Ke Alaula, Volume I, Number 3, 1 June 1866 — Page 12
12 KE ALAULA.
ainana kaulana ia no Amerika, mamua koke iho o kona make ana, "ua noi mai ko'u makuahine ia'u aole e inu i na wai ona, a pela no au i hooko ai. Ua noi hou mai no hoi oia i kekahi manawa e ae, e pale loa aku i ka pili pepa, a aole no hoi au i ike iki i ka pepa. A ua manaolana no hoi ia aole au e makemake ana i ka paka, a aole no hoi i komo mai ka paka ma ko'u mau lehelehe."
A ma kekahi haiolelo a Kauka Mila (Rev. Dr. Mills) i na makuahine, no ka malama ana, a alakai ana i ka lakou mau keiki i ka oihana Euanelio, ua hai mai oia: Ua lana ka manao o ka makuahine o kekahi kanaka ui e lilo ia i kahunapule, aka mahope loa hooholo iho la ia i kona manao e lilo i loio. Mahope iho o ka makuahine ninau akahele ana aku iaia me ka leo oluolu, "E kuu keiki, o ke aha kau i hooholo ai e lilo i hana nau?" "O ka lilo i loio, e ka makuahine," wahi a ke kanaka ui. Eia wale iho no ka ka makuahine i pane aku ai: "Ua kuhi au o ke kahunapule kau hana;" o ka uwe no ia o ka makona manaolana. Olelo iho la ua kanaka ui nei: "Ua manao anei oe he hiki ia'u ke ao i ka loio maluna aku o na waimaka o ko'u makuahine?" Noonoo iho la ia i keia kumu, a mahope lilo iho la i kahunapule mikimiki, a hooko i ka manaolana o kona makuahine.
KULA POKII.
SABATI I.
1. Owai ke keiki i oi ka maikai mamua o na keiki a pau i hanauia ma ka honua nei?
O Iesu.
2. He keiki uwe anei kela?
Uwe no paha i kekahi manawa.
3. No ke aha ka uwe ana o keiki?
No ka eha, a no ka mai kekahi.
4. Pehea ko Iesu noho ana?
Pilikia no, e like me na keiki a pau.
5. Aole anei i huhu i kekahi manawa?
Aole loa.
6. No ke aha la i huhu ole ai o Iesu?
No ka mea, he keiki hemolele ia.
SABATI II.
1. Mai hea mai keia keiki hemolele?
Mai ka lani mai.
2. Owai kona makuahine?
O Maria.
3. Owai ke kane a Maria?
O Iosepa.
4. Heaha kana hana?
He kamana.
5. Heaha ka hana a ke kamana?
Kapili hale, kapili moku, a pela aku.
6. Heaha la na mea ma keia keena i hanaia e na kamana?
7. A heaha la ka hana a Iesu i kona wa opiopio?
He paani paha i kekahi manawa.
SABATI III.
1. Pehea aku o Iesu i kona mau makua?
He hoolohe mau.—Luka 2:51.
2. Ina pilikia laua, pehea oia?
Kokua nui oia.
3. Pehea e hiki ai i na keiki e kokua i na makua?
Ma ka malama ana i na kaikaina.
4. Pehea hoi e kokua ai ma na kapa?
Ma ka malama pono ana, i haehae ole ia, a i lepo ole.
5. Heaha hoi kekahi?
Ma ka humuhumu lole.
SABATI IV.
1. Heaha kekahi hana hooponopono i hiki i na keiki?
He pulumi hale.
2. Heaha hoi na hana mawaho?
Ke kanu pua hoonani i ka ipuka hale.
3. Pehea e hooulu ai i na mea kanu?
Ma ka hoopulu mau i ka wai.
4. He ulu wale anei na mea kanu?
Aole; aia wale no a waeleia a kipuluia.
5. He mau hana keia no na la hea?
No na la noa.
6. He mau hana keia i ku ia wai?
I na keiki pono a pau.
ALOHA I NA HOLOHOLONA.
O Robaka, he keiki miki loa ma ka paani, he haumana noonoo no nae. Aole ona hana hapa i kekahi mea. Ina imi oia iloko o ka palapala, imi no ia me kona ikaika. Ina paani, paani no ia me ka hoihoi. Kukulu no ia i kekahi manawa i pa kaua me he koa la, a hele mai na kamalii koa e wawahi, paio lua no ia e pale aku ia lakou. Aka, he akahai no nae, a ua piha aloha no hoi. O kekahi hoalauna ona, kona ilio nui maikai, ka mea i hoolealea pu me ia iloko o kona mau paani a pau. Hoopaa no o Liona (oia kona inoa) i ka hinai, a kai akahele no ia, me ka malama pono i ka ai a me ka ia o loko, a ina i mea mai na kamalii kolohe i kona haku, hookeke ia i kona niho, a hooauhee aku no ia ia lakou, me he mea la o ke kahu malama, oia kana oihana kupono.
A nui ae keia keiki i kanaka makua, lilo no ia i kahuna haiolelo; aka aole i pio iki kona aloha ia Liona, aole hoi i hoeha wale oia i kekahi holoholona. Pinepine kona olelo penei: "He kanalua no wau i ke keiki hoino holoholona."
Auhea oukou, na keiki kane, me na kaikamahine hoi? Ua lilo ka oukou hana i na holoholona i mea e hoomaopopo ai i ko oukou ano. Ina he keiki akahai a aloha, oia no ke keiki e minamina ana i na holoholona uhane ole.
HE MAU OLELO HOONAAUAO NO KELA LA, KEIA LA.
O ke kamana hemahema, oia ka mea hoohalahala i kona pahiolo.
E aho ka manu hookahi ma ka lima i na manu elua e lele ana i ke kula.
O ke kauwa maikai, e lilo auanei ia i haku maikai.
E aho ke kekake holo malie, i ka lio owala a pahu oe ilalo.
O ka lawelawe hana, oia ka mea e mau ai ke kino.
Hoihoi ka paakai i Waimea!
Hoihoi ka ai i Waipio!
Aia a hei kau bipi, alaila kau kou hao kuni.
Piinana loa iluna, eha loa oe ke haule iho.
O ka hana, oia ka hua o ka laau; o ka olelo waha, he lau wale no ia.
Ina o ka lealea ke kumupaa, o ka mai ehaeha auanei ka uku hoopanee.
E hookauwa oe i kou alelo, o hookauwa anei kela ia oe.
Ina ua ike oe i na hewa o hai, mai kaena oe, aka e hoopau oe i kou.
Kohu ole ia oe ke kapa aahu o hai i hookomo iho.
Mikomiko me he paakai la ka hua olelo pokole.
He kanaka huhu ke kanaka pololi.
O ka punaheleia mai e ke alii, he hooilina paa ole ia.
Ina o ke kala kini ke kepa, kakaelua ka holo ana o ka lio.
He lio haawi wale ka hoi! mai nana paha oe i ka niho.
O ka aie, o ke keu loa ia o ka ilihune.
NA HOME HAWAII.
(TRAMP, TRAMP, TRAMP, OR THE PRISONER'S HOPE)
1. Mai na home kahakai,
Mai na wahi pomaikai,
Hui kakou kein la hauoli no;
Na keiki o Hawaii,
Me na kumu akamai,
E hoomaikai a hiilani pu kakou.
HUI:—Ku, ku, ku, e oli kakou!
Ku, ku, ku, a naue ae!
A malalo o ka hae
Hele olioli ae
Mai na home, mai na home o Hawaii.
2. Mai na home mauna nei,
Mai na home laelae e,
Hui kakou keia la hauoli no;
Poe ilihune, ku,
Me ka poe waiwai pu.
E hoomaikai a hiilani pu kakou.
HUI:—Ku, ku, ku—a pela aku.
3. Ma ka luakini nei,
Ma na wahi hui e,
A kakou i kula'i a ao maikai,
Ke loaa nei ia makou,
I ka mane lani no,
Mai ko kakou home lani ma ke ao.
HUI:—Ku, ku, ku—a pela aku.
"KE ALAULA,"
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.
25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.