Ka Nupepa Kuokoa, Volume LXII, Number 20, 17 May 1923 — Page 6

Ka Nupepa Kuokoa

KE KILOHANA POOKELA NO KA LAHUI HAWAII.

 

He Moolelo Walohia

Ko Vekinia Waiwai Hooilina

Hoopuhiliia na Hana a ka Mea Manao

Ino---Kau i ke Aki i ka

Manawa Hope

 

            "Aole au i manao he manao hewa kekahi iloko o kela kanaka opio no ka mea, he keonimana oiaio oia i ka'u nana aku, malia paha, aia no he manao kuko iloko ona, aka nae, o kona hoao ana e hana i ka hewa i keia kaikamahine me ka ae ole o ka mea i kuleana ia kaikamahine, aole oia e hana iki ana i kekahi mea o ia ano," i pane aku ai o Mr. Naita.  "I ka nana aku he kanaka Pelekane opio kela i hoonaauao maikai ia, he kulana keonimana kona, aole ona mau ano ino a mau hana ino paha mamua o kona hui ana me Veki.  O kekahi mea mahalo a'u i kela kanaka opio aole ona puhi paka, oiai nae, he hana maa mau ia i na kanaka opio o keia mau la, e ike mau aku ana oe e kau mai ana ka ipupaka i ka waha a i ole ke kika a kikalika, i kela kanaka opio nae, aole au i ike iki ia mau ano ino, no ka mea ma ia mau ano hana maikai ole no e ike aku ai oe i ke ano o ke kanaka."

            "Pela no, aka, aole kaua i maopopo iki i kekahi mea e pili ana nona ame kona ohana; eia hou, aole kaua i maopopo mai hea mai la o Enelani oia o ka holo ana mai, a no ia mau kumu pohihihi ma kona aoao, e hoike aku no au ia oe aohe o'u hilinai i kela kanaka opio," i hookikina loa mai ai ke kamailio ana a ke kaikuahine.

            "Pela pu no me a'u, aole au i maopopo i kona ano mamua, aole no hoi i ka aina maloko o Enelani, kahi ana o ka holo ana mai, hookahi wale no mea i maopopo ia'u i keia manawa he kanaka opio Pelekane oia, no ka mea aole no au i ninau iki aku iaia mai hea la oia i holo mai ai, o ke kumu no aohe ano ohiohi wale mai o kela kanaka ma ke kamailio ana, oki loa aku hoi kona hoakaka ana mai i kahi o kona home i ku ai ame kona ohana, aka nae, e niele aku ana au iaia i kekahi manawa i mea e maopopo ai ia'u kona moolelo," wahi a ke kaikunane o ka pane ana mai.

            "Aka nae, e Stella (o ka inoa keia o ke kaikuahine) ina na'u ponoi o Veki, ua maopopo no ia oe i nei manawa ua aloha au i kela kaikamahine me he mea la na'u ponoi, manao au aole kumu iki ma ko'u aoao e hoohuoi ai no ke ano o kela kanaka opio ame kana mea e hana aku ai ia Veki, no ka mea, elike me ia a'u i hoakaka mua aku nei ia oe he hilinai nui ko'u maluna o kela kanaka opio e loaa ole iho ai ia mea he hopohopo a he maka'u hoi iloko o'u no ka hoohihiaia o ka noonoo o kela kaikamahine a haulehia aku oia i ke aloha, a ina he aloha io kona no Mr. Hamiletona a e koho ana o eVki iaia i kane nana, aohe no a'u mea e ahewa iho ai, a makala aku paha, no ka mea, ua ike au ua kupono loa laua kekahi na kekahi."

            "Owau pu kekahi i makemake i kela kanaka opio mamuli o kona oluolu, maikai kana mau olelo, a he kanaka opio paa rula maoli no oia i ka nana aku, a no ia mau ano maikai ona a'u i ike aku ai iloko ona i loaa iho ai ka manao koho iloko o'u mailoko mai paha oia o kekahi ohana maikai a kiekie loa o Pelekane, no ka mea, ina aole kela mau ano maikai ona ua hiki no ke kohoia aku mailoko mai oia o kekahi ohana haahaa, eia nae, aohe no he maikai iki o ko'u noonoo i ko laua hui mau.

            "No Veki he makemake au iaia e hoi aku i kona makuahine me ka maluhia elike me ia ana i hele mai ai, me ka loaa ole o kekahi mea a kona makuahine e hoohuoi mai ai, a e hoonalueaia ai hoi o kona noonoo.  No Mr. Hamiletona hoi, ina he makemake wahine kona, oia ponoi no ke hele aku e noi ia Mrs. Alekanedero, o ke kaawale aku o kela kaikamahine mai ko kaua malu aku oia ka hoomama loa mai i ko'u noonoo, a ia manawa e ike iho ai kaua ua kaawale ua kaawale aku ka mea hoopilikia mai ia kaua.

            "I nei manawa he hiki ia'u ke heluhelu aku i na hoailona o ke au o ka manawa e nee mai nei mamua no kela mau opio, ina no e oi loa aku ana ko'u luahine mamua o keia manawa, a, ina aole kaua e makaala ana, e hoikeia ae ana laua he mau ipo mamua o ka hala ana o elua pule hou mai keia la aku."

            He helehelena piha noonoo ko Mr. Naita no kekahi manawa, a i ka loaa ana o kana pane i mai la: "Aole kakou e akoakoa mau aku ana no kekahi manawa loihi, e haalele mai ana no o Mr. Hamiletona i keia huakai i ka manawa e pau ai kana makaikai ana ia Kaleponi nei a holo aku no Mekiko me kekahi poe, nolaila ea, mai hookaumaha loa ia i kou manao."

            "Pela no, ua maopopo ia mea ia'u, oia hoi ka mea nana i hoouluku loa ae i ko'u noonoo no ia holo aku ona, a oiai oia e hui ana me Veki i nei manawa aole e nele ana kona hookomo iloko o ko Veki noonoo i na manao e hoohihiaia ai ka wahine opio mamuli o ka pokole o kona manawa i koe e hui ai me ia, a ke hopohopo nui nei au ina aole kaua e kiai makaala loa ana i kela kaikamahine.  I kona manawa e haalele iho ai i kela kaikamahine a hookaawale aku iaia aole anei e komo iho ana ka manao koho iloko ou e waiho iho ana oia i kekahi mau huaolelo o ka manaolana no ko laua hoohuiia, e hiki ole ai ke holoiia ae mai ko kela kaikamahine noonoo ae?  E waiho iho ana oia, oia ka mea maopopo loa."

            "O, e kuahine Stella, he manao maikai no kau i hoakaka mai la a he kumu kupono no hoi e ulu ae ai ka hopohopo iloko ou," wahi a Mr. Naita o ka akaaka ana iho, "a ke manao nei au he mea pono io no e hoikeia aku kekahi huaolelo i na pepeiao o ke kanaka opio, a ke manao nei au he mea maikai no no'u ke kapaia mai he elemakule hokai wale aku i ka hana ame kamanao o na opio, mamua hoi o ka hoolilo ana aku i ke ola makamae o kela kaikamahine i ola hookaumaha mau ia."

            Ua maikai loa keia manao o Mr. Naita, i ko ke kaikuahine noonoo, nolaila aole oia i kamailio hou mai maluna o keia kumuhana mamuli o kona ike iho e hooko ana ke kaikunane i kana olelo hooholo.

            Maloko o ke kulanakauhale o Jose keia kumuhana i kamailioia ai a hoopau ia no malaila.  He mau la lehulehu ka lakou o ka hooholo ana e hoohalaia maloko o ia kulanakauhale nani, a oia no hoi ko lakou kikowaena e hoi mau mai ai mahope o ko lakou hele ana aku e makaikai ma kela ame keia wahi kaulana o ia aupuni, a oiai lakou malaila ia mau la, hooholo iho la o Mr. Naita i kona manao e hui aku me ke kanaka opio a e hoike aku i kona manao imua ona e pono oia e hoomamao a mai hui mau me Veki, elike me ka manao o ke kaikuahine o ke kamailio ana mai iaia, i hookaawaleia ae ai ia noonoo mailoko ae o Stella e hoomanao hou ole aku ai.

            Ia lakou i haalele iho ai i ka rumiaina o ka Hokele Ajeria mahope o ka aina ahiahi i kekahi ahiahi, hele aku la Mr. Naita, a kuiee mai la i ka lima o Rupata ma ke ano e hoike mai ana aia ka makemake ame ke aloha iloko ona nona, a i mai la:

            "E Mr. Hamiletona, e hele ana au e holoholo no kekahi manawa liilii a hoi mai ma kekahi mau wahi owaho aku nei o ke kulanakauhale.  E oluolu ana anei oe e hele pu me a'u?"

            Ia Rupata ame Veki mawaho o ka lanai mamua aku o ka aina ahiahi, ua hooholo laua e hoi hou aku malaila i hoolohe aku ai i ke kani mai a na mea kani e paani mai ana ka bana ma kekahi wahi kokoke aku, aka, mamuli hoi o keia nonoi a ke keonimana aoo ana i manao ai he hoaloha oiaio oia nona, ua hiki ole iaia ke hoole aku i kana kono, a me ka hookaulua ole iho, i aku la.

            “Me ke hauoli nui au e hoike aku nei e hele pu aku ana au me oe, me ka mahalo pu i kau kono.”

            Ia laua i hoea aku ai i ke alanui huli ae la ka Mr. Naita pailaka ana i kona hoa i kahi o kekahi paka kokoke mai, a mahope o ko laua u haele like ana aku ma ke alanui no kekahi manawa, komo aku la i ka paka a u haule iho la noho maluna o kekahi o na noho laau e ku ana, me ke noi ana mai o Mr. Naita i ke kanaka opio e hle aku a noho pu ma kona aoao, a ia laua i u noho iho ai, huli mai la o Mr. Naita e kamilio i ka i ana mai:

            “E kuu hoaloha opio, he hana maa mau na’u i ka manawa e loaa ai o kekahi hana ano nui na’u e hana aku ai, a mamua hoi o ka hoomaka an e hoonee mua aku ia hana ano nui na’u e hana aku ai, a mamua hoi o ka hoomaka ana e hoonee mua aku ia hana, e noonoo mua ana au i ka’u mea e hana aku ai, a ke loaa ole ia’u kekahi manao maikai e ui mua aku ana au i kekahi o ko’u mau hoaloha no kona hoakaka ana mai i kona manao maluna o ia kumuhana; eia iloko o kou umauma i nei manawa he makemake a e hoike aku ana au ia oe, a o ke kumu nui hoi o ko’u kono ana aku nei ia oe e hele pu mai, no ko’u hilinai ia oe, e noi mua aku ana nae au i kou huikala ana mai mamua o ko’u hoike ana aku ia oe i ko’u manao, a he manao hoi ia e hoikeia aku ana me ka poipoi a hunahuna ole, aka, me ka moakaka loa.”

            Ia Rupata e hoolohe aku ana i nei mau olelo a kona hoa ke lelele wale la no kona oili me ka ninau iloko iho ona, heaha ana la ia manao nui o Mr. Naita e kamailio aku ana iaia, a me kahelehelena o ka mea i hoohikileleia ae ka noonoo i nana mai ai i kona hoa, me ka kakali malie o ka puka aku o ka olelo a i mai la nae:

            “Ina he mea pili kekahi ia’u ma keia hana au e manao la e kamailio mai ke lana nei ko’u manao e hoike mai ana oe me ka hunahuna ole a o ka mea oiaio wale no hoi kau e hoike mai ana.”

            “O, mahalo nui ia oe e Mr. Hamiletona.  Ua maopopo no ia’u e hookipa aku ana oe i keia manao a’u e kamailio aku ana ia oe me ka manao maikai,” wahi a Mr. Naita o ka pane ana aku, me kona aloha no nae iloko ona no ke kanaka opio no ka hookuhauia aku o kona noonoo ma kekahi ano.

            “He elemakule au i nei manawa, elike me ia au e ike mai la e kuu keiki, aka he kanaka opio no au mamua elike no hoi me kou opiopio i nei manawa, a oiai ua kahiko ko’u mau la a ke aneane nei e napoo apau no hoi na manaolana ana no na hoohauoli o keia ola honua ana. eia nae, aole no i palaka mai ka’u hoomanao ana ae na hoao lehulehu i halawai mai me a’u, ka hauoli no hoi o na la opio ame na makemake like ole no hoi o kela ame keia ano a ka manao e ulu ae ai, a pela no hoi ka ono o ka maka ke ike aku i na mea nani like ole o keia ao.

            “Iloko o ia mau mea nani a hoohauoli noonoo a’u i ike maka ai aole hiki ia’u ke ike aku i kekahi mea hewa iloko o na puuwai o na mea aloha elua, a e hoahewa aku ai hoi i kekahi opio a ui nohea o ko laua mau hiohiona e lulumiia ana e ke aloha, e lilo aku ai laua i mau hoaloha a mau ipo paha iloko o ko laua mau la o ke ola hauoli ana ma keia ao; aka nae-”

            Ma keia wahi i huli koke mai ai o Rupata Hamiletona e nana i kona hoa me ka helehelena kahaha a i mai la:

            “O kau mea anei i makemake ai e kamailio mai oia ko’u launa ana a makemake ana paha ia Miss Alekanedero, he hiona a’u e kanalua ole nei ke olelo ae ua loaa ia oe ka hoomaopopo ana ua haulehia au i ke aloha nona?” wahi ana me ka huna ole iho i kona manao a ma ke ano hoi e ikeia mai ai he manao kanaka makua kona, a i lilo ai hoi ia mau olelo ana i mea oluolu loa i ko Mr. Naita manao, oiai nae, ua ike mai la o Rupata i ka pii iki ana ae o ka ula ma kona mau papalina.

            “Ua pololei oe i koho mai la, o ko’u manao maoli no ia.  No keia manao au i makemake ai e kuka pu me oe,” wahi a ke keonimana aoo, a i hou mai la: “Ua maopopo no ia oe ke koikoi o ka hana maluna iho o ko’u mau poohiwi ma ka malama ana ia Miss Alekanedero no ka mea, he okoa no ka mea i kuleana iaia oia kona makuahine, aka nae, ua hookuuia mai kela kaikamahine e hele pu me a’u mamuli o ka hilinai mai o kona makuahine maluna o’u e lawe ana au iaia a hoihoi aku me ka maluhia a me ka manuheu ole.

            “He kaikamahine o Miss Alekanedero aohe ona makuakane a’u i maopopo, o kona makuahine wale no, a oia makuahine ona he hoaloha oiaio loa hoi oia no’u, a ua hookuuia mai ia kaikamahine e hele pu me maua a malalo hoi o ka’u ame ka kuu kaikuahine malama maikai ana, mamuli o ka hiki ole i kona makuahine ke ukali pu ia maua ma keia huakai.

            “No ia kumu, e i@ mai oe, he hana naauao ole na maua a he hoohaahaa hoi i ko maua inoa ame ka inoa o ke kaikamahine ame kona makuahine, ka ikeia ana ae ua haulehia kela kaikamahine i ke aloha i kekahi o na kanaka opio ma keia huakaihele, a i ole, e ikeia mai ai paha hoi e kekahi poe i ko olua hui mau a lilo hoi ia i mea walaau na lakou e lilo ai ko lakou mau manao koho wale i mea e hoowaia ia ai kona inoa maikai ma nei mua aku.

            “Ua ike oe a ua maopopo no hoi he opiopio loa o Veki i nei manawa, a he manaoio ko’u aole oia i hoomaopopo i ka hewa o kona launa mau ana me oe, a aole no paha oia i haawi iki i kekahi noonoo nui ana maluna o ka pilikia e hoea mai ana maluna o keia launa mau ana o olua, malia paha, aole olua i hoolala a i noonoo no ka hanaia o ka hewa, aka o na launa a kamilio wale ana no ma ke ano maikai, aka nae, aole oia i hoomaopopo i ka wa e kuonoono loa iho ai ia aloha iloko ona, a ia oe pu, ia manawa e ike iho ai oia, a oe pu, i ke koikoi o ko olua hui mau ana, a oiai oia ua mamao loa mai kona makuahine mai, he minamina ko’u ina no kona haulehia ana i ke aloha ia oe oiai oia ua mamao loa i kahi e mai kona makuahine mai.

            “He manao maikai ole keia a’u e hoike aku nei ia oe, he hana hookahaha aku i kou noonoo, malia aole paha he manao hewa iloko ou e lilo ai ia i mea e hoopoino aku ai i ka noonoo o kela kaikamahine, a malia, ua makemake wale no paha oe e launa mau me ia no ka hoohauoli a hoolaukanaka ana aku iaia i mea e hoopoi@aia ae ai kona noonoo nui no ka home, a e hookaawaleia aku ai na manao mehameha a hoouluku i kekahi manwa, aka nae, e ike oe e lilo ana ko olua launa mai ana i mea hiki ole ke huhukiia ae mailoko lilo ae o ka puuwai o kela kaikamahine, a i kona haulehia ana i ke aloha, ia manawa e ike ai au i ke koikoi o na ahewa e kauia mai ana maluna iho o’u no ko’u malama maikai ole ana i kela kaikamahine,” a hooki iho la o Mr. Naita i kana kamailio ana me ke kaumaha no nae no ke kanaka opio.

            “Aole a’u mau ahewa ana aku ia oe, ua pololei loa kou manao, e Mr. Naita,” i pane mai ai o Rupata, mahope o kona noonoo ana no kekahi minuke.  “No keia hoike mua ana mai la au i keia mea i nei manawa iloko o ka manawa kupono loa ke haawi aku nei au i ko’u mahalo nui ia oe, no ka mea, ua lilo oe i mea uwao mua ia maua no ka pilikia e hiki mai ana, ina la paha o ko maua hui mau wale ia ahiki i ka hookuonoono loa ana o ka iini ame ka makemake o kekahi o maua, a he hana paakiki ka ulaa ana ae ia mea mai ko maua mau puuwai ae.”

(Aole i pau.)

 

He Moolelo no

KA MEAHUNA POHIHIHI

A I OLE

Ka hoohokaia Ana o ka Manao Puuwai o ka

Mea Lili-He Moolelo i Piha me na

Wiliau o ke Aloha

 

            Hoakaka aku la o Tiodora i na ano apau o kela komo, elike me kana e hoomanao la, a o na mea apau ana i kamailio aku ai, ua kulike loa ia me ke komo hoopalau e nieleia mai nei iaia e loaa aku ka mea oiaio.

            “Manao no anei oe, e hiki ana ia oe ke ike i ua komo hoopalau nei, ina e hoikeikeia aku ana imua ou?”

            “Aole loa o’u kanalua iki no ia mea.”

            Iloko o keia manawa a Mr. Kelekolio e kamailio ana me Tiodora, aia kona lima ma ka aoao kahi i lewalewa ai, hapai oe la oia i kona lima akau iluna, a hoikeike mai la i kekahi komo imua o ke kaikamahine opio.

            I kela ike ana aku no o Tiodora i ke komo, ua hooho koke ae la oia me ka pane ana mai: “O e Habaki! E Habaki!” alaila noke iho la i ka uwe, no ke ala ana mai paha hoi kekahi o na hoomanao ana no ke kanaka opio i nalowale a i pepehiia paha a make.

            Ke kakali malie la o Mr. Kelekolio ahiki i ke akakuu ana mai o ka Tiodora uwe ana, ninau hou mai la:

            “Ua hoomaopopo mai la anei oe i keia komo? E oluolu oe e lalau mai a nana pono iho, i maopopo pono ai, o ua komo hoopalau nei i’o keia, aole paha?”

            Lalau okoa aku la o Tiodora i ke komo, a nana iho la, aia hoi iloko o kona noonoo, na manao kohokoho, ina paha ua loaa ke kino make o Habaki Naika, a mai kona manamanalima mai, i laweia mai ai kela komo, a i ka hala ana o kekahi mau sekona, i aku la oia i kona kahu hanai:

            “Ae, o ua komo hoopalau nei no keia, aohe wahi lilo, ma na ano apau,” me kona hina ana mai hilinai ihope o kona noho, oiai hoi ka hanu e pinapina’i ana me kona umauma me ka pihoihoi.

            “Ua loaa anei ke kino o Habaki?” wahi a ua o Tiodora me kela pihoihoi no iloko ona, mamuli o ka loaa ana o ke komo hoopalau.

            “Aole i loaa ke kino o Habaki,aka o keia komolima wale no ka mea i loaa ame keia mea,” me ka waiho ana aku o Mr. Kelekolio i kekahi apana welu maluna o ke pakaukau.

            “Auwe no k ahoi e, o keia ka apana o ke kuka o Habati, e komo ana a kela la! E hoike mai ia’u i ka moolelo o ka loaa ana aku o keia mau mea!” me ka puliki okoa ana ae o Tiodora i kona mau lima a elua i kahi hookahi; e hoike mai ana hoi kona helehelena, i kona hele a piha me ka menemene, ina nei no ka make i’o o Habaki.

            “Aole mea hiki ia’u ke hoike aku imua ou e kuu kaikamahine, koe wale no ka loaa ana aku o keia mau mea  Oiai nae aole e lilo ana keia mau mea, i mau mea waiwai, aka nae he moali keia no ka hookolo ana aku malia o hoea mai  i ka wa e hua’iia ae ai ka mea oiaio loa i hanaia, eia nae, ke hele loa aku nei keia hana, i ka pohihihi loa.”

            “O, e Papa Kelekolio!” i noke okoa ae ai o Tiodora i ka uwe, me ka puliki ana mai i kekahi lima o Mr. Kelekolio, ke naka la hoi kona kino me ka haalulu, a o ia kana o ke kamailio hou ana mai.

            “E hoike koke mai ia’u, aia anei kekahi mea, e kau aku ai na hoohuoi ana maluna o Gai Wakona, no kona pili i ke karaima pepehikanaka.”

            “Eia wale no ka mea hiki ia’u ke hoike aku imua ou e kuu kaikamahine; ma ko’u manaoio, aole e lilo ana keia mau mea, i mau mea e hooiliia aku ai na ahewa ana maluna o ke kanaka opio, aka nae ma kekahi ano ke nana aku, aole no ia, he mea e hoopauia ae ai ke kau ana aku o na manao hoohuoi maluna ona, ahiki i ka hoea ana mai i ka maopopo maoli ana ae, o ka mea nana i hana i ke karaima pepehikanaka.”

            Mamuli o ka ike maoli aku no o Mr. Kelekolio, i ka nui pihoihoi o Tiodora koi aku la oia i ke kaikamahine opio e hoi e hooluolu, a mahope o k ahaawi ana aku la noi i ke kaikamahine opio e hoi e hooluolu, a mahope o ka haawi ana aku i kona aloha, me na olelo hoolana, ua hoi hou mai la o Mr. Kelekolio no kahi o kana malihini e kakali aku ana iaia maloko o ka rumi waiho buke.

            O keia malihini o ke kipa ana mai e ike ia Mr. Kelekolio, aole no ia he mea okoa aku, aka o Simona no ia, kela kanaka elemakule malihini o ka hoea ana mai no Ladana, no ka nana ana i ki, no ka luapao o ka ilina o ka poe make malalo o ka honua, a o ke kanaka hookahi no hoi o ka hoea ana aku no Welafika elike me na mea i hoakakaia ma na mokuna aku nei i hala.

            Iloko o na la a Simona Kaapuni e noho ana ma Welafika, e hele mau ana oia i na anaina haipule i ke ahiahi ame ke kakahiaka, koe wale no na manawa ana e holo ai no Ladana.  I kona wa nae e komo ai maloko o ka halepule, e noho mau ana oia ma kekahi wahi hookahi, me ka hiki pono iaia ke ike aku i ka papa himei ame ke kahunapule, eia nae aia ka hapanui o kana nana ana maluna o ke alakai o ka papahimeni.

            I na manawa apau e hookuu ai na hana haipule, e hemo mua aku ana oia iwaho o ka halepule, me ka hoolalau wale ana iho no, ahiki i ka wa e oili mai ai o Keoni Naika, alaila e haawi aku ana i kana kunou ana i kela keonimana, a i kekahi manawa e haawi okoa aku ana oia i kona manao mahalo, no ka maikai o ka himeni.

            E hoao mau ana o Simona Kaapuni e hookamaaina iaia iho me Keoni Naika, eia nae aole he holopono iki o kana mau hooikaika ana, ahiki i kekahi la, mahope o ka hookuu ana o ke anaina haipule, ua noi okoa ak;u la oia ia Keoni Naika, e hele pu laua, a ia wa i hoohele aku ai kana kamailio ana, no na mea pili i ka himeni, me ka hoohalike ana, me ka papa mu, a papa konane hoi ma kekahi ano i kamaaina i na Hawaii.

            Me he mea la nae, ua lilo paha keia mau olelo a Simona Kaapuni i mea hoihoi na Keoni Naika, kamailio okoa mai la ua kanaka nei i ka ninau ana mai:

            “Pehea i kulike ai na mea pili himeni i ka papa mu?”

            “Aole au he loea himeni, a aole no he hiki ia’u ke heluhelu i na huamele, eia nae, ua hiki ia’u ke noho a hoolohe aku i ke ano o kau hookani ana i ka piano no kekahi mau hora, me ka hialaai maoli.  Ma ko’u manaoio, ua hanaia na huamele, ma ke ano i kulike loa ko lakou hoonohonohoia ana me na mea maluna o ka papa mu, koe waleno nae keia, he okoa no hoi ke ano o ka paani ana i na huamele, a he okoa no ka paani ana i ka papa mu.”

            “Ke apono aku la au i kena mau hoakaka au e kuu hoaloha,” wahi a Keoni Naika, me kona hoike okoa ana mai, no kona ohohia i na mea a ke kanaka malihini e kamailio aku nei iaia.  “Aia i’o he like ole no ma ke ano o ka hoonohonohoia ana o kela mau mea a elua, a pehea he paani mu no nae paha oe ea?”

            “Ae, he oi aku ko’u makemake ia ano paani, mamua o kekahi mau ano paani e ae, aka nae he mau manawa no ko’u, i komo pu aku ai e paani pepa hahau me ko’u mau hoaloha.  Aole au he kanaka loea ma keia ano paani, eia nae he hiki no ia’u, ke hoohoka i ko’u hoa paani i kekahi manawa,” i pane aku ai o Simona Kaapuni, me ka hele mai la a nui kona @ kemak@ e paani mu me Keoni Naika.

            “Ua like pu no ka hoi oe me a’u, o ka paani mu no ka’u @ paani makemake,” me ka lamalama ana ae o na maka o K@ Naika, a i hou mai la: “Ina aole oe e ku-e mai ana ea, a@ ua makemake au e paani mu me oe, no ka hoohala ana i kekahi manawa.”

            “Heaha la hoi, ina o kou manao ia ea, aliala ke haawi @ nei au i ko’u ae,” wahi a Simona Kaapuni, me ka imoimo ana iho o kekahi maka, me ka ike ole mai nae o Keoni Naika @ ka mea ua huli aku la ka Simona Kaapuni nana ana i ka@

            “Aia a pau ka paina ahiahi, alaila e hele mai oe no@ ko’u rumi, malaila kaua e paani ai, he oki loa hoi k@ mehameha wale iho no, me ka nele i ka mea e nanea ai.”

            “Ua pono kena manao, e hoea i’o aku ana au noloko @ rumi, mahope o ka pau ana o ka aina ahiahi,” i pane kok@ ai o Keoni Naika, me ka piha hoihoi.

            He oiaio, he hapalua hora mahope iho o ka pau ana @ aina ahiahi, ua hoea aku la o Keoni Naika, maloko o ka @ o Simona Kaapuni, a o ka hoomaka koke aku la no ia @ mau kanaka nei e paani, me ka hoohalaia ana o kekahi mau hora o kela po e laua me ka hauoli maoli.

            I kinohi o ka laua paani ana, ua loaa koke aku la ka ike ia Keoni Naika, aole kona hoa he kanaka holona ma kela @ paani, nolaila ua haawi iho la oia i kona akamai piha, i wahi e kaa ai ke eo ma kona aoao, a he mea oiaio, iloko o ka @ mau paani mua ana, he ekolu manawa i kaa ai ke eo ia Keoni Naika.

            “Ea, ua lawa paha keia paani ana o kaua, ua kaa wale @ ka lanakila ma kou aoao, e hoomaha kaua, a malia no kekahi manawa hou aku, e kaa ana ke eo ma ko’u aoao,” i kamailio ae ai o Simona Kaapuni, me ka minoaka ma kona mau papalina, me he mea la, aole he wahi manao maikai ole iloko @ no kela eo mau i kona hoa paani.

            “Ua pilikia au ia oe i keia manawa, aka nae aole au he @ i maa i ka haawipio malalo o ko’u hoa paio, nolaila pehea @ hoi, ina e hele hou mai kaua e paani i ka po o ka la apopo?”

            “Ina o kou manao ia ea, aohe a’u mea e hoole aku ai,” wahi no hoi a Keoni Naika me ka hoihoi, no kona manao @ hiki ana iaia ke hoohoka mau aku i kona hoa lealea.  “O ka pilikia wale no a’u e hoomaopopo nei, e hiki ole ai ia’u ke paani mu me oe ma na ahiahi, ua paa loa au i na hana lehulehu mahope aku o ka hora elima, pehea no hoi, ina ma na hora o ke kakahiaka kaua e paani ai?”

            “Ua pono kela, oiai ua kaawale ko’u mau manawa apau, mai ke ao ame ka po, a ua ku a molowa no hoi i kekahi manawa i ka loaa ole o ka’u hana.”

            “O oe ke kanaka laki loa, i ka nui o kou manwa kaawale,” wahi a Keoni Naika, me ka hoomaku’e ana iho o kona mau maka, no kona ike no, aole ona manawa i noho wale ai, me ka hana ole.  “Ua pono kela, aia a pau ke anaina pule o ke kakahiaka, alaila hele mai au noloko nei o kou rumi, no ka nanea ana no kekahi mau hora, oiai aole no a’u mau hana e ae o ka wa ao, aia wale no a hoea i na hora o ke ahiahi.”

            Mamuli  o kela mau hoolala ana, ua ike mau ia kela mau kanaka elua maloko o ka rumi o Simona Kaapuni, e paani mu ana i na la apau, mai ka hora eiwa mai o ke kakahiaka ahiki i ka hora umi-kumamalua.

            I kinohi o Keoni Naika ke hele mau mai ana noloko o k@ rumi o Simona Kaapuni.  Aia kela ma ka aoao hikina o ka hale, me ka loaa mau mai i ka la, a he ku aku no hoi ka wela i ke ao, nolaila, i kekahi la, kamailio mai la o Keoni Naika, e hoi laua noloko o kona rumi e paani mu ai, ma ka aoao @ mohana o ka hale, kahi loaa ole mai i ka la, ahiki i na hora@ ka auwina la, ke olu loa la o Simona Kaapuni, me ka pane ana mai:

            “Aohe a’u  mea e hoole aku ai, ina o kou makemake ia e Keoni Naika kuu hoaloha,” me ka piha maoli iho la o Simona Kaapuni me ka olioli, oiai o kona iini no ia, o ko laua hoi maloko o ka rumi o Keoni Naika e paani ai, aole nae ona makemake, e kaa ma kona aoao ke koi aku e hoi ma ka rumi o kela kanaka.

            Ua nui maoli ka hialaai o ka paani ana a ua mau kanaka nei, ma kela hoi ana aku noloko o ka rumi o Keoni Naika, a no ia hialaai loa, aole o laua nana ae i ka manawa, aia no a@ki i ka pau ana o ko laua makemake paani alaila hoomaha a he kakaikahi loa no hoi ko laua walaau mawaena o laua iho no ka mea e hoolelepau an aka noonoo o kela ame keia @ ke ano o kana hoonee ana i ka mu, i wahi e loaa ai iaia @ lanakila.

            No na pule ekolu kela hoomau ana a ua mau kanaka nei @ ka paani, ua haki iho la ke pakaukau e laua e paani mu n@ he pakaukau kahiko keia, e hiki ai no ke opiopi ae, a ke k@ kulu hou, i ka wa e makemakeia ai, eia nae ma kekahi a@ i hoomaopopo ole ia, ua hemo kekahi kui ko-lu, pela i loaa ai kela pilikia.

            Ua hoao iho la o Keoni Naika, e hoopaa hou i ke kui ko-@ o ke pakaukau, aole nae e hiki, no ka mea ua popopo kekahi wahi o kela kui, a oiai o ke pakaukau hookahi wale no kela maloko o ka rumi, e hiki ai ke aihoia ka laua papa m@ laila ua hele o Keoni Naika a piha me ke kuaki, me ka pane okoa ana mai:

            “E hele aku au e huli i kekahi kaula, no ka nikii ana i na wawae o keia pakaukau, aia hoi a kekahi manawa okoa ak@ alaila kakia maoli i ke kui a paa,” me kona haalele ana @ i kona noho, a hele aku la e huli i kekahi kaula.

            Aia he rumi waiho lole ma kekahi aoao o kela keena a laua e paani mu nei, hele aku la o Keoni Naika no kela keena, a wehe mai la i ka puka, a ke noho aku la hoi o Simona Kaapuni, hakilo i na mea o kela keena uuku.  “Aole o’u manao, he kau@ kekahi maloko nei o keia rumi, a malia paha o paa no hoi i keia mea,” me ka lalau ana aku o ua o Keoni Naika i kekahi welu loihi e lewalewa ana ma ke kui kau lole, a lawe mai @

            (Hoi mai la oia a kahi o ke pakaukau e waiho ana, noke i@ la i ka hauhoa i ka wawae i hemo o ke pakaukau, a ke ha@lo mai la hoi o Simona Kaapuni i ka hana a kona kokoolua, @ kana mea e hoomaopopo mai la, he keu aku a ka haalulu o na lima o Keoni Naika, a ua hele pu hoi kona helehelena a haikea, a o ia kana o ka hooninau wale ana mai no:

            “Heaha ke ano o kena kaula welu au e hauhoa mai @ ke pakaukau, akahi no au a ike i kekahi mea o kena ano?”

            “He mea hoopuehana keia no ko’u a-i i ka wa hooilo, a e hele mau ana au me keia mea i ka hapanui o ko’u manawa e hele ai i ka po.  He elua mau kumu o ko’u makemake loa ana i keia apana lole, o ka mua o ia no ka mama, a o ka @ he pumehana no hoi, no ka mea he pilikia wale ko’u a-i, ke hele i ke ana, e loaa ana au i ke kunu, a pela iho la au @ hana ai i keia apana lole loihi.”

            “Ma ka’u nana aku, he apana lole ano e loa kena,” me ka lalau okoa ana mai o Simona Kaapuni i kekahi piko o ua apana lole nei, a nana iho la.

            “Ma ko’u manao koho wale no, me he mea la @ ma @ i hanaia ai keia ano lole, a ua makemake no hoi au, ma@ kona silika ana, oiai aole o’u hoihoi iki i na apana lole huluhulu.”

            “Pela i’o ka’u e ike nei, he apana lole silika keia, a he @ aku maoli a ka uaua, i oi aku no paha kona paa imua o kekahi ano kaula e hanaia mai nei,” me ka hoao ana iho o Simona Kaapuni e huki i kela apana lole.

(Aole i pau)