Ka Nupepa Kuokoa, Volume LXI, Number 18, 4 May 1922 — Hoololi i ka la Hoopuka [ARTICLE]

Hoololi i ka la Hoopuka

E hoomaka ana mai keia pule aku, e hoopukaia ana ka Nupepa Kuokoa, ma nā kakahiaka Poaha apau, aole hoi ma na kakahiaka Poalima, elike me ka maa. E lilo ana keia puka ana aku o ke Kuokoa, he hookahi la, mamua ae o kona manawa mau, i kamaaina i ka lehulehu, i mea malihini i kona poe heluhelu; aka nae, aole no ia he kumu, e loli ae o kona kino ame kona mau ano, aka e mau aku ana no ia, ma na ano apau, ma ka la wale no e puka ai, ka i hoololiia. Ua hoike aku makou, ma ka pule aku nei i hala, i ke kumu o keia hoololi ana, aole ma kekahi ano e ae, aka i hiki ai ke loaa ka mokuahi e holo ana no Kauai ma kela la,'a he mea hoomaalahi mai no hoi ia, i na hana o ke pa'i ana i ka nupepa, malalo o ka papapa'i hou o keia keena pa'i nupepa. O ka poe he mau hoolaha ka lakou i makemake ai e hookomo maloko o ke Kuokoa nei, a he mau manao paha, i kakauia, he mea pono, ke hoouna e mai, iloko o na la mua o ka pule; aole e kakali a ku haiki ka manawa, o hiki ole auanei ke puka ma ka pule, i hoounaia mai ai ia mau hoolaha, a mau palapala paha a na makamaka.