Ka Oiaio, Volume I, Number 67, 3 April 1896 — Page 2

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

KA OIAIO PUKA LA.

 

JOHN E. BUSH, Luna Hooponopono a me Puuku

 

HONOLULU, : : APERILA, 3, 1896

 

NA AINA AUPUNI.

            Malalo o ke aupuni Repubalika o Hawaii e ku nei i keia wa ua hoihoi ia ae na aina leialii a ua hoohuiia he hookahi me na aina e ae o ke aupuni, a na kapaia hoi na aina aupuni. Eia i keia manawa, keia mau aina a pau ma ka hooponopono ana a kekahi Komisina i hookohuia malalo o ke kanawai no ia hana. Ke ku nei keia Komisina i keia la a eia hoi na hoa oia Komisina ke hooponopono nei i na mea e pili ana i ke ano o ka lakou mau hana e like me ke ano o na kanawai. Ka imi ana i na aina a pau e noho ona ole ia ana e kekahi mea, ka hoolimalima ana, ke kuai ana a me ka mahelehele ana i na aina i ike ia he mau aina kupono e lilo i mau home no ka poe i nele i ka aina home no lakou iho. Ua hoolala ia keia manao e Mr. S.B. Dole ia ia he hoa no ka Ahaolelo o kekahi kau malalo o ke aupuni moi.

            Me he la o kana mea nui ia, i hooikaika ai no ka pomaikai o ka lehulehu ka poe nele. Ua hoomau oia i keia manao ona, a hiki i kona lilo ana i kanawai, iloko o ka nui o na hoomaloka o na hoaloha a me na hoaluna-makaainana.

            Aka, aole nae oia i haalele a hiki wale i ke ko ana, a hiki no i keia wa eia no oia ke hooikaika nei e hooholo mua i kona manao aloha hoakanaka, hoolaukanaka, a hookuonoono i ka poe nele. Malalo o kana kanawai a me na hoololi i ku ai keia Komisina Aina Aupuni.

            I keia manawa na hoao ke Komisina e hooko i ka lakou hana me ke akahele loa, i mea e poino hou ole ai ka lahui, e like me ia malalo o ka hoopomaikai i mana oia no ka lehulehu malalo o na palapala hoona kuleana i ke au o ka noho moi o Kauikeaouli. Ke ana nei lakou i na apana aina iloko o na mahele kupono no ke kanaka a me kona ohana e ola ai. Ua hoohamama ia ka i puka o keia pono nui, he aina loaa wale i na Hawaii mamua o na lahui e ae a pau a mahope mai ko waho. Ke lawe nei kekahi poe Hawaii i keia pomaikai, a me kekahi o na haole a me na lahui e ae. Aka, o ka nui no nae o ka poe i hoomaopopo i ka pono i hoohamamaia malalo o ke kanawai, o na lahui kanaka no ia o na aina e, ka poe i ike i ka waiwai o keia mea, he honua e kohu ai ka i ae he aloha aina ko ke kanaka no kona aina hanau.

            Mamuli o keia kanawai ua haawiia ka mana e hoolaha ia kau na aina i ka poe makemake e hookuleana no lakou iho, malalo o na kumu e hiki ole ai ke hooliloia aku i kumu hoopukapuka e ka poe mea dala. Oia hoi, ua ae ia ka aina i ka poe aina ole a nona paha he wahi aina wai malalo o hookahi eka ma ona iho, ma o ke kane a ma o ka wahine paha, ma kekahi wahi e aku o ka paeaina, e noho ia no eono makahiki mamuli o kekahi palapala noi a ina e hooko ponoia na kumu malalo o ke kanawai alaila, e loaa no i ka mea noi, he palapala hoolimalima no 999 makahiki. Ua hoike piha ia na kumu o ka palapala hoopii noi a me ke kulana o ka paa ia ana o ka aina malalo o na pauku 31-54, o ke Kanawai Aina 1895.

 

KELA ME KEIA.

            He mau la makani keia o kakou e kaa hele nei.

            Ua hoohiki aku o H. Pinao.

            E bapetizoia ana ka Moiwahine me ka Hoomana Enelani.

            Mai poina e na hoa'loha i ke kipa ana ae ma ka halekuai o N.S. Sach.

            Mai poina i na kuai hoemi ma kahi o B.F. Ehlers (Bainaba).

            Mai poina i ka hele ae ma ka halekuai o Kerr, e kuai ai i mau lako no ke kino, oia i he emi na mea kuai ma ia halekuai.

            E kuai kudala ia aku ana ka pahale o Gertz, mahope iho o Kawaiaa@o e W.S. Luce.

            Akahi no a uku ia ka auhau o ka waiwai o ka Wahine kane make, Mrs. Youmans, he $7,697.85, a he $555. Ola ka waihona.

            He aha hoolaulea kai malama ia ma ka luakini o Mekthodist ma alanui Beritania a me Miller.

            Hoopai ia o Nao a me Koma no ka aihue. He mau keiki opio, he 2 makahiki o ka mua a he ekolu mahina o ka lua.

            I keia la i hue pau aku ai ka mokuahi Kinau no kona mau awa mau.

            He aha mele ke malama ia ana e ka hui Y.M.C.A i keia Poalua ae.

            He okana hou ke houna ia mai ana no ka Halekula o ka Punahou ia keia mau pule ae.

            He keakalio ke malama ia ana i ka auwina la o ka Poaono ae nei.

            I keia la e holo aku ai ka mokuahi Ke Au Hou no kona mau awa.

            I keia la e ku mai ai ka mokuahi Makee mai Kauai mai, me na ukana oia mau awa mai.

            Aohe hana aupuni o keia o la, no ka hoomanao ana i ka Poalima maikai.

            I ka ponei i ku mai ai ka mokuahi Kauai mai Kauai mai.

            Ua hoole loa ia ka palapala hoopiiaa na Pukiki, e pili ana i ke komo hou ana, mai o na limahana o na aina me ia.