Ka Nupepa Kuokoa, Volume LVI, Number 14, 5 April 1918 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

NUPEPA KUOKOA, HONOLULU, T.H., POALIMA, APERILA 5, 1918

 

HE MOOLELO NO

BEDERA

Ka Moi o Peresia

AME KO

GIOHARE

Ke Kamaliiwahine o ke Aupuni Samanadala

 

            "Aka, mahope o ko'u noonoo ana me ke akahele loa ua hooholo au i koʻu manao e ae aku i kau noi me ka manao maikai, a ke noi hou aku nei no au i kou lokomaikai no ka manawa hope loa e lawe oe i kuu keiki a e hana mai i ka mea maikai loa non, a mai hana mai oe i kekahi hana mana au e hoopoino ai iaia elike me kau i hana ai i kekahi poe kanaka opio a uʻi no hoi elike me ia mamua aku nei.

            "Ua nui koʻu aloha i kaʻu keiki me he mea la naʻu ponoi oia, a e hoohikiwwe aku ana oe i koʻu mau la no ka lua kupapaʻu in a e hana mai ana oe iaia i kekahi mea e hoehaehaia ai koʻu noonoo, ʻa i kekahi hana hoi mawaho ae o kau i hookiki mai ai imua oʻu ma ka la aku la i nehinei, oiai ma ia mau hoohiki au i loaa ai iaʻu ka manaolana no kona palekana."

            "He mau hoohiki ia aʻu i hoakaka aku ai ia oe aʻu e hooko aku ana me ka oiaio loa, i lohe oe," wahi a ka moiwahine o ka pane ana mai," a ke olelo hou aku nei no au ia oe ia mea hookahi e malama loa ana au i kaʻu hoohiki, a e loaa aku ana no ia oe a iaia pu na mea a olua e hauoli iho ai.

            "Ke ice nei au aole ka i lawa loa kou hoomaopopo ana mai noʻu ; me he mea la ke ike mai nei oe iaʻu maloko maio kekahi uhi, in a e ike ana au i ko keiki he kanaka oia i kupono, elike me koʻu makemake, a he hoaloha waiwai loa e hauoli nui ana au no ka hooiaio ana aku ia oe ua pomaikai loa au i kona lilo ana he hoaloha maikai loa noʻu."

            I ka pau ana o kana kamailio ku malie iki iho la oia i loaa i manawa no ka Moi Bedera e nana aku ai i kona helehelena uʻi, eia nae, aohe no i ka uʻi a ke kanaka e hoohihi aku ai.

            "Aohe no i uʻi, aole hoi e hihi o kona lilo ana he moiwahine a na kona waiwai ame ka hanohano i pai ae la iaia a hihimanu ke nana aku.  Aohe no e loaa aku ka uʻi o ke Kamaliiwahine Giohare o ke aupuni Kai, ke nana aku oe ia la maemae i ke kai ka pua o ka hala," wahi a ka Moi Bedera o ka nalu ana iho.

            "E uʻi wale no ka helehelena o ia wahine a pupuka ka hana e pupuka ana ia uʻi, o ka uʻi i hui pu ia me ka maemae o ka olelo, ka hana ame ka manao oia ka wahine uʻi oiaio," wahi hou ana o ka namunamu ana iho.

            Oiai ka Moi Bedera e nalu ana iloko on a a e haka pono pu aku ana hoi kana nana ana i ka moiwahine, huli mai la ka elemakule lokomaikai e nana iaia a hopu mai la i kona lima a kaʻi aku la imua o ka moiwahine a i aku la :

            "E ka madame maikai, e hoike hou aku ana au ia oe no ka manawa hope o kaʻu keiki hanauma keia, elike no me ia aʻu i hoike mua aku ai ia oe i nehinei au no e poina ole la ; ke haawi aku nei au iaia malalo o kau malama a hoohana ana paha, a eia kaʻu noi ia oe, e pono oe e hookuu mai iaia no ka hele ana mai e ike iaʻu i kekahi manawa."

            "Heaha no hoi auanei koʻu mea e aua ai iaia?  Ina e makemake ana oia e hele mai e ike ia oe e hookuu mai ana au, a i ole o maua like no paha ke hele mai o hoomahuka ma-lu aku auanei oe iaia a nele hoi au i ka hoaloha," wahi a ka moiwahine.

            No ka hooiaio ana mai i kana olelo, a i ole no kona hauoli loa paha no ka hookoia ana aku la o kona makemake, haawi mai la ia Abadala i kekahi ekedala i hele a hua-ke i na dala lelo, hookahi kaukani apana dala ma ke gula.

            Ua hoole aku la ka elemakule i kinohi i ka lawe ana mai ia mau dala, aka, no ka hoopaakiki loa mai o ka moiwahine i ka haawi, oiai nae, o kona iini no ia e ku aku ana ia manawa, aohe hiki iaia ke hoole hou aku, a o kona lalau aku la no ia a paa mai la iloko o kona lima.

            O ke kauoha koke ae la no ia o ka moiwahine i kekahi o kona mau kauwa e kaʻiia mai ka lio i hoomakaukau mua ia no ka Moi Bedera, he lio a pu-ki mai la i na kaula kaohi.

            "Hookahi aʻu mea i poina aole i ninau aku nei ia oe." wahi a ka moiwahine ia Abadala, "owai ka inoa o ko keiki?"

            "O Bedera," i pane aku ai o Abadala.

            "O, he kuhihewa nui a kamahao loa keia," i pane mai ai ka moiwahine ; "o ka pololei loa a kapaia ai o kona inoa o Sekema, o ka manao o ia huaolelo 'ka la,' ma kahi o ka 'mahina piha,' no ka mea, o ka manao o ka huaolelo Bedera 'ka mahina piha,' a o ka huaolelo Sekema 'ka la.' O Sekema kona inoa pololei e kapaia ai, no ka mea, ua like loa oia me ka la."

            I ka huakai i hoomaka aku ai e kaʻi no ka halealii hahai aku la ka Moi Bedera mahope o ka Moiwahine Labe, eia nae na kauoha mai la ka moiwahine iaia e hele aku ma kona aoao hema, no kona makemake e pili mau aku oia ma kona aoao.

            I ka ike ana mai o ka lehulehu i ka maemae o ka helehelena o ka Moi Bedera, nana mai la lakou maluna on a me ka minamina, a ma kahi o ko lakou haawi mai i ko lakou aloha maluna o ka moiwahine ua nana mai lakou maluna on a me ka hoowahawaha loa, mamuli o na hanaino lapuwale loa a ka moiwahine i hana aku ai maluna o kekahi mau kanaka opio mamua aku a lakou i ikemaka ai.

            "Ka, ka wahine ino hoomanamana," wahi a kekahi, loaa hou mai la no ia kanaka opio ana e hana la[uwale hou ai ; in a aia iloko ou ka manao koho hewa kahi i hana ai e hoomauia aku ana no kekahi manawa loihi kou laki, e hiki mai ana no he la e haule ai oe i ka honua ; ua hanohano oe a ua kiekie no hoi i kena la, aka, e hiki mai ana kekahi ino nui mahope au e auwe iho ai."

            "Aole i nele keia mau olelo i ka hooiaio ia e ka moi no ka Abadala mau mea apau i kamailio mai ai iaia no ke ano oiaio a lapuwale o ka moiwahine, aka oiai aole hiki iaia ke hilinai maluna o kona hoaloha elemakule a lokomaikai no ka hookuu ana ae iaia mai ka poino mai, alaila, haawi holookoa aku la oia iaia iho i ka Mea Mana Loa, me ka hilinai nui i ka mana mai ka lani mai no ka hooholo ana mai no kona hopena.

            "Aole i nele keia mau olelo i ka hooiaio ia e ka moi no ka Abadala mau mea apau i kamailio mai ai iaia no ke ano oiaio a lapuwale o ka moiwahine, aka oiai aole hiki iaia ke hilinai maluna o kona hoaloha elemakule a lokomaikai no ka hookuu ana ae iaia mai ka poino mai, alaila, haawi holookoa aku la oia iaia iho i ka Mea Mana Loa, me ka hilinai nui i ka mana mai ka lani mai no ka hooholo ana mai no kona hopena.

            Ia hoea ana aku a ka huakaʻi i ka halealii, a i kona lele ana iho ilalo hele mai la ma kahi a ka Moi Bedera e ku ana a haawi mai la i kona lima no ke kokua ana mai i ka lele ana aku ilalo, alaila, oiai laua e ukaliia ana e na wahine ame na luna o na kanaka i poaia, komo nui aku la noloko o ka halealii.

            ia manawa lawe aku la ka moiwahine e hoomakaikai i ka Moid Bedera i na rumi apau oloko o ka halealii i hoo@aniia me na mea gula ame na pohaku momi, he mau rumi i piha me na lako hale nani o na ano apau.

            O kona rumi moe kana wahi hope loa o ka lawe ana aku e hoomakaikai i ka Moi Bedera, a malaila aku a i ka lanai poepoe ma ka aoao akau o ka halealii, he lanai e huli pono aku ana i kekahi kihapai nani i piha me na mea kanu no lakou na pua aala loa i leweia mai na wahi like ole mai o ke ao.

            Haawi aku la ka Moi Bedera i kona mahalo no kana mau mea apau i ike ai me ka haawi ole aku i kekahi kanalua iloko o ka moiwahine e hoohuoi iho ai aole oia he keiki na Abadala.

            Maluna o kekahi mau kumuhana lehulehu ka laua kamailio ana no kekahi manawa ahiki i ka hele ana mai o kekahi kauwa e hoike ia laua ua makaukau na meaai no ka aina awakea e kali wale ana no o ko laua hoi aku.

Ua eu koke ae la ka moiwahine âme ka Moi Bedera a u haele like aku la no ka rumi aina ; o na pa, na pola ame na mea e ae apau he gula wale no e muu mai ana.

            Ua noho like iho la laua ilalo a hoomaka iho la e ai.  Aole laua i inu iki i kekahi kiaha lama ahiki i ka laweia ana mai o na huaai, a ia wa i kauoha aku ai ka moiwahine e hoopihaia mai kona kiaha me ka waina maikai loa, a iaia i owala ae ai no ke ola o ka Moi Bedera, paa iho la no oia i ke kiaha a kauoha aku la i ke kauwa e hoopiha hou mai, alaila, haawi aku la i ka Moi Bedera e inu, a lalau mai la no hoi oia me ka haawi ana mai i ka mahalo ma o ke kunou ana mai me ka haahaa loa, a i mai la e inu ana oia no kona ola.

            Aneane ma keia manawa a laua e u inu ana, he umi mau kaikamahine i komo mai me ka lakou mau mea kani, a hookani mai la me ka himeni pu ia manawa hookahi, elike me ke ano hana mau a na alii apau.

            Ua lilo ke kani o na pila hoene a na kaikamahine, ka hoene pu o ko lakou mau leo, hui pu iho me ke kahiohio o ka waina, i mau mea hoonanea loa i na alii ahiki i ke komo loa ana aku i na hora kuliu o ke aumoe.

            Oiai lauae nanea ana a i ka iho ana iho o ko kowaluna poe, a pii ae la no hoi ka wela o ke kiaha waina, ua poina loa ae la ka Moi Bedera he wahine kilokilo ka moiwahine, a @a nana mau aku oia iaia ma ke ano he wahine wale no i oi ae ka uʻi ma ke ao a puni.

            I ka ike ana mai o ka moiwahine ua luluu loa ka Moi Bedera ana e ike ole mai ana he moi keia, ihea iho la la hoi ka ike kilokilo ana, elike me kona makemake, haawi aku la oia i ke kauoha i kana mau kauwa wahine ame na luna i poaia e hoi no ko lakou mau rumi.

            Ma kekahi la ae, i ko laua ala ana ae, hele like aku la laua no ka hale auau ; i ka pau ana mai o ka ka moi auau ana, haawi aku la na kauwa wahine i na lole lilina i hoomakaukau pu ia nona.

            O ka moiwahine kekahi i kahiko iaia ma ia la me na lole nani loa i hoomakaukau mua ia nona, mamua o na lole aua o ka aahu ana ma ka la mamua iho, a i ka hui ana mai me ka moi u hoi like mai la noloko o kona rumi maloko o ka halealii, a oiai ua makaukau na meaai ia manawa, ua noho like iho la laua e ai i na meaai ono loa i hoomakaukauia mai e ke kuke.

 

MOKUNA XV.

 

            Me keia ano iho la ka Moiwahine Labe o ka hoohauoli, ka hooluolu ame ka hoopunihei ana i ka noonoo o ka Moi Bedera no na la he kanaha, elike me kana ano hana mau i kana mau ipo apau o na la mamua aku.

            Ma ka po o ke kanaha o na la, oiai o laua wale no, a i ka wa a ka moiwahine i manaoio ai ua hiamoe loa ka Moi Beder, ala ae la oia me ka hoonioni ole aku i ka Moi Bedera ; o ka hoomaka ana keia o kana hana lapuwale a nana ole ae i kana mau hoohiki imua o Abadala, ana o ka hoopaa ana iaia iho.

            Ua kualana loa ka hiamoe kulipolipo o ka Moi Bedera ia manawa, a no kona manao he ano hana kamhao ka ka moiwahine a e hana mai ana pahaʻi kekahi hana e hoopoinoia mai ai oia, no ka mea, he haʻo wale no nei kakahiaka ala wanaao o ka moiwahine, hoomoemoe loa iho la oia me ka onioni ole, a hoaiki aku la kana nana ana i ka moiwahine ame kana mea e hana mai ana.

            I kela ala ana ae o ka moiwahine huki mai la oia i kekahi ume o ka pahuku, a lawe mai la i kekahi wahi pahu uuku i piha me ka pauda.  Aole i maopopo i ka Moi Bedera ka mea oloko o ia wahi pahu, eia iho a i ka lu helelei ana a ka moiwahine iluna o ka papahele, akahi no oia a ike aku, eia ka he pauda lenalena elike me ka olena hooluu ka[pa paʻupaʻu o ke au kahiko.

            Ua lu heleleiia aku keia pauda maloko o ka rumi, a mahope o ia lu ana aku ana ua loli ae la ka pauda i wai aliali loa, elike me ke aliali o ka wai e kahe mai ana mailoko mai o kekahi mapina, a no ia ike ana aku a ka Moi Bedera ia mea kamahao loa i kona noonoo ua hookahaha nui ia oia ia manawa, alaila hooiaio loa iho la oia i kana mau mea apau i lohe ai mai a Abadala mai.

            Ia manawa ua naka e wale ae la no kona kino no ka piha i ka makaʻu, aohe nae ona oni iki, ke hoomau loa la no i ka moe hoololo ana, i ole e loaa aku ka ike i ka moiwahine ua ike aku oia i kana mau mea apau e hana mai ana, a i manao iho ai no ia on a ea, aohe oia i ala.

            Ke hkilo pono aku la oia no ka ka moiwahine hana hope ; kii aku la oia i kekahi kiaha a hoopiha iho la ia kiaha me ka wai e lana ana, alaila, ninini iho la iloko o kekahi pa hana meaono he palaoa koloko, a me ia palaoa oia i hoowali iho ai.

            I mea aha la i ka ka Moi Bedera noonoo iho, aka oiai oia e hoomau aku ana i kana nana ana ahiki i ka wali ana o ka palaoa, kii aku la i kekahi mau omole laau make mailoko mai o kekahi mau pahu lehulehu like ole, a hana iho la a lilo i meaono nui, waiho iho la iloko o kekahi pakini e hoomoaia ai o ka meaono.

            O kana hana mahope iho oia no ka ho-a na ae i ahi e hoomo-a ai i ka meaono, a i ka a ana ae a wela pono no hoi ke kapuahi, hookomo aku la i ka pa o ka meaono me ka laaumake iloko iloko o ke kapuahi, alaila hoihoi hou aku la i na omole ame na mea e ae apau ana o ka lawe ana mai ma ko lakou mau wahi.

            O ka wai e lana ana iluna o ka papa hele he manawa pokole ua nalowale koke iho ia iloko o ka imo ana a ka maka i ka manawa i hoopuka ae ai ua moiwahine la i kekahi mau huaolelo a ka Moi Bedera i lohe ole aku ai.

            I ka wa i moʻa ai o ka meaono a lawe mai la mailuna mai o ke kapuahi lanahu, ua hele no ka hoi a moʻa maikai e ike ole iho ai no kekahi maka holona i ka like ole mawaena o ka meaono maikai ame nei meaono laaumake iloko, hoihoi aku la noloko o ka hale pa, alaila, hoi hou aku la iluna o ka moe me ka nihi malie loa o ala ka Moi Bedera, me kona manao ua nalowale kana mau hana ino apau i na maka o ka Moi Bedera.

            Me ka nihi malie loa ia hoi hou ana aku iluna o ka moe, a ke hoononolo loa la no hoi ka Moi Bedera i kona mau pukaihu me ka hiamoe hoopunipuni loa, a no ia ano o ka Moi Bedera aole i loaa iki i ka Moiwahine Labe kekahi manao hoohuoi ua ikeia kana mau meahuna o ka hana ana i ka manawa mamua iho.

            Iloko o na la he kanaha i hala aku, oiai ka Moi Bedera e hoopuniia ana e na mea nani o ka halealii, a e hoohauoli mau ia ana hoi kona naau e na olelo ame na hana pulama hoopunipuni apau a ka Moiwahine Labe, ua palaka loa oia i ka hoomanao ana ae no Abadala, kona hoopakele, a o kona kamaaina maikai loa hoi nana i malama a i hookipa maikai iaia iloko o na la malihini loa o kona hoea ana mai ia aupuni.

            Aka, i keia la, i ka manawa ana i ike ai i nei ano hana a ka moiwahine, he hana ana i koho io ai he poino aku paha kona hope, alaila, ala mai la iloko o kona noonoo ka hoomanao ana nona, me he mea la aia mau kona helehelena imua o kona mau maka, a he manawa kupono loa hoi keia nona e launa aku ai me ia ia hoakaka aku i kana mau mea apau i ike ai, i hiki ai e loaa kekahi mau oleloaʻo maikai mai iaia mai no kona palekana, elike me ia ana e hoomanao ana no na oleloaʻo a Abadala iaia mamua o kona haalele ana aku iaia.

            Iaia i ala ae ai, hoakaka mai la oia imua o ka moiwahine i kona makemake e ike ia Abadala, a noi mai la i ka moiwahine e ae aku iaia e hele e ike, oiai, ua loihi na la o kona kaawale ana mai kona makuakane mai, a he mea pono iaia e hele aku e ike no ka nana ana aku i ke ano o kona noho ana.

            He noi keia ana i nele ole ke ku-eia aku e ka moiwahine aloha hoopunipuni i ka i ana aku : "Alaila ua manaka koke iho la anei oe - aole au e olelo aku ana no kou manaka i keia wahi, no ka mea, he nui a lehulehu wale na mea e hoohauoliia ai kou noonoo, ua lako oe maanei me na mea apau e oluolu ai kou noho ana, o kau mau mea apau e makemake ae ai ua akoakoa imua o kou mau maka, aka no kou noho pu ana me aʻu, ka moiwahine o keia aupuni i haawi aku i kona aloha paumako maluna ou, a i hoike aku hoi i na hooiaio he nui no kona paulele maluna ou wale no?"

            E ka Moiwahine kiekie loa," i pane mai ai ka Moi Bedera, "pehea hoi e hiki ai iaʻu ke manaka iho i na hana maikai he nui au e ka moiwahine i kau mai ai maluna oʻu, aohe aʻu mea e kaniuhu iho ai, ua lako au ia oe ma na mea apau, aole oʻu wahi hemahema iki, o ka nohoalii wale no kahi i koe aku iaʻu?

            "Aole loa au i konakona iho la ia oe, aole no hoi oe i pakuwa iho la iaʻu, a no ia kumu la koʻu manao ana e hele aku e ike i koʻu makuakane ; aole ; e hoomanao oe he aloha no au i koʻu makuakane, a ua liu loa no hoi nei mau la aʻu o ke kaawale ana mai iaia mai, a oiai ua hu ae la hoi koʻu aloha iaia i nei manawa, pela hoi au i noi aku la ia oe e hookuu mai e hele e ike aku, o koʻu ike wale aku no ka hoi la ua lawa ia no ka hoomama ana ae i koʻu aloha makua.

            "O kekahi manao nui o koʻu makemake ana iho la e hele oia no ka hoike ana aku iaia i na mea maikai he nui au i haawi mai ai iaʻu ; ua hoohanohano mai oe iaʻu elike me kau e hoohanohano aku ai i kekahi moi, oiai nae, he wahi kanaka lopa haalele loa wale no au, a i kumu hoi nona e ike iho ai aohe kahi i lalapa ai nona.

            "O ka manna hope aʻu i hoike aku la ia oe oia ka oi aku o ke koikoi mamua o na mea e ae, a no ka mea, ua maopopo iaʻu o kona aloha nui eia maluna oʻu wale no, oiai aohe ana keiki e ae owau wale no, a oiai hoi aole oʻu makemake e loaa aku iaia ka manao ua hoopoina au iaia ma o koʻu hoopanee ana a hala kekahi manawa loihi me ka hele ole aku e ike iaia ana paha e olelo iho ai i kuu awaawa a lokoino.

            "No keia wahi la hookahi wale no hoi au i manao iho la e hele a e hoi mai ana no au e noho me oe ahiki i ko wa e konakona a hoowahaha iho ai iaʻu, a piikoi hou aku ana oe i ka mea okoa," a hooki iho la ka Moi Bedera i kana kamailio ana me ka houweuwe ana iho me ka maalea, i manao mai ka moiwahine ua nui iʻo kona aloha ia Abadala.

            "Ina hoi ha pela, o hele," i pane mai ai ka moiwahine me ka hakanu ; "ke ae aku nei au ia oe e hele a mai noho loa aku oe, no ka mea, ua maopopo ia oe ka nui o koʻu aloha nou, aohe no hoi he hiki iaʻu ke noho hookahi i ka hale nei ke nele koʻu ike aku ia oe."

            Ia manawa o kona haawi koke aku la no ia i ke kauoha i kekahi o na kauwa e hoomakaukauia mai kekahi lio no ka Moi Bedera e holo ai, he kauoha i akaaka ma-lu iho ai ka Moi Bedera iloko wale iho no on a.  Ike ole ua moiwahine kilokilo hoomanamana nei la !

            I ka makaukau ana mai o ka lio a laweia mai la a ke alapii mamua o ka helealii, haawi ae la ua mau alii la i na muki ana, me ka pane ana aku o ka moiwahine i kekahi mau huaolelo e ike ia mai ai he aloha iʻo, he piha nae i ka maalea, "e malama mau oe i kuu aloha."

            Ia ee ana aku a ka Moi Bedera noluna o ka lio, huli mai la e haawi i ke aloha a wehe aku la ka ee me ke kani ana iho o kana aka no ke kaawale ana aku.

            Ua piha hauoli loa ka elemakule Abadala i ka ike hou ana mai i ka Moi Bedera, lele mai la e apo, a apo aku la no hoi ka Moi Bedera, nolaila, ua lilo ia hana a laua ia manawa i hana hiki ole i kekahi mea ina e nana mai ana ia manawa, ke hoohuoi iho aole oia he keiki na Abadala.

            I ko laua haule like ana iho iluna o na noho, i mai la o Abadala i ka Moi Bedera, "pehea kou noho ana me ka moiwahine hoomanana, kela wahine hiki ole ke hilinaiia aku?"

            "He maikai wale no maua noho ana me ka hauoli ma na ano apau mai koʻu hoi ana aku a hala na la he kanaha, a ma ka po nei wale no i ike aku ai au i kekahi hana a ua moiwahine la aʻu i hoohuoi nui ai, a no ia kumu au i hoea mai la imua ou i keia la.

            "Iloko o na la i hala aku ua hoike mai oia i kona pulama ame kona aloha ma kana hana a ma ka olelo, koe aku oloko hananui ia kaua, a ua hoao mau mai no hoi oia e hoohauoli iaʻu ma na mea apau ; ua hoolako mai i na mea apau aʻu e ike ole iho ai i koʻu nele ame koʻu hemahema i kekahi mea ; ua haawi mai i kona manawa ame kana noonoo nui ana no koʻu pono, eia nae, iloko o ka nui o ia mau mea ana e hana mai ana noʻu, aole no i nele ka makaala ana ma koʻu aoao, mamuli o koʻu lohe mua i kau mau mea apau i kamailio mai ai iaʻu nona.

            "Ma ka po nei ua ike aku la au i kekahi mea ana o ka hana ana mai, me kona manao paha ua hiamoe loa ia au a aole e ike aku ana i kana mau hana, i hoalaia ae ai koʻu manao hoohuoi e hana mai ana oia i kekahi mea e poino ai au."

            Alaila hoakaka piha aku la oia i na mea apau a ka moiwahine i hana ai, oia ka hana ana i meaono, elike me ia i pau mua ae nei i ka ikeia e oe, e ka mea heluhelu, a ma ka hopena o kana mau olelo, i aku la :

            "E hoike aku au ia oe i ka mea oiaio ua poina loa au nou, mamuli o ke koia e ke aumiki ame ke auka, ahiki iho la i ka po nei, akahi no a ulu ae ka hoomanao iloko oʻu nou ; aneane loa e pau kaʻu mau hoomanao ana nou ame na oleloaʻo apau au i hoakaka mai ai iaʻu e makaala loa no kela moiwahine.

            "Mai mau no paha koʻu noho nanea a palaka in a aole au i ikemaka aku i na mea apau a ka maoiwahine o ka hana ana mai i ka po nei, a ua pau pono no hoi ia mau hana ana iaʻu i ka ikeia aku mamuli o kona manao ana oia mau no koʻu kaia loaia i ka hiamoe, eia nae, he hiamoe hoololo wale iho no ia aʻu.

            "Ua lilo kela hana ana i mea noʻu e piha ai i ka makaʻu a e hahaki ana oia i kana mau hoohiki i haawi mai ai ia oe, nolaila, noonoo iho la au aohe oʻu hoopakele e ae, a oiai ua aʻo mua mai oe iaʻu in a au e ike ana i kekahi hiohiona o ia ano hana ana e hele koke mai au e hoike aku ia oe, nolaila, hoomanao koke ae la au nou, a oia koʻu kumu la o ka hoea ana mai la imua ou i keia l."

            "Alaila aole oe i hoopunipuniia, no ka mea, ua ikemaka aku la oe i kana mau hana elike me kaʻu i hoakaka aku ai ia oe nona," wahi a Abadala o ka pane ana aku me ka aka ana iho ; "aole loa he mea hiki ke hoololi ae i ke ano lapuwale o kela moiwahine, aka mai makaʻu oe i kahi mea ana e hana mai ana nou.

            "Ua ike au i ka hana ana i manao ai e hoopoino mai maluna ou, e hoi hou aku ai ia hana ino hoopilikia ia oe maluna ona. E hoomanawanui iki a hoakaka aku au ia oe i kau mea e hana aku ai maluna ona e hoi aku ai no kana hana poino maluna on a.

            "Ua pomaikai oe i kou hoohuoi ana no kela meaono ana o ka hana ana, a iloko no hoi o ka manawa kupono loa, no ka mea, in a oe i hoololohi aku nei a kekahi manawa okoa, he pepeiao koʻu e hoolohe aku ua lilo oe i manu a i @ holona paha, elike me kana e makemake ai e hoololi ae @ oe.

            "Oiai kela moiwahine aole i maa ia ka hoololohi aku i ka hoololi ana ae i kana mau ipo mamua a hala mahope o na la he kanaha, a ma kahi la hoi o kona hookuu mai ia @ e hele me ka maikai, ua hoololi ae la no nae oia ia la@ mau holoholona, a me ia mau holoholona i hoololiia ae la i mau hoopiha aku ai oia i kana mau ululaau, na paka, ame na whi lehulehu e ae o kona aupuni.

            "Ma ka la aku la no i nehinei koʻu noonoo ana e lawe i kekahi mau keehina-hana e hoopau loa ia ai ka hana a ke a moiwahine ino, no koʻu noonoo honua ana iho e hana @ ana no oia i kekahi hana e hoopoinoia mai ai oe.

            "Ua loihi na la o ka auwe ana o ka honua no kana mau hana ; he manawa kupono loa keia e pono ai e halawai aku oia me kona hopena a e pono e loaa koke aku iaia ia hopena, i kaawale aku ai oia mai keia aupuni aku."

 

MOKUNA XVI.

 

            Ua piha loa ka elemakule Abadala i ka huhu ia man@ wa, a i kona hooki ana iho i kana kamailio ana, haawi mai la oia iloko o na lima o ka Moi Bedera elua mau mea@ ana o ka hoomakaukau mua ana no ka mea, ua maopopo iaia ma ia la e pau ai na la he kanaha, elike me kona maa i ka hana a ka moiwahine i ka poe mamua aku, ana no @ ka haupu wale ana ae e hoea aku ana ka Moi Bedera imua on a ia la.

            "E malama pono loa oe i kena mau meaono aʻu o ka haawi ana aku la ia oe, no ka mea, me kena mau meaono e hiki ai ia oe ke hoopuhili aku i kana mau hana ino e hana mai ana ia oe ; o kela meaono au o ka ike ana aku, ana @ o ka hana ana he apukoheoheo ia nou e make ai, in a @ kou ai nei.

            "Wahi au i kamailio mai nei iaʻu," wahi hou ana, "he meaono ka kela wahine hoomanamana o ka hana ana i ka po nei ; he meaono ia ana i hana ai no ka hanai ana mai ia oe, e hoomaopopo iho oe ; e makaala loa oe i kekahi apawa o ia meaono, e lawe mai no oe i kekahi apana ana e haawi mai ana, mai ai nae oe ; ma kahi o kou hookomo ae ia apana meaono ana o ka haawi ana mai ia oe, e ai ae oe i kena meaono aʻu i haawi aku la me kona ike ole mai.

            "I ka manawa ana e manaoio iho ai ua moni aku oe i kana meaono o ka haawi ana mai, ia manawa oia e ho@ mai ai e hoololi ae ia oe i kino o kekahi o na holoholona, a i ka nele ana o ka hiki iaia ke hoololi ae, a ike iho i ka hoka on a, ia wa oia e hoao mai ai e hana i kekahi hana e ike aku ai oe he ano hana paani wale no nana, aia nae i@ on a ka ehaeha no ke ko ole ana o kana hana lapuwale maluna ou, a e manao iho ana oia no ka lawe ole paha o na mea make ana i hana ai iloko o ka meaono i poino ole ai oe.

            "Me ka meaono i koe aʻu i haawi aku la ia oe olelo aku oe iaia i ka ono ame kona akamai i ka hana ana,  alaila haawi aku oe ia meaono iaia a olelo aku me ka hoomalimali e ai aku oia.

            "E ai aku ana oia me ke kanalua ole i mea nou e ike aku ai he hilinai no oia maluna ou, aole nae he oiaio o kona aloha ia oe.

            "I ka manawa ana e ai aku ai i kekahi apana o ka meaono au e haawi aku ana iaia, lalau aku oe i kekahi wai iloko o kou lima a kiola aku ma kona mau maka, a olelo pu aku oe ia mawa hookahi i keia mau huaolelo :

            "E haalele koke oe i kena kino ou i nei manawa a e loli ae oe i moo, a i ole, ma kekahi ano kino e ae paha au e makemake ai.

            "A pau keia mea i ka hanaia e oe, mai noho hou aku oe malaila, hoi koke mai oe ianei me aʻu me ko lawe pu mai i ua holoholona la, a naʻu ia e aʻo aku ia oe no kau mea e hana hou aku ai no ua holoholona la.  E hana oe i keia mau mea apau me ka makaala loa, no ka mea, o kou ola keia aʻu e hoike aku la ia oe.:

            "Haawi aku la ka Moi Bedera i kona mahalo ia Abadala no keia mau hoakaka apau ana no kona pono, a no kona lokomaikai ma o ka hooikaika ana e hoopakele ae iaia mai na poino mai a kekahi wahine kilokilo a hoomanamana ino loa e hana mai ana maluna on a.

            No kekahi manawa pokole mahope iho ko laua hoomau ana i ke kamailio a ia pau ana haalele mai la iaia a hoi aku la i ka halealii.

            Iaia i hoea aku ai i ka halealii hoikeia mai la iaia e ke kanaka kahulio ko ka Moiwahine Labe uluhua loa me ka hoonaukiuki pu no kona hele loihi loa, a aia ka moiwahine maalea iloko o ke kihapai kahi i kali ai nona.

            "Kali noʻu," i namunamu iho ai ka Moi Bedera, "ka, ka wahine ino hoopunipuni ; he uluhua kona aole no kuu hoe koke ole mai, aka i hooko koke mai ai oia i kona manao pepehikianaka maluna oʻu, i make koke au a i ole loli ae paha i holoholona, alaila kani kana aka."

            Me keia manao oia e nalu ana ahiki i ka loaa ana aku o ka moiwahine iaia iloko o ke kihapai, a ia ike ana mai n@ ana he mea mahamaha hoi kau la, me ka mama wale o ia hele ana mai ana a kokoke loa, a i mai la :

            "Makena no hoi ka loihi o kau hele ana ; e manao ana paha hoi oe ahohe aloha iloko oʻu nou ; aohe mea oiaio e ae mamua o ka mea i kamailio mau ia no ka nalewale wale ana no o kekahi mea kino i alohaia i hoonui ia aku ai ke aloha iloko o kekahi mea.  Owau nei ia mea i lohe oe !

            "Aohe i loaa iki iaʻu kekahi mea e hoohouoliia ae ai o koʻu noonoo mahope o kou kaawale ana aku nei, oiai no nae au e hooikaika ana e hoohauoli iaʻu iho.  Aia no oe a a noho mai imua o koʻu alo, olu iho la au ; i koʻu noonoo iho me he mea la ka hoi he makahiki okoa kou kaawale ana aku nei mai koʻu manawa i ike hope ai ia oe ; in a oe i hooulolohi loa aku nei, in a ua hele okoa aku nei no au e huli ia oe," wahi a k@ wahine piha maalea o ka pane ana aku me ka hoouweuw@ ana iho.

            "E ka madame maikai," i pane aku ai ka Moi Bedera, "auhea oe e kuu aloha, owau pu kekahi i uluhua no ke kamailio loihi loa mai o kuu makuakane ; ua hele pu no au a kua uluhua i ke kaawale loihi ; makemake loa au e hoi koke mai, no kuu aloha wale mai no ia ia oe, aia no a ike aku au ia oe oʻu iho la au he wai kolalo.

            "Ua hele kuu makemake a nui e hoi koke mai, aka, @ noo iho la hoi au he hana maikai ole naʻu ka hoole ana aku i kekahi mau minuke maikai loa o ka launa ana me ka makua i hoike mai i kona aloha nui maluna oʻu, no ka mea, e ike iho no oe nou iho, ua loihi na la o ke kaawale ana akahi no ka halawai hou, a ua nui ke aloha o ka makua i ke keiki a pela hoi ke keiki i ka makua.

            "Ua makemake oia iaʻu e hooliuliu loa aku i koʻu noho ana me ia, aohe nae oʻu hoolohe aku i kana kaua mai, o koʻ@ ku ae la no ia a hoi mai nei i kahi au, e ke aloha, i kono ae ai, mahope o koʻu ai ana mai nei i kekahi meaono a hooko@ mai nei no au i kekahi nau."

            Ua owiliia kekahi meaono e ka Moi Bedera iloko o kekahi hainaka maemae a iaia i wehe ae ai haawi aku la i ka moiwahine e ai, a i pu aku la : "E oluolu oe e ai aku i keia meaono, e kuu mea aloha, a mai hoole mai hoi oe."

            "Heaha hoi auanei kaʻu hoole ana aku ua laweia mai la ia e kuu aloha i keia loa ; e ai aku ana au ia no kou pono a no ka pono o ko makuakane.  Mamua nae hoi o koʻu ai ana io i keia meaono au i haawi mai la ea, e oluolu hoi oe e ai aku i keia meaono, he meaono aʻu i hana iho nei i kou wa i hele aku nei."

            "O, kuu moiwahine nani," me ka lalau ana aku i ka mea ono mai ka lima mai o ka moiwahine me ke kunou pu ana aku ia manawa, a me na ano hoohaahaa no hoi a pau a ka moiwahine e ike mai ai aohe on a manao e ae o ke aloha wale no iaia.

(Aole i pau)