Ka Nupepa Kuokoa, Volume LXI, Number 20, 18 May 1922 — Ka Ahahui Puuhonua o na Hawaii. [ARTICLE]

Ka Ahahui Puuhonua o na Hawaii.

Ua loaa mai nei ka palapala hoohui me ke aupuni o ka Ahahui Puuhonua o na Hawaii, ahahui a ke Keikialii Kalanianaole i kukulu ai, no ka hoopakele ana ae i ka lahui Hawaii, mai ke emi mau ana aku ilalo, ma na ano apau, a ma kekahi olelo ana ae hoi, he ahahui e hoao ana e haawi aku i na kokua ana i keia lahui kanaka, ma na loina, e hoea māi ai i ko lakou ikeia ana aku, e ku maloeloe ana maluna o ko lakou mau kapuai wawae iho. Ua moe aku ke Keikialii Kalanianaole me ka hooko ole ia o ka iini ame na manao makee iloko ona, e ike aku i kona lahui kanaka, e hahai ana ma ka meheu o ko kakou poe kupuna, aka nae, aole oia i moe aku, me ka nele i na manaolana; o ke oki-pu wale ia ana ae no o kona ola ana, ka mea nana i hoolei i kana mau hooikaika ana, ma o ka Ahahui Puuhonua la o na Hawaii, no ka hapai ana ae i kona lahui ma na anuu kiekie ae, e ikeia mai ai kakou, he lahui kanaka holomua; eia nae, ua waiho mai oia he hana nui a ko'iko'i, ha kakou, ka poe e pani ae ana i kona makalua, a hoopau pono aku i na hana, i hoolalaia eia no ka pomaikai ame ka holomua o na Hawaii. He ahahui ka Puuhonua no na Hawaii, a i kulike ai me ka manao o na lunanui na lakou e hoonee aku ana i na hana o keia ahahui imua, ua makemakeia kakou, e.kokua aku ma ka hoahu ana i kekahi waihona dala, me ia dala auanei, e hiki ai ke hoohanaia aku na loina apau, e hoea mai ai i ka hookoia ana o ka iini iloko o ke Keikialii Kalanianaole, no ka pono, aole no ke kanaka Hawaii hookahi, aka no ka lahui holookoa. Aia iloko o keia waihona i manaoia, na kakou e kokua aku, he ekolu mau mahele; a i kulike ai me kona palapala hoohui, ua kaupalenaia ke ano e hoolilo ai i kela mau dala, he hana hoi a kakou e kanalua ole ai, no ka hooliloia aku o na dala apau, ma na alahele kupono, aole hoi no ka pomaikai o kekahi mea i kuleana i ka hoohana ana i kela mau dala. Ina aia iloko o ka jioonoo o na Hawaii oiaio apau, na hoomanao aloha ana no ke Keikialii Kalanianaole, aole he hoike maopopo no ia aloha, o ko kakou kokua wale aku no, e loaa kekahi waihona, no ka hoonaauao ana i na kanaka opio ame na wahine opio; no ka imi ana aku e loaa ka ike ame ka makaukau hanalima, a maluna ae o na mea apau, no ka hoea aku i ka loaa ana he kahua e ku ai na wawae o na Hawaii. He mea ole na hooikaika ana a ka poe i lawe ae nei i na ko'iko'i o ka hoohana ana aku i keia ahahui, ke ole kakou ka lahui holookoa, e komo pu aku, a haawi i na kokua ana, no ka pono o keia lahui kanaka, ma na mahele i hookaawaleia ai, ka hoolilo ana, na kokua ana aku i na dala e hoahuia ana e kakou no ka waihona kokua. He mea hookahaha nui loa i ko kakou noonoo, ka ike maoli ana iho no, o kakou ka poe no lakou ko kakou aina kulaiwi, e kuewa hele ana me ka loaa ole he wahi lihi kuleana i ka lepo o Hawaii nei, a o na lahui malihini, o lakou ia e noho mai nei, me ka olelo ana, he lani iluna, a he honua ilalo. Aole keia i lohi loa, no ko kakou ala like ana mai, e na Hawaii, a kokua aku, i na lunanui, na lakou e hoohana aku ana i keia ahahui, a ina he al6ha i'o ko kakou ia kakou iho, alaila mai hoala mai i na ku-e ana, i ka manawa e ho®a aku ai na poloai ana i kau kokua e ke kanaka ame ka wahine Hawaii.