Ka Nupepa Kuokoa, Volume LXII, Number 38, 20 September 1923 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA HONOLULU, T. H., POAHA, SEPATEMABA 20, 1923   EKOLU

 

HE MOOLELO NO

ALIKA

A I OLE

Ke Ao Omamalu o Kekahi Karaima Pohihihi Mamuli o ka Manao Lili

 

            "Na kou makuahine anei i hoouna mai nei ia oe e hele mai e hui pu me a'u i keika la?"

            "Aole, na ko'u manao ponoi no i kono mai ia'u e hele mai e hui he alo a he alo me oe, aka pehea oe i manao ai, o kuu makuahine ka mea nana au i hoouna mai e hele mai imua ou e Lola?"

            "No keia kumu, ua kamailio mua mai ko makuahine ia'u, aia au a ae aku e lilo i wahine mare nau, alaila aole loa oia e hana mai i na mea e poino ai au, a ua makaukau loa oia e kiola aku i na ike apau i loaa iaia, no ka make ana o Alika, mamuli o ka laaumake."

            "Aole loa he mea i maopopo i kuu makuahine no ko'u mau makemake e hele mai e hui pu me oe, a oki loa aku hoi ka loaa ana he wahi hoomaopopo ana iaia no ka mana a'u e hooia aku maluna ou. Pehea e ae mai ana anei oe e Lola e lilo i wahine mare na'u ma keia mua aku?

            "Elike no me ka'u i hoole mua aku ai ia oe, pela no au e hoole hou aku nei, aole loa au e lilo i wahine na'u, me kou nana ole, i ka hopena e kau mai ana maluna o'u ma keia hihia pepehikanaka o'u."

            "Ua nana i'o aku no au i kela pane mua au i hoike mai ai imua o'u, ma ke ano, malaila iho la no, pau ko'u noonoo hou ana aku ia oe ma ke ano e lilo mai i wahine na'u, aka nae mahope iho o ka make ana aku o Alika, a i ka wa hoi i kau mai ai keia pilikia nui maluna ou, ulu ae la kekahi noonoo iloko o'u, malia paha e maliu mai ana oe i ka'u leo uwalo hope loa ke ike mai oe, owau hookahi wale no ke kanaka i hiki e hoopakele ae ia oe mai ka poino mai. O, e Lola ua haulehia au i ke aloha nou, e ae mai ana anei oe e lilo i wahine na'u?"

            "Ina he mana i'o kou e Uilama Wadona, e hiki ai ke hoopakele ae ia'u mailoko mai o ka poino, alaila ua kau aku kekahi hana ma kou aoao, ka hoopakele ana ae i ka mea iloko o ka poino, me ka nana ole, ina paha e ae aku ana au, a i ole e hoole aku ana i kau noi. No ka elua nae o ka manawa, ke ninau hou aku nei au ia oe e Mr. Wadona, ma ka mana hea e hiki ai ia oe ke hoopakele ae ia'u?"

            "Elike no me ka'u i hoole mua aku nei ia oe, pela no au e hoole hou aku nei; aka nae, o ka mea oiaio maoli no ea, ua hiki ia'u ke hoopakele ia oe, o kau wale no, o ka haawi mai i manaolana iloko o'u, alaila owau ka mea nana e hooko aku i na hana apau."

            "Alaila o ka mea oiaio anei, aole oe e ae ana e hoopakele ae @a'u mailoko mai o ka pono, aia wale no au a ae aku e mare me oe?'

            "Pela maoli no ka mea oiaio loa, e hooia maoli mai oe me na olelo maoopo mai kou waha mai, e lilo i wahine na'u, e ike auanei oe, aole ka'u he mau olelo palaualelo wale no, aka he mau olelo oiaio loa ia, elike me ke kau malie ana o ka la ma kona wahi i ke ao ame ka mahine hoi i ka po."

            "Ua olelo mai nei oe, ua aloha oe ia'u, he mea oiaio anei ia?"

            "Ae, ua aloha maoli no au ia oe e Lola me kuu olelo okoa ana mai nae, no kou manaoio ole ia mea."

            "A pehea he oiaio anei aia ka mana iloko o kou mau lima e hiki ai ke hoopakele ae ia'u?"

            "Ae, o ka mea oiaio loa ia."

            "O ua mana nei anei i loaa ia oe, o ia no ka hiki ana ke hoauhee loa aku i na kumu hoohuoi apau mai ia'u aku, e pili ole mai ai kekahi wahi kiko eleele maluna o kuu inoa maemae?"

            "Ae, o kena mau mea apau au e hoakaka mai nei," wahi a Mr. Wadona, me ke ka@amaha koke ana mai nae o Lola iaia :

            "Alaila aole loa oe e ae ana, e hooko aku i kekahi hana hanohano loa, no ka hoopakele ana ae i kekahi kaikamahine hewa ole, mai kekahi hewa i kahihi wale ia mai maluna ona, aka e noho malie wale mai no oe, a nanamaka me ka manao lokoino, pela anei e Mr. Wadona? O kou hana ana pela, ua pili ia oe ka hewa pepehikanaka, ina e kau mai ana ka hoopa'i make maluna o'u, a i ole hoopaaia paha maloko nei o ka halepaahao apau ko'u ola ana, o keia anei kau mea e hana mai ana?"

            "E noonoo oe e Lola me ke akahele loa i keia mau mea, o ia hoi, ma kekahi aoao, o ka make, ame ka noho paahao apau ke ola, ke paakiki oe, me ka maliu ole mai i keia leo uwalo imua ou; a ma kekahi aoao hoi, ina nei no kou lilo mai i wahine mare na'u, alaila e hoao no au elike me ka hiki ia'u, e hana aku i na mea apau e hoohauoliia ai kou manao. Mamua o ko'u hooko ana aku i ka hana hoopakale i kou ola ame kou inoa maemae, he mea pono e loaa mua mai ia'u na hooia ana mai ia oe mai, e loaa ana he uku ia'u no ia hana."

            "Alaila e Mr. Wadona, aole anei ou manaoio, no ko'u hana ana i ke karaima pepehikanaka? Ua loaa anei ia oe kekahi mau ike, no ko'u pili ole i ka hewa?"

            "Aole au e pane aku ana i ka haina o kau mau ninau, koe wale no keia, e hoopakele no au ia oe, ke ae mai oe e lilo i wahine mare na'u, o keia wale no ka'u pane."

            "Pehea no hoi, ina nei no kou hoopakele ia'u mai ka poino mai, alaila e mahele no au i ka hapalua o ko'u mau waiwai, a haawi aku nou, i uku no keia hana hoopakele au?"

            O ka hapalua o kou mau waiwai apau, e holo mai ana no ia maluna o'u, ina no kou ahewaia e make, a o kekahi hapalua, e holo aku maluna o kuu kaikaina, nolaila heaha auanei ka'u mea e ae aku ae i kena manao ou?"

            "Auhea oe e Mr. Wadona, ua makemake loa au e loaa ia'u ka hele lanakila ana, elike me mamua, e eia hoi iloko o'u ka iini, e hoauhee loa ia aku na kikohukohu o na manao hoohuoi mai kuu inoa ae, ame ko'u kulana, ke loaa ka hoi ia'u keia mau ano la, alaila o ke olokaaia ana ae ia o kekahi haawe kaumaha loa mai kuu noonoo ae; aka nae aole loa au e ae ana e loaa ia'u ia mau ano, ma ke kuai ana me oe, elike me kau e koi mai nei, a e hauhoa ia'u iho a paa malalo ou, i oi aku paha ke ino, i keia a'u e noho hoomanawanui nei maloko o ka halepaahao."

            "Pehea, ua makemake maoli anei oe e make e Lola?" i ninau mai ai o Uilama Wadona me ka hele o kona helehelena a pii ka ula, me ka uumi wale ana iho no i kona manao inaina, no ka hoohokaia ana o kona mau manaolana apau i upu aku ai, e lilo mai o Lola i wahine nana.

            "Aole o'u makemake e make," wahi a Lola me ka leo kaumaha. "Eia no au iloko o ko'u mau la opio, a ia'u e nana aku nei imua, me he mea la, ke olino mai la na mea e hoohauoliia ai ka manao, me ka lilo ole o ko'u noho paahao ana, i kumu e alai ae ai ia hiona e kau mau mai an aimua o ko'u mau @aka. Ina nae elike me kau i hoakaka mai nei, o ke alahele wale no e palekana ai au, o ia ka ae ana aku e mare me oe e Uilama Wadona, alaila ua ahona ka make ana, mamua o ka lilo ana aku i wahine nau."

            "Ua hehena ia anei oe e Lola, i kamailio mai ai oe i kena mau olelo?" i pane aku ai o Uilama Wadona, me ke ku okoa ana ae iluna, me ka hele hoi o kona mau maka a li-o, i kau a mea o kona piha i ka inaina.

            "Aole au i hehena, eia no au me ko'u mau manao maikai apau, a maluna o ka Mea Nana i hana ka lani ame ka honua, ke kino ame ka uhane, e kau aku nei ko'u mau manaolana, no Kana mau hooponopono ana. Ma ke ola ana o ke Akua oiaio loa, aole Oia e hookuu mai ana e lanakila ka hewa maluna o ka pono, aka Nana no e haawi mai ia'u i ka ikaika, e hoomanawanui i na mea apau. Ina aia me oe kekahi mau ike no ka hiki ana ke hoopakele ae ia'u, ina aole oe e hooko ana i kekahi hana, a ke Akua i haawi mai ai na kakou apau e hooko, alaila ua pili kekahi hewa ko'iko'i loa maluna ou."

            "Aole au i kamailio aku nei, no ka maopopo ana ia'u o kekahi mau ike; o ka'u wale no i hoike aku nei ia oe, o ia ka hiki ia'u ke hoopakele ae ia oe mai ka poino mai, ina e haawi mai ana oe i kau hoohiki."

            "He mea liilii wale no ke ano maoli o kau mau olelo i kamailio mai nei. Eia ka mea ano nui loa ina ua hiki ia oe ke hoopakele ae ia'u, a hooko ole nae oe i kekahi hana; aka ku wale mai no, me ka paa o kou mau lehelehe; me kou ike no, aole loa i pili kekahi hewa maluna o'u, a i kauia mai ka make maluna o'u, ua makaukau loa au e halawai me ka make, me ka piha o kuu uhane i ka hauoli, no ko'u ae ole ana e hana hewa ia'u iho, ma o ka ae ana aku i kau koi.

            "Ke kauia mai nae ka hoopa'i make maluna o'u, me ko ike no aole loa i pili iki kekahi kiko eleele maluna o ku uinoa, alaila e lilo ana kou ola ana aku, i ola ana iloko o ka hoehaehaia. Ina no i papalimaia ae ka nui o ko'u mau waiwai, a haawiia aku ia oe, aole loa ia he mea e hiki ai ia oe ke hopoina, i na  hoehaehaia e kau mai ana maluna ou, no kau hewa i hana mai ai maluna o'u."

            "Ua hoakaka aku au imua ou e Lola, no kou pono wale no au e hoao ai e hoopakele ia oe me ka nana ole ae, i na hopena e kau mai ana maluna o'u," i pane aku ai o Uilama Wadona ma ke ano hoolalau.

            "Pela i'o ka hoi! Ina he manao hoopakele kekahi iloko ou ia'u, aole loa ia no kou hooko ana i kekahi hana kilakila, a ku i ka hanohano, aka i wahi e hookoia ai kekahi o kou mau manao lapuwale, o ke ano iho la ka ia o ka hana a kekahi kanaka, e manao aku ai kekahi wahine e pono oia malalo o kana malama ana.

            "Aole au e noi aku ana ia oe e Mr. Wadona, e hoopakele ae ia'u, a aole loa o'u makemake e komohia aku ka manao kaumaha iloko ou, no ko'u mau pilikia, aole loa! Me keia mau mea a'u e hoakaka aku nei imua o'u, ke makemake nei au e ku oe a hele, me ka hoao ole ma kekahi ano, e hana mai no'u, a na'iu no ia e hoomanawanui ,me ke kau aku o ko'u mau manaolana maluna o ke Akua, a Nana no auanei e hoopakele ae ia'u mai na poino mai apau."

            No kela pane a Lola, ua hele maoli o Uilama Wadona a piha me ka hilahila, me kona ike okoa ana iho, i ke ahuwale o kona mau ano apau imua o Lola, a o ia kana o ka wikiwiki ana aku i ke kamailio me ka leo haalulu:

            "He keu no hoi oe e Lola a ka piha lokoino maoli! O kou ae wale mai no ka hoi la i na mea a'u i noi aku nei imua ou, o ka pau ae la no ia."

            "Aole loa au e ae aku ana i kou makemake. Ua lohe aku nei no oe i ka'u pane, e ku oe a hele mai keia wahi aku, me ka hoao ole mai, e hoouluhua i ko'u noonoo, o kahea okoa aku auanei au i kekahi kiai oloko nei o ka halepaahao, e kii mai e e kipaku maoli ia oe."

            "Heaha la hoi, mamuli o kou maliu ole mai i ka'u uwalo aku imua ou no kou pono, e ike ana oe, i ke kau mai o ka hoopa'i maluna ou; aole loa he mana ma ka honua nei i hiki ke hoopakele ae ia oe owau wale no."

            "Heaha auanei kou pilikia, ina e kau mai ana ka poino maluna o'u, owau hookahi wale no ke auamo ana ia mau haawina ehaeha apau, aole he mea e ae."

            "Aole oe i maopopo i ka nui o ko'u ehaeha nou e Lola! Mai manao oe, he kanaka au i piha i na ano maikai ole, aole pela. aka aia iloko o'u, na manao makee no kou palekana, a no kou hauoli."

            "He makehewa wale no kou hoao ana mai e pulapu, me kou manao paha e manaoio aku ana au i kau mau olelo! O kekahi kanaka i hoike okoa mai i kona mau ano, ma o kana mau olelo la, aole oia e hoopakele ana i kuu ola, ke ole e haawi aku au ia'u iho, i wahine nana, ua makehewa loa kona ola ana ma keia honua!

            "Ina nei no ke kau mai o ka make maluna o'u, e hoopauia ae ana ko'u mau ehaeha apau, a ua makaukau au e hele aku, i kahi e ike hou ole ai i na pilikia ame na poino. Mamuli o ia make ana, e halawai koke aku ana au me ka'u mau mea aloha i hala e ma kela ao, a malia e halawai hou aku ana au me Alika, kuu hoahanau.

            'Ina nei no kuu ae aku, e kuai ia'u iho, a lilo ia oe, i wahi e pakele ai kuu ola, aole loa au e ike ana he hookahi minuke o ka hauoli o ko'u ola ana aku, nolaila e ike mai oe e Mr. Wadona, ua ahona kuu make ana mamua o ka ae ana aku e lilo i wahine nau, e noho mau aku ai iloko o na kaumaha ana, ahiki i ko'u mau la hope ma keia ao."

            Aole e hiki hou iho ia Uilama Wadona ke hoomanawanui, no kela mau olelo ku i ka hoehaeha ame ka hoohilahila a Lola i kamailio mai la nona, nolaila noke okoa ae la oia i ka hoopuka i na olelo kuamuamu, i kupono ole e kamailioia imua o kekahi wahine, a o ia ka Lola o ka papa ana mai iaia ma ka pane ana mai.

            "Ke papa aku nei au ia oe e Mr. Wadona, aole e hoopuka i na olelo kupono ole imua o kuu alo!"

            "Owai auanei ka mea nana i kono mai ia'u e hoopuka ia mau olelo, o oe wale no e Lola! Ikou hoike okoa ana mai nei i kou manao, ua ahona kou make ana, mamua o kou lilo ana i mea kaana pu me a'u i na hauoli o keia ola ana, ua lawa ia no kekahi mea, e lilo ai i kanaka pupule."

            "Nokeaha no hoi kou kumu e Uilama Wadona i hoike ole ae ai i kou ano kanaka maikai, ma kau mau hana? E manao ana au la, ia'u i hoole aku ai i kau noi e lilo aku au i wahine nau no ka manawa mua loa, e ike iho ana oe, he hookahi wale no pane a kekahi wahine i makee i kona kulana, aole he elua e ekolu paha. Ma kahi o kou hoopau i ka noonoo hou ana mai no'u, ua hoolilo mai oe ia'u i enemi ino loa nou, a i wahi e hookoia ai kela manao lapuwale iloko ou, me he mea la. ua hoolala oe i kekahi hana, me kou nana ole ae ia'u e noho nei iloko o ka hoomanawanui, me ko manaolana, pela iho la au e lilo aku ai i mea hooko i kou mau makemake apau.

            "O ko makuahine pu kekahi i hele a piena ia'u i hoole aku ai i kana noi, e lilo aku au i wahine mare nau, a no ia hana ma ko'u aoao, ua hoao pu oia e imi i kekahi alahele i pili i ka hewa pepehikanaka. ka mea a'u i lawelawe ole ai. Ke ole au e kuhihewa, ua kulike no ka olua mau hana hoopilikia ia'u. no ko'u hoohoka ana aku i ko olua mau makemake."

            "Ua kamailio mua aku nei au ia oe, aole he mea i maopopo i ko'u makuahine no ka'u mau hoolala ana no kou pono e Lola, nolaila mai hoohuikau wale mai oe iaia iloko o ka'u mau hana."

            "Ua kamailio i'o mai nei oe ia'u pela, aka nae ina aole i maopopoo i kou makuahine kau mau mea i hoolala ai, aole no ia he mea e kaokoa ae ai kau mau hana mai kana mai, oiai o ko olua mau makemake a elua, o ia no ka hooikaika ana ma na ano apau, e mare aku au ia oe e Mr. Wadona."

(Aole i pau.)

 

He Moolelo no

KA MEAHUNA POHIHIHI

A I OLE

Ka hoohokaia Ana o ka Manao Puuwai o ka

Mea Lili--He Moolelo i Piha me na

Wiliau o ke Aloha

 

            "Ma ka'u mau mea i hoomaopopo, ua huikala mai ka poe apau au i hana hewa aku ai, ma ka manawa a lakou i ike ai i ka haawina popilikia i kau mai maluna ou, a aia iloko o ko lakou mau noonoo apau, na manao kaumaha me ke aloha nou. E hoao oe e hoopoina i ka noonoo ana i na mea o keia ao, a e kau aku i kou mau maka maluna o ke Keiki Hiwahiwa a ke Akua, ka mea nana e lawe aku i ko kakou mau hala; no ka mea he mana iloko o ke Keiki a ke Kanaka e huikala mai i na hewa apau."

            "Ua hoao no au elike me kau e Habaki e olelo mai nei ,aka ke kanalua loa nei nae au, oiai ua lohi loa ko'u mihi ana, ua hala ka wa pono. He keu aku maoli no au a ke kanaka lapuwale, ua hoolilo au ia'u iho, i kanaka ino, a i mea paahana malalo o ka mana o ke diabolo," wahi a Keoni Naika me ka manaolana poho ma kona mau maka.

            Mahope aku o kela mau olelo a Keoni Naika i kamailio mai ai, ua hiamoe aku la oia, me ka puoho ole mai no kekahi manawa loihi, eia nae, e walaau olohewa ana oia iloko o kona wa e hiamoe ana, me ka hoopuka ana i ka huaolelo opiuma, me ka olelo ana i ka mea ino, a i ka hoolilo iaia i kanaka lapuwale.

            No kekahi mau hora lehulehu, aia o Habaki Naika, ame na kahuma'i, ke kiai la me ka manao, ua kokoke loa mai ka hopena o kela kanaka poino. O ka hele ia ahiki i ka napoo ana o ka la, akahi no a huli ae kona poo ma kekahi aoao, me he mea la, ua lohe aku oia i kekahi mea nakeke, alaila eueu ae la kona mau lehelehe, ia wa i kulou iho ai o Habaki, no ka hoolohe ana i na huaolelo a kona makuakane e kamailio ae ana a o kana mea i lohe pono iho ai, o ia no ke kahea ana ae o Keoni Naika ia Silia, me ka uwalo ana aku imua o kela wahine, e huikala mai iaia.

            Ma ke kakahiaka ana ae o kekahi la mai, i pauaho mai ai o Keoni Naika, a waiho iho la ke kino lepo, a hoi aku la ka uhane i ka Mea Nana i hana, a ma kona anaina hoolewa ame kona huakai hoolewa, i ukali pu aku ai ka poe apau ana i hana hewa ai, me ko lakou hoao ana e hoopoina, i na mea o ka wa i hala, koe wale no na manao kaumaha iloko o lakou no Keoni Naika, aka nae me na manaolana iloko o lakou apau, ina ua loaa i'o i kela kanaka ka manao mihi oiaio, alaila ua huikala mai no ke Akua i kona mau hewa apau, a ua hookipa aku hoi i kona uhane, me na manao hiipoi o ka Makua i Kana Keiki.

MOKUNA XXXV.

            I kela nalo ana aku o Keoni Naika, hoi aku la o Habaki me kona mau hoa no ka home o Tiodora, a ma ia ahiahi no, i hoike ae ai o Mr. Kuene i kona manao, no ka hooko koke ia o ka mare mawaena ona ame Silia, no ka mea wahi ana, aole e hiki iaia ke kakali no ka manawa loihi, oiai ua makemake oia e komo koke laua iloko o na hauoli o keia noho kino ana.

            He mau kumu maikai no nae ka kela kanaka opio i makemake loa ai e mare koke oia i kana wahine, o ia ke ku wale mai o kona home me ke kanaka ole maloko, a no ka makaala ana aku i kela home, me kona mau aina, a hui pu iho no hoi, me kona makemake e hoopau i ka hele auwana ana, pela oia i iini loa ai e mare i kana wahine, a hoihoi aku i haku maloko o kona home, a maluna hoi  o kona mau waiwai.

            Mamuli o keia manao o Mr. Kuene, ua hooholoia iho la ka la e mareia ai laua, a i ka wa i hoikeia aku ai ka lohe ia Mr. Kelekolio no ia mea, ua noi okoa mai la oia ia Silia, oia ka mea nana e haawi mai i ka wahine opio i kana kane, elike me ka rula o ka mare ana o ka poe hanohano.

            "Aole ou makuakane e Silia, nana e haawi aku ia oe imua o kau kane, a he nani hoi ia, ua loihi ko kakou noho pu ana iho nei, ua manao au, e kaa ia'u ka hanohano, o ka lilo ana, i mea nana e haawi aku ia oe na kekahi kanaka elike me Sr. Kuene i wahine nana, a ua pomaikai loa oe e Silia i ka loaa ana ia oe he makua kupono, a ke hauoli nei au, no ko olua komo aku iloko o ke ola hou."

            I ka lohe ana o Silia i na hoakaka a Mr. Kelekolio, halo'ilo'i ae la na waimaka ma kona mau lihilihi, aole wale no ka hoomaopopo ana iho, i na hana oluolu a lokomaikai a kela loio, aka no ka hoomaonao ana mai i kona makuakane i hala, aole ana mea e hoole aku ai, koe wale no ka haawi ana mai i ka ae me ka mahalo pu ana mai ia Mr. Kelekolio.

            "He keu aku maoli no paha a ka nui o na mea kamahao," i pane ae ai o Tiodora, iaia i lohe aku ai, o Mr. Kelekolio, ke ku ana he makuakane no Silia, a haawi aku i kela wahine opio imua o Sr. Kuene. "He kanaka o Mr. Kelekolio i nui kona mau makahiki, ua ike a kamaaina i ka mare ana o kekahi poe hanohano o ka aina, nolaila ua pau ae la ko kaua pilikia e Josepine, aia no hoi a hoe@ mai i ko kaua la e mare ai i ka kaua mau kane, alaila o Mr. Kelekolio no ka mea nana e lawe aku ia kaua a haawi i na kane, aole he hoaa ana i koe, ua laki maoli kakou, ua loaa ka makua kupono, he kanaka i  maa ma keia hana, oiai aole o kakou mau makua e ola nei i keia wa."

            "Nou ame Silia, ua maopopo ko olua mare, a ua kupono kou hoakaka ana mai nei e pili ana ia Mr. Kelekolio, aka no'u nei la, aole au i hoopalau i ke kane, nolaila aole he kohu iki, o kou hoohuikau wale ana aku nei no ia'u me ko olua mare," i pane aku ai o Josepine me ka hele nae a pii ka ula ma kona mau papalina.

            "Ua ike no au e Josepine, aole oe i hoopalauia, aka nae aole ia he kumu e hewa ai ka'u mea i kamailio mua ae nei, malia no hoi paha e hoea mai ana no i ka la e hoopalauia ai oe no ka mare aku me kekahi kane, nolaila ua loaa ka makuakane ma kou aoao, oia o Mr. Kelekolio, he hewa ia la?"

            "Aole no hoi paha he hewa, aka nae he hana kohu ole na kakou ke kamailio wale ana no i na mea i maopopo mua ole," wahi a Josepine i pane hoolalau wale aku ai no, me ka mau no nae o ka ula ma kona mau papalina.

            Ua maopopo ia Tiodora ke kumu o ka pii o ka ula ma na papalina o Josepine, aole nae oia i kamailio mai aka ku ae la iluna, a hemo aku la mailoko aku o ka rumi, me ka nalu ana iho iloko ona, aole he loihi o na la a lakou e kakali aku ai, o ka hoea mai no ia i ka hoopalauia ana o Josepine me Habaki Naika, oiai e pili mau ana kela mau opio ma ka hapanui o na manawa a lakou e noho ai i ka hale.

            Ma kela manawa i maopopo ae ai ka hoopalau mawaena o Silia ame Mr. Kuene, ua hoolala o Silia e hoolimalima i kekahi mau rumi, maloko o kekahi hale e pili kokoke mai i ko Tiodora home, no kona hoi aku e noho malaila, ahiki i ko laua mareia ana; oiai ua manao o Silia, ua lawa kona noho ana, ma ke ano he malihini na kela kaikamahine lokomaikai, nolaila he pono iaia e hoi aku i wahi okoa e noho ai, malalo o na hoolilo o kana kane e mare aku ai.

            I ka wa i lohe ai o Tiodora i kela manao o Silia, ua ku-e loa oia, me ka olelo okoa ana mai:

            "Aole he kupono iki o kou hoi ana e Silia a noho hookahi maloko o kekahi rumi, me kekahi kauwa lawelawe i malihini loa ia oe, ma ke ano oia kou kokoolua e noho pu ai. He keu no hoi, e noho mai no kakou, a e lilo maua o Josepine i mau mea nana e kokua aku ma ka hoomakaukau ana i kou mau lako mare, no kela la ano nui, a ua ike no oe, he mea hauoli loa na na kaikamahine opio ka hana ana i na mea u'i apau e nani ai ka lole mare; a hoi no hoi, ina e haalele mai ana oe ia ia, alaila aole e e hoea hou mai ana o Mr. Kuene, e hoomauia aku ai ko lakou noho hauoli ana, elike me na la i hala aku nei."

            No keia mau hoakaka a Tiodora, ua noke ae la o Josepine ame Silia i ka akaaka, ahiki i ke kamailio hookolohe ana aku o Josepine: "Malia paha he makemake ko Silia e hoi i wahi kaawale e noho ai, o lilo auanei oe e Tiodora i mea hoohihia aku i ka noonoo o Mr. Kuene!"

            "Heaha auanei kana mea e hopohopo ai no'u, no ka mea ua hauhoaia kuu puuwai a paa malalo o ka mea okoa, e nana mai no hoi olua i keia komo hoopalau, ma kuu manamanalima nei, a oiai ke pii mau ae nei ko Habaki maikai i kela ame keia la, aole loa ana mau kumu e hopohopo ai, no ke komo hewa o kekahi mea ma kona ahupuaa."

            Ua loaa pono mai la o Josepine i na olelo a kona hoaloha, me kona kamailio hou ole aku, aka noke ae la nae o Silia i ka akaaka, alaila i aku la:

            "Ua hiki ole ia'u ke hoole aku i kau au'a e Tiodora: a ke ae aku nei au e noho no kakou, ahiki i ka lawe ana aku o Mr. Kuene ia'u no ko maua home hou. He oiaio, e mehameha ana au, i ka noho hookahi, ma kekahi wahi malihini; aka nae e ae ana au i kau au'a malalo o keia kumu wale no."

            "O, e hoike mai ia kumu, a mai huna aku oe." wahi a Tiodora, me ke pa'i ana ae i kona lima ma ka umauma. "Ina no oe e noi mai ana i ka hapaluao kuu aupuni, e haawi aku no au ia oe me ka minamina ole."

            "Owai no la ia mea nele ole o ke aloha ia oe e Tiodora, i kou piha lokomaikai maoli! Ua lilo oe i malamalama no keia home, a ua makaukau mau oe i na olelo kupono i na manawa apau e kamailio mai ai, no ka hoohauoli ana i ka manao," i pane aku ai o Silia, me ke kulou okoa ana aku imua, a honi aku la ia Tiodora. "Eia ke kumu e ae ai au e noho pu me olua, o ia no ko olua ae ana mai e lilo i mau kuaoao no'u, a o Gai Wakona ame Habaki Naika na kuaoao o Mr. Kuene!"

            "Ua pilikia kaua e Josepine ia'u, mamuli o ka'u mau hana pupuahulu," wahi a Tiodora me kona piha i ke kahaha, eia nae aohe ana mea e hoole aku ai i kela noi, o ka hooko wale no, alaila huli ae la ia Josepine a kamailio aku la: "Pehea oe o kaua, aole anei, o keia kekahi o na han amaikai ole a Silia? Mai kanalua iki oe e Josepine, e hooko aku kaua i keia noi a Silia, me ka manaolana e lilo ana ia, i mea no kakou e pomaikai like ai."

            Aohe a Josepine pane no kela mau olelo hoomakeaka a kona mau hoa, oiai no nae, ua maopopo no iaia, ke hookolohe mai la o Tiodora ame Silia iaia, e pili ana no Habaki Naika a o ia ka Silia o ka kamailio ana mai:

            "Mamuli o ka makaukau mau o kou mau lehelehe e Tiodora, i na olelo hookolohe, ua konoia mai au, e kuai i kekahi laka, a hoopaa i kela mau lehelehe, no ka mea ke hopohopo nei au, no kou kamailio mai i kekahi mau mea e hoehaehaia ai ka manao; aka ua hala aku la ia, ke makemake nei au e kokua mai olua ia'u, ma ko kakou nana ana ae i keia mau apana lole hoikeike, o ka hoounaia ana mai nei i keia kakahiaka," me ka wehe ana ae o ua o Silia he apana lole silika, he veleveka ame ke satina, o ka lulumi iho la no ia o ua mau wahine opio nei, no ka nana ana i kela mau apana lole hoikeike, me ko lakou hoakaka ana i @o lakou mau manao pakahi, no ka lole kupono e hanaia ai i lole mare.

            Ua hala okoa he mahina, ma ka hoomakaukau ana i na mea e pili ana i ka mare o Silia me Mr. Kuene, a i ka hoea ana mai i ka la, i hooholoia ai, no ka hoohui ana ia laua, ua haalele iho la ka paamare, i ka home o  Mr. Kelekolio, i ukaliia e ko laua mau hoaloha, maluna o na kaa, noloko o ka hale pule, kahi e hookoia ai ka mare.

            Ma na ano apau ke nana aku ma kela kakahiaka, me he mea la o Silia kekahi o na wahine hauoli loa, me ka maemae pu o kona mau ano apau, he wahine hoi i haawi pau aku i kona aloha oiaio, no ke kanaka ana i koho ai i kane nana; ua kahikoia oia me kekahi lole satina, aole no he nui o na mea hoonani i hanaia, eia nae he ku i ka u'i ke nana aku, a iloko o ka hora hookahi ,mahope iho o ko lakou haalele ana i ka home, aia hoi ua kau aku la he inoa hou maluna o Silia, o ia no ka Lede Kuene, i ka manawa a ke kahunapule i hooko mai ai i kana oihana mare, e hoolilo ana i ke kane ame ka wahine i hookahi iloko o ke apo kula o ka mare, a na ka make wale no e hookaawale ae ia laua.

            Ua hooko o Tiodora ame Josepine i ke noi a ko laua hoaloha, ma ka lilo ana i mau kuaoao, a oiai o Josepine ka mea loihi o laua, oia ka ukali aku mahope o Silia, a o Tiodora aku hoi ka hope loa; aia hoi o Gai Wakona me kona kulana kilakila o ke kanaka u'i, pela hoi me Habaki Naika, ua hoi hou mai kela ano kahiko o ke kanaka opio, aole kela kino ma'i, elike me na la aku i hala, a ma na ano apau ke nana aku i kela mau opio, ua kohukohu maoli no lakou apau, ina nei no ko laua mareia ma kela manawa hookahi me Silia ame Mr. Kuene.

            Ua hoea mua o Mr. Kuene no ka halepule, a e kakali mai ana o ka hoea aku o Silia ame kona mau hoa, a iaia i ike mai ai i ka wahine a kona puuwai i aloha ai, lamalama ae la kona mau papalina, me ka hopu ana mai i kona lima, a haawi aku la malalo o ka malu o Mr. Kelekolio, me ko lakou komo ana aku iloko o ka halepule, kahi a ke kahunapule ame kekahi poe makaikai e kakali mai ana, i ka paamare.

            He manawa pokole wale no ka ke kahunapule o ka lawelawe ana mai i ka oihana laa, o ka pau no ia, alaila kau hou mai la na mea apau maluna o na kaa, a huli hoi aku la no ka home o Mr. Kelekolio, kahi o kekahi paina i hoomakaukau mua ia, e kakali mai ana o ko lakou hoea aku.

            Ua hoohalaia he mau hora loihi e ka paamare opio ame ko laua mau hoaloha ma kela paina mare, alaila haalele aku la o Sr. Kuene ame ka Lede Kuene i na hoaloha ,no ko laua home me ko laua makemake ole e hoohala i na la mahina meli ma ke kaahele makaikai ana, aka e hoohala no laua i na la hikimua o ko laua hauoli, maloko o ko laua home.

            O kela home nani o Sr. Kuene, ma ka inoa ka Malo Paka, i hoohemahemaia no kekahi manawa loihi, a i lilo hoi, i wahi hoihoi ole na Sr. Kuene e noho ai, i kau a mea o ka mehameha, ua lilo ia i home nona e hauoli ai, no ka mea ua lilo kana wahine i mea nana e hoohoihoi aku iaia ma na ano apau; a he nani hoi ia, ua hoea aku la ka paamare hou no ko laua home, e haalele aku kakou ia laua e luakaha ana i ka nani o kela home, a e komo ana hoi iloko o na hauoli o ka noho mare ana, me na manaolana no ka ukali mau ia o ko laua mau la me kela haawina hauoli ahiki i ka hooluolu ana.

            O ka noho hoi ia o Mr. Kelekolio, ahiki i ka pau loa ana o na malihini i ka hoi no ko lakou mau home, hele aku la oia nowaho o ka lanai, no ke puhipaka ana, a no ka hoonanea ana no hoi; aia no o Tiodora ame Gai maloko o ka rumi hookipa kahi i hana ai i na makana a Silia e ahu mokaki ana, i wahoia malaila no ka makaikai ana a na malihini, aia hoi a kekahi manawa kaawale, alaila hookomoia iloko o na pahu, a hoouna aku i ka home o ka Lede Kuene.

(Aole i pau.)