Ke Alaula, Volume I, Number 6, 1 September 1866 — Page 24

24 KE ALAULA.

HE PUA ROSE I AKOIA.

                I ka la 30 o Augate, ua lawe ia e na lima menemene ole o ka make mai ka poli aku o kona mau makua, kekahi o na keiki liilii i lawe mau i ko kakou wahi pepa o ke Alaula nei, me ka nana mau, me ka hauoli loa i na kii i hoolaha ia maanei no na keiki, oia hoi o (Aka) Arthur Merril Clark, ke keiki ponoi a Alvah K. Clark, he moopuna hoi na Rev. E. W. Kalaka, he keiki i hookamaia a i hanai ia mai kona la i hanau ai a i kona la i make ai e O. H. Kulika a me kana wahine e noho la i Waialua.
                He keiki makamae loa keia nona na makahiki eha a me na malama keu he umi. Elima wale no la o ka mai ana.
                Ke kulu nui nei na waimaka o na kaikamahine o ke Kula Nui o Waialua i ka nalo ana o ka lakou wahi milimili.
                Kei ke aloha i na keiki liilii.

KA PULE I AE IA.

                Ua mai loa a aneane make kekahi kaikamahine. Uwe nui na makua a kaumaha loa ka naau, no ka mea, he kaikamahine kamakahi keia a laua.
                Aka, aole i poho ka manao o ka makuakane. Lana no kona manao i ka Mea i hiki ke hoola i ke kaikamahine, a hoomanao no hoi oia i ke keikikane i aloha nuiia, a kekahi alii i hoolaia'i ma ka olelo a ka Mea mana la. I ka lohe ana o keia makuakane ua hoi mai o Iesu mai kela kapa o ka maonawai o Tiberia, hele koke aku no ia e huli iaia. Loaa iaia ua puni i ka aha kanaka nui.
                Haule iho la ia ma kona mau wawae me ka nonoi nui iaia, i ae la, ke waiho la kuu kaikamahine i ka welau o ka make, e hele mai oe a e hoola iaia. Hele koke aku o Iesu me ia, aka, i kona hele ana, loaa ia i na mea e keakea'i. Kaumaha paha ka naau o keia makuakane i ka hakalia o ko Iesu hele ana, o make e paha auanei kana kaikamahine mamua o ko Iesu hiki ana'ku i kona hale. A pela io no. I ka hele ana'ku, holo mai la kekahi mai kona hale mai, a olelo mai, ua make kau kaikamahine, mai hooluhi oe i ke Kumu.
                Olelo koke aku la o Iesu iaia, mai makau oe, e manaoio, a e hoola ia no ia.
                I ka hiki ana i ka hale, e uwe kanikau nui Iesu ia lakou, me ka olelo aku, aole no i make ke kaikamahine, aka, e hiamoe ana. Hoowahawaha aku la lakou iaia, me ka henehene paha, no ka mea, ua akaka ia lakou ua make ia.
                Alaila lawe o Iesu i kana mau haumana ekolu, o Petero a me Iakobo a me Ioane, a me Iairo ka makuakane o ke kaikamahine, a me ka makuahine, a komo aku e ike i ke kupapau o ke kaikamahine. Lalau ae la ia i ka lima palupalu o ke kaikamahine, a olelo aku ma ka olelo Kiro Kaledea, penei, Talitakoumi. A o ke ano o ia olelo, oia keia, "E ke kaikamahine, e ala iluna." O kona ala koke mai no ia a ku a hele!
                Kahaha nui loa na makua a me ka poe a pau ma ka hale, a pihoihoi hoi. O ke keiki i mai loa a make aku, eia ka, ma ke kauoha a Iesu ua hoi mai kona uhane iloko ona! Pana hou ke koko ma kona lima. O kona mau lala koekoe mehana hou mai. O kona mau maka i pipili kaakaa hou mai a a-a mai. Hoomaka ia i ka hanu ana. O ke ala mai no ia a ku a hele a kamailio mai me pa makua.
                Ma ke kii ke ike nei kakou i ke kaikamahine e moe ana me ke ano make. Ke kikoo aku nei o Iesu i kona lima maluna o ke kaikamahine. Ke ku aku nei na haumana ekolu ma keia aoao o kahi moe, a o ka makuakane a me ka makuahine, aia ma kela aoao mai o kahi moe. O ka makuahine ka mea e hoopili loa ana i kana kaikamahine e ike ana me ka olioli nui loa i ka hoi ana mai o ka hanu ma kona mau puka ihu.
                A ala mai ia, kauoha ae o Iesu e haawi ia i ai nana.
                Pehea la ka manao o keia kaikamahine ia Iesu, aole anei i aloha loa ia i kona Haku. Ua hui pinepine paha ia me ke keikikane a ke alii o Kaperenauma, e noho kokoke ana malaila ke keiki mai a Iesu i hoola ai. Ua kukakuka paha no ke aloha o ka Haku ia laua.
                O ka mea mai mua ana i hoola ai, oia ua keikikane la o Kaperenauma, a o ka mea make mua ana i hoola ai, oia no keia kaikamahine o Kaperenauma.
                Nani no ko Iesu aloha i na keiki a i na makua mea keiki i kahea aku iaia. E like hoi me kona hoolohe ana i na makua o ia wa i ka lakou nonoi ana aku i pono no ka lakou mau keiki, pela no i keia wa, e hoolohe ana no ia i ka leo kahea a na makua haipule e nonoi ana iaia i na pono no ka lakou mau keiki.
                E na keiki e heluhelu nei, ua like ko Iesu aloha ia oukou e noho nei me kona aloha i kela mau keiki i kona wa e noho ana i ke ao nei. Ina e hele oukou io na la a pule aku iaia e haawi mai no ia i ke ola mau loa no oukou.

E LAWE! E LAWE!!

                I O'U MAU MAKAMAKA OPIOPIO; ALOHA OUKOU: Ua lana mai ko'u manao e paipai aku ia oukou, e lawe nui i keia pepa, ko oukou pepa hoi e na kamalii "Ke Alaula."
                Ua puka mai keia pepa me ka maikai; mai hookipa ia ia e na kamalii ma kahi inoino, e waiho ma kahi maikai, mai kau ia ia ma ka paia o ka hale, o pau anei i ka nahaehae a weluwelu. E malama a nui na helu, alaila, e humuhumu i buke kii maikai e heluhelu ai i na la ua a me na la wela.
                Mai kuai i na omole wai-ala ina hapaha a oukou, e malama na ko oukou pokii. Me ke aloha i na hoa opiopio. S. M. P. KALEOOPIO.
Halawa, Aug. 26, 1866.

KULA POKII.
SABATI I.

1. Ma hea la ka lani?
Aia maluna, ma kahi a ke Akua e noho ai.
2. Owai ke hiki ana ia wahi?
O ka poe pono a pau.
3. Owai la ka poe pono?
O ka poe i aloha i ke Akua.
4. Heaha ka lakou hana ma keia ao?
O ka malama ana i ka ke Akua mau kauoha.
5. A hiki lakou i ka lani, heaha ka lakou hana malaila?
O ka hoolea aku i ke Akua a me ka hana i kana hana.
6. Heaha kekahi hana?
He mau elele no lakou nona e hele ana i kahi ana e hoouna ai ia lakou.

SABATI II.

1. He wahi oluolu anei ka lani?
Ae, he wahi maikai loa.
2. Aole he pilikia malaila?
Aole, he wahi laelae loa.
3. Heaha na pilikia o keia ao?
He anu, he wela.
4. Heaha hoi kekahi?
He pololi, he makewai.
5. Pehea ma ka lani?
Aole anu, aole wela, aole pololi, aole make-wai.

SABATI III.

1. Heaha kekahi o na pilikia o keia ao?
O ka mai kekahi.
2. Heaha hou aku?
O ka make, a me ke kanikau.
3. E hiki anei ia mau mea i ka lani?
Aole e hiki; aole he make, aole he mai, e hiki ma ia wahi.
4. Aole anei e uwe ko ka lani poe?
Aole no: "Na ke Akua no e holoi ae mai ko lakou maka aku, i na waimaka a pau."
5. Pehea ko laila kapa komo?
He aahu keokeo nani loa.
6. Pehea ko laila ai?
Aole e like me ko nei, no ka mea, "Aole lakou e pololi hou."

SABATI IV.

1. E komo anei na keiki liilii i ka lani?
Ae, e komo no.
2. Pehea e maopopo ai?
No ka Iesu olelo ana, e kuu mai oukou i na kamalii e hele mai io'u nei.
3. Pehea hou e maopoopo ai?
I ka Iesu olelo ana, no ka poe e like me lakou nei ke aupuni o ka lani.
4. He hewa anei na keiki liilii?
Aole lakou i hana hewa i ka liilii loa.
5. Pehea na keiki nunui iki ae?
He hana hewa no lakou.
6. A e komo anei lakou i ka lani?
Aia a mihi i ka hewa alaila e komo.
7. Na wai lakou e hoomaemae?
Na Iesu no, ko lakou Hoola.

"KE ALAULA,"
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.