Ka Nupepa Kuokoa, Volume XLVI, Number 1, 1 January 1909 — HOOKUPU NO KE KULA O KAWAIAHAO [ARTICLE]

HOOKUPU NO KE KULA O KAWAIAHAO

I ke au kahiko, o ka hana i maa mau i keia lahuikanaka, oia no ka malamaia o kela hana he hookupu ma ke ano he makana no kekahi mea a hana paha i manao nuiia, a i keia la ma ke kula kaikamahine Kawaiahao, ma ke awawa o Manoa e ike houia ana ia hana. Ua noi mai kela kula i ka poe apau i komoia e na manao aloha no ke kula e haawi aku i ka lakou mau makana kokua i ke kula ma na mea i kupono. i ke kula, a o ka poe apau e manao ana e lawe aku i m&a makana hookupu na lakou e pono e hiki aku ilaila mai ka hora elua auwina la a hiki i ka hora eono o ko ahiahi o keia la, Poalima lanuari 1, ma ke ano he makana Hapenuia ia i ke kula no ka A. D. 1909. A i ole ai e lilo i mea hoopohihihi i ka manao o ka poe e lawe ana i na makana i ke ano o ka lakou mau makana e lawe aku ai, o keia mau hoakaka malalo nei kekahi o na makaua ano nui i makemake ia: I buke a mau buke moolelo paha, e pili ana i na huakai kaaliēle ame na moolelo kaao; i mau buke na na kamalii, i mau noho, mau pa a pola na pakaukau, na kii kauhale, piano, mau pahu waiho buke a pepa paha, paku makika no na puka aniani, na mo-

ena veleveta; mikini humuhumu, hae Amerika nui, hae Hawaii nui, na hae liilii, na kapa apana, i mau mea kinai ahi, iliwai kiki no na kihapai, na mea paani noloko a no walio, a 0 kekahi i mau lako no ka pa hanai holoholona hou, e laa na moa, kaka, puaa, bipi waiu, lio, ilikaa, ame ona kaalio. Aohe no i papaia na mea apau i ka lawe ana ae i na mea kupono apau no ke kula, 0 ko lakou aloha no ia.