Ke Alaula, Volume II, Number 2, 1 May 1867 — Page 5
KE ALAULA.
BUKE II. HONOLULU, MEI, 1867. HELU 2.
KA ULANA ANA.
E malama i na minute, pela e holo ai na hana. Ke ike nei kakou ma keia kii i ke kupuna-wahine e ao ana i kahi moopuna e ulana i ke kakini. Ke ao aku nei ia i kahi e hookomo aku ai i na kui a me ke ano o ka owiliwili ana i ka lopi e ulana ai a paa ke kakini. Ua maa kahi kupuna-wahine i ka hoohana mau i kona mau lima mai kona wa opiopio mai, nolaila, he mea hiki ole iaia ka noho wale iho me ka hana ole. O ka hoopiha mau ia o ka manawa i na hana kupono e hiki ai ia kakou, oia no ka mea e olioli ai ka noho ana o ke kanaka. Nolaila, e ao aku oukou, e na kupuna-wahine, a me na makuahine, i ka oukou mau moopuna, a me na keiki, e hana i na mea kupono i ko lakou mau lima mikioi e hana ai.
He manawa no na mea a pau; he manawa e paani ai na keiki, a he manawa e kula ai i na buke, a he manawa e hana ai na lima. O ka noho palaualelo ana, oia ke kumulau e hoolaka mai ai i ke kolohe. "O ke poo o ke kanaka palaualelo, he hale kamana ia no ke diabolo."
I ke au i kunewa ae nei i hope, ulana na wahine Hawaii i na moena akaakai, moena lauhala, moena pawehe, oia hoi ka makoloa, a ke hana nei no kekahi o na wahine i keia wa i keia hana maikai e hoomaikai ai i ka hale a me kahi moe. Aka o ka hapa nui o na wahine o ka hanauna opio e ulu mai nei, e ike ole ana lakou i keia hana maikai e pono ai a e lako ai na hale. O ka hana nui a na kaikamahine e makemake nei e ao, oia no ka humuhumu a me ka hana lihilihi. He mau hana maikai no laua a i elua, aka, mai haalele i ka hana moena e maemae ai ka hale. E awili pu na wahine opio i ka ike o na makuahine o lakou me ka ike hou e loaa mai nei mai na haole a me na kumu hou. E hoopiha mau i na lima i ka hana, a i ke poo i ka ike, o ka naau hoi i ka noonoo. E hoopaa i na mea i loaa, a e kikoo aku i na mea hou.
E ao na kupuna-wahine i na moopuna i ka ulana moena, i ka milo kaula, i ka humuhumu lole. Pela e lilo ai na moopuna a oukou i mau wahine makaukau a noho pono, e pomaikai ai ka aina, a e pono ai na kane a me na keiki a lakou.
I NA ONA OPIOPIO O KA HOKU AO.
Ua nui ka hauoli o ka lehulehu o na keiki o Honolulu a me Hilo i ka ike ana i keia moku nani loa i kapiliia e na keiki kula Sabati he lehulehu o Amerika, me ke kokua pu ia e na kulu wai liilii a na keiki o Hawaii nei.
No ka ike ole o kekahi lehulehu o na keiki o Hawaii nei i keia moku a lakou i kokua ai, nolaila, e hai aku makou i kekahi o na mea a makou i ike ai no keia elele o ke ao. Ua oi loa aku ka paa a me ka makaukau o keia moku i ko ka moku mua. Ua oi aku ka loa o keia moku i ko ka "Hoku Ao" mua eono kapuai, a o ka laula, elua kapuai ka oi.
He umi kumamakolu ka nui o na pea a pau, a i ka wa e piha pono ai lakou a pau i ka makani maikai, e loau ka holo o ka moku he umi mile a keu i ka hora hookahi. O ka hale o hope ua kau wale maluna o ka oneki, nolaila ua oluolu ka holo ana o ke ea ke hoohamamaia na puka makani, e like me he hale la e ku ana ma ka aina.
Ma ua hale nei he keena nui o waena, a ina hai na keena moe no na ohua e holo pu ana. Ma ke keena nui e ike ai kakou he pakaukau, kahi e paina ai ke kapena a me na 'lii moku a me na ohua, me na noho loihi ma kela aoao keia aoao; he koki, he pila hookani leo maikai, he keena waiho buke, he waki, he mau kii ekolu e kau ana ma ka paia, he mea hoike i ka hiki mai o ka makani ino (barometer.) He kii kekahi e kau ana ma ka paia, e hoike ana i ka hoolana ana ia "Hoku Ao" ma Bosetona i ka la 22 o Sepetemaba, 1866, me ke anaina keiki e ku ana ma ka uapo e nana ana i kona lele ana aku iloko o ke kai.
Ua hoolako pono ia keia moku i na heleuma, na kaula hao, na waapa elua, na panana, na ohenana, na palapala aina, na hae, a me na mea a pau e holo pono ai ka moku ma ke ala laula o ka moana, me ke ku aku i na awa ku moku.
O ka mea nui loa nae e pono ai keia hana, oia no ka hooliloia o kekahi o na misioneri i kapena no keia moku i kapiliia e lawelawe no na misioneri, me ka halihali aku ia lakou, a me ka hoolako pu aku ia lakou i na mea e pono ai a