Ka Nupepa Kuokoa, Volume LXII, Number 6, 8 February 1923 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

EHA  NUPEPA KUOKOA HONOLULU, T. H., POAHA, FEBERUARI 8, 1923.

 

. . . . He kii keia no na hopena a ke kaihoee i hana ae ai ma Hilo.  .He hapa wale no nae keia no na poino a ke kaihoee i hana ai.  Ma keia kii e ikeia ai ka waapa lawai'a ke Susam Maru i hapaiia aku e ke kaihoee a kahi maloo mamua pono mai o ka hale hanahao o Hilo.

 

HE MAU HOAKAKA NO KA POMAKAI O NA HAWAII.

 

            E na hoahanau Hawaii e na oiwi a ka aina kaulana i ke aloha, na mamo a Kinilauamano, ke koko maemae o Iseraela, e hoolohe mai i ka'u wahi leo e uwe leo ole aku nei imua o oukou.  He kanikau hoi keia no ka mea, ke emi mau nei keia lahui, i aloha nui ia e ke Akua a aneane nalowale ka ikeia ana o na maka Hawaii maoli maluna o keia aina o na Kamehameha kaulana.

            E na hoa e, e hoomanao oukou i ke aloha kamahao o ka Makua Lani, i Kona hookaawale ana i ko oukou mau kupuna mua maluna o ke one o Hawaii nei.  Nani Kona aloha ia oukou ulu wale na huaai o ke kuahiwi, piha ka moana kai me na i'a ono loa i ke kino, pua, mai la na pua, a lawe mau ia ka aala maluna o ka makani nahenahe, i o a ianei, a huli ka makahiki a huli i ka makahiki.  Pa-e mau no ka @@ aloha o na ale o ke kai i ka pepeiao, e hoike mai ana i ke aloha palena ole o ke Akua ia oukou.  Huna no ke Akua i ko oukou mau kupuna, maluna o keia Edena nani ka Paredaiso o ka Moana kai malie o ka Pakipika.

            Pehea ko oukou manao e na hoa ua lawe wale ia mai anei ko oukou mau kupuna e na ale aloha ole o ke kai, a pae wale mai maluna o ka @iaina o keia paemoku?  A i ole, ua alakai ia paha na waa o na kupuna mua o keia aina e ke Akua o ka Iseraela, a ku ko lakou mau wawae maluna o ke one o na ka@akai o Hawaii nei.

            E hoomanao oukou, i na olelo a kekahi kaula i noho ai maluna o ka aina o Amerika, he mau haneri makahiki mamua o ka hanau ana o Iesu Kristo, oia hoi o Iakoba.  Ua hoohalikeia ka hale o Iseraela me kekahi kumuoliwa a ka Haku o ka pawaina i kanu ai iloko o kona pawaina.  Ua malama pono ia keia kumuoliwa e na kauwa hana iloko o ka pawaina no na makahiki loihi loa, a ua ohiia mai la @a @ua maikai, aka mahope mai, ua hoomaka ae la na lala o ke kumu e ma@, a aneane make ke kumu

            Kauinaha loa iho la ka Haku o ka pawaina, no ka mea ua nui no kona aloha i kana kumuoliwa.  Maka'u iho la oia e make ke kumu, a ohi ole mai oia i na hua maikai o kona pawaina: nolaila, kauoha mai la oia i kana kauwa e kipulu hou, a e hookahe hou i ka wai, a e malama pono i kana kumuoliwa i ole make, a pau kona manaolana no ke kumuoliwa ana i makemake loa ai.

            Aka ua hua ole mai nae ke kumu i ka hua maikai, a nolaila i mea e make ole ai, a e ohi hou ai i na hua maikai o kona pawaina, ua oki aku la oia i kekahi o na lala opiopio a ua lawe aku la oia i na lala opiopio a kanu mao a maanei o ka pawaina.  Ua oleloia ua kanuia kekahi ma na wahi mamao o ka pawaina, o ia hoi na moku o ke kai, a ua hana ka haku o ka pawaina i keia hana, no ka nui o kona aloha i kana kumuoliwa a mamuli o kona iini, e mau ke ola o ua kumu nei, ahiki i ka wa e hua hou mai a mahuahua ka hua maikai o kona pawaina.

            Pehea ko oukou manao e na hoapaaua o keia wahi manao o ka pawaina?  Aole anei oukou kekahi lala o keia kumuoliwa i okiia, a i laweia mai la e ka haku o ka pawaina, a kanuia ma ka lepo momona o keia aina?  Ua lehulehu loa na kumu e hooiaio ana, ke kahe io nei ke koko maemae o Iosepa ke keiki a Iakopa (i kapaia o Kini-lau-a-mano iloko o ka moolelo kahiko o Hawaii nei) iloko o na aa o ko oukou mau kino.  Aole o'u manao e hoike aku i keia mau mea i keia wa, no ka mea, he manao okoa ka'u i manao ai e kalai aku imua o oukou iloko o keia pepa.

            Ina heluhelu oukou iloko o na moolelo o na Hawaii, o ka wa kahiko, i ka wa o na Kamehameha, a mamua o ia manawa, e ike ana oukou, ua piha loa keia aina me na kanaka Hawaii, he haneri kaukani.  Ua @@i ikaika ko lakou mau kino.  Ua hiki no ka poe o ia mau la ke hana i na hana ikaika loa, me ka luhi ole.  Ua oi aku ka mama o kekahi ma ka holo ana mamua o ka holoholona.  A o ka ikaika o ko lakou mau kino, he kupaianaha no ia.  Auhea na haneri kaukani o ia mau la?  Auhea na kino kukilakila o na Kamehameha.  Auhea ka poe i hiki ke heihei me ka lio a puka?  Auhea ka nani o ka aina o ia mau la?

            Ua moe kahikona iwi o ia poe me na kupuna.  Ua hoi ko lakou mau kino iloko o ka opu o ka makuahine o ka honua.  Ua lohe hou ole ia ka leo o lakou e na ale o ke kai malie, o ke onehanau o Hawaii, kahi a ke Akua i huna ai ia lakou.

            E ninau kakou ia kakou iho, heaha na kumu no ko lakou nalowale ana?  No keaha la e mau nei ka emi ana o keia Lahui ahiki mai i keia wa?  E na hoa e noonoo akahele ka kou.  Ina e heluhelu oukou i na hoike ua oi loa aku ka nui o na make mawaena o na Hawaii mamua o ka hanau i kela ame keia mahina.  Ina e mau keia heaha ka hopena e ili koke mai ana maluna o ka Lahui o Papa ame Wakea?  Auwe hoi ke aloha; o ka haku o ka pawaina, ka mea nana i hookaawale ia oukou maanei!

            Kauoha hou mai la ke Akua ia lakou, e hoomana pono Iaia, a e malama i na kanawai o ke Akua o ia aina, oia hoi ka Makua Mau Loa o ka Lani.  Kauohaia mai la lakou e malama i na Kanawai Umi.  Ao pu mai ke Akua ia lakou, aole pono lakou ke mare pu me na lahui o ia aina, aka e lawe lakou i ka lakou mau wahine, mailoko mai o ke koko o Iseraela, i mea e mau ai ke koko maemae iloko o ko lakou mau ohana.

            I ka wa a lakou i malama pono ai i na kanawai o ke Akua, ua holomua lakou, a ua mahuahua lakou maluna o ka aina, a ua noho lakou me ka lako ame ka maluhia.  I ka wa nae a lakou i poina ai i ke Akua, ua hele mai la ko lakou mau enemi maluna o lakou, a ua pepehiia, aua hoehaia, a i kekahi manawa, ua lilo no lakou i mau kauwa kuapaa malalo iho o na aina e.  A pela no lakou i noho ai maluna o ka aina, ahiki i ka wa a na Alii ame na makaainana i poina ai i ke Akua.  Kii no lakou i na wahine o na aina e, kukulu no lakou i na akua o ko na aina e, a hoomana iho la ia lakou, a lilo no lakou i poe hoomanakii, hookamakama, inu a ona i ka rama, a i poe hahai mamuli o na kuko o ka io.  A ia manawa poina loa ke Akua ia lakou, a ua hoopilikia loa ia lakou o na aina e.

            Ua pepehi nui ia no lakou, ua hoopuehuia mao a maanei o ka aina, a ua lawepioia ka hapanui e na lahui ikaika o ka aina, ahiki i ko lakou nalowale ana.  Ua lilo ka lahui nui a nani a ke Akua i aloha nui ai, Ana hoi i hoonoho ai maluna o o ka aina o Kanaana, a haawi hoi ia aina i aina hooilina mau loa no lakou in a malama lakou i Kona mau kanawai, ua lilo no lakou i mau kauwa kuapaa malalo o na alii o na lahui ai-a.  Auwe no hoi ke aloha ole, pehea la i hiki ai ka lahui, i berita pu ai me ke Akua, ke poina koke i Kona aloha luaole ia lakou?

            Aole nae i poina loa ke Akua i kana mau keiki o ke berita, ua haalele no lakou Iaia, a ua uhai no lakou i Kona mau kanawai.  Ua ae oia i ko lakou mau enemi e hoao ia lakou, a e hoopilikia ia lakou, aka ua mau no kona aloha, a in a e hookokoke hou aku lakou Iaia e hookokoke mai no oia ia lakou.

            I Kona ike ana ua haalele kona mau keiki hiwahiwa iaia, uwe aku la oia ma o kana Keiki la o Iesu Kristo me ka i ana, "E Ierusalema, E Ierusalema! ka mea nana i pepehi i na kaula, a i hailuku hoi i ka poe i hoounaia mai i o 'u nei, nani kuu makemake e houluulu mai i kau poe keiki, elike me ka houluulu ana a ka moa i kana ohana keiki malalo iho o kona mau eheu; aole nae oukou i makemake mai."

            Iloko no o keia mau makahiki o ka noho pio ana, e noho ana ma Ierusalema kekahi kauwa a ke Akua, he mamo na Iosepa, ke keiki a Iakoba ma ka puhaka o Manase, o Lehi kona inoa.  Hiki mai la ka leo o ke Akua iaia; a kauohaia oia e haalele i ke kulanakauhale o Ierusalema me kana ohana keikikane, a e lawe pu me ia o Isemaela, he mamo na Iakoba, me kana mau kaikamahine, a hele iloko o ka waonahele.  Olelo mai la ka Haku iaia, e alakaiia ana lakou e Ia ahiki aku i kekahi aina nani waiwai loa, ana i hoomakaukau ai no lakou.  Eono haneri keia mamua o ka hanau ana o Iesu Kristo.  I na la e noho alii ana o Zedekia ma Ierusalema, a he umi-kumamakahi makahiki mamua o ka lukuia ana o Ierusalema e ka poe o na alii o Kaladea.  E nana ma Oihanalii 36:16-22.

            Ua alakai pono ia o Lehi me kona puali kanaka ahiki i na kapakai o ke Kai Ula, a ma ke kauoha a ke Akua, ua kukulu lakou i moku, hoahu no lakou i na pono ai, na anoano like ole ame na pono like ole e ae iloko o ka moku.  Ee ae la lakou, a mahope o ka hala ana o na la he nui, ma ke alakaiia ana e ke Akua, ua pae mai la lakou maluna o ka aina o Amerika.

            Hoomaka ae la lakou o laha maluna o ka ili o ka honua, a ua lilo koke no lakou i lahui kanaka nui loa.  Ua hoomakaukau no ke Akua i na pomaikai lehulehu loa no lakou, kauoha mai la Oia ia lakou e hoomana mau Iaia.  Ua lawe pu mai la lakou me na Kanawai Umi, a me ke a'o ana a ke Akua i kana mau keiki ma o Mose la.  Aole loa lakou i poinaia e ke Akua.  Aole hoi lakou i noho iloko o ka pouli me ka ike ole i ka olelo a ke Akua.  He poe naauao no lakou.  He poe lakou mailoko mai o ka ohana a ke Akua i aloha nui ai, he poe i waeia, e lilo i mau alii, a i mau kahuna nui iloko o ko ke Akua aupuni.  O lakou no kekahi lala o ke kumuoliwa i uhakiia, a i kanuia iloko o kekahi aina nani momona loa. 

            Ua haawiia ka aina i hooilina mau loa no lakou, i puuhonua nani no lakou, olelo mai la ka Haku ia lakou, maluna o ka aina, mai ia Ierusalema mai, elike me ia i alakai ai ia Mose iloko o ka waonahele, e hoopomaikai nui ia ana lakou maluna o ka aina, a e illo ana lakou i lahuikanaka nui, a e haawiia ana ka aina i hooilina no lakou, a no ko lakou poe mamo no ka manawa pau ole.

            Aka ina poina lakou i ke Akua, a e emi lakou iloko o ka hoomaloka, a uha'i i na berita a lakou i hana ai me ke Akua, e lilo ana ka aina i na lahui e ae, a e hoopa'i mai ana ke Akua ia lakou me kona inaina weliweli, ahiki i ka wa a lakou e mihi ai, a e hoi hou mai e hoomana Iaia me ka pono ame ka oiaio. 

            Ua noho pono lakou no kekahi mau hanauna.  Ua hoomanao no lakou i ka mea nana i haawi i ka aina ia lakou, a ua lilo io no lakou i lahui lehulehu maluna o ka aina.  Ua mahuahua loa na pomaikai a ke Akua i hoili mai ai maluna o lakou, ahiki ole ke heluia.  Aka hoomaka ae la lakou e hahai i ke alakai ana e kk io.  Haaheo a hookano no lakou, hoomaka lakou e ona mau i ka rama.  Lilo ka maemae ame ka puupaa o na wahine i mea ole ia lakou.  Poina iho la lakou i ke Akua, lilo kona mau kanawai i mea i hoowahawaha ia e lakou.  Kukulu ae la lakou i na akua pohaku, a i na akua dala, gula a peia wale aku, a kulou iho la lakou imua o ia mau akua kii a hoomana aku la ia lakou.  Lilo ko lakou noonoo ame ko lakou hooikaika ana, ma na mea o keia noho kino ana, a o na mea koikoi o ke Aupuni o ke Akua, na mea e ola ai ka uhane, ua poina loa ia.

            I ko lakou hana ana i keia mau mea, ua hoomaka mai la ke Akua e hoopa'i ia lakou.  O ke kanaka, a i ole ka lahui, e malama ole ana i na kanawai o ke Akua, aka  e haawi aku ana i kona kino, ame kona uhane, i ka hahai ana i ke alakaiia ana i na kuko o ka io, e hahai io ana na hoopa'i o na kanawai ana i uhaki ai iaia.  A pela no keia lahui i hana ai ahiki i ko lakou emi ana mai kekahi lahui nui, ikaika, nani a mana, a i kekahi lahui uuku, nawaliwali, a palaualelo. Haawi aku la ke Akua i ko lakou aina nani iloko o ka lima o kekahi mau lahui e ae.  Kailiia ko lakou mau pomaikai e ka lima o ka malihini, a elike me Esau o ka Baibala, ua kuai lakou i ko lakou hooilina no ka mea e poino ai lakou.

            Ina kakou e huli iloko o ka moolelo o na lahui apau, i noho ai maluna o keia honua, mai ka wa ia Adamu ahiki mai i ko kakou mau la, e ike ana kakou o na lahui apau i malama pono i na kanawai o ka noho maemae pono ana, ua mahuahua no lakou, a lilo lakou i lahui nui mana, a ikaika, a naauao maluna o ka aina.  Aka i ka waa lakou i emi ai iloko o ka hoomanakii, i ka inu nui ana i ka waiona, i ka hookamakama, a i ka pepehikanaka, lilo ko lakou ikaika i mea ole imua o ke alo o na alii o na aina a imua o ka maka o ke Akua. 

            Nani wale ka haule ana o ke Aupuni o Babulona.  Hoohaahaa loa ia ke alii nui o Nebukaneza.  Ua lilo ka nani ame ka mana o ke Auupuni o Midia me Persia i mea ole ia Alexaderia ke alihikaua nui.  Ulu ae la ke aupuni o Roma, a noho mana maluna o ka hapa poepoe hikina holookoa.  Ua like no kona mana ame kona ikaika me ka hao.  Ua kapaia ke aupuni o Roma ke aupuni hao.  Aka mamuli o kona hewa, ua okaoka liilii ia, a ua hoopuehuia ia mao a maanei, mawaena o na lahuikanaka apau o ka honua.  Aole anei i hiki ia kakou ke ike iloko o keia mau moolelo, i ka lima o ke Akua, e hoopomaikai mai ana, a e hoomahuahua mai ana i na lahui, e malama pono ana a e hoopa'i mai ana, a e hoemi mai ana, a e anai mai ana i na lahui apau e malama ole ana i na kanawai pono a ke Akua i haawi mai ai?

            E na hoa, e hoomanao kakou, aole loa e hiki ke kanaka, a lahui paha ke pakele ka hoopa'i weliweli o ke kanawai i uhakiia.  Aka e hahai mau ana ka hoopa'i o ke kanawai, maluna o ke kanaka a lahui paha, ahiki i ka pau ana o ka uha'iia ana o ia kanawai.  A ina mihi ole na Lahui kanaka, a mau ko lakou hakihaki ana i ko ke Akua mau kanawai, ame na kanawai o ka noho alunu ana, e hiki io mai ana ka wa e pau ai ka hehi ana o ko lakou mau kapuaiwawae maluna o ka ili o keia honua a e helu pu ia ana lakou me ka lehulehu o na kanaka i moe iloko o ka honua.  Auhea ka nani ame ka mana o na kulanakauhale o Tyre ame Sidomo?  Auwe ka lukuia ana o Gamora ke kulanakauhale haaheo o ka hikina.  Maalahi ka pakele ana o Nineva, mamuli o ke a'o ikaika ana o Iona ke kauwa a ke Akua.

            Ke ninau mai nei no paha oukou e ka poe heluhelu, heaha la ka pili o keia mau mea ia makou ka poe Hawaii?  Eia ka pili:

            Ke manaoio nei au ua hookaawale ia oukou ma keia mau mokupuni liilii o ke kai, e ke Akua.  A no keaha la i hookaawale ai ke Akua ia oukou maanei?  No keia kumu.  He poe mamo no oukou na Iosepa i kuaiia ma Aigupita.  Ke kahe nei iloko o ko oukou mau kino, ke koko maemae o ka hale o Iseraela.  A i mea e mau ai keia koko maemae, a e huikau ole me ke koko o na aina e, ke Akua mamua, ke manao nei au ua huna ke Akua ia oukou maluna o keia aina.

            E nana pono kakou i ka poe Iudaio; he poe no lakou i hoopuehuia, a kalanaia mawaena o na aupuni apau o ka honua.  Ua hoomaauia no lakou, ua pepehiia lakou, ua hana ino ia lakou ma na ano apau.  Ua hoowahawahaia lakou e na lahuikanaka apau o ka honua.  Aka heaha ka mea i ikeia?  Ua mau ko lakou malama ana i na kanawai o Mose.  Aole lakou i hoopa i na ano ai i papaia, a hokapuia ma ke kanawai o Mose.  A o ka mea nui loa, aole loa lakou i ae e mare mawaho ae o ka ohana Iudaio.  Ina hanau mai ka makua Iudaio, he keiki Iudaio piha ke keiki. A pela i mau ai ke koko ikaika maemae iloko o ko lakou mau kino.  A pela no lakou i haawipio ole ai lakou, a pela hoi i anai ole ia ai lakou i ka hana ino ia mai ame ka hoomau e na lahui like ole o ka honua.  A pehea ka poe Iudaio i keia wa?  Ke ulu kawowo nei lakou, a ke hoi nei lakou maluna o ko lakou hooilina ma Pelesetina, a ke hoomakaukau nei ke Akua i ko lakou kulanakauhale i aloha nui ia; o Ierusalema, i home hou, a i puuhonua no lakou.  Ina aole au i kuhihewa, ua kokoke mai no ka wai i ike ai lakou, o ke kanaka a ko lakou mau kupuna i kau mainoino ai maluna o ka laau ke'a Oia io no ke Keiki Hiwahiwa a ka Makua Lani, ke ola o na lahui apau, ke Alii o na Alii, ka Haku o na Haku.

            E na hoa Hawaii, pehea e hoolaupa'i hou ia ai ka lahui, nona keia aina?  Ke hoao nei ke aupuni o Amerika e kokua ia oukou ma keia hana nui, ma ka hoonoho ana ia oukou maluna o na apana aina i hookaawaleia iloko o ka Bila Hoopulapula, a ke Keikialii o kakou i noi ai ma Wakinekona, a lilo ia i kanawai.  Ke mahalo nui nei au i ka uhane o ka mea nana keia bila.  Ma ko'u noonoo ana, he mea maikai loa, ina lilo na Hawaii i poe mahiai a hanai holoholona.  Hauoli loa no au ina lilo na Hawaii apau i poe ona aina, i mau haku hana maluna o ko lakou mau pono hoi aole i poe hana mau no ka uku la malalo o na haku hana e ae.  Hauoli au ina e hiki ana na Hawaii o ke Kulanakauhale o Honolulu, e noho nei iloko o na hale kupono ole, ke hele ma na kuaaina, maluna o na aina hoopulapula, kahi e hanau ai ka lakou mau keiki ma ke ea oluolu maikai, kahi hoi e hanaiia ai ka ai maikai, a e a'oia na hanalima kupono i ka opiopio.

            Eia no kekahi o na pilikia a'u e ike nei iloko o ko kakou noho ana i keia mau la.

            Akahi; aole i a'o nui ia ka kakou mau keiki ma ka malama ana i na kanawai paa loli ole o ka noho ana.  A o ke ko'iko'i o ka hui ana o kekahi kaikamahine me kekahi keikikane iloko o ka berita laa o ka mare, mamua o ko lakou lilo ana i mau makua mea keiki.  Ke manao nei au he mea pono loa ke a'o oukou e na makua Hawaii, i ka oukou mau keiki, e wae akahele i ko lakou mau hoa iloko o ka berita o ka mare.

            Ina e makemake ana oukou na Hawaii e hanau mai keia hanauna keiki me na kino ikaika, e hiki ana ke ola a lilo i poe naauao ikaika, alaila e a'o ikaika oukou i ka oukou mau keiki, e malama pono, i na kanawai paa o ka noho maemae ana, mamua a mahope o ko lakou mare ana.

            Aole o'u manao ku-e i na lahui e ae, e noho nei ma Hawaii nei, aka ke manaoio nei au, me kuu naau apau, he mea pono loa ke mare ka Hawaii me ka Hawaii.  Aole kekahi koko maluna o ka honua i oi aku kona maemae mamua o ke koko Hawaii maoli.  No laila e na Hawaii, ina e makemake ana oukou e hoolaupa'i hou i ko oukou lahui, alaila e malama i na rula o ka noho maemae ana, a e a'o aku oukou i ka oukou mau keiki, o keia kino ua hanaia no ia e kulike me ke kino o ke Akua, a o ka hale laa no ia o ka uhane.  Aole pono e hana ino ia keia kino hemolele, me na hana uhauha pono ole, ame ka hahai palena ole ana i na kuko o ka io.  O ka hope o keia mau hana pono ole, he nawaliwali, a he make koke no ia.

            Elua: Ina e makemake ana oukou e holomua ma ka aina, a e lilo i lahui kuonoono, naauao a kuokoa, e a'o koke oukou i ka pakiko.  E hoomaopopo oukou i ka waiwai io o na pomaikai o ke dala ame na lako e ae o ka aina.  E lilo oukou i poe malama me ka uhauha ole i na loaa o ko oukou mau lima.  "Iluna no ka ua waele e i ke pulu", ikaika opiopio ke kino, e hoahu kekahi o na loaa no ka wa elemakule nawaliwali.  Mai hoohalike kakou me ka uhini, i ka wa kau, nui ino ka hoonuu ana a puua, aka i ka wa i hiki mai ai ke anu o ka hooilo, make koke iho la no, no ka mea, aole i malamaia kekahi o na loaa o ka wa lako.

            Ekolu: E lilo koke oukou i mau kanaka mahiai, a kanu i na huaai like ole.  Ua hiki kela ame keia Hawaii ke kanu iloko o kona pa-hale, i na meaai like ole, o ia hoi ka uala, ke akaakai, ke kalo ame na ano ai e ae.  E a'o aku oukou i ka oukou mau keiki e mahiai, a e malama i keia mau meakanu.  A ma keia e a'oia ka oukou mau keiki i ka hana i ka wa opiopio.

            Eha: E hoomaka koke oukou e ua wahine Hawaii, e a'o i ke kuke ame ka hoomakaukau ana i na mea ai apau o ko oukou mau pakaukau.  Ke manao nei au o kekahi kumu nui no ka ma'i mawaena o kakou ame ka kakou mau keiki, o ia no ko kakou kuai nui, a ai nui ana i na meaai o n halekuai Pake.

            I ko'u hoomaopopo ana aole i kupono keia mau meaai i ka kakou mau keiki, a he nui loa hoi ka lilo.  Komo ka kakou mau dala iloko o ka lima o ka Pake, pau loa ko kakou ike ana, no ka mea ua hoouna koke ia i Kina, no ka pono ka poe o ia aina.  E hoomaopopo oukou e na makuahine i ka ai kupono na ka oukou mau keiki, a e hana me ko oukou mau lima ponoi, i maopopo oukou ua maemae, a ua hanaia mailoko mai o na mea e ikaika pono ai na kino o ka oukou mau keiki.

            Elima: E na makua Hawaii, e a'o nui oukou i ka oukou mau keiki iloko o na loina o ka hana.  Mai hookuu oukou i ka oukou mau keiki o hoohala i ka hapanui o ko lakou manawa ma ka paani ana ma na kihi alanui.  Ina hookuu wale ia ka kakou mau keiki, e hele auwana mao a maanei, me ka ike ole o na makua, aole nele ko lakou hui ana me na hoapaani kupono ole, a e alakaiia ana lakou iloko o na hana pono ole.  O ke keiki e a'o ole ia ana e hana i ka wa opiopio, he mea maopopo lea e palaualelo ana ia keiki i kona wa e kanaka makua ai.  Ua hiki anei ke kanaka palaualeolo ke lilo i makua maikai nana a hoolaupa'i, a e hoopulapula i ka lahui?  Ke manao nei au o ke kanaka molowa hana ole, aole kupono oia e ai i ka ai a ke kanaka hana, a ua like no ia me ke kino make, poho ka ai ame ka luhi.

            Eono:  E kokua oukou na Hawaii i kekahi.  E lokahi oukou no ko oukou pono iho.  I keia wa ke lilo nei ka oukou mau dala no ka pomaikai o na lahui malihini.  Ke kuai mai nei oukou na Hawaii, i ko oukou mau pono apau iloko o na halekuai o na kanaka o na aina e.  He malihini ka mea nana e ako i ko oukou lauoho.  He ilikea ka mea nana e lapaau ia oukou i ka wa ma'i.  Mai na aina e mai no na kauka niho apau.  Na ka malihini e hana ka ai, humuhumu ka lole, kukulu i ko kakou mau hale, a e hanai i ka ai mai ka wa i hanau ai ahiki i ka make ana.  A mahope  o ko kakou make ana, na ka ili okoa e hana ka pahu kupapau, ko kakou home hope loa ma keia honua, a eli lua, kahi a kakou e moe ai ahiki i ke kanii ana o ka pu a ala hou aku kakou mai ka make mai.  E na hoa e ala kakou a e a'o kakou i ka kakou mau keiki iloko o na hana noeau apau.  Ka oihana kauka, loio, malama buke, na hana kalepa like ole, ame hanalima apau ka enekinia, wiliki, kamana, pena, tela lole, puhi palaoa, ku'ihao, ame na hana kupono e ae apau.  I hiki ai ia kakou ke ku me na lahui e ae a pau, a e lawe i ko kakou hapa mahele o na pomaika'i apau a ke Akua i hoolako ai maluna o keia honua no ka pomaikai o Kana mau keiki.

            Me ke aloha poina ole,

            WM. M. Waddoups,

            Presidena o ka Hale Laa ma Laie.

 

            CONSTANTINOPLE, Feb. 6 --  Ua hoikeia aku i keia la e na Tureke i na komisina o na lahui e mahope aku o ka la apopopo aole mokukaua i oi aku maluna o 100 tona e aeia aku e komo mai iloko o ke awa o Smyena, a pela pu hoi aole mau mokukaua like loa elua o kekahi lahui e aeia aku e komo mai ma kekahi manawa.  Aole e nana mai ana na aupuni mana e ae o ke ao i keia hookapu  o ia ka mea i hoomaopopoia.

 

AE OKOA NA KANAKA OPIO LIMANUI I KO LAKOU HEWA.

 

(Mai ka aoao 1 mai.)

 

a iwaena o kela poe kanaka opio a pau, he hookahi wale no o lakou i hoike mai kekahi hoailona, no kona piha i ka hilahila, oiai ilaila wale no kona poo e kulou ai, aka no ka nui ae o kona mau hoa, aohe wahi mea a komo iho o kela manao hilahila iloko o lakou a i kela ame keia manawa, e haawi mai ana kekahi poe i na minoaka, me he hana kilakila loa ke karaima a lakou i hana ai.

            I ka wa i ninau pakahi ia mai a ka poe i hoopiiia e ka aha, ua ae aku kela ame keia o ka poe ehiku no ko lakou pili i ka hewa, a @@@ pane no paha na mea elua i koe, ina aole o laua mau loio nolaila aole i loheia ka laua pane ahiki i keia Poakahi ae.

Ke Karaima i Hanaia

            I kulike ai me ka hoakaka a na makai,  i ka nana kiionioni ke kaikamahin opio i hoopoinoia, aole hoi elike me ka moolelo mua, i puka aku ai maloko o ka nupepa, no ka hele ana e uku i kekahi mau bila i ka halekuai, a e huli hoi ana oia me kona kokoolua no kona home, a no ka loaa ana i ke kuaua, ua komo ae la laua malalo o ka lanai o ka halekula o Pohukaina, no ke kakali ana a malie ka ua.

            Ma ka po Poaono kela, o ka la 13 o Ianuari, ka po hoi i hoomaka mai ai ka makani ame ka ua, nana i luku iho i na kumulaau ame na meakanu a mokaki ilalo.

            Ia laua maloko o kela lanai, ua hoea aku la kela puulu o na kanaka opio limanui, a pepehi aku la i ke kokoolua o ke kaikamahine, a no kona ike, e pilikia ana oia, ua holo okoa oia, no ke kii ana i kekahi mau kokua.

            I kona hala ana aku, a koe hookahi iho la kela kaikamahine, ua laweia aku la oia, no ka hale maluna, a malaila i hooko aku ai kela poe kanaka opio, i ko lakou mau manao lapuwale, me ka haalele ana no i ua kaikamahine la iloko o ke kulana kupouli, a holo nui aku la no kahi e pakele ai lakou.

Ka Hookolo Ana a Na Makai

            Aole i hoike koke ia mai ke karaima i hanaia i ka oihana makai, ahiki i ka la 15 o ka mahina o Ianuari, o ke kumu, e waiho ana ka makuakane o ke kaikamahine, i hoopoinoia i ka ma'i, a ua hoihoiia aku hoi kela kaikamahine no kekahi home okoa aku, malaila oia i lapaauia ai, no ka poino i kau aku maluna o kona kino.

            I ka loaa ana aku o ka hoike i ka Makaikiu McDuffie, ua hoomaka koke oia e ninaninau i kela kaikamahine, he hookahi wale no nae, mea iwaena o kela poe eiwa, a kela kaikamahine i hoomaopopo oia o Louis Gomes, o ka nui aku, aole i maopopo iaia ko lakou mau inoa.

            Ma ka la 20 o Ianuari, i paa ae ai o Louis Gomes i ka Makaikiu McDuffie, a nana i hoike ae i na inoa o ka poe i komo pu me ia iloko o ka hana karaima hookahi, a i kela ame keia manawa i lawe liilii ia mai ai kela poe kanaka opio, i ka halewai.

            Maluna o ka mokuahi Manoa, i paa ai o John Pavao i ka hopuia, aohe he wa, a pakele oia mai ka makaikiu aku, no ka mea ua kau oia maluna o kela mokuahi, no ka manao e holo i Kapalakiko.

            O George Hoopii, Minoru Kimura ame Eddie Fuller, ma Kauai lakou i paa ai i ka hopuia e ka Makaikiu Kellet, ma ka la 27 o Ianuari, a no Paahao Gilman hoi, nana ponoi no i haawipio ae iaia iho, ma ka Poalima aku nei i hala.

            He hookahi o kela poe kanaka opio, i hoike okoa ae i ka Makaikiu McDuffie, aole kela o ka mua loa, o ko lakou lawelawe ana i ka hana hoopoino, a limanui, aka iloko aku nei o ka mahina o Dekemaba, ua limanui no lakou i kekahi wahine ma Kamaki Kuea, o ke kumu wale no i pakele ai kela wahine, mamuli o kona noke ana i ka uwe kapalili, a mama na wawae o ka poe kolohe i ka holo.

            Iwaena o kela poe apau, he hookahi wale no o lakou i mare i ka wahine, oia o George Hoopii, elike me ia i kamailioia ae ai.

 

AIHUEIA KE KAA OTO O KA MAKAI NUI ROSE.

 

(Mai ka aoao 1 mai.)

 

a hoikeia mai la ka lohe iaia, ua loaa kona kaa ma kahi hoomoana o na koa ma Leilehua.

            O na mea na laua i lawe aihue i kela kaa, he mau koa no ia, i komo i na lole o na makaainana, a e hoomakaukau ana ka ua mau koa nei, e kukulu aku i ke kaa, ma ke kahua o na mokulele, o ka manawa ia i ikeia mai ai e ke aliikoa, nana e kiai ana ka uwaki o kela manawa, o ko laua paa no ia i ka hopuia.

            Ma ka Poalua nei, i hoounaia ai o W. J. Lilis, ke poo o na makai nana kaa, no Leilehua, no ka hoihoi ana mai i kela kaa otomobile o ka makai nui, i aihueia ai.