Ka Nupepa Kuokoa, Volume LVI, Number 51, 20 December 1918 — KUU KAMAAINA I KA UA KUKALAHALE. [ARTICLE]

KUU KAMAAINA I KA UA KUKALAHALE.

He hoomanao no Honolulu i hala na ka Anela o Mekiko. No ka pomaikai o na hanauna hou o kuu lahui, nolaila au i konoia mai ai e hoikeike aku ia oukou i kekahi mau inoa o na wahi kahiko o Honolulu nei o na la i hala; a e loaa pu ana no hoi ka pomaikai like i na kamaaina o ke taona nei ma ka hoomanao ana ae no ia mau wahi ame ka lakou mau ike no ia mau wahi o na la i hala o keia aina, ka aina nona ka oleloia: Aina nui Honolulu, Haiki ke awa e komo ai; Hookahi no ka hoe i Mamala, Naue na ale i Kepo. A po'i ka nalu i Apua, Kuakea kai o Kewalo. Nolaila, e na makamaka, e hoomaka kakou mai keia wahi aku: Lebeka Holo (Liberty Hall). —O keia ka inoa o ke kihi komohana o na huina o na alanui Hotele ame Maunakea, kahi hoi e ku nei i keia wa o ka halekuai i'o puaa o kekahi hui Pake. He halepohaku inu rama malaila i ke au i hala, a i kapaia hoi Liberty Hall, a no ia inoa i loaa ai ka inoa Lebeka Holo, o ia hoi ka unuhi ana hoomaauea o ka inoa Enelani. Kepana-Ki (Japan Sea). —O ia kahi malalo aku, aoao Waikiki o na huina o na alanui Beritania ame Nuuanu, a e ikeia no ma ka inoa o keia mau la Kukui lane. Malaila ka akoakoa ana o na wahine u'i, na keiki holokahiki ame na kamalii holoikauaua o ia mau la no ka lu ana ia lakou iloko o na le'ale'a. Na puka o ka pa 'lii—Kauikeouli, o ia ka inoa o ka puka ma ke alanui Moi; Likelike, o ia ka puka ma ke alanui Likelike; Hakaleleponi, o ia ka puka mauka, alanui Hokele; Kinau, o ia ka puka ma Ewa ma ke alanui Rikeke. Mauna Roke. —O ia kahi puu e ku nei iloko o ka pa 'lii kokoke i ke kihi o na alanui Likelike ame Moi. O keia ka ilina mua no na iwi o na 'lii mamua ae o ke kukuluia ana o ka Masoliuma e ku nei mauka o Mauna Ala. Ke Kihi Poohina (Old Corner). —O keia ka inoa o ka halepohaku e ku nei ma ka huina o na alanui Nuuanu ame Moiwahine (kihi Walkiki). He haleaina ame rumi biliodi ia wahi i na la i hala no Nolte; ka ona hoi nona ka haleaina e ku nei ma ke alanui Papu, mawaena o na alanui Kalepa ame Moiwahine. Ka Huina-a-Kale. —Kihi o na alanui Moi ame Maunakea, e ku nei o ka haleaina Palace of Sweet. Kauanououla.—O ia kela wahi hakahaka nui e waiho wale nei ma Ewa iho o kahi o E. O. Hall & Son, mawaena o na alanui Papu ame Bihopa, makai o ke alanui Moi, a mauka o ke alanui Kalepa. O keia kahi i oili a i hanauia mai ai o ka Anela o Mekiko; a maanei i hoolaaia ai ka makapeni hulu nene ahiu a ua Anela la no kona lahui. Nolaila, he Oahu ka Anela ma ke kino o na kamaiki a ko keia honua. (A keia hebedoma ae.)