Ke Alaula, Volume II, Number 2, 1 May 1867 — Page 8

8 KE ALAULA.

UA HELU NO KE AKUA.

                E paani ana na keiki elua ma ka moena, a haliia mai he pa mea ono a kauia ma ke pakaukau. Hele mai kahi keiki kane, me ka olelo, "E lawe ana wau i kekahi mea ono." Papa mai kona kaikuahine, me ka olelo iho, "Ua kapu ka lawe wale; mai lalau ae oe!" Pane mai kela, "Aole o mama e ike ana ina e lawe wau i hookahi wale no; aole no oia i helu i ka nui o ua mau mea ono nei." Pane hou aku ke kaikuahine, "Malia paha o ke Akua no ka i helu i na mea ono." Na keia olelo hope a ke kaikuahine i hoopaa mai i ka lima o ke keiki i manao e lawe kolohe.
                E hoomaopopo oukou, e na keiki, ke helu nei no ke Akua, a ua ike oia i na mea a pau. Ke haka pono mai nei kona mau maka i na manawa a pau.

KA LEPELEPEOHINA.

                Ua ike kakou a pau i keia mea eheu nani e lele ana ma na kula, me he manu la, me kona mau eheu onionio kikokiko i hoholaia, e kaikai ana iaia iluna a kuu iho ilalo ma na wahi a pau ana e manao ai e lele aku. O ka pulelehua a me ka oka'i, ua like no ko lakou ano me ko ka lepelepeohina. Lele aku no lakou ma na pua kowali, a me na pua uala, a me na pua e ae, a hoo aku i ka umiumi iloko o ka pua e omo ai i ka wai momona o na pua, e like me ko ka nalo meli ohi ana i ka meli mai loko mai o na pua o ka nahele. O keia nuku loihi a ka pulelehua a oukou i kapa aku ai he umiumi, he wahi ohe no ia; a komo aku ka ohe iloko o ka momona o ka pua, mukiki iho la kela, a omo aku i ka momona iloko o kona waha, a komo i kona opu.
                Ke manao kuhihewa nei kekahi poe keiki he hoohanau mai kekahi lepelepeohina i kekahi lepelepeohina, e like me ka hahau ana mai o kekahi holoholona no loko o kekahi. He kuhihewa ia manao. Penei ka loaa ana mai o ka lepelepeohina, a me na pulelehua: Hoohaule lakou i na hua makalii maluna o na kumu laau, a ma na pohaku, a ma na lau kekahi; a liuliu kiko mai keia mau hua makalii, a hanau mai he mau peelua, a enuhe liilii, e kolo ana, e ai ana i na lau o na mea kanu, a me ka nahele, a me ka mauu o ke kula. A nui ae ua mau peelua nei, ua loloa— hookahi iniha ka loa o kekahi, a elua iniha a oi ae ka loa o kahi. A oo ke kino o ka peelua, eli iho oia i hale nona iloko o ka lepo, a ilaila ua hooleiia aku kona ili kahiko, a lilo ia i mu.
                O kekahi ano peelua hoi kau lakou ma na lala laau, a hana i wahi kaula e hoopaa ai i ka hope iluna, a hookuu i ke poo ilalo e lewalewa ai, a lilo lakou i mu e kau ana a e lewa ana i ka makani, me he mau kula pepeiao loloa la e kau ana ma na pepeiao o ka wahine puni hanohano. Ulana ka enuhe hana kilika i lole nona a puni kona kino, me he hale la nona e waiho ai kona kino i ka wa e lilo ai oia i mu. O keia wahi hale a ka enuhe kilika i ulana ai nona, oia no ke kilika e hanaia nei i lole kilika, i lole pahoehoe, a i hainaka kilika. Ka moe no keia o ka mu ma ka lepo, a kau paha ma ka lala kahi i kau ai, a hala kekahi mau mahina, alaila ua hoomalule hou ia oia, a puka mai mai loko o ka lepo he pulelehua, a he lepelepeohina paha, e lele aku ana me he manu la.
                Kupaianaha ke ano e ana o keia mea he pulelehua. E waiho ana he wahi hua makalii loa me he poo kuipine la. Aole i ikeia he maka, a he wawae, a he poo, a heaha la. A hanau mai la he peelua e kolo ana, a eu wale ae ma ka lepo, he mea i hoopailuaia. A loaa hou i ke ano mu, aole ona wawae, aole no hoi ona maka e ike mai ai—o ka waiho wale no ma ka lepo e hiamoe ai me ka ai ole i kekahi mea. Pela no ia e moe ai a liuliu iki, hoomaluleia a puka mai oia he mea maka, he wawae, he mau eheu, he mea nani loa, me he manu hulu maikai la.
                E nana iho ma ke kii maluna ae nei. Malaila e ikeia ai he enuhe e lewalewa ana ma kahi kaula kilika makalii ana i hookuukuu iho ai mai kona waha aku. Aia hoi e waiho ana ma ka lepo he mu. E lele aku ana hoi he lepelepeohina me kona mau eheu onionio kikokiko nani. O ka hua makalii a ka lepelepeohina e hoohaule ai, oia ka ha o na ano o keia mea kupanaha a ke Akua i hana ai.
                Ua hoohalikeia no ke kanaka me keia mea a kakou i ike ai maluna. I keia noho kino ana a kakou e noho nei, ua like kakou me ka peelua, e kolo akahele ana ma o a maanei, e pepe pinepine ana i na mea i haule iho mai luna mai, a e haule ana iloko o kela lua keia lua, a luuluu no i na pilikia he nui wale o keia mau kino kaumaha o kakou. Mahope e moe no kakou ma ka lepo, malaila e hiamoe loihi ai me he mu la. I ka la nui hoi mahope, i ke kani ana o ka pu a ke Akua, e puka mai no keia mau kino mu la mai ka lepo mai, a e hoomaluleia a e loaa i ke ano hou, ano okoa loa, e ano like ana me ko na anela. Aole e like ia noho ana me keia noho kino ana.
                "E na punahele, ano la, he poe keiki kakou na ke Akua, aka, o ko kakou ano mahope aku, aole ikea ia; aka, ke ike nei kakou, a i kona wa i ikea mai ai, e like auanei kakou me ia." 1 Ioane 3:2.

KULA POKII.

SABATI I.

1. A ku ka hewa ia Adamu laua o Ewa pehea aku ke Akua?
Kipaku aku oia ia laua mai ka mahinaai maikai aku o Edena.
2. Heaha kana mea i hoonoho aku ai?
Hoonoho aku oia he anela me ka pahi-kaua e kiai i ka puka.
3. O aha?
O hoi hou mai paha auanei laua iloko o ka mahinaai.
4. Pehea kakou i ka ike ana i ko laua pilikia?
Minamina no.
5. Pehea o waho o Edena?
Aole he maikai loa e like me loko.
6. Heaha na mea ulu nui mai mawaho?
O ka nahelehele, na laau o-oi, na pua kala.

SABATI II.

1. Heaha ka hana a Adamu ma ia hope iho?
He mahiai, a eli iho i ka lepo a luhi loa.
2. Aole anei e hua wale mai na laau e like me na laau maloko o Edena?
Aole no; he hua mai i kekahi manawa, a nele no i kekahi manawa.
3. Heaha ka i loaa ia Adamu i kekahi maawa?
He eha, a he hui ma kona kino.
4. Pehea la kona lauoho?
Lilo i poohina, a lilo oia i elemakule.
5. Pehea la o Ewa?
Loaa iaia ka nawaliwali, ka eha, a me ka uwe.
6. Aloha no o Adamu laua o Ewa. Ina ua hoolohe laua i ke Akua, ina la ua aha?
Ina no ua noho pomaikai a hauoli mau.

SABATI III.

1. Heaha kekahi mea i maopopo ia Adamu a me Ewa?
Ua maopopo e make ana laua.
2. Heaha la kekahi mea i haawiia mai ia laua?
He mau keiki liilii.
3. Heaha kekahi mea a laua i ike ai no na keiki?
Ike laua e make ana na keiki a laua.
4. Heaha hou kekahi mea weliweli loa?
Ka lilo ana o ko laua naau i ka hewa a i ka hana ino.
5. Ua ano like aku laua la me wai?
Me Satana.
6. Ua like me Satana ma keaha?
Ma ka makemake i na mea hewa.

SABATI IV.

1. Heaha la ka manao o Satana?
Ua kali aku no ia me ka manao e make laua, a hoi aku na uhane me ia e noho ai i ka po.
2. Heaha la kana mea i ike ai?
Ike oia aole e noho ka poe hewa me ke Akua.
3. Mahea kahi i hoomaopopoia no ka poe hewa a pau?
Ma ka po.
4. Mai komo aku o Adamu ma ihea?
I ka po, me na uhane ino.
5. Nawai i aloha a imi i wahi e pakele ai no laua?
Na ke Akua no.
6. No laua wale no anei ke ola i hoomakaukauia?
Aole; no laua no a me ko laua keiki, a mamo aku.

                I keia mau la iho nei ua hoohaule mai na lani i ko lakou mau kulu waimaka, a ua hoaahuia na kula, na awawa a me na pali me ka mauu, me he lole omaomao la ke nana'ku. Na ke Akua, e na keiki, i hoohaule mai i keia ua i pilikia ole na kanaka e noho nei ma ka honua.

KE ALAULA,
He Nupepa Hoikeike Kii.
Hoopuka mau ia ma Honolulu, i kela malama keia malama e ka PAPA HAWAII, no na Kamalii Hawaii.

                25 keneta ka uku no ka makahiki no ka pepa hookahi; 20 keneta pakahi ka uku no na pepa he iwakalua a oia aku paha ma ke ope hookahi, ME KA HOOKAA MUA IA MAI.
O. H. KULIKA, Luna Hoopuka.