Ke Alaula, Volume I, Number 2, 1 May 1866 — Page 6

6 KE ALAULA.

me na kahuna haiolelo. E nalowale aku ana no na manao a oukou e haku ai a e hai aku ai, aka o ka hopena o ia hai ana i ka olelo a ke Akua, o ka hoomaemae ana no i na naau o ka poe e lohe ana.

OLELO HOOLAHA.

                I na luna o keia nupepa:—Ke paipai ia aku nei oukou e hoike koke mai oukou i ka nui o na pepa a oukou e makemake ai.
                E ohi koke mai no hoi oukou i ka uku no na pepa, a i ka hui ana o ka Aha Euanelio ma Honolulu nei i Iune, oia ka wa e hoihoi mai ai i na dala no na pepa i lawe ia ; a o ke koena o na pepa i lawe ole ia, oia ka oukou e hoihoi mai ia wa.
                O ka poe a pau e loaa aku ana he ope pepa mai ka Luna Hoopuka aku, o lakou ka i manao ia, he mau luna hoolaha aku i na pepa iwaena o ka lehulehu o Hawaii nei.
                He pono i na makua a me na keiki ke lawe i keia pepa. O. H. KULIKA.

KA MOONIHOAWA.
(THE VIPER.)

                O ka moonihoawa kekahi o na ano nahesa he nui wale, i ikeia ma ka honua nei. He nahesa ano liilii keia, aka o kona nahu mai i ke kanaka he wela loa, a i lapaau ole ia, he make no ka hope o ka mea i nahuia. I ka nana ana i keia holoholona, he ano like no kona kino me ka puhi. He kolo aku nae keia, ma na poopoo pohaku, a me ka nahelehele e moe ai, a o kela hoi, ma ke kai wale no kona wahi e noho ai.
                O ke alelo o ka nahesa he loloa, a i kona wa e huhu ai a hapai ae i kona poo iluna, a hoopuka aku i kona alelo i manamana ulaula, iwaho, aa kona mau maka alohilohi; ia manawa hahai mai kela ia oe, a i ole ia, hoolapuu iaia iho me ka makaukau e lele mai maluna ou a nahu mai, o kou manawa no ia e weliweli ai, a huli e holo paha mai ona'ku. Ina nae he laau ma kou lima, he hiki ia oe e paopao i kona poo a make ia.
                O kekahi mau ano nahesa he liilii, hookahi paha kapuai ka loa, a o kekahi hoi he nui ae a hiki aku i ka nui loa, i ka iwakalua a kanakolu kapuai ka loa o kekahi. O ka nahu o kekahi mau nahesa he mea make no ke kanaka a me ka holoholona. He wahi puu awaawa maloko o ko lakou mau waha e pili ana i na niho. A i ka wa e nahu ai, kiki iho kau wahi o ia mea awaawa make la i kahi i komo ai na niho. O ka pehu mai no ia, a o ka make no ka hoopena, ke lapaau ole ia. O kekahi mau ano nahesa, ke nahu mai, aole ia he mea e pilikia ai ke kanaka, no ka mea aole he mea make ma ko lakou mau waha.
                O kekahi mau nahesa he kowali lakou maluna o na laau e pii ai, a o kekahi hoi he kolo wale no ma ka lepo.
                O ka holoholona no keia a Satana i komo ai a kamailio mai me ko kakou kupunawahine o Ewa ma ka mahinaai o Edena, a hoowalewale iaia e ai i ka hua o ka laau kapu a ke Akua i papa mai ai. No ia kolohe ana a ka nahesa a me kona lilo ana i kauwa na Satana, nolaila ua hooino mai ke Akua iaia me ka i ana ae: "No kau hana ana ia mea, e oi aku kou ahewaia i ko na holoholona a pau; * * ilalo kou alo e kolo ai oe; o ka lepo kau e ai ai, a pau na la o kou ola ana."
                Ua palapala mai o Kauka Hilipalani (Dr. Hillebrand,) ka mea i hoouna ia i na aina o Asia e ke aupuni e imi i na laau kanu a me na holoholona hou e hoolaha mai ma Hawaii nei, a ua paiia iho nei i kona palapala ma ka nupepa haole (Hawaiian Gazette,) e i ana, aia ma ka mokupuni o Kilone (Ceylon,) a ma ka mokupuni o Iawa (Java,) he ano nahesa pepehi iole. O keia moo, keu ka keia o na holoholona pepehi iole, a ai iole. O ka moo ai iole o Iawa he noho ia ma na loi laiki, a he pau na iole ai laiki iaia i ka ai ia. Ma ia mau aina ua manao nui ia e na kamaaina keia mau moo, aole hoi e pepehi ia. He mau holoholona e kokua nui ana i ka pomaikai o ka poe mahi laiki, a he hoopilikia ole i ke kanaka. Ua lana ka manao o Kauka Hilipalani e lawe pu mai me ia i kekahi o keia mau holoholona kupaianaha, i mea e hoolaha aku mawaena o na mala ko, a me na loi laiki o Hawaii nei. Ia manawa e ike ai na keiki o keia aina i na nahesa nahu ole i ke kanaka.

BILI BOI.

[Golden Wreath.]
1. Ihea la oe, Bili Boi, Bili Boi,
Ihea la oe, Bili Boi?
I ka hale kula wau, i ka imi naauao;
He paakiki, a ane loaa ole.

2. Ua komo anei oe, Bili Boi, Bili Boi,
Ua komo anei oe, Bili Boi?
Ae, ua komo lea wau, a hoao i naauao;
He paakiki, a ane loaa ole.

3. He noho anei kou, Bili Boi, Bili Boi,
He noho anei kou, Bili Boi?
Ae, he noho bela ko'u, a ua noho imi no;
He paakiki, a ane lona ole.

4. He buke anei kou, Bili Boi, Bili Boi,
He buke anei kou, Bili Boi?
Ae, he buke maikai ko'u, a e ake e ike no;
He paakiki, a ane loaa ole.

5. Ua ike anei oe, Bili Boi, Bili Boi,
Ua ike anei oe, Bili Boi?
Ae, ua ike iki no, nui nae ka naaupo;
He paakiki, a ane loaa ole.

6. Ehia hora ao, Bili Boi, Bili Boi,
Ehia hora ao, Bili Boi?
Nui no na hora ao, me ka hele no a mau,
He paakiki, a ane loaa ole.

7. Aloha nui oe, Bili Boi, Bili Boi,
Aloha nui oe. Bili Boi;
A i hooikaika mau i ka imi naauao,
E loaa no me kona waiwai nui.
WAIKOLOA.

HOIKE KULA SABATI O WAIALUA.

                Ua manaoia e hoike i ke Kula Sabati o Waialua,i ka manawa e hoike ia'i ke Kulanui Kaikamahine o Waialua. E hoomakaukauia paha he huakai hele, a he ahaaina, no na keiki a me kekahi mau mea e ae e hoolana ai, a e hoohauoli ai i na naau o na kamalii o na Kula Sabati a pau o Waialua. E launa pu mai, a e kokua pu hoi, na makua a me na makamaka ma ia mau hana ia la.

KA HAALELE ANA O PAULO IA DAMASEKO.

                Ua ike iho nei oukou ka poe i heluhelu i ka helu akahi o keia pepa i ka mea kupaianaha i loaa ia Paulo i kona hele ana i Damaseko me na palapala mai ke kahuna nui e ha aku ana i na olelo hooweliweli, a me ka luku aku i na haumana a ka Haku. Halawai ka Haku me ia i ke alanui, anapu mai ka malamalama nui mai ka lani mai, a hina iho la ia i ka lepo. Alakai lima aku la lakou iaia a hiki i Damaseko. Malaila ua ao ia oia e kekahi haumana haipule, a ua loaa mai iaia ka Uhane Hemolele. Hapai koke aku no ia i ka hana a ka Haku ana i hoomaau ai mamua. Hai olelo koke no ia iloko o na hale halawai o Damaseko me ke ao aku, o Iesu oia ke keiki a ke Akua. Kahaha iho la na naau o na kanaka i lohe i kana olelo, a i ae la "aole anei keia ke kanaka i hele mai ia nei e luku aku i ka poe o keia aoao hoomana?"
                Mahuahua loa aku ka ikaika o Paulo i ka hoakaka ana o Iesu no ka Mesia, a pili pu iho la na Iudaio. Ukiuki loa nei lakou, a kukakuka e pepehi iaia. Lohe o Paulo i ka lakou kuka ana. Hoomakakiu lakou ma na ipuka o ke kulanakauhale i ke ao a me ka po, e pepehi iaia.
                Kokua na haumana iaia i ka holo ana mai ia kulanakauhale aku. I ka po, ma kekahi hinai, hookuukuu aku lakou iaia ilalo, mawaho o ka pa, e like paha me ka mea i ikeia ma ke kii maluna ae nei, a hele aku ia i Ierusalema, a malaila hui pu aku me na haumana ma ia kulanakauhale. O ka hoomaka ana no keia o kana hana i kaulana loa ai oia iwaena o ka poe manaoio o na hanauna a pau.
                E nana kakou i ke kii maluna ae nei. Aia ka pa pohuku e puni ana i ke kulanakauhale o Damaseko. Eia owaho o ka pa kahi a kakou e ike nei. Aia ke kaula e lewalewa nui ana a me ka hinai. O Paulo no kela iloko o ka hinai. E paa ana kekahi lima ona i ke kaula. E kiei aku ana kela ilalo e ike i kahi e haule pono aku ai. Aia no na hoalauna maluna o ka pa e hookuukuu liilii aku ana i ke kaula a haule aku ko lakou makamaka ilalo mawaho o ka pa. Aole no e ike ia ma ke kii na kanaka maluna. Ua nalo lakou maluna o ka pa. O ke kaula wale no ka mea i ike ia.