lole eke e hookomoia nei iloko o Hawaii nei i na makahiki apau a in a e hoohanaia ana na paahao no ka hana eke no ke kokua ana i na kauoha eke, oiai he ikaika na koi ana o ia mea, alaila, aole no e lilo ana ia mea i mea hukihuki, me na limahana, i kulike ai me ke kulana e ku nei i keia manawa.

            Iloko iho o Hawaii he nui na limahana kuokoa a ua ike ia no hoi e na mea apau, he mea pono ia lakou e hana ma na alanui in a he mau hana kahi o ia ano, aka, he nui no hoi na hooikaika ana iloko o na Ahaolelo a i ka Ahaolelo no hoi i hala iho nei e ku-e ana i ka hoohanaia o na paahao ma na alanui, i loaa ai i hana na na limahana kuokoa, aka, aole i lanakila ia mau ku-e ana no ka mea aia no na paahao ke hana mau nei ma na alanui a oiai no hoi aole he hana kupono e ae na na paahao e hoohanaia ai. Ua hoopa'iia no hoi lakou e hana ma na hana oole'a a ua kupono ko lakou hoohanaia ana ma na alanui, eia nae, ua makemakeia ia ano hana no na limahana ukuhana.

            Ina e kupono ana keia kumuhana a ka Makai Kiekie no ke kukulu ana i hale hana lole eke a halewili lole eke e loaa ana he hana hou na na limalana akamai ole ke makemake lakou e komo hana iloko olaila. Malia ua hiki ke hoouluia ka meaulu e loaa ai ka lole eke iloko o kekahi mau wahi o Hawaii nei no ka mea o kahi i makemakeia no ia meaulu oia no na wahi ua mau a pa nui ia e ka la e ma-u mau o ka lepo.

 

Ka Poe A Makou i Ike Ole ai

 

HE POE LAKOU NO HONOLULU A O KA LAKOU E HOIKE AI HE POMAIKAI KULOKO IA.

 

            I ka manawa e loaa ai kekahi ano hana hou e like me ia malalo iho, alaila he haawina hoohihi koikoi ia na ko kakou poe heluhelu e kilohi iho ai. He nui na mea ano malihini e hoolahaia mai nei maloko o na nupepa, he mau mea oiaio no, eia nae, hoomaloka no kanaka. Ma ke kumuhana hookahi ua nalohia aku ke ano hoomaloka. Ua loaa mai ia mamuli o ka ike mai na kupa o kakou nei a o ka lakou mau hoike ua pili no ia ia lakou. O ka poe i kanalua e hoopauia ko lakou kanalua mamuli o keia maikai i ikeia ma ke alo. O na olelo hoike e waihoia ae ai i ke akea no kekahi kupa e noho nei no iloko nei o Honolulu, he mea hoi nau e ike iaia i kela ame keia la he mea ia e hoopau loa ai i ke ano hoomaloka.

            O kahi noho o Mrs. N. Joseph aia ma ke kihi o na alanui Liliha ame Moi.

            "No ehiku inahina i eha ai ko'u kua a e loaa ana hoi i keia ame keia wa i ke anu ame ke lia o ke kino. He maikai ole maoli no ko'u ola ana, a nolaila, ua kuko nui loa au e loaa ona laau e loaa ai la'u kahi oluolu. Ua loaa io ia'u ka'u mea i makemake ai ma na Huaale a Doan. Kuai aku la wau ma ka halekuai laau o Hollister ma a ua hauoli loa au i ka hoike ana aku aole wale no i haawi mai keia mau huaale ia'u he maha, aka, he ola loa maoli; a no ia mea aohe o'u wahi kanalua iki ma ka hoomaikeike aku ia mea, oia hoi. i ola au i na HUAALE A DOAN NO KE KUAHANEENEE AME PUUPAA. He laau maikai keia no na ma'i puupaa."

            He kuaiia na Huaale a Doan no ke Kuahaneenee ame Puupaa e ka poe kuai laau lapaau apau. he kanalima keneta no ke poho hookahi a he eono poho no $2.50. E hoounaia aku no maloko o na eke leta e Hollister Drug Co. Honolulu. na agena kuai nui no ko Hawaii Paeaina, ke loaa mai ke kumukuai.

 

NUHOU KUWAHO

 

 

MANO O PARKER O PERESIDEN RUSEWALA KA MOHO.

 

            BIRMIGHAM, Nu Ioka, Malaki 16 -- Ma ka hui a ninauia ana aku o Lunakanawai Alton B. Parker ua hoike ae ola ma kona manao ana ke makemake nei o Peresidena Rusawela e holo moo hou.

 

            Me he mea la ma ke ano he kanaka i maa i ka noonoo ake no ka noho Peresidena pela ike ai o Lunakanawai Parker i na hoailona. Ala lo no a he mea oiaio no hoi ia he nui e iana malia o haawi aku ka peresidena i kona ae e noho hana hou no ka lua o ke kau iloko o ka Hale Keokeo. Eia nae aole he mea hoike ana i ka makemake io e lilo i moho hou mai ka Peresidena mai a aole no hoi mai kekahi mea i manaola ua hilinaila e ia (Peresidena).

 

            UA HOOIA LOA IA AE KA HOOHOLOIA AKU O KA BILA ALAHAO.

            TOKIO, Malaki 16 -- O ka hooholo loa ia aku o ka bila e pili ana i ke kukulu ana i alahao e ke aupuni ua hoola loa ia mai.

 

            Ma ka hoomaka ana no o keia kau o ka Ahaolelo o Iapana ua oleloia ae o kekahi hapa o ka makemake o ke aupuni ola no ka lwe ana ae i na alahao a he bila o ia ano ka i hookomoia ae. I ka nana aku aia ua bila kanawai la ma ke ala e hooholoia aku ai a ma keia e oi loa aku ai o Iapana mamua o na aupuni o ia mau wahi hookahi ma o keia mau pomaikai pililaula la.

 

UA HAKAKA PULUA AE HE MAU SEPANIA ME NA PAHIKAUA.

 

            MADRID, Malaki 16 -- He hakaka pulua me na pahikaua ka i hoohana ia ae mawaena o Konela Riveria ame Hope Soriano. A ua eha like no laua a elua, aole no nae i ke kukonukonu loa.

 

HE MAU LA KA INO MAKANI IKAIKA ANA O KE KAI ELEELE.

 

            SIMFEROPOL, Rusia, Malakai 16 -- HE makani ikaika loa ka i pa ikaika iho no umi-kumamakolu la ma ke Kai Eleele. He nui ka poino o na moku.

 

HE ELUA HANELI AME KANALIMA MILIONA KA MAKEMAKE AIE O RUSIA.

 

            BELINA, Malaki 17 -- He hoaie hou ka Rusia o elua haneli ame kanalima miliona dala (marks) e hoopukaia ana mahope o ka pau ana o ka ahakuka o na hana o Morako.

 

NA KE AUPUNI E HOOMOR I KE ALAHAO O IAPANA.

 

            TOKIO, Malaki 17 -- O ka bila no na alahao o ke aupuni ua hooholoia ae ma ka Ahaolelo. Ua manaoia ae aia ma kahi o elua haneli ame kanalima miliona iena (dala Kepani) no na hoolilo o ka makemake o ua kanawai nei.

 

UA HOLO AKU NO CANADA

 

            IOKOHAMA, Malaki 17 -- O ke Duke o Connaught ua hala aku nei no Canada.

 

            O ka Duke o Connaught, ka hoahanau ponoi a ka Moi o Enelani, ka Ilamuku ame Generala-Lunanana o na pualikoa Pelekane, ua hoohala loa ae oia i kana hana ma na wahi apau o na koa Pelekane i kukuluia ai no ka nana ana e like me kana oihana. O kana huakai ua hiki loa aku i Aferika Hema. Inia ame Kina. Me he mea la o kana huakai aku la i Canada e kulike'ana paha ia me na mea i hooholoia e Pelekane, oia hoi ka lawe ana ae i kona mau pualikoa mai ke aupuni ae. O na awa o Halifax ame Esuimalt aia malalo o ka hoomalu ana o na koa o Canada.

 

NUI KA POE I PAU I KA EHA.

 

            PARISA, Malaki 17 -- He iwakalua poe i loaa i na palapu ma ka loaa ana aku i ke pa-hu ikaika o kekahi halehana kamikala.

 

KE HAALELE NEI NA KIU IA VLADIVOSTOK.

 

            VLADIVOSTOK, Malaki 17 -- Ua kauohaia ae nei na Kiu (Iudaio) e haalele i ke kulanakauhale.

 

NUI KA MAKE I KE OLA'I MA FORMOSA.

 

            TOKIO, Malaki 18 -- He ola'i ikaika ka i hoonaueue ae ia Formosa a pau i ka make he mau haneli o na kanaka, a he mau haneli o na hale i hoopoinoia.

 

            O Formosa, he wahi mokupuni ia i lilo aku ia Iapana mai a Kina aku ma ka panina o ke kaua ma ka manawa i koiia ai o Iapana e na mana aupuni e haalele i kona kuleana maluna o Manukuria: he mokupuni hoi e waiho la he kanalima mile mai ke kapakai aku o ka aina o Fuhkien o na Pake a i hookaawaleia hoi e ke ko-wa o Formosa. He wahi mokupuni oia nona ka ui iliaina ma kahi o 14,978 mile kuea, ua aneane hoi e like me ka hapalua o Irelani. Aia he mau lalani mauna e moe ana mai ka akau a ke kukulu hema a ua oleloia ae aia ke kiekie o kekahi o ia mau lalani mauna maluna aku o umi-kumamalua kaukani kapuai, aka, ua nui no na hoopaapaaia ana no ia mea. He nui na lua waiwela maluma o keia mokupuni a he nui no hoi na hana kamahao o ka pele maiala.

 

MA BARAZILA, HE NUI KA MAKE

 

            RIO JANEIRO, Malaki 18 -- O ke kaheawaiia ana ame ka hiolo-lepo, o laua na mea i hookomo aku he nui o na ola Uoko o ka poino. He hookahi haneli kaukani poe i hoopoinoia, a pau i ka make kekahi poe mawaho ae o ka poe i loaa i na palapu.

 

IKAIKA KE AUPUNI O RUSIA

 

            ST. PETERSBURG, Malaki 19 -- Ke hapai nei ke Aupuni i ka lawelawe ana i mau kanawai no ke kaupale ana aku i na olohani alahao.

 

WAIHO O AMABASEDOA STORER I KONA KULANA

 

            WAKINEKONA, Malaki 19 --  Mamuli o na like ole, o Mr. Storer, ka Amabasedoa no Aukuria, ua waiho mai i kona oihana. Ma keia la paha e hookohu aku ai o Peresidena Rusawela i kona pani.

 

            Aole i maopopo loa ke kumu o ka waiho ana o Mr. Storer i ka oihana, a malia mamuli o kona aupuni iho a i ole mamuli paha o na meahou i loaa koke iho nei mai Aukuia-Hungary mai, eia nae aole he hiki ke kuailo ae. Mai ka makahiki 1902 o Mr. Storer i hoomaka ai kona kulana elele no Amerika i Aukuria-Hungary. He loio oia ma kana hana, a he Havard hoi ma kona kulana humana, oiai mailaila mai oia i puka mai ai, a i Cincinnati kona wahi i hanau ai, a o ke 59 keia o kona mau makahiki. He hoa-ahaolelo oia no ka Ahaolelo Nui i ka makahiki 1891-5, a he Kuhina i Belina i 1897-9, a he Kuhina i Sepania mai Iune, 1899 a Sepatemaba, 1902.

 

NUI HOU NO KA POINO MA FORMOSA I KE OLA'I

 

            TOKIO, Malaki 19 -- He hookahi haneli poe i make ma ka ikaika o ke ola'i o Formosa a he elua haneli poe hale i hoopoinoia.

 

PEPEHIIA KA WILIKI A HOOKUUIA KA PAAHAO

 

            WARSAW, Malaki 19 -- He poe hoohaunaele ka i komo ae iloko o ka halepaahao maanei a pepehiia ka wiliki malama halepaahao o hookuuia he paahao, he kanaka kalaiaina ma kona kulana.

 

KILA A MAKE KEKAHI ALAKAI RUKINI

 

            ST. PETERSBURG, Malaki 20 -- O Lukanela Schmidt, ke aliikoa i huipu ai me ka poe hoohaunaele o ka moku ma ke Kai Eleele, iloko o ka malama o Novemaba i hala, ua kiia i ka pu a make loa.

 

HOLO KA BILA KANAWAI KANIKELA

 

            WAKINEKONA, D.C., Malaki 19 -- Ua hooholo ae ka Hale o na Lunamakaainana i ka bila Senate no ka hooponopono hou ana i ka oihana kanikela. Ua hanaia keia bila kanawai no ka hoano hou ana ae i ka oihana kanikela Amerika.

 

KOMO HOU NA RUIKINI I KA HOOAUNAELE

 

            ST. PETERSBURG, Malaki 21 -- Ua hoikeia ae ua hoohaunele ae na luina ma ke kahua mokukawa o Sebastopol, e pepehi wale ana i ko lakou mau alii ame ke ki pu aina i ke kulanakauhale.

 

NUI KA MAKE MA FORMOSA

 

            TOKIO, Malaki 21 -- O na a'o hope mai nei mai Formosa mai e hoike ana ke mau kaukani o na poe i mae ma ka hana o ke ola'i i hoonaueue ae i ka mokupuni. Ua palahaia na kaona o Oatigo ame Raishiko. E hiki ana na poino ma kahi o $35,000,000.

 

 

NUI KA HAUNAELE

 

            LENS, Palani, Malaki 21 -- O na olohani limahana lua-nanahu ua pii ae ke helona i ka 51,000, aia ke mau nei na hakaka ana o lakou me na makai.

 

HOLO KA BILA MALAMA OLA

 

            WAKINEKONA, Malaki 21 -- Ua hooholo ae ka Aha Senate i ka bila haawina malama ola nona ka waiwaiio o $140,000,000.00

 

KU-E I KA MARE LEHULEHU

 

(Hoomauia)

            No Aberahama -- He mea makehewa wale no paha ia'u ka hoakaka hou ana aku, oiai, aole au mau hooiaio kupono no ke kakoo ana i ka pono o kou aoao. Koe wale no kou pane ana mai ma ke ano hoolauwili me kou hoao ole ana mai e ku-e i kau mau hoakaka. Ua apono mai no oe i ka'u i olelo ai, o Sarai ponoi no ka mea nana i hoomoemoe i kana kane ia Aberahama me Hagara, aole o ke Akua. Wahi au ma ke Aloha Aina.

            "Ua maopopo no ia kakou o Isemaela ke keiki i loaa ia Aberahama ma ke kino, oiai, i ka wa opio no o ke kauwa wahine a oia no hoi ko Sarai kauoha ana i kana kane e komo ae iloko o kana kauwa wahine i loaa one keiki nana ma o Hagara la, no ka mea, ua pau ia Sarai ka mea a na wahine, ua elemakule, ua hiki aku na makahiki o Sara i ke kanaiwa, a no ia kumu i kauoha ai oia i kana kane e hana pela."

            He wahi kumu nawaliwali loa keia ma ka aoao kakoo mare lehulehu. Aole loa i ikeia he mau a'o ana ma ka Palapala. Hemolele e pili ana i ka mare, ua hiki i kela ame keaia wahine i nele i ke keiki, ke kauoha aku i kana kane e komo aku iloko o kahi wahine i mea e loaa mai ai kana keiki ma ia hana ana. Aole loaa Aia mahea ia kauoha?

            He mea oiaio loa, ua haawi mai no ke Akua i na keiki i kekahi poe wahine keiki ole, mamuli o ke noi ana aku iala, aole ma ke kauoha ana aku i na kane e komo aku iloko o kahi wahine okoa aku, i mea e loaa mai ai on a keiki. Hoopaa mai no ke Akua la Aberhama e hoolilo mai ana Oia iaia i lahuikanaka nui, ua pili keia no ko Sarai hanau ana i ke keiki i kona wa luahine aka, kuhi@ nae o Sarai, aole e hoo@ ana ka ke Akua mea i olelo mai ai nolaila, hoomoemoe oia i kana kane me Hagara. Aole anei keia he hana hewa? He hana hewa keia. O keia hana hewa nae a Sarai, oia iho la ka oukou e lawe mai nei i kakoo no ka mare lehuiehu Kupanaha."

            No ka mea e pili ana i kau ninau no ka hewa o Aberahama ma ka hooko ana i ka leo o kana wahine? O ka'u haina: Ua hewa ola. Ua like ko laua manao me Sarai no ka mea e loaa ai ke keiki, aole laua i manaoio e loaa he keiki ponoi na laua no ka elemakuie. A in a no e hana no poe Moramona pela, ua hewa no. Aole hiki ke alo ae.

            Aia ma ka pauku 13 o ka mokuna 21 o Kinohi, e ike ai kakou i keia mau olelo a ke Akua ia Aberahama: "Mai hoehaeha oe i kou naau no ke keiki, a no kau kauwawahine (Hagara)." Pehea keia kauwawahine, he wahine mare anei ia? He ike ole anei no ka Akua he wahine mare lehulehu o Hagara a oukou e koi ole wale nei, ka mea e olelo nei he KAUWAWAHINE?

            Aole a'u mau ku-e nui no na mea e pili ana i na hoopomaikai, oiai eia no ke kau nei no ke Akua la malunda o ka poe pono ame ka poe hewa, a ke hoopulu like nei no ka ua i na mahinaai a ka poe pono ame ka poe hewa, a ua oi aku ka ehaeha o na poe pono ma keia ao i kahi wa, a ua oi aku hoi ka hauoli o na poe hewa ma keia ao i kahi wa, aka, o ka Paulo e olelo nei: "Aole kakou e lilo i poe keiki na ke kauwa wahine, aka, na ka kahu wahine nei no no ka mea, aole e hooili pu ia ka waiwai i ke keiki a ke kauwa wahine, me ke keiki a ka haku wahine." E na makamaka heluhelu, mai ae a lawe i ka hoopomaikai o ke kanaka ahiu, elike me Isemaela.

            E manaoia maanei, o ka'u mau hoakaka e ku-e ana a e hoike ana i ka hewa o ka lawe ana mai ia Aberahama ame kahi poe e aku i mau kakoo no ka mare lehulehu. He makahewa ka ninau ana mai.

            Wakie hou au i pane mai ai ma "Ke Aloha Aina" o ka la 23 o Dekemaba, 1905. "he hooili nei oe i kau mau ahewa ana ia Labana, ka makuahonowai o Iakobo, ma kona uha'i berita, wahi au aole ka i ike o Iakobo i keia hana maalea a Laban, haawi mai nae o Labana ia Lea i wahine na Iakobo lawe no ia; a in a hoi ua ikeia kona ike ole i keia hana maalea, aka, lawe no nae ia a hanau mai na keiki me Lea, a haawi hou mai no o Labana ia Lahela, lawe hou no."

            He mea pololei loa keia, ua hewa o Labana ma keia hana ana, pela no me Iakobo. Aole anei o kou hui ana me kekahi wahine okoa i kaawale ae mai kau wahine i hoopaa ai e mare, he hana hewa ia? Ae. Pela no me Iakobo, he okoa kana wahine i hui ai i ka po malalo o ka hana maalea a Labana, he moekolohe keia o Iakobo. Oiai, ua hui oia me kahi wahine okoa, aole o ka mea ana i hoopaa ai i wahine nana. O keia ano hana nae ka oukou e iawe mai nei i kakoo no ka mare lehulehu. Kupanaha! He hana pono iho la ka ia?

                        Moses Keaulana.

                        (Aole i pau.)

 

NO KE KANAKA

 

            Olelo ihio la ke Akua i kinohi, "E hana kakou i ke kanaka ma ke ano i ku ia kakou." Kahakaha iho la ke Akua i ka lepo, a lilo ae la ka lepo i kii kanaka, a haawi iho la i ka uhane ma ka puka ihu o ke kii lepo kanaka, a lilo ae la ke kii lepo i kanaka. Nolaila, kapa aku la ke Akua i kona inoa, Adamu (lepo ulaula i huiia me ka palolo). Ike iho la ke Akua ua hemahema ke kanaka ke noho oia wale no, nolaila, haawi mai la ke Akua i ka hiamoe nui i ke kanaka, a unuhi ae la i ka iwi aoao hema, a lilo i wahine; kapa aku la ia i kona inoa o Eva (he ola, no ka mea, mailoko mai on a i puka mai ai na Materia ola kino uhane apau) olelo hou iho la ke Akua, "E hoohau ae olua, a e hoolaha hoi, a e hoopiha hoi i ka honua."

            Nolaila, o ke kanaka, he kino ia a he uhane i hanauia mai i alii a i hooilina no na waiwai i hoahu a i hoolahaia e ke Akua maluna o ka honua. He hale a he wa-hi ke kino no ka uhane. O ka haalelo ana o ka uhane i ke kino, o ka mehameha ana ia o ka hale; hoomaka mai la ka nahaha, kulu, popopo, a lilo i palaho. O ka ikaika ame ka hauoli o ke kanaka, ola ka noho o ka uhane iloko o ke kino. O ka hooko ana i na alakai a ka uhane ka mea e loihi ai na la o ke ola ana. A o na kualana o ko ke kanaka ola ana mai ka hanau ana a hiki i kona make ana, penei no ia:

1. Ka hanau ana.

2. Ka hele ana.

3. Ka pupuu ana.

4. Ke kolo ana.

5. Ke ku ana.

6. Ke ka'i ana.

7. Ka hele ana.

8. Ka wa opio.

9. Ka hookanaka ana.

10. Ka oo ana.

11. Ka emi ana.

12. Ka wa elemakule.

13. Ke kanikoo.

14. Ke kolopupu.

15. Ka haumakaiole.

16. Ka palalauhala.

17. Ke ka-i-koko

18. Ka uhikapaeleele

19. Ke kau-ka-puaa-i-ka-nuku

                        S.H. PETER KALAWAIAOPUNA

                        (Aole i pau.)

 

E NOI ANA I MOKUKAUA NO NA MOKE HEIHEI HAWAII.

 

            Ina e loaa ka poe kupono no ka hele ana i Wakinekona a i ole hoouna aku i na manao kupono, alaila e hiki mai ana paha kekahi o ia ano i keia awa no ka ukali ana i na mokupe'a heihei Hawaii e komo ana iloko o ka heihei maluna o na kai o ka Pakipika, ka hana nui hoi e hoolalaia nei.

            Ua noonooia ae keia kumuhana ma ka halawai i malamaia ae e ke Komike Hoeueu ma ka Poalua iho nei. A ua hoohoioia e holo kuka mau aku me Akimaraia Lyon, ka mana nui o ke Kahua Mokukaua maanei, e like me ia e kuka pu ai me Hope Kiaaina Atkinson, a ma o keia mau keonimana ia i manaolanaia ai e kupono ai ka waiho ana aku i ke kumuhana i Wakinekona ma na ano a laua i ike ai e kupono ana no ka ae ia mai o ke noi.

 

E HOIKE LOKAHI ANA I KA BILA HOIHOI LOAA O HAWAII

 

            WAKINEKONA, Malaki 15 -- O ke Komike Hale maluna o na Teritori ua hooholo lokahi iho lakou e waiho aku i ka koike ma ka lokahi i ka nila a Kuhio e pili ana i ka haawi ana ia Hawaii i dala no na bana hou o ka lehulehu. O ka bila, he bila ia e haawi ana a e ae ana e haawila i 75 pakeneta o na loaa aupuni Federaia o ka Teritori no ka manawa o iwakalua makahiki no na hana hou o ia ano. Malia o pakuiia mai ka bila mamuli o ka loihi o ka manawa.

 

            E like me na a'o ana mai Wakinekona mai e hoounaia mai i mau elele Hawaii no ka hooikaika ana e holopono ka bila ua hoike aku na elel i na hoa o ua komike nei ma ka wa e noonooia ana ua bila nei aole no he hoohalahala e ulu ana in a nei e oki hapaluaia ka manawa i hoakakaia iloko o ua bila kanawai nei.

            A no ka mea hoi e pili ana i ka limaiia aku o ua bila nei ua hoike ae o Mr. W. O. Kamika i kona manao i ka nupepa Advertiser, penei:

            "Ma ke ano mau o ka hele ana o na hana, no ka Bila Hoihoi Loaa o Hawaii, e kauia ana oia ma ka pap kuhikuhi o na hana o ka la mahope iho o ka hoike o ke Komike, alaila e hele no ioa ma ke ala maamau koe wale no a hapaiia ae mamuli o ka hooholo lokahi ae o na hoa e hooloheia ka bila, oia hoi, e hooloheia mamua o kekahi poe bila a ae. A ke manaolana loa nei au e hanaia mai ana i rula, kahi e hiki ai ua bila la ke hapaiia mai no ke noonoo ana.

            "Oiaio no, in a no e hooholoia mai ana keia rula, aole ia he mea e kupono ai kona hooholo loa ia, aka, ma ia hana nae, e ike koke ai kakou i kona hopena. Aka, no'u iho ua manaolana maoli no wau e puka mai ana no ka hua.

 

HOIKEIKE PAIKAU O KA PUALI F.

 

            Ma ka la 19, auina la Poakahi, ua nanaia iho la ka pualikoa a Kapena Sam Johnson, e Mekia an Vliet o Camp McKinley. He paikau hoikeike mahope o ka nanaia ana. O ka bana Hawaii kekahi maiaila.

            O Kapena Sam Johnson ke kapena o keia puali, a o Chas. Costa ka lukanela. No kekahi mau makahiki loihi o keia ka puali i kaa mau i ka helu ekahi. Ekolu makahiki i hala i kekahi paikau hoikeike ana ua loaa i keia puali he 99 3-10 pakeneta.

            Ua lilo ka makana iaia, he kiaha kala o $250 ke kumukuai ame ka makana kala kuike kekahi. Ua haalele kekahi mau hoa kahiko: a i keia ia he eono wale no koa kahiko. He oiwi Hawaii wale no ka poe i keia mau la. Ua kaulike no ka lakou nei hana me ka poe i haalele mua mai.

 

UA HALA AKU I KE ALA HOI OLE MAI

 

            MAUI, Malaki 16 -- He puiwa a he kaumaha nohoi ka lohe ia ana mai o ka make o Aukukina Enos, kekahi o na kamaaina o Wailuku. He ma'i ma ka puuwai kona kumu pilikia. He kanaka oia i aloha nui ia e kona mau hoalauna, a he kanaka ia i hilinai nui ia. He kanaka haipule no hoi. He Pukiki kuonoono oia; nona kekahi mahele o ka aina hanai holoholona o Kahikinui, a nona nohoi kekahi aina hanai holoholona ma Makawao, a he halekuai nui ma Wailuku. Ma ka Paokolu, ua hukihapaia ae la na have no ka hoomanao ana nona.

 

KELA AME KEIA

 

            Ma ka Poalua iho la, la 12, ua hoouna mai la o Charley Copp he Poko Riko pupule ma ka hale pupule ma Honolulu nei.

            Ma ka Poaono iho la ia ku mai ai ka moku Olympia ma Kahului. Ua manaoia ua ku mai no ka lawe ana aku he mau Kepani mai nei aku; aka, aole i maopopo loa. Ua lele mai ke kapena ma ka aina no kekahi mau hora pokole. Ma kona huli hoi ana ua kia aku la ia i kona moku no Hilo. Aohe i ikeia kela moku no kekahi mau lo loihi.

 

HOOHAKALIAIA KA PAA ANA O KA HALE MALAMA MOOLELO

 

            "O ka hale malama moolelo, aole makou i makaukau no ke komo ana, a no ka wehe ana ae no ka lehulehu, mamuli o ka no-ha ana he ehiku mau pohaku mabala ma ka manawa o lakou i laweia mai ai," wahi a Mr. Alapaki Kauka, kekahi o na Komikina Malama Moolelo o ke Aupuni Hawaii i ka Poaono nei.

            "Ua hoea mai keia mau pohaku mabala mai Tenesi mai o Amerika a i ka wa a makou i wehe ae ai mai na pahu o lakou i hookomoia mai ai a hoounaia mai ai, ua ike iho la makou ua noha he ehiku o lakou.

            "Aole no hoi i hiki ia makou ke hoike ae ihea la kahi i no-ha ai, in a paha ma keia aoao o ke ala i hoounaia mai ai. a i ole ma kekahi hapa paha i ke ala o ka laweia ana mai. O ka makou i ike ai oia no ka loaa ana aku ua no-ha, a ua ike pu no hoi makou o keia ano noloko o ka hale, a nolaila e hoouna hou ia ai ka makou kauoha."

            A ma keia iho la i hoohakaiiaia ai ka wehe ana o ka Hale Malama Mooelo o Hawaii Paeaina, e kukuluia nei i keia manawa a ua paa hoi ke kino a o na hemahema liilii wale no koe ame na mea like. O keia ka hua o kekahi kanawai i hooholoia iloko o ka Ahaolele i haia iho nei. Eia nae he mau la ne ia e hakalia ai ka makaukau o keia hale o ka lehulehu mamua o kona weheia ae no ka lehulehu. I'a kukuluia keia hale a ke ku nei ma ka aoao Waikiki o ka palii ma ka puka-pa ma alanui Likelike.

 

KUNA KALEA

 

O ka loaa koke ana o ka oluolu mamuli o ka lawe ana i ka laau kunu a Kamalena o ia kona mea i lilo ai i mea nui i na makuahine apau he mau keiki @ ka lakou. O keia ka laau nana e hoopulu i ka maie, a peia iho la e hemo maaiahi mai ai, ke kunu a hookaawale aku mai ka loaa ana i ka numonia. Ke kuaiia nei e BENSON, SMITH CO., LTD., Agena ma Hawaii nei.