Hawaii Holomua, Volume III, Number 143, 20 January 1893 — PELA IO ANEI? [ARTICLE]

PELA IO ANEI?

Maloko o kekahi o na lalani lehulehu o ke poo manao o ka nupepa Kuokoa i noho Lunahooponopono ia e J. U. Kawainui, a i hoea ae i keia auwina la iho la, ua olelo ae ia ua hoole ka na makaainana i ke Kumukanawai hou. No makou iho, aole makou i ike a hoomaopopo i ka oiaio o keia; aka, e ninau aku ana makou imua o ka lahui Hawaii —he oiaio anei na olelo a J. U. Kawainui maloko o ka nupepa Kuokoa? A i ole, he wahahee a he hoopunipuni maopopo anei? Ina he oiaio, alaila. ua lauakila kana mau olelo kaena. a ina hoi aole, alaila, ke oki nei no oia i kona kani a-i.