Ka Nupepa Kuokoa, Volume LVI, Number 18, 3 May 1918 — Page 7

Ka Nupepa Kuokoa

KE KILOHANA POOKELA NO KA LAHUI HAWAII.

 

            O kekahi kumu nae o ko Rose holo hou ana i ka hokele, no kona hopohopo ,aole paha i loaa kana palaplala i kakau ai ia Hawila ma, a in a no a loaa, hooko ana paha oia elike me ka ia nei kauoha, aole paha pela i kona ikaikaia mai ai kona manao, e hele hou i ka hokele e nana ai in a paha aia no o Hawila ame Oto Beriana malaila kahi i noho.

            Me ka mama apau i loaa ia Rose, ke holo la oia, aia ka pono o ka hoea e aku i ka hokele, a he oiaio ua hiki aku la ua kaikamahine nei i ka hokele, a iloko o ka manawa pokole, ku ana mawaho o ka puka o ko Hawila rumi, a kikeke aku la mawaho.

            "Owai kela mawaho?" i ninau mai ai o Hawila maloko mai, i kona wa i lohe mai ai i ke kikeke ana aku o kekahi mea ma ka puka o kona rumi.

            "He hoaloha, i hele mai la au e hoike aku ia oe ame kou hoa, eia ke keiki a ke kiaaina ke hele mai nei me kona mau naita he umi, no ka pepehi ana ia olua, nolaila i hele e mai la au e hoike aku ia olua, aole he manawa hou aku no ka hoohakalia ana, aka e haalele koke olua i keia hokele, a hele aku no kahi e palekana ai ko olua mau ola."

            Ua hoomaopopo mai la Hawila ,o ka leo no kela o Rose, nolaila kii mai la oia e wehe i ka puka, o ka mea apiki nae, aole o Rose mawaho kahi i ku ai ,aka ua nalowale aku ua kaikamahine nei iloko o ka puahia nui, oiai ua hooko aky la no oia i kana hana, a he mea pono hoi e kaawale koke aku oia mai ka hokele mai, mamua o ka hoea ana aku o kona haku, a ikeia hoi oia e kela poe.

            Kahea kau la o Hawila ia Oto Beriana, no na mea a Rose ikamailio mai ai, a ia wa no i hoike koke aku ai oia i kona manao i kana aikane, aole laua e pono e noho hou aku maloko o ka hokele, aka e hele laua i ka holoholo, o hoea mai auanei kela poe maloko o ka hokele, o ka hooukaia no ia o kekahi kaua hokahekoko mawaena o lakou.

            Oiai ua makaukau laua ma na ano apau, nolaila hoomaka mai la laua e iho nolalo o ka hokele, ia laua nei no nae a ku ana mawaho o ka puka, o ka wa no ia i maalo ae ai o kekahi kanaka i kahikoia me kekahi kuka koloka loihi, aole no nae o laua nei nana aku iaia, aka hele aku iaia, aka hele aku la laua nowaho o ke alanui, a ke ike mai la laua i ka hookolo aku o kela kanaka mahope o ko laua meheu, ia wa i komo mai ai na manao hoohuoi iloko o kaua o kekahi kela o na kanaka limakoko.

            Oiai no nae laua e hoomau ana i ka hele ana, ua nalowale honua iho la ke kanaka me ke kuka loihi a laua i ike ai, o kona wahi nae i nalowale aku ai, ke noho la laua me ka poiliuli, eia nae aole no o laua nana iaia, ke hoomau la ho laua nei i ka hele ana ma ke alahui, me ko laua hoomamapono uo nae i ko laua mau pepeiao, no ka lohe aku no i kekahi nakeke, ua makaukau mau laua i na manawa apau.

            Ke nalu la o Hawila ma i kahi i nalowale honua aku ai o kela kanaka, a ua hoopihaia aku no hoi laua me na manao kahaha nona, eia nae ia laua nei no e nalu ana, puiwa hikilele ae la laua, i ka haluky o kekahi mau kapuai wawae mahope pono kay o laua, i nana mai paha ka hana ihope he poe kanaka i kahikoia me na kuka holoka loloa ke hele aku ana.

            ke hoolalau wale la no laua nei, me he mea la aole i ike mai i keia poe, aka nae i ka maopopo pono ana ia laua i ka ukali pololei aku o ua poe nei ma ko laua alahele ia wa i huli ino mai aia o Hawila ma ihope, hemo ae la hoi ka laua mau pahikaua a paa iloko o ko laua mau lima.

            I ka manawa o kela puulu kanaka i ike mai ai i ko Hawila ma ku ana iho a hula akyu la ihope, me ka hemo ana ae o ka laua mau pahikaua, o ka manawa hookahi no hoi ia i hemo like e ai na pahikaua a ua poe nei, o ka nee mai la no ia imua me ka manao o ko lakou nui ana ma ko lakou aoao, o ka mea iho la ia e kaa ai ka lanakila ia lakou.

            Ua kuhihewa loa nae ka manao aha o ua poe kanaka nui pela, no ka mea i ka wa i ku aku ai o Hawila ma, paio me kela puulu, ua haawi aku laua ikaika apau, e hoo hana ana hoi me ke akamai luaole i loaa ia laua, a he mea oiaio. iloko o na minuka helu wale no o kela noke ana iho a lakou i ka paio ana me ke akamai luahole i loaa ia laua, a he mea makehewa wale no ka hoonahoa ana aku e ku imua o kela mau kanaka, a ka ikaika nui wale, ke noke la lakou i ke kuupau i ko lakou mama holo, a o ia ka ka mea kakau moolelo i hoomanao mai la i keia mau lalni mele a ka poe haku mele:

"Kukini mama oia la,

He alualu kuaua no Hohewale,

He muhee no kalalau,

Aia ka ilina i Waiolama."

            Ua pomaikai i'o kela poe naita o ke keiki a ke kiaaina o Roma, me ua keiki nei i ko lakou holo ana, pela pakele ai ko lakou mau ola, i loihi iho ka lakou paio ana, in a he mau kino make ke loaa aku e waiho ana maluna o ke alanui, nolaila ke ike mai la no kaua e kuu makamaka heluhelu, ua kaa no ka lanakila ma ko Hawila ma aoao, a ua hoohokaia aku hoi kela manao lapuwale o ke keiki a ke kiaaina, me kona kuhihewa, o ka nui o kona mau kanaka, ke kumu e pilikia ai o kona enemi, eia ka oia ke holo ana ame kona mau kanaka.

            Oiai aole a laua nei hana hou aku e kakali ai o kela poeleele, ua huli hoi pololei aku la ua o Hawila ma, no ka hokele Malaga, eia nae ia laua nei no a ku ana ma ka puka-pa o ka hokele, oili ana no o Rose a ku mamua o ko laua alo, me ka wehe ana ae i kona koloka loihi e komo ana, a ahuwale ae la kona kino wahine, a oiai ke wehewehe ae la ke alaula o ka malamalama ia manaca, ua hiki ia Hawila ke hoomaopopo aku me ka hoohewahewa ole, o ke kaikamahine kauwa lawelawe no ia Magarita.

            "O oe no anei keia e Rose e halawai pu nei me a'u?" i ninai aku ai o Hawila, i wai e hoopauia ae ai kona pohihihi.

            "Ae, owau no keia e kuu haku." i pane mai ai no hoi o Rose, me ke kulou ana iho o kona poo ilalo, a hoomaka iho la e uwe. a i ka hala ana o kekahi manawa, ia wa i kamailio hou mai ai:

            "Eia ihea kuu Magarita, ka mea a'u i kumakaia aku ai, me kekahi o na hana ekaeka haahaa loa? Peha la e hiki hou ai ia'u ke noea aku imua on a. a mihi aku hoi i ka'u hewa nui i hana hewa aku ai iaia a ia oe hoi e kuu haku, a eia au ke noho nei ma keia aina malihini he kuewa, me ka maopopo ole o ko'u hopena.

            "No ka'u mau hewa apau i hana aku ai ia oe e kuu haku, ke nonoi aku nei au me ka walania o kuu naau, e huikala mai ia'u a ua makaukau au e lawe mai i kau mau hoino ana apau maluna iho o kuu poo, in a no ia he mea nou e kapa mai ai ia'u i ka wahine puuwai eleele.

            "ua ike no au, he mea oe i hoopihaia me ka oluolu ame ke aloha hoa kanaka, a pela au e kau aku nei i ka'u mau manaolana, no kou huikala mai i ka'u mau hewa apau i hana aku ai maluna ou: a ke nonoi pu aku nei no hoi au i kou oluolu, e hoike mai oe i kahi e noho nei o kuu haku wahine, in a ke ola mai nei oia, i hiki ai ia'u ke huli aku ahiki i kona loaa ana."

            "Auhea oe e Rose, he nani hoi ia, ua ike oe i ka nui o ke ko'iko'i o ka hewa au i hana mai ai ia'u ame ko haku wahine, a no kou mihi ana mai nei imua o'u, ke ae aku nei au e huikala ia oe ma na ano apau. No kau ninau no ko haku wahine, eia no oia ke ola mai nei, aia ma Hunegaria, aka in a oe e hoomanawanui ana, e noho aku no ma Roma nei, ahiki i ko maua huli hoi ana mai, ma keia huakai a mua no Kokenekai, ia manawa auanei e hele pu ai kakou no kahi o ke haku e noho mai la."

            I ka lohe ana o Rose i kela manao hoakaka o Hawila, kulou iho la kona poo ilalo, me ka hookahe ana aku i kona mau waimaka, a i ka aea ana mai o kona poo iluna, pane mai la i keia mau olelo:

            "Aole e hiki ia'u ke noho hou iho ma Roma nei i hookahi la, aka e hele koke no au e huli i kuu haku ma Hunegaria, a ka malia o loaa ae no au ia olua e hele ana ma ke alanui. i ko olua wa e huli hoi mai ai.

            "O ka'u kauoha wale no ia olua, aole he hoonohonoho hou ana iho maloko nei o keia kulanakauhale, no ka mea eia na kanaka omakoko puu wai eleele ua hele a piha i na manao inaina no olua, a eia lakou ke hookolo mai nei mahope o ko olua meheu.

            "I ko olua haalele ana iho i keia kulanakauhale, a hoomau aku i ka hele ana ma ko olua alahele e hoea aku ai no Rokenekai, mai hele me ka nanea, aka e makaala no ka mea he nui na poino ame na popilikia ma ke alanui, mai na enemi mai."

            Hakalia no a pau kela mai olelo a Rose o ke kamailio ana mai, o ka manawa no oi o ua kaikamahina nei i nalowale aku ai, me ke kakali ole mai a lohe i ko Hawila manao, aole no hoi o laua nei kahea aku, no ka mea he hana paakiki ka hoohulihuli hou ana aku i ka manao o Rose.

            No kekahi mau minuke ko Hawila ma ku malie ana iho ma kela wahi, me ka noonoo nui ana i na olelo a laua ke kukakuka ai, in a no ko laua haalele koke iho i ka hokele, a ia ole, noho iho paha, e halawai pu me ko laua mau enemi he alo a he alo.

            Aole i loihi loa ko laua noonoo ana a hooholo ma kekahi mea pono a laua a hana aku ai, no ka mea ia hoea ana aku no a ua mau opio nei holoko o ko laua rumi, ua hoakaka aku la o Hawila i kona manao, no ko laua haalele iho i ka hokele ma kela manwa, a kamoe aku ko laua alahele no Rokenekai, ua haawi koke mai la no o Oto Beriana i kona ae, o ko laua liuliu iho la no ia i ko laua mau ukana, alaila oili aku la iwaho me ka hele ana aku e uku i ko laua noho ana ma ka hokele no kela po, me ka ai ana i kekahi mau meaai mama, alaila hele aku la no kahi o ko laua mau lio e ku mai ana, hauhoa aku la no kahi o ko laua mau lio e ku mai ana, hauhoa aku la i ka noho, o ko laua nei hoomaka aku la no ia e hele.

            Ma ko laua nei alahele, aole laua i halawai iki me na ulia poino, aka he maalahi wale no ko laua hele ana, a hele no hoi a aui ka la, komo aku la laua nei maloko o ke kulanakauhale o Rokenekai, a i ka wa i ike mai ai o na kanaka e hele ana ma na alanui i keia mau kanaka malihini, ua lilo laua i mea makaikai nui ia e kela poe, aole no ka akahi a ike i kekahi mau naita malihini, aka mamuli o ko laua nei mau kulana kilakila me ka hiehie pu, i kaokoa ae mai ka nui mai o na haita i ke ike a ko lakou mau maka.

            O ko laua hele aku la hoi ia ahiki i ke kokoke ana i ke kakela Mamiona, ka home aloha o ka Uʻi Magarita, ia wa i hu mai ai ke aloha o Hawila no ua Manu Nunu Ahia nei, alaila halo'ilo'i mai la kona mau waimaka e hoopulu elo ana ma kona mau paplina, nawai hoi e ole ke aloha, i ka ike aku, i kahi i hoopunana mua ia ai ko laua mau aloha, a ia omouia ai ke kaula kaa-kolu, nana i hipuu polena i ko laua mau puuwai pakahi, malalo o kekahi hoohiki laahia loa, e lilo laua a elua, na laua pakahi, o ka make wale no ka mea nana e hookaawale.

            No ka hiki ole ia Hawila ke uumi hooanawanui iho i kona aloha, ua kaohi okoa mai la oia i kona lio, me ka huli ana ae i kona aikane, a i aku la:

            "Ua hele au a piha me na manao kaumaha, ia kaua i hoea mai la ma keia wahi, o keia mau waimaka au e ike mai la, he mu waimaka ia ,e hiki ole ai ia'u ke hoike koke aku ia oe i keia manawa i ke kumu, aka nae e hoea mai ana no ka wa kupono e ike ai oe i na mea apau.

            "Ia kaua e hoomau aku ai i ka hele ana a loaa he alanui e moe ana ma kapa o kekahi kahawai nui, malaila auanei kaua e pii pololei aku ai no ko'u home, kahi a'u i holoholo ai iloko o ko'u mai la opio, a i a'o ai hoi i na makaukau apau o ka oihana naita, aia no paha kuu luaui makuakane, ke noho mai la, me ke kau mau mai o na maka o ka hoea aku o kana keiki loha."

            Hoomau aku la laua i ka hele ana a hoea i ke alanui ma kapa o ke kahawai, hoohuli ae la i kko laua mau lio no ke alahele mauna, a ia laua nei e pii la, ke kau okoa mai la no na hoomanao ana iloko o Hawila no kana aloha, ke ike aku la no oia i kahi ana e holo mai ai maluna o kona waapa a pili ma kapa o ke kahawai, aia no hoi ke kumulaau wilou o han ke aloha ke ku mai la mamua pono o laua, a ma na ano apau, me he mea la, aia okoa no kana aloha ke ku aku la imua on a, a no ia mau hoomanao ana, i hiki nou ole iho ai ia Hawila ke kaohi mai i kona mau waimaka, ua hookuu aku la no oia e hanini ma kona mau papalina.

            Ke hoomau la no laua nei i ka pii ana ahiki iluna pono o kekahi kiekiena, a ike aku la no o Hawila i ke ku mai o kona home, iwaena o ka lau o na laau, ia wa oia i pane mai ai ia Oto Beriana:

            "Auhea oe e Oto Beriana, ke ike la no anei oe i kela mea hapa'upa'u i waena o ka lau o na laau?"

            Haawi aku la no hoi o Otot Beriana i kona ae, mahope iho o kona noke ana aku i ka nana no kekahi manawa, a o ia ka Hawila i pane hou mai ai:

            "O kela hale au i ike aku la, o ko'u home ia ,a aia maloko olaila ko'u luaui makuakane e loaa aku ai ia kaua."

            Ke pii la no laua ahiki i ke komo ana aku maloko o kekahi wahi ululaau uuku, a i ka oili ana aku mawaho o ua ululaau nei, ia wa i waiho malaelae mai ai ka hale, e hoopuniia ana e kekahi pa laau ,elike no hoi me na home noho kuahiwi.

            I ko laua nei hoea ana aku mawaho o ka pa, aia hoi ike aku la laua i ka holoholo mai o kekahi mau koa kiai mamua pono mai o ka hale, a e hoomoana ana hoi kekahi poe he nui, ma ke kahua palahalaha.

            Ke hoomanao la no o Hawila o kela no kekahi poe kanaka malalo o ka Weli o na Pae Mauna, i lilopio mai iaia, a i hoounaia aku hoi eia e hoi lakou e kiai i kona makuakane, nolaila aole he manao hopohopo iloko on a, nolaila, hoomau aku la no laua nei i ka hele ana, e hookokoke mau aku ana hoi i kahi e ku mai ana o ka hale.

            Ua kaa e mai la nae ka ike ana ia laua nei i kekahi o na koa kiai e holoholo ana, ia manawa i hoomaka ae ai oia e puhi i kana o-le, o ka manawa no ia i ku like ae ai na kanaka akpau iluna, a ku aina ae la, me ko lakou lako pono i na meakaua apau ,maiwaena mai o kela puulu kanaka, ua oili mai la he hookahi mea olakou, a hele pololei mai la imua o Hawila ma.

            Ike aku la o Hawila, o kela no kekahi o na alakai o na kanaka powa, malalo o kona kaikuaana, a i kona kokoke ana mai ia laua nei, haawi mai la i kona aloha, me ka ninau ana mai:

            "Owai olua e na malihini?"

            Ma kahi nae o ka pane ana aku i ka haina pololei o ka ninau, ua hoolalau wale aku la no ka Hawila kamailio ana aku, ma ka ninau ana aku i ua kanaka nei:

            "Eia no anei o Lomeliano maloko o ka hale?"

            Loaa aku la paha ka haili i ua kanaka powa nei, i ke kumu o ka ninaura ana aku o Lomeliano, ia wa oia i pane hou mai ai:

            "O oe anei o Sa Naita Hawila, ka mea i sila paa ia iloko o ko makou puuwai, e hookauwa aku malalo ou?" me ka haka pono loa ana mai o kana nana ana maluna o ke kanaka opio.

            "O ka mea nona ka inoa au i puana mai la, oia no ia e ku aku la imua ou, eia ihea o Lomeliano kuu makuakane?"

            Ma kahi o kona pane koke mai i ka haina o ka Hawila ninau. haalele aku la oia i kona wahi e ku ana, a hemo mai la mawaho o ka pa, a mamua pono aku o Hawila, haule iho la kona mau kuli ilalo, a pane mai la:

            "E kuu haku opio, e aloha mai oe i kau wahi kauwa nei; a e maliu mai hoi i ko'u leo, ma ka ae ana mai o kou kiekie ame kou hanohano, e lilo kau wahi kauwa, i mea nana e alakai aku ia oe ame kou kokolua noloko o kou home.

            "O kuu haku o Lomeliano, a luaui hoi ou e kuu Hawila, aia no oia ma ko olua home kahi i holio ai me ke kakali hoomanawanui mau ana o kou hoi mai, he maikai kona ola kino, elike no me ia au i haalele iho ai @aia."

            Kauoha aku la o Hawila i kela kanaka, e ku ae iluna, o ko laua nei komo aku la no ia iloko o ka pa, oiai hoi ua kanaka nei i holo aku ai a haawi aku la i kona mau hoa, e kulaina ma na aoao o ke alanui, no ka hoohanohano ana mai i ko lakou haku opio, pela pu hoi i haawi aku ai i ke kauoha i kekahi mau kanaka elua, e hele aku e paa i na lio o na malihini. a e lawe aku noloko o ka halelio, i ko laua wa e lele iho ai mailuna mai o na lio.

            I ka hoea ana aku o Hawila me kona kokoolua mamua pono o ka puka o ka hale, lele iho la laua ilalo, ia wa no noi i miki mai ai na kanaka elua a paa ana ko laua mau lio, o ko lua nei komo aku la no ia iloko, eia nae o ka mea mua loa i haiawai aku me laua. he wahine kino wiwi, a ua uhiia hoi kona helehelena me kekahi uhimaka manoanoa. Hele pololei mai la oia imua o laua nei, me ka wehe ana ae i kona uhimaka, ia wa i ike aku ai o Hawila, o kela no ka wahine ana i ike ai, oiai oia e hoonanea ana maloko o ka ululaau, iaia e liuliu ana no ka iho ana mai i ke kulanakauhale o Rokenekai, ma no po, e malamaia ana ka lealea e ke Kiaaina Benekona.

            Aole no kaua e ka makamaka heluhelu e hoohewahewa iho ana i keia wahine, o ka hoa hanau ponoi no ia o ke Kilokilo Sidia nona ka inoa o Leidenala, ka wahine no hoi nana i hoopakele ia Magarita mailoko aku o ka halepaahao, a i alakai aku hoi i ua kaikamahine nei noloko o ka ululaau, ahiki i ka loohia ana i ka pupule, ka mea nana i kono aku iaia e holo a haalele i kona puuhonua, elike me ia a kaua i ike ai ma kekahi mau helu aku nei i hala o keia moolelo.

            "E kuu keiki," i pane mai ai ua wahine nei no ka hoolauna ana mai iaia iho imua o Hawila. "Owau no keia, ka hoahanau ponoi o ke Kilokilo Sidia, ka mea i kamaaina ia oe, a e noho mai la hoi ma ke Kakela Melodiana me ke Kilokilo Monika.

            "He elima ae nei la i hala, ua hoea mai la au no kou home nei, no ka hoike ana aku i kou luaui makuakane, eia no oe ke ola nei; a me ka lua o koʻu hiki ana mai, ua hoike aku no au iaia, eia oe ma ke alahele huli hoi no kou home no ka ike ana iaia, nolaila aole oia e puiwa mai ana ke ike ia oe, oiai ua loaa mua ku iaia ka ike no keia hoea ana mai la ou e kuu keiki.

            "Aia no kou makuakane maloko kahi i noho ai, nolaila e komo mai kakou no ka halawai pu ana o ke keiki me ka makua, mahope iho o ka nalowale ana o na maka no kekahi mau la loihi, "haawi aku la no hoi o Hawila i kana kunou ana, o ko lakou nei komo lke aku la no ia iloko o ke keena hookipa.

            Ma kahi mamao loa no, ua ike aku la o Hawila i ka noho mai o kona luaui makuakane maluna o kekahi noho paipai mui, he helehelena kona i auhee aku na haawina o ke kaumaha, aka o ka mohala maikai ke halii ana maluna o kona mau maka, ia wa i hoomama loa ia mai ai ko Hawila manao, ame na kaina mama, hele pololei loa aku la oia no kahi a kona makuakane e noho mai ana, a i ka ike ana mai o Lomeliano i kana keiki, ku koke ae la oia iluna, a hele mai la imua, me ka puliki ana mai ma kona a-i, a hooho ae la me ka leo nui:

            "E kuu Hawila aloha, ke hauoli loa nei kuu uhane i ko kaua halawai hou ana," alaila hiolo iho la kona mau waimaka, o ke aloha keiki oiaio, a i ka hala ana o kekahi mau sekona, hoomau hou mai la: "Ke hoomaikai ae nei au i na Lani, i ka hoihoi hou ana mai ia oe e kuu keiki, e ike hope iho i kou makuakane nei, mamua o koʻu hoi ana aku iloko o ka opu o ka honua.

            "He hoohiki nae kaʻu i hana ai me ko kaua Makua ma ka lani, e hooloihi mai Oia i koʻu mau la i koe e ola aku ai, ahiki i kuu ike ana aku i kou hoohuiia ana iloko o ka berita o ka mare me ka Uʻi Magarita, ka wahine ho i hoe poo aku ai ahiki i ka maewaewa ana o ko olua mau kino, i na hana lokoino a na enemi," alaila puliki mai la oia i ka a-i o kana Hawila aloha, pela no hoi ke keiki i apo aku ai i ka a-i o kona makuakane, a o kekahi kela o na minuke o na manao ehaeha me ka walania i kau iho maluna o laua, me ko laua ku malie ana i kahi hookai, e hoomana ana i na manao ikiiki, e pauma mau ae la iloko o ko laua mau puuwai pakahi.

            O ko laua nei lulumi hoi ia ahiki i ka mahie ana ae o na manao kupouli o ke aloha o kekahi no kekahi, ia wa hookuu ae la o Lomeliano i kana keiki a pane hou mai la:

            "E hoonaniia ke Akua ma na lani kiekie loa, no ka mea ua aloha wale mai oia ia kaua iloko o na la loihi o ko kaua noho kaawale ana, eia ka e hoohalawai hou mai ana oia ia kaua, a ua hoopiha loa ia mai kuu puuwai me ka hauoli i ka ike hou ana aku i kou mau maka e kuu Hawila hoomanawanui.

            "E noho ae ilalo o ka noho, a mahope, e hoakaka mai oe iaʻu i na mea ano nui i pili aku ia oe e kuu keiki," me ke kuhikuhi ana ae o Lomeliano i kekahi noho paipai e waiho mai ana.

            "Mamua o koʻu noho ana aku ilalo e kuu makua aloha, e ae mai oe e hoolauna mua aku au imua oe i koʻu hoaloha nei, o Oto Beriana keia, ka meaʻi alo pu me aʻu, a i auamo pu hoi iloko o koʻu mau pilikia apau," alaila hoolauna aku la ia Otot Beriana imua o kona makuakane, me ka puana ana ae i keia mau olelo:

            "E Oto Beriana, kuu hoaloha, o Lomeliano keia, hoʻu lualuʻi makuakane, a luauʻi pu hoi no kaua," ia wa i lululima pu ae ai o Oto Beriana me Lomeliano me ka pane ana mai hoi o Lomeliaho:

            "E ka hoaloha o ka'u keiki ke hauoli nei au i ka loaa ana o keia hanohano iaʻu, o ka hui ana he alo a he alo me oe, ka mea i komo pu me kaʻu keiki nei iloko o kona mau pilikia; ua hamama ka hale o ko olua makuakane nei, no ka hookipa ana mai ia olua, nolaila ua noa na wahi apau o keia home ia oe," alaila noho nui iho la ilalo, maluna o na noho e waiho mai ana.

            I kela manawa a Hawila e hui la mea kona makuakane, aole on a noonoo hou mai no ka wahine nana i hookipa aku ia laua, i kona manawa nae i hoomaopopo ae ai iaia, ua nalowale ua wahine nei, no kahi ana i ike ole ai, oiai he wahine kilokilo kela o ke ano hookalakupua, aohe no a lokou nei noonoo nou aku nona.

            Ma kela noho ana aku o Hawila imua o kona makuakane, ua hoike piha aku la oia i kona moolelo, mai kona manawa i haalele aku ai i kona home kuahiwi, ma kana huakai no Roma, kona komo ana iloko o na hookuku hookelakela me na kanaka kaulana apau o Europa, ahiki i ka haulepio ana o ia poe malalo o kona akamai ame kona ikaika, kona hookauia ana maluna o ke kua o kekahi lio ahui, kona kuewa hookahi ana ma na ululaau o Hunegaria, ahiki i kona hookipaia ana aku e ke Keikialii o Hungegaria maloko o kona halealii, ka hooukaia ana o kekahi kaua hookahekoko maloko o ka ululaau, ahiki wale i kela hoea ana mai on a ame kona hoaloha imua o kona makuakane.

            Aia hoi o Lomehano ke hoolohe pono loa la me ka piha i ka ehaeha no na mea a kana keiki e kamailio aku ana imua on a; a ia ka pau ana o na hoakaka ma ko Hawila aoao, e pili ana iaia iho, ia manawa no hoi i hoakaka mai ai o Lomeliano, i ka nui o kona kaumaha i kona wa i lohe ai, ua hookauia kana keiki maluna o ka lio ahiu, a o kona manaoio maoli no, ua halawai o Hawila me ka make, aka nae o ka mea wale no nana i hoomama ae i kona mau manao kaumaha apau, mamuli no ia o ka hoea ana aku o kekahi wahine imua ona, he elima la mamua aku, a kamailio aku la i ka pakele ana o Hawila mai ka make mai, a na ua wahine nei no hoi i hoolana aku i kona manao, e halawai pu ana laua he alo a he alo.

            O ko lakou nei noke hoi ia i ke kamailio ahiki i ka hala ana o kekahi manawa, me ka maopopo o na niea e pili ana i ke keiki i kona makuakane, pela hoi ke keiki i hoomaopopo aku ai i na mea i pili i kona makuakane, ia wa i lalau mai ai o Lomeliano i kekahi pu puhi, e waiho ana maluna o ke pakaukau, kau ae la ma kona mau lehelehe, a hoomaka aku la e puhi me ka ikaika, a iloko o ka manawa pokole, komo ana no kekahi kanaka, a ninau mai la ia ka niea i makemake ia nana e hooko mai, a o ia ka LOmeliano i pane aku ai:

            "E hele aku oe e kauoha e hoomakaukauia mai i mau meaai na ka haku opio o oukou, a e kukala pu aku hoi imua o na kanawa, e hoomakaukau lakou, no ka hele ana mai e ike i ko oukou haku, ka mea aʻu i kanikau ai, ua hoi hou mai oia, a e komo kakou iloko o na hauoli ana."

            Hakalia no a pau kela mau hoakaka a Lomeliano, o ke emi hope aku la no ia o ua kanaka nei, a oili aku la iwaho o ka hale, me ka haawi koke ana aku i ke kauoha, i ke poo kuene, e hoomakaukau koke ia mai i mau meaai na ko lakou haku opio, a pela no hoi oia i haawi aku ai i ke kauoha, i ke poo kuene, e hoomakaukau koke ia mai i mau meaai na ko lakou haku opio, a pela no hoi oia i haawi aku ai i ke kauoha, i ke poo o na kanaka oka oihana koa, e liuliu a e hoomakaukau ia lakou iho, no ka hele ana aku e hui pu me Hawila, i ka manawa e loaa mai ai ke kauoha no ko lakou nui pu ana, me ko lakou haku, nana i hoonoho aku ia lakou e lilo i mau kiai no kona makuakane.

            I ka eleele i hele aku ai e hoike i kana kauoha imua o ka nui ame ka lehulehu o na kanaka ua hoike nou aku la o Hawila, i na mea e pili ana i na kokua ma kona aoao, oia o Oto bEriana ame Malawalia ,a pela me ka manao nui o ka laua nuakai o ka hoea ana mai imua on a, a no Malawalia, ua huli hoi hou aku oia no ke Kakela Molodiana, me kekahi pualikoa nui, no ke kaua ku-e ana aku i na enemi.

            O ko lakou nei nanea hou aku la ia ahiki i ko lakou hoomaopopo ana aku, ke hoomakaukauia mai la na meaai maluna o ke pakaukau, ia wa i noi aku ai o Hawila. i kona makuakane, e kala mai ia laua, no ka hoi ana aku e wehe i ko laua mau kapa kila, i kupono ai ka noho ana aku e ai, o ke ku ae la no ia o Hawila iluna, a kono aku la i kaha aikane e hoi aku laua maloko o kona rumi no ka wehewehe ana i ko laua mau kapa kila, a no ka holoholoi ana hoi i ko laua lepo o ka hele ana mai o kela loa.

            O ko laua wehewehe hoi ia i ko laua mau kapa kila ahiki i ke koe ana iho o ko laua mau lole maoli, ia wa i leha aku ai ka Hawila nana ana maluna o ka paia. a ike aku la i ke kau mai o kana kita, ia wa oia i lalau aku ai a hoomaka iho la e honi. me he mea la, ua like pu kela pila gita iaia iloko o kela manawa me kekahi ipo aloha.

            "Auhea oe e Oto Beriana kuu hoaloha," i huli mai ai o Hawila a kamailio i kana aikane, "Ke ike mai la oe ai keia wahi pila gita o koʻu hoa pili keia o na po anoano huʻihuʻi o na la lehulehu i hala aku nei, kela mau po i hoonipaaia ai na maawe kaakolu o ke aloha oiaio mawaena oʻu ame ka U'i Magarita.

            "O keia wahi gita au e ike mai la, oia nei ka mea nana i kokua inai ia @ma ke kulaʻi ana i ke kupaa o ka Uʻi Magarita, ka mea a ko Rokenekai i olelo ae ai, ka Manu Nunu Ahiu, aohe kiamanu e nei ai. ua lilo nae kona kupaa ame kona uahoa i na kaula eono o keia pila. oia kela uʻi a kaua haalele aku nei mahope, maloko o ke Kakela Melodiana.

            "Ke manzo nei au, aia kaua a huli hoi hou aku no ke Kakela Melodiana, alaila e lawe pu aku ana au i keia pila gita, mea hoonanea na kakou. a in a no hoi e loaa ana he manawa maikai iaʻu ma keia po, alaila e hoikeike aku no au imua ou i kekahi o kaʻu mau hana i aʻo ai a lehia, maluna o na kaula nei o keia pila, ka mea hoi au i ike mua ole ai i kou hoa nei. e hookani ana ikekahi gita, iloko o na la a kakou e walea ana ma Roma."

            Oiai ke lilo wale la no ko laua manawa ma ke kamailio ana e kakali loa mai ai o Lomeliano ia laua, nolaila hoopokole iho la o Hawila i kana kamailio ana. ma ka olelo ana mai ia Oto Beriana, e holoi ko laua mau maka, e kahi hoi ka lauoho, alaila hoi hou mai noloko o ka rumi hookipa. malia ua makaukau na nieaai na laua.

            Awiwi iho la ua mau kanaka opio nei ahiki i ka pau ana o ko laua hemahema, o ko laua oili mai la no ia noloko o ka rumi hookipa. e kakali aku ana no o Lomeliano ia laua. aka i ka ike ana aku i kana mau keiki, ia wa i ku ae ai oia iluna a ninau aku la:

            "Ua makaukau mai la anei olua no ko kakou hele ana aku noloko o ka rumi aina?" wahi ana me ka hopu ana aku i ka lima o kana keiki.

            "Ae, ua makaukau maua, a ua hele no hoi a pololi, e hele koke aku kakou e hoopiha i ka lua o ka inaina," wahi no hoi a Hawila me ka peʻa ana ae i ka lima o kona makuakane, malalo o kona poli, a ke ukali aku la no hoi o Oto Beriana mahope o laua.

            Ia lakou nei nae e hele aku ana a kokoke i ka rumi aina, aia hoi e ku laina mai ana na kanaka powa iloko o ko lakou mau aahu piha o ke kulana powa. elike me ko lakou ano mau e noho ana malalo o ka Weli o na Pae Mauna, a ua lako like hoi lakou apau me ka lakou mau meakaua. i ka wa i ike mai ai i ko lakou nei oili ana aku, ia wa i haawi like mai ai i ko lakou aloha ma ke kulana pili oihana, pela no hoi o Hawila ma, i panai' aku ai, alaila komo loa aku la lakou nei noloko o ka rumi aina, aia hoi na meaai ke waiho mai la a e moani mai ana ke ala, e moni wale ai no ka haae, i kau a mea o ka ono, i hanaia mai me ka maiau loa e na kauwa lawelawe.

            Noho aku la oLomeliano ma ke poo o ke pakaukau, o Hawila no hoi ma ka aoao akau, a ma ka aoao hima o Oto Beriana, o ko lakou nei hoomaka iho la no ia e ai. aia hoi na kauwa ke lawelawe mai la no lakou nei ,e haawi ana i ka lakou makaala ana ma na mea apau e pono ai na mlihini ame ko lakou haku.

            I ko lakou nei maona ana, haalele iho la lakou i ke pakaukau, a huli hoi hou aku la noloko o ka rumi hookipa. a i ka wa i hoea aku ai ma kahi e ku laina mai ana na kanaka powa, ia wa i kauoha aku ai o Lomeliano ia lakou, e komo mai e ike i ko lakou haku opio.

            Hakalia no a noho pono iho o Hawila ma, maluna o ko lakou mau noho maloko o ka rumi hookipa, ia wa i komo pakahi mai ai ua poe kanaka powa nei, me ke kulike ana ae no hoi o Hawila ma iluna, hele mai la kela ame keia pakahi o lakou e lululima me Hawila. alaila haawi aku ana i ke aloha lululima ia Oto Beriana. me ke kauoha ana aku nae o Hawila ia lakou, e ku mawaho o ka hale, no ka mea no mau olelo pikole kana i makemake ai e kamailio aku imua o lakou.

            O ka ike noi ia o ua poe kanaka powa nei ahiki i ka pau ana, ia wa i hele aku ai o Hawila, a ku iho la mamua o ka puka o ka hale, a kamailio aku la imua o ua poe kanaka nei me keia mau huaolelo:

            "E na kanaka no lakou na puuwai i kukuni paaia e ke koa ame ka wiwoole, ke hauoli nei au no keia halawai hou ana o kakou he alo a he alo, aole ma ke ano he mau enimi, aku he mau hoaloha oiaio; aole hoi ma ke ano he mau hoa paonioni, aka me he mau hoahanau la iloko o ka oihana hookahi.

                                                                                                (Aole i pau)