Ka Nupepa Kuokoa, Volume LVII, Number 51, 19 December 1919 — Page 3

Ka Nupepa Kuokoa

 

 

HOOPAKELEIA O KANEHAKU E NA KEPANI LAWAI’A

(Mai ka aoao Ekahi mai).

 

Kona waapa iuka o ka aina, eia nae ina no kona lele iloko o ke kai, a au iuka o ka aina, aole no he manaolana no kona pono ma kela mokupuni, oiai he puu pohaku oneanea wale iho no ia, ua ahona no ka noho malie ana maluna o kona waapa, ina no kona make, o ia iho la no, a ino no hoi no kona pakele, he pomaikai ia mailuna ma.

 

Loaa i ka Waapa Kepani

 

            Ma ke ahiahi o ka Poalima, ka la 12 o keia mahina, i hoea aku ai ka waapa Kepani, ke Kaiyo Maru, i noho kapenaia e Kashiwamara, me eha hou ae poe Kepani mawaho ona, a ike aku la lakou i ka lana mai o keia waapa, e laweia ana e ke au. E hoowalewale ana o Kanehaku i ke aku, ua kahea aku la kela poe Kepani iaia, a i ka lohe ana i ko lakou leo, i huli mai ai oia, a ike i kona mau hoopakele, a manao ae la ka palekana mai ka make mai.

            I ka manawa i loaa ai o Kanehaku i na Kepani lawai’a, ua hoike mai la oia ia lakou i kona moolelo ku i ka walohia, me ka olelo pu ana mai ia lakou, ua makemake oia e hoopakele pu ia kona waapa me ia, a e laweia mai no Honolulu nei, a e hoihoiia aku hoi kela waapa imua o kona ona, ma Kawaihae, Hawaii, oia o Oliva Laau, ka mea iaia i lilo ai ka aelike no ka halihali ana i na leka mawaena o Kawaihae ame Mahukona.

            O ka hoea ana aku no ia o kela waapa Kepani mai Honolulu aku nei, ma ka nui pu o na dala i hooliloia no na makaukau lawai’a, i ka lohe ana nae o kela poe Kepani i ka moolelo o Kanohaku, akoakoa ae la lakou i kahi hookahi, me ke kukakuka ana i ka mea pono e hana ia, a hooholo ae la lakou e huli hoi hou ami no Honolulu nei, me Kanehaku; ua hoopaaia mai la kona waapa mahope, a koloia mai la e ka waapa Kepani, a ma ka hora eha o ke kakahiaka o ka Poaono nei, i komo mai ai kela waapa hoopakele me Mr. Kanehaku, ke kanaka i manaoia ua make, he aneane e piha ka elua mahina ae nei i hala.

           

Haawiia na Kokua Dala

 

            I ka manawa i pahola ae ia ka nuhou, no ka hoopakeleia ana o Kanehaku e na Kepani lawai’a, ua haawi koke ia ua kokua iaia ma ke dala e ka poe i komo na manao aloha iloko o lakou, me kona laweia ana aku e hanai, a e ike i ka Meia Fern, a hoike aku la iaia e hoouna i ka lohe i kona ohana, no kona palekana ana, pele hoi i ka ona nona ka waapa, e hoihoiia aku ana kona waiwai iaia; ua hooko aku ka Meia Fern ia noi, ma ka hoouna ana aku i ke kelekalapa uwea ole i ka wahine a Kanehaku, ame na hoaloha ma Kawaihae.

            He eke dala i hiki aku ka huina ma kahi o ke kanawalu me kanaha keneka ka i haawiia aku iaia, e na hoaloha Kepani, na keiki poola, ame ka lehulehu ae o keia kulanakauhale, me ko lakou manao, ua oi aku ke kokua ana i ko lakou makaainana ponoi, iloko o ka pilikia, mamua o ka poe mawaho.

 

KAKOO O KUMALAE I NA HOA REPUBALIKA O KA PAPA.

 

(Mai ka aoao Ekahi mai).

 

I ka hana ole ana o na Demokarata i kumu i ku okoa ae ai oia iluna a hana aku elike me kana i ike ai he pono, a na ka lehulehu e kaupaona aku iaia ma ke ano o kana hana. Ua hookau pu aku oia i na ahewa ana maluna o ka Meia Fern, no ka vito ana i kekahi mau kauoha kanawai ana i hookomo aku i iloko o ka papa, a o ia kana o ka olelo hou ana ae, aole i kupono o J. J. fern e noho meia no ke kulanakauhale.

            Ua ku hou mai ka Lunakiai Pacheco, a hoike mai la i kona manao, aia mau no ka mana o na hana apau o ka papa i na Demokarata, me ka nana ole i ko Kumalae lele ana aku ma ka aoao Repubalika, no ka mea e ku mau ana ka meia me na Demokarata ma na ninau apau, a ma kekahi olelo ana ae hoi, e ku malie ana na hana o ka lehulehu no na makahiki eha.

            O na Lunakiai Arnold ame Hollinger kekahi i ku mai a kamailio no ka hoopoina ana o na hoa o ka papa i na mea maikai ole, aka e hana kela ame keia no ka pono o ka lehulehu, a e hooko aku hoi i na hana i waihoia mai ai iloko o ko lakou mau-lima.

            O keia malalo iho nei ka papainoa hou o na komite o ka papa, elike me ia i waihoia mai ai e ka Lunakiai Kumalae, a i hooholoia hoi e ka hapanui o na hoa o ka papa:

            Komite waiwai—Hollinger, McClellan ame Low.

            Komite alanui—Kumaae, Arnole ame Low.

            Komite paka—Low, Hollinger ame Kumalae.

            Komite makai—Arnold Pacheco ame Hollinger.

 

HOOPII HOU IA KA UKU O NA LIMAHANA.

 

            Mahole iho o ka noonoo ana o na huku o na hale hanahao, ka Honlulu Iron Works ame ke Catton, neill & Company, i hooholo ae ai lakou, ma ka Poalua aku la i hala, e hoopii hou ae i ka ukuhana o na limahana apau e noh hana nei maloko o kela mau hale hana i hiki aku ka huina, ma kahi o ka ewalu haneri ka nui o na limahana.

            Ma ka hooholo ana e hoomahuahua hou ae i ka ukuhana o na limahana apau, e loaa ana i ka poe ike hana mi kanika he umi pakeneka ka oi ae i ko lakou uku e loaa nei i keia manawa, a he iwaalua pakeneka hoi i ka poe kokua, ua like ia me elua kaukani dala, a kela mau halehana e uku ai o ka pule hookahi ma keia hope aku i na limihana.

            E hoomaka ana keia hoomahuahua ukuhana a kela mau halehana e haawi ai i na limahana, mai ka la ekahi mai nei o ka mahina o Okatoba, a e loaa ana i na limahana, no ka pule he umi o ko lakou noho hana ana ka ukuhana i oi ae, i ko lakou uku mamua aku nei.

            I ka hoakaka ana ae i ke kumu o ka haawi hou ia ana aku i uku no na limahana, ua hoakaka ae o mr. W. G. Hall, ka lunanui o ka halehana o ka Honolulu Iron Works, aole he kumu e ae i nana aku ai na haku hana i ka pono o na limahana, mamuli mai no ia o ka pipii loa o na meaai i keia manawa, a oiai ua hana aku no hoi na limahana, i na mea e loaa ole ai he mau hoohalahala ana ma ka aoao o na haku hana, nolaila i manao ai na haku, he mea kupono no, ka hoomahuahua hou ana ae i ka uku o na limhana. Ke hoomanao nei no ko ke Kuokoa poe heluhelu i ka hoala ana ae o na limahana oloko o kela mau halehana, he olohani nui iloko aku nei o ka mahina o Sepatemaba, me ka hoi hou ana o na lumahana i ka hana mahope mai, me ka hooko ole ia ana nae o ka lakou koi, no ka hoihoi hou ia o kekahi o na limahana, o ka hoopauia ana mai ka hana aku.

 

MAKAUKAU NA LIMAHANA MAHIKO E OLOHANI.

 

            Mamuli o ka ae ole ana mai o na ona mahiko, ma o ka Ahahui la o ka Poe Kanu Ko, i ke koi hoomahuahua ukuhana, ame na hora hana pokole mai, a na hui uniona o na Pilipine ame na Kepani, i laweia ae ai kekahi mau keehina e na alakai o kela mau hui, no ka hoala ana ae i kekahi olohani nui iwaena o na limahana mahiko, i komo i mau lala no kela bui uniona.

            Maloko o ka Hale Hui Phoenix i malama ae ai na Pilipono i ka lakou halawai kukakuka ma ke Sabati aku nei i hala, no ka hoala ana au i ka olohani nui iwaena o na limhana Pilipino apau, e noho hana nei no na mahiko, me ka hooholo ana, ma keia Poaono, e hookoia aku ai ia hana, ua hoopaneeia keia, me he mea la, no ka haawi ana aku i manawa no na Kepani e kukakuka ai mawaena o lakou iho, a lokahi like mai me na Pilipino, ma ka olohani ana.

            Mahope iho o ka hooholo ana o na elele o na hui uniona o na Pilipino e hooko aku i ka manao olohani, ua hoounaia aku he kelekalapa uwea ole i ke Kakauolelo o na Limahana Wilson, ia Samuel Gompers, ke poo o ka hui uniona makua ma Amerika, e noi aku ana i na kokua mai na hui uniona mai o Amerika, ma na mea pili dala, a ma kekahi mau ano okoa ae paha, e holomua ai ka manao olohani a na limahana maanei nei.

            I ka manawa i maopopo ai ka hooholo ana o na elele Pilipino i akoakoa ae maloko o ka lakou halawai o ka hui uniona, ma ke Sabati nei, no ka olohani ana, ua hui pu ae la na alakai me na alakai o na hui union Kepani ma kela kulanakauhale, a ma ka Poakahi ae i hoounaia aku ai ka lohe i na hui uniona apuni keia Teritore, o ka hooholo ana o na alakai iwaena o na Kepani maanei nei, e olohani na limahana, o ka mea wale no nana i hoohakalia i kela manao, o ia ka hoea mai o na elele mai na mokupuni mai no keia kulanakauhale, a haawi i ko lakou apono ana no keia hana.

            Oiai ua kulike loa na hoola’a ana a na hui uniona Pilipino me na hui uniona o na Kepani, mai ka hoomakaia ana mai o ka noonoo ana, no ka ninau hoomahuahua ukuhana, ua kauka’i aku na Pilipino no ka holopono o ka hana olohaui maluna o na Kepani, me ka manao, pela iho la e hiki ai ia lakou ek hookikina aku i na ona o na mahiko, e ae mai i ko lakou mau makemake.

 

HOLO MAKAIKAI E IKE I KA NANI O KAPAA.

 

            SOLOMON Hauohano, Aloha kaua:--E oluolu mai kou hanohano, ina he mea hiki no kela wahi poomanao e kau ae la maluna, i ike mai ai ko kaua lahui i na mea maikai ma ka la eha o keia mahina, o ia ka Poaha, ka hora eha, haalele i ka home, a hui iho la me ko’u mua oia o Mr. J. Kanepuu, me kona makaukau piha, pela no hoi me ka mea kakau nei, a puili lima ae la maua ma ke ano hoahanau oiaio, a hui iho la no hoi me na hoaloha, a kani ana no hoi ke oeoe mua, a eia au ke kuwiliwili nei me ka’u aliiwahine, no ka mea o ka piha ana keia o na makahiki he iwakalua ka pili aloha ana, o ka makamua iho la keia o ko’u waiho ana iaia mahope nei, aka aia no me ia ka iini i na manawa apau, a kani hou ana ke oeoe elua, aia maua ke nana la kekahi i kekahi me ka pana like o ko maua mau puuwai a kani hou ke oeoe hope, hookui ae la na pau ihu o maua, me he makeneki la a honi aku la i ka moopuna ame na keiki, a kau aku la noluna o ka moku, o ka hora 5:10 ia.

            Ulumahiehie na mea apau maluna o ka uwapo, a eia ua kaikamahine Kinau nei ke emi hope nei, nana aku oe la nakanaka hoi kau o ke kikala o ua mahimahi nei, a eia no au ke ku nei mamua iho o ka rumi pailaka a nana mai i kuu hoopili o ka po anu e ani ae ana i kona hainaka, a ke nana la no hoi i ka nani o ke kulanakauhale, he u’i maoli no me he la o ke koho iho a ka meakakau, ua like aku me kakahi mau kulanakauhale nui o ke ao nei, a o ko makou au aku la no ia, a kaalo iho la makou ma ka haleipukukui, a nehe ana i ka nuku o Mamala, a hone ana ka pele poe, a iho ana i ke awa o Kalihi, me ko’u huli ana mai a nana ia Daimana Hilo, e kau aheahe mai ana, a haupu ae la au i na keiki o kuu kaha i neia kanaenae:

            Kilkila Daimana Hila a e kui nei,

            I ka hoomalamalamaia a e ka uwila,

            Makani kuwalapoo,

            Inisi, inisi malie.

            Eia ka ihu o ua kaikamahine Kinau nei ke auku nei i ka makani, a iho ana makou i ke awalau o Puuloa, a ke houhou mai la ke kui makani i kana hana, a ke imoimo mai la ke kukui o ka papaaina, a iho mai la au e hoopiha ia Hanale a holo ia Keoni Bulu, nana aku oe la, elua mapua hoe i ka hookahi a Hanale, a kauaheahe mai ana na pali o Waianae, a hui iho la me ka Lunakauawai opio Wm. Achi me ka pumehana ame na olelo hookaau ana e pili ana i kona kulana, a hui iho la me ka Hon. Sam Keliinoi ame ko’u hoa no hoi ma ka maua haha, e holo nei, a pono ole mai la ua hoa nei o’u, no ka mea ua kau mai la na mea apau i ka puu, a moe aku la oia, a paupu ae la au i keia wahi lei:

            I Waianae makani kuehu lepo,

            Makani houhou ili inisi inisi malie.

            Ke pakika loa aku la a hoi aku la au e hooluolu i ko’u wahi pauku kino, a lilo aku la me Anoipua, a i puoho i kahi keiki lawelawe e kalahea ana Nawiliwili, Nawiliwili i o ae nei, a i kuu nana ana iho i ka manawa o ka hora 1:50 a.m. a kuu iho la ka heleuma o ua Kinau nei i ka hora 2:10, a eia ke hooponopono nei i kahi puolo, a hui iho la me kuu hoa me ka pumehana, a pehea oe? Maikai no; pehea hoi oe? Maikai fine. Hui aku la me na hoaloha, a kali aku o ke kahea ia mai e kau i ka waapa, a kau aku la no maua, a na ka waapa mokuahi e huki a he anapuu ana na ka pauku kino, holu ana i ka uwapo o Nawiliwili, a lele aku la.

            E ku mai ana ka Hon. J. M. Kaneakua me ka hemo mai o na lima a elua me ka pumehana no hoi o ua makamaka hoahanau nei, a loaa mai la na paiki o maua ame ka hui ana aku me ke Kahu Kauka Opio, a kau aku la makou ma ka mokukaa a nee aku la nomua, a ike koli’uli’u aku la au i keia mea malamalama a poepoe no hoi aia au ke nana la me ke kaha o ka manao, a i ke kokoke ana aku, hoomanao mai la au o ke kahua ia o ka hale aupuni kalana.

            He uwaki nui no hoi e hoike mai ana i ka manawa o ka hora 2:50 a.m. ia, me ka manao maoli o ka meakakau o ka Hoku la o Bekelehema, hookahi no paha ua hupo, he noho mau i kahi hookahi, a ninau aku la au i kuu kamaaina, owai ka inoa o keia makani o houhou nei i kuu manawa? Olelo mai la kela he makani kui keia, a he makani kuehu holoku, a hu ae la ko makou aka.

            A owai hoi keia puu e kau aheahe mai nei, a holu anapuu ana makou i ka ihona? O kapaia keia; maikai kona kulana, piha pono i na hale ame ka aa mai a na kukui, a haupu ae la au i keia wahi lei mokihana:

            O ka a wale mai no a ke kukui,

            Aole ka mea i manao ia.

            Kiei aku au ma ka pukaki,

            O ka pela me ka uluna ke waiho ana.

            O hanamaulu aku kena i o ae nei; a e a mai ana ka uwila, ua like maoli me Waipahu, Ewa, o ka owe a ka lau o ke ko kau mea lohe ma kela ame keia aoao o ke alanui, eia no ua mokukaa nei ke kuupau nei, a komo ana i ka Haukomo, a holuholu ana i ka uwapo nani o Wailua, he nani maoli keia uwapo i hanaia ai e ke akamai o ia kauaka Hawaii hoopono ame ka hoomanawanui, oia ka Hon. Mahikoa; auwe ka nani e, a maalo ae la ia uluniu o Waipouli ia, a hoola’i ana ua moku kaa nei i Kapaa, kahi i iini ia ai, a mea mai la ka mea hanohano eia ka home e Mokumaia, e komo maloko e hoopumehana ai, a kuu iho la ka luhi o neia au ana, a hui iho la me ka makuahine maikai o ka home me ka pumehana, o ka hora 3:45 a.m. ia a hooluolu iho la kahi pauku kino i hele a laau, a eia kou rumi, ua makaukau i na pono Hawaii o kela au mamua, pumehana no hoi i ka pela nolunolu o Hulehulei, a lilo aku la me Niolopua, a i puoho i ka hanu ana iho o kela wahine u’i o ua aina nei:

            Hanohano Kauai wahine ku kilakila,

Lei ana i ka mokihana inisi inisi mailie.

            I puoho ae ko’u hana, honehone ana ke ala o ua lei nei me kuu manao, eia no au la i kuu home, a lohe ana no au i ka nehe mai o ke kai, a manao ae la e auau wahi kai, alaila ike i ka nani o Kapaa, a o ko’u nihi malie aku la no ia, a puka iwaho o ke kahua, ke nana la i na aoao o ua aina nei me ko’u mahalo i ka nani o ka waiho ana o ka aina ahiki aki la au i ka aoeone o ua kaha nei, ke kilo nei au i kona ano ame ka nee ana o ke kai, he one wale no me ka makani e kokololio mai ana mai ke kua hiwi mai, a haule aku la auau i ke kai o Kapaa, a hoi mai la auau i ka wai kaulana o ua kaha nei, a hoomaemae mai la no hoi, a hui aku la me ko ka home kamaaina, a hoolaunaia mai la ia’u kela kaikamahine u’i waipahe, Mrs Senakoa ka eueu o Maui, ua kamaaina mua no i Pauoa, oiai oia me kana aliikane e noho ana me na pokii, o ia mau no ka heahea o ua lede nei o kela oluolu no ame kau semio no hoi, nana aku oe i ua Mine nei mea ole ke alu ka ihona pali

            O ka Poalima keia, maikai keia la wehe, pau mai na paia lani i na mea maikai no na elele lawe, kauoha, ke hele la ia oluolu maikai ua mea apau; o kekahi mea maikai a ka mea kakau i ike ai, o ia keia: Hookahi pele e hoomakaukau oe, i ka elua o ka pele e noho iho maluna o kou noho, ua piha ke pakaukau i na mea a ka puu e ono ai; ulumahiehie mau ka home ame na mea e pono ai keia kino, ame ka hoomaha liilii ana ame na ninau like ole mai ka makuahine mai. E Mokumaia momona no hoi oe, ua loihi no hoi akahi no kaua a hui hou; ma ka nana aku a ka mea kakau oia mau no ka u’i, aole elike me ko keia au o ka hamo pauda no oe, o ka mea apiki ano molohia no hoi ano e mai la ka ili kohu kaupakaa, i ka ike ana aku i ka makuahine, aia mau no ka ulumahiehie.

            I ka makaukau ana o ka naue no ia no ka ike hou ana ia Lihue, he ike maoli ko’u kamaaina, i ka noho kapena, nana aku oe moe kololio ka holo o ke kaa, i kuu ninau ana aku, ehia mile mai Kapaa ahiki i Lihue, 21 ½ mile, 45 minuke wale no e holoia ai, i keia la ua ikeia na kualono ame na kuahiwi, ahiki aku la i kona keena hana, o ia no hoi ka hale oihana o ke Kalana o Kauai, a hui me na luna aupuni kalana: Mr. Henry Blake, lunahooia o ke Kalana; K. C. Akana, puuku; S. K. Kaeo, loio; W. H. Rice makainui; J. M. Kaneakua, kakauolelo; Enoka Lovell, hope makai nui; C. J. Holt, hope ohi auhau.

            O keia mau keonimana o lakou nei na kiai naue ole nana e kiai a e malama i na waiwai o ke kalana ame kona holomua me ka nee malie loa, a ua hilinaiia no hoi no ka hoopono malunao ka lakou hana.

 

LOAA I NA KIURE KA HOOPII HOAHEWA PILIWAIWAI.

 

            Mahope iho o ka huli ame ka ninaninau pono ana o ke kiure kiekie o ke Teritore i na hana piliwaiwai ma Waipahu ae nei, i hoihoi ae ai lakou, ma ka Poakahi aku la i hala, he hoopii hoahewa, e ku-e ana i na lunanui o ka mahiko o Oahu, ma ke ano, ua pili ka lakou ka hewa, o ia ka ae ana aku i na hana piliwaiwai, e lawelaweia maluna o ka waiwai o ka mahiko, a maloko hoi o na hale i nohoia e na limahana.

            Malalo o ka mana o kela hoopii hoahewa o na lunanui apau o kela mahiko, mai ka lunanui mai ahiki aku i na lala o ka papa hooko, ke hoea ae ana imua o ka aha, no ke kupale ana ia lakou iho.

            He elua mau wahi noho o na limihana i hoomaopopoia, ka hoohanaia ana o ka piliwaiwai, ma ke Camp 5 ame 6, no ia kumu, ua manao ke kiure kekie, ua pili aku ka hewa i na lunanui o ka mahiko, i ka hookuu laula ia o ka piliwaiwai ma na wahi i kuleana ai ka mahiko o Oahu.

            Maloko o ka palapala hoopii heaheawa, e hoakaka ana ia no ka lawelaweia ana o ka piliwaiwai, ma ka la mua, o ka mahina aku nei o Novemaba i hala, a iloko hoi o na mahina he iwakaluakumamalua mamua aku.

            O na haku o keia mau camp, oia o Tng Lin ame Lee Chong, ua hoihoi ae ke kiure kiekie i na hoopii hoahewa e ku-e kiure kiekie i na hoopii hoahewa e ku-e ana ia laua pakahi.

 

EHA MAKAI I AHEWALA E KE KIURE KIEKIE.

 

            Mamuli o ka huli ame ka noii pono ana a ke kiure kiekie o ke Teritore ma na mea e pili ana i na hana piliwaiwai, ma koolau aku nei, i hoihoi ae ai kela kiure i kana hoike imua o ka Lunakanawai De Bolt ma ka Poakolu aku la i hala, e ahewa ana i kekahi mau makai o Koolauloa, no ka pili o ka hewa ohumu ia lakou, e hoopakele i na hana piliwaiwai.

            O na makai i komo ma ka hoike a ke kiure kiekie, oia ka Hope Makai Nui Joseph Luahiwa o ka apana o Koolauloa; Joseph H. Holi, ke kapena makai o Hauula; Solomon Ili, he makai no Punaluu; Samuel W. Logan, he makai no Laie, a mawaho ae o kela mau makai eha, he Pake kekahi o Tai Kou ka inoa, he mea malama kaa otomobile hoolimalima no Punaluu, o lakou apau ka i loaa ka hoopii hoahewa i ke kiure kiekie, ma ka lakou noii pono ana ma na mea pili i ka hana piliwaiwai.

            Ma ka hoike a ke kiure kiekie, e hoakaka ana ia i ka hui pu ana ae o kela mau luna oihana o ke aupuni iloko o na hana ohumu, me ko lakou maopop ono, a i ku-e hoi i ke kanawai, ua aeia aku ka hana piliwaiwai, o ia ka pai-kau, ka lulu me ka ulu ame ka fan tan, e lawelaweia ma kekahi wahi i hoolimalimaia, a i hoomaluia e lakou ma Punaluu.

            Ma na hana huli a noii i lawelaweia e ke kiure kiekie, ua oleloia ae, ua loaa aku kekahi mau mea e hookahahaia ai ka manao, no na hana piliwaiwai ma ka huli Koolau aku nei, e hoea mai ai i ka hopuia ana o kekahi poe hou aku i ka manawa kupono.

            Mahope iho o ka waiho ana ae o kela kiure kiekie i kana hoike, i hoopuka ae ai ka Lunakanawai De Bolt he palapala hopu, no kela poe elima, a e hoea ae lakou imua o ka aha, ma ke kakahiaka o keia Poalima, no ka pane ana, no ko lakou ku i ka hewa ame ka ole.

            No kekahi mau mahina ae nei i hala, i lawe ae ai ke kiure kiekie i ka hana noii i na hana piliwaiwai ma ka huli Koolau aku nei o ka aina, me ka nui o na hoike i hoea ae imua o kela kiure, no ka lakou mau mea i ike ai, a mamuli o na mea i loaa aku i ke kiure, i waiho ae ai lakou i ka hoike elike ae la me ia maluna.

            Ma ka oleloia, aole o keia wale ae la no na mea i loaa i ke kiure kiekie, aka he nui a lehulahu, eia uae, ua hookauluaia ka waiho ana ae i kekahi mau hoike hou, ahiki i ka manawa kupono.

 

MAKE HE BEBE 18 MAHINA I KE KAA UWILA

 

            Ma ka hora 12:30 o ka auwina la Sabati i hala iho la i make hikiwawe loa ai ke kaikamahine uuku 18 mahina a Manuel Dias, he Pukiki nona ka inoa o Francis dias, mamuli o ka hooku’iia ana mai e ke kaa uwila a piiia kona kino e na huila o ke kaa e hooholoia ana e J. F. McCarthy, ke kiakaa, a o Geo. Manoha ka mea ohi dala, maluna o ke kihi o na alanui Kula ame Luso.

            Ua palahe ke kino o kela bebe mamuli o ka piia ana o kona kino e na huila hope me ke kaualakoia ana aku o kona kino no kekahi wahi mamao.

            Ma ka louo i hoikeia ae i ka oihana makai, ma ka aoao o ke alanui keia bebe kahi i ku ai, a i ka manawa e holo mai ana o ke kaa uwila i ka ihona no haki o ka huina alanui oia ka manawa o keia bebe i holo ae ai a kaa pono ma ka aoao o ke kaa. Ua hina oia ilalo a kaa pono malalo o na huila o ke kaa.

            Ma ia la no pakele kekahi bebe Kepani mai palahe i na huila o ke kaa uwila o ke Alanui Moi mawaho iho o ka hale kii onioni ma Pawaa, e ole wale no ka ike mua ana mai o ke kiakaa a kiiia mai a hapaiia ae maha’i o ke alanui.

 

NO WALLACE NO KA HEWA NO KA HOOLOHE OLE I KE KAUOHA

 

            Wakinekona, Dec. 12.—Ua loaa ae i ke keena aupuni he pane no ka ninau i uiia aku ai mai ke aupuni Mekiko mai e pili ana i ka pepehiia ana a make o James Wallace e na koa a Carranza, he makaainana Amerika, maloko o ka apana aina o Tampico ma ka la 28 o Novemaba.

            I kulike me ka hoakaka a ka palapala mai Mekiko mai ua hauohaia ae e ke aupuni o Mekiko ka hopu ana i na koa e kau ia aku ai na ahewa ana no ka make ana o Wallace. E hoakaka ana ka palapala ua ona o Wallace aole i ku iho ma ka manawa i kauohaia mai ai e na koa a Carranza.

            I kulike hoi me ka hoakaka a ka lono mua i loaa mai i ke keena aupuni, ma ka hoakaka a ke aliikoa nana e hoomalu ana i na koa i hoomoana ai ma Tampico, ua hoonaukiuki aku ka o Wallaci i na koa ma kona manawa i kiia mai ai a make.

 

 

E HOIHOIIA ANA NA PILIPINO PU PULE I KO LAKOU AUPUNI

           

            I nei manawa he 45 poe Pilipino papule e paa mai la maloko o ka halema’i pupule ma Kalaepohaku. He 24 o lakau he poe maikai iki a hoopoino ole mai, a o ke koena iho, he poe ino loa.

            Ma ka halawai a ke komisina kau kanawai teritore o ka noho pu ana me ke Kiaaina McCarthy ma ia halawai ma ka auwina la Poakahi nei, a iloko o ka manawa e kamailioia ana maluna o keia kumuhana, ua hoakaka ae ka Hon. W. T. Rawlins i kona manao e pon  e hoihoiia aku na kanaka o na lahui e i loaa i ka ma’i pupule i ko lakou mau aupuni, kahi a lakou i hele mai ai.

            Ma ka hoakaka a ke kiaaina ua lehulehu na palapala i loaa ae iaia e hoakaka ana ma ka mea i pili i ka poe o na lahui e i loaa i ka mai’i pupule. O ka Peresidena Trotter o ka papa ola ka i hoike ae iaia no ka nui o na hoolilo o ke teritore i ka malama i ka poe Pilipino pupule, o ka hana pono wale no oia ka hoihoi ana aku ia lakou i ko lakou wahi i hele mai ai. I kulike me na huahelu i hoikeia ae he 68 keueka ka lilo o ke teritore i ka la no ke kanaka hookahi iloko o ka mahina o Augate i hala. I a mahina mamua aku he 63 keneka o ka la.

            Wahi hoi a ke Kakauolelo R. D. Mead o ka Ahahui o ka Poe Mahiko, kahi a ke kiaaina o ka hoike ana ae, ua ae ka poe mahiko em ka makaukau e uku i na hoolilo no ka hoihoi ana aku i na Pilipino, o ka pilikia wale no aohe loaa o kahi kupono maluna o na moku no ka hoihoi ana aku ia lakou. O keia hana o ka hoihoi ana aku i na Pilipino pupule he 21 e waiho ia aku ana mamua o ka oihana kaua, no ka mea, o na moku lawe koa wale no na moku kupono e malama ia ai keia poe me ka maalahi a na ka poe mahiko e uku i ka hoihoi ana.

            Na Lunamakaainana Rawlins i hoakaka ae i kekahi mea a ka mokuaina o Kaleponi i hana ai, oia hoi ka hoihoiia ana aku o kekahi poe Pake pupule i Kina. O kekahi o ia poe pupule he 38 makahiki ka loihi o ka paa ana i ka halema’i pupule. Ua hoihoiia aka e ka makuaina o Kaleponi na ma’i pupule apau a na lahui e i ko lakou mau aupuni, a oia ka Rawlins o ka hoakaka ana ae ina ua hana o Kaleponi pela, no keaha hoi o Hawaii nei e hana pu ole aku ai, aohe kumu maikai ike e hiki ole ai ke hoohalike aku me ia.

 

HE LEO HOALOHALOHA NO MRS. CHARLOTTE KAWALEWAI.

 

            Kuu Solomon Hanohano, Anoai oe: --Me ka naau i mokumokuahua i ke aloha i ko makou opio, a aloha poina ole no Mrs. Charlotte Papakeleaulani Kahalewai.

            Aohe eu i ka hana a ke anu,

            Ua oni wale i ke oho o ke kupukupu,

            I na hoa pa kaunoa i ka la e,

            Ka la o ke aloha i hiki mai ai no ko makou opio maikai, hoopono, a makua e hiki ole ai hoi ke hoonalonalo iho i kona helehelena mai ia makou aku, no ka mea, ua lilo kana mau hana i mau mea na makou e poina ole ai. A uwe Papakeleaulani hele loa e, aloha no!

            Ma ka hora 7?15 o ke ahiahi Poaha. la 20 o Novemaba, 1919, i kii mai ai ka anela o ke aloha ole a lawe aku la i ka makou opio aloha, Mrs. Papakeleaulani Kahalewai.

            E Home Maluhia, ua pau ko oukou lohe hou ana i kona leo; e Home Maluhia e, ua pau ko oukou ike hou ana i na lima o Papakeleaulani e paani ana i ka piano, ua nalo, ua pau, ua moe, e hooipoipo ana paha me Niolopua. Aloha no!

            Ua haalele mai i kana kane aloha ame kana mau lei gula ame hona mama aloha nui ia eia. Ua moku ke kaula waki o ka berita mare, ua hoi i ka home nani ma o me kona Haku e pili mau ai.

            E Mrs. Lilia Aholo e, ka mama i hooneleia i ke keiki, e imi ana paha oe ia Papakeleaulani, e huli wale oe ma na paia o Puna, aohe ana e loaa o Papa keleaulani ia oe; ua hele aku la e huli i kana puni ke ala pua rose.

            Auhea oe e Sam Kahalewai e, ke ka ne i hooneleia i ka wahine; ua pau kou ike hou ana i na hana maikai a kau mea aloha; aole hoi o kou hele aku a hoi home. ike aku hoi oe i kau mea aloha nui he wahine, ua mae ka ilima aohe ia e koii hou.

            Ua pau kana hana maikai maanei, ke au la i ke kai loa o Puaena. Ua nalo kona mau maka palupalu, ua kuu ka luhi, ua pau kona u ana i ka ehaeha o keia ao.

            Ua ko iho la ka olelo o ka Buke Nui he mahu ke ola i pua a nalo aku. E hoonani ia ka Haku ma ka lani, Nana no i haawi mai a Nana no i lawe aku. Ua lawe aku oia i ka uhane, a o ke kino lepo kana i waiho iho na kona mama. kane aloha, ame kana mau lei e hoomanao pau ole ai. ame kakou apau.

            Ke kalokalo nei makou i ka Makua lani, e haawi mai i ka maha o na luuluu i kona mama aloha, i kana kaue aloha, ame na lei ma keia ao; na ke Akua e lawe aku na kaumaha mai ia oukou aku, ame makou pu kekahi.

            Ke noi hou nei no au ia oe e kuu Solomon Hanohano e hoouna loa i hookahi kope o keia hoalohaloha i ka makuahine ame ke kane. Me ka mahalo nui ia oe e na keiki pa’inupepa, a ia oe no hoi kuu mahalo nui loa.

            O makou na hoaloha. a hoahanau o ka Ekalesia o Kawaiahao.

                        MRS. ANNIE M. KENNEDY,

                        MRS. N. K, NAUKANA,

                        MRS. H. BAKER,

                        MISS LONO NAUKANA,

 

NA INAMONA O KE KOOLAU.

 

            Ua oili mua mai nei o Joseph Kekuku Apuakehau, $2.00 holopuni; Mr. Kelii o Laie, $1.00, holopuni hapa.

            Auhea aku mawaho, ka eleu, ame ka holokiliopu no 1920 o ka hemahema, malia i’o paha, e hiki mai ana a hiki mai no!

            Neah mai nei hoi keia o oikou puni nane? Ahea, ahea ana la ka hoi; o kumulau moa ualehu o Laie, a o na wahi no apau? Pehea ana ka holopuni o 1920, a posi apuni o 50 pooleka mawaho mai?

            Auwe, ka mahina kupaianaha holo kapakahi o Kahuku, aina lewa i ke kai; ma ka wanaao Poaono nei o Dec. 6, hora 5 a.m. ponoi, ia’u e holo kaiehu kuupau ana i ka loa maluna o ko’u wahi lio hapa mapu imua, ihope, ma ka ihu akau hikina e holo hi-o akau ana no, no Waialee School Hoopololei, aia pu no ko’u ike i ka iho ana aku o ka mahina o kimo poo iloko o ke kai paha, a i ole, he puka poepoe paha ma o aku ona, o ka’u kupanaha i ike aku, me he la o ka’u ike hoomaopopo ana ia, he wahine u’i maoli, peopoe na maka, memele ka ili me he la ka hoi i hoopuu ae, a i ole, i hoiamo ae, a o ka nalo aku la no ia iloko o ke kai, a o kona wahi no ka ia iloko o ke kai, a o kona wahi no ka ia. i puiwa hou ae au i ka o ana mai ho mau olino malamalama hou ka hoi keia mahope mai o kuu kua, i hoohuli ae kuu hana, a ike hou aku la he mahina hou no ka hoi keia, e puka hou mai nei mahope, like no ka nui poepoe a ula ohelohelo no hoi a ka wahine u’i, ea; kupaianaha maoli, elua ka mahina, iho aku a pii hou mai, o ko’u kuleana paa mua no. E kohu ai o ka hooniponipo, o ke kelepona i ka hikina, ua pane ia mai aole ia he mahina haina, o ka la no ia a hoohuli ae au i ke kanuku, a pu puhi makani hou aku, e hooponopono hou mai, ke iho loa nei ka mahina i ka aoao akau loa o Oahu nei, a pehea o Honolulu ka oukou ike i ka napoo ana o ka mahine, e hoi loa ae ana paha a ma o mai o Daimanahila a napoo ma Waialua ia J. H. Kawelowai kau aoao.

            Huli hoi aku la kahi keiki kolohe o Nahiku, a poina oe i ka nani o Laie.

            I Laie iho la ka makani hoki’oki’o o Waikapu e huli hoi aku ana na malihini ko’iko’i o Salt Lake City, Utah, Amerika mai, ma ka Poalua, la 9 o Dekemaba nei, ina pela, ua puehu mua mamua o keia Poalima. la 12, mahope loa.

            E heluhelu a koho iho penei: Mat. xvi:18. Kou uhane, kou kiaika, ame kou manao apau, oia ka ekalesia pono a po@ ei, a ke Akua, ka Makua, i kana Keiki, a ia Joseph Smith Jr., i kukulu hou ia ai, a oiai, ua hoi o Jesu a pau loa na aposekolo i ka make, a wanana na kaula i ka wi nui o ka honua i ka euanelio ole, a hoihoi hou ia mai i ka honua nei, Luka x: 22.

            Ma Isaia e ioio mai no mai ka lepo mai, ka olelo a ko Akua. Haina ka papa gula pohaku i hoikeia mai ka lepo mai o ka puu o Kumora o ia ka buke a Moremona ia Joseph Smith, Jr., ke kaula i koho pono ia e ke Akua, aoeh ae mawaho o keia.

            Mr. Lunahooponopono, e haawi i ka lokomaikai, opu ahonui, e hoopuka ae i keia Poalima, no ka pono o ko kaua poe heluhelu. Ke makemake nei au o hoonui loa aku i kau palena wehewehe ma keia auiui aku. Ko’u adieu 1920 ame kuu uhane apau e hoonui ae i ka holomua o kau hana, me kou mau paa haua ma ka papapa’i, a haku pu no ka pomaikai kaulike o ka lehulehu o Hawaii lahui a Hawaii o kuu aina hanau aloha.

 

NALOWALE HE KEIKI UUKU.

 

            He mea anei kekahi i ike i kekahi keikikane haole, lauoho haulaula, o eiwa makahiki, me ka papale ole, a oloheloho hoi o na wawae, aole kamaa, me kekahi paalole bolu ekeke’i? O kekahi e ikeia ana me kela mau hoakaka ae la maluna, eia oia ke hele auwana nei ma kekahi wahi o ka Mokupuni o Oahu nei, a i ole, aia paha malalo o ka malu o kekahi mea, mawaho ae o kona mau mkua ponoi, i kulike ai me na hoakaka a ka Makai o na Keiki Joseph Leal, ma nehinei, ka mea i noi mai i na nupepa e kokua aku ma ka huli ana i ke keiki nalowale. Ma ke ahiahi o ka Poaono aku nei i hala i nalowale ia kela keiki uuku.