Ka Nupepa Kuokoa, Volume LXI, Number 14, 7 April 1922 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

 

HOOMANAOIA KA LA HANAU O KALANIANAOLE

 

            I ka Lunahooponopono, Solomon Hanohano, Aloha oe:--E ae mai no keia makapeni kekahi keena kaa @ wale o ka kaua hiwahiwa, i ike mai ai na kini lehulehu o kaua i na hana hoomanao la hanau o ke alii aloha makaainana Jonah K. Kalanianaole e moe mai la i ka poli puanuanu o Maunaala.

            He ahahui keia i kukuluia e kekahi poe ma’i o Kalaupapa nei, a i  hookahuaia iho la i ke ahiahi Sabati nei, o ia hoi kona la hanau, ka la 26 o Maraki, a ua malama pu ae no keia ahahui he paina luau nui na ia la no, aka mamuli o ke kaa ana o kona la i ka Lapule, ua hoohala na lala apau e paina i ka Poaono o ia ka la 25 o Maraki.

            Ua konoia na mea apau e noho ana mai ka uka iu o Waikolu ahiki i Kalaupapa nei, ua nui na meaai i  hoomakaukauia e keia ahahui, ua ai ka lehulehu a lawa i ka ono a ka puu o ia hoi, puaa laulau i huiia me ke kamano, opihi ono o Hoolehua, ka hee me ka lumu alaula, ka manini, ka nenue, ka uhu, ka maikoiko, ke kole, ka moano, ke ake pipi momona a Geo. P. Cooke, he ono mai hoi kau, i hui pu ia me ke kukui inamona, hui me ka nioi, ka uala kalua, ke kulolo ame haupia, meaono i hana noeauia e na lede opio o keia ahahui, me na pika wailemi ma hoohuiia me ke grape juice ame ice.

            Ua ia kamahele a lawa i ka lokomaikai o ka ahahui o ke Alii J. Kalanianaole. Ke haawi nei keia makapeni i na mahalo he nui loa i ka ahahui holookoa, a e hoomauia ka oukou mau hana maikai me ka lokahi ma na ano apau, i mea e o mau ai ka inoa o ke alii, a na ka oukou mau hana auanei e hookomo aku iloko o ka puuwai o na makaainana aloha alii o kekahi mau mokupuni, e hoala ae e hana elike me ka oukou i hana ai.

            Ma ke ahiahi Sabati mai, ua malama hou no keia ahahui he hoolaulea ame paina mama; mamua o ka hoonee ana o na hana, ua ku mai ka peresidena o keia ahahui a hoolauna mai imua o ka lehulehu, oia o Jno. Kalama, hope peresidena Mrs. Mary Kahananui, kakauolelo Jno. M. Bright, hope kakauolelo Mrs. Alana Mahana, puuku Abraham Paniani, papa hooko, Caesar Nascimento, Lui Hoolapa, Sam Kaai, Manuel Soares, Mrs. Nancy Hore, Mrs. Mary Nailima, Mrs. Annie Kamaka Mrs. Helen Kaai. Jno. Dias.

            Mahope o keia, ua haiolelo mai oia no ka mea nona ka la, me kana mau hoakaka no ka hookahuaia o ka ahahui ma ia ahiahi, a e malama ana lakou i ke Sabati, pela i paina ole ia ai ma ia la, elike me ko ke alii makee i ke Sabati, aole ana mau hana kalaiaina ma ia la, a he kanaka haipule oia i kona wa e ola ana, pela lakou i lawe mai ai i kumu hoohalike.

            Nui ka maikai o ka lakou malama ana i ka halawai ame ka haiolelo naauao, mai ka peresidena mai, i ka nana aku a ka poe makaikai, he mau helehelena hauoli wale no ko lakou apau.

            Ua hauoli like ka poe apau loa ma kela ahiahi, i ka pau ana o kana haiolelo, ua malamaia he mau himeni hoohauoli i ke anaina, a oiai he nui na manu leo le’a o ka uka, au e ka makaikai e hoolohe ai, a eha no hoi ka iwaiaoao i ka haalo’ulo’u i ka aka i kahi polopeka hana ukulele, he palanaiki kahi kaaka, he keu a ka hei o na manamana i na kaula keleawe o kana hokeo ululele.

            He ano e no keia ano ukulele he ho’i no kona kani iloko o kona pahu, aole elike me na ukulele o na hale hana pila o Honolulu, he kani kona iwaho, e lohe pono ia ai, o keia hoi he hoi no kona kani iloko o ka pahu, he ano pila hou loa keia ma Kalaupapa nei wale no e loaa ai.

            O kekahi mea nani i loaa mai la i keia ahahui, o ia ka haawi ana mai la o ka Luna Nui McVeigh i kekahi kii o ke Alii Kalanianaole, i hoonuiia ma ke ano he makana nana i ka ahahui, nolaila he hoike ana keia i kona kakoo i keia ahahui.

            Ke hooki nei me ke aloha a nui i ka Lunahooponopono ame na keiki paahana. Owau iho no,

 

HANA HOU IA KA HALE KAHU O NAPOOPOO

 

            Ma ka mahina aku nei o Feb. ua noho na luna ekalesia ame na hoahanau no ka noonoo ana, e wawahiia ke pili laau, a e uhiia i pili piula, a ua hooholo koke ia no.

            Ua kauohaia ia Kuke ma, a ua loaa mai; a i keia wa, ua paa ke kino hale ame elua lanai, a hookahi lanai i koe, a o ka paa loa no ia.

            O kekahi no keia o na ekalesia noi ole i dala iawaho mai kahiko loa mai no.

            No ka ikaika no nae o ka Puuku @. H. Paris, a hui pu mai hoi me na kumukula wahine u’i lokomaikai i ke kokua i na hana Kristiano, ka holomua ka hana.

            Ke holomua nei na halawai haipule i na la Sabati apau. aohe kahunapule o keia Ekalesia, a na na luna ekalesia no e malama i na la Sabati apau, a ua ikeia ke ala o na makua. O ia, mai hoopalaleha i ka hana maikai; no ka mea, i ka wa pono e ohi auanei kakou ke hoonawaliwali ole kakou.

            Ma ka la 12 o keia mahina, akahi no na hoalaia i Hui C. E., no keia Ekalesia e na opio wahine; a ua kokua nui ka mea e kakau nei.

            Ua noho lunahoomalu ia no ka ka halawai e Mr. Moses Moku, a hapaiia ka hana koho luna nui; Miss Sara Kahiwa, peresidena, ame alakai himeni; Mrs. A william Martin, hope peresidena; Miss Isabela Kikaka, kakauolelo; Mrs. A. Keohohou, hope kakauolelo; Miss Ella H. Paris, puuku; Miss Mabel K. Ahuna, hope puuku; luna hoeueu nui, Miss L. K. Kaolulo. He poe kumukula wale no ka hapanui o keia mau luna nui.

            He mau opio wahine u’i wale no, i hoeunuheia (mare kane ole.) Eia nae, he poe kokua nui i na hana Kristiano, a pono nui ko makou ekalesia, me ka holomua. Hooikeikaia ka hana; he hana na ke Akua, a e holomua mai ana no Oia i ka oukuo hana, a ke kalokalo nei au i na Mana Lani no Kona aloha e hoouna mai i ka Uhane Hemolele e kiai ia kakou apau.

                        Z. P. KALOKUOKAMAILE,

 

AHAHUUI EUANELIO AHAHUINA, MOKUPUNI O KAUAI

 

            E noho mai ana ka Ahahui Euanelio Ahahuina o ka Mokupuni, a Kalana o Kauai, ma ka Halepule Hawaii o Lihue, ma ka Poalima ekolu a Aperila, ka la 21, a e malama ana na hana a ka aha Makua, ma ia kakahiaka, a e oluolu na kahu me na elele me ka lakou mau hoike makahiki, e makaukau mai ma ia la, pela na kahu Hawaii, na kahu Haole, na kahu Pake, na kahu Iapana ame na kahu Pilipino, ame na haiolelo ame na komite.

            Oluolu na kahu Kula Sabati nui, apana ame ko oukou mau elele pakahi, e hele mai me ka oukou mau hoike me ka makaukau, no na hana a ia aha, me ka eleu ame ka miomio ma na hana a ko oukou mau Kula Sabati.

            Oluolu pu me ka hope peresidena o na C. E. o ka Mokupuni, na peresidena apana mai na ekalesia mai, me ka oukou mau elele pakahi, no na hana C. E.

            Ua makemake pu ia kakou na C. E. o ka Mokupuni o Kauai o Manokalanipo, e hooholo a e wae kakou i papa himeni hookuku na kakou o na C. E. o Kauai nei, a hele aku no Honolulu, ma ka wa e noho mai ai ka Aha Paeaina, ma ka la 27 o Iune. O ka himeni hookuku ma ke ahiahi Poaona ia o Iulai 1, hora 7:30.

            Nolaila, hele mai na lala o na aha ekolu me ka makaukau me ka oukou mau inoa i hooholo pono ai, a ma ka aha ma Lihue, e hookuikahiia ai ko kakou mau manao pakahi, no na hana i pili i ke aupuni o ko kakou Haku aloha.

            Ka oukou kauwa a paahana pu iloko o ka Haku.

                                    JAS. K. KAIWI,

                                    Kakauolelo o ka Aha.

 

 

HOOLAHA O KE KUAI O NA HOOLIMALIMA AUPUNI LAULA

 

            Ma keia ke haawiia aku nei ka hoolaha akea, ma ka hora 12:00 awakea, Poakolu, Mei 10, 1922, ma ka puka mamua o ka Halekuai o Kingson Ching ma Keanae, Koolau, Maui, T. H., malaila e kuai hooliloia aku ai ma ke kudala akea i ka mea koho kiekie, malalo o ka Pauku 380 o na Kanawai Hooponopono Hou ia o Hawaii o 1915, ame ka Pauku 73 o ke Kanawai Kumu o Hawaii ka Hoolimalima Laula i ka Aina Aupuni malalo iho nei penei:

            Ka hapa o ka aina Aupuni ma Keanae, Koolau, Maui, e moe ana mawaena o ke alanui Hamakualoa ame ke kai, a e hooloihi ana mai ke Kahawai Waihaoa a ma-o iki aku o ke Alanui i ke awa kumoku, nona ka iliaina o 9.60 Eka, oi aku a emi mai paha; manawa hoolimalima, 5 makahiki mai Mei 10, 1922 aku; uku hoolimalima haahaa, $28.00 o ka makahiki, e uku hapa-makahiki mua ia.

            O, ka Hoolimalima Laula maluna ae, e komo ana he pauku e hookoe ana i na alanui, na moali alanui, na auwai, na kahawai, ka aina ma na kahawai ame kekahi mau pono e ae ame na wai apau malaila.

            E uku koke ka mea kuai mai mahope o ka lilo ana, i ka hoolimalima i kohoia o na mahina mua eono, hui pu me na hoolilo o ka hoolaha ana ame kekahi mau hoolilo e ae, ame na kaki i pili i ka hoomakaukau ana i ka Hoolimalima Laula i oleloia.

            O ke kuai o ka Hoolimalima Laula maluna ae, e komo ana he pauku e hookoe ana i na alanui, na moali alanui, na auwai, na kahawai, ka aina ma na kahawai ame kekahi mau pono e ae ame na wai apau malaila.

            E uku koke ka mea kuai mai mahope o ka lilo ana, i ka hoolimalima i kohoia o na mahina mua eono, hui pu me na hoolilo o ka hoolaha ana ame kekahi mau hoolilo e ae, ame na kaki i pili i ka hoomakaukau ana i ka Hoolimalima Laula i oleloia.

            O ke kuai o ka Hoolimalima Laula maluna ae, ua kaa malalo o na manao ame na kulana o ka Hoolimalima Laula Aupuni i hoopukaia e ke keena o ke Komisina o na Aina Aupuni.

            O na kii palapala aina o ka aina e hoolimalimaia aku ana, me ke ano o ka Hoolimalima Aupuni Laula, eia ke waiho nei ma kahi waiho o na palapala, a e ikeia no ma ke keena o ka Hope Agena Aina ma Wailuku, Maui, a i ole ma ke keena o ke Komisina o na aina Aupuni.

            No na hoakaka laula, e ninau ma ke keena o ka Hope Agena Aina, Mr. F. K. Kalua, Wailuku, Maui, T. H., a i ole ma ke keena o ke Komisina o na aina Aupuni, ma ka Hale Kapitala, Honolulu, T. H.

                        C. T. BAILEY,

            Komisina o na Aina Aupuni.

Hanaia ma Honolulu, Mar. 30, 1922.

 

KUU LEI DAIMANA UA HALA.

 

(PHOTO)

 

JOSEPH K. NAMAKAOKALA,

 

            E ae mai ia’u e ka Lunahooponopono o ke Kuokoa; ka ipu kukui uwila nana e hoolele aku i ka malamalama kupaianaha apuni na moku, mai ka la puka ma Kumukahi a ka welona a ka la i Lehua; ina hoi e loaa ana ka rumi kaawale o kekahi o kou moku, alaila e oluolu ia mai ka hoonee ana aku i keia poomanao e kau ae la maluna.

            Ma ke ahiahi o ka la 24 o Maraki hora 8, ua pauaho mai la o Mr. Joseph Kaleikapu Namakaokala, i keia ola honua ana, a lilo aku la me Liawahine, ka wahine noho i ka maka o ke ao polohiwa, a haalele mai la i ka hoapili he wahine, ka hoa kuwiliwili, hoa alo anu o na po kehau o Kalauhue, Waihee, Maui, ka home a laua i noho ai, a i honi ai i na ea aala maile o Eleile ame na rose aala kupaoa o Maunaalani.

            Aloha ino kuu kane i noho ai maua iloko o ka hune ame ka nele i hoomanawanui ia ai.

            Ua hanauia mai o Joseph Kaleikapu Namakaokala, mai ka puhaka mai o Emalia Kekalohe, ame Namakaokalanuhi, ma Waihee, Maui, i ka M. H. 1881. Nolaila ua piha aiai na makahiki 41, a ua mare oia me Kealoha Sam Paahao, i ka M. H., 1907, a ua malama oia i ka maluhia o ka berita mare, a hala wale aku la no.

            He kane heaha, he hookipa maikai i na hoaloha, a he malama i kana mea aloha he wahine.

            E ka wai hui o Eleile, ame ka makani kilioopu, aole olua e hooipo hou ana me Kaleikapu. E Mauna Rose, ua pau ka honi ana i na rose aala o Salona. E ke kai maokioki o Kaikoo, ua pau kou kipehi ana i kou mau hunakai ma na papalina nohea o Kaleikapu. E ka wai puai mai o ka Punapai e, aole oe e ike hou ana i na maka, o Kaleikapu.

            E na pali hulaana o Makamakaole, aole e ani peahi hou ana na lau kukui o kou mau oawa, i keia keiki kupa o ka aina. E na opae ai limu hunehune o Waiokila, aole e hoopapa hou na lima o Kaleikapu i ko oukou mau kino me na kikawaio ono o Kaukini.

            Aloha Waiehu i ka Ua Hoehaili, aloha ka piina o Poaliala, aloha Wailuku i ka huikau a na kupa o ka aina hanau o kuu kane, hala o Kaleikapu, ke koe nei o Noeoikeanu L. ame W. Oene Kaahanui, kona mau kaikuahine.

            Ke hooki nei au ma keia ulele ana i ko’u kikohu ana i ko’u makasila maluna o ke aiai o keia kanana.

            Maluna o ka Lunahooponopono o ke Kilohana pookela, ko’u aloha nui a maluna o na keiki ulele huametala o ka papapa’i o ke Kuokoa, kou welina aloha.

 

HE INOA NO KA AHAHUI O O NA MAMAKAKAUA..

 

                           I

            E na koa o Kamehameha,

            E na Mamala hoa,

            Nana i na’i na Moku;

            Mai Hawaii a Kauai,

            Honolulu ke Kaona Nui,

            One kapu o Lolani,

            Aia la ilaila, ilaila;

            Na ala i aloha ia.

                       II

            I kaua wiwo ole ia,

            I na pali o Nuuanu.

            I ke Kawelu o Lanihuli,

            Huli hoi ua lanakila.

            Hoolai na pololu,

            A Hawaii nui a Keawe,

            Aia la ilaila, ilaila;

            Na ala i aloha ia.

                      III

            Aia i ke kuahiwi,

            I ka lau o ka Maile,

            Aia i ke awaawa;

            I ka nu’a o ka palai,

            I ka wai paieie,

            Ne a ka awapuhi,

            Aia la ilaila, ilaila;

            Na ala i aloha ia.

                        IV

            Aia la i ka uka,

            Hale o Kahalaopuna,

            I na pali ku haaheo;

            I ke ehu anuenue.

            I ka wai a Kanaloa,

            Wai ono a na manu,

            Aia la ilaila, ilaila;

            Na ala i aloha ia.

 

HE HOALOHALOHA NO MRS. ROSE HOOLIKELIKE

 

            Mr. Lunahoponopono, Aloha kaua: Eoluolu e hookomo iho ka kahi kaawale o ka kaua hiwahiwa, i ike mai ke ohana nui o maua, ua haalele mai kuu kaikuaana ia’u ame ke kane a maua e noho aku me ke kaumaha ame ka luuluu nona, pela me na keiki a maua i hooneleia i ka makuahine.

            Ua haalele mai kuu kaikuaana i keia ola honua ana i ka la 26 o Maraki, i ka hora 11:30 p.m., imua o’u, ke kane, na keiki ame ke kaikunane o maua, Dan Kaleiki, ke kane makua ame ke kane opio.

            O makou ka ohana ma ka aoao o kona moe i kona manawa i haalele mai ai i keia ola ana.

            Ua loihi no ka hoomailo ana a ka ma’i maluna o ke kino o kuu kaikuaana, a na ka nui loa o ka ma’i i hoi ai oia i ak haukapila Moiwahine, ua hoi oia i ka Poalima, la 17, a ua piha hoi iaia hookahi pule me hookahi la iloko o ka haukapila, a hoihoi hou ia oia i ka hale, a ma kona home no oia a hala aku la ma ka Auld lane.

            Oiai na la o kuu kaikuaana iloko o ka haukapila ua hele aku makou ka ohana e ike iaia, i na la apau, a oiai na la apau a makou e hele aku ana e ike iaia, e olelo mau mai ana oia i ka nui loa o kona eha ame kona makemake e hoi i ka hale. I ka piha ana o ka pule iaia iloko o ka haukapila, i koi ai oia e hoi hou iwaho, a i kekahi la mai oia ka la 25 i hookoia ai k na makemake e kana keiki aloha Mr. Lanakila pa.

            I kona manawa i hoihoiia mai ai, malaila no kana kane, keiki, kona kaikunane Dan Kaleiki ame kana kaikamahine Mrs. Maggie Apoi, a no’u ua hoi e mai la me ka manao ole e hoihoiia ana i ka hale, aka i ke kakahiaka nui o ka Lapule, i kahea ae ai ke keiki a maua ma ke kelepona, e hele mai oe e aunty eia o mama i ka hale nei e hele koke mai oe.

            I ka pau ana o ko maua walaau ana ma ke kelepona, o ka makaukau iho la no ia e hele i ka home o kuu kaikuaana, i ka hoea ana aku, hoike mai la no kona ano he wahi manawa liilii wale no koe a hala aku.

            Na ka Ahahui aloha Niihau i hooponopono i ka hoolewa o kuu kaikuaana, a o ka ahahui o makou ohana Niihau wale no, a i kukuluia hoi e ko maua kaikunana Mr. Dan Kaleiki, peresidena o ka ahahui, ua hoomoe ia aku oia ma ka pa ilina ohana ma Makiki.

            He ohana nui no makou, o 22 ka nui, mailoko mai o ko makou mau makua, a owau no ka muli loa, ua hoomoe ia aku oia ma ka pa ilina ohana ma Makiki.

            He ohana nui no makou, o 22 ka nui, mailoko mai o ko makou mau makua, a owau no ka muli loa, ua lawe aku ka po i ka nui apau, a hookoe iho la ia makou ekolu, owau kona pokii, me ke kaikuaana o maua ame ke kaikunane o maua e noho mai la i Niihau.

            Ke haawi aku nei au i kuu mahalo a nui i na hoaloha o kuu kaikuaana ame ka ohana apau i hoouna makana mai i na boke pua, a i komo pu mai me a’u, me ke kane, na keiki, iloko o na hora o ka auwe, luuluu ame ke kaumaha no ke kino wailua o kuu kaikunane aloha. Aloha no au i ka hooneleia i ke kaiuaana.

            Aloha no ke kane i ka hooneleia i ka wahine, ka hoapili, a o ka makua hoi o ka home, pela me na keiki i nele i ka makuahine i keia wa, ua pau ka lohe hou ana i kona leo, ua nalo no ka manawa mau loa.

            Ke nonoi nei au i ka Makua lani e lawe aku i ko makou mau kaumaha ame na luuluu apau.

            Owau no me ke kaumaha ame ka luuluu, kona kaikaina aloha.

 

EHA MAU APANA AINA AUPUNI I KUAILA AKU.

 

            Eha mau apana aina i kuaiia aku e ke keena aina ma ka Poalima o ka pule aku nei i hala, ekolu o keia maluna o ka Mokupuni o Oahu a hookahi ma ka mokupuni o Hawaii. He koena aina aupuni ma Hauula nona ka ili 1205 kapuai kuea ua kuaiia ia Ben Hollinger no $27. He koena aina aupuni no ma ka apana o Iwilei nona ka ili he 20,555 kapuai kuea ua lilo i ka Hui Kaaahi o Oahu no $7,195 a e hoohana wale ia no ia apana ma na hana o ka hui kaaahi. He hoolimalima o uni makahiki no kekahi mau apana pahale elua ma ka apana o Puowaina kekahi i kuaiia aku no $56 o ka makahiki.

            Ma ka mokupuni o Hawaii elua mau apana aina ma ka Apana o Puna i lilo aku ma ke kuai no ke kumukuai haahaa $30. O ka ili o ia mau apana elua 1.81 eka a oi aku a emi mai paha no ka uku hooliimalima o $30 o ka makahiki. O ke kumukuai no keia apana aina aole i loaa ae ka ike ia manawa i ke keena aina ma Honolulu nei.

 

HE HOALOHALOHHA NO KO MAKOU MAMA ALOHA.

(PHOTO)

 

 

            Mr. solomon Hanohano, Lunahooponopono o ke Kuokoa; Aloha nui oe:--E oluolu mai kou lokomaikai ame kou aloha e hookomo iho i kela mau huaolelo e kau ae la maluna iloko o ke kino o ka hiwahiwa a ka lahui, ina he wahi rumi kaawale kekahi, a nana hoi ia e lawe aku, i ike mai ai ka ohana o ko makou mama aloha, ame na hoaloha e noho mai la i ka la hiki ma Ha’eha’e ahiki aku i ka la kowelo i Lehua i ke onehanau o ko makou mama aloha.

            Ua haalele mai ko makou mama ia makou i kana poe keiki ame ko makou papa aloha Mr. Hoolikelike i ka la 26 o Maraki, 1922, i ka hora 11:30 o ke kakahiaka Sabati, a ua waiho iho i kona kino wailua na makou e kumakena aku iloko o ke kaumahana ame ka luuluu, pela no kona kaikuaana ame kona kaikaina i komo pu mai me makou iloko o keia haawina hookahi o ke kaumaha ame ka luuluu.

            Ua loihi no na la o ko makou mama o ka noho ana iloko o ka pilikia ma’i, a ua imiia aku no na mea e pale ai i na pilikia iwaena o na kauka o ke aupuni, aole nae he wahi mea a loaa mai o ka maha iaia, ahiki i kona hala ana. Ua hanauia mai ko makou mama aloha mailoko mai o M. W. K. Kauanaulu ko lakou makuakane ame Kaleiwahine Kauanaulu ko lakou makuahine i ka makahiki 1876, i ka la 25 o Maraki ma ka mokupuni o Niihau, nolaila ua piha iaia na makahiki he 46 me hookahi la o kona hanu ana i na ea o keia ola honua ana, a ua mare kuu mama i ke kane i ka A. D. 1892 a ua puka mai makou 3 keiki; 2 maua e ola nei o J. W. Lanakila Pa, ame D. K. Wailiula, a o ko maua hope, ua hala mua no oia, a o ia ka’u e aloha ae nei no kuu pokii e noho mai la i ka ainahanau, no kona ike ole i ka hanu hope loa o ko maua mama aloha.

            Aia he ohana nui no ko makou mama e noho mai la ma ka mokupuni o Niihau, he mau makua, he mau kaikunane a he mau kaikuaana a he mau pokii, aole lakou i ike i ka hanu hope loa o ko makou mama.

            E na makani hoolewa o ka aina, ua pau kou hoopa hou ana mai i na papalina o ko makou mama, ua lawe aku la o Malio ua lilo. E ka pali hinahina o Kaali, kahi a ko makou mama e pii aku ai e honi i ke ala o kou nani, i kona helehelena, ua nalo. E na pupu kaulana o ke one o Waiapoloa, ua pau ko oukou ike hou ana i na hapa pulima o ko makou mama i ka lawe kiani ae ia oukou iloko o kona lima e ka waihuna i ka pohaku, ua pau ka inu hou ana o ko makou mama i kou aliali, ua hala, e ke one kapu o Kahamaluihi, ua pau kou ike hou ana mai i na kapuai wawae o ko makou mama i ka hehi, iho maluna ou; e ka home Kakela i ka la’i o Kamalino, ka home hoi o ko makou mama i puka mai ai mai kona mau makua mai, ua pau kona komo hou ana aku iloko o kou malu ua hala ua moe ua nalo, aloha no!

            E na ulu hua noho i ka hapapa, ua pau ko oukou ike hou ana mai i ka helehelena o ko makou mama i ka nana aku ia oukou. E ka wai a Kaulili i Keanahaki, ua pau kou ike hou ana mai i na papalina o ko makou mama aloha i ka nana aku ia oe. E na ko eli lima o Halalii, ua pau ko oukou ike hou ana mai i ka helehelena o ko makou mama aloha; no na wahi kaulana o ke onehanau o ko makou mama aloha i haalele mai i keia noho ana.

            Ua haalele aku ko makou mama i kona onehanau i ke A. D. 1903, a hele mai oia a noho maluna o keia mokupuni, o kona wahi i noho mua ai iuka o Kalihi, a mai Kalihi mai, noho makai o ke alanui Liliha ame Moi, a mai keia hale aku, nee hou kona noho ana i Puowaina, loihi no ia mau la o ka noho ana i Puowaina, nee hou mai ko makou noho ana i ka Auld Lane, ahiki i ko’u imi ana kana keiki i wahi no makou e noho paa ai, a ua hookoia ia mau upu ana, a ilaila makou i noho iho la me ko makou mama ahiki i kona haalele ana mai ia makou na keiki ame ko makou papa aloha. O ko makou mama, he makua oia no ka home.

            Nolaila o makou o ka poe no lakou na inoa malalo iho nei, ke haawi aku nei makou i ka makou mau hoomaikai palena ole, i na hoaloha ame na makamaka i haawi mai i ka lakou mau makana pua, ame ke ku kiai ana i kona kino ahiki i ka waiho ana o kona kino ma ka ilina o Makiki, malalo o na hooponopono ana a ka Hui Ohana Niihau a kona kaikunane i kukulu ai mawaena o keia ohana oia o D. K. Kaohelaulii.

            O makou iho no me ka oiaio,

                        MR. HOOLIKELIKE,

                                    MRS. R. K. KAHEE,

                                    MRS. M. KU’I

 

HE HOOMAIKAI.

 

            Ke haawi aku nei makou i na hoomaikai a nui i ke Kahu Kula Sabati o Paia, Mr. ame Mrs. Daisy Kalaaupa ame kona ohana, i ke kokua ana mai ia maua i na mea e pono ai keia kino; a ua auamo pu i ke kaumaha ame kona hele mau mai e hoolana i ko maua manao kaumaha, ame ka haipule mau, e noi ana i ko kakou Makua ma ka lani, e lawe aku i na kaumaha ame na luuluu, i loaa i Kana mau kauwa.

            Maluna ae o keia, he hoomaikai pu aku nei makou i kona Ahahui K. S. ame ka peresidena, Mrs. rose Milikaa o ka Ahahui Ladies’ Aid Society, me ka oukou mau  kahili, o ia hoi he navy blue ame ka white, i hana maiau ia e ko oukou mau lima ame ko oukou puuwai aloha.

            Pela hoi i ka Ahahui Manawalea o Paia i ko lakou komo pu ana mai me makou iloko o ke kaumaha me na boke pua i hanaia me he mau kahili la, a maluna o ke poo ke kalaunu no ka hoohiwahiwa ana i ke kino wailua o ka makou mea aloha.

            Na ke Akua e hoopiha pono mai i keia mau ahahui me na pomaikai he nui.

            Me oe e Mr. Sol. Hanohano ko makou aloha nui.

            O makou iho no me ka luuluu,

                        MR. ME MRS. KAHALEANU,

 

Kopa Moi Keokeo No Ka Mikini Holoi

 

 

E ka Poe Hookuonoono Ke Makemake Oukou i na Lako---

 

NO KA HOME A NO KA AINA MAHIAI PAHA E KIPA AE MA KE KEENA O NA LAKO PILI HAO O KA

 

AMERICAN FACTORS, LIMITED

 

No na mea elike me keia:

Kapuahi.                                            Meahana Mahiai.                            Uwea Pa Moa me Pa.

Lako Mahiai.                                                Meahana Kamana.                          Pena me na Palaki.

 

O ke Kanaka Kuai i na Lako Hana Maikai ua Lanakila e no Oia i ka Hapa o ka Hakaka

 

Aole hiki ia oe ke lawelawe i na hana maikai me na meahana inoino. O ke kanaka e hoao ana e hana me na meahana inoino, e hoea mai ana i kona wa e kiola ai, a kuai i na mea kupono, ina he noonoo oia. Aka nae ua poho wale ka manawa ame ke dala ma ka hana ana pela. Ke kuai nei o Lewers & Kooke, Ltd., i na lako hana maikai wale no.

 

KE MALAMA NEI MAKOU HE AHUA PIHA PONO LAULA O NA

LAKO MAHIAI AME NA LAKO KUKULU HALE

 

He Makemake Paha Kou i

 

KO’I KIPIKUA, KOPALA, HO HAMARE, PAHIOLO, KO’I LIILII, NA LAKO KAMANA PIHA PONO, HOANA HOOKALA, PAKEKE.

 

Papa o Kela ame Keia Ano, na Lako Hao, Pena, Aniani

 

Kakau mai a i ole kipa mai no na hoakaka. E hookoia no na kauoha apau ma ka leka me ke akahele ame ka hikiwawe loa.

 

LEWERS & COOKD, LIMITED

 

Na I’o Pipi Momona Waeia Mai na Aina Hanai Pipi Like Ole Mai o Hawaii Nei

 

            O keia i’o pipi momona, ka papa maikai hookahi ma ka makeke, a ke kuai hoolilo nei makou, ma ke kumukuai haahaa, me ka hoopono maoli.

            Eia keia mau kumukuai malalo loa iho o ko na makeke e ae, a hui pu iho me na kulana maemae e hoohanaia nei e makou ma ka lawelawe ame ka hoahu ana i na i’o pipi, he mea pono e lilo ko makou makeke i makeke nou.

 

                        Pipi Ku Mokupuni..............................15c     o ka lb.

                        Kulana Aoao o ka Pipi........................15c  o ka lb.

                        Ku’eku’e Pipi......................................12 ½ c            o ka lb.

                        Pipi Palai Iwi Hoehoe.........................15c  o ka lb.

                        Pipi Palai Uha......................................15c  o ka lb.

                        Kulana Aoao Koala.............................15 ½ c       o ka lb.

                        I’o Hipa Ku.........................................10 c    o ka lb.

                        I’o Umauma o ka Hipa........................10 c  o ka lb.

                        I’o Hoehoe Palupalu............................12 ½ c o ka lb.

 

            WAIUBAKA MAILE.....................................50c    o ka lb.

 

METROPOLITAN MEAT MARKET