Ka Nupepa Kuokoa, Volume LXI, Number 47, 23 November 1922 — KEKAHI HOOPONOPONO I KE KANAWAI HOOPULAPULA [ARTICLE]

KEKAHI HOOPONOPONO I KE KANAWAI HOOPULAPULA

Ma ke kino holookoa o ke kanawai hoopulapula, ame ka manao o kela kanawai ke nana iho, he hookahi no mea ano nui, o ke kokua aku i na kanaka Hawaii e loaa ia lakou ka noho kuokoa ana. nie ka noho kuonoono ana, a iloko no hoi o ia manawa hookahi, e loaa hou ka hoolaupa'i ana i ka lahui. Me kela iini no ka holomua o ka hana hoopulapula i keia lahui kanaka, aole i hoomaopopoia kekahi pilikia e ala mai ana, ahiki iloko o na la aku la i hala, i ka manawa a ke komisina home Hawaii, e lawelawe nei i kekahi mau hana pili i na aina ma Kalamaula; akahi no a hookaakaa pono' ia na maka o kela komisina. i ke kaupalenaia ana o ko lakou mana. ame ke ano e holo ai o na dala, i hoohanaia no na aina hoopulapula. Ma ka manao kanawai o ka loio kuhina, o na dala apau i hooliloia aku e ke komisina home Hawaii. no na hana hoopulapula. ua hiki no ia hoolilo ana, aka nae, i ka wa e loaa mai ai kekahi mau dala, ma o ke kuai hooliloia ana aku o kekahi mau waiwai, ina paha ua pili loa ia i na aina hoopulapula, a i na meapaahana paha, e holo pololei loa ana kela mau dala apau iloko o ka waihona puuku. aole iloko o ka waihona hoopulapula. Ma kekahi manawa aku nei i hala, ua uku hewa aku ke komisina home Hawaii i kekahi mau dala, mamuli o ke kuhihewa. ua hoihoi hou ia mai nae kela mau dala, mahope mai o ka ikeia ana. ua kaki papaluaia mai ke komisina; o kela mau dala nae, aole ia i loaa hou mai i ke komisin, aka ua holo aku ia iloko o ka waihona puuku o ke Teritore, mamuli o ka manao kanawai o ka loio kuhina. He pilikia keia e pono ai e hooponoponoia ke kanawai hoopulapula, o ia hoi. o na dala apau i loaa mai, mamuli o ka hoolilo ana aku o ke komisina i kekahi mau waiwai o na aina hoopulapula, ma ke kuai, a mau meapaahana paha, e pono no e holo mai kela mau dala apau i ke komisina, a e lilo ia mau dala no ka waihona hoopulapula, aole hoi elike me ia e ku nei i keia wa, ka lilo o ia mau dala i waiwai no ke Teritore. Ina aole e hanaia keia hooponopono i ke kanawai hoopulapula, me ka hoolilo mau o na komisina home Hawaii, i kekahi mau huina dala mahuahua mailoko ae o ka waihona hoopulapula, no ka pono o ka poe e hoi aku ana e noho maluna o na aina, he mea maopopo loa, e hoea mai ana i ka manawa e hiki hou ole ai i kela komisina ke nee aku imua; ma kekahi olelo ana ae hoi, e pau e ana ka waihona o hookahi miliona dala i ka hooliloia, mamua o ka maemae a maikai kupono ana o na aina i hookaawaleia no ka hana hoopulapula. Aole kakou i makemake e holo hope keia hana hoopulapula, u e ko ka manao hoonaaikola a ka poe e hoomakaleho nei i na aina hoopulapula, no ko lakou kuleana iloko o ia mau aina; nolaila aia a noho mai ko kakou ahaolelo kuloko, he mea pono i na hoa o ka ahaolelo kuloko, ke hana aku i kekahi hooponopono ahaolelo, a waiho aku i ka ahaolelo lahui, no ka hoopau ana ae i kela pilikia o ke kanawai hoopulapula, ame kekahi mau hooponopono ahaolelo e ikeia ana, he mea ia e hooiia ae ai ka maikai o ke kanawai.