Ka Nupepa Kuokoa, Volume LIV, Number 30, 28 July 1916 — HE HOOMAIKAI NUI. [ARTICLE]

HE HOOMAIKAI NUI.

Mr. Solomon Hanohano, Lunahooponopono o ke Kuokoa; Aloha-oe: - E kakou i ikeia mai hoi na hana maikai oluolu mai hoi kou ahonui i wahi kaawale o na eheu o ka nene aukai a ame ka manao i ku i ke aloha oiaio i loko o ko kakou Haku Iesu Kristo. Ma ke ahiahi Poaono, ka la 15 o keia mahina iho la, ua hapai ae o Mrs. Richard C. Searle, he ahamele ma Honokohau, Maui, no ka pono o ka Ekalesia o Honokohau, oiai ua pu-haia kekahi mau wahi o ka luakini, a nolaila, ua waihoia aku keia kumuhana iloko o ka lima o na komite, a i ka hoomaopopoia ana o na pilikia o ka luakini, aia wale no a loaa kekahi huina dala mahuahua, a lilo pau pono na hemahema e ae. Nolaila oiai aole o Mrs. Searle he hoahanau no Honokohau, aka nae ua hooikaika ae oia i pau kekahimau pilikia o kela ekalesia ma ka hana ahamale, no ka mea he eiwa wale no hoahanau o keia ekalesia, a o na loaa kuike i ka po o ka hana, he kanakolu-kumamaka-hi dala, me ke koe aku no o kekahi mau dala aole i hoihoiia mai a pau pono. Ma kekahi wahi e ike mai oe e ka mea heluhelu, ke haawi aku nei makou na hoaloha, na kamaaina, ame na hoapaahana o ka Ekalesia o Honokohau, i ko makou hoomaikai nui ia Mrs. Richard C. Searle no keia kokua nui loa i ka Ekalesia o Honokohau nei, me ka pule ana aku i ke Akua e papahi mau iho i ka lei o ka hauoli, hookipa mau iho i na pomaikai he nui, a lehulehu maluna o keia opio puuwai hamama, a kanaka makua no hoi, a pela pu hoi ia haawina maluna o kana kane, ame kona ohana holookoa no apau. Mamuli o ka hilinai ia o keia opio e ka haku o Honolua, ka Lunakiai D. Fleming, pela i haawiia mai ai na kaa o ka hui no ka halihali ana mai i ka poe e makemake ana e holo mai i Honokohau e ike ai i na meahou o ka ahamele. He u-i, he nani, he mikioi, a he sure maoli no me ke onaona, na mele i meleia, a o ka oi loa aku hoi o ia no ke mele i meleia mai e ka papa himeni a Solomon Pali, ke kumukula aupuni o Honokohau, o ia hoi "Nani No Oe e Maui." Penei ka olelo o ka hui, e like me ka hiki i kau kiu ke apo aku, oiai he maikai na leo, e mele ana a he maopopo loa no hoi na huaolelo: "Nani no oe e Maui, Me na wai eha, e anapa nei; Me na hono eono a Piilani, I huiia me Haleakala." I ka hooki ana i keia mau manao ae la ke lana nei ka manao o keia makakila, e hoomau mai ana no ko kakou Haku i ka pulama ana mai i ka poe no lakou keia hoomaikai, ame na keiki no lakou na lima ppalanehe i hele lehia i ka oniu ana i na hua keleawe kou welina. Owau me ka haahaa, KIU HANU MEAHOU Lahaina, Maui, Iulai 7, 1916.