Ka Oiaio, Volume VI, Number 28, 13 July 1894 — Page 3

Nupepa Ka Oiaio.

"O KA PONO KA AIALII E OLA AI KA AINA"

 

Ke Anaina Haipule Hoalohaloha.

NO KA

Peresidena Carnot o Farani.

_______________

Ma ka Luakini o Maliakamalu.

______________

       Ma ka Hora 9 A. M., Iulai 11, 1894, ua malamaia he anaina haipule hoalohaloha no ka Peresidena o Farani i make e ka Bihopa o Ponapoli. Malaila ae na Luna Aupuni o Beritania, Farani, Potugala, Italia, Geremania, Rusia, Denemaka, Holani, Auseturia, Sepania, Amerika, Kili, Kina, ect. Malaila pu  ao ke Kiaaina Cleghorn me ka Puuku Robertson o ka Moiwahine. Na wahi Kuhina P. G. elua.

       Na Kapena o na moku kaua Champion me Phildelphia, na Alii moku a me kekahi mau sela. I laila no hoi ka Peresidena o ka Hui Aloha Aina me ka Lunahoomalu o ke Komite Hooko o ka Hui Aloha Aina o na wahine.

       Malaila ae ka Bana Lahui kahi i hookani ai, me ka lehulehu o na hoaloha a me na poe makamaka.

       Ua kahikoia o loko o ka Luakini me na kanikau a malalo o kekahi Kuahupuoa, ua waihoia ka pahu kupapau me na kinohinohi o ke ano mau, a i hoopuniia me na kukui ihoiho ea ana. Ua lilo ka hapa nui o ka manawa ma na hana haipule maa mau a mahope loa, ua hoopuka mai la ka Bihopa ma ka olelo Enelani i kekahi mau manao pili no ka Peresidena o Farani.

NA OLELO KAUKAU A LA BIHOPA

       E kou mau hoaloha ano, ua akoakoa mai nei kakou maanei no ka hoike ana aku i ko kakou mau manao aloha no ka Peresidena o Farani i make.

       O ka Peresidena o Farani, he kanaka ia i mahalo ia a i aloha nui ia no hoi e ka Lahui Farani, a me na Lahui i noho hoaloha pu me ia; Aka ua pepehia oia a ua make ma ka lima o ka powa, ma ke kulanakauhale o Laiana maloko o Farani.

       Mamua o kona haalele ana aku i ka Hale Alii Neullie ma Parisa, ua honi hope aku oia i kana wahine a me na keiki elua; a haalele aku la ia lakou iloko o ka lokomaikai o ke Akua, a kau aku la maluna o ke kaa ahi a kamoe aku la no ke kulanakauihale o Laiana ma ka aoao hema o Farani.

       Iaia i hiki aku ai i Laiana, ua hui aku la oia me kana Kaikamahine me ka hunona a me ka moopuna, a teleagarapa aku la i ka ohana ma Parisia, no kona hui aloha ana me na keiki a me ka moopuna; a me ke ohohia nui o ka Lahui, no na hana hoohiwahiwa ma laiana. Aole i liuliu iho mahope iho, ua hiki hou aku la ke keleagrapa e hoike anku ana i ka ohana, ua kokoke make ia ka Peresidena.

       I ka Peresidena, e hooko ana i ka hana a kona Lahui i kono mai ai iaia aia hoi ua loaa mai la oia i ua ulia poino a na lima menemene ole o ka enemi i ohumu ai e hana ia maluna ona. Oiaio ua hookoia ka manao o ka mea powa a ua pepehiia oia a ua make aku hoi a ke kanikau nei ka Lahui o Farani nona.

       I ka wa i loaa aku ai ka lono make o ka Peresidena i kana wahine, e aahu ana no oia he mau aahu o ke kulana ola hauoli, ia wa ua eu ae la oia e hele me ia aahu no, kahi i waiho ai kana kane aloha ma Laiana ua hoole oia i ke koi mai a na makamaka, no ka wehe ana ae ia aahu: Meia aahu no oia, a hiki i kona wa i hiki aku ai i kahi e waiho ana kino wailua o kana kane ke kauhale o Laiana. Malaila oia kahi i noho ai no elua la me ke komo ole o kana ai, a me ka helelei ole hoi o na kuluwaimaka. (anoe no hoi.)

       Ua hiki nui mai na Teleagarapa mai na wahi a pau o ka aina: Ua hoouna mai la hoi ka wahine Victoria he Telegarapa hoalohaloha i ka wahine kanemake, pela no hoi na poo Aupuni a pau o Europa ko Amerika hoi a me na Lahui e ae; e haawi mai ana i ko lakou mau manao hoalohaloha kuhohonu no ka make ana o ka Peresidena, a no ka wahine hoi.

       E kuu mau hoaloha, e like me ka hoopuka ana a kekahi alakai o Farani i kona wa i hoopuniia ai e kona mau enemi, e kahea ana: "Ua mamao loa o Farani, a ua kiekie loa hoi ka Lahui" Ke olelo aku nei hoi au ia oukou. He oiaio no, ua mamao loa o Farani; aka, ua kokoke loa mai ka Lani.

       Ma ka Lani kakou e hoouna aku ai i ko kakou mau pule aloha i ke Akua, Nana e aloha mai ka wahine kane make a me na keiki makua ole.

       E na makamaka, aole aa e komisiua ia no keia hana, aka hoi, mamuli o kou ano he kanaka na Farani, ua hana au i keia; a ke pahola aku nei au i na hoomaikai ana o'u, a me kou Lahui ia oukou. Me ke aloha nui.

_________________________________

EIA KA KE KUMU.

_________________

       No ka olelo hooholo ka a ke Senate, e olelo ana aole e keakea ia mai na kanaka Hawaii ma ka lakou hana e pili ana i ka lakou aupuni i makemake ai, oia iho la ke kumu o keia aupuni e ku ai, a e paa ai. He mau olelo makani, palaualelo wale no keia, na ka poe hoohui-aina. He hoike ana manao wale no kela olelo hooholo na ka Aha Senate ia Peresidena Cleveland; he olelo ano nui ole ma kona ano iho, oiai he olelo mana ole no hoi; he kumu alakai wale no i ka Peresidena, e like me ka olelo hooholo a ka Hale Makaainana i hoapono ai, e apono ana i ka hoihoi hou ia o ke aupuni moi a me ka Moiwahine Liliuokalani.

       He nui ko makou akaaka i ka lohe aku i na olelo hooikaika alakai hewa a ka poe hoohui-aina e hele mai nei e ao ia makou. Aka, he ahuwale, a he koho kamalii ka manao a me ka olelo lalau hupo a keia poe. Ua hele mai e hoohaupu ia makou, aka, ua pouli nae lakou, oiai o ka ke Akua olelo hemolele ka makou ana, ka makou kumu hoonaauao, a ua ike no hoi makou, i ka oiaio a me ka pololei o ko makou kahua e ku nei.

_________________________

Mai Hahai i ke ao a ka Holomua.

___________

       Ma ka nupepa pula la Holomua haole o ka la 10 o Iulai nei; ua hoopuka ae ia nupepa i na mea elua a ka poe Aloha'lii e hana ai; oia hoi, he ala like mai, me na mea kaua a mea kaua ole paha, a e kipaku aku i ke aupuni; a i ole ia, e hui pu aku me ka Repubalika, a lawe i ka hoohiki ana.* * * *

       Ke hoike aku nei makou imua o ka Lahui Hawaii, akahi a hoea maoli ae la ka nupepa Holomua, e ao hewa loa ana ia oukou, e hana oukou i na hewa elua; oia hoi, e hele e hakaka me na lima i ke aupuni Repubalika, a i ole e ae aku e hoohiki no keia aupuni Repubalika. O ka oi keia o ka nupepa lapuwale loa.

       Ke hoike aku nei makou i na poe Aloha Alii, Aloha Aina, a Aloha Lahui, he mea pono loa ia oukou ke haalele loa i ka nupepa Holomua poholalo e hana maalea mai nei.

       Ke mahalo mai la no ka nupepa Advertiser i keia hana a ka Holomua, oiai, o lakou la no ia. Ke paani nei ka nupepa Holomua maluna o na kaula elua; ina e moku ana kekahi kaula, alaila, hookani no ma ke kaula i koe.

       Eia na kaula elua; oia ke Aupuni Moi, a me ke Aupuni Repubalika. Ke paani nei na ona o ka Holomua, oia o Wilisona ma maluna o keia mau kaula elua. I na haule loa ke aupuni Moi, alaila, paani no ma ke kaula o ke aupuni Repubalika! Kupanaha no keia mau hana a ka poe punahele i na 'Lii! Lapuwale no hoi ke ano o keia mau hana.

       UA OLELOIA.

__________

       Wahi a Waiamau, ke kahu akua Baala, ua aneane o Kaulukon e kakau inoa i ke Kumukanawai a e hoohiki ke Hooia aku nei makou i ka ike o ke Kaula o Baala, aole wale i aneane, aka, ua koakoa maoli no ia mea iloko o ka uhane, a o ka loaa wale no o ka wa kupono e wehe akea ia ae ai oia manao, oia wale no koe. Aka, ua oi aku ka pomaikai o ka lahui i ka ike i ka enemi koakoa mai loko a waho, mamua o ka mea e anehenehe ana i na wa a pau e kue mai i ka lahui. Ua oi aku ka waiwai o hookahi aloha-aina oiaio mamua o hookahi haneri aloha-aina piepiele loaa.

_______________________

E HOONOHONOHO IA ANA KA UPENA.

__________________

       Eia ke holo hio nei na lala o ka aoao hoohui-aina, no Hawaii, Maui, Molokai a me Kauai, e hoonohonoho i na papa nana e hoohiki i na Kanaka Hawaii, e puni ana. E like me ka makou olelo mau, he kulapa hope loa ana keia a lakou. Ma na hoao lima nui ana a ke aupuni P. G. e kukulu i kekahi hana, ua keakea mau ia ka mana aupuni noho manawa mai ka hana pono ana mamuli o ka hopohopo o  ike akea ia kona apono ole ia e ka lahuikanaka o Hawaii; nolaila, ua hana mau ia na hana e ka hapa nuku a waiho ia mai e puni aku ka lahui, ma na hana maalea, a komohia hewa aku e apono. Aka, aole kakou i puni a hiki wale i keia la, a aole no hoi he hiona loli ae o ka lahui. No keia mau hana kupaa, ua mahaloia no keia lahui, a ua akahi a hoike mai ko loko nei a me ko waho, he lahui naauao io maoli keia, oiai ua pahua na hana a ke kolohe i ka hoopono o ka lahui Hawaii, a he hoike ana hoi, he haipule oi aku ka mea i ao ia i ka olelo no ke Akua, mamua o na kahunapule nana i lawe mai ka olelo hemolele.

____________________

He Hopohopo Wale

___________

      No ka piha hopohopo o ka poe hana hewa i ka hopena o ka lakou hana nolaila, ua hoopuniia lakou e na kiai a me na kiu e kiai ana i ka po ma kahi noho a e kaukolo ana i ke ao ma kahi e hele ai. O ka hua iho la no keia o na hana a ke kanaka: e like me kau e kanu ai pela no e hua mai ai a he olelo oiaio loa keia a oia iho la no ka hua a ka poe hana hewa e ike nei i keia la. E like me ko kakou hoowahawaha ana i ka nani a me ka pololei o ka ke Akua mau kuhikuhi ana i na kanaka i ke alanui o ke ola a me ka maluhia pela no lakou e kuia ai mamuli o ko kakou makemake a o ka hopena he poino, he pilikia, he uluaoa, he luku aku luku mai. Pela i ulu mai ai ke kumu o na poino o kakou e koho nei i keia la. Ua hoomaka mai kekahi poe e @@@@ me kakou he mau kumu-ao ka olelo ana a he oiaio ua ao no, iloko nae o keia ao ana e ulu mau ana na hana hoowalewale a ane-Karisto iloko o ko lakou naau i kela a me keia wa a na kumu ao e palaka ai a pela iho la i ulu ai na anoano o ka hewa iloko o lakou i puka a maka maoli ae iloko o na mamo a lakou a hiki i ke kuakolu e ola nei. He kuko ka mua o na hewa a pau a no ke ano ole oia mea he kuko i ko kakou noonoo ana ua hoomaloka kakou i ka olelo ao a ka Makua Lani ua hoolilo i mea uuku, a o ka hope oia no ka aai ana o ka ka Hewa mau hana iloko o ko ke kanaka naau me kona hoomaopopo ole i ka hewa e ulu ana iloko ona, a i ka wa i puni ai o ke kino a me ka uhane i ka hewa alaila e kuhihewa maoli ana no ke kanaka he pono kana mau hana hewa i hana ai. Pela ka mamo kuakahi a hiki i ke kuakolu a na misionari e hana nei, ua kuhihewa maoli no he pono ka aihue-aina, he pono ka hoohaunaele ana, ka hookahuli ana i ke aupuni ma na hana kipi ka ohumu ka pepehi kanaka, a pela aku.

       O keia mau mea a pau loa oia ka hua o ke kuko iloko o na makua e hua nei i keia wa ma o ko lakou mau keiki aku: a o ka hopena oia mau hana hewa ana he makau wale mai no me he la e ike a e kuko ana ko lakou lunaikehala e uhai ia ana lakou e ka poino a me ka make. O keia ke kumu e kiai ia ai o na mamo misionari e noho nei. Aole no ke aloha ia no na hana maikai a me na hana pono aka no ka hopo wale mai no mamuli o na hoalaala mau a ka lakou mau hana ia lakou. Ua oleloia mai makou ke hele ae kekahi, he hele pu me ka ukali kiu aneane lakou e lapu ia e ko lakou mau aka@@e hoopuohoia e na moe ino, e hoohiaa i ia e na kuko a ma na hana a lakou hana ai.

__________________

KA OIAIO.

____________

       Ua ninau maoli ia aku o Kuhina Willis, e kekahi luna aupuni kiekie oke aupuni moi, penei: O ka Olelo Hooholo a ka Aha Senate, oia anei ka pane hope loa a America, ia Hawaii? Ua pane mai oia, "Aole!" Nolaila o ka paipai a ka Holomua haole e kaua a i ole e kakoo aku i ke aupuni a ka hapa uuku a na malihini i kukulu ae nei o ia ka pono, he olelo ia na ka poe naau po kole a i alakai hewa ia e na uhane ino, a me na kuko lapuwale.

________________

Nui ka Hauoli.

_________

       He mea nui ko makou lohe ana i ka manao kupaa o ka lahui, mahope o ko lakou manao aloha aina. He mea inaina loa no lakou ka hoohali ia aku no ka hoohoi aina, ke aupuni hou ae, a pela aku. E aho e make e mamua o ka ae ana aku i .. mea e hoani ae ai i ko lakou aloha aina. Ua kunia-paa ia keia iloko o ka lahui. Ua hae ia mai o Alapaki e na kanaka i ka Makeke Kuai Ia, iaia i hoino aku ai i ko ka lahui alakai, a ua awiwi maoli ae oia e haalele ia wahi. Me he la, ua like na mamo a na misionari me Kaina, ua hoailona ia i ka maka o na Hawaii. E like me ka ke Akua i ai ai, ina kakou e hoolohe i kana olelo, e naauao no kakou, e like me kana olelo: E haawi aku ai i waha no oukou a me ke akamai, aole hiki i ko oukou poe enemi ke hoopohala, aole hoi ke pale. A e kumakaia ia'ku no hoi oukou e na makuka (misionari), a me na hoahanau (o na hoomana) a me na haumana (Iosepa, Kauhane ma), a me na makamaka, (oia ko Walakahauki ma ano); a e pepehi mai lakou i kekahi poe o oukou a make. A e iaina ia mai oukou e ka poe (hana hewa) a pau, no ko'u inoa, (Ka Pono). Aka, aole hoi e lilo ke oho hookahi o ko oukou poo. Ma ke ahonui e malama ai oukou i ko oukou uhane. A i ka wa e ike ai oukou i ko Ierusalema (ka poe hana hewa) e hoopuni ia e na Kaua, alaila, e ike oukou ua kokoke mai kona (ko ka poe hewa) neoneo ana. Alaila o ka poe ma (ka Aina) Iudea e hookaawale aku ma na mauna; a o ka poe iloko (o kana mau hana hewa) e holo lakou mawaho; a o ka poe mawaho (ma na kuaaina) aole e komo aku iloko ona (aole hoi e huipu me ka poe hana hewa). No ka mea o na la ia e hoopaiia ai a e ko ai hoi na mea a pau i palapala ia, (ke kokoke mai nei ka hilahila ia lakou no ke kue i ka Pono).

       He mau olelo keia na ke Keiki Ponoi a ke Akua i kana mau haumana, ia lakou i ui mai ai iaia i ka hopena o ka nani o Ierusalema a me kona hiki hou ana mai a me ka hopena o na mea a pau. E like me ka hohonu a me ka laula o ke ano o ka naauao o ka ke Akua olelo, pela i hiki ai kona pili i na ano a pau o keia poepoe honua a me na mea a pau maluna iho ona. He ao ka ke Akua olelo, e kuhikuhi ana i ka kakou mau hana e pakele ai, a me ka hopena poino e loohia ana ke hooko ole ia. Ua hoohalike ia o Ierusalema me kekahi home no ka hewa, mahope o ko ia kulanakauhale hoole ana i ke 'lii o ka Pono. Ua hoowahawaha na Kahunapule ia Karisto ia wa, pela no na Kahunapule o kela mau la. Ke malama nei lakou i ka ke 'lii o ka Hewa ma kahi o ka ke 'lii o ka Pono. Ke luku n i na misionari i ka poe he wa ole, a ke inaina nei i ka poe pono i kuhikuhi aku i ka lakou mau hana hewa; ke @au nei ko lakou ku'i, aka wahi a ke Alii o ka Pono a me ke Aloha, "e ahonui a e kaohi i ko oukou mau uhane." No ka mea wahi a ke Akua, aole oia e poina i kekahi oho o ko ka poe aloha a hoopono, aka, e haule no lakou i ka pahikaua a lakou i kukulu ai, oia hoi e haulehia ana no lakou mamuli o ka lakou mau hana hewa. Kulu iho hoi ko ka Haku waimaka no ka poe hana hewa, a i iho la oia, ua ake aku au e hoopunana ia oukou me na kahiko o ka pono e maluhia a e pumehana ai oukou, aole nae oukou i apo mai i ko'u aloha. Pela no na misionari maanei, a me na wahi e aku, na keia Baala maopopo.

_________________

Ua Hiki Imua o ka Aha Senate

_________

       Ke hooiaio mai nei no ka Holomua ua hoike ia aku ka olelo ia Kuhina Gresham, mai a Kuhina Willis aku, e pili ana i ka palapala kue a ka Hui Hawaii Aloha Aina i ka hana kumukanawai a ke aupuni Noho Manawa. Ua hooko o Mr. Willis i ka mea hiki ia ia, a ua hoike aku oia i ke ano o ka mea i waiho ia aku e ka Hui Hawaii Aloha Aina, ia ia ponoi ma kona ano he Kuhina a Elele Nui no ke Aupuni Amerika ma Hawaii nei. Ua loaa aku kana palapala i ke Kuhina Gresham e hoike ana i keia kue ia o na hana a ke aupuni Noho Manawa, a e like me kana i olelo mai ai, oiai ma kona inoa oihana ua palapala kue la i waiho ia aku ai i kumu e loloiahili ole ai ka ike ana o ko Amerika Mana Aupuni Hooko e noho ana ma Hawaii nei, "e hoike aku ana no a'u i kou aupuni i ko oukou manao kue ma ke alanui hiki ia'u."

       Ua hooko oia i kana hana, a ua waiho loa aku o Kuhina Gresham i ka Peresidena i keia hoike a Kuhina Willis a na ka Peresidena i waiho loa aku imua o ka Aha Senate.

       Nolaila, ua hiki loa aku imua o ka Aha Senate, ka leta a Kuhina Willis o ka la 10 o Mei, a ma kahi e olelo ana no ka Hui Hawaii Aloha Aina penei kana olelo: Ma ka la 10 iho la (Mei) ua waiho mai kekahi mau hoa o ka Hui Hawaii Aloha Aina, o Hon J. E. Bush a me Hon. J. Nawahi kekahi iwaena o lakou, i kekahi palapala ia'u a maloko oia palapala ka League e kue ana i ka hana a ke Aupuni Noho Manawa e kahae ana i kekahi Aha Elele Kumukanawai kekahi hana hoi i kapae ia ai na Hawaii maoli i koe aku malalo o kekahi olelo hoohiki hoohaiki a e olelo pu ana hoi he hana ua hana la e wawahi ana i ka hana oluolu i ke aupuni o Amerika Huipuia a he hana kue hoi i ko lakou (P.G.) mana aupuni noho manawa. Ua wehewehe aku au ia lakou aia hoi ka ninau Hawaii imau o ka Ahaolelo, a aole hoi e hiki iau ke lawe mai a hoouna aku i na olelo hooholo o na Aha Hui Kalaiaina, koe wale no ma ke ano o na moolelo e hana maoli ia ana. A no ia mea aole au e hoouna aku ana i kekahi kope o ka leta. Kakauia, Albert S. Willis.

       Ma keia kakou e ike ai, (1) Ua lawe aku o Mr. Willis i ka palapala kue a ka Hui Hawaii Aloha Aina mahope iho o kona hoao ana e papa mai malalo o kekahi kumu ana i manao ai he kupono, oia hoi ua papa ia mai oia aole e hoouna hou aku i kekahi mau olelo hoike e pili ana i ka ninau Hawaii. Ma ka ke Komite wehewehe ana ua lawe aku nae oia me ka olelo mai e hoike aku ana no oia i kona aupuni ma ke ano mawaho o ke ano oihana, aole nae ia mea i ke Komite, me ia no ia. Ua ko ka ke Komite, e lawe oia, a ua lawe aku.

       (2.) Ua hoike aku oia ia Kuhina Gresham i ke ano a me ka manao o ua palapala la he hoopii kue ma ka leta o ka la 10 o Mei, 1894.

       (3.) Ua waiho loa ia aku ua leta la e hoike ana i he kue o ka lahui Hawaii ma o ka Hui Hawaii Aloha Aina, imua o ka Aha Senta, mamuli o ko Peresidena Cleveland ike ana keia mea hou e pili ana i ka manao o ka Lahui ma ka ninau Hawaii imua o ka Senate, a e hoike ana no hoi ko Mr. Willis alalai kumu ole, a me kona lauwili, aka me ka puka pule lo kino ana no nae imua o na wahi ana paha i makemake ole ai, e like me ka ka Holomua, imua o Peresidena Cleveland, a maia ia aku a imua o ka Senate.

       E ike hoi kakou ma ka pokole.

       (1.)  Ua papa ia o Kuhina Willis, wahi ana, aole e hoike hou aku no ua mea e pili ana i na mea i hala ma ke kulana o ka ninau Hawaii i waiho ia aku imua  o Peresidena Cleveland aole nae no na hana e ae e hana ia a na mawaho ae o ke kulana mua o ka ninau Hawaii.  Aka, ma kona kuhihewa paha, a aloha pili-ili, ua hoao oia e pale i na mea a pau e waiho ia aku ana imua ona ma ka aoao o ka Lahui Hawaii, oiai ke ike pu iho la no kakou ua komo loa aku la ka leta hoohunahuna ana i ke kue o ka Lahui Hawaii, me ka maholehole imua o ka Aha Senate, aka ua like nae ia mau huaolelo uuku imua o ke Senate me he poka pahu la. Ua kapae malu aku keia ia Kuhina Gresham, aka ua kuu akea ia aku hoi e Peresidena Cleveland he hana pili aupuni imua o ka Aha Senat o Amerika Huipuia.

       Pehea hoi oe e Holomua lolelua, e hahai la i ka manao hoole a ka aoao kue i ka pono o ka Lahui Hawaii au e olelo nei me ka aahu hookamani he aloha oe.

       O ka Palapala Hoopii kue a ka Hui Hawaii Aloha Aina ia Kuhina Willis, ua lawe ia aku mai ke Komite, o kona ano nui i waiho ia aku e ia ia Gresham, ka io, ka manao o ua palapala hoopii la a ka Lahui Hawaii, ua hoouna loa ia aku oia imua o ka Aha Senate e Peresidena Cleveland, a aia oia malaila kahi i aai a lapalapa ai, ae hoole opukeemoa wale no ka naau hoopili repubalika o ka Holomua aole e nalo ka mea i hana ia no ka pono a me ke ola o ka lahui kulaiwi o Hawaii! Aloha no ka Holomua Holokee.

___________________________

Alapaki Ma.

__________________

       Ma ke awakea Poakahi nei, ua hiki aku la o Alapaki Kauaka ma ka Makeke a ua ike aku la oia i kekahi Hawaii e heluhelu ana i kekahi nupepa; a ninau aku la: O ka nupepa hea keia au e heluhelu nei?

       Ua pane ia mai la oia, o ka nupepa KA LEO O KA LAHUI. Hapai koke aela o Alapaki Kauka i kona lima a pani ae la i kona maka me ka olelo ana mai, e pani i ka maka He nupepa ino kena, he lapuwale, he hoopunipuni. A wahi hou ana, nui ka huliamahi o na kanaka o na Mokupuni o Hawaii a me Maui, mahope o  ke Aupuni Repubalika.

       E Alapaki Kauka, ua kapa mai oe ia makou he hoopunipuni, a o ka makou nae e ike nei o oe ka hoopunipuni nui, i ko olelo ana aku imua o ke la poe kanaka i ka huliamahi o na kanaka o ka mokupuni o Maui a me Hawaii mahope o ke aupuni ou e pookoi nei. Ma na leta i loaa mai ia makou he kakaikahi loa ka poe Hawaii i hoohiki o na kkuaaina, a oia poe, o ka poe hoohui aina no i kokua ai ia oukou ma ia kumu hana a oukou a haulepahu: a o oe no hoi ke ike pono nei i keia mau la ma Honolulu nei i ke kakaikahi loa o ka poe Hawaii e hele aku nei imua o oukou e hoohiki ai, a o ka poe wale no nae e noho nei ma na oihana aupuni.

       Ke waiho nei makou i keia imua o ke akea, i ike mai ai ka lehulehu holookoa i kou hoopunipuni.

       "O ka mea lawe i ka pahi-kaua e make no oia i ka pahi-kaua." Pela makou e h@ihoi hou aku nei i kau mea i kapa mai ai ia makou i ka hoopunipuni, a kau no maluna o kou hokua e Alapaki Kauka.

___________________

UA HALA, UA NALO, UA MOE AKULA, I KA MOE KAPU O NIOLOPUA.

_______________________________ 

       I ka la 28 o June i hale aku la i kuu mai ai i keia ola ana o S. Kaulu pali i kona hanu ana i ua ea oluolu o keia ola ana a niau aku la no kahi mau o na mea a pau, e hoi ka lepo i ka lepono ka wa mau loa.

       A he mau la kona i kani koo a ua aneane o 90 ko nui a kona mau makahiki, he kupa, a he kamaaina oia no Puna Paiaala i ka hala.

       Ua haalele iho oia i kona hoapili he wahine, na keiki, na moopuna, na hoaloha, a me na makamaka @@ aku nona ma keia kae o ka lua kupapau.

       E Puna paia ala i ka hala a me ka lehua e ua hala aku la o S. Kaulupali, ke kamaaina heahea o ka Hikina o ka la.

       Ause! luuluu ino, ia lala o ka Hui Aloha Aina ou e Hawaii Ponoi.

       He mahu ke ola o ke kanaka i pua a ae, a nalo aku la e ka ohana o ka mea i hala akula, e hoomaha ia oukou a pau ma o ka Haku ala nana i haawi mai, a nana no i lawe aku e hoomaikai ia ka inoa o ka Haku.

AHAHANA! KU AKU LA KA'U LAAU I KA AAMA KULENALENA---KE HOLU ALA I KA OPI MAHAMAHA.

___________________________

       E ka hoa, "pau paha auanei Peapea la i ke ahi." e hookoe aku nae hoi au i ou mau hulu i ka mahamaha, i mea e ike ia ai. "He poo maunu oe na'u i ai a kau iluna o ka laau."

       Aole anei o oe ka huelo loa o ka poe i hoohiki o ka apana o Waialua nei mamua koke iho o ke pani ia ana o ka Pahu Balota ma ka hora 5 P. M. o ka la 2 o Mei, 1894? Aole e hiki ia oe a me kou mau aumakua unihipili ke hoole mai i ka oiaio oia hoolaha ana i pili ia oe. I na he kanaka naauao maikai oe, heaha kou mea i hoohikiia ai ma kuono o ka Hale Hookolokolo o Waialua nei kahi kupono ole ia oe e hoohikiia ai? No kou hilahila anei? I na pela, ua pololei no kou hoolaha ia ana i ka hohe wale. I na he kulana keonimana maikai kou, no keaha oe i hele ai e hoohiki iloko o na la elua i noho ai ka papa nana koho balota ma ka Halekula, a pela no hoi ma ka Hale Wiliko? Ua oi aku ke kulana hanohano o ko Mokumaia hoohikiia ana mamua o kou, no ka mea ua hoohiki ia oe e Alfred Kaili ma ke kulana haahaa loa, me na huaolelo pihoihoi mai kou waha ponoi ae, e i ana. E wiki mai hoi oe! E wiki mai hoi oe! Ke hooia mai nei oe, aole o i koho balota ma ia la, a ua loaa io hoi ia oe na kulana oihana hooia palapala kepa a me Noteri no ka lehulehu, a oia ka uku o kou h ohiki pupuahuluia ana. Heaha ia ia oe? He ake oihana maopopo ia ou. Ke hooiaio mai nei kau mau olelo no ko Edgar Halstead hele ana aku e noi ia oe e lawe i ka hana "Agena Hooiaio Palapala" a me "Hooiaio Aelike Paahana," a oiai no na kulana oihana a ke keonimana aloha aina i makemake ole ai e paa me ka lawe pu i ka hoohiki kumakaia i ko ka Moiwahine a me kona aina hanau, au no hoi i lohe popono ai ko poo, kahi i ku ai ou mau eeiao i ka hoole ana o ua keonimana la, aole e hooki maloko o ka Hale Amara o P. C. Lane, a mahope koke iho no oia wa au i lohe ai, o ka wa no ia i hele ai e hoohiki, a pela iho la i lilo ai ua mau oihana la ia oe. Heaha ia ou? He ake oihana e like me ka'u i hoolaha ai nou. O wau kai hele e noi i ke kahunapule Rev. E. S. Timoteo e kakau inoa malalo o kau palapala noi Lunakanawai hou.

       O oe no, aole mea e ae. Ke hoomanao nei au i kou koho ia ana i Elele no ka Ekalesia o Waialua nei e hele i kekahi Ahahui, a hoole ai oe, au hoi i olelo ai, i ka hookikina aku ia oe, o lawe ia kau wahi apana palaoa (oihana). Aole nae i paa iho ua oihana la ia oe mamuli o kou noho ana me kou hilinai ia ana. Ua puehu aku la hoi i ka ununu a ka waahia. "Heaha ia ia oe la? He ake oihana, a he minamina oihana: Nolaila ma nau ano apau o ke ake oihana, ua kahinu ia oe mai ka piko o ko poo a hiki i ka manea ou mau wawae me ia mau hualelo o ka hilahila, aka, o Makee Alii a me Aloha Aina, oia mau no oia i ke alo pali. E ke hoa eena aku la paha ke kolopa i ka lihi kai o @hele. E kilahao ana i ka nuku o ka manu. Ke ae pololei mai nei oe, ua hai olelo aku oe maloko o ka Luakini o Liliuokalani ma ka la 2 o Sept. 1893, oia hoi ka la hanau o ka Moiwahine, kai no paha, aole oe i hai olelo ma ia la. A no ka mea, he hoohui aina oe mamua, a ua ike ia kou ribine hoohui aina maloko o ka halepule i kekahi manawa e kula Sabati ana mamua aku, a i kou wa i hoopauia mai ia ka oihana Lunakanawai ae a me ka haule walawala ana o ka'u palapala noi Lunakanawai hou no laila ua nuha oe a hookeekee oe, a haalele oe i ua aoao la, kahi aina mua la ou, a huli ae oe a komo pu, ae oe a hele pu ae oe i ka pu@e-Aloha Alii a Aloha Aina o Waialua nei. A ma ka la 2 o Mei, 1894, ua hoihoi oe ma ua aoao kalaiaina mua la ou me he muhee la. O ka lehulehu o Waialua nei ka hoike no ka oiaio oia mau mea a pau, a pela i kapaia ai oe. He ohi lua wale i ka makani a he ilio e hoi hou ana e ai i kona luai. Pehea la ia e ka hoa, ua pili pono paha la i Papaenaena ea. Ua pili aole akamai nana e hoole mai, ua kakia aku la ke kuinao a ke akamai. Ke hoole mai nei oe, aole na ka Hui Aloha Aina o Waialua nei, ua halawai la.

       Hole Samoka! Hole S@@ser!! ke hai aku nei au ia oe i ka mea oiaio na ka Hui Aloha Aina o Waialua nei i hoolale e malama i ua la la i la Hoalohaloha i ke Akua ma na manawa ekolu, oia hoi ma ka hora 6 a. m. hora 11 a. m. a me ka hora 6 p. m.    Aole i pau.

___________________

       He keu ke ku @@ole launaole o na alakai o ke Aupuni Pikake, a niha, a lohe ia mai la ka nuhou ma ka mokuahi Aus teralia o ka la apopo ua pau holookoa ka pono nou e Hawaii Ponoi, waiho a ma maoli lakou nei, a o ka pupule aku ka hop@ aloha i no no kahi hoi, auwe! nuinui pilikia no.