Ka Nupepa Kuokoa, Volume LVIII, Number 36, 3 September 1920 — Page 7

Ka Nupepa Kuokoa

 

NUPEPA KUOKOA, HONOLULU, T. H., POALIMA, SEPATEMABA 3, 1920.

 

He Moolelo no

 

MARGARITA ADAMU

 

a i ole

 

Ka Hoohokaia Ana o na Manao Lapuwale o ka Mea Kolohe—Ka Papahi Ana o ka Mea Hoopono i ka Hanohano me ka Waiwai

 

MOKUNA XXXVI.

 

            Ua ike aku o Tede i ke komo ana mai o kela kanaka malilani i paa kona poo i ka wa-hiia me ka wela, a e komo ana hoi me kona paleili wale no. nolaila hopu mai la oia i ua kanaka nei a hoonoho iho la maluna o kekahi noho, me kona ku pu ana iho ma kona aoao, e kakali ana, o ka loaa o ka manawa kupono ana e kahea aku ai i na kokua, no ka hoihoi ana aku i kela kanaka ma’i noloko o kona wahi i waihoia ai.

            Ua lohe mua o Tede no ke kukonukonu o ka poino i loaa ia Makala, oiai oia ma kona alahele i holo mai ai no ka hui pu ana ma Kapena Rede, a ina paha i loaa aku ka ike iaia o keia no ke kanaka nana i hookau aku i ka poino maluna o kona hoaloha, ina aole loa ua o Tede e nana mai iaia me na manao aloha no kona noho pouluili loa nae i ka mea a keia kanaka i hana aku ai ia Kapena Rede, nolaila he hookahi wale no noonoo iloko ona, o ia ka hana mai i na mea apau e pono ai o Makala.

            No kekahi manawa laihi, aole he hookahi mea hiki ke kamailio ae, aia ka meha ke halii la maloko o kela keena, aia no hoi o Nina Hilakona ke nana pono la ma na maka o Makala. pela no hoi o Makala e haka pono mai la kana nana ana maluna o Nina. me ka puliki ana o kona mau lima, mahope o kona noho. i mau ai ka ikaika iloko ona, oiai hoi o Tede ame Pilipo Rede e nana mai ana i kela mau me ka piha kahaha.

            No kekahi manawa kela noho hamau loa ana o na mea apau. alaila hoao ae la o Nina Hilakona e minoaka, alaila pane aku la ia Makala me ka leo haalulu:

            “Ua hoopuiwa loa ia mai au, ia ka’ike ana aku ia oe e Makala, me kena kulana poino ou, no ka mea aole i maopopo mua ia’u, o oe kekahi koa oloko o ka puali kiai lahui, a oki loa aku hoi ko’u lohe ana ua loaa oe i ka poino.”

            “Pela i’o ka hoi, alaila ina ka paha oe i lohe ua loaa au i kekahi poino. alaila, o oe anei ka mea mua loa e hele mai e ike ia’u?” wahi a Makala, me ka hele o kona mau maka a hulili, i kau a mea o ka piha me ka inaina, ke naka wale la no hoi kona kino me ka haalulu, a i hou mai la:

            “Malia paha, ina no kou lohe mua, ua loaa au i kekahi poino. o oe ka mea mua loa, e waiho aku i kau mau leo pule imua o ke Akua e hoopakele ae maika make mai. O e Nina, iwaena o na kino kanaka apau a ke Akua i hana mai ai ma ka honua nei. o oe ka wahine ino hookahi. a ke hoomaikai ae nei au i ke Akua i kona hooloihi ana mai i ko’u ola ana. ahili i keia manawa a’u e hokau aku ai i ko’u inaina maluna ou.” Alaila hilinai mai la ua o Makala ihope, no ka mea ua hele oia e paupauaho. No ka mea ua kamailio aku oia i na olelo maluna ae, me ka hookikina maoli o kona leo.

            “Ua hehenaia anei oe e Makala. i hoopuka mai ai oe i kekahi mau olelo i kupono ole i na lehelehe o ke kanaka ke kamailio?” wahi a Nina. me ka hoike oka ana mai o kona ano i ka maka’u ame ka hopohopo. No kekahi mea ano nui, e oili mai ana mai kela kanaka mai.

            No kela mau olelo mai ia Nina Hilakona aku. ua ala hou mai la o Makala a noho pono iluna, me ka i ana mai:

            “Aole loa au i hehena. aole he manawa e ae i loaa ai ia’u ka noonoo maikai loa elike me keia. O kou makemake loa e Nina. o ia no ko’u lilo i kanaka hehena. aole nae nou ia hewa. o ko’u lilo ole ana i kanaka pupule. no ka mea, aole no i ae mai ke Akua e nele au me na noonoo maikai elike me ia i loaa ia oe.

            “Mamuli o kau mau hana e Nina, ua paa kuu hoohiki. e hoea mai ana ka la a’u e hookau aku ai i kuu inaina maluna ona. ua hoea mai ia manawa, a e ike ana oe. aole he wahi hana maalahi. ka hoao ana mai e pulapu i kekahi kanaka noonoo maikai elike me a’u neo. He kanaka puniwale au, he mea hohewale. a he kanaka kipi a kumakaia i kuu ainaame kuu hae. A he kanaka hoi e hiki ole ai ke hilinaiia mai e ka poe maluna ae o’u. aka nawai i hoolilo mai ia’u i kanaka o kela ano? Naue Nina. a maluna iho o kou poo. ka auanio ana i na hopena awahia o ka anoano au i lulu ai.

            “O oe e Nina ka mea nana au i alako aku iloko o ka nenelu o ka hewa. a maluna iho o kou poo e kau aku ai ko’u mau hewa apau. a o na hoopa’i e hookauia mai ana maluna o’u. o ia mau hoopa’i hookahi no ke kau aku ana maluna ou. Ina au e kiolaia aku ana iloko o ka luahi o Gehena kahi e naka ai ko’u mau kuli. a e uwi ai hoi kuu mau niho. Alaila o oe pu no kekahi iloko olaila, e auamo ana ia mau hopena ehaeha apau.

            “Ua maopopo no anei ia oe ke kumu i lilo ai au he kanaka hohewale, me ka maka’u i ke ku ana aku imua o ke alo o ka enemi? Mamuli mai no ia o kuu maka’u i ka inaina o ke Akua a’u i ike ai ua makaukau loa kona inaina e kau  mai maluna iho o’u. Aia iloko o kuu uhane ka manao pepehikanaka, a’u e maka’u ole nei ke ku aku imua o Kona alo. Me ka hapala nae o kuu uhane me na kihe’ahe’a koko o ke karaima pepehikanaka. a kuu lima i hooko aku ai, aole a’u hoole ana ae no ko’u pili i ka hewa ma na ano apau. Ia’u i nana aku ai maluna o ka helehelena o ka mea hewa ole. a hoouna aku la i kona uhane imua o ka Mea Nana oia i hana mai. me ke kumu ole. ua ili aku ke ko’iko’i o ka hewa maluna ou e Nina. no ka mea o oe ponoi ka mea nana i kauoha mai ia’u e hooko aku i ke karaima pepehikanaka. aole he mea okoa ae. Ua hauleia au i ke aloha nou e Nina. ua ike no oe ia mea. a na ia aloha iloko o’u nou i lilo ai au i mea paahana, na kou mau manao lapuwale apau.”

            Ma kela wahi o na olelo a Makala e noke la i ke kamailio aole e hiki hou aku ia Nina ke hoolohe, no ka mea ke hu’epania mai la na meahuna i pili i kona ola ana e kela kanaka. alaila ku okoa ae la oia iluna. Ma ka pahola ana aku o kona mau lima. Imua o Kapena Rede. A i aku la:

            “O. e Kapena Rede. Imua o kou aloha. ke noi aku nei au i kou oluolu e papa ae i keia kanaka mai kona kamailio ana mai i na olelo oiaio ole. Ke hoohiki nei au imua o ke Akua a minu hoi ou e kuu kapena maikai. oiaio ole. Ke hoohiki nei au imua o ke Akua a imua hoi ou e kuu kapena maikai. aole loa he oiaio iki iloko o na olelo apau a keia kanaka e kamailio mai nei!”

            Aohe a Kapena Rede pane no na olelo a Nina Hilakona imua ona. o ka mea nae nana i hookahaha aku i ka manao o ua kapena nei. o ia no kona ike ana mai ia Makela e huli pono aku ana imua o kona alo. me ka pane ana aku:

            “Eia au ke hookokoke mau ak unei ma ka’e o ka luakupapa’u. nolaila e ike mai oe e Kapena Rede, aole he kumu maikai ma ko’u aoao. e hoike aku ai i na mea oiaio ole. Ke hoohiki nei au imua o ke Akua, ka Lunakanawai, a’u e hele aku ana e ku imua o Kona alo. o ka oiaio wale no ka’u mea e hoike nei maloko o keia rumi, aole loa he hookahi hoopunipuni iloko olaila. Owau ka mea nana i hookau aku i ka poino maluna ou, aole ia mamuli o kekahi kumu okoa ae, aka mamuli o ko’u lili, no ka maemae o kou ola ana elike me ka hau, pela hoi ke koa o kou puuwai elike me ka liona, oiai hoi au he kanaka i hele a ekaeka me na hewa like ole o keia ola ana. No ka hana ana aku nae i kekahi maikai no ka hewa nui loa a’u i hana aku ai maluna ou, ke makemake nei au e hoopakele ae ia oe, mai ka lilo ana i pio malalo o na hana pelo a keia wahine, i like aku kona ino me ko ka nahesa.

            Ia’u i noho mai nei maloko o ko’u rumi,lo he mai nei au i ka leo o ka wahine i hele a kamaaina loa ia’u, a iloko o ko’u kunana nawaliwali, ua loa nae ia’u ka ikaika e hele mai ai maloko nei, mamuli o ka hoalaia ana mai o ka inaina iloko o’u nona. Ua kokolo mai nei au ahiki ma ke puka o keia rumi, malaila au kahi i noho ai no kekahi mau minuke, me ka lohe pono o ko’u mau pepeiao, i na huaolelo apau e kamailioia ana mawaena o olua, a mamua o ka noho mana ana aku o keia wahine, maluna o kou mau noonoo maikai apau, pela iho la au i hele okoa mai nei, no ka hoopakele ana ae ia oe mai iaia mai. E ae mai ana anei oe e Kapena Rede, e hoolohe i ka’u mau olelo, a i ole e manaoio aku ana paha oe i na olelo a keia wahine?”

            “Ke haawi aku nei au i ka manawa nou. e hoike mai ai ia’u i kau mau mea apau i manao ai. a ua hiki ia Nina, ke hoakaka mai mahope aku. i ka pololei ole o kau mau olelo.” wahi a Kapena Rede me ka leo kuoo.

            “Aole, aole loa!” i hooho ae ai o Nina Hilakona, me ka hoopahola ana aku i kona mau lima imua o Kapena Rede. “Mai hoolohe hou aku oe i na olelo hoopunipuni a kela kanaka. Ma ke ano he wahine au i kokoke e hoopalauia me oe—“

            “Uwoki,” i kahamaha koke mai ai o Kapena Rede, me ka leo kuoo, e hiki ole ai ia Nina Hilakona, ke pane hou aku.

            “Aole oe he wahine hoopalau na’u e Nina. Mamuli paha o kou manao. ponoi iho, a i ole, ma ke ano kuhihewa, no ka’u mau olelo apau i kamailio aku nei imua ou, pela oe i manao mai ai, he wahi lihi noonoo kekahi iloko o’u nou, ma ke ano au i hoopuka mai la. Mamua o ke komo ana mai o keia kanaka maloko o keia rumi, aole he noonoo e ae iloko o’u. o ka hana wale aku no i na mea e hookaumaha ole ia ai kou manao. Aole o’u makemake. e komo hokai hou mai oe. ina he mau mea kekahi a keia kanaka i makemake ia e hoike mai ia’u; no ka mea ke emi mau aku nei kona ikaika. Ina oe e hoao ana e komo hokai wale wai, ma a hookaawale aku ia oe no kekahi wahi okoa.”

            Ua hoopukaia mai kela mau olelo e Kapena Rede me ka leo kuoo, a ina he manao kekahi iloko o Nina Hilakona, he kanaka oluolu loa o Kapena Rede, ua auhee aku ia manao mailoko aku ona, mamuli o ka ike pono ana aku i ke ano o kela kapena koa, aole oia he kanaka hiki ke paani wale ia aku me ka maalahi.

            Aia ua o Nina Hilakona, ke hoo-pu malie la maluna o kona noho, a ke haalulu wale la no kona mau lima, mamuli o kona hoomaopopo, e hua’i pau ae ana o Makala i ka moolelo o kona ola ana, ame kona mau ano epa he nui, ka mea hi ana e kau la ka weli, no kona hooliloia mai i wahine ino loa ame ka hoowahawahaia e Kapena Rede.

            Ke kakali malie la hoi o Makala, ahiki i ka loaa ana iaia o ka ikaika kupono e hoomaka mai ai e kamailio, ia wa i owaka ae ai kona waha. a pane mai la imua o Kapena Rede:

            “Aole i maopopo ia’u, pehea la ka loihi i hala ae nei, aka nae. he mau makahiki paha he umi kumamaono. a i ole malalo mai paha. ua halawai mua loa iho la au me keia wahine, o ka umi-kumamawalu no ia o kona amu makahiki. Ia manawa o ko’u halawai mua ana me ia, oia kekahi o na kaikamahine kuapala, me ka lauoho eleele, ame na maka bolu alohilohi, ke ano hoi i kaulana ai na kaikamahine Ailiki no ko kakou u’i.

            “Elike nae me ka nee mau ana mai o kona mau makahiki imua. a hui pu iho me kona noke mau i ka hooluu i kona lauoho, ua loli ae kela ano kahiko ona, a i ke ano hou, eia nae, iloko o ia mau hoololiloli ana i kona ano, aole loa ia he mea no’u e hoohewahewa aku ai iaia. O ke ano maoli o keia wahine, he waipa-he oia i kekahi manawa. elike me ke keiki opiopio, aka i kekahi manawa, e loli hikiwawe ae ana oia. mai ke kulana oluolu ae. a i ke kulana uohoa, he tiga wahine ka hoa e kohu ai ke hoohalike ae, e haehae okoa ia ai kou puuwai mai kou kino ae.

            “Ua halawai mua loa au me ia, ma kekahi wahi kauhale uuku i noho nui ole ia e na kanaka, oiai oia e noho ana ma ke ano he mea malama keiki, no kekahi bebe uuku loa. No kela halawai mau o maua, ua haulehia iho la au i ke aloha nona. a o ke Akua wale no ka i ike, i ka oiaio o ia aloha a’u i haawi aku ai i ekia wahine. Na kela aloha iloko o’u, i kono mai e hoomana okoa aku au iaia, a o kona mau makemake apau, aole loa he hookahi manawa a’u i hooko ole ai; mamuli nae o ka pokole o ka manawa, aole e hiki ia’u ke hoike aku ma ke ano neepapa i ka moolelo piha o ko’u noho ana me keia wahine.

            “E hoohalaia ana kekahi mau manawa lehulehu e maua ma ka hele holoholo ana ma na lihi aekai, e hele holoholo ana ma na po mahina, ae laukaha ana hoi malalo o ka malumalu o na kumulaau, me ka hele ana i ka hoehoe waapa maluna o ka lokowai.

            “He kanaka au me kahi loaa liilii loa. o ia no ko’u uku e loaa mai ana ma ka’u hana he kupakako noloko o kekahi halekuai, me ia wahi loaa liilii no nae. ua hoolilo aku au apau loa, no ka hooko ana i kona mau makemake. Oiai nae, e hoike okoa mai ana oia i ka nui o kona aloha no’u, o ka mea apiki nae aole loa ona makemake ike e mare mai me a’u.

            “Aole no e hiki ia’u ke hua’i pau aku ia oe i ka moolelo. o ka hoea ana mai o kekahi wahine. no ka hale a’u e noho ana. a koi mai la ia Nina. e malama i ka bebe. I waihoia mai nana e hanai. Ua ki-e okoa mai kela wahine ia Nina, ma ka haawi ana mai i ke dala ame ke gula, i wahi nona e lawe ai i kela bebe. he oiaio, ua lilo ke dala ame ke gula i mea nui iloko o ka noonoo o kela wahine, o kona puni aku la no ia.” alaila hooki iho la ua o Makala i kana kamailio ana mai. i kau a mea o ka paupauaho.

            Aia o Tede ke nana la maluna o ka helehelena o Kapena Rede, pela hoi ua kapena koa nei, e nana mai la ia Tede, me ka hoomaopopo iloko o laua pakahi, no ka hoea mai i ka wa e ahuwale ae ai kekahi meahuna i pili loa aku i ko Magarita hanauia ana.

            “Aole a’u mea i noonoo hou no kela bebe ahiki i ka po nei aku la, i ko’u wa i lohe mai ai i na mea e pili ana no kekahi lede opio, akahi no a haupu mai la iloko o’u, malia paha, o ka bebe i waihoia mai malalo o ka malama ana a Nina, o ka lede opio ia a’u i lohe ai e kamailioia ana ma ka po nei.

            “I ka manawa i lawe mai ai o Nina. i na dala o ke ki-peia ana mai iaia. akahi no au a ike, eia ka, aole o Nina he anela elike me ka’u i nana mau aku ai iaia mawaho. ma ke ano oia kekahi o na wahine maemae, eia ka he iliohae oia iloko o ka aahu huluhipa.

            “Ua pipilipaa aku ka noonoo o Nina no kela bebe uuku. me ka hoonaauao ana iaia, me he keiki ponoi la nana. No ka hooko ana aku nae i ka mea ana i ae aku ai imua o ka wahine nana oia i ki-pe mai, hooholo iho la o Nina, e lawe aku i kela bebe no kekahi kauhale o na kanaka lawai’a, he wahi no i kamaaina aiai, ua noke mai oia i ke koi ia’u e noho hamau loa ko’u waha, no na mea e pili ana i kela bebe, ame kana mea i manao ai e hana aku nona, a no ke aloha no hoi i keia wahine, ua haawi aku la au i ko’u ae.

            “Aia nae kekahi mea hookahaha i ko’u manao, i ko maua hoea ana aku no kela kauhale o na kanaka lawai’a, eia ka ua mare mua o Nina i ke kane. a o ke kumu nui ia, o kona ae ole ana mai e mare me a’u,” alaila palolu okoa ae la o Makala i na lima ma kona helehelena no kekahi manawa. aka iaia i hookuu ae ai i kona mau lima, hoomaka hou mai la oia e kamailio. i ka i ana mai:

            “Hoike mai la o Nina ia’u. na kona makuakane ino. i hookikina iaia e mare aku i ke kanaka ana i aloha ole ai. a no ia nele i ke aloha no kela kanaka. i holo mahuka okoa ai oia mai iaia mai. ua lilo keia mau olelo a Nina o ka hoike ana mai ia’u, i kumu e hooiia aku ai ko’u aloha iaia.

            “Ua hoea aku la maua no kela wahi hou, a hoi aku la o Nina e noho pu me kana kane i mareia ai. eia nae. i kela ame keia manawa, e hoea mau aku ana no au imua ona, ma ke ano maalea; a e hoouna mau ae ana no hoi kela wahine nana ka bebe i ke dala iaia. aka i ka make ana nae o kela wahine, a pau hoi ka loaa hou ana mai o ke dala iaia, olelo mai la kela ia’u i kekahi la. ua makemake oia e hele no ke kulanakauhale, eia ka auanei, no ka pau ana o ka loaa mau aku o ke dala iaia ke kumu o keia uhu ana o ka manao e hele no ke kulanakauhale, aole nae au i maopopo ia manawa, eia wale mai no ko’u ike ana, a mahope mai. aka ina no paha oia i hoike mai ia’u i ka mea oiaio loa, aole no a’u mau ku-e ana aku. oiai ua aloha loa au iaia.

            “Ua lawe i’o mai la au iaia no ke kulanakauhale e noho ai, me ka haalele ana aku i kana kane me ke keiki ana o ke malama ana, me kona hoike ole mai nae i kana mau meahuna ia’u, koe wale no kona hele a piha i ka maka’u no kana kane. Ua kono okoa ia mai oia e hoololi i ka waihooluu o kona lauoho. a e pena hoi i kona helehelena, i hiki ole ai i kana kane ke ike mai iaia, ina nei no ko laua halawai ma kekahi wahi, eia nae. aole no ia he mea e pau ia kona mau manao hopohopo, e kau mau ana kona weli. no kela kane.

            “I kela ame keia po, a i na la no hoi apau, e ike aku ana au i kona piha me ka haalulu, no kona hopohopo, e pepehiia mia ana oia a make, ke loaa pono mai i kana kane. Aole he maopopo ia’u o ke kumu o kona maka’u loa ana i kana kane, aka i kekahi la nae hoike mai la oia, i ka loaa ana aku he leka mai ua kane nei aku ana, he leka hooweliweli a’u nae e hiki ole ai ke manaoio i keia manawa, mai kela kane mai ua leka nei, malia paha o Nina ponoi no ka mea nana i kakau, i wahi no’u e puni aku ai iaia.

            “Hoike okoa mai la oia i kela leka ia’u, a i ko’u heluhelu ana i na manao oloko, e hoike mai ana kela kane. no kona ike ana i kahi i noho ai o Nina. me ke koi okia mai i ua wahine nei ana, e hoi hou aku e noho pu me ia, a ina aole oia e hana aku ana pela. alaila e pepehiia ana oia a make. O kana i olelo mai ai ia’u. he hookahi wale no alahele e hiki ai iaia ke noho pu hou me a’u, o ia no ka make ana o kela kane ana.

            “Aole loa e hiki ia’u ke hoopoina i ke ano o kona leo, ame ka nana ana mai a kona mau maka, iaia i kamailio mai ai i keia mau olelo ia’u. Ua maopopo loa iaia ka nui o ko’u aloha nona, me he mea la. oia ka’u akua e hoomana ana i ke ao ame ka po, a ua makaukau hoi ma na ano apau e hooko wale aku no i kona mau makemake.

            “Ua loaa ia’u ka ike, no kana mea i makemake ai, me ka hele mai la a kau ka weli ia’u, aka i kahi nae e maopopo pono ai kona makemake, ninau okoa aku la au iaia i kekahi la: ‘Ua makemake anei oe e hele au e pepehi i ko kane a make?’ aole oia i pane mai i ka’u ninau. aka nae, kulou mai la kona poo imua o kuu umauma. Me ka noke ana i ka uwe haalo’ulo’u, a iaia i aea ae ai iluna, honi mai la oia ia’u me ka pane ana mai:

            “Aole he alahele e ae e hoomauia aku ai o ko kaua noho aloha ana, aia wale no a make kela kanaka. me kona hoike ana mai i kahi i noho ai o ua kane nei ana. ame ke alahele a’u e hoea aku ai no kona home. No ka hele no o kela aloha a paila iloko o kuu puuwai no Nina, ua haalele iho la au iaia ma kela po no. a holo aku la no Manakeka. a ma kekahi po mai. i hooko i’o aku ai au i ke karaima pepehikanaka, ma ka pepehi ana i kela kane a Nina, i kona wa e hiamoe ana.

            “Auwe no ka hoi e!” i hooho like ae ai o Tede me Kapena Rede. no ka mea aia ua mau kanaka nei ke hoolohe pono loa mai la i ka moolelo a Makala e kamailio aku nei, me ko laua moeuhane mua ole nae, e hoea aku ana ia i kahi e hookahahaia ai ko laua noonoo, a o ia ka Tede o ka ninau koke ana mai:

            “Alaila o ka inoa anei o kela kanaka au i pepehi ai a make o Iokia Adamu?” “Ae, o ka inoa ia o kela kanaka. a o ke kane mare hoi a Nina Hilakona, keia wahine i oi aku ke ino imua o na wahine apau ma ka honua nei.’

            “Alaila o ke kaikamahine a Nina Hilakona i lawe aku ai e malama, o Magarita anei kona inoa?” i hoomau mai ai no o Tede i ka ninau ana, no kona makemake e maweheia ae ka pohihihi o ko Magarita lilo ana aku i kaikamahine na Iokia Adamu.

            “Ae, o kona inoa ia.” wahi a Makala me ka palulu ana ae i na lima ma kona mau maka. “Ua maopopo ia’u, ua kau aku na ahewa ana a na kanaka maluna o kela kaikamahine no ke karaima a’u i hana ai; ua nele nae au i ka manao koa e ku aku ai a hoopakele ae iaia mai na ahewa mai i kauia aku maluna ona. He mea pepehikanaka au. i hiki ole ia’u ke ku aku imua o ke kanaka ame ke Akua, nolaila hoomaka aku la au e holo no ka maka’u i ka make, a i ka hala ana o kekahi mau la o ko’u pee ana, hoi hou mai laimua o ke alo o ka wahine nana au i hoolilo mai i mea pepehikanaka. Heaha kana mea i hana mai ai no’u?” me kona ku ana ae iluna, a paa ae la iahope o kona noho, i loaa ai iaia ka ikaika ame na maka i hulili i kau a mea o ka piha inaina, kuhikuhi mai la oia ia Nina. me ka pane hou ana ae:

            “I kela hoi ana aku a’u imua ona, ua kipaku mai la oia ia’u, me ka olelo mai he mea pepehikanaka au. E nana mai olua i ke ano o keia wahine, o kana wale no i makemake ai. e loaa ka noho lanakila ana iaia, mamuli o ka’u hana. O kela aloha ana e noke mau mai ana i ke kamailio ia’u no’u, aole ia ma kona mau lehelehe. aka ua hoohalike mai oia ia’u, me na hunahuna leop a kona mau wawae e hihi ana me na kamaa.

            “Ia’u i hookokoke aku ai iaia, ua papani ae la oia i kona mau maka. i ole ai e ike mai i ka mea pepehikanaka; aohe mea hiki ia’u ke hana aku, a hoike ae paha i ka mea oiaio imua o na kanaka. no ko’u maka’u o liia aku auanei au iluna o ka amana likanaka, no ka mea ua kihe’ahe’a kuu uhane me ke koko hala ole o Iokia Adamu. E ike mai nae olua e na hoaloha. aole he mea e ae nana i hoolilo mai ia’u i diabolo, o keia wahine wale no, aia maluna o kona mau lima. na kikohukohu o ke karaima pepehikanaka.”

            Alawa mai la ka nana ana a Kapena Rede ame Tede ma na maka o Nina Hilakona. ua hele ua wahine nei a kunahihi, elike me ke ano o na wahine pupule, alaila hooho ae la ua o Nina, me ka leo pihoihoi:

            “E nana! He koko. he koko! Mai ae aku e pulu mai au i ke koko!”

            He oiaio aia ke kahe mai la ke koko mai kahi mai a Makala e ku ana, no na wawae o Nina Hilakona, me ka pulu o kona palekoki i ke koko. a no kela leo kahea o Nina. i holo mai ai kekahi poe koa, a komo ana iloko o kela rumi, a iwaena o ka poe o ka hoea ana mai. o ke kauka kekahi o ka oihana koa, a haawi ae la na kauka nei i ke kauoha i kekahi poe koa, e hookaawale loa aku ia Nina no kekahi wahi kupono, alaila huli mai la oia imua o Makala a pane mai la:

            “He keu aku oe a ke kanaka hoolohe ole i ka’u kauoha, no ka mea ua hemo ka welu i wa-hiia ai ma kahi o kou eha, pela i homo nui mai ai ke koko nolaila; aole loa he manaolana i koe no ka hiki ia’u ke hoopakele ae ia oe mai ka make mai.”

 

MOKUNA XXXVII

 

            Elike me ka hikiwawe loa o ka hoopihaia ana mai o kela rumi e na koa, pela no ka hikiwawe o ko lakou hemo ana aku iwaho. a iloko o ka manawa pokole loa, ua nohoalii iho la ka maluhia maloko o kela keena, me ke koe kokoolua wale iho no o Kapena Rede me Tede. me ke kauoha koke ana aku o ke kapena koa ia Tede e hele e ike i ke kauka, a e hoike aku i na olelo apau a Makala o ke kamailio ana mai ia laua, a e hoopaaia aku hoi na olelo apau a kela kanaka maluna o kekahi palapala, i hiki ai e hoauheeia aku na kikohukohu o na ahewaia mai ia Magarita aku, no ke karaima pepehikanaka.

            Me ka eleu loa i hele aku ai o Tede e hui pu me ke kauka, a hoike aku la i na mea apau a Kapena Rede o ke kauoha ana aku iaia, a i ka loaa ana mai o na hooia ana mai kela kauka mai. e lawelawe koke aku ana oia la hana, ia wa i hoi hou mai ai o Tede imua o kona hoaloha, a noho iho la ma ka aoao o ka moe. paa aku la hoi i kekahi lima o Kapena Rede, me ka i ana aku.

            “He nuhou hauoli loa ka i loaa ia kaua i keia la, ma o na mea apau a kela kanaka i hoike mai nei, a i hoike aku au ia oe e kuu hoaloha ea, ua hoea mai kaua i ka hookoia ana o ka’u mau mea apau i noonoo mua ai.”

            “Heaha ia mea e Tede? E hoike mai oe ia’u?”

            “Mai hoahewa wale mai oe ia’u, aka e ae mai oe no ka loaa ana ia’u o ka ike kupaianaha loa. e heluhelu aku i ke ano o ke ola ana o kekahi mea, a i ole, ka pololei paha o ka’u koho ana.”

            Minoaka wale mai la no o Kapena Rede no kela hoakaka a Tede, alaila i ae la: “De ae aku nei au, he keu oe a ke kanaka opio pololei i ke koho ana, a ua aneane loa au e hookau aku i kekahi inoa hanohano maluna ou, ka helu ekahi o na makaikiu ma Amerika holookoa.”

            “Ke hoomanao nei no anei oe ia kaua e hono ana ma ka halekoa, a hoahewa mai ai oe ai’u, i ke kamailio ana aku i kekahi mea maikai ole no Nina Hilakona?”

            “Aohe a kaua hoi hou ana aku e kamailio i na mea o ka wa i hala, koe wale no, ke ae aku nei au i ka pololei o kau mau mea apau i manao ai. Ua hele au a luhi, aole he waiwai ia kaua e hoopau manawa wale, ma na mea liilii, no ka mea aia kekahi mau kumuhana ano nui, e loaa ai no kukakuka ana mawaena e kaua iho. Ua poina anei oe no kela leka?”

            “Aole loa au i poina no kela leka. eia mau no ko’u noonoo, no na mea a kaua i ike iho nei maloko olaila.”

            “No na hana i makemakeia maloko o kela leka. ke nonoi aku nei au ia oe e Tede, e hooko aku, no ka mea, aole he hana hiki ia’u, oiai au ma kela kulana nawaliwali. I ko’u wa i hoihoiia mai ai no kela wahi, ua noi aku au i ke kauka e hoihoi pololei ia’u no Nu Ioka, ua hoole paakiki mai nae oia, nolaila e ike mai oe, he hana paakiki loa nana ka hookuu ana mai ia’u e hoi no ko’u wahi i keia manawa.”

            “Aohe mea hiki ia oe e kuu hoaloha ke hana, nolaila e waiho mai owau ka mea nana e huli aku ia Miss Admau ahiki i kona loaa ana. O, e lilo ana ka moolelo a kaua i lohe iho nei i mea na’u e kaau aku ai imua o keia kaikamahine, a i hoike aku au ia oe ea, ina aole kou haulehia mua ana i ke aloha no Miss Adamu, ina ua lawe maoli mai au iaia a lilo na’u, me ko’u nana ole ae i ko’u hoahanau ana nona.”

            “Mai poina i’o ka hoi au, no kou lilo ana he hoahanau no Miss Adamu, mamuli hoi paha o kau mau olelo hoolalau, i palaka loa ai kou noonoo no kou pili iaia?”

            “He hookahi kumu o ka palaka o ko’u noonoo e Kapena Rede, no kou punihei wale i na olelo mali a Nina Hilakona, ua kokoke maoli no oe e olelo okoa aku iaia, no ka nui o kou aloha iaia, a ma kuu manaoio maoli no, ua aloha kela wahine ia oe, a o ke kumu ia, o kona hele okoa ana mai nei a kukuli aku malalo o kou mau wawae. No na mea nae e pili ana ikuu hoahanau, ke manao nei au, ma ke ano maalea e hiki ai ia’u ke komo iloko o ka hale i hoopaahaoia ai oia.”

            “O ke alahele maalahi loa nou e hoea ai no kela wahi ea, o ia no kou hele pololei ana aku imua o ka oihana makai, me ka lawe pu ana i keia leka me oe, e hoike aku ia lakou. ua hoopaahaoia kekahi wahine opio maloko o kela hale ma ke ano kolohe. a e noi aku oe i ke poo o ka oihana makai, e hoouna i kekahi makai me oe, ma kau misiona. E hele kino maoli no oe no kela hale a ke loaa aku o Miss Adamu malaila, e lawe koke mai oe iaia. Ke maopopo pono mai la anei ia oe ko’u manao?”

            “Ae. ke hoomaopopo aku nei au, o kou manao maoli. o ia no ka hoopuka ole ia maloko o na nupepa na mea e pili ana i ka hoopaaia ana o Miss Adamu maloko o kela hale. Ina no ka loaa i’o aku o kuu hoahanau ia’u, o ka’u e manao nei, o ia no ko’u hoihoi pololei ana aku iaia noloko o ko’u home, malaila oia e noho ai. pehea la ia i kou manao?”

            “Aole o’u manao he pololei kena noonoo ou, no ka mea, he pono ke loaa mua aku i kou makuahine, na hoakaka ana no ko Magarita moolelo, mamua o kona hookipa ana aku i kela kaikamahine ma kona home. Ma ko’u manao, aole he wahi kupono e ae au e lawe mai ai iaia, o kela wahi wale no, a e hoouna aku oe i kelekalapa i kona makuakane. a i hookahi ko kaua ike like ana ia kakou iho i ka manawa hookahi.”

            Ke ike la o Tede i ka manao o ka Kapena Rede hoakaka, me ka hene iki ana iho o kana aka, alaila pane ae la:

            “Heaha la hoi. elike me kau i makemake ai, pela no e hookoia aku ai,” me ke ku ana ae o ua o Tede iluna. “Ma ke kaaahi mua loa e huli hoi mai ai mai Nu Ioka mai no Bufalo. e lawe mai ai au ia Miss Adamu. O ke aloha no kou e kuu hoaloha, a e hooikaika oe e loaa ka oluolu kupono i kou kino, mamua o kou huli hoi hou ana mai. me ka waiwai makemae a kaua. E hooikaika oe e loaa ka oluolu maikai i kou kino, i hiki ai i ka ehakoni ke hoomoe aku i kona poo maluna o ko umauma.

            “E hoea pu mai ana kona makuakane i nei nei. i ka wa pono loa e loaa pu aku ai ka ike iaia. no ka loaa ana o kana kaikamahine, ame ka lilo hoi ana mai iaia aku iloko o ka manawa pokole loa. I hoike aku au ia oe e Pilipo Rede ea, o oe ke kanaka laki hookahi. Iloko o na makahiki he kanaha aku nei i hala, aole loa he mea nana i hoonioni i kou puuwai, i keia manawa nae, ua hiki hou ole ia oe ke kupaa hou aku. oiai ua hoea mai ka mea nana e hoohina i ke kupaa o ke kanaka koa. No keia pomaikai nui nae i loaa ia oe. ke haawi aku nei au i ka’u mau mahalo ana he nui, a e ukaliia ko olua mau la o ke ola ana, me na haawina o ka hauole.”

            Me na puililima aloha ana, i haalele iho ai o Tede i kona hoaloha, a oili aku la iwaho o kela rumi, aia nae iloko o Pilipo Rede ka manao paa, aole e hoohakalia ino ana o Tede ma ka hele ana aku e hooko i kana misiona, a’e huli hoi koke mai ana hoi kela kanaka opio, elike no me kana i haoike mua mai ai, me ka hoihoi pu mai ia Miss Adamu.