Ke Alaula, Volume I, Number 3, 1 June 1866 — Page 1

KE ALAULA.
BUKE I. HONOLULU, IUNE, 1866. HELU 3.

KA PUNANA AITO.

                Holo aku au i kekahi mokupuni ma ka aoao komohana o Sekokia e imi ana i kela ano manu keia ano manu. O kuu hana, o ka hopu ana a me ka malama ana me ka maikai o ka hulu a me ka hoonoho ana e like me he manu ola la, iloko o na pahu aniani, e hoikeike ai ia lakou. Noho wau me kekahi lawaia elemakule poohina palupalu loa, a me kana kaikamahine, a me na keiki kane elua. Ua make ka wahine a keia elemakule, a no kona ano palupalu loa, ua pau kona lawaia ana, iloko wale no o ka hale e pupuu-anu ai.
                Na ke kaikamahine, ke keiki hanau mua, i malama i kona makuakane a i kona mau pokii elua, me ka hooikaika a me ke aho nui me he makuahine la no lakou.
                O Ake ka inoa o ka muli loa o keia mau keiki ekolu i noho ma ia moku aina ma kahakai a ma ke kumu pali, he keiki ano nawaliwali. Lilo keia wahi keiki i punahele ana i na manu. Aa kona mau maka me ka olioli loa i ka ike ana i kuu hoopoho ana a me ka malama ana i na kino manu.
                I kekahi la, i aku wau iaia, "he makemake ko'u e loaa i na keiki o kekahi ano aito i ike ia ma ia aina." Aole pane mai ua wahi keiki nei, aka ike aku wau i ke aa ana o kona mau maka.
                He mau la ma ia hope mai, ala kakahiaka nui wau e hele iuka maluna o na pali e makaikai ai a e imi manu. Huli iho au i kuu wahi hoahele a alakai, aole nae i loaa iaia. Ua hala aku la ia ihea? Nolaila, hoomaka wau i ka hele hookahi. Popoi mai ka nalu ma ke one kahakai, a ma kekahi aoao e pouli mai ana na pali awaawaa wanawana a kiekie. E hele hookahi ana wau ma ia waoakua mehameha a lohe koke au i ka leo uwe o kekahi manu. Lele koke aku wau maluna o kekahi pohaku e alai mai ana, a ike aku wau i kekahi mea e lelele ai ka oili. Ike aku au i kuu wahi pokii, o Ake, e like me ka mea i hoikeia ma keia kii. Ua hoopaa oiai kekahi kaula ma kona opu, a ma kona wawae, a ua hookuukuu na keiki elua iaia ilalo i kahi o ka punana aito. Ua lawe oia i na aito keiki elua ma kona lima, a hoomaka na keiki elua e huki iaia iluna. Ia hoomaka ana i ka pii iluna hoi mai ka makuahine mai kona wahi i hele ai. Lele mai ia me ka huhu weliweli, a hookokoke mai e kiko mai a poalo ae i na maka o Ake, ka mea i kaili ae i kana mau keiki. Noonoo koke o Ake i ka mea e pono ai, a hoolei aku i kekahi o na aito liilii. Lele koke aku ka makuahine a malalo o ke keiki, a hoopaa ia maluna o kona kua, a hoihoi aku iaia i kona punana. Kona hoi koke mai no ia e kii mai i ka lua o kana mau keiki, a o ka hoolei aku no ia o Ake i ka lua o na manu liilii. Huki ikaika aku na keiki elua maluna o ka pali, a kau aku o Ake iluna. Mama iho la kuu manao i piha mua i ka weliweli a me ka menemene. Puliki aku au i kuu wahi punahele me ka uwe aloha iaia i kona hele ana ma kahi nihinihi loa me ka hoopilikia i kona ola iho, e imi ana i ka mea ana i lohe ai ia'u ua makemake au.
                Ke ike nei kakou i ka maka huhu a me ka nuku nukee o keia manu nui e hookoke mai ana e hahai mai i ka maka o Ake a weluwelu. Ke ike la hoi kakou i kekahi keiki maluna e hoomakaukau ana e hahau i ka manu makuahine me kona laau ma kona lima.
                I kekahi la ma ia hope mai, hele pu au ilaila me Ake, me ka makaukau pono e iho i ka pali, a ike pono iho au i ka punana a ka aito ma kahi kahua pohaku ma ka aoao o ka pali. He mau laau liilii, me na ohe, a me na apana limu, na mea i kapiliia he punana. Mawaho ae o ka punana ikeia na iwi o na holoholona liilii a keia manu nui i hopu ai a lawe ilaila e ai ai.
                Ma ka huli ana i na ano o na manu, na holoholona, na ia, a me na mea kolo, e ike ai kakou i ke akamai lua ole a me ka hohonu o ka mea nana i hana i na mea a pau.

KA HOME.

                O ka home, o kahi no ia i noho ai kekahi iwaena o kona pili, a o kona ohana paha. E kuu keiki, he hale anei kou, he wahi pumehana e moe ai anei, malalo o ke kaupaku hale o kou mau makua paha? Ua lako anei oe i na kapa kupono e mehana ai i ka wa anu, a e wela ole ai i ka wa la? Ua maona kela la keia la? E hoomaikai oe i ke Akua no kou home maikai, a no ka hiki ole ana mai o ka lima menemene ole o ke kaua a me ka haunaele e kaili mai ou aku i na pono o kou home.
                He nui na keiki i hooneleia ma ke kaua i na pono a pau a ke Akua e haawi nei ia oe. Puhiia i ke ahi ko lakou mau hale, a ua hookuu wale ia lakou me ke kapa ole e haukeke ai i ke anu, a e uwe i ka pololi, e auwana hele e imi i wahi e moe ai ma na ulu laau a ma na ana, me ka piha loa o ko lakou naau i ka luuluu a me ka weliweli i ke ao a i ka po.
                I kou noho maluhia ma kou home, e nonoi oe i ke Akua e hoomaikai i na keiki i pilikia i ke kaua ma Amerika a me Europa.