Ke Alaula, Volume I, Number 12, 1 March 1867 — Page 46
46 KE ALAULA.
ia lakou iho i hiki ai i keia keiki ke hele i ke kula nui? Ke hoopailua nei no ko oukou naau i keia kanaka ino, me ka i iho. "Akahi no ke kanaka aloha ole e like me keia."
Aka ea, e nana pu kakou i kekahi hana i like no me ko keia kanaka. Ua aloha mai kou Makua ma ka lani ia oe--ua hoopomaikai ia oe, ua hoolako mai, a ua aloha mai. I kona ike ana ia oe e haule ana iloko o ka make mau, ua hoouna mai oia i kana keiki hiwahiwa e hoola ia oe. I keia wa ua hele mai ua Makua la ma ka lani e ike ia oe. Ke ku nei ma ka ipuka, a ke kikeke nei. Ina aole oe e wehe ae i ka ipuka o ke aloha o kou naau nona, a kahea aku iaia e komo mai; ina no e hoole oe, "aole wau he keiki nona," auhea kou like ole me ua kanaka hookiekie la i oleloia'i maluna. "O ka mole o ka naauao oia ka makau ia Iehova." O ka mea no ia i loaa ole i ua kanaka hookano le i aoia ma ke kula nui. Ua hoowahawaha oia i ke kanawai o Iehova, e i ana, "E hoomaikai oe i kou makuakane a me kou makuahine, i loihi ae kou mau la ma ka aina a Iehova a kou Akua i haawi mai ai ia oe."
Na'u, na E. P. CHURCH.
MALAMAIA HE BUKE HELU.
Ua ike na keiki a me na kanaka o Hilo i kekahi haole opiopio o Charles H. Rogers kona inoa. Noho kumu kokua oia ma ke kula hanai o Rev. D. B. Laimana, he mau malama paha, a loaa i ka mai a make aku ma Hilo. He haole opiopio loa no. He umi-kumamaiwa ka nui o kona mau makahiki i kona wa i make ai.
Holo ohua mai oia mai Bosetona mai maluna o kekahi moku kalepa. I ka hiki ana o ka moku ma ka Lae Hao, no ka nui o ke anu, kipa pinepine oia ma ka hale kuke e pupuu anu ai, i loaa iaia ka mehana kupono malaila.
He negero ke kuke, a he kanaka hoohiki ino i na manawa a pau i ka inoa a Iehowa. Ao aku keia kanaka opio i ke kuke e hoopau i ka hoohiki ino ana. A penei i hoopau ai. Hoomaka iho o Rokeke e kakau a helu aku i ka nui o ka hoohiki ino ana a ke kuke i kela manawa keia manawa a laua i noho pu ai ma ka hale kuke. A ike ke kuke i ka mahuahua loa ana o ka helu o kona hewa ana, haalele loa oia i ka hoohiki ino ana. Alaila ao aku o Rokeke iaia i na Kanawai he Umi, a me kekahi o na Halelu. Ma ia hope mai hoomaka ke kuke i ka pule aku i ka Haku, a i ke ku ana mai o ka m oku ma ke awa o Honolulu, he haipule io kela kanaka i hoohiki ino mau mamua.
He hua nui no keia o ka hooikaika aloha ana o keia kauwa opiopio o ka Haku. Ke olelo nei no ka lunaolelo o Iakobo 5:20: "E ike pono oia, o ka mea e hoohuli mai ana i ka mea hewa, mai kona hele hewa ana mai, nana no i hoopakele ae i ka uhane i ka make, a nana hoi i hooki i ka hewa he nui loa."
Ina no e hoomaopopo ana kakou e malamaia he buke helu, kahi e kakau mau ia ai ko kakou mau hewa a pau, alaila e makau maoli kakou a haalele iho paha. Ke olelo nei ka Haku: "O na huaolele ino a pau a kanaka e olelo ai, e hookolokoloia'na lakou ia mea, i ka la e hookolokolo ai."—Mat. 12:36. Hoike mai hoi o Ioane no ka la hookolokolo, penei: "A weheia na buke, ua hoopaiia ka poe make ma na mea i palapalaia iloko o na buke."--Hoik. 20:12.
Ua ike paha kekahi o oukou, o na mokuaina o Amerika Huipuia, he mau panalaau lakou no Beretania i ke kau i hala iho nei. Mai Beretania mai ka nui o na kanaka i noho ma ua mau panalaau la. A hiki i ka wa a lakou i manao ai e hoohui ai ia lakou iho i aupuni kuokoa, kaua mai o Beretania me lakou. Iloko o ia kaua ana, kokua mai kekahi kanaka kaulana o Farani, oia o Generela Lapeeta, (General Lafayette,) ia Generela Wasinetona a me ke aupuni opiopio o Amerika Huipuia.
I kona wa elemakule, hoi hou oia i Amerika e ike i kela aina ana i kokua ai i ka wa o ko kakou pilikia ana. Olioli loa na kanaka, a hooke iaia i ka iini nui e ike a e lulu lima me ka makamaka o ko lakou aupuni, a me ka hoa'loha o Wasinetona.
Ma kekahi hookahuli aupuni ana ma Farani, holo aku oia i Auseturia, a ua hopu ia malaila a hoopaahao loihi ia e kona poe enemi. I mea e hemo ole ai oia mai ko lakou lima 'ku, hana lakou i wahi puka uuku, hookahi paha iniha ka nui, ma ka puka pani o kona keena paahao, a hoonoho ia kekahi koa e kiai mau iaia i na manawa a pau, me ka hoopili mau mai i kona maka ma ua puka la e hoomakakiu ana i ke ao a i ka po. I ka wa e luhi ai kekahi koa, hoonoho hou ia mai kekahi, a pela e kiai mau ai iaia. I kela manawa keia manawa, ina e nanu'ku o Lapeeta ma ua puka la, e kau mai ana ua maka la e kiai ana iaia. He mea hoopilikia loa mai no ia i kona manao, wahi ana.
Auhea oe, e ke keiki. Ke hoomanao mau nei anei oe e nana mau mai ana no ka maka a Iehova ia oe? I kela la keia la ma na wahi a pau au e hele aku ai, a ma na hana a pau, i ka wa e paani ana, e kula ana, e hiamoe ana, e nana mau mai ana no ka maka a Iehova ia oe.
I kuu ike ana i na kaikamahine e paani ana iloko o ka halawai haipule, manao iho la au ua poina lakou i ka nana mau mai o ka maka a Iehova ia lakou.
Ike aku au i kekahi mau mahina i hala iho nei, he mau keiki elua i hopu ia no ka aihue ana i kekahi eke dala. Ua maopopo no aole o laua i hoomanao i ka ike mau mai o na maka weliweli a Iehova ia laua.
Ua mai kekahi kaikamahine uuku, a hala kekahi mau la iaia ma kona wahi moe. Heluhelu pinepine mai kona makuahine iaia mai loko o na buke liilii. I kekahi la loaa i ua keiki nei keia mau olelo i kakau ia, "Ka maka i ike ma na wahi a pau." Ninau oia i kona makuahine i ke ano o keia mea. Hai mai oia, "Pili ia olelo i ka nana mau mai o ke Akua ia kakou. Ua ike oia i na mea a pau loa, o ko kakou ano, a me ka kakou hana." Pane mai ua kaikamahine la, "Aole o'u makemake i ka nana mau mai o ke Akua ia'u, a ike i ka nui o na hewa o kuu naau." Makau loa oia ina e hele iki aku kona makua hine ma kahi e, no kona weliweli i ke kau mai o ka maka a Iehova maluna ona. Ma ia hope mai paulele aku ia maluna o Iesu, a o ka pau koke no ia o kona makau i ka nana mai o ka maka a Iehova iaia. Kau mai ua maka la maluna ona me ke aloha a me ka oluolu.
Ina e huli io kekahi i ka Haku, lilo o Iesu i hoa'loha, a o ke Akua i makamaka, alaila he mea oluolu mau no iaia ka hoomanao i ka nana mau mai o ka maka o kona Makua ma ka Lani iaia.
"HOSANA I KA MAMO A DAVIDA."
I kekahi hele ana'ku o Iesu i Ierusalema, kau aku oia maluna o kekahi keiki piula i hooholo ole ia mamua e kekahi kanaka. He laka wale no ua wahi piula la iaia. He kau wale aku no ia maluna, aole he wahi noho, aole paha he kaulawaha. Hohola ae lakou i na kapa, a hoee aku ia Iesu.
I ke kokoke ana'ku i Ierusalema, hohola ae la ka nui o na kanaka i ka lakou mau kapa ma ke alanui, a okioki ae la kekahi i na lala laau a haliilii ma ke alanui, a hele ae kahi keiki piula maluna me ka puiwa ole, me he piula kahiko la i maa a i laka i ka hooholo mau ia.
A launa'ku lakou i ke kulanakauhale, halawai mai na kanaka he nui loa me ia, a me na keiki he mau haneri paha, a ukali aku lakou iaia me ka hooho a huro nui aku me ka olelo aku, "Hosana i ka Mamo a Davida."
A hiki aku lakou i Ierusalema, pihoihoi ko ke kulanakauhale a pau me ka ninau mai, "Owai keia?" Manao lakou he alii paha keia, he kanaka nui no na aina e mai paha; owai la? I kona komo ana iloko o ka luakini, hookani ae na kamalii, "Hosana i ka Mamo a Davida." A ike na kahuna nui, a me na kanaka naauao, i na keiki e hoolea ana iaia, ukiuki lakou. Pane aku o Iesu ia lakou, "Aole anei oukou i heluhelu, ua hoomakaukau oe i ka hoolea mai loko mai o na waha kamalii a me na keiki ai waiu?"
Iloko o ka mahina i hala ae nei ua loha ae makou no ke kani ana o na leo o kekahi o na keiki a kakou ma Honolulu nei, ma Kapunahou, ma Koolau a me Waialua, e hoomaikai ana a e hosana ana i ka Haku, e like me ka hana ana o kela mau keiki i ka wa ia Iesu ma Ierusalema. O ko lakou nei hana ua like me ko lakou la i ka wa i hoopiha ia i ka Uhane Hemolele. Piha ae la ka naau o ia mau keiki, a me keia poe keiki hoi a kakou, i ke aloha i ko lakou Haku Hoola, a piha hoi ka waha i ka hoolea. Ua haalele ia poe keiki, a ka Uhane Hemolele i launa mai ai i na mele hula, a me na mele lealea wale, a o na mele a lakou i makemake nui ai, oia na himeni hoomaikai ia Iesu, ka Mamo a Davida. Ua hiki no ia lakou ke olelo pu me Davida: "Ua haawi mai oia i ka mele hou iloko o kuu waha, i ka hoolea i ko kakou Akua."—Hal. 40:3.
He mea hou a he mea kamahao loa ka hiki ana mai o ka haawina o ka Uhane Hemolele maluna o na keiki ma na kula nui, a ma kekahi mau wahi e ae, a he mea no ia e hoomaikai aku ai kakou i ka Haku, no ka mea ua hoomanao mai oia i kona poe kanaka, a me ka lakou mau keiki.