Hawaii Holomua, Volume III, Number 143, 20 January 1893 — BONAKILA [ARTICLE]

BONAKILA

MOKUNA XIII. — KE ALA O KA POINO. Ua ike no oe, aole o oe ke kumu o keia mau mea a pau loa. Aka, aia no he mau mea mawaho aku o kou malu ka mea nana i hana i keia mau mea a pau. Eia oe ke hoao nei e hoomaikai mai ia’u ae, ke hoao nei oe e hoohemolele mai ia’u ma na ano a pau. Ma ka inoa nae o na aumakua o ka po! he mea pono e hahau ia au mo he keiki uuku la ke hoao au e hoahewa aku ia oe no keia mau mea. Aole, aole loa, e ko’u hoaloha oiaio o na oiaio— e hoopau loa oe i kela manao mai a oe aku e kuu hoaloha. O na mea i hala ua hala ia iloko o ka lua meki o ka poina loa, kahi hoi e hiki ole ai i ka mana kanaka ke lalau hou aku a hoihoi mai. O na mea wale no o keia mua aku ka kaua e naua ai. Aka, no keia manawa heaha ka kaua mea pono e hana aku ai? E Bonakila maikai, aohe a’u olelo ao e haawi aku ai ia oe no keia manawa. Koe wale iho no paha ko’u ao ana aku ia oe e malama loa oe ia oe iho no Timeona, aole no keia mea wale no, aka, he kanaka ino oia a lapuwale. He kauaka maalea loa oia. a iwaena o kana mau minoaka aia no he ino malalo ae. No Bereda hoi, ua manao au he hana maikai a ku i ka pono kou hele pololei ana aku me ke koa a me ka maka’u ole e hui me ia. Aka, nae, mai hoike aku oe ia me.i iaia a hiki i kona mauawa e kamailio mai ai no ia mea Alaila, hoomanao iho oe ua oiaio na mea au i olelo aku nei ia oe. Ako, ke kamailio mai o Bereda no ia mea, e hoike aku oe i oe iaia i na mea a pau me ka huna oleE hoike aku oe iaia i kou ike ana ia Vaioleta, a ma kou makemake ana iaia, a pela no hoi me ko olua hoopaa ana e hoohui ia olua maloko o ke apo o ka mare.

I kou ike ana iaia e komo ana iloko o kuu rumi, ua koi mai la oe ia’u e ae aku ia oe e hele mai e ike iaia. E hoike pu aku no hoi oe, ua hoole aku au i kou makemake i kinohi, uka nae, mahope iho ua ae aku la au. Mahope aku o keia mau mea ua hiki loa ia oe ke pakui aku i ua mea a pau au i ike ai he pono. O na ouli maluna o na hele- helena o ua Bereda la kou alakai, oia wale no ka’u e ao aku ai ia oe i keia manawa. Aka, i paikui hou aku ai o Bonakila, oiai o Corina e hoomakaukau ana e haalele mai, pehea la ka Ui Vaioleta i kona lohe ana i keia mau mea a pau? Ua lilo keia ninau i mea na ua wahine nei e hanu kaumaha ai. Me ka malie, hapai ae la oia i kona lima akau a hoomaha iho la ma ka aoao hema o kona umauma, maluna iho o kona puuwai, me ka hamo ana o kona mau manamanalima maluna o ka alu o ka lole ana e komo ana.