Ke Alaula, Volume I, Number 10, 1 January 1867 — Page 40

40 KE ALAULA.

lua, i wahi e kanu ai i ua wahi keiki nei, ina he keiki kane. Ia laua e kali ana no ka hiki mai, aia hoi, hoea mai la kela mai ka pouli mai a i ka malamalama. A ike iho la laua he wahi keiki kane, a he uuku haalele no hoi, alaila lalau aku la ke kane i ua wahi keiki nei, a me kona wahi keena i moe ai i kela hale pouli, a kiola iho la iloko o keia hale pouli mau. Ia wa no, puana ae la ia i hookahi mapuna leo iloko o ke ea, e like me ke ano mau o na keiki hanau. Lawe ia'ku la ia wahi leo e na eheu o ka makani, a lohe aku la ka poe e noho ana iloko o ka hale, a hoopuiwa ia iho la lakou a pau e ia wahi leo malihini, a holokiki nui e ike ia mea hou. Aia ka iloko o ka lua! Ua kapoo koke kona la i ke kakahiaka nui, a e uhi iho ana na eheu o ka lepo maluna ona. E hapai ae ana kona makuakane i ka oo e hou iho iaia, no ka mea, aia oia ke lumilumi ia la e na ale o ka make. Ke iho iho la hoi ka oo a na lima menemene ole o kona makuakane i ka elele a ka make ma kahi e. Kiko mai la na lima o ke aloha, a lawe ae la iaia mai kona hale-lua mai, a ola ae la ia a hiki i keia wa.
                I kona nui ana ne, hoomaka aku la ia e pii i ka puu o ka ike, ka mauna hoi o ka noeau. A i kona hoi ana mai ka mauna mai, ua kahea ia oia e ke Akua e alakai i kona poe hoahanau mai ka aina o Make aku, mai ka hale hooluhi aku o ka hewa, a i ka aina o Kanaana maluna. Oia, iloko o na manao a me na hana a pau a kanaka, "ka lima o ke Akua."

KA PEKALE.
(THE PECCARY.)

                Heaha keia holoholona huhu e hehi nei me ka nahu aku i ka Nahesa? He ano Puaa Ahiu a liilii hoi i noho ma na waonahele ma Amerika Hema. He manoanoa, a poepoe, a pokole kona kino—aole i loloa e like me na Puaa maoli a kakou. He oolea loa kona hulu, a i ka wa huhu, okalakala mai. Ekolu manamana ma kela a me keia wawae. He ai no keia Puaa i na ai a pau e like me ka Puaa laka, a he hiki no ke hoolakalaka ia. He eku aku no ia me kona nuku ma ka lepo, a ai hoi i na Lana, na Moo, na Koe, a me na Nahesa. He u-u mai kona leo e like me ko ka Puaa. O kona wahi noho paa, oia na ululaau a me na waoakua kahi i noho ole ke kanaka.
                I kekahi manawa ua hele akoakoa loa keia ano Puaa me na pu-a nui, hookahi tausani a keu ma ka pu-a hookahi, e imi ana i ai no lakou. Ina e loaa aku ia lakou he mala uala, a he mala kulina paha, pau no ia lakou, aole koe. Ina i ka hele pu-a ana loaa aku i kekahi muliwai, au aku no lakou a pae i kela kapa. Ina no hoi i ka wa e akoakoa nui ana lakou, hele aku kekahi kanaka e pepehi i kekahi o lakou, o ka hoopuni ia mai no ia e lakou, a make no ia ia lakou, ke loaa ole iaia he laau, a pii ilaila e pakele ai.
                Elua ano Pekale i ikeia ma Amerika Hema—o ka Pekale a-i keokeo, a o ka Pekale lehelehe keokeo. Ke ike la kakou ma ke kii o keia holoholona he wahi keokeo e pii ana mai lalo o ka a-i a hiki iluna o ka hokua. He Puaa uuku keia, e hiki ana kona kino i ke kanalima wale no paona.
                O ka Pekale lehelehe keokeo, he keokeo kona auwae, a me luna o ka nuku. He holoholona nui iki ae keia—ua hiki aku i ka haneri paona kona kaumaha.
                O ka Puaa no kekahi holoholona i hoowahawaha nui loa ia ma na aina a pau. He hoonuu wale no kana hana, me ka hiamoe aku ke piha kona opu. Aole keia he kauwa i hiki i ka hoohana ia e ke kanaka, e like me kekahi mau holoholona e ae, aole hoi e loaa mai kona wai-u i mea ai no ke kanaka. O ka hiamoe wale aku no kana hana. He ai no hoi i na mea maikai, a me na mea ino a pilau loa. Aole he mea ino i haalele ia e keia holoholona waha ukele.
                Ua papa ia na Iudaio aole e ai i ka Puaa. O ko Aigupika a me na Arabia kekahi i ai ole i ka io Puaa, no ko lakou manao he mea ia e pili mai ai ka mai lepera a me na mai e ae ma ka ili o ke kanaka. Ma Hawaii nei nae, a me na aina haole, ke ai ia nei no ka io Puaa.

HE MAU KANAWAI NO KE OLA KINO.

                I ka po, e moe koke aku no oe, i oluolu kou kino luhi; aole o ke ala wale aku a hiki i ke aumoe e puhi kukui ai.
                I ke kakahiaka; e ala koke ae oe, a e lalau aku kou lima i ka hana. I ka o-o ana o ka moa e ala ai; aole o ka hiamoe a wela mai ka la maluna o kou poo, alaila hapai hana'ku.
                E holoi pinepine oe i kou maka a me kou kino holookoa i ka wai maemae.
                E ai pakiko oe i na mea ono a pau. Ma na ai maikai wale no e hoomaona pono oe i kou puu i loaa i ka pololi mamuli o ka hooikaika ana o na lima i ka hana.
                E hookaa wale aku i na mea awaawa a me na wai ona a pau mai kou waha aku.
                E hookaa pono aku oe i kou hoalauna i kana a pau, a mai noho a aie wale i ka hai. A lilo oe i ka aie ia hai, o kou lilo no ia i kauwa hooluhiia nona, a he mea ia e inoino ai kou opu, a e hapa ai ka ikaika o kou mau olona.

KULA POKII.
SABATI I.

1. I ko ke Akua hana ana i ka honua nei, pehea ia?
Ua panoa loa.
2. Pane mai ke Akua, a heaha na mea i hana ia?
Na laau o kela ano keia ano.
3. Heaha la kekahi o na laau i hana ia?
O ke koa, ka lehua, ka mamane, ke kou.
4. Heaha la kekahi o na laau hua ai a ke Akua i hana ai?
O ka alani, ka puawa, ka ohia, ka niu, ka manako.
5. Heaha kekahi o na mea ai e ae a ke Akua i hooulu ai?
O ka uala, ke kalo, ka huita, a me ke kulina.
6. Heaha hou kekahi mea a ke Akua i hooulu ai?
O ka mauu, a me na pua.

SABATI II.

1. Heaha la ka mua o na mea a ke Akua i hooulu ai ma ka honua?
O na laau ka mua.
2. Heaha la ka lua?
O na mea ai e ulu ana iloko o ka lepo.
3. Heaha la ke kolu?
O na hua ai e like me ke kulina.
4. Heaha la ka ha?
O ka mauu.
5. Heaha la ka lima?
O na pua.
6. Pehea la ka honua nei i ka pau ana o keia mau mea i ka hana ia?
He nani maoli.

SABATI III.

1. Owai ka i ike i ka nani o ka honua a ke Akua i hana ai?
O ke Akua a me na anela.
2. Heaha hou ka ke Akua i hana ai?
Kau mai la ia i ka la e hoomalamalama ai i ke ao.
3. Heaha ko ka po?
Ka mahina a me na hoku.
4. Pehea la ka nui o ka la?
He nui loa no.
5. Heaha la ka mea e liilii ai ka la i ka nana aku?
No ka mamao loa aku.
6. Nawai e hoopaa i ka la ma kona wahi?
Na ke Akua.

SABATI IV.

1. Ua like anei ka malamalama o ka mahina me ko ka la?
Aole; he nui ka malamalama o ka la, he uuku ko ka mahina.
2. No ke aha la ka hoemi ia ana ka malamalama o ka po?
I hiamoe ke kanaka.
3. Owai ka mea i hiki ke helu i ka nui o na hoku?
O ke Akua wale no.
4. Ua loaa anei iaia ko lakou helu?
Ae; ua ike no hoi oia i ko lakou mau inoa a pau.
5. I ko kakou nana ana i ka mahina a me na hoku, heaha ka manao e ulu mai ana iloko o kakou?
E mahalo kakou i kona mana.
6. Ua poina anei ke Akua i na mea liilii?
Aole; ua aloha a ua malama oia i na manu liilii a me na keiki uuku.
                                He aloha ko Iesu
                                I ke keiki liilii no.
                                Nona no ka poe liilii,
                                Nona wau ka pokii nei.
                                Kei ke aloha!
                                Kei ke aloha!
                                Kei ke aloha!
                                Ke aloha o Iesu!

                E kuu keiki, ina e hoowalewale mai ka poe hewa ia oe, mai ae aku.

KE ALAULA,
He Nupepa Hoikeike Kii,
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oi aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.