Ka Oiaio, Volume I, Number 71, 9 April 1896 — Page 1

Ka Oiaio/Ka Oiaio Puka La/

Hoopukaia i na la a pau koe ka la Sabati a me Lapule no 30 keneta o ka mahina.

 

OIAIO PUKA LA

NA

K@eh@a io Karisto La.

oo

HAKUIA E MRS E G. WHITE.

KA ULU ANA AE ILOKO O KARISTO.

(Hoomau ia).

            O ka hapa nui o ka hana a ko kakou Hoola ma ka hale kamana o Nazareta, e hoomanawanui ana ma ka hana. Ua kokua na anela ia ia oiai e hele pu ana me kanaka haahaa a me na kana ka hana, me ka ike'a ole ia a me ka hoohanohano ole ia. Ua like kona pono i kona hooikaika ma kona hana haahaa me ka wa ana i hoola ia i ka poe ma'i ma o Galilaia. Pela no ma na hana haahaa loa a ma na wahi kiekie ole, ua hiki no ia kakou e hele pu a hana pu me Iesu.

            Ke olelo mai nei ka lunaolelo: "E na hoahanau, e noho no kela kanaka keia kanaka me ke Akua, ma ka mea ana i hea mai ai." Kor. 7:24. Ua hiki no i ke kanaka hana e hoonani aku i kona Haku ma kona 1 hana no kona kupaa ma ka pono. Ina he haumana oiaio no Karisto, e hui pu no ia i kona ano haipule ma na mea a pau ana e hana ai, a hoike aku i ke ano o Karisto. E hiki no i ke kanaka hana lima me ka hoomanawanui a me ka malama pono e lilo i mea hoike no ka mea i hana me ka haahaa ma na puu o Galilaia. He pono i kela a me keia mea e hana i ike mai na mea e i kona mau hana maikai, a hoonani aku i ko lakou mea nana i hana a me ka Hoola.

            He nui na mea i hoola i ka haawi ana i ko lakou mau haawina no ko Karisto hana, no ka mea ua oi aku na haawina a me na pono o kekahi poe e ae. Ua manaoia he pono i na mea akamai kupono wale no e hoolaa i ko lakou ikaika no ka hana a ke Akua. Ua manaoia ua haawiia na talena i kekahi hapa i alohaia wale no, ua kapaeia ke koena mai ka hana a me ka ohi ana i na hua o ka hana.

            Aole nae pela ka hoike ana ma ka olelo nane. I ke kahea ana o ka Haku i kona mau kauwa, ua haawi aku oia i kela kanaka i keia kanaka i kona hana.

            Me ka manao aloha e hiki ai ia kakou e hana i na hana haahaa "me he mea la, no ka Haku, aole hoi no kanaka." 1 Kol, 3:23. I na o ke aloha o ke Akua ma ka naau, e hoikeia no ma ka noho ana. E hoopuniia kakou e ka mea ala maikai o Karisto, a e lilo ko kakou mana i mea e hapaia ae a e hoopomaikai.

            Aohe he pono ia oe ke kali no na hana nui a me na talena oi aku mamua o kou hana ana no ke Akua, mai manao i ka olelo o ko ke ao nei.

            I na ua hoike aku kou hana i kela a me keia la no kou ano maemae a me ka oiaio o kou manaoio, a ua maopopo ia hai kou hooikaika ana e hoopomaikai aku ia lakou, aole no e ltlo kou hana i mea ole.

            E hiki no i na haumana haahaa a ilihune loa a Iesu e lilo i mea e hoopomaikaiia hai. Aole paha e maopopo ia lakou na mea maikai a lakou e hana ai, aka e lilo ko lakou mana i ike ole ai e lakou iho, i mea e hoomahuahua ae ai i na pomaikai a laula ae a hohonu ae, aole hoi e ike ia na hope pomaikai a hiki aku i ka la hope loa. Aole lakou i manao aole hoi i hoomaopopoia ka nui o ko lakou hana.

            Aole he waiwai ke hookaumaha lakou ia lakou iho no ka hua o ko lakou hana. Eia wale no ko lakou pono e hele imua me ka malie, e hooikaika ana ma ka hana a ke Akua i haawi mai ai alaila aole e lilo ko lakou ola i mea ole. E ulu ae ko lakou mau uhane ponoi a mahuahua ka like ana me ko Karisto ano; he poe e hana pu ana me ke Akua ma keia ola ana, a @ e hoomakaukau ana no ka hana iluna'e ao ka olioli kina ole o ke ao pau ole.

KA IKE ANA I KE AKUA.

            He nui na ano o ko ke Akua imi ana e hoike mai ai ia ia iho io kakou nei a hoohui pu i ko kakou noho ana me ia. Ke kamailio mai nei na mea o keia ao i ko kakou ano maoli me na leo oki ole. E hoomaopopo no ka naau hamama i ke aloha a me ka nani o ke Akua iloko o na mea ana i hana ai. E lohe ka pepeia o hoolohe a e hoomaopopo na mea a ke Akua i hoike ai ma na mea o ke ao nei. Ke kamailio mai nei i ko kakou mau naau na kula uliuli, na laau kiekie na opuu a me na pua, na ao e lele nei, ka ua e haule ana, ka halulu ana o na kahawai, ka nani o na lani, ke kono mai nei lakou ia kakou e ike aku i ka Mea nana i hana ia lakou a pau.

            Ua opeope pu ko kakou Hoola i na haawina ao makamae me na mea o keia ao. Ua hui pu ia na olelo o ka oiaio me na laau, na manu na pua o ke kahawai, na puu, ka moanawai, na lani nani, me na mea e ae e puni ana, i mea e hoomanao mau ai kakou i kona mau ao ana oiai e hoikaika ana ke kanaka ma na hana kaumana o keia ola ana.

            Ke makemake nei ke Akua ia kakou e hoomaopopo i kana mau hana, a hauoli ma na mea nani ana i hookahiko ai i ko kakau home honua. Ke hauoli nei ke Akua ma na mea nani a oi aku mamua o na mea e nani ai o waho ua puni oia i ka nani o ke ano kanaka maikai; ke makemake nei oia ia kakou e ulu ma ka maemae a me ke akahai, ka nani leo ole o na pua.

            I na kakou e hoolohe e ao mai no na hana o ke Akua i na haawina makamae o ka hoolohe a me ka hilinai. Ke hoolohe nei na haku, na mea i hele no na kau a kau mamuli o ke alanui i kuhikuhiia a me na mea liilii loa i ke kauoha o ke Akua, ka mea nana lakou i hana A ke hoomanao nei a ke malama nei ke Akua i na mea a pau ana i hana ai

            Aole i pau.