Home Rula Repubalika, Volume I, Number 2, 6 November 1901 — Page 6

6   HOME RULA REPUBALIKA, POAKOLU, NOVEMABA 6, 1901.

Ka Nupepa
Home Rula Repubalika
ELUA PUKA ANA O KA PULE

No ka Makahiki... $4.00
No Eono Mahina.... $2.25
No Ekolu Mahina.... $1.20
No Hookahi Mahina .... .40
Kuike ka Rula.
                Aole e hoounaia aku kekahi Nupepa ma ka owili pakahi ke ole e hookaa mua ia mai kona ola.
                Aole e hoopukaia a hoolahaia kekahi manao ma na kolamu o keia Pepa malalo o kekahi inoa kapakapa, ke ole e hoike mai i kona inoa pololei i ka Lunahooponopono.
                O na Kauoha Nupepa ana a pau, e kauoha pololei mai i ka Lunahooponopono.
                E hoouna pololei mai i na Nuhou—na Kumumanao—Na Olelo Hoolaha a me na Kanikau i ka Lunahooponopono o keia Pepa.
                E paiia no na Olelo Hoolaha—na Mele Inoa me ke Kanikau—ma ke Dala Kuike.
                E hookaa polei ia mai no ka Auhau o ka Nupepa e like me ia i hoakakaia maluna ae.

MRS. ROBERT W. WILCOX, Ona me Puuku
SOLOMON MEHEULA, Lunahooponopono

HONOLULU, POAKOLU, NOVEMABA 6, 1901

                Ma ka hoomaopopo ana iho ma na nupepa namu o keia kulanakauhale ua lawelawe iho nei ke komite kuwaena o ka Aoao Repubalika i kekahi mau hana e ke kue no i ko lakou mau rula. Pela io ka paha ke ano kalaiaina Amerika ana, ea?

                O ka hana kue rula ana a ua komite la oia no ka noho ana o ka   lakou halawai ma ke kaheaia ana e ka mea i kuleana ole e kahea. A ma ia halawai, ua hooholoia e pakui hou aku i elua lala no ia komite. A no ka hoopiha ana i kekahi o keia mau noho ua waiho mai ka Apana Elima i ka inoa o kekahi keiki Hawaii kupono. Aka, oiai, aole oia he manu no ka hulu hookahi, aole oia i aeia e noho ma ia noho. Pela io ka ke ano kalaiaina Amerika ana.

                Malia paha, aole io no i ko ka makemake o kela a me keia mai kona hoaloha aku i ka wa i makemakeia. He hana naauao anei ka haalele ana i kou hoaloha, a kaili ae i kou manao hilinai mai iaia mai a haawi aku i kou enemi? No ka hiki ole ana anei i kou io ponoi ke kokua mai ia oe i kekahi manawa ke kumu o kou haawi ana i kou home a me kou pono kino na ka malihini e malama, he kanaka no au i hoomaopopo ai e kaili ana i kou mau pono a pau ina e loaa iaia he wa kupono? E akahele a e noonoo mamua o kou lele ana. E aho ka noho ana iloko o ka halekulu mamua o ka holo hele ana iloko o ka ua nui.

KA PAPA OLA.

                Ma ka hoomaopopo ana i keia mahele oihana o ke Aupuni, me he mea la, he aupuni kuokoa keia nona iho maloko nei o ke aupuni, nona na mahele oihana i like me ke aupuni Teritori, oia hoi he mana hooko, mana kaukanawai a me ka mana hookolokolo no paha.
                Ua hiki loa i keia Papa Ola ke hooholo i mau rula i like loa— a oi ae no paha—ka mana me na kanawai a ka Ahaolelo e kau ai. Ma na rula a ka Papa Ola e kau ai aole loa e hiki i na luna aupuni e ae ke pale. Ua hiki loa i keia Papa Ola ke kau i na kanawai no kekahi poe me ke kau ole aku o ia kanawai maluna o kekahi.
                Mamua iho o ka noho ana o ka Ahaolelo iloko o Feberurari iho nei ua noi aku ka Mea Hanohano F. W. Beckley, ka Lunamakaainana o ka Apana Ekolu, e ae ia mai oia e hele aku e hui pu me kona  mau haku makaainana ma kela aina o ka ehaeha, ke kahua mai lepera, i ike mua ai oia i ko lakou mau hemahema mamua ae o ka noho ana  mai o ka Ahaolelo, aka, ua hoole ia mai la kana noi; aka,  me he mea la, ma ia mau la no, ua noi mai la kekahi haole malihini e hele i ua kahua la a ua ae koke ia aku la.
                Aole no i malihini i ka lahui na hana lehulehu e ae a keia wahi aupuni kamehai, nolaila, he mea makehewa wale no ia makou ke hoonuinui loa aku. Aka, eia ka makou e paipai aku ai i ka Lahui e ao mai oukou i ko oukou mau wahaolelo e hooholo i kanawai e hoohiolo a ulupa i keia Papa Ola puhi ahi a kukulu hou ae i Papa Ola i hilinaiia e ka Lahui holookoa. A i hoemiia mai kona mana kau kanawai aia a aponoia e ka lehulehu. Ma ke kanawai e ku nei ua loaa i keia poe ka mana ohi aku ia kakou a kanu ola aku ia kakou Hawaii ma kela lua puhi o ka ehaeha ma Kalaupapa. Ua hooholo iho nei lakou aole loa e ae ia na kauka e ae mawaho o ko lakou pohai e lapaau i na poe i manao ia he ma'i i me ke komo ole aku o ka lakou hokae.
                E hoike mai ana aole o lakou makemake e i ae he ola no ka ma'i lepera oiai he mau puu dala nui ka lakou e ai nei o ka   makahiki . Ma Ko makou ano he wahaolelo no ka lehulehu oia ka makou e hoike aku nei mamuli o na ike i loaa mai i keia kau iho nei o ka Ahaolelo aia no he heluna nui o ko kakou mau hoa oiwi ma kela panalaau aole he ma'i lepera aka aia no lakou ilaila me ke ola kino maikai e noho maila. Mamuli o kela kanawai pepehi kanaka oia ke O lima ua laha aku ka ma'i pala a me ka mai kuna o kona kupuna a oia iho la ke kumu lilo aku la i Molokai ma ke ano he ma'i lepera. Auwe ko kakou make e! Aia a puka hou aku—aole i pau.

HUI MOKUAHI O WAILA
HOOLAHA
HOOLOLI UKU O NA OHUA.

                Mai ka la 1 aku o Dekemaba, 1901, e auhauia ana na ohua penei:
                Ohua Oneki mai Honolulu a Hawaii, $3.00.
                Ohua Kapena, mawaena o Honolulu, Hana, Hamoa a me Kipahulu, ma ka Mokupuni o Maui, $7.00.
                Ma ia la e hoopau loa ia ai na auhau kuikawa, koe ko na kahunapule.
G. L. WIGHT.
Peresidena.

B. F. EHLERS & CO .
(PAINAPA MA.)

Kuai Nui o na Waiwai Koena!
O na ano waiwai like ole a pau iloko o ka Helukuai.
E hoomaka ana ma ka Poalima ,
Novemaba La 1.
E hoemi loa ia ana ke Kumukuai o na
Koena Pokopoko
Me ka Nana Ole i ke Kumu Lilo.
Ka Hoemi Kamahao
O na Lihilihi
a me na Kua.
E hoomaka ana keia Hoemi Nui ma ka Poalima, Novemaba 1. He hoemi i ike ole ia ma Honolulu nei.
B. F. EHLERS & CO .
Alanui Papu.

HUI LAKO HALE O POKA MA....

NA LAKO HALE NANI HOU LOA
NA MOE KU I KINOHINOHIIA.
NA PAHU BUKE, NA PAKAUKAU KAKAU
NA PAKAUKAU KAKAUOLELO
HE HELUNA NUI O NA NOHO I-E.
Na Noho Paipai Oka a me na Lako Lumi Hookipa.
HE NUI NA ANO LAKO KEENA MOE ,
na Moena Veleveta, na Paku, na Pela, Koki, Uluna. Pela aku, a pela aku.
HE HAUOLI loa makou i ka hoikeike aku i na poe a pau e kipa mai ana i o makou nei, no ka mea, he makemake makou e kuai aku. He emi loa ka makou mau kumukuai, a e hoao hou no makou e hooko aku i ko oukou makemake.

L. J. SUN
MEA KUMU LOLE

ALANUI NUUANU
Kokoke i ke Alanui Pauahi
Na Lole nu paikini o na Lede, na paleili o na wahine, na Paku Makika, Pale Uluna, Paleili, a me na Muumuu. E loaa mau no i na wa a pau.
Aole kaki wale ke ku ole i ka makemake.