Ke Alaula, Volume II, Number 2, 1 May 1867 — Page 6
6 KE ALAULA.
e holo ai ka malamalama ma na mokupuni o ke kai. O Binamu opio ka misioneri i noho ehiku makahiki ma Apaiana, oia ke kapena, a ke holo pu nei hoi kana wahine me ia.
I ke kani ana o ka bele, i ke kakahiaka a me ke ahiahi, akoakoa mai na luina a pau a me na ohua ma ke keena o hope e malama i ka pule ohana, e like me ko na ohana haipule e hana nei
Ina e ku aku keia moku ma na aina naaupo, aole e like ke ano o kana hana me kekahi mau moku e alakai nei i na kanaka naaupo ma na hana kue wale no i ka pono a na misioneri i kukulu ai. E hoomanao mau kakou i keia moku, a e noi pinepine aku i ka mea e hoopaa nei i na makani ma kona lima, e malama oia i ke ola o keia moku a na keiki i kapili ai nona, a e hooliloia oia i "Hoku Ao" io no na lahui pegana.
KA MOKU O KA WAOAKUA.
Heaha la keia holoholona helehelena ino, wawae kikoola, e holo mai nei me ke kanaka e noho kiihelei ana maluna ona? He haahaa ka lio a me ka bipi i keia mea wawae kikeekee, kuapuu. O kona a-i, o kona poo, a me ka nuku, ua kohu hipa ke ano. He kamelo keia. Elua ano nui o ke kamelo—o ka mea nona na puu elua ma kona kua, a me ke kamelo puu hookahi. O ke ano nona ka puu hookahi, oia no ka mea mama loa i ka hele, a ua kapaia oia "ka moku o ka waoakua," no ka mea, o ke alanui hookahi no ia e hiki ai ke hele ma na waoakua one o Arabia a me Aferika. He wahi loihi e hele aku ai me ka loaa ole o ka mauu a me ka wai. Aia no maloko o ka opu o ke kamelo he mau eke kaawale, a i kona wa e inu nui ai i ka wai, hoopihaia ua mau eke nei i ka wai, nolaila, aole pilikia koke iho ke kamelo ke nele i ka wai a hala kekahi mau la.
He pomaikai loa na Arabia i keia holoholona kupono ma ka aina o lakou. Ua maikai loa ka ai ana o kona io, a o ka waiu, ka ai no ia a na keiki a lakou. O ka ili hoi, hanaia i mea uhi iho maluna o na hale lewa o lakou; o kona hulu, ulanaia i lole.
O kekahi o na kamelo ua hoounaunaia e lakou i ukana i ka wa opiopio, a o kekahi ua hooholoia e na kahu, a ua hiki ia lakou ke holo he kanaono a hiki i ke kanaiwa mile i ka la hookahi. Ua oi aku ka ikaika a me ka mama i ko ka lio, a ua hiki hoi ia lakou ke hele ma kahi one i hiki ole i ka lio ke hele, a make wale paha ka lio i ka wai ole, a me ka wela o ka la. Lokomaikai mai ka mea nona mai na mea a pau, i na kanaka o ia mau aina, i ka haawi ana i keia holoholona kupono no ia mau aina.
Ua haiia mai he eono haneri kamelo ko Ioba, a ua heluhelu hoi kakou i ka wanana a Isaia no ka wa e huli mai ai ko na aina e e hoonani i ka ekalesia, e i ana: "E uhi mai no ka lehulehu o na kamelo ia oe, o na kamelo mama hoi o Midiana, a me Epa, e hele mai no hoi na mea a pau o Seba; e lawe mai no lakou i ke gula a me ka libano, a e hoikeike lakou i na mea nani o Iehova."
KA AHAHUI KULA SABATI O IUNE, 1867.
Auhea oukou, e na kahu ekalesia, na kahu kula Sabati, a me ka poe makee pono no ka lahui opio e ulu mai nei. Ke kau leo aku nei makou ia oukou e hoomanao oukou i ka Ahahui Kula Sabati o Iune ae nei, a e hoomakaukau rnai i na mea e pono ai ua aha la. Eia na lala o ia aha mamuli o ke kumukanawai i aponoia: oia hoi na kahu ekalesia a pau o ka aoao Euanelio, o na kahu kula Sabati a pau, a me na elele i koho pakahi ia--hookahi elele no kela kula Sabati keia kula Sabati. Nolaila, he pono i na kahu ekalesia a me na kahu kula Sabati, e paipai i na kula Sabati e koho a hoouna mai i elele pakahi no kela kula keia kula. E paa mai no hoi na kahu kula i na buke helu o na kula Sabati i hoolakoia e na luna o ka ahahui.
Eia na inoa o ka poe i kohoia e haku a hoopuka i na manao imua o ua ahahui la i ka hui makahiki o Iune, 1867: O Rev. J. F. Pogue, J. R. Kinney, Esq., o C. J. Laiana, Esq., Rev. J. Waiamau, a me Mekia W. L. Moehonua.
E hoomanao na hoa i na hana o keia aha makahiki a kakou. O. H. KULIKA,
Preresidena o ka Ahahui Kula Sabati.
NA KEIKI HIPA AUWANA.
(WANDERING LAMBS)
[HAPP Y VOICES.]
1. Auwana wale na kamalii.
Mai ka pa hipa, kahi hanai,
Ma na puu anu, a panoa no;
Na makamaka, e kii ia lakou.
CHO.--Wiki e imi e hoola mai,
O nalowale, a make e.
2. E ake ke Kahu e paa na pokii
Ma ka pa hipa, kahi hanai,
Eha, aloha a kii e hoi mai,
Ke auwana iki mai ka pa ae.
CHO.—Wiki e imi e hoola mai,
O nalowale, a make e.
3. Hooowalewale ko ke ao nei,
Alo na hewa e pahele ai,
Hoolalau ino na enemi,
Hoomakakiu e pepehi mai.
CHO.—Wiki e imi e hoola mai,
O nalowale, a make e.
4. Alakai pono i na pokii,
E ao pinepine, e paipai maikai.
Ikaika ka huli, i komo lakou
Ma ka pa hipa ma kela ao.
CHO.—Wiki e imi e hoola mai,
O nalowale, a make e.
NO NA MEA I HAKU MANAO.
Ua loaa mai nei ia makou na manao aloha a J. P. Iwa, no Honolima, Hilo, a me Imiola, no Waikoloa, Waimea, Hawaii, e paipai ana i na hoa e lawe nui i ko kakou pepa nei i hoa noho a i kumu ao; aka, no ka hoopuka mua ia no o na manao paipai like, nolaila, aole makou e hoopuka aku i ko laua mau mea i haku ai. Aia no me laua ko makou aloha a me ka mahalo.
KA HOOLOHE MAKUA.
[HE OLELO I HOOPUKAIA E MR. E. P. CHURCH IMUA O KE KULA SABATI O KAWAIAHAO.]
E hai aku wau ia oukou no kekahi keiki hoolohe i launa pu me a'u i na malama i hala iho nei. He wahi pokii no ke kula Sabati o Waialua, nona na makahiki elima, o Aka kona inoa.
E kaahele pu ana makou me na makua o ua keiki nei i na Pali Koolau o Oahu nei. A hiki aku makou i Hauula, pii aku makou e makaikai i ke awawa o Kaliuwaa me ko laila wailele.
I ko makou hele ana, ae ia ua wahi keiki nei e kau pu me a'u mamua o'u ma ka noho lio; a pii aku makou e ike i na pali kiekie, ka wailele puehuehu, a me na mea kupaianaha a ke Akua i hana ai ma ia wahi. He huakai nui ko makou i ka pii ana; e hele wawae ana kekahi poe, a maluna o na lio kekahi poe. Ua pala na ohia o uka o Kaliuwaa, a haawi mai na kaikamahine e hele wawae ana ia Aka i elua ohia. Aole kela i hookomo koke i ka ohia ma kona waha, aka, paa wale iho no ma kona lima, me ka i mai, "e ninau mua aku wau ia mama ina he pono ia'u ke ai i na ohia." Oia holo aku no o maua a kahi i loaa aku ai kona makuahine e holo ana maluna o kekahi lio; kahea koke aku kela, "E mama, ua haawi mai na kaikamahine ia'u i elua ohia; e pono anei ia'u ke ai?" Pane mai kona makuahine iaia "e ai i hookahi, a koe hookahi." Ka pili iki aku no ia o maua me kona makuahine, a o ka holo koke aku no ia o kona lio, a kaawale hou iki aku.
Nahu aku o ua o Aka i kekahi o na ohia ma kona lima, a ua ino ka o loko. I aku la wau iaia, "e hoolei aku i kela ohia ino, a e ai i ka lua o na ohia." Kanalua iho la kela, me ka olelo mai, "ua ae mai o mama ia'u e ai i hookahi ohia, a ua hoomaka iho nei au i ka ai ana i kekahi; e hewa paha auanei ke ai aku wau i ka lua." Olelo aku wau iaia, "aole o mama i ike e ino ana kekahi o keia mau ohia, a i kou hoao ana, ua ikeia ke ino o kekahi. Aole nae oe i ai i ka mea ino, o ke nahu wale ana aku no a ike i ke ino; nolaila, he pono ke hoolei aku i kela, a e ai iho i ka mea maikai." Ma ia mau olelo, hoolohe mai o Aka ia'u, a hoolei aku i ka ohia mua, a ai iho i ka lua.
Ma ia hope hui hou aku maua me kona makuahine, a pane koke aku kela, "e mama, hoao aku wau i ka ai ana i kekahi ohia, a ua palaho o loko, nolaila ua hoolei aku wau ia ohia, a ai iho i ka lua; ua pono anei ia, e mama?" Apono mai kona makuahine, "ae, ua pono no."
E o'u mau pokii a pau, pela anei ko oukou hoolohe pono ana i ko oukou mau makuahine me ka makou i ka hana i kekahi mea kue i ko lakou makemake, me ke aloha maoli o ka naau ia lakou? E hoomahui oukou ma keia mea ia Aka, kahi pokii o ke Kula Sabati o Waialua.
Ua minamina paha na keiki o ko Hawaii nei pae aina i ka lohe ana, aia a hiki mai ka la 18 o Mei, pau ka holo ana o ka moku i aloha nui ia, oia hoi o Kilauea. Ina e pau io ana ka holo o keia moku ma na kai lipolipo o Hawaii nei, aohe minamina a koe aku, no ka mea, pomaikai paha ke loaa kekahi moku like me ia ma ka lawe hikawawe loa i na nu hou, na nupepa, a me na leta, ma kela wahi keia wahi o Hawaii nei. Nawai e hoole mai, "aole ia Kilauea ke aloha la?"